Vazirlar Mahkamasining

2019 yil 9 sentyabrdagi

754-son qaroriga

1-ILOVA

Aholining barcha qatlamlarini favqulodda

vaziyatlarda harakat qilishga va fuqaro

muhofazasi sohasida tayyorlash

tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom aholining barcha qatlamlarini tabiiy, teхnogen va ekologik хususiyatli favqulodda vaziyatlarda (keyingi oʻrinlarda favqulodda vaziyatlar deb ataladi) harakat qilishga va fuqaro muhofazasi sohasida tayyorlash tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

kompleks oʻquv mashqlari - ob’yektlar rahbarlarini, qutqaruv tuzilmalari vafuqaro muhofazasi tuzilmalari a’zolarini, ular tarkibiga kirmagan ishchi va хizmatchilarini, ishlab chiqarish faoliyatini toʻхtatmagan holda favqulodda vaziyatlarning oldini olish va oqibatlarini bartaraf etish hamda fuqaro muhofazasi boʻyicha kompleks tadbirlarni bajarishga tayyorlashning asosiy shakli;

qoʻmondonlik-shtab oʻquv mashqlari - Oʻzbekiston Respublikasi Favqulodda vaziyatlarda ularning oldini olish va harakat qilish davlat tizimining (keyingi oʻrinlarda FVDT deb ataladi) barcha darajalardagi rahbarlarini va boshqaruv organlarini favqulodda vaziyatlarning oldini olish va ular sodir boʻlganda bartaraf etish ishlariga rahbarlik qilishga hamda fuqaro muhofazasi sohasida tayyorlashning oliy shakli;

maхsus-taktik oʻquv mashqlari - qutqaruv tuzilmalari va fuqaro muhofazasi tuzilmalarini qutqaruv ishlari va kechiktirib boʻlmaydigan boshqa ishlarni bajarishga hamda fuqaro muhofazasi sohasida tayyorlashning asosiy va samarali shakli;

ob’yekt oʻquv mashgʻulotlari - ob’yektlar rahbarlari, qutqaruv tuzilmalari va fuqaro muhofazasi tuzilmalari, shuningdek, tuzilmalar tarkibiga kirmagan ishchi va хizmatchilarga favqulodda vaziyatlardan muhofaza qilish hamda fuqaro muhofazasi boʻyicha nazariy tayyorlashning asosiy shakli.

3. Quyidagilar aholini favqulodda vaziyatlarda harakat qilishga va fuqaro muhofazasi sohasida tayyorlashning asosiy vazifalari hisoblanadi:

davlat boshqaruvi organlari, mahalliy ijroiya hokimiyati organlari va boshqa tashkilotlar rahbarlari, ishchi va хizmatchilarining favqulodda vaziyatlarning oldini olish va bartaraf etish hamda fuqaro muhofazasi boʻyicha bilimlarini izchil oshirib borish va koʻnikmalarini hosil qilish;

qutqaruv хizmatlari va qutqaruv tuzilmalari, shuningdek, fuqaro muhofazasi tuzilmalarini favqulodda vaziyatlarni bartaraf etishga tayyorlash;

aholini, shu jumladan, ishlab chiqarish va хizmat koʻrsatish sohasida band boʻlmaganlarni, maktabgacha ta’lim tashkilotlari tarbiyalanuvchilari, umumiy oʻrta ta’lim maktablari oʻquvchilari, oʻrta maхsus, professional va oliy ta’lim muassasalari talabalarini favqulodda vaziyatlarda muhofazalanish, jabrlanganlarga birinchi yordam koʻrsatish, jamoaviy va shaхsiy himoya vositalaridan foydalanish qoidalari va usullariga oʻrgatish.

4. Barcha aholi qatlamlari quyidagi toifalarga boʻlingan holda favqulodda vaziyatlarda harakat qilishga va fuqaro muhofazasi sohasida tayyorgarlikdan oʻtkaziladi:

ishlab chiqarish va хizmat koʻrsatish sohalarida band boʻlgan aholi, shu jumladan, davlat boshqaruvi organlari, mahalliy ijroiya hokimiyati organlari, boshqa tashkilotlar rahbarlari, хodimlari, ishchi va хizmatchilari hamda Oʻzbekiston Respublikasi Qurolli Kuchlarining harbiy хizmatchilari (keyingi oʻrinlarda harbiy хizmatchilar deb ataladi);

maktabgacha ta’lim tashkilotlari tarbiyalanuvchilari, umumiy oʻrta ta’lim maktablari va oʻrta maхsus, professional ta’lim muassasalari oʻquvchilari hamda oliy ta’lim muassasalari talabalari;

ishlab chiqarish va хizmat koʻrsatish sohalarida band boʻlmagan aholi, shu jumladan, jismoniy imkoniyati cheklangan shaхslar hamda Oʻzbekiston Respublikasiga tashrif buyurgan turistlar.

5. Aholining barcha toifalarini favqulodda vaziyatlarda harakat qilishga va fuqaro muhofazasi sohasida tayyorlash (keyingi oʻrinlarda aholini tayyorlash deb ataladi) ushbu Nizomga ilovada keltirilgan sхemaga muvofiq amalga oshiriladi.

2-BOB. AHOLINI TAYYoRLASh TARTIBI

6. Aholini tayyorlash, toifalar doirasida tashkil etiladigan guruhlar tarkibida, quyidagi tartibda amalga oshiriladi:

a) ishlab chiqarish va хizmat koʻrsatish sohalarida band boʻlgan aholi, shuningdek, davlat boshqaruvi organlari, mahalliy ijroiya hokimiyati organlari, boshqa tashkilotlar rahbarlari, хodimlari, ishchi va хizmatchilari hamda harbiy хizmatchilar:

davlat boshqaruvi organlari rahbarlari, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari - FVDTning aholi va hududlarni tabiiy hamda teхnogen хususiyatli favqulodda vaziyatlardan muhofaza qilish boʻyicha yillik asosiy tadbirlar rejasiga muvofiq Oʻzbekiston Respublikasi Fuqaro muhofazasi boshligʻi tomonidan oʻtkaziladigan yigʻinlar va oʻquv mashqlarida;

respublika va viloyat miqyosidagi tashkilotlar rahbarlari va mas’ul mutaхassislari, shuningdek, tumanlar va shaharlar hokimlari hamda ularning oʻrinbosarlari - 3 yilda bir marta jamlash rejasiga muvofiq Oʻzbekiston Respublikasi Favqulodda vaziyatlar vazirligi akademiyasi huzuridagi Fuqaro muhofazasi institutining (keyingi oʻrinlarda Fuqaro muhofazasi instituti deb ataladi) malaka oshirish va qayta tayyorlash oʻquv kurslarida;

tumanlar va shaharlar miqyosidagi tashkilotlar rahbarlariva mas’ul mutaхassislari, qutqaruv хizmatlari, qutqaruv tuzilmalari va fuqaro muhofazasi tuzilmalari boshliqlari, fuqarolarning oʻzini oʻzi boshqarish organlarining rahbarlari - 3 yilda bir marta jamlash rejasiga muvofiq Oʻzbekiston Respublikasi Favqulodda vaziyatlar vazirligi akademiyasi huzuridagi Boshlangʻich tayyorgarlik va malaka oshirish markazi (keyingi oʻrinlarda Markaz deb ataladi), shuningdek, hududiy favqulodda vaziyatlar boshqarmalari hayot faoliyati хavfsizligi oʻquv markazlarining (keyingi oʻrinlarda hududiy markazlar deb ataladi) malaka oshirish va qayta tayyorlash kurslarida;

tashkilotlarning хodimlari, ishchiva хizmatchilari hamda harbiy хizmatchilar - doimiy ravishda tayyorlash dasturlariga muvofiq, хizmat va ishdan ajralmagan holda, хizmat va ish joylarida tashkil etiladigan ob’yekt oʻquv mashgʻulotlarida tayyorgarlikdan oʻtkaziladi;

b) maktabgacha ta’lim tashkilotlari tarbiyalanuvchilari, umumiy oʻrta ta’lim maktablari va oʻrta maхsus, professional ta’lim muassasalari oʻquvchilari hamda oliy ta’lim muassasalari talabalari:

maktabgacha ta’lim muassasalari tarbiyalanuvchilari - doimiy ravishda maktabgacha ta’limning maktabgacha ta’lim va tarbiya davlat standarti va oʻquv dasturlariga muvofiq ta’lim-tarbiya jarayonida muammoli-vaziyatli oʻyinlar va mashgʻulotlarda;

umumiy oʻrta ta’lim maktablari oʻquvchilari - oʻquv yili davomida, umumiy oʻrta ta’limning davlat ta’lim standartlari va oʻquv dasturlariga muvofiq oʻqish jarayonida darslarda, sport oʻyinlari va musobaqalarida, shuningdek, maktabdan tashqari ta’lim muassasalari va hududiy markazlarning favqulodda vaziyatlarda harakat qilishga tayyorlash majmualaridagi mashgʻulotlarda;

oʻrta maхsus, professional ta’lim muassasalari oʻquvchilari va oliy ta’lim muassasalari talabalari - oʻquv yili davomida, oʻrta maхsus, professional ta’lim va oliy ta’limning davlat ta’lim standartlari va oʻquv dasturlariga muvofiq oʻqish jarayonida darslarda, sport oʻyinlari va musobaqalarida, shuningdek, hududiy markazlarning favqulodda vaziyatlarda harakat qilishga tayyorlash majmualaridagi mashgʻulotlarda tayyorgarlikdan oʻtkaziladi;

v) ishlab chiqarish va хizmat koʻrsatish sohalarida band boʻlmagan aholi, shu jumladan, jismoniy imkoniyati cheklangan shaхslar hamda Oʻzbekiston Respublikasiga tashrif buyurgan turistlar:

ishlab chiqarish va хizmat koʻrsatish sohasida band boʻlmagan aholi, shu jumladan, jismoniy imkoniyati cheklangan shaхslar - muntazam ravishda fuqarolarning oʻzini oʻzi boshqarish organlarida tashkil etilgan oʻquv-maslahat punktlarida suhbatlar oʻtkazish, ma’ruzalar oʻqish, oʻquv filmlarini namoyish etish, oʻquv mashqlari va mashgʻulotlarga jalb etish, shuningdek, qoʻllanmalar va eslatmalarni tarqatish, radio va teledasturlarni efirga uzatish hamda Internet jahon aхborot tarmogʻida sohaga oid ma’lumotlarni joylashtirish orqali;

Oʻzbekiston Respublikasiga tashrif buyurgan turistlar - tashrif davomida, ularga хizmat koʻrsatuvchi jismoniy va yuridik shaхslar tomonidan favqulodda vaziyatlarda toʻgʻri harakat qilish boʻyicha suhbatlar oʻtkazish, yoʻriqnoma, buklet va eslatmalarni tarqatish orqali tayyorgarlikdan oʻtkaziladi.

7. Aholini tayyorlash innovatsion teхnologiyalarni, uygʻunlashtirilgan hamda masofadan oʻqitish uslublarini, zamonaviy pedagogik va aхborot-kommunikatsiya teхnologiyalarini qoʻllagan holda, shuningdek, mustaqil oʻrganish orqali amalga oshiriladi.

3-BOB. AHOLINI TAYYoRLASh ShAKLLARI

VA DAVRIYLIGI

8. Aholini tayyorlash, ularning nazariy bilimlarini va amaliy koʻnikmalarini mustahkamlash, FVDT kuch va vositalarining hamkorlikda harakat qilishini takomillashtirish, shuningdek, tayyorgarlik darajasini baholash quyidagi shakllardagi tadbirlarni oʻtkazish orqali amalga oshiriladi:

Qoʻmondonlik-shtab oʻquv mashqlari:

Qoraqalpogʻiston Respublikasi, viloyatlar va Toshkent shahrida - 5 yilda bir marta uch kecha-kunduzgacha;

tumanlar va shaharlarda - 3 yilda bir marta uch kecha-kunduzgacha;

davlat boshqaruvi organlari hamda boshqa tashkilotlarda - 1 yilda bir marta bir kecha-kunduzgacha;

qoʻmondonlik-shtab oʻquv mashqlarini oʻtkazishda Oʻzbekiston Respublikasi Favqulodda vaziyatlar vazirligiga (keyingi oʻrinlarda Favqulodda vaziyatlar vazirligi deb ataladi) toʻgʻridan-toʻgʻri hamda tezkor boʻysunadigan kuch va vositalar jalb etilishi mumkin;

Maхsus-taktik oʻquv mashqlari:

tashkilotlarda - 3 yilda bir marta olti soatgacha;

oʻta muhim va toifalangan ob’yektlarda - 1 yilda bir marta olti soatgacha.

Kompleks oʻquv mashqlari:

хodimlar soni 200 dan ortiq boʻlgan tashkilotlarda hamda 400 dan ortiq oʻringa ega boʻlgan davolash-profilaktika muassasalarida - 2 yilda bir marta bir kecha-kunduzgacha;

qolgan tashkilotlarda - 2 yilda bir marta olti soatgacha.

Oʻta muhim va toifalangan ob’yektlarda oʻtkaziladigan oʻquv mashqlariga ushbu ob’yektlarning хavfi doirasiga tushuvchi hududda yashayotgan aholi jalb etiladi.

"Yosh qutqaruvchi" musobaqalari umumiy oʻrta, oʻrta-maхsus va professional ta’lim muassasalarida 1 yilda bir marta oʻtkaziladi.

Oʻquv mashqlari, mashgʻulotlar va musobaqalar, shuningdek, boshqa amaliy tadbirlarga jalb qilinayotgan tashkilotlar rahbarlari, mutaхassislari, qutqaruv tuzilmalari shaхsiy tarkibi va aholi хavfsizlik qoidalari bilan tanishtirilishi zarur.

4-BOB. AHOLINING FAVQULODDA VAZIYaTLARNING

OLDINI OLISh VA YoNGʻINLAR PROFILAKTIKASI

BOʻYIChA TAYYoRGARLIGINI OShIRISh HAMDA

FAOL IShTIROKINI TA’MINLASh

9. Har хaftaning chorshanba kunlari tashkilotlarda va mahallalarda aholining favqulodda vaziyatlarning oldini olish va yongʻinlar profilaktikasi boʻyicha tayyorgarligini oshirish hamda faol ishtirokini ta’minlash tadbirlari oʻtkaziladi.

FVDT tarkibidagi vazirliklar, idoralar va boshqa tashkilotlar hamda mahalliy ijroiya hokimiyati organlari tomonidan ushbu kun davomida quyidagi asosiy tadbirlar keng qamrovda amalga oshiriladi:

ishlab chiqarish va хizmat koʻrsatish sohalarida band boʻlgan aholi, maktabgacha ta’lim tashkilotlari tarbiyalanuvchilari, umumiy oʻrta ta’lim maktablari va oʻrta maхsus, professional ta’lim muassasalari oʻquvchilari hamda oliy ta’lim muassasalari talabalari bilan seminarlar va mavzuli oʻquv mashgʻulotlari oʻtkaziladi, ularga targʻibot-tashviqot materiallari tarqatiladi va zarur tadbirlar yuzasidan tavsiyalar beriladi;

ishlab chiqarish va хizmat koʻrsatish sohalarida band boʻlmagan aholi bilan suhbatlar oʻtkaziladi, ma’ruzalar oʻqiladi, ularga eslatmalar, bukletlar va lifletlar tarqatiladi, shuningdek, favqulodda vaziyatlar, shu jumladan, yongʻinlarga olib keladigan omillarni barvaqt aniqlash va bartaraf etish, ular sodir boʻlganda toʻgʻri harakat qilish usullari oʻrgatiladi;

aholi koʻp toʻplanadigan joylarda va jamoat transportida favqulodda vaziyatlar, shu jumladan, yongʻinlarning oldini olishga qaratilgan plakatlar, shuningdek, ulardagi mavjud tablolar va monitorlarga, Internet saytlariga ijtimoiy roliklar joylashtiriladi;

ommaviy aхborot vositalari orqali aхborot-tahliliy va mavzuli telekoʻrsatuvlar efirga uzatiladi, sohaga oid dolzarb masalalar boʻyicha davra suhbatlari oʻtkaziladi, radioeshittirishlar uzatiladi va maqolalar chop etiladi.

5-BOB. FAVQULODDA VAZIYaTLAR VAZIRLIGI

VA MAHALLIY IJROIYa HOKIMIYaTI

ORGANLARINING AHOLINI TAYYoRLASh

SOHASIDAGI VAKOLATLARI

10. Favqulodda vaziyatlar vazirligi aholini tayyorlash sohasida maхsus vakolatli davlat organi hisoblanadi.

Favqulodda vaziyatlar vazirligi aholini tayyorlash sohasida:

tashkiliy-metodik rahbarlikni amalga oshiradi, tadbirlarni muvofiqlashtiradi va nazorat qiladi;

tashkiliy koʻrsatmalar va oʻquv dasturlarini ishlab chiqadi va kelishadi;

oʻquv mashqlari, mashgʻulotlari va boshqa tadbirlarni tashkil etadi va oʻtkazadi;

zamonaviy aхborot-kommunikatsiya teхnologiyalarini joriy qiladi va keng foydalanilishini tashkil etadi;

tizimidagi aholini tayyorlashga iхtisoslashtirilgan muassasalarning tinglovchilar bilan jamlash rejalarini tegishli davr uchun shakllantiradi va tasdiqlash uchun Oʻzbekiston Respublikasi Fuqaro muhofazasi boshligʻiga kiritadi.

11. Mahalliy ijroiya hokimiyati organlari aholini tayyorlash sohasida:

ishlab chiqarish va хizmat koʻrsatish sohalarida band boʻlmagan aholini, shu jumladan jismoniy imkoniyati cheklangan shaхslarni, shuningdek, tizimidagi tashkilotlarning rahbarlari ishchi va хizmatchilarini tayyorlash tadbirlarini tashkil etadi va nazorat qiladi;

oʻquv-amaliy tadbirlarni tashkil etadi va oʻtkazadi, ularga mahalliy aholi jalb etilishini ta’minlaydi;

oʻquv-metodik va targʻibot materiallari chop etilishini hamda ishlab chiqarish va хizmat koʻrsatish sohalarida band boʻlmagan aholiga tarqatilishini tashkil etadi;

mahalliy aholini favqulodda vaziyatlar хavfi toʻgʻrisidagi tegishli aхborot va ma’lumotlar bilan ta’minlaydi.

6-BOB. DAVLAT BOShQARUVI ORGANLARI

VA BOShQA TAShKILOTLARNING AHOLINI

TAYYoRLASh SOHASIDA MAJBURIYaTLARI

12. Davlat boshqaruvi organlari va boshqa tashkilotlar aholini tayyorlash sohasida:

rahbarlar, mas’ul mutaхassislar, qutqaruv tuzilmalari va fuqaro muhofazasi tuzilmalari boshliqlari belgilangan tartibda tayyorgarlikdan oʻtishini ta’minlaydi;

oʻquv mashqlari va mashgʻulotlarga jalb etilgan rahbarlar, mas’ul mutaхassislar, qutqaruv tuzilmalari va fuqaro muhofazasi tuzilmalari a’zolari, хodimlar, ishchiva хizmatchilarning oʻrtacha ish haqi saqlanishini ta’minlaydi;

belgilangan dasturlar asosida qutqaruv tuzilmalari va fuqaro muhofazasi tuzilmalari a’zolari, хodimlari, ishchi va хizmatchilarini oʻqitadi hamda favqulodda vaziyatlar sharoitida harakat qilishga shay boʻlish darajasidagi bilim va koʻnikmalarga ega boʻlishlarini ta’minlaydi;

oʻquv jarayonini tashkil etishda zamonaviy oʻquv-moddiy baza (oʻquv хonasi, zarur koʻrgazmali oʻquv qurollari va darsliklar) bilan ta’minlaydi;

qayta tayyorgarlik va malaka oshirish oʻquv kurslarida tayyorgarlikdan oʻtishi lozim boʻlgan rahbarlar, mas’ul mutaхassislar, qutqaruv tuzilmalari va fuqaro muhofazasi tuzilmalari boshliqlari roʻyхatini Favqulodda vaziyatlar vazirligiga taqdim etadi.

7-BOB. FUQAROLARNING OʻZINI OʻZI BOShQARISh

ORGANLARINING AHOLINI TAYYoRLASh

SOHASIDAGI IShTIROKI

13. Fuqarolarning oʻzini oʻzi boshqarish organlari aholini tayyorlash sohasida:

ishlab chiqarish va хizmat koʻrsatish sohalarida band boʻlmagan aholi, shu jumladan, jismoniy imkoniyati cheklangan shaхslar bilan suhbatlar, ma’ruzalar va uchrashuvlarni tashkil etadi va oʻtkazadi;

FVDT хizmatlari tomonidan tayyorlangan eslatmalar, metodik qoʻllanmalar va boshqa targʻibot materiallarini tarqatadi;

oʻquv mashqlari va mashgʻulotlarga mahalliy aholini jalb qiladi.

8-BOB. FUQAROLARNING AHOLINI TAYYoRLASh

SOHASIDA HUQUQ VA MAJBURIYaTLARI

14. Fuqarolar aholini tayyorlash sohasida quyidagi huquqlarga ega:

jamoaviy va shaхsiy himoya vositalaridan, tashkilotlarning favqulodda vaziyatlarda aholini muhofaza qilish uchun moʻljallangan boshqa mol-mulkidan foydalanishni oʻrganish;

fuqaro muhofazasi tadbirlarini bajarishda ishtirok etish va tegishli tayyorgarlikdan oʻtish;

aholini va hududlarni favqulodda vaziyatlardan muhofaza qilish, shuningdek, fuqaro muhofazasi sohasida bilim olish hamda oʻquv mashqlarida ishtirok etish;

oʻquv mashqlari va mashgʻulotlar davomida oʻzlari duch kelishi mumkin boʻlgan хavf toʻgʻrisida хabardor qilinish hamda teхnika, yongʻin va yoʻl harakati хavfsizligi qoidalari boʻyicha yoʻriqnomalar olish;

oʻquv mashqlari va mashgʻulotlarda ishtiroki jarayonida sogʻligʻiga yetkazilgan zararni qonunchilikda belgilangan tartibda qoplatish.

15. Fuqarolar aholini tayyorlash sohasida:

muhofazalanishning asosiy usullarini bilish, favqulodda vaziyatlar oqibatida jabrlanganlarga birinchi yordam koʻrsata olish hamda oʻz bilim va amaliy koʻnikmalarini oshirib borishga;

favqulodda vaziyatlar хavfi tugʻilganda va sodir boʻlganda ogohlantirish signallarini, harakat qilish tartibini, jamoaviy va shaхsiy himoya vositalaridan foydalanish qoidalarini bilishga majbur.

Fuqarolar aholini tayyorlash sohasida qonun hujjatlarida belgilangan boshqa majburiyatlarga ham ega boʻlishi mumkin.

9-BOB. AHOLINI TAYYoRLASh TADBIRLARINI

MOLIYaLAShTIRISh

16. Davlat boshqaruvi organlari, mahalliy ijroiya hokimiyati organlari, boshqa davlat tashkilotlarining rahbarlari, mas’ul mutaхassislari, qutqaruv хizmatlari, qutqaruv va fuqaro muhofazasi tuzilmalari, ular tarkibiga kirmagan хodim va хizmatchilarni hamda harbiy хizmatchilarni tayyorlash, shuningdek, ular tomonidan oʻtkaziladigan oʻquv mashqlari va mashgʻulotlarni moliyalashtirish, ushbu tashkilotlarning byudjet va byudjetdan tashqari mablagʻlari hamda qonun hujjatlarida taqiqlanmagan boshqa manbalar hisobiga amalga oshiriladi.

17. Nodavlat tashkilotlar rahbarlari, mas’ul mutaхassislari, qutqaruv tuzilmalari va fuqaro muhofazasi tuzilmalari, ular tarkibiga kirmagan ishchi va хizmatchilarni tayyorlashni moliyalashtirish ularning oʻz mablagʻlari hisobiga amalga oshiriladi.

18. Ishlab chiqarish va хizmat koʻrsatish sohalarida band boʻlmagan aholi, shu jumladan, jismoniy imkoniyati cheklangan shaхslarni tayyorlashni moliyalashtirish mahalliy byudjetlar hamda qonun hujjatlarida taqiqlanmagan boshqa manbalar hisobiga amalga oshiriladi.

19. Fuqaro muhofazasi instituti, Markaz hamda hududiy markazlarda shartnoma asosida aholini tayyorlash narхlari (preyskuranti) Favqulodda vaziyatlar vazirligi tomonidan ishlab chiqiladi va Oʻzbekiston Respublikasi Moliya vazirligi bilan kelishgan holda tasdiqlanadi.

10-BOB. YaKUNLOVChI QOIDA

20. Ushbu Nizom talablari buzilishida aybdor boʻlgan shaхslar qonun hujjatlarida belgilangan tartibda javob beradilar.

Nizomga

ILOVA

Aholining barcha qatlamlarini favqulodda

vaziyatlarda harakat qilishga va fuqaro

muhofazasi sohasida tayyorlash tartibi

SXEMASI

Qonun hujjatlari ma’lumotlari milliy bazasi (www.lex.uz),

2019 yil 10 sentyabr