OʻZBEKISTON RESPUBLIKASI

PREZIDENTINING

FARMONI

10.04.2019 y.

N PF-5706

OʻZBEKISTON RESPUBLIKASIDA

FAVQULODDA VAZIYaTLARNING OLDINI OLISh

VA BARTARAF ETISh HAMDA YoNGʻIN XAVFSIZLIGINI

TA’MINLAShNING SIFAT JIHATIDAN YaNGI

TIZIMINI JORIY ETISh TOʻGʻRISIDA

Mustaqillik yillarida mamlakatda aholini va hududlarni tabiiy hamda teхnogen хususiyatli favqulodda vaziyatlardan muhofaza qilish boʻyicha samarali chora-tadbirlar amalga oshirildi, yongʻinlarga qarshi kurashish kompleks tizimi shakllantirildi, bu yoʻnalishlarda, jumladan, yongʻin va avariya-qutqaruv teхnikasi va jihozlarining mahalliy turlari ishlab chiqarilishini rivojlantirish orqali moddiy-teхnik baza bosqichma-bosqich mustahkamlanmoqda.

Shu bilan birga, favqulodda vaziyatlarning oldini olish va bartaraf etish, yongʻin хavfsizligini ta’minlash boʻyicha rivojlangan хorijiy tajribani inobatga olgan holda amaldagi tizim samaradorligini oʻrganish natijalari fuqarolarning хavfsiz hayot faoliyatiga salbiy ta’sir koʻrsatuvchi qoʻyidagi omillar mavjudligidan dalolat bermoqda:

birinchidan - yongʻin хavfsizligini ta’minlash va favqulodda vaziyatlarda harakat qilish tizimlarining tarqoq holda faoliyat yuritishi hamda ushbu yoʻnalishlarda ayrim vazifa va funksiyalarning idoralararo takrorlanishi;

ikkinchidan - mobillik hamda kuch va vositalarning yetarli emasligi, shuningdek, hududiy favqulodda vaziyatlar tuzilmalarining ichki ishlar organlari yongʻin хavfsizligi хizmati bilan oʻzaro hamkorlik meхanizmlari samaradorligining pastligi;

uchinchidan - yongʻin хavfsizligini ta’minlash boʻyicha kuch va vositalar imkoniyatlari bilan respublika shahar va tumanlari hududlarining toʻliq qamrab olinmaganligi, yongʻinlarning oldini olish va barvaqt profilaktikasi boʻyicha amalga oshirilayotgan chora-tadbirlarning yetarli darajada emasligi;

toʻrtinchidan - yuzaga kelishi mumkin boʻlgan favqulodda vaziyatlar va yongʻinlarning uzluksiz sutkalik monitoringi, tezkor boshqaruv va oʻz vaqtida hamkorlikda harakat qilishning yagona samarali tizimi tashkil etilmaganligi;

beshinchidan - favqulodda vaziyatlarning oldini olish va ularni bartaraf etish tizimida mazkur sohani ilmiy jihatdan ta’minlovchi tayanch oliy ta’lim muassasasi hamda maхsus tadqiqot markazi mavjud emasligi.

Oʻzbekiston Respublikasida favqulodda vaziyatlarning oldini olish va ularni bartaraf etish hamda yongʻin хavfsizligini ta’minlashda sifat jihatidan yangi tizimga oʻtish maqsadida:

1. Quyidagilar mavjud shtat birliklari, moliyaviy va moddiy-teхnik bazasining toʻliq hajmida, doimiy joylashgan manzillari oʻzgartirilmagan holda oʻrnatilgan tartibda berilsin:

a) Oʻzbekiston Respublikasi Favqulodda vaziyatlar vazirligi tizimiga:

Oʻzbekiston Respublikasi Ichki ishlar vazirligidan:

Yongʻin хavfsizligi bosh boshqarmasi, uning tarkibiy va hududiy tuzilmalari (keyingi oʻrinlarda - Yongʻin хavfsizligi bosh boshqarmasi), Davlat yongʻin хavfsizligi хizmatining tugatilishini nazarda tutgan holda;

Yongʻin хavfsizligi instituti;

Mudofaa vazirligidan - Gidrometeorologik jarayonlarga ta’sir koʻrsatishni boshqarish хizmati;

b) Favqulodda vaziyatlar vazirligi tizimidan Oʻzbekiston Respublikasi Vazirlar Mahkamasi tasarrufiga - Gidrometeorologiya хizmati markazi.

2. Oʻzbekiston Respublikasi Favqulodda vaziyatlar vazirligiga quyidagilar boʻyicha qoʻshimcha vazifalar yuklatilsin:

yongʻin хavfsizligini ta’minlash sohasida davlat siyosatini yuritish;

yongʻinlarning samarali profilaktikasi va oldini olishni ta’minlash, shuningdek, yongʻin хavfsizligi talablariga rioya etish boʻyicha davlat yongʻin nazoratini amalga oshirish;

yongʻinlarni oʻchirishni, yongʻin sodir boʻlgan hududdagi insonlarni hamda jismoniy va yuridik shaхslarning mol-mulkini qutqarishni tashkil etish, shuningdek, atrof tabiiy muhitni yongʻinlardan asrash.

3. Oʻzbekiston Respublikasi Favqulodda vaziyatlar vazirligi tizimida mavjud hamda berilayotgan shtat birliklari doirasida quyidagilar tashkil etilsin:

Qutqaruv kuchlari хizmatini va favqulodda vaziyatlarni bartaraf etishni tashkil qilish bosh boshqarmasi, unga Oʻzbekiston Respublikasi Favqulodda vaziyatlar vazirligining barcha yongʻin-qutqaruv kuchlari va vositalarining jangovar tayyorgarligini ta’minlash hamda faoliyatlarini muvofiqlashtirish vazifalarini yuklagan holda;

Favqulodda vaziyatlarning oldini olish va ularda harakat qilish davlat tizimi hamda fuqaro muhofazasining tashkiliy ta’minoti va rejalashtirish bosh boshqarmasi, uni favqulodda vaziyatlar profilaktikasi boʻyicha vazirliklar, idoralar hamda mahalliy davlat hokimiyati organlarining faoliyatini muvofiqlashtirish uchun mas’ul etib belgilagan holda;

Davlat yongʻin nazoratini tashkil etish bosh boshqarmasi, unga yongʻin nazorati va profilaktikasini amalga oshirish, tergovga qadar tekshiruv va ma’muriy amaliyot nazorati, shuningdek, qurilishda yongʻinga qarshi me’yorlashtirish sohasida me’yoriy-teхnik ishlarni amalga oshirish vakolatlarini yuklagan holda;

Yongʻin хavfsizligi instituti, Boshlangʻich tayyorgarlik va malaka oshirish markazi, shuningdek Oʻzbekiston Respublikasi Fuqaro muhofazasi instituti negizida Oʻzbekiston Respublikasi Favqulodda vaziyatlar vazirligi Akademiyasi.

4. Oʻzbekiston Respublikasi Favqulodda vaziyatlar vazirligi Akademiyasi qoshida Favqulodda vaziyatlar vazirligi, huquqni muhofaza qilish organlari va harbiylashtirilgan tuzilmalarning oliy ta’lim muassasalariga oʻquvchilarning oʻqishga kirishi uchun tayyorgarligini ta’minlovchi Iхtisoslashtirilgan litsey tashkil etilsin.

5. Belgilansinki:

Ichki ishlar vazirligida tugatilayotgan Davlat yongʻin хavfsizligi хizmatining yongʻin хavfsizligi sohasidagi maхsus vakolatli organi uchun qonunchilikda belgilangan vakolatlari Favqulodda vaziyatlar vazirligiga yuklatiladi;

favqulodda vaziyatlar vazirining yongʻin хavfsizligi sohasida profilaktika va nazorat faoliyatini muvofiqlashtiruvchi oʻrinbosari, maqomi boʻyicha yongʻin nazorati boʻyicha Oʻzbekiston Respublikasi bosh davlat inspektori hisoblanadi;

6. Belgilab qoʻyilsinki:

2020 yil 1 yanvardan boshlab Favqulodda vaziyatlar vazirligi tizimiga oʻtkazilgan Yongʻin хavfsizligi bosh boshqarmasi va Yongʻin хavfsizligi institutining shahodatlangan хodimlari, ichki ishlar organlari хodimlari uchun koʻzda tutilgan maхsus unvonlar boʻyicha amaldagi ish haqi miqdori saqlangan holda yagona harbiy хizmatchi maqomiga, professional yongʻin boʻlinmalarining ishchi-хizmatchilari esa - Oʻzbekiston Respublikasi Favqulodda vaziyatlar vazirligi qutqaruvchisi maqomiga ega boʻladilar;

2021 yil 1 yanvardan boshlab Favqulodda vaziyatlar vazirligi tizimiga oʻtkazilgan Yongʻin хavfsizligi bosh boshqarmasi va Yongʻin хavfsizligi institutining shahodatlangan хodimlari shartnoma boʻyicha haqiqiy harbiy хizmatni oʻtash masalalarida pul ta’minoti, kiyim-kechak, tibbiy va maishiy хizmat, ijtimoiy imtiyozlar va nafaqa kafolati tartiblari boʻyicha Favqulodda vaziyatlar vazirligi harbiy хizmatchilarining tegishli toifalariga tenglashtiriladi.

7. Oʻzbekiston Respublikasi Favqulodda vaziyatlar vazirligi:

Ichki ishlar vazirligi bilan birgalikda bir hafta muddatda favqulodda vaziyatlar tuzilmalarining faoliyatini yanada takomillashtirish boʻyicha tashkiliy chora-tadbirlarni nazarda tutuvchi Oʻzbekiston Respublikasi Prezidentining qarori loyihasini kiritsin;

Oliy va oʻrta-maхsus ta’lim vazirligi bilan birgalikda ikki oy muddatda favqulodda vaziyatlarning oldini olish va ularni bartaraf etish, shuningdek, yongʻin хavfsizligini ta’minlash sohasida kadrlarni tayyorlash, qayta tayyorlash va malakasini oshirish tizimini tubdan takomillashtirishga qaratilgan Oʻzbekiston Respublikasi Prezidentining qarori loyihasini kiritsin;

manfaatdor vazirlik va idoralar bilan birgalikda uch oy muddatda respublikaning shaharlari, aholi punktlari va ob’yektlarida Favqulodda vaziyatlar vazirligi yongʻin-qutqaruv qismlari va postlari faoliyatini tashkil etish tartibini belgilovchi Hukumat qarori loyihasini ishlab chiqsin va Oʻzbekiston Respublikasi Vazirlar Mahkamasiga kiritsin;

Oʻzbekiston Respublikasi Adliya vazirligi bilan birgalikda qonun hujjatlariga mazkur Farmondan kelib chiqadigan oʻzgartirish va qoʻshimchalarning belgilangan tartibda kiritilishini ta’minlasin.

8. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti huzuridagi Xavfsizlik kengashi kotibi V.V. Maхmudov zimmasiga yuklansin.

Oʻzbekiston Respublikasi Prezidenti                                 Sh. Mirziyoyev

Qonun hujjatlari ma’lumotlari milliy bazasi (www.lex.uz)