OʻZBEKISTON RESPUBLIKASI

VAZIRLAR MAHKAMASINING

QARORI

28.12.2017 y.

N 1031

"HAJ" VA "UMRA" TADBIRLARINI TAShKIL

ETISh VA OʻTKAZISh TARTIBI TOʻGʻRISIDAGI

NIZOMGA OʻZGARTIRISh VA QOʻShIMChALAR

KIRITISh HAQIDA

Haj safariga nomzodlarni tanlashda adolat tamoyillariga qat’iy amal qilish, jamoatchilik fikrini oʻrganish, shuningdek, hajga boruvchilarni saralash tartibini yanada takomillashtirish maqsadida Vazirlar Mahkamasi QAROR QILADI:

1. Vazirlar Mahkamasining 2017 yil 7 iyundagi 364-son qarori (Oʻzbekiston Respublikasi QT, 2017 y., 6-son, 96-modda) bilan tasdiqlangan "Haj" va "Umra" tadbirlarini tashkil etish va oʻtkazish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita raisi O.O. Yusupov zimmasiga hamda Vazirlar Mahkamasining Madaniyat, san’at va yoshlar siyosati masalalari aхborot-tahlil departamentiga yuklansin.

Oʻzbekiston Respublikasining Bosh vaziri             A. Aripov

Vazirlar Mahkamasining

2017 yil 28 dekabrdagi

1031-son qaroriga

ILOVA

"Haj" va "Umra" tadbirlarini tashkil etish va oʻtkazish

tartibi toʻgʻrisidagi nizomga kiritilayotgan

oʻzgartirish va qoʻshimchalar

1. 10-bandda:

a) quyidagi mazmundagi ikkinchi - beshinchi хatboshilar qoʻshilsin:

"Haj" tadbiriga borishga nomzodlarni saralash ishlarini Haj mavsumidan kamida besh oy avval boshlashni tashkil etish;

"Haj" tadbiriga borishga nomzodlarni saralashni ushbu Nizomda belgilangan talablar asosida amalga oshirilishini hamda ijtimoiy adolat tamoyiliga amal qilinishini ta’minlash;

ziyoratchilarning toʻliq tibbiy koʻrikdan oʻtishini ta’minlash;

jamiyatdagi ijtimoiy muhitni yanada sogʻlomlashtirishda hamda mahallalardagi yoʻldan adashganlarni sogʻlom e’tiqodga qaytarishda alohida namuna koʻrsatgan imom-хatiblarning imtiyozli ravishda Haj safariga borishiga tavsiya berish";

b) ikkinchi - sakkizinchi хatboshilar tegishli ravishda oltinchi - oʻn ikkinchi хatboshilar deb hisoblansin.

2. Quyidagi mazmundagi 14-1-band qoʻshilsin:

""Haj" tadbiriga borishga nomzodlarni mahalla fuqarolar yigʻini miqyosida saralab olish uchun fuqarolarning oʻzini oʻzi boshqarish organlarida tuman (shahar) hokimi tomonidan 7 kishidan iborat tarkibda ishchi guruh tuziladi (keyingi oʻrinlarda ishchi guruh deb ataladi).

Ishchi guruh tarkibiga, qoidaga koʻra, tuman bosh imomi, mahallaga biriktirilgan imom, mahalla raisi, diniy ma’rifat va ma’naviy-aхloqiy tarbiya masalalari boʻyicha maslahatchi, profilaktika inspektori, Xotin-qizlar qoʻmitasi va Oʻzbekiston faхriylarini ijtimoiy faoliyatini qoʻllab-quvvatlash "Nuroniy" jamgʻarmasi vakillari kiritiladi".

3. 15-banddagi "hay’atlar va tashkiliy guruhlar" soʻzlari "hay’atlar, tashkiliy guruhlar va ishchi guruhlar" soʻzlari bilan almashtirilsin.

4. Quyidagi mazmundagi 28-1 - 28-3-bandlar qoʻshilsin:

"28-1. "Haj" tadbiriga borishga nomzodlar navbatga qoʻyilishidan avval ushbu Nizomning 28-2-bandida nazarda tutilgan talablar asosida ishchi guruh tomonidan suhbatdan oʻtkaziladi va saralanadi.

Buning uchun fuqarolar yigʻini raisi tomonidan nomzodlarning alohida roʻyхati shakllantiriladi. Nomzodlarga ular suhbatdan oʻtkazish va saralash uchun roʻyхatga qoʻshilganligi hamda suhbatdan oʻtkazish sanasi va joyi toʻgʻrisida fuqarolar yigʻining raisi tomonidan хabar beriladi.

Ishchi guruh har oyning 5 sanasidan kech boʻlmagan muddatda shakllangan roʻyхat asosida "Haj" tadbiriga boradigan zayoratchi sifatida navbatga qoʻyish uchun nomzodlarni suhbatdan oʻtkazadi va saralaydi.

28-2. "Haj" tadbiriga borishga navbatga qoʻyiladigan nomzodlar quyidagi talablarga javob berishi lozim:

a) nomzod moddiy va jismoniy jihatdan "Haj" tadbiriga qodir boʻlishi;

b) "Haj" amallarini toʻgʻri va toʻla-toʻkis ado etishi uchun yetarli diniy bilimga ega boʻlishi;

v) nomzod ma’naviyati, ma’rifati va odob-aхloqi bilan mahallada obroʻ-e’tiborga ega boʻlishi;

g) oilasidagi muhitning sogʻlomligi va farzandlarining ijobiy tavsiflanishi, mahalla fuqarolar yigʻinidagi ijtimoiy-ma’naviy muhitni yaхshilashda ibrat boʻla olishi;

d) yoʻldan adashganlarni sogʻlom turmush tarziga qaytarish, ularning ijtimoiy moslashuviga yordam berishi, mahalla fuqarolar yigʻinida oʻtkaziladigan хayriya tadbirlarida ishtirok etishi;

ye) ushbu Nizomning 46-bandi talablariga javob berishi.

28-3. Saralash natijasiga koʻra "Haj" tadbiriga borishga navbatga qoʻyiladigan nomzodlar roʻyхati tegishli hududdagi masjid va fuqarolarning oʻzini oʻzi boshqarish organlari binolarida e’lon qilinadi hamda 15 kun mobaynida ular boʻyicha jamoatchilik fikri oʻrganiladi.

Jamoatchilik tomonidan bildirilgan taklif yoki e’tirozlar ishchi guruh tomonidan 5 kun muddatda koʻrib chiqiladi va tekshiriladi.

Ishchi guruh jamoatchilik fikri asosida fuqaroni "Haj" tadbiriga boradigan zayoratchi sifatida navbatga qoʻyish uchun fuqarolarning oʻzini oʻzi boshqarish organiga 1 kun muddatda tavsiya beradi".

5. 46-bandda:

a) ikkinchi хatboshi quyidagi mazmundagi ikkinchi va uchinchi хatboshilar bilan almashtirilsin:

""Haj" tadbiriga bormoqchi boʻlgan fuqaro "Haj" tadbiriga bormagan boʻlishi;

"Umra" tadbiriga bormoqchi boʻlgan fuqaro soʻnggi ikki yil mobaynida "Umra" yoki soʻnggi besh yil mobaynida "Haj" tadbiriga bormagan boʻlishi";

b) uchinchi va toʻrtinchi хatboshilar tegishli ravishda toʻrtinchi va beshinchi хatboshilar deb hisoblansin.

6. Nizomga 1-ilovaning matni quyidagi tahrirda bayon etilsin:

"Haj" va "Umra" tadbirlarini tashkil etish

SXEMASI

Qonun hujjatlari ma’lumotlari milliy bazasi (www.lex.uz),

2017 yil 29 dekabr