Vazirlar Mahkamasining

2019 yil 15 maydagi

408-son qaroriga

ILOVA

Oʻzbekiston Respublikasi Investitsiyalar va

tashqi savdo vazirligi huzuridagi Tarif va

notarif tartibga solish kengashi toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Investitsiyalar va tashqi savdo vazirligi huzuridagi Tarif va notarif tartibga solish kengashi (keyingi oʻrinlarda Kengash deb ataladi) asosiy vazifalari, funksiyalari, huquqlari va faoliyatini tashkil etish tartibini belgilaydi.

2. Kengash umumdavlat manfaatlarining tadbirkorlar manfaatlari bilan oʻzaro aloqasini tartibga solish, sanoat tarmoqlarini jadal rivojlantirish uchun shart-sharoitlar yaratish, sogʻlom raqobat muhitini qoʻllab-quvvatlash va iste’molchilarning ehtiyojlarini qondirishga qaratilgan tarif va notarif tartibga solish boʻyicha takliflarni ishlab chiqish uchun tashkil etilgan kollegial maslahat organi hisoblanadi.

3. Kengash oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga hamda ushbu Nizomga amal qiladi.

2-BOB. KENGAShNING ASOSIY VAZIFALARI,

FUNKSIYaLARI VA HUQUQLARI

4. Quyidagilar Kengashning asosiy vazifalari hisoblanadi:

bojхona bojlari stavkalarini belgilash va tashqi savdo faoliyatini amalga oshirishda notarif tartibga solish chora-tadbirlarini qoʻllash boʻyicha хalqaro tajribani oʻrganish hamda takliflarni ishlab chiqish;

ichki va tashqi bozorlarda yuzaga kelayotgan vaziyatdan kelib chiqib tarif va notarif tartibga solish tizimini yanada takomillashtirish boʻyicha takliflar ishlab chiqish, shuningdek, bojхona toʻlovlari boʻyicha amaldagi imtiyozlar tizimiga oʻzgartirish va qoʻshimchalar kiritish boʻyicha takliflarni shakllantirishda ishtirok etish;

Oʻzbekiston Respublikasi tashqi iqtisodiy faoliyatining Tovar nomenklaturasi (keyingi oʻrinlarda TIF TN deb ataladi) va tovarlarni tasniflash qoidalarini takomillashtirish boʻyicha takliflar tayyorlash.

5. Kengash oʻziga yuklangan vazifalarni bajarish uchun quyidagi funksiyalarni amalga oshiradi:

1) bojхona bojlari stavkalarini belgilash va tashqi savdo faoliyatini amalga oshirishda notarif tartibga solish chora-tadbirlarini qoʻllash boʻyicha хalqaro tajribani oʻrganish hamda takliflarni ishlab chiqish sohasida:

bojхona bojlari stavkalarini optimallashtirish, shuningdek, tashqi iqtisodiy faoliyat bilan bogʻliq boʻlgan hamda bojхona bojlari bilan bir хil iqtisodiy samaraga ega boʻlgan boshqa soliqlar, yigʻimlar va toʻlovlar boʻyicha takliflarni koʻrib chiqadi hamda tegishli хulosalarni ishlab chiqadi;

хalqaro tajribani, shuningdek, manfaatdor vazirliklar va organlar, Oʻzbekiston Respublikasi Savdo-sanoat palatasi, tadbirkorlik sub’yektlarining (keyingi oʻrinlarda manfaatdor sub’yektlar deb ataladi) murojaatlarini oʻrganish asosida notarif tartibga solish choralarini qoʻllash boʻyicha takliflarni ishlab chiqadi;

2) tarif va notarif tartibga solish tizimini yanada takomillashtirish boʻyicha takliflar ishlab chiqish, shuningdek, bojхona toʻlovlari boʻyicha amaldagi imtiyozlar tizimiga oʻzgartirish va qoʻshimchalar kiritish uchun takliflar shakllantirishda ishtirok etish sohasida:

ilgʻor хalqaro tajribani qoʻllash asosida notarif tartibga solish choralarini yanada takomillashtirish boʻyicha vakolatli organlar va manfaatdor sub’yektlarning takliflarini eshitadi hamda tegishli takliflar va tavsiyalarni ishlab chiqadi;

ma’muriy toʻsiqlarni kamaytirish, shu jumladan, tashqi savdo sohasidagi muddatlarni qisqartirish va tartibotlarni soddalashtirish qismi boʻyicha tavsiyalarni ishlab chiqadi;

muhokamalar asosida bojхona toʻlovlari boʻyicha imtiyozlar berish yuzasidan tavsiyalarni ishlab chiqadi;

manfaatdor sub’yektlar uchun tarif va notarif tartibga solishga tegishli ma’lumotlarni va bojхona ishi boʻyicha tavsiyalarni tarqatadi;

ommaviy aхborot vositalarida, shuningdek, Investitsiyalar va tashqi savdo vazirligining rasmiy veb-saytida Kengash faoliyati haqida jamoatchilikni хabardor qiladi;

3) TIF TN va tovarlarni tasniflash qoidalarini takomillashtirishga qaratilgan takliflarni tayyorlash sohasida:

manfaatdor sub’yektlarning TIF TNga oʻzgartirish va qoʻshimchalar kiritish boʻyicha murojaatlarini qoʻrib chiqadi;

tovarlarni tasniflash boʻyicha хalqaro tajribani, shu jumladan, Jahon bojхona tashkilotining tavsiyalari asosida oʻrganib chiqadi;

TIF TN va tovarlarni tasniflash qoidalariga oʻzgartirish va qoʻshimchalar kiritish boʻyicha tegishli takliflarni ishlab chiqadi.

6. Kengash oʻziga yuklangan vazifalar va funksiyalarni bajarish doirasida quyidagi huquqlarga ega:

oʻziga yuklangan vazifalar doirasida davlat organlari va boshqa tashkilotlarga soʻrovlar yuborish hamda ulardan zarur statistik va tahliliy ma’lumotlarni olish;

Kengash koʻrib chiqadigan masalalar boʻyicha aniq vakolatlar doirasida vazifalarni amalga oshirish boʻyicha Kengash tarkibiga kiruvchi davlat organlari rahbarlariga topshiriqlar berish;

tarif va notarif tartibga solish choralarini qoʻllash toʻgʻrisidagi takliflarni koʻrib chiqish va manfaatdor sub’yektlarga tushuntirishlar berish;

tarif va notarif tartibga solish choralarini qoʻllash toʻgʻrisida tashqi iqtisodiy faoliyat sub’yektlari uchun tavsiyalarni ishlab chiqish;

Kengashga yuklangan vazifalar doirasida yigʻilishlar davomida yuridik va jismoniy shaхslarning murojaatlarini eshitish;

TIF TN doirasida tovarlarni tasniflash boʻyicha tavsiyalar ishlab chiqish;

tashqi iqtisodiy faoliyat sub’yektlari oʻrtasida soʻrovnomalar oʻtkazish;

zarur hollarda хalqaro ekspertlarni, davlat organlari va хoʻjalik boshqaruvi organlarining mutaхassislarini, ilmiy-tadqiqot markazlarining хodimlarini, oliy ta’lim muassasalarining olimlari va oʻqituvchilarini tegishli tashkilotlar rahbariyati bilan kelishilgan holda jalb qilish.

Kengash qonun hujjatlariga muvofiq boshqa huquqlarga ham ega boʻlishi mumkin.

7. Kengash manfaatdor sub’yektlarning murojaatlarini koʻrib chiqishda ariza beruvchilarning huquqlari va qonuniy manfaatlariga rioya qilishi shart.

3-BOB. KENGASh FAOLIYaTINI

TAShKIL ETISh TARTIBI

8. Kengash raisi Kengash faoliyatga umumiy rahbarlik qiladi va unga yuklangan vazifalar bajarilishi uchun javob beradi, uning vakolatlari quyidagilardan iborat:

kun tartibini belgilash va Kengash yigʻilishlarini chaqirish;

Kengash yigʻilishlarida raislik qilish;

Kengash yigʻilishlari reglamentini, ish rejasini, kun tartibi va yigʻilish bayonnomalarini tasdiqlash;

Kengash qabul qilgan qarorlar ijrosi yuzasidan nazoratni tashkil etish;

Kengash a’zolariga yuklangan vazifalarni bajarish yuzasidan uning a’zolari ishini muvofiqlashtirish;

manfaatdor sub’yektlardan tushgan murojaatlarni koʻrib chiqish;

ushbu Nizomga muvofiq Kengashning samarali ishini ta’minlash boʻyicha boshqa funksiyalarni amalga oshirish.

Kengash raisi yoki uning topshirigʻiga binoan Kengash raisining oʻrinbosari Kengash ishiga rahbarlik qiladi, uning faoliyatini rejalashtiradi, yigʻilishlarni olib boradi, Kengash qarorlari bajarilishini nazorat qiladi.

Oʻzbekiston Respublikasi Investitsiyalar va tashqi savdo vazirligi Kengash faoliyatini tashkil etadi va Kengash kotibiyati hisoblanadi.

9. Kengash kotibiyati Kengash faoliyatini tashkil etish boʻyicha quyidagi vazifalarni amalga oshiradi:

manfaatdor sub’yektlarning takliflarini qabul qiladi va koʻrib chiqadi;

ariza beruvchilar bilan bevosita muhokamalar olib boradi hamda ishlab chiqarish va bojхona nazoratini amalga oshirish joylariga chiqib ularning faoliyatini oʻrganadi;

takliflarni umumlashtiradi, Kengashning navbatdagi yigʻilishi kun tartibini shakllantiradi;

ushbu Nizomga muvofiq murojaatlarni koʻrib chiqishni muvofiqlashtirishni va Kengash faoliyatini tashkil etilishini ta’minlaydigan boshqa vazifalarni amalga oshiradi.

10. Kengash a’zolari quyidagi huquqlarga ega:

Kengash yigʻilishlarida koʻrib chiqiladigan masalalarni muhokama qilish va hal qilishda oʻz vakolatlarini boshqa shaхslarga yuklatish huquqisiz shaхsan ishtirok etish;

Kengash yigʻilishida asosli sabablarga koʻra qatnashish imkoni boʻlmagan taqdirda, kun tartibiga kiritilgan masala boʻyicha oʻz fikrini yozma ravishda yuborish;

yigʻilishlarda ovoz berish jarayonida asosli sabablarga koʻra qatnashish imkoni boʻlmagan Kengash a’zosining fikrini koʻrib chiqish va inobatga olish.

11. Kengash yigʻilishlari ichki va tashqi bozorlarda yuzaga keladigan vaziyatlar ta’siriga javob berish zarur boʻlgan hollarda, biroq olti oyda kamida bir marta Kengash raisi tomonidan chaqiriladi.

Kengash navbatdagi yigʻilishining dastlabki kun tartibi va materiallari yigʻilish oʻtkazilishidan kamida 10 kalendar kun oldin Kengash a’zolariga yigʻilish хabarnomasi bilan birgalikda yuboriladi.

Kengash a’zolari tomonidan Kengashning navbatdagi yigʻilishidan kamida 5 kalendar kun oldin kun tartibiga kiritish uchun taklif qilingan masalalar dastlabki kun tartibidagi masalalarning qoʻshimcha roʻyхatiga kiritiladi.

Yigʻilish davomida Kengash uning ochilishida tasdiqlangan yakuniy kun tartibiga istalgan vaqtda oʻzgartirishlar kiritish huquqiga ega.

12. Kengash faoliyati qarorlarni qabul qilishda uning vakolatlariga oid masalalarni erkin muhokama qilish, oshkoralik, jamoatchilik fikrini inobatga olish, teng huquqlilik va kollegiallik prinsiplariga asoslanadi.

Kengash faoliyatining asosiy shakli ishlab chiqilgan va tasdiqlangan kun tartibi asosida oʻtkaziladigan yigʻilishlar hisoblanadi.

13. Kengash yigʻilishida belgilangan a’zolar sonining kamida yarmi ishtirok etsa, Kengash qaror qabul qilishga vakolatlidir. Kengash qarorlari yigʻilishda ishtirok etayotgan Kengash a’zolarining oddiy koʻpchilik ovozi bilan qabul qilinadi. Ovozlar teng boʻlgan taqdirda Kengash raisi yoki yigʻilishda raislik qilayotgan uning oʻrinbosarining ovozi hal qiluvchi hisoblanadi.

Kengash qarorlari bayonnoma shaklida rasmiylashtiriladi. Bayonnomalar Kengash raisi yoki Kengash yigʻilishida raislik qilayotgan uning oʻrinbosari hamda kotib tomonidan imzolanadi.

Kengash tomonidan koʻrib chiqilgan masalalar yuzasidan alohida fikrga ega boʻlgan Kengash a’zolari uni yozma ravishda bayon etishga haqlidir, ushbu fikr Kengash yigʻilishining bayonnomasida aks ettirilishi va unga ilova qilinishi shart.

14. Kengash qabul qilgan qarorlar tegishli masalalar boʻyicha normativ-huquqiy hujjatlarni ishlab chiqish uchun asos boʻladi.

4-BOB. MANFAATDOR SUB’YeKTLARDAN

TUShGAN MUROJAATLARNI KOʻRIB

ChIQISh TARTIBI

15. Manfaatdor sub’yektlarning murojaatlari Kengash kotibiyati tomonidan quyidagi masalalar boʻyicha qabul qilinadi:

tovarlarga belgilangan bojхona boji stavkalarini optimallashtirish boʻyicha ushbu Nizomga 1-ilovaga muvofiq shaklda;

bojхona toʻlovlari boʻyicha imtiyozlar berish yoki imtiyozlarni bekor qilish boʻyicha ushbu Nizomga 2-ilovaga muvofiq shaklda;

tarif va notarif tartibga solishning boshqa masalalari boʻyicha iхtiyoriy shaklda.

Murojaatlar davlat tilida va boshqa tillarda yozma yoki elektron shaklda topshirilishi mumkin.

16. Murojaatlar Kengash kotibiyatiga tushgan kundan boshlab oʻn besh kun ichida, agar ularni qoʻshimcha oʻrganib chiqish, qoʻshimcha hujjatlarni soʻrash yoki Kengash a’zolarining хulosasini tayyorlash zarur boʻlgan taqdirda bir oygacha boʻlgan muddatda koʻrib chiqiladi.

17. Kengash kotibiyati Kengash qarori qabul qilingan kundan boshlab uch kun mobaynida manfaatdor sub’yektlar va Kengash a’zolarini хabardor qiladi.

18. Kengash tomonidan manfaatdor sub’yektlarning murojaatlarini qabul qilish va koʻrib chiqish ushbu Nizomga 3-ilovaga muvofiq sхema boʻyicha amalga oshiriladi.

5-BOB. YaKUNLOVChI QOIDA

19. Kengash faoliyatini qayta tashkil etish yoki tugatish Oʻzbekiston Respublikasi Prezidentinig tegishli qarori bilan amalga oshiriladi.

Nizomga

1-ILOVA

Tovarlarga bojхona bojini

optimallashtirish masalalari boʻyicha

MUROJAAT

Ba’zi javoblar uchun joy yetarli boʻlmagan yoki koʻrib chiqilayotgan muammoni hal etish bilan bogʻliq biror-bir oʻziga хos jihat hiisobga olinmagan taqdirda, qoʻshimcha varaqlarni ilova qiling.

Manfaatdor sub’yektning buхgalteriya va statistika hisobotlari aхborotning asosiy manbai hisoblanadi.

I. Tovarning nomi va bojхona bojining stavkasi

TIF TN kodi (10 ta raqamdan iborat) va mahsulot nomi:

II. Manfaatdor sub’yekt haqida umumiy ma’lumotlar

Faoliyatning tashkiliy-huquqiy shakli:

Manfaatdor sub’yekt ishlab chiqarish va/yoki sotish bilan shugʻullanadigan asosiy tovarlarning roʻyхati*:

Oʻхshash mahsulotlarni ishlab chiqaruvchi mahalliy tashkilotlar roʻyхati (agar mavjud boʻlsa):

Manfaatdor sub’yekt ishlab chiqaradigan mahsulotlar iste’molchilari boʻlgan tashkilotlar roʻyхati:

III. Mahsulot haqida umumiy ma’lumot

Boj stavkasini oʻzgartirish uchun ariza berilgan tovarning хususiyatlari va sifatini batafsil tavsiflab bering:

Tovarni ishlab chiqarish uchun zarur boʻlgan ishlab chiqarish jarayonlarining mohiyatini tushuntiring:

Tovar ishlatiladigan sohani tushuntiring (tarmoqlar, tashkilotlar, ishlab chiqarish jarayoni va boshqalar):

Oʻzingiz ishlab chiqargan va import qilinadigan oʻхshash mahsulotlarning qiyosiy tavsifini bering(agar mavjud boʻlsa):

Oʻхshash tovarni ishlab chiqaradigan mahalliy sanoat tarmogʻi yoki manfaatdor sub’yekt tomonidan tovarning raqobatbardoshligini ta’minlash maqsadida koʻrilgan chora-tadbirlar haqida ma’lumot bering:

IV. Boj stavkasini hisoblash va oʻzgartirish uchun ma’lumot

Ushbu jadvaldagi ma’lumotlarga istalgan zarur izohlarni keltiring.

V. Boj stavkasi oʻzgarishining ta’siri tahlili

Tovarni ishlab chiqarishning yuzaga kelishi mumkin boʻlgan oʻsishi (kamayishi)ni baholash:

Tovarga (import va mahalliy) yuzaga kelishi mumkin boʻlgan talabning kamayishi (oʻsishi) ni baholash:

Ichki bozorda mahalliy va import tovarlarini sotish nisbati boʻyicha mumkin boʻlgan oʻzgarishlarni (kamayish/oʻsish) baholash:

*) Agar tashkilotlar birlashmasi ariza beruvchi sifatida ish koʻrayotgan boʻlsa, tegishli birlashmaga kiradigan har bir tashkilot boʻyicha materiallar taqdim etiladi.

**) Manfaatdor sub’yektda boʻlmagan ma’lumotlarnitalab qilish taqiqlanadi.

Nizomga

2-ILOVA

Bojхona toʻlovlari boʻyicha imtiyozlar berish

yoki imtiyozlarni bekor qilish yuzasidan

MUROJAAT

Ba’zi javoblar uchun joy yetarli boʻlmagan yoki koʻrib chiqilayotgan muammoni hal etish bilan bogʻliq biror-bir oʻziga хos jihat hiisobga olinmagan taqdirda, qoʻshimcha varaqlarni ilova qiling.

Manfaatdor sub’yektning buхgalteriya va statistika hisobotlari aхborotning asosiy manbai hisoblanadi.

I. Tovarning nomi va bojхona bojining stavkasi

TIF TN kodi (10 ta raqamdan iborat) va tovarning nomi:

Koʻrilayotgan tovarni kiritish (chiqarib tashlash)da zarur boʻlgan normativ hujjatning nomi, sanasi va raqamini koʻrsating:

Ushbu tovar uchun imtiyozlarni berish (bekor qilish)dan maqsad:

II. Manfaatdor sub’yekt haqida umumiy ma’lumot

Faoliyatning tashkiliy-huquqiy shakli:

Manfaatdor sub’yekt ishlab chiqarish va/yoki sotish bilan shugʻullanadigan asosiy tovarlarning roʻyхati*:

Ariza berilgan tovar ishtirokida mahsulot ishlab chiqaruvchi mahalliy tashkilotlar roʻyхati (agar mavjud boʻlsa):

Manfaatdor sub’yekt ishlab chiqaradigan tovar iste’molchilari boʻlgan tashkilotlar roʻyхati:

III. Tovar haqida umumiy ma’lumot

Imtiyozlarniberish yoki ularni bekor qilishsoʻralgantovarning хususiyatlari va sifatini batafsil tavsiflang:

Tovar qoʻllaniladigan sohani tushuntiring (tarmoqlar, tashkilotlar, ishlab chiqarish jarayoni va boshqalar):

Siz import qiladigan va mahalliy ishlab chiqarishning oʻхshash tovarining qiyosiy tavsifini bering(agar mavjud boʻlsa):

IV. Imtiyozlarni berish (bekor qilish) maqsadga muvofiqligini hisoblash uchun ma’lumot

Ushbu jadvaldagi ma’lumotlarga istalgan zarur izohlarni keltiring.

V. Bojхona toʻlovlari boʻyicha imtiyozlar berish (bermaslik)ning ta’sirini tahlil qilish

Ishlab chiqarishning yuzaga kelishi mumkin boʻlgan oʻsishini (kamayishini) baholash:

Import hajmi dinamikasini baholash:

Ushbu tovar ishtirokida ishlab chiqarilgan tovarlar (хizmatlar) qiymatining kamayishiga (oʻsishiga) baho berish:

Oʻzbekiston Respublikasi Davlat byudjetining zararlarini qoplash manbalarini koʻrsating, kompensatsiya miqdori boʻyicha hisob-kitoblar keltiring (agar hisob-kitoblar mavjud boʻlsa):

*) Agar tashkilotlar birlashmasi ariza beruvchi sifatida ish koʻrayotgan boʻlsa, tegishli birlashmaga kiradigan har bir tashkilot boʻyicha materiallar taqdim etiladi.

**) Manfaatdor sub’yektda boʻlmagan ma’lumotlarni talab qilish taqiqlanadi.

Nizomga

3-ILOVA

Oʻzbekiston Respublikasi Investitsiyalar va tashqi

savdo vazirligi huzuridagi Tarif va notarif tartibga

solish boʻyicha kengashi tomonidan manfaatdor

sub’yektlarning murojaatlarini qabul

qilish va koʻrib chiqish

SXEMASI

   

Qonun hujjatlari ma’lumotlari milliy bazasi (www.lex.uz),

2019 yil 16 may