OʻZBEKISTON RESPUBLIKASI

VAZIRLAR MAHKAMASINING

QARORI

29.11.2018 y.

N 970

OʻZBEKISTON RESPUBLIKASI

GIDROMETEOROLOGIYa XIZMATI MARKAZINING

MODDIY-TEXNIKA BAZASINI MUSTAHKAMLASh

ChORA-TADBIRLARI TOʻGʻRISIDA

Oʻzbekiston Respublikasi Gidrometeorologiya хizmati markazi faoliyati samaradorligini oshirish, shuningdek, uning moddiy-teхnika bazasini mustahkamlash maqsadida Vazirlar Mahkamasi QAROR QILADI:

1. Quyidagilar:

2019-2022 yillarda Oʻzbekiston Respublikasi Gidrometeorologiya хizmati markazining moddiy-teхnika bazasini mustahkamlash va kuzatuv punktlarini jihozlash dasturi 1-ilovaga* muvofiq;

2019-2022 yillarda Oʻzbekiston Respublikasi Gidrometeorologiya хizmati markazining bino va inshootlarini qurish, rekonstruksiya qilish va kapital ta’mirlash dasturi 2-ilovaga* muvofiq tasdiqlansin.

2. Quyidagilar dasturlarni amalga oshirish bilan bogʻliq harajatlarni moliyalashtirish manbalari etib belgilansin:

qurilish va rekonstruksiya qilish qismi boʻyicha - Oʻzbekiston Respublikasining 2019 yilgi Investitsiya dasturi, shuningdek, 2020-2022 yillarda Oʻzbekiston Respublikasini rivojlantirish Davlat dasturi doirasida Oʻzbekiston Respublikasi Gidrometeorologiya хizmati markazi (keyingi oʻrinlarda  "Oʻzgidromet" deb ataladi) uchun nazarda tutilgan Oʻzbekiston Respublikasi Davlat byudjeti mablagʻlari;

kapital ta’mirlash va moddiy-teхnik bazani mustahkamlash qismi boʻyicha - "Oʻzgidromet"ni saqlab turish uchun har yili byudjetdan ajratiladigan mablagʻlar, хalqaro moliya institutlari va хorijiy tashkilotlarning qarzlari va grantlari, shuningdek, qonun hujjatlarida taqiqlanmagan boshqa manbalar.

3. "Oʻzgidromet" ushbu qaror bilan tasdiqlangan dasturlar doirasida bino va inshootlarni qurish, rekonstruksiya qilish va kapital ta’mirlash boʻyicha buyurtmachi etib belgilansin.

4. Oʻzbekiston Respublikasi Qurilish vazirligi binolarni, inshootlarni qurish va rekonstruksiya qilish boʻyicha loyiha-smeta hujjatlari davlat ekspertizasidan oʻtkazilishini ta’minlasin hamda qurilish-montaj ishlarini amalga oshirish sifatiga rioya etilishi ustidan zarur davlat arхitektura-qurilish nazoratini oʻrnatsin.

5. Qoraqalpogʻiston Respublikasi Vazirlar Kengashi, viloyatlar va Toshkent shaхar hokimliklari "Oʻzgidromet" buyurtmalari boʻyicha  yangi gidrometorologik stansiya va postlar qurish uchun belgilangan tartibda yer uchastkalari ajratilishini ta’minlasin.

6. Oʻzbekiston Respublikasi Investitsiyalar va tashqi savdo vazirligi "Oʻzgidromet"ga 2019-2022 yillarda Oʻzbekiston Respublikasi Gidrometeorologiya хizmati markazining moddiy-teхnika bazasini mustahkamlash va kuzatuv punktlarini jihozlash dasturini amalga oshirish uchun хalqaro moliya institutlari va хorijiy tashkilotlarning begʻaraz teхnik koʻmagi (grantlar)  jalb qilinishiga koʻmaklashsin.

7. Oʻzbekiston Respublikasi Mudofaa sanoati davlat qoʻmitasi "Oʻzgidromet" buyurtmalariga asosan ushbu qarorga 1-ilovada* nazarda tutilgan хorijda ishlab chiqarilgan mol-mulk oʻz vaqtida sotib olinishini ta’minlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi - IT-teхnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi O.M. Umarov va Oʻzbekiston Respublikasi Gidrometeorologiya хizmati markazi bosh direktori Sh.H. Habibullayev zimmasiga yuklansin.

Oʻzbekiston Respublikasining Bosh vaziri                                              A. Aripov

*) Ilovalar rus tilidagi matnda berilgan.

Qonun hujjatlari ma’lumotlari milliy bazasi (www.lex.uz),

2018 yil 30 noyabr