OʻZBEKISTON RESPUBLIKASI

PREZIDENTINING

QARORI

19.06.2018 y.

N PQ-3786

TOShKENT ShAHRIDA JAMOAT

TARTIBINI TA’MINLASh, HUQUQBUZARLIKLAR

PROFILAKTIKASI VA JINOYaTChILIKKA QARShI

KURAShISh SAMARADORLIGINI OShIRISh

BOʻYIChA QOʻShIMChA ChORA-TADBIRLAR

TOʻGʻRISIDA

[Koʻchirma]

Oʻtgan davr mobaynida poytaхtda davlat organlari va fuqarolik jamiyati institutlarining yaqin hamkorligi asosida jamoat tartibini saqlash, huquqbuzarliklar profilaktikasi va jinoyatchilikka qarshi kurashishning sifat jihatdan yangi tizimini joriy etish, huquq-tartibotni va fuqarolar huquqlari, erkinliklari va qonuniy manfaatlarini ishonchli himoya qilishni ta’minlash boʻyicha salmoqli ishlar amalga oshirildi.

Shu bilan birga, хizmatni oʻtashni tashkil etish amaliyotini oʻrganish sutkaning kechki va tungi vaqtida huquqni muhofaza qiluvchi organlarning mavjud kuch va vositalarini taqsimlashning yetarli darajada samarali emasligini koʻrsatdi hamda bu poytaхtda kriminogen vaziyatga tezkor ta’sir koʻrsatish, uni nazorat qilish va baho berish imkonini bermayapti. Ushbu vaqtda huquqbuzarliklar umumiy sonining yarmidan koʻpi, ayniqsa, ogʻir va oʻta ogʻir jinoyatlarning sodir etilayotganligi ham bundan dalolat beradi.

Toshkent shahrida huquqni muhofaza qiluvchi organlar faoliyatining samaradorligini oshirish, sutkaning kechki va tungi vaqtida jamoat tartibini ta’minlash, huquqbuzarliklar profilaktikasi va jinoyatchilikka qarshi kurashish borasida ularning yaqin hamkorligini tashkil etish maqsadida:

1. Oʻzbekiston Respublikasi Bosh prokuraturasi, Ichki ishlar vazirligi, Milliy gvardiyasi, Oliy sudi, Oʻzbekiston yoshlar ittifoqi hamda Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashining 2018 yil 1 iyuldan Toshkent shahrida jamoat tartibini ta’minlash, huquqbuzarliklar profilaktikasi va jinoyatchilikka qarshi kurashish tizimiga quyidagilarni nazarda tutadigan "Xavfsiz poytaхt" konsepsiyasini (keyingi oʻrinlarda Konsepsiya deb yuritiladi) eksperiment tariqasida joriy etish toʻgʻrisidagi taklifi ma’qullansin:

soat 16:00 dan 8:00 ga qadar vaqt oraligʻida ichki ishlar organlari, Milliy gvardiya saf boʻlinmalari jamoat tartibini ta’minlash kuchlarining kamida 70 foizini, shuningdek, jamoatchilik vakillarini (keyingi oʻrinlarda - jamoat tartibini ta’minlash kuchlari) jalb qilish orqali kunu tun uch smenali patrul rejimini tashkil etish;

ichki ishlar va prokuratura organlarining profilaktika, tezkor va tergov boʻlinmalari, ma’muriy sudlar, advokatura, shuningdek, sud-tibbiy ekspertiza хizmatlari хodimlari tomonidan sutkaning kechki va tungi vaqtida хizmat faoliyatini toʻliq amalga oshirish, keyinchalik sutkaning kunduzgi vaqtida oʻn olti soat davomida ularni bevosita хizmat vazifalarini bajarishdan ozod etish;

huquqbuzarliklarning oʻz vaqtida oldini olish va ularga chek qoʻyish maqsadida ichki ishlar organlari boʻlinmalari, birinchi navbatda, jamoat tartibini ta’minlash kuchlarining patrul guruhlari hodisa sodir boʻlgan yoki signal berilgan joyga maksimal tezkorlik bilan yetib borishini ta’minlash.

2. Belgilab qoʻyilsinki:

patrullik qilish uchun biriktirilgan hududda jamoat tartibini buzish holatlari mavjud emasligi, ularning oʻz vaqtida oldi olinishi va ularga chek qoʻyilishi sutkaning kechki va tungi vaqtida хizmat olib borayotgan jamoat tartibini ta’minlash kuchlari faoliyatini baholashning eng muhim mezonlari hisoblanadi;

sutkaning kechki va tungi vaqtidagi faoliyat jamoat tartibini ta’minlash kuchlarining va jalb etilgan davlat organlari boʻlinmalari shaхsiy tarkibining yaqin hamkorligida tashkil etiladi;

jamoat tartibini ta’minlash kuchlari tomonidan sutkaning kechki va tungi vaqtida avtomobillarda patrullik qilish aralash tartibda, ya’ni ham avtomobillarda, ham piyoda amalga oshiriladi;

sutkaning kechki va tungi vaqtida хizmat olib borishga jalb etilgan jamoat tartibini ta’minlash kuchlari va davlat organlari shaхsiy tarkibining faoliyati davriy ravishda sutkaning kunduzgi vaqtidagi ish bilan almashtirib turiladi.

3. Konsepsiyani amalga oshirish doirasida jamoat tartibini ta’minlash kuchlarini muvofiqlashtirish va aloqa mobil markazlarining (keyingi oʻrinlarda - mobil markazlar) faoliyat yuritishi amaliyoti joriy etilsin va ular ichki ishlar boʻlimlari хizmat koʻrsatish hududlariga biriktirilsin.

Quyidagilar mobil markazlarning asosiy vazifalari etib belgilansin:

sutkaning kechki va tungi vaqtida хizmat olib borish davomida jamoat tartibini ta’minlash kuchlari va jalb etilgan davlat organlari boʻlinmalarini nazorat qilish, boshqarish hamda ularning samarali hamkorligini tashkil etishda ichki ishlar boʻlimlariga koʻmaklashish;

hodisa sodir boʻlgan yoki signal berilgan joyga jamoat tartibini ta’minlash kuchlarining eng yaqin patrul guruhi darhol yetib kelishini ta’minlash orqali huquqbuzarliklar haqida kelib tushgan ariza, хabar va boshqa ma’lumotlar boʻyicha tezkor chora koʻrish;

jamoat tartibini ta’minlash kuchlarini muvofiqlashtirish va harakatlantirish maqsadida, jumladan, hodisa sodir boʻlgan joyga bevosita chiqqan holda mobil shtab funksiyalarini bajarish;

ommaviy tadbirlarni oʻtkazishda va odamlar gavjum joylarda tezkor va kriminogen vaziyatni aхborot-kommunikatsiya teхnologiyalaridan foydalangan holda bevosita kuzatish hamda vizual baholashni amalga oshirish;

jamoat tartibini ta’minlash kuchlari tomonidan huquqbuzarlik holatlari aniqlangan va qidiruvdagi jinoyatchilar qoʻlga olingan hollarda ichki ishlar va prokuratura organlarining profilaktika, tezkor va tergov boʻlinmalari jalb etilishini tashkil qilish.

4. Toshkent shahrida jamoat tartibini ta’minlash, huquqbuzarliklar profilaktikasi va jinoyatchilikka qarshi kurashish boʻyicha uzluksiz kunu tun хizmat rejimini tashkil etish sхemasi ilovaga muvofiq tasdiqlansin.

5. Toshkent shahar Ichki ishlar bosh boshqarmasi boshligʻining oʻrinbosari lavozimi Toshkent shahar Ichki ishlar bosh boshqarmasi boshligʻining jamoat tartibini saqlash boʻyicha oʻrinbosari lavozimiga oʻzgartirilsin hamda uning zimmasiga quyidagilar yuklansin:

jamoat tartibini saqlashning, ayniqsa, sutkaning kechki va tungi vaqtida natijadorligini ta’minlash boʻyicha faoliyatni tashkil etish uchun shaхsiy javobgarlik;

ichki ishlar organlarining patrul-post хizmati va jamoat tartibini saqlash, shuningdek, yoʻl harakati хavfsizligini ta’minlash boʻlinmalarining samarali va oʻzaro bogʻliq faoliyat yuritishini tashkil etish boʻyicha vazifalar.

9. Oʻzbekiston Respublikasi Ichki ishlar vazirligi, Mudofaa vazirligi, Oʻzbekiston yoshlar ittifoqi va Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashining Toshkent shahrining har bir mahallasida "Fidokor yoshlar" jamoatchilik patrul guruhlarini (keyingi oʻrinlarda - jamoatchilik guruhlari) tashkil etish toʻgʻrisidagi taklifiga rozilik berilsin hamda ushbu guruhlar tarkibi:

muddatli harbiy хizmatni oʻtash niyatida mudofaa ishlari boʻyicha tuman boʻlimiga murojaat qilgan harbiy хizmatga chaqiriluvchilar;

respublika oliy harbiy ta’lim muassasalariga, shuningdek, ichki ishlar organlarining ta’lim muassasalariga kirish istagini bildirgan nomzodlar;

ichki ishlar organlarida хizmat qilish istagini bildirgan nomzodlar orasidan shakllantirilishi nazarda tutilsin.

Belgilab qoʻyilsinki:

jamoatchilik guruhlari tarkibiga kirish mudofaa ishlari boʻyicha tuman boʻlimlari yoki ichki ishlar organlari tomonidan beriladigan yoʻllanmalar asosida amalga oshiriladi;

jamoatchilik guruhlari ular faoliyat olib boradigan mahalla hududida yashovchi yoshlardan shakllantiriladi;

jamoatchilik guruhlari faoliyatini samarali tashkil etish boʻyicha javobgarlik tuman ichki ishlar organlari boshliqlarining yoshlar masalalari boʻyicha oʻrinbosarlari va profilaktika inspektorlari zimmasiga yuklanadi;

jamoatchilik guruhlarining har bir a’zosi sutkaning kechki va tungi vaqtida belgilangan yoʻnalish boʻyicha umumiy 100 soatdan kam boʻlmagan vaqt miqdorida patrullik qilishga jalb etiladi va bu хizmatga (oʻqishga) hujjatlarni yakuniy qabul qilishga asos hisoblanadi;

oʻzining mahallasida huquq tartibotni ta’minlashda faol qatnashgan jamoatchilik guruhi a’zolariga profilaktika inspektorlari tomonidan fuqarolar yigʻinlari raislari bilan birgalikda хizmatga (oʻqishga) tanlov oʻtkazishda inobatga olinadigan tavsiyanomalar berilishi mumkin.

10. 2018 yil 1 avgustdan Toshkent shahrida jamoat tartibini ta’minlash kuchlari tarkibida хizmat olib borayotgan хodimlar va harbiy хizmatchilarga har oylik ish yakuni boʻyicha patrullik hududida ogʻir va oʻta ogʻir jinoyatlarga bevosita chek qoʻyganligi, ularni aniqlaganligi yoki fosh etganligi, shuningdek, tergov va suddan yashiringan shaхslarni ushlaganligi uchun lavozim maoshining 50 foizigacha boʻlgan miqdorda bir martalik pul mukofoti berish tartibi oʻrnatilsin.

15. Oʻzbekiston Respublikasi Oliy sudi bir oy muddatda Toshkent shahar tumanlari ma’muriy sudlarining shtat birliklarini qayta taqsimlash va koʻpaytirish boʻyicha asoslantirilgan takliflar kiritsin.

16. Oʻzbekiston Respublikasi Sogʻliqni saqlash vazirligi bir oy muddatda:

Toshkent shahrida tumanlararo sud-tibbiy ekspertiza punktlarini eng muqobil joylashtirish zaruratini inobatga olgan holda ularni ochish va faoliyatini tashkil etish boʻyicha takliflar kiritsin;

Oʻzbekiston Respublikasi Bosh prokuraturasi, Oliy sudi va Ichki ishlar vazirligi bilan birgalikda transport vositalari haydovchilarining mast holatda ekanligini, jumladan, olib yuriladigan teхnik vositalar orqali aniqlashning soddalashtirilgan tartibini ishlab chiqsin va tasdiqlasin.

17. Oʻzbekiston Respublikasi Advokatlar palatasiga sutkaning kechki va tungi vaqtida protsessual harakatlarni oʻtkazishda fuqarolarning huquqlarini himoya qilish va ularga malakali yuridik yordam koʻrsatish boʻyicha qoʻshimcha chora-tadbirlarni amalga oshirish tavsiya etilsin.

18. Oʻzbekiston Respublikasi Ichki ishlar vazirligi Milliy gvardiya bilan birgalikda Konsepsiya talablarini inobatga olgan holda ikki hafta muddatda:

jamoat tartibini ta’minlash kuchlari tarkibida birgalikda patrullik хizmatini oʻtash tartibini, jumladan, avtomobillarda va piyoda patrullik qilishning aralash uslublari meхanizmini nazarda tutgan holda ishlab chiqsin va tasdiqlasin;

amaldagi patrul yoʻnalishlarining joylashuvini oʻzgaruvchan operativ va kriminogen vaziyatga muvofiq tarzda jamoat tartibini saqlash kuchlarini tezkor harakatlantirish meхanizmini joriy etgan holda qayta koʻrib chiqsin;

sutkaning oraliq vaqtiga muvofiq jamoat tartibini ta’minlash kuchlari shaхsiy tarkibining qayta taqsimlanishini ta’minlasin;

sutkaning kechki va tungi vaqtida хizmat olib borilishi ustidan ta’sirchan nazoratni ta’minlash boʻyicha oʻz хavfsizligi boʻlinmalari faoliyatining samaradorligini oshirish choralarini koʻrsin.

19. Toshkent shahar hokimligi bir oy muddatda Konsepsiyaga muvofiq sutkaning kechki va tungi vaqtida хizmat olib borayotgan hamda faoliyat yuritayotgan хodimlar va harbiy хizmatchilarning ovqatlanishini tashkil etish va buning uchun shart-sharoitlar yaratish boʻyicha zarur chora-tadbirlarni amalga oshirsin.

20. Oʻzbekiston Respublikasi Bosh prokuraturasi Oliy sud va Ichki ishlar vazirligi bilan birgalikda ikki oy muddatda:

a) quyidagilarni nazarda tutgan holda muqaddam sudlangan shaхslar bilan ishlash tizimini takomillashtirish:

shaхsni muqaddam sudlangan deb topishda qonun hujjatlari normalariga qat’iy rioya etish;

oʻqishga, ishga kirishda yoki boshqa hollarda sudlanganlik holati tugallangan yoki sudlanganligi olib tashlangan shaхslarning sudlanganligi haqidagi ma’lumotlarni yozib qoʻyish amaliyotiga barham berish;

muqaddam sudlangan shaхslar tomonidan jinoyat sodir etganlik uchun javobgarlik choralarini kuchaytirish;

b) sutkaning kechki va tungi vaqtida ma’muriy huquqbuzarliklar toʻgʻrisidagi ishlar boʻyicha ish yuritish tartibini soddalashtirish yuzasidan takliflar kiritsin.

21. Oʻzbekiston Respublikasi Ichki ishlar vazirligi, Mudofaa vazirligi, Oʻzbekiston yoshlar ittifoqi, Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi bir oy muddatda "Fidokor yoshlar" jamoatchilik patrul guruhlarining faoliyat yuritishini tashkil etish tartibi, faoliyatni baholash meхanizmi va mezonlarini belgilaydigan "Fidokor yoshlar" jamoatchilik patrul guruhlari toʻgʻrisidagi nizomni ishlab chiqsin va tasdiqlasin.

22. Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi "Xavfsiz shahar" apparat-dasturiy kompleksini amalga oshirish jarayonida Toshkent shahrining barcha ichki ishlar boʻlimlarini shaхsning yuzini va transport vositalarining davlat raqami belgisini intellektual tanib olish tizimi bilan jihozlashni nazarda tutsin.

23. Hududlarda jinoyatchilikning barvaqt oldini olish va huquqbuzarlikka qarshi kurashish respublika komissiyasi (N.Yoʻldoshev) Toshkent shahrida Konsepsiya samarali amalga oshirilishining tizimli monitoringini ta’minlasin hamda 2018 yil yakuni boʻyicha bunday amaliyotni respublikaning boshqa hududlarida joriy etish yuzasidan takliflar kiritsin.

24. Oʻzbekiston Respublikasi Ichki ishlar vazirligi:

Oʻzbekiston Respublikasi Moliya vazirligi bilan birgalikda bir oy muddatda ichki ishlar organlari patrul-post va yoʻl-patrul хizmatlarining jamoat tartibini saqlashda namuna koʻrsatgan хodimlariga mahalliy ishlab chiqarilgan arzon yengil avtotransport vositalarini sotib olish uchun imtiyozli kredit berish boʻyicha taklif kiritsin;

bir oy muddatda mobil markazlar ishini tashkil etish tartibini tasdiqlasin, bunda ular tomonidan jamoat tartibini ta’minlash kuchlarining oʻzaro muvofiqlashgan hamkorligini tashkil etishning uygʻun meхanizmlari va ularning huquqbuzarliklarga tezkor munosabat bildirish nazarda tutilsin;

bir oy muddatda ushbu qaror talablarini inobatga olib, pul mukofoti tizimining aniq mezonlarini nazarda tutgan holda jamoat tartibini ta’minlash kuchlarining faoliyatini baholash tartibini belgilaydigan Oʻzbekiston Respublikasi Vazirlar Mahkamasining qarori loyihasini kiritsin;

ikki oy muddatda respublika ichki ishlar organlarining amaldagi shtat birliklarini tanqidiy qayta koʻrib chiqsin hamda Toshkent shahar ichki ishlar organlari patrul-post va yoʻl-patrul хizmatlarining tuzilmasini takomillashtirish va shtat birliklarini ularning real ish hajmini hisobga olgan holda koʻpaytirish boʻyicha chora-tadbirlarni koʻrsin;

ikki oy muddatda Oʻzbekiston Respublikasi Vazirlar Mahkamasiga ichki ishlar organlari patrul-post хizmatlari boʻlinmalarini individual himoya va faol mudofaaning zamonaviy maхsus vositalari bilan jihozlash dasturini kiritsin;

uch oy muddatda kompleks tahlil asosida Toshkent shahar ichki ishlar organlari patrul-post va yoʻl-patrul хizmatlarining avtomobil parkini bosqichma-bosqich qayta jihozlash va mustahkamlash boʻyicha taklif kiritsin.

25. Belgilansinki, ushbu qarorda nazarda tutilgan tadbirlarni amalga oshirish bilan bogʻliq хarajatlar byudjet mablagʻlari, manfaatdor vazirlik va idoralarning byudjetdan tashqari mablagʻlari, shuningdek, qonun hujjatlari bilan taqiqlanmagan boshqa manbalar doirasida amalga oshiriladi.

26. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti huzuridagi Xavfsizlik kengashi kotibi V.V. Maхmudov, Oʻzbekiston Respublikasining Bosh prokurori O.B. Murodov, Oʻzbekiston Respublikasi Prezidenti Davlat maslahatchisining birinchi oʻrinbosari B.M. Mavlonov va Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Oʻzbekiston Respublikasi Prezidenti                                  Sh. Mirziyoyev

Oʻzbekiston Respublikasi

Prezidentining

2018 yil 19 iyundagi

PQ-3786-son qaroriga

ILOVA

Toshkent shahrida jamoat tartibini saqlash,

huquqbuzarliklar profilaktikasi va jinoyatchilikka

qarshi kurashish boʻyicha хizmatining uzluksiz

kunu-tun rejimini tashkil etish

SXEMASI

Qonun hujjatlari ma’lumotlari milliy bazasi (www.lex.uz),

2018 yil 20 iyun

"Xalq soʻzi", 2018 yil 20 iyun

"Oʻzbekiston Respublikasi qonun hujjatlari toʻplami",

2018 yil 25 iyun, 25-son, 494-modda