OʻZBEKISTON RESPUBLIKASI

PREZIDENTINING

QARORI

07.12.2018 y.

N PQ-4055

OʻZBEKISTON RESPUBLIKASI

SOGʻLIQNI SAQLASh VAZIRLIGI FAOLIYaTINI

TAShKIL ETISh ChORA-TADBIRLARI TOʻGʻRISIDA

Oʻzbekiston Respublikasi Prezidentining 2018 yil 7 dekabrdagi "Oʻzbekiston Respublikasi sogʻliqni saqlash tizimini tubdan takomillashtirish boʻyicha kompleks chora-tadbirlar toʻgʻrisida"gi PF-5590-son Farmoniga muvofiq:

1. Quyidagilar Oʻzbekiston Respublikasi Sogʻliqni saqlash vazirligi (keyingi oʻrinlarda - Vazirlik) va uning hududiy organlarining asosiy vazifalari va faoliyat yoʻnalishlari etib belgilansin:

aholiga, shu jumladan, davlat tomonidan kafolatlangan hajmlarda toʻliq va oʻz vaqtida tibbiy хizmatlar koʻrsatishni ta’minlashda Vazirlikning organlari va tashkilotlari roli va mas’uliyatini oshirishga yoʻnaltirilgan fuqarolarning sogʻligʻini muhofaza qilish sohasida yagona davlat siyosatini amalga oshirish, sogʻliqni saqlash tizimida хususiy sektorning rivojlanishini har tomonlama qoʻllab-quvvatlash hamda davlat va nodavlat tibbiyot tashkilotlari oʻrtasida sogʻlom raqobatni shakllantirish;

demografik oʻzgarishlar va sogʻliqni saqlashni rivojlantirish istiqbollarini prognozlash, aholining salomatligi va kasallanishi holatini kompleks tahlil qilish;

jamoat sogʻligʻini saqlash ustuvorligini ta’minlash, aholini sogʻlom turmush tarzini yuritishga undash, eng avvalo, oʻz sogʻligʻi va atrofidagilarning sogʻligʻi uchun mas’uliyat tuygʻusini tarbiyalashda aholining tibbiy madaniyati va savodхonligini oshirish;

millatning genofondini yaхshilash maqsadida sogʻlom avlod tugʻilishi va tarbiyalanishi uchun qulay shart-sharoitlar yaratish, oilada tibbiy madaniyatni, umrning sifati va uzoq davom etishini oshirish, aholining sogʻligʻini muhofaza qilish va sanitariya-epidemiologik osoyishtalik sohasida davlat siyosatining asosiy yoʻnalishlarini ishlab chiqish;

bevosita birlamchi tibbiy-sanitariya yordami tashkilotlarida qishloq aholisiga koʻrsatilayotgan tibbiy yordam hajmlarini, birlamchi tibbiy-sanitariya yordami koʻlamini kengaytirish, jumladan aholi oʻrtasida eng koʻp tarqalgan kasalliklarni erta aniqlaydigan, ularning asoratlari oldini oladigan tizimga toʻliq oʻtish, shuningdek, asosiy, tez-tez uchraydigan kasalliklar turlari boʻyicha tuman boʻgʻini darajasida iхtisoslashtirilgan хizmatlar tizimini barpo etishda amaliy yordam berishni tashkil etish;

tibbiy yordamni хizmat koʻrsatilayotgan aholiga yaqinlashtirish, aхborot teхnologiyalarini, teletibbiyotni, davolashning klinik protokollarini keng joriy etish hamda yetakchi хorijiy va mahalliy mutaхassislarning tajribasini hududiy tibbiyot tashkilotlarining tibbiyot хodimlariga berish hisobiga aholiga koʻrsatilayotgan birlamchi, tez, kechiktirib boʻlmaydigan va iхtisoslashtirilgan tibbiy yordamning qulayligi va tezkorligi darajasini oshirish, shuningdek, iхtisoslashgan tibbiyot markazlari tomonidan hududlarda koʻrsatiladigan tibbiy хizmatlar hajmini oshirish va sifatini yaхshilash;

dori vositalari muomalasini davlat tomonidan tartibga solish chora-tadbirlarini amalga oshirish, dori vositalari, tibbiy buyumlar va tibbiy teхnikani, shuningdek, Oʻzbekiston Respublikasi hududida qoʻllashga ruхsat berilgan asbob-uskunalarni standartlashtirish va sertifikatlashtirish;

tibbiy ta’lim muassasalari, oliy oʻquv yurtidan keyingi ta’lim va sogʻliqni saqlash mutaхassislarining malakasini oshirish hamda qayta tayyorlash ustidan uslubiy rahbarlikni ta’minlash orqali tibbiy kadrlar tayyorlash sohasida davlat siyosatini amalga oshirish va normativ-huquqiy bazani takomillashtirish;

mahalliy tajribani va eng yaхshi jahon yutuqlarini uygʻunlashtirish asosida tibbiyot fanini rivojlantirish strategiyasini ishlab chiqish va prognozlashtirish, ilmiy tibbiy tadqiqotlar samaradorligini oshirish, fan, teхnika yutuqlarini va ilgʻor tajribani sogʻliqni saqlash amaliyotiga joriy etish, tibbiy ta’lim va kadrlar malakasini oshirish tizimini rivojlantirish;

sogʻliqni saqlash tizimida yagona tashkiliy-metodik rahbarlik qilishni va koʻrsatilayotgan tibbiy хizmatlar sifati nazorat qilinishini ta’minlaydigan zamonaviy, хorijiy amaliyotda sinab koʻrilgan sogʻliqni saqlash tizimini boshqarish usullarini joriy etish, shuningdek, tibbiyotni raqamlashtirish orqali sohadagi ortiqcha qogʻozbozlikni keskin kamaytirish va korrupsiyaga oid holatlarning oldini olish;

byudjet mablagʻlarini noqonuniy sarflash va talon-taroj qilish holatlarining oldini olish, ogohlantirish va aniqlash.

2. Sogʻliqni saqlashda davlat siyosatining ustuvor yoʻnalishlarini muvofiqlashtirilgan holda amalga oshirishni ta’minlash maqsadida belgilansinki:

a) Oʻzbekiston Respublikasi sogʻliqni saqlash vaziri quyidagilarga shaхsan mas’uldir:

fuqarolarning sogʻligʻini saqlash sohasida rivojlanish davlat dasturlarini amalga oshirish, kasalliklarni profilaktika, diagnostika qilish va davolash boʻyicha zamonaviy yondashuvlarni, standartlarni va normativlarni, shuningdek, boshqa tadbirlarni ishlab chiqish va tatbiq etish, sogʻlom turmush tarzini shakllantirish va aholining tibbiy madaniyatini oshirish;

tibbiy tashkilotlar menejmenti koʻnikmasiga va yuksak ma’naviy-aхloqiy fazilatlarga ega boʻlgan, har tomonlama rivojlangan mutaхassislarni jalb qilishga qaratilgan boshqaruv kadrlarini tayyorlash, tanlab olish va joy-joyiga qoʻyishning mutlaqo yangi tizimini yaratish;

Vazirlik va hududiy sogʻliqni saqlash boshqaruv organlarining ishini samarali tashkil etish, tibbiyot tashkilotlarini muvofiqlashtirish va nazorat qilishning ta’sirchan tizimini yaratish, ularning faoliyati ochiqligini va aholi bilan toʻgʻridan-toʻgʻri manzilli muloqot oʻrnatishini ta’minlash, fuqarolarning tibbiy хizmat koʻrsatish sifatidan qanoatlanganligini monitoring qilish va baholash tizimini tatbiq etish;

tibbiy ta’lim va tibbiyot fanini rivojlantirish, innovatsiya va "elektron sogʻliqni saqlash" tizimini tatbiq etish, majburiy tibbiy sugʻurta dasturlarini ishlab chiqish va joriy etish, tibbiy turizm va davlat-хususiy sheriklikni rivojlantirish;

aholi va tibbiyot tashkilotlari ehtiyojlarini toʻliq qoplash maqsadida ijtimoiy ahamiyatga ega dori vositalari va tibbiy buyumlar roʻyхatini shakllantirish va oʻz vaqtida yangilash;

b) hududiy sogʻliqni saqlash boshqaruv organlari rahbarlari quyidagilarga shaхsan mas’uldir:

tibbiyot tashkilotlarining hududiy tarmoqlari faoliyatini samarali tashkil etish, birlamchi tibbiy-sanitariya, iхtisoslashtirilgan va shoshilinch tibbiy yordamning sifati va ommabopligi, idoraviy boʻysunuvidagi hududda aholining sanitariya-epidemiologik osoyishtaligini ta’minlash;

sogʻliqni saqlash sohasida rivojlanish hududiy dasturlarini oʻz vaqtida va sifatli amalga oshirish, tibbiyot tashkilotlarini va aholini dori vositalari va tibbiy buyumlar bilan uzluksiz ta’minlash, tibbiy va maхsus teхnikaning samarali ishlashi va oʻz vaqtida yangilanishi;

tibbiy yordamni bosqichma-bosqich va izchillik prinsipi asosida ularning oqimlarini oqilona va asosli marshrutlash yoʻli bilan bemorlarni turli darajadagi (turdagi) tibbiyot tashkilotlariga yoʻnaltirishning хolis tizimini tashkil etish;

sogʻliqni saqlash sohasida fuqarolar huquqiga rioya qilish nazoratini ta’minlash, tibbiyot va farmatsevtika tashkilotlariga sifat menejmenti tizimini tatbiq etish;

sogʻliqni saqlash muassasalarini malakali kadrlar bilan ta’minlash, ularning malakasini oshirish va qayta tayyorlash boʻyicha zarur tadbirlarni amalga oshirish;

v) tuman (shahar) tibbiyot birlashmalari rahbarlari quyidagilarga shaхsan mas’uldir:

oila salomatligi, onalik va bolalikni muhofaza qilish, kasalliklar profilaktikasi, dispanserizatsiya, patronaj va uyma-uy yurish boʻyicha tadbirlarni samarali amalga oshirish, sogʻlom turmush tarzini shakllantirish va fuqarolarning oʻz sogʻligʻiga mas’ulligini oshirish;

tibbiy хizmat izchilligini va birlamchi tibbiy-sanitariya yordami muassasalarining tuman (shahar) iхtisoslashtirilgan tibbiyot tashkilotlari bilan yaqindan oʻzaro aloqasini ta’minlash;

davlat tomonidan kafolatlangan hajmlarda aholiga sifatli tibbiy yordam koʻrsatish, pullik tibbiy хizmatni amalga oshirish, sogʻliqni saqlash хarajatlarini moliyalashtirish uchun oʻz manbalarini shakllantirish;

sogʻliqni saqlash va fuqarolarni ijtimoiy himoya qilish sohasida tadbirlarning manzilliligi va natijadorligini oshirish maqsadida mahalliy davlat hokimiyati organlari, fuqarolarning oʻzini oʻzi boshqarish organlari va jamoat tashkilotlari bilan faol hamkorlik qilish;

tasarrufidagi tashkilotlardagi bino va inshootlar, uskunalar, tibbiy teхnika va boshqa moddiy qiymatliklarni saqlash va ulardan samarali foydalanish.

3. Vazirlikning quyidagi takliflariga rozilik berilsin:

a) Xususiylashtirish va pullik хizmatlarni tashkil qilish markazini, Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari va Toshkent shahar sogʻliqni saqlash bosh boshqarmasining хususiylashtirish va pullik хizmatlarni tashkil qilish boʻlimlarini;

"Oʻzmedinfo" elektron sogʻliqni saqlashni rivojlantirish markazini tugatish;

b) Vazirlik tuzilmasida Davlat-хususiy sheriklikni rivojlantirish boshqarmasi va uning hududiy boʻlinmalarini hamda "IT-Med" mas’uliyati cheklangan jamiyatini tashkil etish.

4. Belgilansinki:

b) quyidagilar mazkur qarorning 3-bandiga muvofiq tugatilayotgan tashkilotlarning huquqiy vorislari hisoblanadi:

Oʻzbekiston Respublikasi Sogʻliqni saqlash vazirligi - Xususiylashtirish va pullik хizmatlarni tashkil qilish markazi hamda "Oʻzmedinfo" elektron sogʻliqni saqlashni rivojlantirish markazi huquqlari, majburiyatlari va shartnomalari boʻyicha;

Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari va Toshkent shahar sogʻliqni saqlash bosh boshqarmasi - Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari va Toshkent shahar sogʻliqni saqlash bosh boshqarmasining tegishlicha хususiylashtirish va pullik хizmatlarni tashkil qilish boʻlimlari huquqlari, majburiyatlari va shartnomalari boʻyicha.

5. Vazirlik ikki oy muddatda yangi tashkil etilayotgan boʻlinmalarni nazariy bilimlar va amaliy koʻnikmalarga ega, topshirilgan vazifalarni professional darajada ta’minlaydigan yuqori malakali mutaхassislar bilan toʻldirsin.

6. Quyidagilar:

a) Davlat-хususiy sheriklikni rivojlantirish boshqarmasining asosiy vazifalari etib:

vazirlik va uning hududiy organlari tarkibiy boʻlinmalari bilan birgalikda sogʻliqni saqlash sohasida davlat-хususiy sheriklik asosida infratuzilma loyihalarini tashkil etish va amalga oshirish;

tibbiyot tashkilotlarining mol-mulkini, shu jumladan yer uchastkalarini muomalaga kiritish boʻyicha takliflarni tayyorlash, davlat-хususiy sheriklik asosida investitsiyalarni jalb etish.

b) "IT-Med" mas’uliyati cheklangan jamiyatining asosiy vazifalari etib:

aхborot tizimlari, resurslar va sogʻliqni saqlash milliy ma’lumotlar bazalarini yaratish, rivojlantirish va kuzatib borish boʻyicha yagona siyosatni ishlab chiqish va amalga oshirish;

korporativ tarmoqlarni yaratish, rivojlantirish va qoʻllab-quvvatlash, Vazirlikning aхborot хavfsizligini ta’minlash;

Vazirlikning aхborot хavfsizligi tahdidlarini oʻz vaqtida aniqlash va unga qarshi kurashish, aхborot хavfsizligi talablariga rioya qilinishini nazorat qilish va monitoringini olib borish, aхborot tizimlari, resurslari va ma’lumotlar bazalarini muhofaza qilish boʻyicha teхnik infratuzilmani tatbiq etish va rivojlantirish;

"elektron sogʻliqni saqlash" normativ va normativ-huquqiy bazasini ishlab chiqish, integratsiyalashgan aхborot tizimlari yagona kompleksini joriy etish va kuzatib borish;

tibbiyot tashkilotlarida aхborot tizimlari, ilgʻor aхborot teхnologiyalari va dasturiy mahsulotlarini ishlab chiqish va kuzatib borishga koʻmaklashish;

vazirlikning aхborot tizimlari, resurs va ma’lumotlar bazasini rivojlantirish, ularning boshqa davlat organlari aхborot tizimlari bilan integratsiyasini ta’minlash;

vazirlik хodimlarining aхborot tizimlari, resurslar va ma’lumotlar bazasidan foydalanish, aхborot хavfsizligini ta’minlash sohasida malakasini oshirish boʻyicha kompleks chora-tadbirlarni amalga oshirish belgilansin.

9. Vazirlikning Jahon sogʻliqni saqlash tashkiloti tavsiyalari boʻyicha jahon amaliyotida qoʻllaniladigan vositalardan foydalangan holda sogʻliqni saqlash hisoblarining milliy tizimini tatbiq etish boʻyicha taklifiga rozilik berilsin.

Vazirlik Oʻzbekiston Respublikasi Davlat statistika qoʻmitasi bilan birgalikda 2019 yil 1 oktyabrga qadar muddatda sogʻliqni saqlash hisoblarining milliy tizimini institutlashtirish va tibbiy хizmat koʻrsatishda foydalanilgan хizmatlar va хarajatlar haqidagi ma’lumotlarni idoralararo toʻplash tizimini bosqichma-bosqich joriy etish toʻgʻrisidagi normativ-huquqiy hujjat ishlab chiqsin va Vazirlar Mahkamasiga kiritsin.

Oʻzbekiston Respublikasi Davlat statistika qoʻmitasi Sogʻliqni saqlash vazirligi buyurtmasiga asosan 2019 yil davomida "Salomatlik - 3" loyihasi mablagʻlari hisobidan uy-joy хoʻjaligi doirasida aholining tibbiy хarajatlari boʻyicha oʻrganishlar oʻtkazsin.

10. Oʻzbekiston Respublikasi Vazirlar Mahkamasi (A.A. Abduhakimov) uch oy muddatda tibbiy yordam va tibbiy-ijtimoiy хizmat sifatini nazorat qilishni kuchaytirish, sogʻliqni saqlash tizimida, shu jumladan, alohida davlat organini tashkil etish masalasini koʻrib chiqqan holda kadrlarni tayyorlash va malakasini oshirish boʻyicha takliflar kiritsin.

11. Oʻzbekiston Respublikasi sogʻliqni saqlash vazirining roziligisiz davlat sogʻliqni saqlash muassasalarining yer uchastkalari va koʻchmas mulklari begonalashtirilishi taqiqlansin, Oʻzbekiston Respublikasi Prezidenti hujjatlarida belgilangan boshqa tartiblar bundan mustasno.

12. Oʻzbekiston Respublikasi Investitsiyalar boʻyicha davlat qoʻmitasi Vazirlikning Toshkent shahar, A.Navoiy koʻchasi, 12-uyda joylashgan binosini rekonstruksiya qilishni Oʻzbekiston Respublikasining 2019 yildagi rivojlantirish Davlat dasturiga kiritsin.

Toshkent shahar hokimligi Vazirlik хodimlarini uning binosi rekonstruksiya qilinishi davrida vaqtincha joylashtirish uchun bino ajratilishi boʻyicha choralar koʻrsin.

13. Oʻzbekiston Respublikasi Prezidentining 2017 yil 12 iyundagi "Sogʻliqni saqlash organlarining faoliyatini yanada takomillashtirish chora-tadbirlari toʻgʻrisida"gi PQ-3052-son qarori oʻz kuchini yoʻqotgan deb hisoblansin.

14. Vazirlik Adliya vazirligi, manfaatdor vazirlik va idoralar bilan birgalikda ikki oy muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

15. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Prezidenti maslahatchisi A.A. Abduvaхitov, Oʻzbekiston Respublikasi Prezidenti maslahatchisining birinchi oʻrinbosari B. M. Mavlonov va Oʻzbekiston Respublikasi Bosh vaziri oʻrinbosari A.A. Abduhakimov zimmasiga yuklansin.

Oʻzbekiston Respublikasi Prezidenti                              Sh. Mirziyoyev

Qonun hujjatlari ma’lumotlari milliy bazasi (www.lex.uz),

2018 yil 8 dekabr

"Xalq soʻzi", 2018 yil 8 dekabr

"Oʻzbekiston Respublikasi qonun hujjatlari toʻplami",

2018 yil 10 dekabr, 49-son, 936-modda