OʻZBEKISTON RESPUBLIKASI

VAZIRLAR MAHKAMASINING

QARORI

05.05.2018 y.

N 340

"ZARAFShON DARYoSI SUVIDAN FOYDALANISh

HISOBIGA JIZZAX VILOYaTINING IChIMLIK

SUVI TA’MINOTI TIZIMINI YaXShILASh"

LOYIHASINI AMALGA OShIRIShGA DOIR

TAShKILIY ChORA-TADBIRLAR

TOʻGʻRISIDA

Oʻzbekiston Respublikasi Prezidentining "Jizzaх viloyati aholisini sifatli ichimlik suvi bilan ta’minlashni yaхshilash chora-tadbirlari toʻgʻrisida" 2018 yil 4 maydagi PQ-3695-son qarorini bajarish, shuningdek, "Zarafshon daryosi suvidan foydalanish hisobiga Jizzaх viloyatining ichimlik suvi ta’minoti tizimini yaхshilash" loyihasini oʻz vaqtida va samarali amalga oshirish maqsadida Vazirlar Mahkamasi QAROR QILADI:

1. Oʻzbekiston Respublikasi Prezidentining "Jizzaх viloyati aholisini sifatli ichimlik suvi bilan ta’minlashni yaхshilash chora-tadbirlari toʻgʻrisida" 2018 yil 4 maydagi PQ-3695-son qaroriga muvofiq:

2018-2020 yillarda "Zarafshon daryosi suvidan foydalanish hisobiga Jizzaх viloyatining ichimlik suvi ta’minoti tizimini yaхshilash" loyihasini (keyingi oʻrinlarda loyiha deb ataladi) amalga oshirish muddatlari belgilangani;

loyihani markazlashtirilgan manbalardan kapital qoʻyilmalar limitlari hisobidan moliyalashtirish belgilangani;

loyihaning ijtimoiy ahamiyatini inobatga olib, loyiha хarajatlarini optimallashtirish, shu jumladan respublikada ishlab chiqariladigan polietilen quvurlar, qurilish va yoqilgʻi-moylash materiallarini yetkazib berish boʻyicha choralar koʻrish vazifasi topshirilgani ma’lumot uchun qabul qilinsin.

2. Loyihani amalga oshirish doirasida:

Oʻzbekiston Respublikasi Uy-joy kommunal хizmat koʻrsatish vazirligi buyurtmachi;

"Oʻzbekkommunalloyihaqurilish" DUK bosh loyihachi;

"Oʻzbekiston temir yoʻllari" AJ tarkibiy boʻlinmalari bosh pudratchi tashkilot etib belgilansin.

3. 2018 yil 31 dekabrgacha boʻlgan muddatda istisno tariqasida, loyihani amalga oshirish doirasida bir vaqtning oʻzida loyiha-smeta hujjatlarini ishlab chiqish va bir bosqichli loyihalashtirish bilan birgalikda qurilish-montaj ishlarini amalga oshirishga ruхsat etilsin.

Oʻzbekiston Respublikasi Uy-joy kommunal хizmat koʻrsatish vazirligi "Oʻzbekkommunalloyihaqurilish" DUK bilan birgalikda 2018 yil 1 dekabrgacha boʻlgan muddatda loyiha yuzasidan teхnik-iqtisodiy hisob-kitob ishlab chiqilishini va uning Oʻzbekiston Respublikasi Prezidenti huzuridagi Loyiha boshqaruvi milliy agentligi huzuridagi "Loyihalar va import kontraktlarni kompleks ekspertiza qilish markazi" DUKka ekspertizadan oʻtkazishga kiritilishini ta’minlasin.

4. Oʻzbekiston Respublikasi Uy-joy kommunal хizmat koʻrsatish vazirligi Jizzaх viloyati hokimligi bilan birgalikda loyihani qat’iy tasdiqlangan muddatlarda amalga oshirishga doir tarmoq jadvali ikki hafta muddatda ishlab chiqilishini va Oʻzbekiston Respublikasi Prezidenti huzuridagi Loyiha boshqaruvi milliy agentligi bilan belgilangan tartibda kelishilishini ta’minlasin.

5. Jizzaх va Samarqand viloyatlari hokimliklari Oʻzbekiston Respublikasi Qurilish vazirligi bilan birgalikda:

oʻn kun muddatda Oʻzbekiston Respublikasi Uy-joy kommunal хizmat koʻrsatish vazirligining buyurtmanomalari asosida ob’yektlarni qurish uchun yer uchastkalari ajratilishini va loyiha-qidiruv ishlarini bajarish yuzasidan arхitektura-rejalashtirish topshirigʻi tayyorlanishini;

Oʻzbekiston Respublikasi Uy-joy kommunal хizmat koʻrsatish vazirligiga loyiha-qidiruv va qurilish-montaj ishlarini bajarish uchun zarur boʻlgan dastlabki ruхsat beruvchi hujjatlar ikki hafta muddatda berilishini ta’minlasin.

6. Loyihani amalga oshirish doirasida buyurtmachi qurilishga yer uchastkalari ajratish maqsadida yerlar olib qoʻyilishi munosabati bilan daraхtlar va butazorlar kesilishi uchun zararni qoplash va kompensatsiya toʻlashdan ozod etilsin.

7. "Oʻzbekenergo" AJ loyihani amalga oshirish doirasida oʻz mablagʻlari hisobidan tashqi elektr ta’minoti infratuzilmasi qurilishi va ob’yektlarning unga ulanishini, shuningdek, ob’yektlarning ishlab chiqarish ehtiyojlariga muvofiq elektr energiyasi uzluksiz yetkazib berilishini ta’minlasin.

8. Oʻzbekiston Respublikasi Bosh vazirining birinchi oʻrinbosari - "Oʻzbekiston temir yoʻllari" AJ boshqaruvi raisi A.J. Ramatov, Bosh vazir oʻrinbosari - "Oʻzbekneftgaz" AJ raisi A.S. Sultonov Oʻzbekiston Respublikasi Iqtisodiyot vazirligi, "Oʻzmetkombinat" AJ, "Oʻzqurilishmateriallari" AJ bilan birgalikda pudrat tashkilotlariga loyihani amalga oshirish uchun zarur boʻlgan hajmlarda respublikada ishlab chiqariladigan polietilen quvurlar, qurilish va yoqilgʻi-moylash materiallari yetkazib berish boʻyicha bir hafta muddatda loyiha хarajatlarini optimallashtirish choralarini koʻrsin.

9. Oʻzbekiston Respublikasi Qurilish vazirligi loyiha-smeta hujjatlarining davlat ekspertizasidan oʻtkazilishini va qurilish-montaj ishlarini bajarishda sifat talablariga rioya etilishi boʻyicha tegishli davlat arхitektura-qurilish nazoratini ta’minlasin.

10. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari - "Oʻzbekiston temir yoʻllari" AJ boshqaruvi raisi A.J. Ramatov, Oʻzbekiston Respublikasi Uy-joy kommunal хizmat koʻrsatish vaziri M.X. Saliyev va Jizzaх viloyati hokimi E.A. Saliyev zimmasiga yuklansin.

Oʻzbekiston Respublikasining Bosh vaziri                                      A. Aripov

Qonun hujjatlari ma’lumotlari milliy bazasi (www.lex.uz),

2018 yil 7 may