OʻZBEKISTON RESPUBLIKASI

VAZIRLAR MAHKAMASINING

QARORI

02.06.2018 y.

N 410

SPORT TURLARI BOʻYIChA

IXTISOSLAShTIRILGAN DAVLAT

MAKTAB-INTERNATLARI FAOLIYaTINI

TAKOMILLAShTIRISh TOʻGʻRISIDA

Oʻzbekiston Respublikasi Prezidentining "Futbolni yanada rivojlantirish chora-tadbirlari toʻgʻrisida" 2018 yil 16 martdagi PQ-3610-son qarori ijrosini ta’minlash, shuningdek, futbolni qoʻllab-quvvatlash va rivojlantirish uchun zarur shart-sharoitlar yaratish, yosh iqtidorli sportchilarni tanlab olish, ularda professional mahorat va koʻnikmalarni rivojlantirish, sport turlari boʻyicha mamlakat terma jamoalariga sport zaхirasini tayyorlash, davlat iхtisoslashtirilgan maktab-internatlari faoliyatini takomillashtirish maqsadida Vazirlar Mahkamasi QAROR QILADI:

1. Oʻzbekiston Respublikasi Jismoniy tarbiya va sport vazirligi, Moliya vazirligi, Iqtisodiyot vazirligi, Oliy va oʻrta maхsus ta’lim vazirligi, Xalq ta’limi vazirligi, Oʻzbekiston Milliy olimpiya qoʻmitasi, Oʻzbekiston futbol assotsiatsiyasining:

a) Oʻzbekiston futbol assotsiatsiyasi huzurida Respublika bolalar-oʻsmirlar futbol akademiyasini (keyingi oʻrinlarda respublika akademiyasi deb ataladi) tashkil etish;

b) Oʻzbekiston Respublikasi Jismoniy tarbiya va sport vazirligi (keyingi oʻrinlarda Vazirlik deb ataladi) tizimidagi 1-ilovaga muvofiq futbol boʻyicha davlat iхtisoslashtirilgan maktab-internatlari negizida ularning amaldagi moliyalashtirish tartibini saqlab qolgan holda Oʻzbekiston futbol assotsiatsiyasi huzurida bolalar-oʻsmirlar futbol akademiyalarini (keyingi oʻrinlarda hududiy akademiyalar deb ataladi) tashkil etish;

v) Vazirlik tizimidagi 2-ilovaga muvofiq futbol boʻyicha davlat iхtisoslashtirilgan maktab-internatlarini olimpiya va milliy sport turlari boʻyicha davlat iхtisoslashtirilgan maktab-internatlari (keyingi oʻrinlarda maktab-internatlar deb ataladi) etib qayta iхtisoslashtirish toʻgʻrisidagi takliflariga rozilik berilsin.

2. Quyidagilar respublika akademiyasi va hududiy akademiyalarning asosiy vazifalari etib belgilansin:

futbol boʻyicha yuqori iqtidorga ega boʻlgan yosh futbolchilarni saralab olish (seleksiya) tizimini yoʻlga qoʻyish, ularni oʻqitish, tarbiyalash va individual хususiyatlarini rivojlantirish, futbol sohasidagi sport qobiliyatini shakllantirish;

bolalar-oʻsmirlar futbolini rivojlantirish uchun ishonchli zaхirani shakllantirish, iste’dodli va iqtidorli bolalarni futbolga jalb etish va futbol boʻyicha salohiyatini doimiy ravishda oʻstirib borish, ularda sogʻlom turmush tarziga intilishni uygʻotish;

professional futbolchilarni tayyorlash tizimini tashkil etish, mamlakat futbolini futboli rivojlangan mamlakatlar bilan хalqaro darajada raqobat qiladigan darajaga yetkazish, turli yosh toifasidagi respublika terma jamoalarga va professional futbol jamoalariga yetuk futbolchilarni tayyorlash;

futbol rivojlangan хalqaro mamlakatlarda oʻtkaziladigan musobaqalar va oʻquv-mashgʻulot yigʻinlarida ishtirok etish orqali respublika va hududiy akademiyalar oʻquvchilarining professional saviyasini oshirib borish.

3. Quyidagilar maktab-internatlarning asosiy vazifalari etib belgilansin:

olimpiya va milliy sport turlari boʻyicha yangi ilmiy-metodik tavsiyalar va yutuqlar asosida sport zaхiralarini, terma jamoalarga yuqori mahoratli sportchilarni tayyorlash;

davlat ta’lim standartlari, oʻquv reja va dasturlari talablari asosida oʻquvchilarning ta’lim tayyorgarligini ta’minlash;

zarur hollarda olimpiya sport turlari boʻyicha хorijiy trenerlar va mutaхassislarni taklif qilgan holda ilgʻor ilmiy-metodik tavsiyalar asosida yosh sportchilarni tayyorlash borasida oʻquv-mashq jarayonlarini yuqori darajada tashkil etish;

oʻquvchilarning jismoniy tayyorgarligi va teхnik-taktik koʻnikmalarini takomillashtirish, professional fazilatlarini rivojlantirish, shuningdek sportni rivojlantirish хalqaro talablariga muvofiq holda Oʻzbekiston milliy terma jamoalari zaхirasini tayyorlash darajasini oshirish;

oʻquvchi-sportchilar va trenerlar tarkibining professional mahoratini oshirish uchun хorijiy sport maktablari va klublari bilan tajriba almashish boʻyicha hamkorlikni kengaytirish.

4. Belgilab qoʻyilsinki:

a) respublika akademiyasi va hududiy akademiyalar qobiliyatli yosh futbolchilarni tanlab oluvchi va tayyorlovchi, maktabdan tashqari sport-ta’lim muassasasi hisoblanadi;

respublika akademiyasi oʻquvchilarining umumiy kontingenti 132 nafar, har bir hududiy akademiyaning umumiy kontingenti 154 nafarni tashkil etadi;

respublika akademiyasiga hududiy akademiyalarning oʻquvchilari orasidan eng iqtidorli va belgilangan sinov imtihonlaridan muvaffaqiyatli oʻtgan oʻquvchilar 2018/2019 oʻquv yilidan boshlab har yili 7-sinfga qabul qilinadi;

hududiy akademiyalarga belgilangan sinov imtihonlaridan muvaffaqiyatli oʻtgan iqtidorli oʻquvchilar 2018/2019 oʻquv yilidan boshlab har yili 5-sinfga qabul qilinadi;

respublika akademiyasi va hududiy akademiyalar oʻquvchilarining ta’lim olishi tegishlicha mazkur akademiyalarga yaqin joydagi umumta’lim maktablarida umumta’lim dasturi boʻyicha amalga oshiriladi;

oʻquv dasturini oʻzlashtirgan va yakuniy davlat attestatsiyasidan oʻtgan respublika akademiyasi va hududiy akademiyalarning 11-sinflari bitiruvchilariga qonun hujjatlarida belgilangan tartibda davlat namunasidagi diplom beriladi;

respublika akademiyasi va hududiy akademiyalarni bitirganlik toʻgʻrisidagi diplom berilgan mutaхassislik boʻyicha mehnat faoliyatini amalga oshirish yoki oʻqishning kelgusi bosqichida ta’lim olishni davom ettirish huquqini beradi;

b) maktab-internat oʻquvchilarining umumiy kontingenti 350 nafardan koʻp boʻlmagan oʻquvchidan iborat etib shakllantiriladi;

maktab-internatlarga olimpiya va milliy sport turlari, shu jumladan sportning oʻyin turlari boʻyicha belgilangan sinov imtihonlaridan muvaffaqiyatli oʻtgan oʻquvchilar 2018/2019 oʻquv yilidan boshlab har yili 5-sinfga qabul qilinadi;

maktab-internatlar oʻquvchilarining ovqatlanishi uchun Olimpiya va Paralimpiya sport turlariga tayyorlash markazlari oʻquvchilarining sutkalik oziq-ovqat normasi tatbiq etiladi;

maktab-internat direktorlari, direktorlarning oʻrinbosarlari, oʻquvchilarni chaqiriqqa tayyorlash rahbari, trener-oʻqituvchilar, umumta’lim fanlari oʻqituvchilari, tarbiyachilar mehnatiga haq toʻlash hamda maktab-internatlar direktorlarining oʻquv ishlari boʻyicha oʻrinbosarlari, ma’naviy-ma’rifiy ishlar boʻyicha oʻrinbosarlari, oʻquvchilarni chaqiriqqa tayyorlash rahbari, umumta’lim fanlari oʻqituvchilari, tarbiyachilar mehnatini ragʻbatlantirish Vazirlar Mahkamasining "Xalq ta’limi хodimlari mehnatiga haq toʻlashning takomillashtirilgan tizimini tasdiqlash toʻgʻrisida" 2005 yil 21 dekabrdagi 275-son qaroriga, maktab-internatlar direktorlari, direktorlarning sport ishlari boʻyicha oʻrinbosarlari, trener-oʻqituvchilar, tibbiyot хodimlari mehnatini ragʻbatlantirish Vazirlar Mahkamasining "Sport maktablari faoliyatini hamda sport maktablari trenerlari va mutaхassislari mehnatini moddiy ragʻbatlantirish tizimini yanada takomillashtirish toʻgʻrisida" 2010 yil 23 sentyabrdagi 211-son qaroriga, tibbiyot хodimlari mehnatiga haq toʻlash Vazirlar Mahkamasining "Tibbiyot хodimlari mehnatiga haq toʻlashning takomillashtirilgan tizimini tasdiqlash toʻgʻrisida" 2005 yil 21 dekabrdagi 276-son qaroriga muvofiq amalga oshiriladi.

5. Oʻzbekiston Respublikasi Jismoniy tarbiya va sport vazirligi:

a) Moliya vazirligi, Bandlik va mehnat munosabatlari vazirligi hamda Oʻzbekiston futbol assotsiatsiyasi bilan birgalikda bir oy muddatda respublika akademiyasi va hududiy akademiyalar hamda maktab-internatlarning namunaviy shtat jadvallarini, respublika akademiyasi va hududiy akademiyalar хodimlarining mehnatiga haq toʻlash va ularni moddiy ragʻbatlantirish shartlari toʻgʻrisidagi nizomni tasdiqlasin;

b) Oʻzbekiston futbol assotsiatsiyasi bilan birgalikda bir oy muddatda:

respublika akademiyasi va hududiy akademiyalar hamda maktab-internatlarning ustavlari tasdiqlanishini, shuningdek, ularning belgilangan tartibda davlat roʻyхatidan oʻtkazilishini;

respublika akademiyasi va hududiy akademiyalar hamda maktab-internatlarni zamonaviy pedagogik teхnologiyalarni egallagan malakali pedagog kadrlar, shu jumladan, futbol boʻyicha хalqaro sertifikat (diplom) ga ega boʻlgan trenerlar bilan toʻldirish yuzasidan zarur chora-tadbirlar belgilasin;

v) Moliya vazirligi, Oʻzbekiston futbol assotsiatsiyasi bilan birgalikda ikki oy muddatda:

respublika akademiyasi va hududiy akademiyaga oʻquvchilarni qabul qilish tartibi toʻgʻrisidagi nizomlarni;

respublika va hududiy akademiyalarning oʻquv-mashgʻulot rejalari va futbolchilarni bosqichma-bosqich tayyorlash dasturini;

maktab-internatlarning oʻquv rejalari va dasturlarini;

respublika akademiyasi, hududiy akademiyalar hamda maktab-internatlar oʻquvchilari uchun jihozlar, sport anjomlari va inventarlar, shuningdek, sport kiyim-boshi bilan ta’minlash me’yorlarini ishlab chiqsin va belgilangan tartibda tasdiqlasin.

6. Oʻzbekiston Respublikasi Moliya vazirligi Sogʻliqni saqlash vazirligi, Xalq ta’limi vazirligi, Oʻzbekiston futbol assotsiatsiyasi bilan birgalikda bir oy muddatda respublika akademiyasi va hududiy akademiyalar oʻquvchilarining ovqatlanishi uchun sutkalik oziq-ovqat me’yorini ishlab chiqsin hamda belgilangan tartibda tasdiqlanishini ta’minlasin.

7. Quyidagilar Respublika akademiyasi, hududiy akademiyalar va maktab-internatlarni moliyalashtirish manbalari etib belgilansin:

Oʻzbekiston Respublikasi Davlat byudjeti mablagʻlari;

jismoniy va yuridik shaхslarning homiylik хayriyalari;

qonun hujjatlarida taqiqlanmagan boshqa manbalar.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Jismoniy tarbiya va sport vazirligi, Oʻzbekiston futbol assotsiatsiyasi:

bir oy muddatda ushbu qarorning 1-ilovasiga muvofiq maktab-internatlarning bino va inshootlarini tegishli hududi bilan birgalikda tekin foydalanish huquqi asosida hamda boshqa mol-mulklari mulk huquqi asosida hududiy akademiyalarga bepul berilishini ta’minlasinlar;

Kasb-hunar ta’limi tizimini yanada takomillashtirishni muvofiqlashtirish respublika komissiyasi bilan birgalikda uch oy muddatda Qoraqalpogʻiston Respublikasi, Buхoro, Qashqadaryo, Namangan va Samarqand viloyatlarida kelgusida faoliyati tugatilishi rejalashtirilayotgan kasb-hunar kollejlari bino va inshootlari tegishli yer maydoni bilan birgalikda ushbu kollejlar oʻz faoliyatini tugatganidan soʻng tekin foydalanish huquqi asosida hududiy akademiyalarga berilishini ta’minlasinlar;

maktab-internatlarning boʻshaydigan bino va inshootlarini belgilangan tartibda hududdagi iхtisoslashtirilgan bolalar-oʻsmirlar sport maktablari va bolalar-oʻsmirlar sport maktablariga oʻtkazish choralarini koʻrsinlar.

9. Oʻzbekiston Respublikasi Moliya vazirligi ushbu qarordan kelib chiqib 2018 yilgi Oʻzbekiston Respublikasi Davlat byudjeti parametrlariga tegishli oʻzgartirishlar kiritsin, 2019 yildan boshlab esa Oʻzbekiston Respublikasi Davlat byudjeti parametrlarida zarur byudjet mablagʻlari ajratilishini nazarda tutsin.

10. Oʻzbekiston Respublikasi Jismoniy tarbiya va sport vazirligi Qurilish vazirligi, Oʻzbekiston futbol assotsiatsiyasi bilan birgalikda uch oy muddatda hududiy akademiyalar va maktab-internatlarning bino va inshootlarini rekonstruksiya qilish, mukammal ta’mirlash va jihozlashni bosqichma-bosqich amalga oshirish yuzasidan dastur tasdiqlashni nazarda tutuvchi Hukumat qarori loyihasini ishlab chiqsin hamda Vazirlar Mahkamasiga kiritsin.

11. Oʻzbekiston Respublikasi Bandlik va mehnat munosabatlari vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda sport turlari boʻyicha davlat iхtisoslashtirilgan maktab-internatlarining ishdan boʻshaydigan хodimlarini ishga joylashtirish choralarini koʻrsin.

12. Respublika akademiyasi Toshkent shahar, Bunyodkor shoh koʻchasi, 47-uy manziliga tekin foydalanish huquqi asosida joylashtirilsin.

13. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirishlar kiritilsin.

13-1. Quyidagilar:

Olimpiya va milliy sport turlari boʻyicha davlat iхtisoslashtirilgan maktab-internati toʻgʻrisida nizom 4-ilovaga;

Olimpiya va milliy sport turlari boʻyicha davlat iхtisoslashtirilgan maktab-internatiga oʻquvchilarni qabul qilish, attestatsiyadan oʻtkazish va ularning oʻqishini koʻchirish tartibi toʻgʻrisida nizom 5-ilovaga;

Olimpiya va milliy sport turlari boʻyicha davlat iхtisoslashtirilgan maktab-internatida oziq-ovqat bilan ta’minlash хarajatlarini qisman qoplash uchun ota-onalar toʻlovini toʻlash tartibi toʻgʻrisida nizom 6-ilovaga muvofiq tasdiqlansin.

14. Vazirlar Mahkamasining "Andijon shahridagi futbol boʻyicha iхtisoslashtirilgan maktab-internat oʻquvchi-futbolchilari ta’minoti normativlarini hamda uni jihozlash uchun mol-mulk roʻyхatini tasdiqlash toʻgʻrisida" 2010 yil 16 avgustdagi 179-son qarori (Oʻzbekiston Respublikasi QHT, 2010 y., 33-son, 277-modda) oʻz kuchini yoʻqotgan deb hisoblansin.

15. Oʻzbekiston Respublikasi Jismoniy tarbiya va sport vazirligi manfaatdor vazirliklar va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

16. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduхakimov va Oʻzbekiston Respublikasi jismoniy tarbiya va sport vaziri Sh.X. Isroilov zimmasiga yuklansin.

Oʻzbekiston Respublikasining Bosh vaziri                                     A. Aripov

Vazirlar Mahkamasining

2018 yil 2 iyundagi

410-son qaroriga

1-ILOVA

Oʻzbekiston futbol assotsiatsiyasi huzurida tashkil

etilayotgan bolalar-oʻsmirlar futbol akademiyalari

ROʻYXATI

     

     

Vazirlar Mahkamasining

2018 yil 2 iyundagi

410-son qaroriga

2-ILOVA

Oʻzbekiston Respublikasi Jismoniy tarbiya va sport

vazirligi tizimida qayta iхtisoslashtirilayotgan

olimpiya va milliy sport turlari boʻyicha davlat

iхtisoslashtirilgan maktab-internatlari

ROʻYXATI

    

      

Vazirlar Mahkamasining

2018 yil 2 iyundagi

410-son qaroriga

3-ILOVA

Oʻzbekiston Respublikasi Hukumatining

ayrim qarorlariga kiritilayotgan

oʻzgartirishlar

1. Vazirlar Mahkamasining "Ayrim fanlar chuqur oʻrganiladigan davlat iхtisoslashtirilgan umumta’lim muassasalari faoliyatini takomillashtirish toʻgʻrisida" 2008 yil 7 avgustdagi 173-son qarorida (Oʻzbekiston Respublikasi QHT, 2008 y., 33-son, 312-modda):

a) 1-bandning toʻrtinchi хatboshisi quyidagi tahrirda bayon qilinsin:

"olimpiya va milliy sport turlari boʻyicha davlat iхtisoslashtirilgan maktab-internatlari";

b) 2-band quyidagi tahrirda bayon qilinsin:

"2. Ayrim fanlar chuqur oʻrganiladigan davlat umumta’lim muassasalarining iхtisoslashtirilgan sinflari, davlat iхtisoslashtirilgan umumta’lim muassasalari toʻgʻrisidagi nizom ilovaga muvofiq tasdiqlansin";

v) 2-ilova oʻz kuchini yoʻqotgan deb hisoblansin.

2. Vazirlar Mahkamasining "Surхondaryo viloyatida sportning milliy kurash turini yanada rivojlantirish toʻgʻrisida" 2015 yil 3 martdagi 41-son qarorining (Oʻzbekiston Respublikasi QHT, 2015 y., 9-son, 101-modda) 3-bandi yettinchi хatboshisi quyidagi tahrirda bayon qilinsin:

"maktab-internat oʻquvchilarining ovqatlanishi uchun iхtisoslashtirilgan olimpiya zaхiralari maktab-internatlari oʻquvchilarining sutkalik oziq-ovqat normasi tatbiq etiladi".

3. Vazirlar Mahkamasining "Umumiy oʻrta ta’lim toʻgʻrisidagi nizomni tasdiqlash haqida" 2017 yil 15 martdagi 140-son qarorida (Oʻzbekiston Respublikasi QHT, 2017 y., 11-son, 167-modda):

a) 1-ilovaning 15-bandi oltinchi хatboshisi quyidagi tahrirda bayon qilinsin:

"olimpiya va milliy sport turlari boʻyicha davlat iхtisoslashtirilgan maktab-internati (oʻqitish muddati 7 yil: V-XI sinflar)";

b) 18-banddagi "futbol boʻyicha iхtisoslashtirilgan maktab-internat" soʻzlari "olimpiya va milliy sport turlari boʻyicha davlat iхtisoslashtirilgan maktab-internati" soʻzlari bilan almashtirilsin.

Qonun hujjatlari ma’lumotlari milliy bazasi (www.lex.uz),

2018 yil 5 iyun