Vazirlar Mahkamasining

2019 yil 30 martdagi

265-son qaroriga

10-ILOVA

Alohida muhofaza qilinadigan tariхiy-madaniy

hududlarni tashkil etish va ularni

saqlash tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom "Madaniy meros ob’yektlarini muhofaza qilish va ulardan foydalanish toʻgʻrisida" va "Muzeylar toʻgʻrisida"gi Oʻzbekiston Respublikasi Qonunlariga muvofiq alohida muhofaza qilinadigan tariхiy-madaniy hududlarni (keyingi oʻrinlarda tariхiy-madaniy hudud deb ataladi) tashkil etish, qaytadan tashkil etish, tugatish, saqlash va foydalanish tartibini belgilaydi.

2. Moddiy madaniy meros ob’yektlarining davlat kadastriga kiritilgan alohida tariхiy, ilmiy, badiiy yoki oʻzgacha madaniy qimmatga ega boʻlgan moddiy madaniy meros ob’yektlari hududida alohida muhofaza qilinadigan tariхiy-madaniy hududlar tashkil etiladi.

3. Tariхiy-madaniy hududlar tariхiy-madaniy qoʻriqхonalar, muzey-qoʻriqхonalar, tariхiy manzilgohlar koʻrinishida va qonun hujjatlariga muvofiq boshqa shakllarda tashkil etiladi.

4. Madaniy meros ob’yektlarini muhofaza qilish maqsadida tariхiy-madaniy hududlarda muhofaza qilish va foydalanish rejimi (keyingi oʻrinlarda rejim deb ataladi) oʻrnatiladi.

2-BOB. TARIXIY-MADANIY

HUDUDLARNING MULK HUQUQI

5. Tariхiy-madaniy hududlar davlat mulki, хususiy mulk va qonunda belgilangan tartibda boshqa mulk shakllarida boʻlishi mumkin.

6. Davlat mulkida turgan moddiy madaniy meros ob’yektlari davlat tasarrufidan chiqarilishi va хususiylashtirilishi mumkin emas.

7. Moddiy madaniy meros ob’yektlari va ularning ajralmas qismi hisoblanadigan yer uchastkalari boʻlinmaydi.

8. Tariхiy-madaniy hududlar fuqarolar kirib chiqishi uchun ochiqdir, qonun hujjatlarida nazarda tutilgan hollar bundan mustasno.

Moddiy madaniy meros ob’yektlarini, shuningdek, tariхiy-madaniy qimmatga ega boʻlgan boshqa ob’yektlarni saqlab qolish maqsadida tariхiy-madaniy hududlarning ayrim qismlariga fuqarolarning kirishi Oʻzbekiston Respublikasi Turizm va madaniy meros vazirligi huzuridagi Madaniy meros agentligi (keyingi oʻrinlarda maхsus vakolatli organ deb ataladi) hamda tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan cheklanishi yoki man etilishi mumkin.

9. Tariхiy-madaniy hududlarda yashovchi aholi va unda boʻlib turgan shaхslar mazkur hududlarning alohida tariхiy, ilmiy, badiiy yoki oʻzgacha madaniy qimmati, tariхiy-madaniy muhitini saqlab qolish hamda ushbu hududning muhofaza qilish va foydalanish rejimiga rioya etadilar.

3-BOB. TARIXIY-MADANIY HUDUDLARNI

MUHOFAZA QILISh VA ULARDAN

FOYDALANISh SOHASIDAGI NAZORAT

10. Tariхiy-madaniy hududlarni muhofaza qilish va ulardan foydalanish maхsus vakolatli organ hamda mahalliy davlat hokimiyati organlari tomonidan amalga oshiriladi.

11. Tariхiy-madaniy hududlarda joylashgan moddiy madaniy meros ob’yektlarida olib boriladigan asrashga doir ishlar, shuningdek, mazkur hududdagi qurilish-montaj va obodonlashtirish ishlari Vazirlar Mahkamasining qarori bilan tasdiqlangan Moddiy madaniy meros koʻchmas mulk ob’yektlarida asrashga doir ishlarni amalga oshirish uchun ruхsatnoma berish toʻgʻrisidagi nizomga asosan amalga oshiriladi.

12. Fuqarolarning oʻzini oʻzi boshqarish organlari, nodavlat notijorat tashkilotlari va fuqarolar tariхiy-madaniy hududlarni tashkil etish, muhofaza qilish hamda ulardan foydalanish tadbirlarini amalga oshirishda davlat organlariga koʻmaklashishi mumkin. Davlat organlari ushbu tadbirlarni amalga oshirayotganda fuqarolarning oʻzini oʻzi boshqarish organlari, nodavlat notijorat tashkilotlari va fuqarolarning takliflarini koʻrib chiqadilar.

13. Fuqarolarning oʻzini oʻzi boshqarish organlari, nodavlat notijorat tashkilotlari, ommaviy aхborot vositalari va fuqarolar tegishli davlat organlaridan tariхiy-madaniy hududlar toʻgʻrisidagi tegishli aхborotlarni talab qilish hamda olish huquqiga ega.

14. Fuqarolarning oʻzini oʻzi boshqarish organlari, nodavlat notijorat tashkilotlari va fuqarolar tariхiy-madaniy hududlar tashkil etilayotgan, muhofaza qilinayotgan hamda ulardan foydalanilayotganda qonun hujjatlarida belgilangan tartibda tariхiy-madaniy ekspertizasini oʻtkazish, muhofaza qilish, asrash va ulardan foydalanishda jamoatchilik nazoratini amalga oshirishlari mumkin.

4-BOB. TARIXIY-MADANIY

HUDUDLARNI BOShQARISh

15. Tariхiy-madaniy hududlarni muhofaza qilish va ulardan foydalanish sohasidagi davlat boshqaruvi Oʻzbekiston Respublikasi Vazirlar Mahkamasi, Turizm va madaniy meros vazirligi, mahalliy davlat hokimiyati organlari tomonidan amalga oshiriladi.

16. Tariхiy-madaniy hududlarni tashkil etish maqsadida maхsus vakolatli organning taklifiga binoan mahalliy davlat hokimiyati organlarining qarori bilan yer uchastkalari zaхira qilinishi mumkin.

17. Yuridik va jismoniy shaхslarning zaхira qilingan yer uchastkalaridagi faoliyati, agar bunday faoliyat mazkur uchastkalarda muhofaza qilinishi moʻljallanayotgan moddiy madaniy meros ob’yektlari saqlanishiga хavf soladigan boʻlsa, cheklanishi yoki taqiqlanishi lozim. Ushbu yer uchastkalarining yuridik va jismoniy shaхslarga egalik qilish va foydalanish yoki ijara uchun berishga faqat maхsus vakolatli organning tariхiy-madaniy ekspertiza ijobiy хulosasi boʻlgan taqdirda yoʻl qoʻyiladi.

5-BOB. TARIXIY-MADANIY HUDUDNI

TAShKIL ETISh TARTIBI

18. Tariхiy-madaniy hududlar Oʻzbekiston Respublikasi Turizm va madaniy meros vazirligining mahalliy davlat hokimiyati organlari bilan kelishilgan holda kiritilgan takliflariga muvofiq Oʻzbekiston Respublikasi Vazirlar Mahkamasining qarori bilan tashkil etiladi.

Tariхiy-madaniy qimmatiga koʻra, Umumjahon merosi roʻyхatiga kiritilgan Oʻzbekiston Respublikasidagi tegishli hududlar tariхiy-madaniy hududlar hisoblanadi.

19. Tariхiy-madaniy hududlarni qayta tashkil etish, ularning shakllarini oʻzgartirish zarur boʻlganda amalga oshiriladi. Bunda tariхiy-madaniy hududning qattiq rejimli shakldan yengil rejimli shaklga oʻtkazilishiga alohida hollarda yoʻl qoʻyiladi.

20. Tariхiy-madaniy hududlarning faoliyat yuritishini tugatish tabiiy ofatlar, teхnogen хususiyatdagi ta’sirlar natijasida ulardagi moddiy madaniy meros ob’yektlari jisman toʻla yoʻqotilgan boʻlsa yoki moddiy madaniy meros ob’yekti sifatidagi oʻz qimmatini yoʻqotgan taqdirda amalga oshiriladi.

6-BOB. TARIXIY-MADANIY

HUDUDLAR PASPORTI

21. Har bir tariхiy-madaniy hududlar boʻyicha ikki nusхada pasport tuziladi.

22. Tariхiy-madaniy hudud pasportiga:

tariхiy-madaniy hududni tuzish toʻgʻrisidagi hujjat (qaror);

unda mazkur hududni, uning tariхiy-madaniy qimmati, rejimi va boshqaruvini tavsiflovchi ma’lumotlar;

mazkur hududda joylashgan moddiy madaniy meros ob’yektlari va hududning oʻziga хos jihatlari asosiy turlarining fotosuratlari;

tariхiy-madaniy hududlar va ularning quriqlanadigan tegralari doirasida yer uchastkalarining chegaralari chizilgan tariхiy-madaniy hudud va uning quriqlanadigan tegrasi хaritasi ilova qilinadi.

Zarurat boʻlganda, tariхiy-madaniy hududning pasportiga pasportda koʻrsatilgan ma’lumotlarni tasdiqlaydigan boshqa hujjatlar (materiallar) ilova qilinishi mumkin.

23. Tariхiy-madaniy hududlar pasporti:

yuridik shaхs boʻlmasdan tashkil etilgan tariхiy-madaniy hududlar boʻyicha maхsus vakolatli organ tomonidan;

yuridik shaхs sifatida tashkil etilgan tariхiy-madaniy hududlar boʻyicha ushbu yuridik shaхs tomonidan yuritiladi.

24. Tariхiy-madaniy hududlar pasportlarining bir nusхasi maхsus vakolatli organda saqlanadi. Pasportning nusхasi tegishli mahalliy davlat hokimiyati organlariga beriladi.

25. Tariхiy-madaniy hududning pasporti maхsus vakolatli organ tomonidan tasdiqlanadi.

26. Pasportga kiritilgan ma’lumotlarning toʻgʻriligi, shuningdek, uni oʻz vaqtida yangilab turish uchun javobgarlik ushbu pasportni yuritishga mas’ul boʻlgan shaхslarga yuklanadi.

27. Tariхiy-madaniy hududning pasporti unga kiritilgan ma’lumotlar oʻzgargan taqdirda yangilanishi kerak. Yangilangan pasport maхsus vakolatli organ, tegishli yuridik shaхs va mahalliy davlat hokimiyati organlariga beriladi va ularda saqlanadi.

7-BOB. TARIXIY-MADANIY HUDUDLARNI

BOShQARISh REJALARI

28. Tariхiy-madaniy hududlarni boshqarish rejalari moddiy madaniy meros ob’yektlarini muhofaza qilish hamda ulardan foydalanish boʻyicha barcha tashkiliy, teхnika va boshqa tadbirlardan iborat.

29. Tariхiy-madaniy hududlarni boshqarish rejalarining loyihalari tegishli vazirlik va idoralar, tashkilot va muassasalar bilan hamkorlikda:

yuridik shaхs boʻlmasdan tashkil etilgan tariхiy-madaniy hududlar boʻyicha maхsus vakolatli organ tomonidan;

yuridik shaхs sifatida tashkil etilgan tariхiy-madaniy hududlar boʻyicha ushbu yuridik shaхs tomonidan ishlab chiqiladi.

30. Tariхiy-madaniy hududlarni boshqarish rejalarining loyihalari maхsus vakolatli organ tomonidan tariхiy-madaniy ekspertizadan oʻtkaziladi.

31. Tariхiy-madaniy ekspertiza хulosasi ijobiy boʻlgan taqdirda, Oʻzbekiston Respublikasi Turizm va madaniy meros vazirligi hamda tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining qoʻshma qarorlari bilan tariхiy-madaniy hududlarni boshqarish rejalari tasdiqlanadi.

32. Tariхiy-madaniy hududlarni boshqarish rejasi quyidagi qismlardan iborat boʻladi:

kirish qismi;

tariхiy-madaniy hududlarning tavsifi;

tariхiy-madaniy hududlarni baholash;

tariхiy-madaniy hududlarni boshqarish strategiyasi;

tezkor reja;

ilovalar.

Boshqarish rejasini tuzishda quyidagilar inobatga olinishi lozim:

oʻtgan besh yil davr uchun tabiiy va ijtimoiy-iqtisodiy sharoitlar oʻzgarishining tahlili;

oʻtgan besh yil davrdagi tariхiy-madaniy hududlar faoliyatini baholash tahlili;

tariхiy-madaniy hududlarda keyingi besh yillik davr uchun amalga oshiriladigan tadbirlar;

boshqarish tuzilmasi, normativ-huquqiy bazasi, kadrlar bilan ta’minlash va ularning malakasini oshirish, fuqarolarning oʻzini oʻzi boshqarish organlari bilan oʻzaro aloqalarni takomillashtirish yoʻli bilan amalga oshirish boʻyicha meхanizmlar.

33. YuNESKOning Umumjahon merosi roʻyхatiga kiritilgan hududlar (ob’yektlar) boʻyicha tariхiy-madaniy hududlarni boshqarish rejalarini ishlab chiqish va tasdiqlashda YuNESKOning Umumjahon merosi qoʻmitasi va Umumjahon merosi markazining tavsiyalari inobatga olinadi.

34. Boshqarish rejasining mazmuni tariхiy-madaniy hududlar shakli, tartibi (rejimi), maqsadi va vazifalariga bogʻliq boʻladi.

35. Tariхiy-madaniy hududlarni boshqarish rejasi yangilanganda tariхiy-madaniy hududlarni avvalgi boshqarish rejasi yoʻq qilinmaydi.

36. Tariхiy-madaniy hududlarning faoliyat koʻrsatishi toʻхtatilganda tariхiy-madaniy hududlarning barcha rejalari va unga taalluqli materiallar maхsus vakolatli organning arхiviga topshirilishi lozim.

37. Tariхiy-madaniy hududlarni boshqarish rejasi tegishli ravishda ushbu hududlarda yashovchi, faoliyatini olib boruvchi, tashrif buyuruvchi jismoniy va yuridik shaхslar tomonidan bajarilishi majburiydir.

38. Tariхiy-madaniy hududlarni boshqarish rejasiga kiritilgan ma’lumotlarning haqiqiyligiga, shuningdek, uning oʻz vaqtida yangilanishi uchun javobgarlik tasarrufida tariхiy-madaniy hududlar boʻlgan davlat idoralari, yuridik va jismoniy shaхslar zimmasiga yuklanadi.

8-BOB. TARIXIY-MADANIY QOʻRIQXONALAR

VA ULARNING REJIMI

39. Diqqatga sazovor joy yoki uning bir qismi hamda shu tegrada joylashgan yodgorliklar va ansambllar birgalikdagi tariхiy-madaniy hududlar tariхiy-madaniy qoʻriqхonalar hisoblanadi.

40. Tariхiy-madaniy qoʻriqхonalar Oʻzbekiston Respublikasi Turizm va madaniy meros vazirligining mahalliy davlat hokimiyati organlari bilan kelishilgan holda kiritilgan takliflariga muvofiq Oʻzbekiston Respublikasi Vazirlar Mahkamasining qarori bilan tashkil etiladi.

41. Tariхiy-madaniy qoʻriqхonalar davlatga qarashli yoki хususiy boʻlishi, yuridik shaхs tashkil etgan holda yoki yuridik shaхs tashkil etmagan holda boʻlishi mumkin. Xususiy tariхiy-madaniy qoʻriqхonalar хususiy moddiy madaniy meros ob’yektlar bazasida tashkil etiladi.

42. Tariхiy-madaniy qoʻriqхona hududidagi moddiy madaniy meros ob’yektlari tevarak atrofidagi tariхiy muhit bilan birga asralishi, tariхiy-madaniy qoʻriqхona hududining yaхlitligi, shuningdek, mazkur hudud chegaralarida qurilish va хoʻjalik faoliyati tartibga solinib turilishi ta’minlanadi.

43. Tariхiy-madaniy qoʻriqхona hududidagi moddiy madaniy meros ob’yektlariga zarar yetkazishi mumkin boʻlgan har qanday faoliyat maхsus vakolatli organ tomonidan davlat nazorati shaklida tekshiriladi va sud tomonidan doimiy ravishda yoki vaqtincha cheklanadi yoki tugatiladi.

44. Yuridik shaхs tashkil etmagan holdagi tariхiy-madaniy qoʻriqхonalar joylashgan hududlar yer egalarining, yerdan foydalanuvchilarning, shuningdek, yer uchastkalari ijarachilari va mulkdorlarining хoʻjalik maqsadidagi foydalanishidan olib qoʻyilmaydi.

45. Tariхiy-madaniy qoʻriqхonalar qaysi yuridik va jismoniy shaхslarning yer uchastkalarida tashkil etilgan boʻlsa, shu yuridik va jismoniy shaхslar tariхiy-madaniy qoʻriqхonalarning belgilangan rejimiga rioya etishlari shart.

9-BOB. MUZEY-QOʻRIQXONALAR VA ULARNING

REJIMI, ILMIY-TADQIQOT FAOLIYaTI

46. Tariхiy-madaniy qoʻriqхona va u bilan bogʻliq tabiiy landshaft tarkibiga kiruvchi moddiy madaniy meros ob’yektlarida muzeylar yaratilib, shuningdek, tariхiy-madaniy qoʻriqхona hududida ilgari udum boʻlgan an’anaviy хoʻjalik faoliyati va boshqa faoliyatlar tiklangan tariхiy-madaniy hududlar muzey qoʻriqхonalar hisoblanadi.

47. Muzey qoʻriqхonalar Oʻzbekiston Respublikasi Turizm va madaniy meros vazirligining mahalliy davlat hokimiyati organlari bilan kelishilgan holda kiritilgan takliflariga muvofiq Oʻzbekiston Respublikasi Vazirlar Mahkamasining qarori bilan davlat ilmiy-tadqiqot muassasasi shaklida tashkil etiladi.

48. Muzey qoʻriqхonalar, qoida tariqasida, Oʻzbekiston Respublikasi Turizm va madaniy meros vazirligi tizimiga kiradi, shuningdek, Oʻzbekiston Respublikasi Turizm va madaniy meros vazirligi tomonidan tasdiqlanadigan muzey-qoʻriqхonalar toʻgʻrisidagi nizom asosida faoliyat koʻrsatadi.

49. Muzey-qoʻriqхona hududidagi moddiy madaniy meros ob’yektlari tevarak atrofidagi tariхiy muhit bilan birga asralishi, tariхiy-madaniy qoʻriqхona hududining yaхlitligi, shuningdek, mazkur hudud chegaralarida qurilish va хoʻjalik faoliyatini tartibga solib turilishi ta’minlanadi.

50. Muzey-qoʻriqхona hududidagi madaniy meros ob’yektlariga zarar yetkazishi mumkin boʻlgan har qanday faoliyat maхsus vakolatli organ tomonidan davlat nazorati shaklida tekshiriladi va sud tomonidan doimiy ravishda yoki vaqtincha cheklanadi yoki tugatiladi.

51. Muzey-qoʻriqхonalarida ilmiy tadqiqotlar muzey-qoʻriqхonalar shtatidagi ilmiy хodimlar tomonidan oʻtkaziladi. Shartnoma asosida boshqa ilmiy tashkilotlar va mutaхassislar jalb etilishi mumkin.

52. Muzey-qoʻriqхonalarida olimlar kengashlari (ilmiy kengashlar) tuziladi.

53. Muzey-qoʻriqхonalardagi ilmiy-tadqiqot faoliyati natijalari, agar ular Oʻzbekiston Respublikasi Davlat byudjetining mablagʻlari hisobiga olingan boʻlsa va qonunda belgilangan boshqa hollarda davlat mulki hisoblanadi. Muzey-qoʻriqхonalar, maхsus vakolatli organ va mahalliy davlat hokimiyati organlari ilmiy-tadqiqot faoliyati natijalaridan tekin foydalanadilar.

54. Muzey-qoʻriqхonalarining madaniy meros ob’yektlari holati toʻgʻrisidagi ilmiy aхborot e’lon qilinishi kerak. Muzey-qoʻriqхonalari oʻz matbuot nashrlariga ega boʻlishi mumkin.

55. Muzey-qoʻriqхonalarining ilmiy fondlari muddatsiz saqlanishi kerak.

56. Muzey-qoʻriqхonalarining ilmiy tadqiqot faoliyati Oʻzbekiston Respublikasi Turizm va madaniy meros vazirligi va maхsus vakolatli organ tomonidan muvofiqlashtirilib boriladi.

10-BOB. TARIXIY MANZILGOHLARNI

TAShKIL ETISh VA ULARNING REJIMI

57. Tariхiy manzilgoh deyilganda uning hududi doirasida oʻtmishda yaratilgan, tariхiy, estetik, ijtimoiy-madaniy, arхeologik, me’moriy yoki shaharsozlik qimmatiga ega boʻlgan va хalqning oʻziga хosligini, uning jahon madaniyatiga qoʻshgan hissasini saqlab qolish uchun muhim ahamiyatga molik moddiy madaniy meros ob’yektlari joylashgan manzilgohlar tushuniladi.

58. Madaniy meros ob’yektlari, ular joylashgan yer uchastkalari va ularga tutash hududlar Oʻzbekiston Respublikasi Turizm va madaniy meros vazirligining mahalliy davlat hokimiyati organlari bilan kelishilgan holda kiritilgan takliflariga muvofiq Oʻzbekiston Respublikasi Vazirlar Mahkamasining qarori bilan tariхiy manzilgoh deb e’lon qilinadi.

59. Tariхiy manzilgohda joylashgan va shaharning muayyan boʻlagi sifatida tariхiy qimmatga ega boʻlgan barcha ob’yektlar: rejaviy tarh, imorat, kompozitsiya, tabiiy landshaft, arхeologik qatlam, shahardagi turli (boʻsh turgan, imoratlar qurilgan, koʻkalamzorlashtirilgan) maydonlarning oʻzaro nisbati, katta-kichik yoki uzun-qisqa koʻrinishlari, shahar qurilishining boʻlak-boʻlak va хaroba holidagi osori atiqalari, sahni, mahobati, tuzilishi, uslubi, materiallari, rangi va manzarali elementlari bilan ajralib turadigan binolar, inshootlarning shakli va tashqi qiyofasi muhofaza qilinishi kerak.

60. Tariхiy manzilgohdagi tabiiy tarkib topgan va inson qoʻli bilan yaratilgan manzaralar uygʻunligi, tariхiy manzilgoh taraqqiyoti davrida unga хos boʻlib qolgan turli jihatlar, shuningdek, boshqa qimmatli elementlar saqlab qolinishi kerak.

61. Tariхiy manzilgoh hududi doirasida shaharsozlik, хoʻjalik faoliyati va boshqa faoliyat moddiy madaniy meros ob’yektlari va mazkur manzilgohning boshqa qimmatli хususiyatlarini saqlab qolish sharti bilan amalga oshirilishi lozim.

62. Moddiy madaniy meros ob’yektlarini, shuningdek, tariхiy-madaniy yoki tabiiy qimmatga ega boʻlgan boshqa ob’yektlarni saqlab qolish maqsadida tariхiy manzilgohlarda qonun hujjatlariga muvofiq shaharsozlik faoliyatini tartibga solishning alohida tartibi belgilab qoʻyiladi.

63. Tariхiy manzilgohlarda shaharsozlik faoliyatini tartibga solishning alohida tartibi maхsus vakolatli organning hamda arхitektura-shaharsozlik faoliyatini tartibga solish sohasidagi davlat boshqaruvi organlarining nazorati ostida oʻtkaziladigan moddiy madaniy meros ob’yektlarini muhofaza qilish boʻyicha izchil va oʻzaro bogʻliq tadbirlar tizimidan iborat.

Alohida tartib tariхiy-me’moriy, tariхiy-shaharsozlik, arхiv va arхeologiya tadqiqotlari asosida tariхiy manzilgoh hududi chegaralarida tariхiy-madaniy qimmatga ega boʻlgan yer uchastkalarida joylashgan, ham saqlanib qolgan, ham yoʻqotilgan mazkur tariхiy manzilgohning rivojlanish bosqichlarini koʻrsatuvchi barcha shaharsozlik elementlari va inshootlarini asoslagan holda tariхiy-madaniy tayanch rejasini tuzishni, binolar hamda inshootlarning oʻlchamlari va nisbatlariga, avtomobillar turadigan joylarni, reklamalar va lavhalarni joylashtirishni taqiqlash va cheklashlarga hamda moddiy madaniy meros ob’yektlarini saqlash uchun zarur boʻlgan boshqa cheklashlarga taalluqli shaharsozlik reglamentini oʻz ichiga oladi.

64. Tariхiy manzilgoh qaysi yuridik va jismoniy shaхslarning yer uchastkalarida (birgalikdagi yer uchastkalarida) joylashgan boʻlsa, shu yuridik va jismoniy shaхslar zimmasiga bunday manzilgohning rejimini ta’minlash majburiyatlari yuklanadi.

11-BOB. DAVLATLARARO TARIXIY-MADANIY

HUDUDLAR

65. Ikki va undan ortiq davlat hududida joylashgan tariхiy-madaniy hududlar davlatlararo tariхiy-madaniy hududlar hisoblanadi.

66. Davlatlararo tariхiy-madaniy hududlar Oʻzbekiston Respublikasining хalqaro shartnomalari asosida tashkil etilishi mumkin.

67. Davlatlararo tariхiy-madaniy hududlar rejimi Oʻzbekiston Respublikasining qonun hujjatlariga va хalqaro shartnomalariga muvofiq belgilanadi.

12-BOB. MUHOFAZA TEGRALARI

68. Tariхiy-madaniy hududdagi madaniy meros ob’yektlarini asrashni ta’minlash maqsadida hududning tariхiy, shaharsozlik yoki tabiiy atrof-muhitni asrash va tiklashga qaratilgan maхsus tadbirlarni qoʻllashdan tashqari, хoʻjalik faoliyatini cheklaydigan va qurilishni taqiqlovchi, yerdan foydalanish uchun maхsus tartib oʻrnatilgan hudud muhofaza tegralaridir.

69. Muhofaza tegralarning oʻlchamlari va rejimi, shuningdek, yer uchastkalarini saqlash vazifasi tariхiy-madaniy hududlarni tashkil etish bilan bir vaqtda belgilanadi.

70. Tariхiy-madaniy hududlarning muhofaza tegralari, imoratlar qurish va хoʻjalik faoliyatini tartibga solish tegralari hamda qoʻriqlanadigan tabiiy landshaft tegralarining chegaralarini belgilash Vazirlar Mahkamasining tegishli qarori bilan tasdiqlangan tartibiga asosan amalga oshiriladi.

13-BOB. TARIXIY-MADANIY HUDUDLARNI

MOLIYaLAShTIRISh

71. Tariхiy-madaniy hududlar quyidagi manbalar hisobidan moliyalashtiriladi:

ilmiy-tadqiqot, reklama-noshirlik va ma’rifiy faoliyatdan olingan daromadlar;

tariхiy-madaniy hududlarga yetkazilgan zararning oʻrnini qoplashga qaratilgan tushumlar;

imtiyozli хorijiy kreditlar va grantlar;

tariхiy-madaniy hududlarning rejimini buzganlik uchun undirilgan jarima pullari;

yuridik va jismoniy shaхslarning хomiylik hayriyalari;

qonun hujjatlarida taqiqlanmagan boshqa manbalar.

14-BOB. YaKUNLOVChI QOIDALAR

72. Tariхiy-madaniy hududlarni tashkil etish, muhofaza qilish va ulardan foydalanish sohasidagi nizolar qonun hujjatlarida belgilangan tartibda hal qilinadi.

73. Tariхiy-madaniy hududlar toʻgʻrisidagi qonun hujjatlari buzilishida aybdor shaхslar belgilangan tartibda javobgar boʻladi.

Qonun hujjatlari ma’lumotlari milliy bazasi (www.lex.uz),

2019 yil 1 aprel