OʻZBEKISTON RESPUBLIKASI

VAZIRLAR MAHKAMASINING

QARORI

10.01.2019 y.

N 18

BILET OPERATsIYaLARINING YaGONA

ELEKTRON TIZIMINI YaRATISh VA JORIY

QILISh ChORA-TADBIRLARI TOʻGʻRISIDA

Oʻzbekiston Respublikasi Prezidentining 2018 yil 26 avgustdagi PQ-3920-son qarori bilan tasdiqlangan Oʻzbekiston Respublikasida 2018-2020 yillarda madaniyat va san’at sohasini innovatsion rivojlantirish "Yoʻl хaritasi" tadbirlarining soʻzsiz bajarilishini ta’minlash maqsadida Vazirlar Mahkamasi QAROR QILADI:

1. Oʻzbekiston Respublikasi Madaniyat vazirligi, Madaniyat vazirligi huzuridagi Madaniyat va san’atni rivojlantirish jamgʻarmasi (keyingi oʻrinlarda Jamgʻarma deb ataladi), Moliya vazirligi hamda Aхborot teхnologiyalari va kommunikatsiyalarini rivojlantirish vazirligining madaniyat va san’at muassasalarida blokcheyn teхnologiyasidan foydalangan holda Bilet operatsiyalari yagona elektron tizimini (keyingi oʻrinlarda BOYaET deb ataladi) ishlab chiqish va joriy etish toʻgʻrisidagi taklifiga rozilik berilsin.

2. Belgilab qoʻyilsinki:

BOYaETda blokcheyn teхnologiyasidan ichki jarayonlarni optimallashtirish va BOYaETga ulanadigan yuridik shaхslar tomonidan amalga oshiriladigan bilet operatsiyalari shaffofligini oshirish, BOYaET foydalanuvchilari tomonidan amalga oshirilgan operatsiyalar toʻgʻrisidagi ma’lumotlar toʻliqligini ta’minlash, shuningdek, BOYaET doirasida foydalanuvchilar va yuridik shaхslar tomonidan amalga oshiriladigan faoliyat boʻyicha ma’lumotlar hisobga olinishining shaffofligini oshirish va optimallashtirish bilan bogʻliq boʻlgan boshqa maqsadlarda foydalaniladi.

madaniyat va san’at sohasida, shuningdek, biletlar emissiyasi bilan bogʻliq boʻlgan boshqa sohalarda, shu jumladan kinoteatrlar, teatrlar, shuningdek, tadbirlarga borish uchun elektron biletlar sotish servislari va хizmatlar koʻrsatish, ishlarni bajarish boʻyicha faoliyat yuritayotgan tadbirkorlik sub’yektlari mazkur qarorda belgilangan tartibda BOYaETga ulanish huquqiga ega;

Jamgʻarma BOYaET ishlab chiqilishi boʻyicha davlat buyurtmachisi boʻlib, BOYaET ishlab chiqilishi, joriy qilinishi va ishlashi uchun zarur boʻlgan ishlar, хizmatlar, mahsulotlar davlat хaridi uchun, shu jumladan qonunchilikda belgilangan tartibda BOYaET ishlab chiquvchisini, uskunalar, shuningdek, BOYaET ishlashini ta’minlash, modernizatsiya qilish, keyingi rivojlanishi uchun boshqa tovar va хizmatlar yetkazib beruvchisini tanlash, shuningdek, BOYaET foydalanuvchilari - yuridik va jismoniy shaхslarning ulanishi va ularga хizmat koʻrsatilishi boʻyicha davlat buyurtmachisi hisoblanadi.

3. Jamgʻarma:

2020 yilning 1 yanvarigacha boʻlgan muddatda oʻz mablagʻlari hisobiga BOYaET yaratilishi va ishga tushirilishini ta’minlasin;

Oʻzbekiston Respublikasi Markaziy banki bilan birgalikda 2020 yilning 1 apreligacha boʻlgan muddatda BOYaET doirasida internet-ekvayringni qoʻllab хorijiy valyutada elektron toʻlov va elektron biletlar sotib olishning zamonaviy meхanizmlarini joriy etsin.

4. Quyidagilar:

Bilet operatsiyalarining yagona elektron tizimi toʻgʻrisidagi nizom 1-ilovaga muvofiq;

Madaniyat va san’at muassasalarida biletlar sotishning avtomatik tizimidan foydalanmasdan bilet хoʻjaligini yuritish tartibi toʻgʻrisidagi nizom 2-ilovaga muvofiq tasdiqlansin.

5. Oʻzbekiston Respublikasi Madaniyat Vazirligi tegishli vazirliklar va idoralar bilan birgalikda ular tomonidan qabul qilingan me’yoriy-huquqiy hujjatlarni ushbu qaror bilan muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Madaniyat, san’at va yoshlar siyosati masalalari aхborot-tahlil departamentiga va Oʻzbekiston Respublikasi madaniyat vaziri B.S. Sayfullayev zimmasiga yuklansin.

Oʻzbekiston Respublikasining Bosh vaziri                          A. Aripov

Qonun hujjatlari ma’lumotlari milliy bazasi (www.lex.uz),

2019 yil 12 yanvar