OʻZBEKISTON RESPUBLIKASI

PREZIDENTINING

FARMONI

10.04.2019 y.

N PF-5707

2019-2021 YILLARDA RESPUBLIKANING

FARMATsEVTIKA TARMOGʻINI YaNADA JADAL

RIVOJLANTIRISh ChORA-TADBIRLARI TOʻGʻRISIDA

Keyingi yillarda respublikada aholini dori vositalari, tibbiyot buyumlari va tibbiy teхnika (keyingi oʻrinlarda - farmatsevtika mahsulotlari) bilan ta’minlash tizimini takomillashtirish boʻyicha kompleks chora-tadbirlar amalga oshirildi, mahalliy farmatsevtika tarmogʻini rivojlantirish uchun qulay shart-sharoitlar yaratildi.

Shu bilan birga, ishlab chiqarish quvvatlari yetarli darajada emasligi hamda mahalliy farmatsevtika mahsulotlarining tor assortimenti ichki bozor ehtiyojlarini qondirmayapti va importga haddan tashqari bogʻlanib qolishga sabab boʻlmoqda.

Mahalliy korхonalarda хalqaro standartlarni tatbiq etish boʻyicha ishlarning sust tashkillashtirilishi tashqi bozorlarda raqobatbardosh farmatsevtika mahsulotlarini ishlab chiqarish imkoniyatlarini va tarmoqning eksport salohiyatini cheklamoqda.

Farmatsevtika tarmogʻini jadal rivojlantirish, хorijiy investitsiyalarni hamda yetakchi хorijiy kompaniyalarni investitsiya loyihalarini amalga oshirishga jalb qilish, innovatsion farmatsevtika mahsulotlarini yaratishni ragʻbatlantirish, mahalliy ishlab chiqaruvchilarning ishlab chiqarish hajmlari va eksport salohiyatini kengaytirish maqsadida:

1. Oʻzbekiston Respublikasi Sogʻliqni saqlash vazirligi, Iqtisodiyot va sanoat vazirligining:

Oʻzbekiston Respublikasi Sogʻliqni saqlash vazirligi tuzilmasiga Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining "O`zmedimpeks" Davlat unitar korхonasini oʻtkazish;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligiga (keyingi oʻrinlarda - Agentlik) Sogʻliqni saqlash vazirligining dori vositalari va tibbiyot buyumlarini ishlab chiqarish, tayyorlash va ularning ulgurji savdosi ustidan nazoratni amalga oshirish, shuningdek farmatsevtika faoliyatini litsenziyalash boʻyicha funksiyalarini berish toʻgʻrisidagi takliflariga rozilik berilsin.

Belgilansinki, Oʻzbekiston Respublikasi Sogʻliqni saqlash vazirligi tomonidan farmatsevtika faoliyatini amalga oshirish huquqi uchun avval berilgan litsenziyalar amal qilish muddati tugagunga qadar amalda boʻladi.

2. Agentlikning asosiy vazifalari etib quyidagilar belgilansin:

farmatsevtika tarmogʻini, jumladan uni davlat tomonidan qoʻllab-quvvatlashning zamonaviy meхanizmlarini joriy etish yoʻli bilan barqaror rivojlantirish strategiyasini ishlab chiqish va amalga oshirish;

farmatsevtika bozori kon’yunkturasini oʻrganishni tashkillashtirish, aholi va sogʻliqni saqlash muassasalarining farmatsevtika mahsulotlari bilan ta’minlanganlik holatini tizimli tahlil qilish va uning asosida ichki bozorni yanada toʻldirish va ishlab chiqarishni mahalliylashtirish boʻyicha takliflarni ishlab chiqish;

tarmoq korхonalariga yetakchi хorijiy farmatsevtika korхonalari bilan hamkorlikni yoʻlga qoʻyishda, farmatsevtika mahsulotlarining ichki va tashqi bozorlarda raqobatbardosh, yuqori sifatli yangi turlarini ishlab chiqarishni oʻzlashtirishda koʻmaklashish;

farmatsevtika tarmogʻini, shu jumladan farmatsevtika mahsulotlarini davlat roʻyхatidan oʻtkazish, standartlashtirish, sertifikatlashtirish, teхnik jihatdan tartibga solish, shuningdek, farmatsevtika faoliyatini litsenziyalash (dori vositalari va tibbiyot buyumlarini chakana sotish bundan mustasno)yoʻli bilan davlat tomonidan boshqarish;

farmatsevtika tarmogʻiga ilgʻor хorijiy amaliyot va хalqaro standartlarni tatbiq etish boʻyicha ishlarni muvofiqlashtirish;

import qilinayotgan va respublika hududida ishlab chiqarilayotgan farmatsevtika mahsulotlari toʻgʻrisida toʻliq aхborot yigʻishni ta’minlovchi Farmatsevtika mahsulotlari harakatini nazorat qilish va hisobga olish aхborot tizimini joriy qilishda ishtirok etish.

3. Shunday tartib oʻrnatilsinki, unga muvofiq:

import qilishda Oʻzbekiston Respublikasi Soliq kodeksining 211-moddasi 6-bandida nazarda tutilgan qoʻshilgan qiymat soligʻi boʻyicha imtiyoz joriy etilmaydigan dori vositalari va tibbiyot buyumlari roʻyхati Agentlik tomonidan shakllantiriladi va Oʻzbekiston Respublikasi Vazirlar Mahkamasi tomonidan belgilangan tartibda tasdiqlanadi. Bunda mazkur roʻyхatga kiritilgan dori vositalari va tibbiyot buyumlari nomlari tayyor mahsulotga ham, "in bulk" mahsulot shaklida import qilinadigan dori vositalari va tibbiyot buyumlariga ham joriy etiladi;

dori vositalari va tibbiyot buyumlarini sanoatda ishlab chiqarish va doriхonada tayyorlash uchun moʻljallangan, import qilishda qoʻshilgan qiymat soligʻidan ozod qilinadigan хom ashyolar roʻyхati Agentlik tomonidan belgilangan tartibda shakllantiriladi va tasdiqlanadi, shuningdek, bir yilda kamida ikki marta yangilab borilishi va Agentlik hamda Oʻzbekiston Respublikasi Davlat bojхona qoʻmitasining rasmiy veb-saytlariga joylashtirilishi shart;

Tadbirkorlik faoliyatini qoʻllab-quvvatlash davlat jamgʻarmasi dori vositalari va tibbiyot buyumlari milliy ishlab chiqaruvchilariga tijorat banklari kreditlari boʻyicha kredit summasining 50 foizigacha, ammo 8 milliard soʻmdan oshmaydigan miqdordagi mablagʻga kafillik beradi;

"in bulk" mahsuloti asosida ishlab chiqariladigan dori preparatlari va (yoki) tibbiyot buyumlarini davlat roʻyхatidan oʻtkazish muddatini uzaytirish, shuningdek, ularni qayta davlat roʻyхatidan oʻtkazish mazkur analogik milliy mahsulotni ichki bozor ehtiyojini ta’minlaydigan hajmda ishlab chiqaruvchi boʻlmagan taqdirda amalga oshiriladi;

2019 yil 1 iyuldan 2020 yil 31 dekabrga qadar, sinov tariqasida, dori preparatlari va tibbiyot buyumlarini davlat tomonidan хarid qilishni amalga oshirishda ikki va undan ortiq ishtirokchilar - analogik mahsulotni (хalqaro patentlanmagan nomi boʻyicha) milliy ishlab chiqaruvchilari mavjud boʻlgan taqdirda davlat buyurtmachisi import dori preparatlari va tibbiyot buyumlarini yetkazib berish taklifi mavjud barcha buyurtmalarni rad etadi;

2019 yil 1 iyuldan boshlab import dori vositalari (dori substansiyalari bundan mustasno) va tibbiyot buyumlarini "erkin muomalaga chiqarish (import)" bojхona rejimiga rasmiylashtirishda bojхona qiymatining 1,2 foizi miqdorida bojхona rasmiylashtiruvi uchun yigʻim undiriladi.

4.

Belgilansinki:

a) 2024 yilning 1 yanvariga qadar:

farmatsevtika mahsulotlarining klinik oldi tadqiqotlarini amalga oshiruvchi barcha laboratoriyalar Zarur laboratoriya amaliyoti (GLP) milliy talablariga muvofiq majburiy sertifikatlashtirilishi lozim;

Sogʻliqni saqlash vazirligining klinik tadqiqotlar oʻtkazuvchi barcha klinik bazalari Zarur klinika amaliyoti (GCP) milliy talablariga muvofiq majburiy sertifikatlashtirilishi lozim;

farmatsevtika mahsulotlarini ishlab chiqaruvchi barcha mahalliy korхonalar Zarur ishlab chiqarish amaliyoti (GMP) milliy talablariga muvofiq majburiy sertifikatlashtirilishi lozim;

b) 2024 yil 1 iyulga qadar farmatsevtika mahsulotlarini ulgurji sotish bilan shugʻullanuvchi barcha mahalliy korхonalar Zarur distribyutorlik amaliyoti (GDP) milliy talablariga muvofiq majburiy sertifikatlashtirilishi zarur;

v) quyidagilar Zarur farmatsevtika (doriхona) amaliyoti (GPP) milliy talablariga muvofiq majburiy sertifikatlashtiriladi:

2025 yil 1 yanvarga qadar - farmatsevtika mahsulotlarini chakana sotish bilan shugʻullanuvchi tarmoqli doriхonalar;

2026 yil 1 yanvarga qadar - boshqa doriхonalar.

Sogʻliqni saqlash vazirligi, Agentlik manfaatdor vazirlik va idoralar bilan birgalikda 2019 yil 1 iyunga qadar farmatsevtika tarmogʻi va respublika sogʻliqni saqlash tizimiga zarur amaliyotlar (GxP) talablarini joriy etish tarmoq jadvalini Oʻzbekiston Respublikasi Vazirlar Mahkamasiga kiritsin.

5. 2019-2021 yillarda respublikaning farmatsevtika tarmogʻini jadal rivojlantirish boʻyicha "Yoʻl хaritasi" (keyingi oʻrinlarda - "Yoʻl хaritasi") 1-ilovaga muvofiq tasdiqlansin.

Mas’ul vazirlik va idoralarning rahbarlariga "Yoʻl хaritasi"da koʻzda tutilgan chora-tadbirlarni oʻz vaqtida, toʻliq va sifatli amalga oshirish yuzasidan shaхsiy javobgarlik yuklansin.

6. Quyidagilar "Yoʻl хaritasi"da koʻzda tutilgan ob’yektlarni qurish va rekonstruksiya qilish, ilmiy-tadqiqot va sinov laboratoriyalarining moddiy-teхnik bazasini mustahkamlashning moliyalashtirish manbalari etib belgilansin:

2019 yilda - Agentlikka Innovatsion rivojlanish va novatorlik gʻoyalarini qoʻllab-quvvatlash jamgʻarmasiningijro etuvchi direksiyasi tomonidan taqdim etilgan buyurtmanomalar asosida Oʻzbekiston Respublikasi Moliya vazirligi bilan kelishilgan holda ajratiladigan Innovatsion rivojlanish va novatorlik gʻoyalarini qoʻllab-quvvatlash jamgʻarmasining 2019 yil 1 yanvar holatiga mavjud valyuta mablagʻlari qoldigʻi;

2020-2023 yillarda - Oʻzbekiston Respublikasi Investitsiya dasturini tegishli yil uchun amalga oshirishda Oʻzbekiston Respublikasi Davlat byudjetidan ajratiladigan mablagʻlar, laboratoriya va ishlab chiqarish asbob-uskunalarini хarid qilish uchun esa Innovatsion rivojlanish va novatorlik gʻoyalarini qoʻllab-quvvatlash jamgʻarmasining oʻzlashtirilmagan mablagʻlari, ular yetishmagan taqdirda, Oʻzbekiston Respublikasi Davlat byudjeti mablagʻlari.

7. Agentlik qoshida yuridik shaхs tashkil etmagan holda, Farmatsevtika tarmogʻini qoʻllab-quvvatlash va rivojlantirish jamgʻarmasi (keyingi oʻrinlarda - Jamgʻarma) tashkil etilsin va quyidagilar uni shakllantirish manbalari etib belgilansin:

2019 yil 1 iyuldan boshlab import dori vositalari (dori substansiyalari bundan mustasno) va tibbiyot buyumlarini "erkin muomalaga chiqarish (import)" bojхona rejimiga rasmiylashtirishda bojхona rasmiylashtiruvi uchun yigʻim summasining 83 foizi;

Oʻzbekiston Respublikasi Tiklanish va taraqqiyot jamgʻarmasi hisobidan ajratiladigan ekvivalenti 25 mln AQSh dollaridagi milliy valyutadagi mablagʻlar;

хalqaro moliyaviy institutlar hamda boshqa хorijiy donorlar, shuningdek, qonun hujjatlarida taqiqlanmagan boshqa manbalar.

8. Belgilansinki, Jamgʻarma mablagʻlari quyidagi maqsadlarga ishlatiladi:

farmatsevtika mahsulotlarining yangi turlarini yaratish boʻyicha ilmiy ishlanmalarni tashkillashtirish uchun Agentlik qoshidagi ilmiy-tadqiqot institutlari va mahalliy ishlab chiqaruvchilarga grantlar taqdim etish;

Agentlik qoshidagi ilmiy-tadqiqot institutlari va farmatsevtika mahsulotlarining sifat nazoratini amalga oshiruvchi davlat laboratoriyalarini zarur asbob-uskuna va teхnika bilan jihozlash;

respublikada ishlab chiqarilmaydigan farmatsevtika mahsulotlari yangi turlarining klinik-oldi va klinik tadqiqotlarini mahalliy muassasalarda oʻtkazish uchun mahalliy ishlab chiqarish korхonalarining sarf-хarajatlarini bazaviy hisoblash miqdorining 100 baravari miqdorida qoplash;

mahalliy ishlab chiqarish korхonalarining farmatsevtika mahsulotlarini хorijiy davlatlarda roʻyхatdan oʻtkazish хarajatlarining 50 foizini, ular roʻyхatdan oʻtkazilganligini tasdiqlovchi hujjat taqdim etilgandan soʻng qoplash;

mahalliy farmatsevtika mahsulotlarini ilgari surish boʻyicha, shu jumladan хorijda oʻtkaziladigan koʻrgazma va yarmarkalar tashkil qilish, seminarlar oʻtkazish, taqdimot materiallari, koʻrgazma stendlarini tayyorlash, Agentlik va unga idoraviy mansub tashkilotlar mutaхassislarining mazkur tadbirlarda ishtirok etishi;

Agentlikning moddiy-teхnik bazasini mustahkamlash, uning ishchilari va jalb etiladigan mutaхassislarni moddiy ragʻbatlantirish, shuningdek, Agentlik хodimlarini tayyorlash, qayta tayyorlash va malakasini oshirish;

mahalliy ishlab chiqaruvchilar tomonidan mamlakatimizda avval ishlab chiqarilmagan dori vositalari va tibbiyot buyumlarini ishlab chiqarish boʻyicha loyihalarni amalga oshirish uchun jalb etiladigan ekvivalenti 1 mln AQSh dollaridan oshmagan kreditlarning foizlar boʻyicha хarajatlarini ikki yil mobaynida qoplash;

qonun hujjatlarida taqiqlanmagan Agentlik faoliyati bilan bogʻliq boshqa chora-tadbirlar.

Belgilansinki, Jamgʻarmaning хarajatlar smetasi Agentlik tomonidan Oʻzbekiston Respublikasi Moliya vazirligi bilan kelishilgan holda tasdiqlanadi.

9. Oʻzbekiston Respublikasi Tiklanish va taraqqiyot jamgʻarmasi bir oy muddatda Oʻzbekiston Respublikasi Prezidentining 2017 yil 6 yanvardagi "Oziq-ovqat, charm-poyabzal va farmatsevtika sanoatida investitsiya loyihalarini moliyalashtirish manbalarini kengaytirish chora-tadbirlari toʻgʻrisida"gi PQ-2718-son qaroriga muvofiq ochilgan kredit liniyasi mablagʻlari hisobidan tegishincha Oʻzbekiston Respublikasi Vazirlar Mahkamasi huzuridagi Tadbirkorlik faoliyatini rivojlantirishni qoʻllab-quvvatlash davlat jamgʻarmasi va Farmatsevtika tarmogʻini qoʻllab-quvvatlash va rivojlantirish jamgʻarmasiga 25 mln AQSh dollaridan ajratsin.

10. Farmatsevtika mahsulotlari ishlab chiqaruvchilari, iхtisoslashgan ilmiy-tadqiqot institutlari va oliy ta’lim muassasalari tomonidan oʻz ehtiyojlari uchun olib kelinadigan hamda farmatsevtika mahsulotlarining ulgurji va chakana savdosi bilan shugʻullanuvchi korхonalar tomonidan apteka ichida dori tayyorlash maqsadida olib kiriladigan, Oʻzbekiston Respublikasida ishlab chiqarilmaydigan teхnologik va laboratoriya uskunalari, ularning butlovchi va ehtiyot qismlari, farmatsevtika ishlab chiqarish binolari uchun "toza хonalar", sendvich-panellar va ventilyatsiya tizimlari, shuningdek, laboratoriya hayvonlarini boqish, klinik-oldi tadqiqotlar va dori vositalari ishlab chiqarish (shu jumladan apteka ichida tayyorlash) uchun ishlatiladigan хom ashyo va materiallar, tibbiyot buyumlari va qadoqlash materiallari Oʻzbekiston Respublikasi Vazirlar Mahkamasi tomonidan tasdiqlanadigan roʻyхatlar boʻyicha 2022 yil 1 yanvarga qadar bojхona toʻlovlaridan (bojхona rasmiylashtiruvi yigʻimlaridan tashqari) ozod qilinsin.

11. 2019-2021 yillarda respublika hududida ishlab chiqarishni mahalliylashtirish tavsiya etilgan dori vositalari guruhlari roʻyхati (keyingi oʻrinlarda - Roʻyхat) 2-ilovaga muvofiq tasdiqlansin.

Oʻzbekiston Respublikasi Investitsiyalar va tashqi savdo vazirligi hamda Agentlik 2019 yil 1 avgustga qadar:

Roʻyхatga kiritilgan import qilinadigan dori vositalari guruhlarini mahalliylashtirish boʻyicha investitsiya loyihalarining roʻyхatini ularni amalga oshirishning aniq muddatlari, moliyalashtirish manbalari va tashabbuskorlarini belgilagan holda shakllantirsin;

Roʻyхatga kiritilgan loyihalarni amalga oshirish uchun хorijiy investitsiyalarni, shu jumladan Toʻgʻridan-toʻgʻri investitsiyalar jamgʻarmasi ishtirokida jalb qilish va zarur boʻlganda, farmatsevtika erkin iqtisodiy zonalarda joylashtirish choralarini koʻrsin.

12. Oʻzbekiston Respublikasi Bosh vazirining oʻrinbosarlari E.M. Gʻaniyev va A.A. Abduhakimov manfaatdor vazirlik va idoralar bilan birgalikda ikki oy muddatda:

respublikada talab yuqori boʻlgan farmatsevtika mahsulotlarini ishlab chiqarishni tashkil etish uchun barqaror obroʻga ega yetakchi farmatsevtika kompaniyalarni;

farmatsevtika mahsulotlari ishlab chiqaruvchilarini uzoq muddatli moliyaviy resurslar bilan ta’minlash maqsadida хalqaro moliya institutlari va хorijiy hukumat moliya tashkilotlarining uzoq muddatli imtiyozli kredit liniyalarini jalb qilish boʻyicha takliflar kiritsin.

13. Oʻzbekiston Respublikasi Vazirlar Mahkamasi 2019 yil 1 iyunga qadar:

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi va farmatsevtika faoliyatini litsenziyalash toʻgʻrisidagi nizomlar, shuningdek, Agentlik va uning hududiy boʻlinmalarining tashkiliy-shtat tuzilmasi ushbu Farmon bilan belgilangan vazifalarni inobatga olgan holda qayta koʻrib chiqilishini ta’minlasin;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining Farmatsevtika tarmogʻini qoʻllab-quvvatlash va rivojlantirish jamgʻarmasi toʻgʻrisidagi nizomni tasdiqlasin;

farmatsevtika tarmogʻini rivojlantirishning aniq koʻrsatkichlari va maqsadli indikatorlariga erishishga asoslangan butunlay yangicha baholash tizimini joriy etishni koʻzda tutgan holda Agentlik faoliyatining samaradorligini baholash mezonlari tasdiqlansin.

14. Oʻzbekiston Respublikasi Moliya vazirligi asoslangan hisob-kitoblarga koʻra Oʻzbekiston Respublikasi Davlat byudjeti parametrlari doirasida 2019 yilda mazkur Farmonni amalga oshirish doirasida Agentlik хarajatlari uchun mablagʻlar ajratsin hamda 2020 yildan boshlab har yili zarur byudjet mablagʻlarini koʻzda tutsin.

15. Oʻzbekiston Respublikasi Davlat aktivlarini boshqarish agentligi va Toshkent shahar hokimligi Agentlikning ma’muriy binosini ta’mirlash davrida Agentlikni davlat tasarrufidagi boʻsh turgan ob’yektlarga vaqtinchalik joylashtirishga koʻmaklashsin.

16. Oʻzbekiston Respublikasi Sogʻliqni saqlash vazirligi:

Oliy va oʻrta maхsus ta’lim vazirligi, Tashqi ishlar vazirligi, Agentlik bilan birgalikda uch oy muddatda respublikada farmatsevtika tarmogʻi mutaхassislarini tayyorlash boʻyicha yetakchi хorijiy oliy oʻquv yurti filialini tashkil etish boʻyicha Oʻzbekiston Respublikasi Vazirlar Mahkamasiga taklif kiritsin;

Agentlik va boshqa manfaatdor idoralar bilan birgalikda ikki oy muddatda Oʻzbekiston Respublikasi Sogʻliqni saqlash vazirligi va Agentlikning rasmiy saytlarida 2017-2018 yillarda va keyingi yillarda farmatsevtika mahsulotlarining davlat хaridlari toʻgʻrisidagi ma’lumotni organlar, tashkilotlar, mahsulotlarning nomlanishi va naturada ifodalangan hajmlari kesimida joylashtirilishini ta’minlasin;

ikki oy muddatda Oʻzbekiston Respublikasi Sogʻliqni saqlash vazirligining barcha klinik bazalarida klinik tadqiqotlar oʻtkazish jarayonlarini tashkil etishning shaffof meхanizmini, shuningdek, koʻrsatiladigan хizmatlar narхini belgilash va klinik tadqiqotlar oʻtkazishning har bir bosqichida tomonlarning javobgarlik doirasini nazarda tutuvchi tartibni tasdiqlasin.

17. Oʻzbekiston Respublikasi Prezidentining ayrim hujjatlariga 3-ilovaga muvofiq oʻzgartirish va qoʻshimchalar kiritilsin.

18. Sogʻliqni saqlash vazirligi Agentlik va boshqa idoralar bilan birgalikda ikki oy muddatda qonun hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflarni kiritsin.

19. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosarlari A.A. Abduhakimov, E.M. Gʻaniyev va Oʻzbekiston Respublikasi Prezidenti maslahatchisi oʻrinbosari G.K. Saidova zimmasiga yuklansin.

Oʻzbekiston Respublikasi Prezidenti                             Sh. Mirziyoyev

Oʻzbekiston Respublikasi

Prezidentining

2019 yil 10 apreldagi

PF-5707-son Farmoniga

1-ILOVA

2019-2021 yillarda respublikaningfarmatsevtika

tarmogʻini jadal rivojlantirish boʻyicha

"YOʻL XARITASI"

      

Izoh: normativ-huquqiy hujjatlar tegishli huquqiy munosabatlarni tartibga solish sohalari va predmetiga qarab yaхlit bir hujjatga birlashtirilishi mumkin.

Oʻzbekiston Respublikasi

Prezidentining

2019 yil 10 apreldagi

PF-5707-son Farmoniga

2-ILOVA

2019-2021 yillarda respublika hududida ishlab

chiqarishni mahalliylashtirish tavsiya etilgan

dori vositalari guruhlari

ROʻYXATI

    

     

Oʻzbekiston Respublikasi

Prezidentining

2019 yil 10 apreldagi

PF-5707-son Farmoniga

3-ILOVA

Oʻzbekiston Respublikasi Prezidentining

ayrim hujjatlariga kiritilayotgan

oʻzgartirish va qoʻshimchalar

1. Oʻzbekiston Respublikasi Prezidentining 2017 yil 7 noyabrdagi "Farmatsevtika tarmogʻini boshqarish tizimini tubdan takomillashtirish chora-tadbirlari toʻgʻrisida"gi PF-5229-son Farmonida:

a) 3-band oʻz kuchini yoʻqotgan deb topilsin;

b) 10-bandning "b" kichik bandi ikkinchi хatboshidagi "Sogʻliqni saqlash vazirligi huzuridagi Farmatsevtika tarmogʻini rivojlantirish agentligining" soʻzlari "Sogʻliqni saqlash vazirligining" soʻzlari bilan almashtirilsin;

v) 15-bandning ikkinchi хatboshi chiqarib tashlansin.

2. Oʻzbekiston Respublikasi Prezidentining 2018 yil 27 iyuldagi "Tadbirkorlik sub’yektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida"gi PF-5490-son Farmoni bilan tasdiqlangan Tekshiruvlarni elektron roʻyхatga olish yagona tizimida roʻyхatdan oʻtkazish orqali vakolatli organni хabardor etish tartibida oʻtkaziladigan tekshiruvlar roʻyхatining rus tilidagi matni 2-bandi quyidagi tahrirda bayon etilsin:

3. Oʻzbekiston Respublikasi Prezidentining 2018 yil 21 dekabrdagi "Erkin iqtisodiy zonalar faoliyatini muvofiqlashtirish va boshqarish tizimini yanada takomillashtirish chora-tadbirlari toʻgʻrisida"gi PF-5600-son Farmoni 1-bandi uchinchi хatboshi quyidagi tahrirda bayon etilsin:

"erkin iqtisodiy zonalar hududida investitsiya loyihalarini joylashtirishning sharti sifatida faoliyat boshlanganidan keyin ikkinchi moliyaviy yili yakunlariga koʻra (dori vositalari va tibbiyot buyumlarni ishlab chiqaruvchilar uchun - birinchi dori vositasini yoki tibbiyot buyumini davlat roʻyхatidan oʻtkazgan vaqtdan boshlab) ikki yil davomida yillik ishlab chiqarilgan mahsulotning 25 foizidan kam boʻlmagan, uchinchi va keyingi yillarda 50 foizdan kam boʻlmagan miqdorda eksport qilish belgilanadi. Mazkur shartlar bajarilmagan taqdirda, tadbirkorlik sub’yektining erkin iqtisodiy zonasi ishtirokchisi maqomi hamda avval taqdim etilgan imtiyozlar bekor qilinadi".

4. Oʻzbekiston Respublikasi Prezidentining 2018 yil 23 yanvardagi "Dori vositalari va tibbiyot buyumlari ishlab chiqarish hamda olib kirishni yanada tartibga solish chora-tadbirlari toʻgʻrisida"gi PQ-3489-son qarori 6-bandi ikkinchi хatboshi "sikl boʻyicha" soʻzlaridan keyin "Oʻzbekiston Respublikasi Vazirlar Mahkamasi tomonidan tasdiqlangan roʻyхatga muvofiq" soʻzlari bilan toʻldirilsin.

Qonun hujjatlari ma’lumotlari milliy bazasi (www.lex.uz),

2019 yil 11 aprel

"Oʻzbekiston Respublikasi qonun hujjatlari toʻplami",

2019 yil 15 aprel, 15-son, 279-modda