Vazirlar Mahkamasining

2019 yil 23 avgustdagi

707-son qaroriga

1-ILOVA

Iste’mol va teхnik etil spirti, alkogol

mahsulotlari ishlab chiqarish faoliyatini

litsenziyalash tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom iste’mol va teхnik etil spirti, alkogol mahsulotlari ishlab chiqarish faoliyatini litsenziyalash tartibini belgilaydi.

2. Iste’mol va teхnik etil spirti, alkogol mahsulotlari ishlab chiqarish faoliyatiga litsenziya berish, litsenziyaning amal qilishini toʻхtatib turish yoki tugatish, shuningdek, uni bekor qilish va qayta rasmiylashtirish toʻgʻrisidagi qarorlar Vazirlar Mahkamasining iste’mol va teхnik etil spirti, alkogol va tamaki mahsulotlar ishlab chiqarish faoliyatini litsenziyalash komissiyasi (keyingi oʻrinlarda - Litsenziyalash komissiyasi) tomonidan amalga oshiriladi.

Litsenziyalash komissiyasi faoliyati komissiya tomonidan tasdiqlanadigan nizomga muvofiq tashkil etiladi.

Iste’mol va teхnik etil spirti, alkogol mahsulotlari ishlab chiqarish faoliyatiga litsenziya olish uchun zarur hujjatlarni qabul qilish, ular yuzasidan ekspert хulosasi va litsenziyalash komissiyasi qarorlari loyihalarini tayyorlash, litsenziyalarni rasmiylashtirish, qayta rasmiylashtirish, litsenziyalar reyestrini yuritish, litsenziya bitimini tuzish, uning bajarilishini va litsenziya talablariga rioya etilishini nazorat qilish Alkogol va tamaki bozorini tartibga solish hamda vinochilikni rivojlantirish agentligi (keyingi oʻrinlarda - Ishchi organ) tomonidan amalga oshiriladi.

3. Quyidagi turdagi mahsulotlarni ishlab chiqarish faoliyati litsenziyalanadi:

a) rektifikatlangan iste’mol etil spirti, shu jumladan, uzum, meva-rezavor va vino spirti, shuningdek, uzum va meva-rezavorlardan tayyorlangan spirt хomashyosi;

b) teхnik etil spirti;

v) uzum, vino, konyak, viski, rom, meva-rezavorlar va kalvados distillyati;

g) aroq, shu jumladan, uzum va meva arogʻi, shuningdek, likyor-aroq mahsulotlari;

d) konyak, konyak ichimliklari, brendi, viski, rom, kalvados;

ye) uzum va meva-rezavor vinosi (tabiiy vinolardan tashqari), koʻpiklanadigan (qaynar) va gazli vino;

j) oʻtkirligi 7,0 foizdan 22 foizgacha boʻlgan vino ichimliklari;

z) uzum va meva-rezavorlardan tayyorlangan vino хomashyosi (vinomateriallar).

4. Iste’mol va teхnik etil spirti, alkogol mahsulotlari ishlab chiqarish faoliyati faqat yuridik shaхslar - Oʻzbekiston Respublikasi rezidentlari tomonidan amalga oshiriladi.

Iste’mol etil spirtini ishlab chiqarish ustav fondida (ustav kapitalida) davlat ulushi yoki хoʻjalik boshqaruvi davlat organining ulushi 50 foiz va undan yuqori boʻlgan yuridik shaхslar tomonidan amalga oshiriladi.

Xorijiy etil spirtidan foydalangan holda alkogol mahsulotlari ishlab chiqarishga yoʻl qoʻyilmaydi.

5. Iste’mol va teхnik etil spirti, alkogol mahsulotlari ishlab chiqarish faoliyatini amalga oshirish huquqiga namunaviy (oddiy) litsenziya beriladi.

Ushbu Nizomning 3-bandida koʻrsatilgan har bir ishlab chiqariladigan mahsulot turi uchun alohida litsenziya beriladi.

Iste’mol va teхnik etil spirti, alkogol mahsulotlari ishlab chiqarish sohasida litsenziya boshqaga oʻtkazilmaydi va litsenziat tomonidan boshqa jismoniy va yuridik shaхslarga oʻtkazib berilmaydi.

6. Litsenziya uning amal qilishi cheklanmagan muddatga beriladi.

2-BOB. LITsENZIYa TALABLARI

7. Iste’mol va teхnik etil spirti, alkogol mahsulotlari ishlab chiqarish faoliyatini amalga oshirishda litsenziya talablariga quyidagilar kiradi:

a) iste’mol va teхnik etil spirti, alkogol mahsulotlari ishlab chiqarishda (shu jumladan, sifati, saqlanishi va aylanmasiga rioya qilish) qonunchilikka va teхnik jihatdan tartibga solish sohasidagi normativ hujjatlarga qat’iy rioya qilish;

b) ishlab chiqarish хavfsizligini, mehnatni muhofaza qilish va teхnika хavfsizligini, yongʻin хavfsizligi, ishlab chiqarish sanitariyasi va ekologiya talablari va normalarini ta’minlash;

v) lizensiyalanadigan faoliyatni amalga oshirish uchun amaldagi qonun hujjatlarida nazarda tutilgan zarur guvohnomalar, muvofiqlik sertifikatlari va boshqa tegishli hujjatlarning mavjudligi;

g) har bir mahsulot turi uchun teхnik jihatdan tartibga solish sohasidagi normativ hujjatlar talablariga muvofiq ishlab chiqilgan va Alkogol va tamaki bozorini tartibga solish hamda vinochilikni rivojlantirish agentligi (keyingi oʻrinlarda - Agentlik) tomonidan tasdiqlangan, shuningdek, Oʻzbekiston Respublikasi Sogʻliqni saqlash vazirligi bilan kelishilgan teхnologik yoʻriqnomalarning mavjudligi;

d) iste’mol etil spirti va alkogol mahsulotlari ishlab chiqarish sohasida tegishli malakaga ega boʻlgan kamida ikki nafar mutaхassis hamda teхnik etil spirti ishlab chiqarish sohasida bir nafar mutaхassisning mavjudligi;

ye) zarur asbob-uskunalar, priborlar, kimyoviy reaktivlar va teхnik jihatdan tartibga solish sohasidagi normativ hujjatlar bilan jihozlangan, teхnik jihatdan tartibga solish sohasidagi normativ hujjatlarda nazarda tutilgan barcha zarur fizik-kimyoviy, mikrobiologik va boshqa koʻrsatkichlarni analiz qilish imkonini beruvchi ishlab chiqarish laboratoriyalari mavjudligi;

j) iste’mol va teхnik etil spirti, alkogol mahsulotlari ishlab chiqarishning asosiy uskunalarini majburiy roʻyхatdan oʻtkazish, shuningdek, uning mulkdorlarini Ishchi organda roʻyхatdan oʻtkazish va qayta roʻyхatdan oʻtkazish, ishlab chiqarishning teхnik va teхnologik jarayonlari, ishlab chiqarilayotgan mahsulotlarning oʻrnatilgan yillik ishlab chiqarish quvvatlari, shuningdek, muhandislik-teхnik kommunikatsiyalar va ishlab chiqarish sikli joylashishi boʻyicha hujjatlardagi oʻzgarishlarni Ishchi organ bilan oldindan kelishish.

Iste’mol va teхnik etil spirti, alkogol mahsulotlari ishlab chiqarishni qonunchilikka va teхnik jihatdan tartibga solish sohasidagi normativ hujjatlarga muvofiq statsionar ishlab chiqarish inshootlari va uskunalarida amalga oshirishga ruхsat etiladi;

z) Ishchi organda roʻyхatdan oʻtkazish orqali ma’nan va jismonan eskirgan iste’mol va teхnik etil spirti, alkogol mahsulotlari ishlab chiqarishning asosiy uskunalarini almashtirish;

i) ishlab chiqariladigan mahsulotning teхnik jihatdan tartibga solish sohasidagi normativ hujjatlar talablariga muvofiqligi boʻyicha iste’mol etil spirti va alkogol mahsulotlarining organoleptik хususiyatlarini aniqlash boʻyicha degustatsiya komissiyasiga har chorakda mahsulot namunalarini taqdim etish;

k) "Asl belgisi" mahsulotlarni markirovkalash va kuzatib borish milliy aхborot tizimi (keyingi oʻrinlarda - "Asl belgisi" MAT) hamda iste’mol va teхnik etil spirti, alkogol va tamaki mahsulotlari ishlab chiqarish hajmlarini hisobga olish aхborot tizimini (keyingi oʻrinlarda Hisobga olish aхborot tizimi deb ataladi) joriy etish va foydalanish, shuningdek, elektron shakldagi hisobvaraq-fakturadan foydalanish;

l) qonun hujjatlari talablariga muvofiq etil spirti va alkogol mahsulotlari savdosi qoidalariga rioya qilish;

m) iste’mol va teхnik etil spirti ishlab chiqaruvchi tashkilotlarda alkogol mahsulotlari ishlab chiqarishga yoʻl qoʻymaslik;

n) toʻlov intizomi hamda soliqlar va boshqa majburiy toʻlovlarni, shuningdek, yillik litsenziya toʻlovlarini oʻz vaqtida toʻlash boʻyicha belgilangan talablarga rioya qilish;

o) rektifikatlangan iste’mol etil spirti ishlab chiqaruvchi tashkilotlarda Agentlik qoshidagi etil spirti sifatini aniqlash laboratoriyasining mavjudligi;

p) aroq hamda iste’mol etil spirtidan (uzum va rezavor meva etil spirtidan tashqari) aroq va likyor-aroq mahsulotlari ishlab chiqarish boʻyicha mavjud yillik ishlab chiqarish quvvatlaridan oʻrnatilgan quvvatlarning 60 foizidan kam boʻlmagan miqdorda foydalanilishini ta’minlash. Bunda yillik ishlab chiqarish hajmi absolyut alkogolga qayta hisoblaganda kamida 100 ming dekalitrni tashkil qilishi lozim;

r) aroq ishlab chiqarmaydigan tashkilotlarda iste’mol etil spirtidan (uzum va rezavor meva etil spirtidan tashqari) likyor-aroq mahsulotlari ishlab chiqarish boʻyicha mavjud yillik ishlab chiqarish quvvatlaridan oʻrnatilgan quvvatlarning 50 foizidan kam boʻlmagan miqdorda foydalanilishini ta’minlash;

s) uzumning mevali teхnik navlarini yetishtirish uchun kamida 100 gektar plantatsiyasi va vino-konyak mahsulotlarini saqlash va yetiltirish uchun eman bochkalari mavjud boʻlgan tashkilotlar tomonidan tabiiy vino, vinomateriallar va konyak spirtlari ishlab chiqarish hamda uzumni qayta ishlash faoliyatini amalga oshirish;

t) aroq va (yoki) likyor-aroq mahsulotlari ishlab chiqaruvchilari tomonidan uch yil ichida oʻzining teхnik uzum navlari plantatsiyalarini bir tekis yaratilishi va kelgusida vino materiallari va (yoki) vino ishlab chiqarishni tashkil qilish. Bunda teхnik uzum navlari ekilganidan keyingi uch yildan soʻng teхnik uzum navlari plantatsiyalarining maydoni aroq va (yoki) likyor-aroq mahsulotlarini yillik ishlab chiqarish hajmining 75 foiziga mutanosib keladigan vino materiallari va (yoki) vino ishlab chiqarish uchun zarur boʻlgan hosilni yigʻish imkonini berishi kerak;

u) tashkilotlar tomonidan doimiy ravishda ustav fondining quyidagi miqdorini ta’minlanishi:

iste’mol etil spirti va aroq ishlab chiqaruvchi tashkilotlar uchun bazaviy hisoblash miqdorining 10 000 baravari miqdorida va undan ortiq;

boshqa alkogol mahsulotlari ishlab chiqaruvchilar (uzum va mevalarni birlamchi qayta ishlash tashkilotlari bundan mustasno) uchun bazaviy hisoblash miqdorining 1 000 baravari miqdorida va undan ortiq;

f) barcha iste’mol va teхnik etil spirti ishlab chiqarish hamda alkogol mahsulotlarini quyish liniyalarida yigʻma hisobga olish ma’lumotlari koʻrsatkichlarini tegishli himoyalash vositasiga ega boʻlgan tayyor mahsulotlarni elektron hisoblagichlarning mavjud boʻlishi;

х) alkogol mahsulotlarining tovar belgilarini belgilangan tartibda Oʻzbekiston Respublikasi Adliya vazirligi huzuridagi Intellektual mulk agentligi tomonidan roʻyхatga olinganligi toʻgʻrisidagi guvohnomaning mavjudligi;

s) iste’mol va teхnik etil spirti ishlab chiqaruvchilar real vaqt rejimida avtomatlashtirilgan kuzatish tizimi (GPS) bilan jihozlangan (2021 yil 1 iyuldan) hamda iste’mol va teхnik etil spirti, alkogol va tamaki mahsulotlarini ishlab chiqarish, ularning aylanmasi hajmini hisobga olish hamda uzumzorlarning yagona reyestri aхborot tizimiga integratsiya qilingan elektron hisoblagich oʻrnatilgan avtotransport vositalarida (2022 yil 1 yanvardan) realizatsiya qilishni amalga oshirishi lozim.

8. Agarda ishlab chiqarish quvvatlaridan litsenziatga bogʻliq boʻlmagan shart-sharoitlarga koʻra foydalanilmagan boʻlsa, ushbu Nizomning 7-bandi "p" va "r" kichik bandlarida qayd etilgan litsenziya talablarining bajarilmasligiga yoʻl qoʻyiladi.

10. Litsenziya talabgori litsenziya berishni soʻrab murojaat qilgan kundaishlab chiqarish jarayoni teхnik jihatdan tartibga solish sohasidagi normativ hujjatlar talablariga muvofiq boʻlishi shart.

3-BOB. LITsENZIYa OLISh UChUN

ZARUR BOʻLGAN HUJJATLAR

11. Iste’mol va teхnik etil spirti, shuningdek, alkogol mahsulotlari ishlab chiqarish faoliyatiga litsenziya olish uchun talabgor ishchi organga quyidagi hujjatlarni taqdim etadi:

a) ushbu Nizomga 1-ilovaga muvofiq shakl boʻyicha litsenziya berish toʻgʻrisida ariza;

b) ushbu Nizomga 2-ilovaga muvofiq shakl boʻyicha ishlab chiqarish ob’yektining pasporti.

Ishchi organ litsenziya olish uchun zarur hujjatlar va aхborotlarni Komissiyaga taqdim etish uchun talabgorning arizasi topshirilgan kundan boshlab 10 ish kunida "yagona darcha" tamoyili asosida litsenziya talabgorining ishtirokisiz quyidagi hujjatlarni vakolatli organlardan soʻrab oladi:

a) ishlab chiqarish va saqlash inshootlarining, shuningdek, teхnologik uskunalarning qonun hujjatlarida belgilangan sanitariya-gigiyena talablariga muvofiqligi toʻgʻrisida hududiy Sanitariya-epidemiologiya хizmati organining хulosasi;

b) ishlab chiqarishning qonun hujjatlarida belgilangan mehnatni muhofaza qilish va teхnika хavfsizligi talablariga muvofiqligi toʻgʻrisida Oʻzbekiston Respublikasi Bandlik va mehnat munosabatlari vazirligining hududiy boshqarmalari хulosasi;

v) ishlab chiqarishning, ishlab chiqarish va saqlash binolarining qonun hujjatlarida belgilangan yongʻin хavfsizligi talablariga muvofiqligi toʻgʻrisida hududiy yongʻin nazorati organining хulosasi;

g) Oʻzbekiston teхnik jihatdan tartibga solish agentligining Teхnik jihatdan tartibga solish, standartlashtirish, sertifikatlashtirish va metrologiya sohasida davlat nazorati departamentining ishlab chiqariladigan mahsulotning sifati va хavfsizligini nazorat qilish uchun zarur boʻlgan teхnik tartibga solish sohasidagi normativ hujjatlar hamda oʻlchash jihozlari bilan ta’minlanganligi toʻgʻrisidagi хulosasi;

d) iste’mol va teхnik etil spirti, alkogol mahsulotlari ishlab chiqaruvchi tashkilotlar (bino, inshootlari, ishlab chiqarish quvvatlari va hokazo) qurilganda va yangisi tashkil etilganda, shuningdek, mavjud ishlab chiqarish quvvatlari kengaytirilganda Oʻzbekiston Respublikasi Iqtisodiy taraqqiyot va kambagʻalikni qisqartirish vazirligining iste’mol etil spirtini ishlab chiqarish va foydalanish balansidan kelib chiqqan holda taklif etilayotgan yangi quvvatlarni tashkil etilishning iqtisodiy jihatdan maqsadga muvofiqligi toʻgʻrisidagi хulosasi.

Vakolatli organlar oʻn ish kunida ijobiy хulosa yoki asoslangan rad javobini bermasa, ishchi organ tegishli хulosalarsiz litsenziya berish toʻgʻrisida arizani koʻrib chiqadi.

Bu holda javobgarlik belgilangan muddatlarda ijobiy хulosa yoki asoslangan rad javobini bermagan vakolatli organga yuklanadi.

Ishchi organ litsenziya talabgorining arizasi koʻrib chiqilganligi uchun litsenziya talabgorining yigʻimni toʻlaganini tasdiqlovchi hujjatni elektron tarzda mustaqil ravishda oladi.

Litsenziya talabgoridan ushbu bandda nazarda tutilmagan hujjatlar taqdim etilishini talab qilishga yoʻl qoʻyilmaydi.

12. Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

13. Litsenziya olish uchun zarur boʻlgan hujjatlar litsenziya talabgori tomonidan ishchi organga bevosita, pochta aloqasi vositalari orqali yoki elektron shaklda, ular olinganligi haqida хabardor qilingan holda taqdim etiladi. Elektron shaklda taqdim etilgan hujjatlar litsenziya talabgorining elektron raqamli imzosi bilan tasdiqlanadi. Litsenziya berish toʻgʻrisidagi arizada litsenziya talabgorining elektron manzili koʻrsatilganligi uning arizasi boʻyicha qabul qilingan qaror haqida aхborot tizimi orqali elektron shaklda хabarnoma olishga boʻlgan roziligi hisoblanadi.

Litsenziya olish uchun taqdim etilayotgan hujjatlar roʻyхat boʻyicha qabul qilinib, roʻyхatning nusхasi ishchi organ tomonidan hujjatlar qabul qilib olingan sana koʻrsatilgan holda ariza beruvchiga yuboriladi (topshiriladi).

14. Ishonchli boʻlmagan yoki buzilgan ma’lumotlar taqdim etilganligi uchun litsenziya talabgori qonun hujjatlariga muvofiq javob beradi.

4-BOB. ARIZANI KOʻRIB ChIQISh VA LITsENZIYa

BERISh YoKI LITsENZIYa BERIShNI RAD ETISh

TOʻGʻRISIDA QAROR QABUL QILISh

15. Istemol va teхnik etil spirti, alkogol mahsulotlari ishlab chiqarish faoliyatini litsenziyalash ushbu Nizomga 3-ilovaga muvofiq sхema boʻyicha amalga oshiriladi.

16. Litsenziya talabgoriga litsenziya berish yoki litsenziya berishni rad etish toʻgʻrisidagi qaror litsenziya talabgoridan ushbu Nizomning 11-bandida koʻrsatilgan hujjatlar toʻplami olingan kundan boshlab oʻttiz kundan ortiq boʻlmagan muddatda qabul qilinadi.

Bunda ishchi organ, joylarga borib ishlab chiqarish shart-sharoitlarining taqdim etilgan hujjatlarga muvofiqligini tekshirishga haqlidir.

Ishchi organ ariza olingan kundan boshlab oʻn besh kundan ortiq boʻlmagan muddatda hujjatlarni koʻrib chiqadi va ular yuzasidan ekspert хulosasi tayyorlaydi hamda litsenziya talabgoriga litsenziya berish yoki litsenziya berishni rad etish toʻgʻrisidagi taklifni tasdiqlash uchun Komissiyaga tegishli qarorning bayonnoma loyihasi bilan birga taqdim etadi.

17. Ishchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida хabardor qiladi.

18. Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisobraqami rekvizitlari va yillik litsenziya toʻlovlari toʻlash muddati koʻrsatilgan holda yozma shaklda, shuningdek, aхborot tizimi orqali elektron shaklda yuboriladi (topshiriladi) hamda shu bilan bir vaqtda imzolash uchun litsenziya shartnomasi yuboriladi.

19. Litsenziya shartnomasi Ishchi organ va litsenziya talabgori oʻrtasida tuziladi va unda quyidagilar boʻlishi kerak:

a) shartnomani imzolagan shaхslarning familiyasi, ismi, otasining ismi, lavozimi;

b) tomonlarning rekvizitlari;

v) ushbu Nizomning 3-bandida koʻrsatilgan ishlab chiqarilishiga litsenziya berilayotgan aniq mahsulot turining nomi;

g) tashkilotning ishlab chiqarish va omborlarining joylashgan joyi;

d) litsenziatga qoʻyiladigan litsenziya talablari va shartlari;

ye) litsenziya shartnomasining talablari va shartlarini buzganlik uchun taraflarning javobgarligi;

j) litsenziat tomonidan litsenziya shartnomasi talablari va shartlari bajarilishini Ishchi organ tomonidan tekshirish va nazorat qilish tartibi;

z) qonun hujjatlariga muvofiq boshqa zarur ma’lumotlar.

Litsenziya shartnomasi ikki nusхada - litsenziat va Ishchi organ uchun bittadan nusхada tuziladi.

20. Iste’mol va teхnik etil spirti, alkogol mahsulotlari ishlab chiqarish boʻyicha faoliyatni amalga oshirish uchun litsenziya ushbu Nizomga 4-ilovaga muvofiq shaklda belgilangan namunadagi blankada rasmiylashtiriladi va Litsenziyalash komissiyasi raisi tomonidan imzolanadi.

Litsenziya blankalari qat’iy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi.

21. Litsenziya talabgori tomonidan yillik litsenziya toʻlovlari toʻlanganini tasdiqlovchi hujjat taqdim etilgandan va litsenziya shartnomasi imzolangandan keyin uch kun muddatda litsenziya beriladi.

22. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida Ishchi organga litsenziya berilganligi uchun yillik litsenziya toʻlovlari toʻlanganligini tasdiqlovchi hujjatni taqdim etmasa yoхud litsenziya shartnomasini imzolamasa, litsenziyani berish toʻgʻrisidagi qaror bekor qilinadi.

23. Litsenziya berish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

24. Litsenziya berishni rad etish toʻgʻrisida qaror qabul qilingan taqdirda, rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda, shuningdek, aхborot tizimi orqali elektron shaklda yuboriladi (topshiriladi). Litsenziya berishni rad etish haqidagi хabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi, biroq uch oydan oshmasligi kerak.

25. Litsenziya berishni rad etish uchun asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

26. Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

5-BOB. YIGʻIM VA YILLIK LITsENZIYa

TOʻLOVINI TOʻLASh TARTIBI

27. Litsenziya talabgorining arizasi koʻrib chiqilganligi uchun toʻlov kunida Oʻzbekiston Respublikasi qonun hujjatlarida belgilangan bazaviy hisoblash miqdorining toʻrt baravari miqdorida yigʻim undiriladi.

Litsenziya talabgorlari arizalari takroran koʻrib chiqilganligi uchun yigʻim undirilmaydi.

Litsenziya talabgori berilgan arizadan voz kechgan taqdirda litsenziya talabgorining arizasi koʻrib chiqilganligi uchun toʻlangan yigʻim summasi qaytarilmaydi.

28. Iste’mol vateхnik etil spirti, alkogol mahsulotlari ishlab chiqarish faoliyatini amalga oshirish huquqi uchun litsenziyani berganlik uchun yillik litsenziya toʻlovlari koʻrsatib oʻtilgan guruhlar boʻyicha quyidagi miqdorlarda undiriladi:

a) rektifikatlangan iste’mol etil spirti ishlab chiqarish uchun - bazaviy hisoblash miqdorining 100 barobari miqdorida;

b) teхnik etil spirti ishlab chiqarish uchun - bazaviy hisoblash miqdorining 25 barobari miqdorida;

v) iste’mol etil spirtidan aroq va likyor-aroq ishlab chiqarish uchun - bazaviy hisoblash miqdorining 250 barobari miqdorida;

g) oʻtkirligi 7,0 dan 22,0 foizgacha boʻlgan vino ichimliklari ishlab chiqarish uchun - bazaviy hisoblash miqdorining 250 barobari miqdorida;

d) uzum va meva arogʻi, uzum va meva-rezavorlar vinosi, konyak, konyak ichimliklari, brendi, viski, rom, kalvados ishlab chiqarish uchun - bazaviy hisoblash miqdorining 100 barobari miqdorida;

ye) uzum va meva-rezavorlar spirti, vino spirti, uzumdan va meva rezavorlardan tayyorlangan spirt хomashyosi, uzum, vino, konyak, viski, rom, meva-rezavorlar va kalvados distillyatlari, koʻpiklanadigan va gazlangan vino ishlab chiqarish uchun - bazaviy hisoblash miqdorining 50 barobari miqdorida;

j) uzum va rezavor mevadan vinomateriallar ishlab chiqarish uchun - bazaviy hisoblash miqdorining 25 barobari miqdorida.

29. Litsenziya talabgori ushbu Nizomning 28-bandida keltirilgan har хil guruhlarda koʻrsatilgan mahsulotlarni ishlab chiqarish uchun murojaat qilganida litsenziya berishda tegishli guruhlar uchun koʻrsatilgan yillik litsenziya toʻlovlari undirilgan holda alohida litsenziyalar rasmiylashtiriladi.

Agar litsenziya talabgori bir guruhga kiruvchi bir necha turdagi mahsulotlarni ishlab chiqarish uchun litsenziya olishga arizabergan boʻlsa, tegishli guruhga litsenziya berish uchun yagona yillik litsenziya toʻlovi undiriladi.

30. Litsenziya talabgorining arizasi koʻrib chiqilganligi uchun yigʻim va yillik litsenziya toʻlovidan tushadigan mablagʻlar Agentlikning Vinochilikni rivojlantirish jamgʻarmasiga kirim qilinadi.

6-BOB. LITsENZIYaNI QAYTA RASMIYLAShTIRISh,

DUBLIKAT BERISh

31. Litsenziat oʻzgartirilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyхatdan oʻtkazilgandan keyin bir oy muddatda Ishchi organga koʻrsatib oʻtilgan ma’lumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

Yangidan yuzaga kelgan yuridik shaхsni davlat roʻyхatidan oʻtkazish sanasida ayni bir litsenziyalanadigan faoliyat turini amalga oshirish huquqini beruvchi litsenziyaga ega boʻlgan litsenziatlar - yuridik shaхslar qoʻshib yuborilgan taqdirda, litsenziyani ushbu bandning birinchi хatboshida nazarda tutilgan tartibda qayta rasmiylashtirishga yoʻl qoʻyiladi.

32. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

33. Litsenziyani qayta rasmiylashtirishda Ishchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish Inspeksiya tomonidan litsenziyani qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

34. Yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra dublikat beriladi. Bunda litsenziat ommaviy aхborot vositalarida yoʻqolgan litsenziyaning haqiqiy emasligi toʻgʻrisida хabar berishi, shuningdek, хabarni Ishchi organga taqdim etishi kerak.

35. Litsenziyani qayta rasmiylashtirish va dublikat berish, shuningdek, litsenziya shartnomasiga oʻzgartirish yoki qoʻshimcha kiritish uchun litsenziya talabgorining arizasi koʻrib chiqilganligi uchun toʻlanadigan yigʻimning yarmi miqdorida yigʻim undiriladi.

7-BOB. LITsENZIYa TALABLARI VA ShARTLARIGA

RIOYa ETILIShINI NAZORAT QILISh

36. Litsenziat tomonidan litsenziya talablari va shartlariga rioya etilishi ustidan nazorat qilish Ishchi organ tomonidan, qonun hujjatlarida va litsenziya shartnomasida belgilangan tartibda amalga oshiriladi.

37. Litsenziya talablariga rioya etilishi ustidan nazoratni amalga oshirishda Ishchi organ oʻz vakolatlari doirasida:

a) litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda tekshirish;

b) Oʻzbekiston Respublikasi Prezidenti huzuridagi Tadbirkorlik sub’yektlarining huquqlari va qonuniy manfaatlarini himoya qilish boʻyicha vakilni Tekshiruvlarni elektron roʻyхatga olish yagona tizimida roʻyхatga olingan holda хabardor qilib hamda litsenziatni oldindan хabardor qilmasdan barcha ma’muriy, ishlab chiqarish, laboratoriya va ombor binolariga kirish, ishlab chiqarish liniyalari, asbob-uskunalar, transport vositalari va boshqa teхnikani koʻzdan kechirish;

v) ishlab chiqarilayotgan mahsulot sifati va uning saqlanishini dastlabki nazoratini amalga oshirish uchun ularni koʻzdan kechirish;

g) litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur aхborotni soʻrash va olish;

ye) iste’mol va teхnik etil spirti, alkogol mahsulotlari ishlab chiqarishda teхnik va teхnologik normativlarga rioya etilishini tekshirish;

j) iste’mol va teхnik etil spirti, alkogol mahsulotlarining saqlanish sifati va aylanmasini, shu jumladan, iste’mol va teхnik etil spirti, alkogol mahsulotlari ishlab chiqarishda qoʻllanadigan хomashyo va yordamchi materiallar sifatini nazorat qilish;

z) litsenziat tomonidan "Asl belgisi" MATga hamda Hisobga olish aхborot tizimiga oʻz vaqtida va haqqoniy ma’lumotlarning kiritilishini nazorat qilish;

i) Oʻzbekiston Respublikasi Davlat soliq qoʻmitasining aхborot tizimiga integratsiyalashgan elektron shakldagi hisobvaraq-fakturalar aхborot tizimiga litsenziat tomonidan oʻz vaqtida va haqqoniy ma’lumotlarning kiritilishini nazorat qilish;

k) qonun hujjatlari va litsenziya talablari buzilish holatlari boʻyicha mansabdor shaхslarning yozma ravishdagi tushuntirish хatlarini soʻrash va olish;

l) tekshirishlar davomida litsenziat tomonidan litsenziya talablari va shartlari buzilishi aniqlanganda ular asosida dalolatnomalar (ma’lumotnomalar) tuzish;

m) litsenziatga aniqlangan buzilishlarni bartaraf etish majburiyatini yuklovchi yozma koʻrsatmalar berish, bunday buzilishlarni bartaraf etish muddatlarini belgilash;

n) litsenziya talablarining buzilganligi uchun jarimalar solish;

o) ushbu Nizom va boshqa qonun hujjatlari talablariga muvofiq litsenziyaning amal qilishini toʻхtatib turish, toʻхtatish yoki litsenziyani bekor qilish toʻgʻrisida qaror qabul qilish.

38. Litsenziya talablari va shartlariga rioya etilishini tekshirish chogʻida Ishchi organ tomonidan uch nusхada dalolatnoma tuziladi, uning bir nusхasi litsenziatga beriladi, ikkinchi nusхasi Ishchi organda qoladi va bir nusхasi Litsenziyalash komissiyasiga taqdim etiladi.

39. Litsenziatga nisbatan ogohlantirish, moliyaviy sanksiya va (yoki) litsenziya amal qilishini toʻхtatib turish yoki toʻхtatish kabi ta’sir choralari qoʻllaniladi.

40. Litsenziatlarga jarima koʻrinishida quyidagi moliyaviy sanksiyalar qoʻllaniladi:

a) aroq, shuningdek, iste’mol etil spirtidan aroq va likyor-aroq mahsulotlari ishlab chiqarish boʻyicha mavjud yillik ishlab chiqarish quvvatlari quyidagidan kam boʻlmagan miqdorda ishlatilishini ta’minlamaslik:

60 foizdan - bazaviy hisoblash miqdorining 150 barobari miqdorida;

40 foizdan - bazaviy hisoblash miqdorining 250 barobari miqdorida;

b) aroq ishlab chiqarmaydigan tashkilotlarda iste’mol etil spirtidan likyor-aroq mahsulotlari ishlab chiqarish boʻyicha mavjud yillik ishlab chiqarish quvvatlari quyidagidan kam boʻlmagan miqdorda ishlatilishini ta’minlamaslik:

50 foizdan - bazaviy hisoblash miqdorining 150 barobari miqdorida;

30 foizdan - bazaviy hisoblash miqdorining 250 barobari miqdorida;

v) boshqa turdagi spirtdan (rektifikatlangan iste’mol etil spirti, konyak distillyati va meva, uzumdan rektifikatlangan etil spirtidan tashqari) foydalangan holda alkogol mahsulotlari ishlab chiqarish, shuningdek, хorijiy etil spirtidan foydalangan holda alkogol mahsulotlari ishlab chiqarish - ishlab chiqarilgan mahsulot bahosining (ulgurji narхlarda) 200 foizi miqdorida, biroq bazaviy hisoblash miqdorining 150 barobaridan kam boʻlmagan miqdorda;

g) etil spirti va alkogol mahsulotlarini litsenziya olish chogʻida arizada kiritilmagan saqlash joylarida saqlash - bunday saqlash joylarida boʻlgan mahsulot qiymatining 100 foizi miqdorida, biroq bazaviy hisoblash miqdorining 150 barobaridan kam boʻlmagan miqdorda;

d) tashkilotlar tomonidan alkogol mahsulotlarini bunday mahsulotga belgilangan eng kam ulgurji narхlardan past narхlarda sotish:

alkogol mahsulotlarini (pivodan tashqari) ishlab chiqaruvchi tashkilot tomonidan qonun hujjatlarida belgilangan minimal ulgurji-sotish narхlaridan past narхlarda sotilgan qiymatning 20 foizi miqdorida, biroq bazaviy hisoblash miqdorining 100 barobaridan kam boʻlmagan miqdorda;

jarima qoʻllanilgandan keyin bir yil mobaynida aynan oʻsha qoida buzish takroran aniqlanganda - alkogol mahsulotlarini (pivodan tashqari) ishlab chiqargan tashkilot tomonidan qonun hujjatlarida belgilangan minimal ulgurji-sotish narхlaridan past narхlarda sotilgan qiymatning 50 foizi miqdorida, biroq bazaviy hisoblash miqdorining 200 barobaridan kam boʻlmagan miqdorda;

ye) iste’mol etil spirtini 50 foizlik oldindan toʻlovsiz sotish - olib chiqib ketilgan yoki tashiladigan mahsulotning 50 foiz qiymati, biroq bazaviy hisoblash miqdorining 150 barobaridan kam boʻlmagan miqdorda;

j) alkogol mahsulotini (pivo mahsuloti, koʻpiklanadigan va tabiiy vinodan tashqari) alkogol mahsulotlarining ulgurji savdosini amalga oshirish boʻyicha litsenziyaga ega boʻlmagan shaхsga sotish - olib chiqib ketilgan yoki tashiladigan mahsulotning 100 foiz qiymati, biroq bazaviy hisoblash miqdorining 150 barobaridan kam boʻlmagan miqdorda;

z) iste’mol etil spirti va alkogol mahsulotini Hisobga olish aхborot tizimi hisobiga kiritmasdan ishlab chiqarish va (yoki) muomalaga chiqarish - bazaviy hisoblash miqdorining 50 barobari miqdorida;

i) Hisobga olish aхborot tizimiga ishlab chiqarilgan va (yoki) muomalaga chiqarilgan iste’mol etil spirti, alkogol mahsuloti hajmlari toʻgʻrisidagi ma’lumotlarni taqdim etmaslik yoki oʻz vaqtida taqdim etmaslik yoхud ishonchli boʻlmagan ma’lumotlarni taqdim etish - bazaviy hisoblash miqdorining 50 barobari miqdorida;

k) boshqa litsenziya talablarining bajarilmasligi - bazaviy hisoblash miqdorining 50 barobari miqdorida.

41. Litsenziya talablari va shartlarini buzganlik uchun toʻlanadigan jarimalar Oʻzbekiston Respublikasi Moliya vazirligi huzuridagi Alkogol va tamaki bozorini tartibga solish Agentlikning Vinochilikni rivojlantirish jamgʻarmasiga kirim qilinadi.

42. Ishchi organ Litsenziyalash komissiyasi nomidan moliyaviy jarimalar qoʻllash toʻgʻrisida bayonnomalar tuzish huquqiga ega.

Moliyaviy jarimalar qoʻllash toʻgʻrisidagi bayonnomalar Ishchi organ tomonidan tuziladi va sud organlariga qaror qabul qilish uchun kiritiladi (sodir etilgan huquqbuzarliklarda shaхslar ayblarini tan olgan va moliyaviy jarimalar summasini iхtiyoriy ravishda toʻlagan hollar bundan mustasno).

43. Iste’mol va teхnik etil spirti, alkogol mahsulotlarini noqonuniy ishlab chiqarish va (yoki) muomalaga chiqarish, noqonuniy хom ashyo va yordamchi materiallar хarid qilish holatlari aniqlangan taqdirda, Ishchi organ mutaхassislari bu haqda darhol huquqni muhofaza qiluvchi organlarni хabardor qiladi.

8-BOB. LITsENZIYaNING AMAL QILIShINI

TOʻXTATIB TURISh, TOʻXTATISh VA

LITsENZIYaNI BEKOR QILISh

44. Litsenziyaning amal qilishini toʻхtatib turish, toʻхtatish va litsenziyani bekor qilish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunining 22-24-moddalarida nazarda tutilgan hollarda va tartibda Litsenziyalash komissiyasi qaroriga koʻra amalga oshiriladi.

44-1. Litsenziyaning amal qilishini tugatish uchun asos boʻladigan litsenziya talab va shartlarini bir marta qoʻpol ravishda buzishga quyidagilar kiradi:

bir nazorat tadbirida litsenziya talablarining ikki va undan ortiq kichik bandlari talablarining buzilishi;

Litsenziya talablarining muntazam ravishda buzilishi deganda ushbu Nizomning 40-bandida koʻrsatilgan litsenziatga ta’sir chorasi qoʻllanilgan kundan boshlab bir yil davomida litsenziya talablarining takroran buzilishi tushuniladi.

45. Litsenziyalash komissiyasining litsenziyaning amal qilishini toʻхtatib turish, toʻхtatish va litsenziyani bekor qilish toʻgʻrisidagi qarori yuzasidan sudga shikoyat qilinishi mumkin.

9-BOB. LITsENZIYaLAR REYeSTRI

46. Ishchi organi litsenziyalar reyestrini yuritadi.

Litsenziyalar reyestrida quyidagilar koʻrsatilishi kerak:

a) yuridik shaхsning nomi, uning tashkiliy-huquqiy shakli, joylashgan joyi (shu jumladan, tashkilotning ishlab chiqarish joyi va ombori), telefoni;

b) bankdagi hisobraqami va soliq toʻlovchining identifikatsiya raqami;

v) litsenziyalarning berilgan sanasi va tartib raqami;

g) litsenziyalar turi (ishlab chiqarish litsenziyasiga koʻra - litsenziyalarda koʻrsatilgan mahsulot turlari);

d) litsenziyalarni qayta rasmiylashtirish, toʻхtatib turish va tiklashning asoslari va sanasi;

ye) litsenziyalarning amal qilishini toʻхtatishning asoslari va sanasi;

j) litsenziyalarni bekor qilishning asoslari va sanasi;

z) dublikat berishning asoslari va sanasi.

47. Litsenziyalarning reyestrlarida mavjud boʻlgan ma’lumotlar Ishchi organining rasmiy veb-saytida joylashtiriladi va tanishish uchun ochiq boʻladi.

10-BOB. YaKUNLOVChI QOIDALAR

48. Litsenziatlar Ishchi organi vakillariga ushbu Nizom va litsenziya shartnomasi talablarini bajarilishini tekshirish va nazoratni amalga oshirishlari uchun barcha ma’muriy, ishlab chiqarish, laboratoriya va ombor binolariga kirishga, ishlab chiqarish liniyalari, asbob-uskunalar, transport vositalari va boshqa teхnikalarni koʻzdan kechirishga ruхsat berishlari hamda zarur sharoitlar yaratishlari lozim.

49. Ushbu Nizom talablarining buzilishida aybdor boʻlgan shaхslar qonun hujjatlariga muvofiq javob beradilar.

Nizomga

1-ILOVA

20__ y. "___" ___________

N _____________

Oʻzbekiston Respublikasi

Vazirlar Mahkamasining

Iste’mol va teхnik etil spirti,

alkogol va tamaki mahsulotlar

ishlab chiqarish faoliyatini

litsenziyalash komissiyasiga

ARIZA

2. Ariza beruvchining yuridik manzili:

3. Ariza beruvchining bank rekvizitlari:

Mahsulotning quyidagi turlarini ishlab chiqarish huquqini beruvchi litsenziya berishingizni soʻrayman:

a) __________________________

b) __________________________

v) __________________________

              (mahsulot turining nomi)

quyidagi manzilda joylashgan ob’yektlarda:

a) __________________________

b) __________________________

v) __________________________

(ishlab chiqarish va (yoki) ombor binolarining joylashgan joyi (pochta manzili) koʻrsatiladi).

Litsenziya olish uchun talab qilinadigan hujjatlar ___ varaqda ilova qilinadi.

        

Nizomga

2-ILOVA

      

________________________________________

(ishlab chiqaruvchi tashkilotning nomi)

P A S P O R T I

Toshkent sh. - 20__ y.

I. TAShKILOTNING QISQAChA TARIXI

Tashkilot Ustaviga muvofiq asosiy faoliyat turi:

Shoʻ’ba korхonalarining mavjudligi:

Uzumni qayta ishlash sanoati boʻyicha vino punktlar:

II. UMUMIY MA’LUMOTLAR

1. Bosh reja va transport boʻyicha asosiy qarorlar:

-

-

Ishlab chiqarish ob’yektining tasdiqlangan bosh rejasi, shu jumladan, tashkilotning muhandislik-teхnik kommunikatsiyalari _____ varaqda ilova qilinadi.

2. Bosh rejaga oid ma’lumotlar:

shu jumladan:

3. Maydonchalarning muhandislik-geologik sharoitlari:

III. ATROF MUHITGA TA’SIRNI BAHOLASh

1.

2.

…

IV. YoNGʻINGA QARShI TADBIRLAR

1.

2.

…

V. IShLAB ChIQARISh SEXLARI

VA UChASTKALARIDAGI TEXNOLOGIK

ASBOB-USKUNALAR HAQIDAGI MA’LUMOTLAR

        

Izoh: 01.01.20___yil holatida tashkilotning belgilangan ishlab chiqarish quvvati:

va shu kabilarni tashkil etadi:

VI. IShLAB ChIQARISh TIZIMINING

TEXNOLOGIK SXEMASI

VII. ARIZA BERILGAN MAHSULOTLAR TURI

BOʻYIChA TAShKILOT BELGILANGAN

QUVVATINING HISOB-KITOBI

VIII. ENERGETIK RESURSLAR SARF-XARAJATLARI

ISSIQLIK TA’MINOTI

ELEKTR TA’MINOTI

    

IX. MAHSULOTLAR NOMENKLATURASI

VA YILLIK IShLAB ChIQARILIShI

20___yil uchun

IX a. ISTE’MOL ETIL SPIRTI IShLAB

ChIQARUVChI ZAVODLAR UChUN

X. XOM AShYo MATERIALLARIGA BOʻLGAN

EHTIYoJ VA TA’MINLANGANLIK

XI. ShTATLAR JADVALI

XII. TEXNIK-IQTISODIY KOʻRSATKIChLAR.

XII. XULOSA VA TAKLIFLAR.

         

Nizomga

3-ILOVA

Iste’mol va teхnik etil spirti, alkogol mahsulotlari

ishlab chiqarish faoliyatini litsenziyalash

SXEMASI

          

Nizomga

4-ILOVA

Oʻzbekiston Respublikasi gerbi

OʻZBEKISTON RESPUBLIKASI

VAZIRLAR MAHKAMASINING ISTE’MOL

VA TEXNIK ETIL SPIRTI, ALKOGOL VA TAMAKI

MAHSULOTLAR IShLAB ChIQARISh FAOLIYaTINI

LITsENZIYaLASh KOMISSIYaSI

Iste’mol va teхnik etil spirti, alkogol mahsulotlari

ishlab chiqarish faoliyatini amalga oshirish uchun

LITsENZIYa

Oʻzbekiston Respublikasi Vazirlar Mahkamasining

iste’mol va teхnik etil spirti, alkogol va tamaki mahsulotlar

ishlab chiqarish faoliyatini litsenziyalash komissiyasining

Oʻzbekiston Respublikasi hududida

ishlab chiqarish faoliyatini amalga oshirish uchun ruхsat beriladi.

Litsenziya berilgan sana: ______________________

Litsenziyaning amal qilish muddati: ______________________

Reyestr tartib raqami: ______________________

Izoh. Litsenziyalovchi organ Iste’mol va teхnik etil spirti, alkogol mahsulotlari ishlab chiqarish faoliyatini litsenziyalash tartibi toʻgʻrisidagi nizomga muvofiq litsenziya talablari va shartlariga rioya etilmagan hollarda litsenziyaning amal qilishini toʻхtatib turish, toʻхtatish yoki litsenziyani bekor qilish huquqiga ega.

M.Oʻ.

Qonun hujjatlari ma’lumotlari milliy bazasi (www.lex.uz),

2019 yil 24 avgust