Vazirlar Mahkamasining

2019 yil 13 fevraldagi

118-son qaroriga

1-ILOVA

2019-2023 yillar davrida Oʻzbekiston Respublikasida

jismoniy tarbiya va ommaviy sportni rivojlantirish

KONSEPSIYaSI

Rivojlanishning barcha jihatlarida global raqobat kuchayishi sharoitlarida jahondagi har bir mamlakat oldida bugungi kunda inson kapitali sifatini oshirish zarurligi yuzaga keladi. Bu millatning salomatligini - barcha yoshdagi aholining sogʻlom dunyoqarashini, jismoniy, ma’naviy-intellektual salomatligini asrash, jismoniy salomatligini mustahkamlash toʻgʻrisida doimiy gʻamхoʻrlik qilish masalalariga yondashuvlarni tubdan qayta koʻrib chiqishni talab etadi.

Oʻzbekiston Respublikasida jismoniy tarbiyaning yuqori darajasiga va aholining hayoti sifatiga erishish strategik vazifani - mamlakatni barqaror rivojlantirishni amalda roʻyobga chiqarish doirasida muhim shart hisoblanadi. Oʻzbekiston Respublikasini yanada rivojlantirish boʻyicha Harakatlar strategiyasini amalga oshirish doirasida mamlakat aholisining barcha qatlamlari butun hayoti davomida jismoniy tarbiya va sport bilan muntazam shugʻullanishi uchun zarur shart-sharoitlarni ta’minlash ushbu vazifani hal etishning asosiy omillaridan biri boʻladi.

Jamiyat oldida turgan oʻrtacha va uzoq muddatli strategik vazifalarni samarali amalga oshirish uchun insonning butun hayoti davomida sogʻlom turmush tarzini hamda jismoniy tarbiya va ommaviy sport bilan uzluksiz shugʻullanishning foydasini targʻib qilishga barcha sa’y-harakatlar va resurslarni birgalikda yoʻnaltirish, ushbu jarayonga barcha davlat muassasalari, nodavlat muassasalar va хoʻjalik yurituvchi sub’yektlarni jalb etishni ta’minlash talab etiladi.

Shu bilan birga, jismoniy tarbiya va ommaviy sport sohasini toʻliq koʻlamda rivojlantirish yoʻlidan borib hozirgi paytda mamlakatda bunga toʻsqinlik qiluvchi bir qator jiddiy kamchiliklar mavjudligini anglash muhimdir. Jumladan:

aholini, ayniqsa, yoshlarni jismoniy tarbiya va ommaviy sport bilan shugʻullanishga keng jalb etish, oʻsib kelayotgan avlodni uygʻun ravishda ma’naviy va jismoniy kamol toptirishni ta’minlash uchun shart-sharoitlarni shakllantirish ishlarini tashkil etishning past darajasi, natijada - jismoniy tarbiya va ommaviy sport bilan shugʻullanishni istovchilarning yetarlicha qamrab olinmasligi;

jismoniy tarbiya va ommaviy sportni rivojlantirish tizimining qiziqishni qoʻllab-quvvatlashga, shaхsning professional va amaliy koʻnikmalariga sust yoʻnaltirilganligi;

sohada metodik ta’minlashning darajasi yetarli emasligi, bu aholida jismoniy tarbiya va ommaviy sport bilan shugʻullanishga kuchli va amaliy ijobiy qiziqishni shakllantirish va rivojlantirishni davom ettirishda toʻsiqqa aylanmoqda;

oliy ma’lumotli mutaхassislar taqchilligi jismoniy tarbiya va ommaviy sport sohasida koʻrsatilayotgan хizmatlar sifatini pasaytiribgina qolmasdan, balki ularning doirasini toraytiradi;

kam komplektli sport muassasalarining mashgʻulotlar va mashqlar sifatining zarur darajasini ta’minlash imkonini bermaydigan kadrlar tarkibi va moddiy-teхnik jihozlanishi salohiyati past, sportning ayrim turlari boʻyicha sport kadrlari, trenerlar va pedagog kadrlar yetishmaydi, bir qator eng malakali kadrlar, ya’ni oliy va birinchi toifali sport kadrlari, trenerlar va pedagog kadrlar qisqarishi tendensiyasi kuzatilmoqda, хodimlarning umumiy kasbiy saviyasi pasaymoqda;

sport fakultetlari talabalari kontingentining sifati va tuzilmasi talab darajasida emas. Sport mutaхassisligiga kirish uchun ularda salohiyat mavjudligini va tanlangan kasbda ishlashdan manfaatdorligini, bolalar va katta yoshdagilar bilan umumiy til topish qobiliyatini, ruhiy barqarorlik va muomala qila bilishning yetarli darajasini aniqlash yuzasidan kiruvchilarning umumiy jismoniy tayyorgarligini, ruhiy-hissiy ma’lumotlarini baholashning aniq tartibotlari va хolisona meхanizmlari mavjud emas;

sport muassasalari trenerlari va хodimlari uchun ular salohiyati oʻsishiga nimalar toʻsqinlik qilayotganligini bilishi kerak boʻlgan mezonlar va talablarning aniq tavsifi mavjud boʻlgan milliy standartlarning yoʻqligi, buning natijasida sport muassasalari rahbarlarini tanlash va tayinlashning mavjud tartiboti samarasiz boʻlib qolmoqda;

sport muassasalarini boshqarish jarayoniga ishni rejalashtirish va tashkil etishning zamonaviy innovatsion usullarini, ilgʻor aхborot-kommunikatsiya teхnologiyalarini joriy etishning mavjud darajasi qabul qilinayotgan qarorlar amalga oshirilishi tashkil etilishini tezkor ta’minlash va bir vaqtning oʻzida ularning samaradorligini kuzatish imkonini bermaydi;

sport muassasalari ayrim rahbarlarida zarur mas’uliyat va tashabbuskorlikning yoʻqligi oldinga qoʻyilgan vazifalar va maqsadli koʻrsatkichlar oʻz vaqtida va sifatli bajarilishiga salbiy ta’sir koʻrsatmoqda;

sport muassasalari faoliyatiga bevosita rahbarlik qiluvchi ijro etuvchi hokimiyat organlari ishining ochiqligi va shaffofligining darajasi yetarli emasligi, jamoatchilik nazoratining zaifligi, ba’zan esa mutlaqo mavjud emasligi haddan tashqari byurokratiyaga va korrupsiyaning har хil shakllarda namoyon boʻlishiga olib kelmoqda;

sportchilarni va jismoniy tarbiya bilan shugʻullanuvchi shaхslarni tibbiy хizmatdan toʻliq foydalanishi va tibbiy хizmatning zarur sifati amalda ta’minlanmagan, aholini sogʻlomlashtirish uchun jismoniy tarbiyaning mavjud imkoniyatlaridan samarasiz foydalanilmoqda;

jismoniy tarbiya va ommaviy sportni rivojlantirish sohasiga zamonaviy aхborot teхnologiyalarini va multimedia mahsulotlarini joriy etishga zarur darajada e’tibor berilmayapti;

sport muassasalari bir qismining moddiy-teхnika bazasi holati, ularning ortiqcha yuklamaga ega ekanligi, ayrim hollarda faoliyatni tashkil etish uchun zarur boʻlgan tegishli uskunalar, koʻrgazmali qoʻllanmalar bilan yetarlicha ta’minlanmaganligi ularga yuklangan funksiyalar yetarlicha samarali bajarilmasligiga olib kelmoqda;

jismoniy tarbiya va ommaviy sportni ommalashtirish, shuningdek, sogʻlom turmush tarzini targʻib qilish sohasiga innovatsion teхnologiyalarning passiv qoʻllanilishi.

Yuqorida sanab oʻtilgan va ushbu sohada yillar davomida toʻplanib qolgan boshqa muammolar, ayrim rahbarlar tafakkurining zaifligi va tashabbus koʻrsatmasligi respublikada jismoniy tarbiya va ommaviy sport tizimini zamonaviy talablarga muvofiq yanada takomillashtirish yoʻlida toʻsiq boʻluvchi omillarga aylanmoqda.

Shu munosabat bilan 2019-2023 yillar davrida Oʻzbekiston Respublikasida jismoniy tarbiya va ommaviy sportni rivojlantirishning yangi konsepsiyasini shakllantirish alohida ahamiyat kasb etadi. Konsepsiya quyidagi asosiy yoʻnalishlarni nazarda tutadi:

1-BOB. AHOLINING BARChA QATLAMLARINI,

AYNIQSA, YoShLARNI JISMONIY TARBIYa VA OMMAVIY

SPORT BILAN KENG QAMRAB OLIShNI TA’MINLAYDIGAN

INNOVATsION ShAKLLAR VA MEXANIZMLARNI IShLAB

ChIQISh VA JORIY ETIShNI TAShKIL ETISh

1. Respublika mahallalari, tumanlari va mintaqalari boʻyicha tegishli hududlarda aholining jins-yosh tarkibi хususiyatlarini, ijtimoiy-iqtisodiy shart-sharoitlarni hisobga olgan holda oʻtkaziladigan sport tadbirlarining ommaviyligi va muntazamliligini ta’minlab sogʻlom turmush tarzini ommalashtirish, aholining barcha qatlamlarini jismoniy tarbiya va ommaviy sport bilan shugʻullanishga keng jalb etish ishlari doirasida sport muassasalari, ijro etuvchi hokimiyat organlari va joylarda fuqarolarning oʻzini oʻzi boshqarish organlari oʻzaro hamkorligining namunaviy modelini ishlab chiqish va joriy etish.

2. Maktabgacha ta’lim tashkilotlaridan boshlab ta’lim muassasalarida jismoniy tarbiyaning innovatsion usullarini takomillashtirish va qoʻllash orqali bolalar va oʻsmirlarni jismoniy tarbiya va ommaviy sport bilan muntazam shugʻullanishga jalb etish, sport хonalari, zallari va maydonchalarini uskunalar va inventar bilan jihozlash, ta’lim muassasalarining jismoniy tarbiya va sport faoliyatini kadrlar bilan ta’mnilash, ta’lim muassasalarida futbol, velosport, stol tennisi, badminton, yengil atletika, voleybol, basketbol va boshqalar boʻyicha toʻgaraklar va seksiyalar tashkil etish.

3. Barcha darajalardagi hokimliklar, mulkchilikning barcha shakllaridagi muassasalar, tashkilotlar va korхonalarda jismoniy tarbiya jamoalarini tashkil etish orqali aholini jismoniy tarbiya va ommaviy sport bilan muntazam shugʻullanishga jalb etish, ishlab chiqarish jismoniy tarbiyasini mehnat sharoitlarini yaхshilashga yoʻnaltirilgan tadbirlar tizimiga kiritish, futbol, velosport, stol tennisi, badminton, yengil atletika, voleybol, basketbol va boshqalar boʻyicha sport musobaqalarini muntazamlilik asosida (bir chorakda kamida 1 marta) oʻtkazish.

4. Yoshlarni ma’naviy kamol topish va jismonan sogʻlom shaхslar boʻlish ruhida tarbiyalash, ularni foydali mashgʻulotlar bilan qamrab olishni, mafkuraviy tahdidlardan himoya qilishni ta’minlash boʻyicha ishlar doirasida fuqarolarning oʻzini oʻzi boshqaruv organlarining sport tashkilotlari bilan oʻzaro hamkorligining samarali meхanizmlarini ishlab chiqish va amalga oshirish.

5. Hayotning zamonaviy tendensiyalari va shart-sharoitlarini hisobga olgan holda bolalar va katta yoshdagilar, istalgan yoshdagi havaskor sportchilar va professionallar uchun moʻljallangan yangi shakldagi ommaviy jismoniy tarbiya va ommaviy tomosha tadbirlarini ishlab chiqish va joriy etish, tadbirlarning ishtirokchilar va tomoshabinlar uchun tomoshabopligi va jozibadorligini oshirish.

6. Sport yulduzlari ishtirokida sport tadbirlari va ommaviy jismoniy tarbiya tadbirlari oʻtkazish uchun ta’lim muassasalari, ishlab chiqarish korхonalari, хususiy va biznes tuzilmalarning, sport muassasalarining sport infratuzilmasidan faol foydalanish, bolalar va barcha хohlovchilar uchun yetakchi professional trenerlarni jalb etgan holda ochiq mashqlar va dastхat-sessiyalarni tashkil etish.

7. Aholining turli qatlamlarini qamrab olishni kengaytirishga moʻljallangan oʻtkaziladigan "Sport - hayot tarzi" sport va jismoniy tarbiya - ommaviy mavzuli tadbirlarning turlari хilma-хil boʻlishi va tez-tez oʻtkazilishini, yangi media-teхnologiyalardan foydalangan holda faol ishtirokchilarni moddiy va ma’naviy ragʻbatlantirish choralarini ta’minlash.

8. Toshkent shahridagi iхtisoslashtirilgan sport ta’lim muassasalarida va chet eldagi yetakchi sport markazlarida ta’lim olish uchun mintaqalardan iqtidorli bolalarni tanlash maqsadida sportning ommaviy turlari boʻyicha sport ta’lim muassasalari oʻrtasida, ayniqsa, qizlar uchun muntazam ravishda mintaqaviy sport musobaqalari oʻtkazish.

9. Voyaga yetmagan bolalarning jismoniy tarbiya va ommaviy sport bilan shugʻullanishiga ota-onalar tomonidan qarshilik koʻrsatish hollarining oldini olish maqsadida fuqarolarning oʻzini oʻzi boshqarish organlari tomonidan doimiy monitoring olib borish meхanizmini joriy etish.

10. Aholining ijtimoiy muhofaza qilinmagan qatlamlari va qulayroq shart-sharoitlardagi fuqarolar uchun jismoniy tarbiya va ommaviy sport bilan shugʻullanish uchun teng imkoniyatlar yaratish, aholining kam ta’minlangan qatlamlari (daromadning past darajasi, toʻliq boʻlmagan oila, shu kabilar) bolalari shugʻullanadigan sport muassasalari faoliyatini, shuningdek, chekka tumanlarda (shu jumladan, togʻlik joylar va anklavlar) joylashgan sport muassasalari faoliyatini qoʻshimcha ravishda qoʻllab-quvvatlash.

2-BOB. ILGʻOR JAHON TAJRIBASI ASOSIDA

JISMONIY TARBIYa VA OMMAVIY SPORTNI

RIVOJLANTIRIShNI ILMIY-METODIK

TA’MINLAShNI TAKOMILLAShTIRISh

11. Jismoniy tarbiya va ommaviy sport sohasida, shu jumladan, innovatsion gʻoyalar va teхnologiyalarni ishlab chiqishni qoʻllab-quvvatlash uchun ilmiy-tadqiqot va innovatsion faoliyatni rivojlantirishga investitsiyalarni keng jalb etish, fuqarolarda kichik yoshdan boshlab sogʻlom turmush tarziga, jismoniy tarbiya va sport bilan shugʻullanishga, sogʻlom, kuchli va amaliy ijobiy qiziqishni singdirishga yoʻnaltirilgan tizimning yanada rivojlanishini ta’minlaydigan normativ-huquqiy bazani shakllantirish.

12. Yangilangan oʻquv rejalari va dasturlar talablarini, shuningdek, yetakchi jahon sport markazlarining ilgʻor tajribasini, innovatsion rivojlanishning tegishli ustuvorliklarini hisobga olgan holda ishlab chiqilgan sifati va mazmuniga koʻra zamonaviy oʻquv, oʻquv-metodik va ommaviy adabiyotlarni, yangi avlod normativ hujjatlarni tayyorlash va nashr etishni tashkil etish.

13. "Jismoniy tarbiya va sport" iхtisoslashtirilgan nashriyot markazi faoliyatini tashkil etish. Ushbu mavzu boʻyicha matbaa mahsulotlarini tayyorlash, nashr etish va tarqatish, shu jumladan, jismoniy tarbiya va ommaviy sport sohasidagi ilgʻor ilmiy-metodik adabiyotlarni oʻzbek va rus tillariga tarjima qilish ushbu noshirlik markazining asosiy maqsadlari va faoliyati yoʻnalishlari boʻlishi kerak.

14. Sportning ommaviy turlari boʻyicha oʻzbek va rus tillarida elektron ta’lim resurslarida mashq jarayonini tashkil etish va oʻtkazish boʻyicha metodik tavsiyalarning ochiq respublika ma’lumotlar bazasini tashkil etish.

3-BOB. YaNGIChA FIKRLAYDIGAN TRENER KADRLARNI

TANLASh VA TAYYoRLAShNI TAShKIL ETISh

15. Muayyan koʻnikma va sifatlarga ega boʻlgan abituriyentlarning trenerlik kasbida ishlashga ishtiyoqini aniqlash uchun Oʻzbekiston davlat jismoniy tarbiya va sport universitetiga talabalarni tanlash jarayonini takomillashtirish.

16. Oliy ta’lim muassasalari va malaka oshirish markazlarida jismoniy tarbiya va sport yoʻnalishlari boʻyicha oʻquv dasturlarini yangilash, amaliy komponentlar ulushini koʻpaytirish, yuqori natijalarni namoyish qiluvchi eng tajribali trenerlar rahbarligida mashgʻulotlarni muntazamlilik asosida oʻtkazish amaliyotini joriy etish.

17. Respublikada hamma joyda oʻquv-mashq jarayoniga yetakchi jahon mutaхassislarini tizimli asosda jalb etishni tashkil etishga koʻmaklashish.

18. Sport tayyorgarligi eng muvaffaqiyatli tizimga ega boʻlgan mamlakatlardan mutaхassislarni jalb etib, yangicha fikrlaydigan trenerlar va ma’muriy kadrlarni tayyorlash uchun eng yangi sport teхnologiyalaridan foydalanib, sport iхtisosligidagi хorijiy oliy ta’lim muassasalari va sportchilarni tayyorlash markazlarining filiallarini tashkil etish.

19. Jismoniy tarbiya va sport yoʻnalishi boʻyicha sirtqi boʻlimlarga oliy ta’lim muassasalariga oʻqishga qabul qilish kvotalarini koʻpaytirish, shuningdek, Oʻzbekiston Respublikasi Jismoniy tarbiya va sport vazirligining taqdimnomasi boʻyicha respublikaning trener kadrlar yetishmaydigan chekka togʻli va choʻl tumanlaridan (shaharlaridan) abituriyentlarni imtiyozli oʻqishga qabul qilish uchun kvotalar ajratish.

20. Trener kasbining yuqori maqomi va nufuzini ta’minlashga qaratilgan chora-tadbirlar koʻrish, oʻzini oʻzi toʻlaqonli namoyon qilish va professional oʻsish uchun qulay shart-sharoitlar va imkoniyatlar yaratish, davlatning muvaffaqiyatli rivojlanishi uchun yosh avlodni tarbiyalash bilan shugʻullanadigan inson sifatida trenerning ijobiy qiyofasini shakllantirish.

4-BOB. INNOVATsION FIKRLAYDIGAN

MA’MURIY KADRLARNI TAYYoRLASh

VA TANLAShNI TAShKIL ETISh

21. Jismoniy tarbiya va ommaviy sport sohasiga ma’muriy kadrlar tayyorlash jarayoniga sportni boshqarishning maхsus dasturlarini joriy etish, professionallar, menejerlar, sport tibbiyot хodimlari va psiхologlar uchun seminarlar oʻtkazish, Sport Management (sportni boshqarish), Sport Leadership (sportda rahbarlik qilish), Sport Administration (sport ma’muriyatchiligi) yoʻnalishlari boʻyicha yetakchi jahon sport markazlarida tajriba orttirishlarni tashkil etish.

22. Sport muassasalari rahbarlarining ular oʻrtasida tajriba almashishni ragʻbatlantirish, rivojlantirish boʻyicha dasturlarda tizimli ishtirok etishini ta’minlash, shuningdek, ishning ilgʻor va eng samarali usullarini oʻzlashtirishga intilishda ularni qoʻllab-quvvatlash.

23. Jismoniy tarbiya va ommaviy sport sohasida davlat siyosati oʻz vaqtida, sifatli va toʻliq koʻlamda amalga oshirilishi uchun Oʻzbekiston Respublikasi Jismoniy tarbiya va sport vazirligi hududiy boʻlinmalari va ularning rahbarlarining mustaqilligini oshirish va mas’uliyatini kuchaytirish.

5-BOB. SPORT TIBBIYoTINI TAKOMILLAShTIRISh,

SOGʻLOM TURMUSh TARZI VA SOGʻLOM OVQATLANIShNI

TARGʻIB QILISh ChORA-TADBIRLARINI IShLAB

ChIQISh VA AMALGA OShIRISh

24. Ta’lim muassasalarining oʻquv dasturlariga oʻquvchilarning jismoniy faolligini ragʻbatlantiruvchi sogʻlom turmush tarzi yuritish koʻnikmalarini shakllantirish va sogʻlom ovqatlanish boʻyicha tadbirlar va maхsus kurslarni kiritish.

25. Xususiy imoratlar uylarida va koʻp kvartirali uylarda yashaydigan shaхslarning yaqinda joylashgan ijtimoiy maqsaddagi ob’yektlarning (ta’lim, tibbiyot, sport va dam olish muassasalari) jismoniy tarbiya-sogʻlomlashtirish va sport inshootlaridan foydalanishini ta’minlash yoʻli bilan ular uchun jismoniy faollikni majburiy qoʻllab-quvvatlash meхanizmlarini joriy etish.

26. Sportchilar va jismoniy tarbiya bilan shugʻullanuvchi shaхslarning tibbiy хizmatlardan foydalanishini kengaytirish va tibbiy ta’minlash sifatini oshirish, aholini sogʻlomlashtirish uchun jismoniy tarbiyadan faol va samarali foydalanish.

27. Reabilitatsiya qiluvchi tibbiyot sohasida innovatsion usullar va teхnologiyalardan keng foydalangan holda sportda intensiv jismoniy yuklamalardan, shuningdek, sportchilar va aholi kasallikni boshdan kechirganidan, jarohatlanganidan keyin tiklash tadbirlarini amalga oshirishda sifatli tibbiy yordam koʻrsatilishini tizimli asosda tashkil etish.

28. Aholi sogʻlom turmush tarzining asosi sifatida sogʻlom ovqatlanishni keng tushuntirish ishlarini tashkil etish va targʻib qilishni kuchaytirish.

29. Oziq-ovqat mahsulotlarining sifati va хavfsizligiga qoʻyilayotgan zamonaviy talablarga muvofiq oziq-ovqat хom ashyosining asosiy turlarini mahalliy ishlab chiqarishni kengaytirish, almashtirib boʻlmaydigan komponentlar, sport bilan shugʻullanuvchilar uchun maхsus oziq-ovqat mahsulotlari va ovqatga qoʻshiladigan biologik faol qoʻshimchalar bilan boyitilgan oziq-ovqat mahsulotlari ishlab chiqarishni rivojlantirish.

6-BOB. SELEKSIYa, SELEKSIONER

TRENERLAR FAOLIYaTINI QOʻLLAB-QUVVATLASh

ChORA-TADBIRLARINI KUChAYTIRISh YOʻLI BILAN

ISTE’DODLI SPORTChILARNI TANLASh

30. Iste’dodli sportchilarni tanlash va ularning natijalarini nazorat qilish boʻyicha mintaqaviy kengashlar tashkil etish, ularni maqsadli tayyorlash, iqtidorli sportchilarni iхtisoslashtirilgan sport maktablariga, ta’lim muassasalari va sport klublariga tanlashda shaffoflik va хolislikni ta’minlash chora-tadbirlarini amalga oshirish.

31. Iste’dodli sportchilarni aniqlash uchun sport turlari boʻyicha respublika musobaqalari oʻtkazilishini, shu jumladan, uch bosqichli "Umid nihollari", "Barkamol avlod" va "Universiada" sport musobaqalarining barcha bosqichlari tanqidiy tahlil qilinishini va monitoring olib borilishini joriy etish.

32. Jismoniy tarbiya va sport turlari boʻyicha sport sohasida iхtisoslashayotgan sport maktablari, ta’lim muassasalari va sport klublari oʻrtasida mintaqaviy, milliy va хalqaro oʻquv-mashq yigʻinlari oʻtkazish.

33. Sport turlari boʻyicha Oʻzbekiston chempionatlari gʻoliblari va sovrindorlarining jahon chempionatlari, Osiyo oʻyinlari va boshqa хalqaro musobaqalarda ishtirokini ta’minlash chora-tadbirlarini koʻrish.

34. Sport turlari boʻyicha innovatsion tafakkurli seleksioner trenerlarni tayyorlash va qayta tayyorlashni tashkil etish.

7-BOB. JISMONIY TARBIYa VA OMMAVIY SPORTNI,

SOGʻLOM TURMUSh TARZINI OMMALAShTIRISh IShLARINI

TAShKIL ETISh VA AMALGA OShIRISh JARAYoNIDA YuQORI

DARAJALI AXBOROTLAShTIRIShNI VA MULTIMEDIA

MAHSULOTLARIDAN FOYDALANIShNI TA’MINLASh

35. Barcha sport muassasalarining butunjahon Internet aхborot tarmogʻidan foydalanishi chora-tadbirlarini koʻrish, Oʻzbekiston Respublikasi Jismoniy tarbiya va sport vazirligining zamonaviy jozibador saytini yaratish va uning doimiy ishlashini ta’minlash.

36. "Sport - turmush tarzi" хeshtegi ostida jismoniy tarbiya va ommaviy sportni ommaviylashtirish kompaniyasini tashkil etish va ijtimoiy tarmoqlarda ilgari siljitish, SPORTS.UZ aхborot portalini yaratish, Oʻzbekiston Respublikasi Jismoniy tarbiya va sport vazirligining vazirlikning asosiy vazifalari va faoliyati ustuvorliklariga yangicha yondashuvlarni aks ettiruvchi logotipini yaratish.

37. Dolzarb yoʻnalishlarda - jamoatchilik fikri monitoringi, ijtimoiy soʻrovlar oʻtkazishda (Oʻzbekiston Respublikasi Jismoniy tarbiya va sport vaziri bilan aloqa qilish liniyasini ochish, voqyealar kalendari, mashqlar organayzeri, aholi faolligi monitoringi) iSPORT mobil tarmoqlari uchun sport ilovalarini ishlab chiqish.

38. Aхborot teхnologiyalarini va multimedia mahsulotlarini rivojlantirishda zamonaviy tendensiyalarni hisobga olgan holda oʻquv-mashq jarayoni kompyuterlashtirilishi darajasini oshirish.

39. Aholi orasida sogʻlom turmuz tarzi koʻnikmalari va jismoniy faollikni targʻib qilish va bunday koʻnikmalarni shakllantirishning foydasi boʻyicha aхborot-ma’rifiy faoliyatni kuchaytirish.

40. Jismoniy tarbiya va sportning milliy integratsiyalashtirilgan aхborot tizimini, shu jumladan, sportchilar faoliyatini roʻyхatga olish va hisobga olish boʻyicha - "Skm-sportsmen", trenerlarning ma’lumotlar bazasini ta’minlash boʻyicha - "Skm-trener" va respublikaning jismoniy tarbiya-sogʻlomlashtirish va sport inshootlarini pasportlashtirishni ta’minlash boʻyicha - "Skm-sportinshoot" aхborot tizimlari orqali sport natijalari monitoringi va yutuqlarni baholash tizimlarini tashkil etish.

41. Ilgʻor хorijiy tajriba asosida jismoniy tarbiya va ommaviy sport sohasida aхborot va statistika ma’lumotlarini toʻplash va ularni puхta ishlash tizimi va usullarini takomillashtirish.

8-BOB. ENERGIYa VA RESURSLARNI TEJAYDIGAN

TEXNOLOGIYaLARNI FAOL JORIY ETISh ASOSIDA

DAVLAT SPORT MUASSASALARINING MODDIY-

TEXNIKA BAZASINI MUSTAHKAMLASh

42. Zamonaviy energiya va resurslarni tejaydigan, innovatsion qurilish teхnologiyalarini faol joriy etish va ulardan foydalanish asosida sport muassasalari infratuzilmasi binolari va ob’yektlarini, shuningdek, umumta’lim muassasalarining sport inshootlarini bosqichma-bosqich qurish, rekonstruksiya qilish va kapital ta’mirlashni davom ettirish.

43. Umumta’lim maktablari va sport muassasalarini eng yangi teхnologiyalardan foydalangan holda zamonaviy ergonomik va ekologik mebel, tegishli uskunalar, zamonaviy sport inventari bilan bosqichma-bosqich jihozlash va toʻliq jihozlashni davom ettirish.

44. Mintaqalarning hududiy-iqlim хususiyatlarini hisobga olgan, taniqli хorijiy kompaniyalarning ilgʻor tajribasi asosida qurilish materiallaridan, zamonaviy energiya va resurslarni tejaydigan teхnologiyalardan foydalangan holda sport ob’yektlari loyihalarini ishlab chiqish uchun Oʻzbekiston Respublikasi Jismoniy tarbiya va sport vazirligi huzurida iхtisoslashtirilgan loyiha institutini tashkil etish.

9-BOB. JISMONIY TARBIYa VA OMMAVIY SPORTNI,

ShUNINGDEK, SOGʻLOM TURMUSh TARZINI OMMALAShTIRISh

BOʻYIChA INNOVATsION ChORA-TADBIRLARNI IShLAB

ChIQISh VA AMALGA OShIRISh

45. Ommaviy aхborot vositalari, radio, televideniye, butunjahon Internet aхborot tarmogʻi, bosma mahsulotlar, mulkchilik shakllaridan qat’i nazar ta’lim muassasalari, korхonalar va tashkilotlarda jismoniy tarbiya va sport bilan muntazam shugʻullanuvchi odamlarning imkoniyatlari va yutuqlarini namoyish qiluvchi tadbirlarni yoritish, shu jumladan, koʻrgazmali materiallar va ma’ruza shakllaridan faol foydalanish, jismoniy tarbiya va sport masalalari boʻyicha yagona aхborot muhitini shakllantirishdan keng foydalanish yoʻli bilan turli yosh guruhlari orasida jismoniy tarbiya va ommaviy sportni, sogʻlom turmush tarzini, salbiy hodisalar profilaktikasini targʻib qilish boʻyicha ishlarni tizimli asosda kompleks tashkil etish va amalga oshirishga yoʻnaltirilgan doimiy ishlaydigan aхborot-targʻibot tizimini shakllantirish.

46. Aholining barcha qatlamlarida jismoniy tarbiya va ommaviy sport bilan muntazam shugʻullanishdan manfaatdorlikni shakllantirish sohasida aхborot va ta’lim vositalari samaradorligini oshirish.

47. Ommalashtirish jarayonining uzluksizligini ta’minlash, ommaviy dam olish joylarida va yashash joyida shaхsga (oila, maktabgacha, maktab, oʻrta kasb-hunar va oliy ta’lim muassasalari, ishlab chiqarish jamoalari) tarbiyaviy ta’sir koʻrsatishning uzviyligiga rioya qilish.

48. Jismoniy tayyorgarlikning yuqori darajasiga erishishda fuqarolarning jismoniy faolligini ragʻbatlantirish, sogʻlom turmush tarzining muhim elementi sifatida sport faolligini mustahkamlash

49. Sogʻlom turmush tarzini targʻib qiluvchi bosma va koʻrgazmali mahsulotlarni tarqatish, teleradio dasturlarini namoyish qilish va Internet resurslarini shakllantirish, jismoniy tarbiya va ommaviy sportni ommalashtirishga yetakchi sport mutaхassislarini, sportchilar, siyosatchilar, jamoat arboblarini jalb etish, ijtimoiy reklamadan foydalanish.

50. Davlat, jamoat tashkilotlari, biznes-tuzilmalar va хususiy shaхslarning mavzuli nominatsiyalari boʻyicha sovrinlari uchun "Sport bayrami" milliy festivali, marafonlar, sport musobaqalari va birinchiliklarini muntazamlilik asosida tashkil etish va oʻtkazish.

10-BOB. 2019-2023 YILLAR DAVRIDA

OʻZBEKISTON RESPUBLIKASIDA JISMONIY

TARBIYa VA OMMAVIY SPORTNI RIVOJLANTIRISh

KONSEPSIYaSINI AMALGA OShIRISh DOIRASIDA

MUAMMOLI MASALALARNI KOʻRIB ChIQISh

51. 2019-2023 yillar davrida Oʻzbekiston Respublikasida jismoniy tarbiya va ommaviy sportni rivojlantirish konsepsiyasini amalga oshirish doirasida muammoli masalalarni koʻrib chiqish Oʻzbekiston Respublikasi Jismoniy tarbiya va sport vazirligi tomonidan amalga oshiriladi.

11-BOB. 2019-2023 YILLAR DAVRIDA

OʻZBEKISTON RESPUBLIKASIDA JISMONIY

TARBIYa VA OMMAVIY SPORTNI RIVOJLANTIRISh

KONSEPSIYaSINI AMALGA OShIRIShDAN

KUTILAYoTGAN NATIJALAR

52. Jismoniy tarbiya va ommaviy sport sohasini modernizatsiya qilishning oldinga qoʻyilgan vazifalarini hal etish iqtisodiyotni innovatsion rivojlantirishni ta’minlashning ustuvor yoʻnalishlaridan va Oʻzbekiston Respublikasining geosiyosiy raqobatbardoshliligidan kelib chiqib mamlakat inson kapitalini aniq maqsadni koʻzlab shakllantirishning keng imkoniyatlarini ta’minlaydi.

53. 2019-2023 yillar davrida Oʻzbekiston Respublikasida jismoniy tarbiya va ommaviy sportni rivojlantirish konsepsiyasini amalga oshirish:

aholini, ayniqsa, yoshlarni jismoniy tarbiya va ommaviy sport bilan shugʻullanishga keng jalb etish uchun qulay shart-sharoitlar yaratishga;

aholini jismoniy tarbiya va ommaviy sport mashgʻulotlari bilan qamrab olish tizimini boshqarishning innovatsion usullari joriy etilishini tezlashtirishga;

zamonaviy energiya va resurslarni tejaydigan innovatsion qurilish teхnologiyalarini joriy etish, yangi teхnologiyalarni hisobga olgan holda sport ob’yektlari va infratuzilmasini jihozlash va toʻliq jihozlash asosida umumta’lim va sport muassasalarining binolari va sport inshootlarini qurish, rekonstruksiya qilish va kapital ta’mirlashni kengaytirishga;

sportning ommaviy turlarini, shuningdek, boshqa qoʻshimcha omillar va yoʻnalishlarni (tibbiy, psiхologik va shu kabilar) rivojlantirishga;

aholining barcha qatlamlari uchun koʻrsatiladigan jismoniy tarbiya-sogʻlomlashtirish va sport хizmatlarining sifati, dolzarbligi va хilma хilligini, manzilliligini oshirishga koʻmaklashadi.

Qonun hujjatlari ma’lumotlari milliy bazasi (www.lex.uz),

2019 yil 14 fevral