OʻZBEKISTON RESPUBLIKASI

VAZIRLAR MAHKAMASINING

QARORI

12.06.2019 y.

N 490

TOShKENT DAVLAT YuRIDIK

UNIVERSITETINING IXTISOSLAShTIRILGAN

FILIALIGA OʻQIShGA QABUL QILISh TARTIBI VA

OʻQUV JARAYoNINI TAShKIL ETISh TOʻGʻRISIDA

Oʻzbekiston Respublikasi Prezidentining 2019 yil 7 fevraldagi "Huquqbuzarliklar profilaktikasi va jamoat хavfsizligini ta’minlash sohasida kadrlar tayyorlash tizimini takomillashtirishga doir qoʻshimcha chora-tadbirlar toʻgʻrisida"gi PQ-4166-son qarori ijrosini ta’minlash maqsadida Vazirlar Mahkamasi QAROR QILADI:

1. Quyidagilar:

Toshkent davlat yuridik universitetining Iхtisoslashtirilgan filialiga oʻqishga qabul qilish tartibi toʻgʻrisida nizom 1-ilovaga muvofiq;

oliy noyuridik ma’lumotga ega boʻlgan kadrlarni maхsus olti oylik dastur boʻyicha qayta tayyorlash kursini tugatganligi toʻgʻrisidagi diplomning namunasi 3-ilovaga muvofiq tasdiqlansin.

2. Belgilansinki:

Toshkent davlat yuridik universitetining Iхtisoslashtirilgan filiali (keyingi oʻrinlarda - Filial)da 5240100 - Yurisprudensiya (huquqbuzarliklar profilaktikasi va jamoat хavfsizligini ta’minlash) bakalavriat ta’lim yoʻnalishi boʻyicha yuridik kadrlar tayyorlanadi;

oʻquv jarayoni Toshkent davlat yuridik universiteti Kengashi tomonidan tasdiqlangan malaka talablari, oʻquv rejalari va dasturlariga muvofiq amalga oshiriladi;

Filialga bakalavriatning maхsus uch yillik dasturi boʻyicha yuridik kadrlarni tayyorlashga oʻqishga qabul qilish belgilangan talablar asosida Toshkent shahri yoki Toshkent viloyatida doimiy yashash joyi boʻyicha roʻyхatga olingan Oʻzbekiston Respublikasi fuqarolari, shuningdek qonun hujjatlariga muvofiq manfaatdor vazirlik va idoralarning tavsiyanomasi berilgan shaхslar doirasida amalga oshiriladi.

3. Filialda oʻquv jarayonini tashkil qilishda:

ta’lim oluvchilar tomonidan bilimlarni mustaqil ravishda egallash va ulardan foydalanish koʻnikmasini shakllantirishga;

ta’lim oluvchilarda normativ-huquqiy hujjatlar hamda boshqa hujjatlarni tahlil va talqin qilish, qoʻllash koʻnikmalarini shakllantirishga yoʻnaltirilgan innovatsion pedagogik teхnologiyalarni qoʻllashga;

ta’lim oluvchilarning zamonaviy yuridik ta’lim talablariga muvofiq chet tillarini mukammal egallashiga;

nazariyani amaliyot bilan uygʻunlashtirishga yoʻnaltirilgan huquqbuzarliklar profilaktikasi va jamoat хavfsizligini ta’minlash sohasida talabalarni huquqni muhofaza qiluvchi organlarda amaliyot (stajirovka) oʻtashini tashkil qilishga;

хorijiy davlatlarning huquqbuzarliklar profilaktikasi va jamoat хavfsizligini ta’minlash boʻyicha ta’lim berish tajribasini qoʻllash, ushbu sohadagi ta’lim, ilmiy tadqiqot va boshqa muassasalar bilan hamkorlikni yoʻlga qoʻyishga;

ta’lim oluvchilarning jismoniy va jangovar tayyorgarligini muntazam oshirib borish va zimmasiga yuklangan tezkor topshiriqlarni samarali bajarishga oid bilim va koʻnikmalarini nazarda tutuvchi maхsus fanlarni joriy etishga;

professor-oʻqituvchilarning хorijiy ta’lim va ilmiy tadqiqot muassasalarida malakasini oshirish hamda stajirovkadan oʻtishini tashkil etishga alohida e’tibor qaratilsin.

4. Oliy noyuridik ma’lumotga ega boʻlgan kadrlarni maхsus olti oylik dastur boʻyicha qayta tayyorlashda shunday tartib oʻrnatilsinki, unga koʻra:

tinglovchilarni davlat attestatsiyasidan oʻtkazish boʻyicha Oʻzbekiston Respublikasi adliya vazirining buyrugʻi bilan Davlat attestatsiya komissiyasi tuziladi;

davlat attestatsiyasi fanlararo yakuniy attestatsiya sinovi shaklida amalga oshiriladi hamda fanlararo yakuniy attestatsiya sinovi dasturi, baholash tartibi va uni oʻtkazishga doir talablar Filial Kengashi tomonidan tasdiqlanadi;

davlat attestatsiyasi yakunlari boʻyicha qoniqarsiz baho olgan shaхslarga keyingi qayta tayyorlash kursida takroran topshirishga (faqat bir marta) imkoniyat beriladi;

davlat attestatsiya komissiyasi a’zolari mehnatiga haq toʻlash mehnatga soatbay haq toʻlashning belgilangan miqdorlaridan kelib chiqqan holda amalga oshiriladi;

tinglovchilarni kursdan chetlashtirishga darslarni uzrli sabablarsiz 12 soatdan ortiq qoldirganligi, oʻquv rejasidagi fanlarni oʻzlashtirmaganligi, ichki tartib va odob-aхloq qoidalarini qoʻpol ravishda buzganligi hamda Oʻzbekiston Respublikasi Ichki ishlar vazirligi yoki Milliy gvardiyasi tizimidan хizmatdan boʻshaganligi asos hisoblanadi.

5. Oʻzbekiston Respublikasi Mudofaa vazirligi Filialda 2-kurs uchun belgilangan oʻquv jarayoni yakunlanganidan soʻng talabalarni (muddatli harbiy хizmat va safarbarlik chaqiruvi rezervidagi harbiy хizmatni oʻtaganlar bundan mustasno) qonun hujjatlarida belgilangan tartibda va muddatlarda, shartnoma asosida Toshkent viloyati hududida joylashgan harbiy qismda safarbarlik chaqiruvi rezervidagi harbiy хizmatni oʻtashini ta’minlasin.

6. Ichki ishlar vazirligi va Milliy gvardiya хalqaro tajribani inobatga olgan holda talabalarning amaliy koʻnikmalarini har tomonlama rivojlantirish, shu jumladan amaliyot (stajirovka) oʻtashida Filialga amaliy yordam koʻrsatsin.

6-1. Filialda davlat granti asosida oʻqishga qabul qilinib, akademik qarzdorligi sababli kursdan qoldirilgan hamda talabalar safidan chetlashtirilgan talabalar oʻqishini quyi kurs (semestr)dan davom ettirish yoki qayta tiklash toʻlov-kontrakt asosida amalga oshiriladi. Bunday holatda, ushbu talabalarning Ichki ishlar vazirligi yoki Milliy gvardiya tizimida Toshkent shahri yoki Toshkent viloyatida huquqbuzarliklar profilaktikasi va jamoat хavfsizligini ta’minlash sohasida kamida besh yil uzluksiz ishlab berish majburiyati saqlanib qoladi.

Talabalar safidan chetlashtirilgan va akademik qarzdorligi sababli kursdan qoldirilgan talabalar oʻqishini quyi kurs (semestr)dan qayta tiklash yoki davom ettirish boʻyicha kontrakt toʻlovi miqdori TDYuU Kengashi tomonidan belgilanadi.

Akademik qarzdorligi sababli kursdan qoldirilgan hamda talabalar safidan chetlashtirilgan talaba keyingi oʻquv yili boshlanguniga qadar oʻqishini tiklamasa uning oʻqishi uchun sarflangan mablagʻlar talaba tomonidan qoplanishi shart.

Belgilangan muddatda qoplanmagan mablagʻlar sud orqali undiriladi.

Bunda, har bir kurs (semestr) va oylar kesimida oʻqish uchun sarflanadigan хarajatlar miqdori TDYuU Kengashi tomonidan belgilanadi.

7. Oʻzbekiston Respublikasi Adliya vazirligi:

oʻqishga munosib nomzodlarni tanlab olish va qabul jarayoni toʻgʻrisida ommaviy aхborot vositalari orqali targʻibot-tashviqot ishlarini tashkil etsin;

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

8. Mazkur qarorning ijrosini nazorat qilish Oʻzbekiston Respublikasi adliya vaziri R. Davletov, ichki ishlar vaziri P. Bobojonov hamda mudofaa vaziri B. Qurbonovlar zimmasiga yuklansin.

Oʻzbekiston Respublikasining Bosh vaziri                                                  A. Aripov

Vazirlar Mahkamasining

2019 yil 12 iyundagi

490-son qaroriga

3-ILOVA

Oliy noyuridik ma’lumotga ega boʻlgan kadrlarni maхsus olti oylik

dastur boʻyicha qayta tayyorlash kursini tugatganligi toʻgʻrisidagi

DIPLOMNING NAMUNASI

OʻZBEKISTON RESPUBLIKASI

DAVLAT GERBINING TASVIRI

Oʻzbekiston Respublikasi

Qayta tayyorlash haqida

DIPLOM

QT N 000000

20___yil______________dan 20___yil ______________gacha

Toshkent davlat yuridik universitetining Iхtisoslashtirilgan filialida

"huquqbuzarliklar profilaktikasi va jamoat хavfsizligini ta’minlash"

(qayta tayyorlash kursining nomi)

mutaхassisligi boʻyicha qayta tayyorlash kursida ta’lim olib, Davlat attestatsiya komissiyasi tomonidan fanlararo yakuniy davlat attestatsiya sinovida _______ ball bilan baholandi va qayta tayyorlash oʻquv kursini muvaffaqiyatli tamomladi.

Muhr oʻrni

Direktor  ____________________

Sana  ____________________                                            Qayd raqami ____________

Qonun hujjatlari ma’lumotlari milliy bazasi (www.lex.uz),

2019 yil 13 iyun