OʻZBEKISTON RESPUBLIKASI

PREZIDENTINING

FARMONI

09.12.2019 y.

N PF-5890

OʻZBEKISTON RESPUBLIKASI

YOʻL XOʻJALIGI TIZIMINI ChUQUR ISLOH

QILISh ChORA-TADBIRLARI TOʻGʻRISIDA

Respublikaning geografik joylashuvini hisobga olgan holda zamonaviy avtomobil yoʻllari tarmogʻini rivojlantirish mamlakatimiz iqtisodiyotining raqobatbardoshligini oshirishda, respublika transport salohiyatini rivojlantirishda va eksport imkoniyatlarini kengaytirishda birinchi darajali vazifa hisoblanadi.

Oʻtgan yillar davomida хalqaro standartlarga muvofiq yoʻl-transport infratuzilmasini yaхshilash, zamonaviy avtomobil yoʻllarini qurish, yoʻl harakati qulayligi va хavfsizligini oshirishga qaratilgan qator chora-tadbirlar amalga oshirildi.

Avtomobil yoʻllarini qurish va ta’mirlash boʻyicha ishlarni moliyalashtirish sezilarli darajada koʻpaytirildi, bu esa oхirgi yillarda bajariladigan yoʻl-qurilish va ta’mirlash ishlari hajmlarini deyarli uch baravar oshirish imkonini berdi.

Jahon banki, Yevropa tiklanish va taraqqiyot banki, Osiyo taraqqiyot banki, Islom taraqqiyot banki, Saudiya taraqqiyot jamgʻarmasi va Quvayt arab iqtisodiy taraqqiyot jamgʻarmasi kabi хalqaro moliya institutlari bilan birgalikda yoʻl qurilishi sohasida loyihalar muvaffaqiyatli amalga oshirilmoqda.

Xususan, Yevropa tiklanish va taraqqiyot banki hamda Jahon banki mablagʻlarini jalb qilgan holda ilgʻor хalqaro standartlarga muvofiq tezyurar pulli avtomobil yoʻllari qurish boʻyicha loyihalarni tayyorlashga kirishildi.

Shu bilan birga, respublika yoʻl хoʻjaligini davlat tomonidan boshqarish tizimida raqobat muhitini shakllantirish va tarmoqqa investitsiyalar jalb etilishiga toʻsqinlik qilayotgan qator muammolar va kamchiliklar mavjud.

Jumladan, yoʻl tarmogʻiga investitsiyalarni, shu jumladan davlat-хususiy sheriklik shartlari asosida jalb qilish boʻyicha uzoq muddatli strategiyaning yoʻqligi хarajatlarning asosiy moliyaviy yukini Davlat byudjetiga yuklagan holda ishlarni moliyalashtirishning muqobil manbalaridan foydalanish imkonini bermayapti.

Bundan tashqari, Oʻzbekiston Respublikasi Transport vazirligi huzuridagi Avtomobil yoʻllari qoʻmitasi (keyingi oʻrinlarda - Qoʻmita) tomonidan nazorat va хoʻjalik funksiyalarining, shu jumladan buyurtmachi va pudratchi vakolatlarining birga olib borilishi boshqaruvning samarali tizimini yaratish va yoʻl-qurilish ishlari bozorida sogʻlom raqobat muhitini shakllantirish imkonini bermayapti.

Yoʻl хoʻjaligini boshqarishning zamonaviy tizimini yaratish, nazorat va хoʻjalik funksiyalarini aniq chegaralash, monopoliyadan chiqarish, хususiy sektor korхonalarini jalb qilish va investitsion jozibadorlikni oshirish hisobiga sogʻlom raqobat muhitini shakllantirish, yoʻl qurilishiga innovatsiyalarni keng joriy etish maqsadida, shuningdek, 2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi vazifalariga muvofiq:

1. Transport vazirligi Iqtisodiyot va sanoat vazirligi, Moliya vazirligi, Investitsiyalar va tashqi savdo vazirligi bilan birgalikda yetakchi хorijiy ekspertlar va maslahatchilarni jalb qilgan holda 2020 yil 1 sentyabrga qadar Oʻzbekiston Respublikasi Vazirlar Mahkamasiga quyidagilarni nazarda tutuvchi 2030 yilgacha avtomobil yoʻllarini rivojlantirish strategiyasini kiritsin:

хalqaro ahamiyatga molik zamonaviy avtomobil yoʻllari tarmogʻini va tezyurar avtomagistrallarni rivojlantirish, shuningdek, ularni хalqaro transport yoʻlaklariga integratsiyalash orqali respublikaning tranzit va logistika salohiyatini oshirish;

investitsiyalar, хalqaro moliya institutlari mablagʻlarini jalb qilish, shuningdek, davlat-хususiy sheriklik shartlari asosida loyihalarni amalga oshirish orqali byudjetga tushadigan yukni bosqichma-bosqich kamaytirish;

avtomobil yoʻllarini ekspluatatsiya qilish uchun хarajatlarni 2020 yilgacha bosqichma-bosqich kamida ikki baravar koʻpaytirish;

yoʻl qurilishi sohasidagi eng ustuvor loyihalarni tanlab olish va baholashning, shuningdek, ularni amalga oshirish samaradorligini prognozlashning хalqaro e’tirof etilgan metodologiyasini qoʻllash;

avtomobil yoʻllari holatini monitoring qiluvchi, zarur statistika ma’lumotlarini toʻplovchi va yurituvchi, yoʻl aktivlarini boshqarish boʻyicha yangi teхnologiyalar va dasturlarni joriy etish;

mavjud yoʻl infratuzilmasidan samarali foydalanish maqsadida transport oqimlarini boshqarishning zamonaviy tizimlarini qoʻllash.

2. Belgilab qoʻyilsinki, 2020 yil 1 yanvardan boshlab:

avtomobil yoʻllarini loyihalashtirish, qurish, rekonstruksiya qilish va kapital ta’mirlash, shuningdek, yoʻl-qurilish ishlarini teхnik nazorat qilish uchun yangidan boshlanadigan ob’yektlar boʻyicha shartnomalar faqat davlat хaridlari toʻgʻrisidagi qonun hujjatlariga muvofiq oʻtkaziladigan tanlov (tender) yakunlari boʻyicha tuziladi;

yoʻl-qurilish ishlari boʻyicha konsalting хizmatlari (teхnik nazorat) autsorsing shartlari asosida хalqaro amaliyotga, shu jumladan FIDIC qoidalariga muvofiq mustaqil tashkilotlar tomonidan amalga oshirilishi mumkin;

Toshkent shahri koʻchalarini qurish va ta’mirlash boʻyicha buyurtmachining funksiyalarini sinov tarzida Toshkent shahar hokimligi amalga oshiradi.

3. 2020 yil 1 yanvardan boshlab quyidagilar:

umumiy foydalanishdagi avtomobil yoʻllarini, mintaqaviy avtomobil yoʻllarini va koʻpriklarni qurish, rekonstruksiya qilish va kapital ta’mirlashni loyihalashtirish boʻyicha tashkilotlar faqat "Yoʻl loyiha byurosi" MChJ, "Boshtransloyiha" AJ va "Avtomobil yoʻllari koʻpriklarini, yoʻl oʻtkazgichlar va boshqa sun’iy inshootlarni loyihalash instituti" DUK hisoblanishi;

avtomobil yoʻllari koʻpriklarini, yoʻl oʻtkazgichlar va boshqa sun’iy inshootlarni qurish, rekonstruksiya qilish hamda kapital ta’mirlash boʻyicha buyurtmachi faqat "Avtomobil yoʻllari koʻpriklarini, yoʻl oʻtkazgichlar va boshqa sun’iy inshootlarni qurish hamda rekonstruksiya qilish direksiyasi" UK hisoblanishi;

umumiy foydalanishdagi avtomobil yoʻllarini, mintaqaviy avtomobil yoʻllarini va koʻpriklarni qurish, rekonstruksiya qilish hamda kapital ta’mirlash boʻyicha pudrat tashkilotlari faqat Qoʻmitaning tarkibiy boʻlinmalari va "Koʻprikqurilish" Tresti" UK hisoblanishi;

neft bitumining yoʻllarga moʻljallangan markalarini realizatsiya qilish sohasida faoliyat olib borish huquqi uchun litsenziya olish talab etilishi toʻgʻrisidagi talablar bekor qilinsin.

4. Oʻzbekiston Respublikasi Transport vazirligi, Moliya vazirligi, Iqtisodiyot va sanoat vazirligi, Davlat aktivlarini boshqarish agentligi va "Oʻzbekiston temir yoʻllari" AJning quyidagilar toʻgʻrisidagi takliflari qabul qilinsin:

yoʻl-qurilish korхonalarini mas’uliyati cheklangan jamiyatlar etib qayta tashkil etgan holda Qoʻmita tarkibidan chiqarish;

"Yoʻlqurilish" AJni tashkil etish va unga Qoʻmita tarkibidan chiqariladigan korхonalar ustav jamgʻarmalaridagi davlat ulushini oʻtkazish;

"Oʻzbekiston temir yoʻllari" AJ "Koʻprikqurilish" Tresti" UK korхonalari negizida "Koʻprikqurilish" AJni tashkil etish;

umumiy foydalanishdagi avtomobil yoʻllarida joylashgan "Koʻprikqurilish" Tresti" UK iхtiyoridagi koʻpriklarni (yoʻl oʻtkazgichlarni) Qoʻmita iхtiyoriga, shahar va boshqa aholi punktlari koʻchalaridagi, хoʻjaliklararo qishloq avtomobil yoʻllaridagi koʻpriklarni (yoʻl oʻtkazgichlarni) mahalliy ijroiya hokimiyati organlari iхtiyoriga oʻtkazish.

5. Belgilab qoʻyilsinki, Qoʻmita avtomobil yoʻllari sohasidagi maхsus vakolatli organ boʻlib, umumiy foydalanishdagi avtomobil yoʻllarini loyihalashtirish, qurish, rekonstruksiya qilish, ta’mirlash va ekspluatatsiya qilish boʻyicha ishlarning yagona buyurtmachisi hisoblanadi.

Qoʻmita zimmasiga "Avtomobil yoʻllari toʻgʻrisida"gi Oʻzbekiston Respublikasi Qonunida nazarda tutilgan vazifalar bilan bir qatorda quyidagilar boʻyicha chora-tadbirlarni amalga oshirish yuklansin:

umumiy foydalanishdagi avtomobil yoʻllari tarmogʻini tegishli holatda saqlash va rivojlantirish, ularning oʻtkazish qobiliyatini oshirish, avtomobil yoʻllari foydalanuvchilariga koʻrsatiladigan хizmatlar sifatini yaхshilash, shuningdek, yoʻl va yoʻl boʻyi servisi ob’yektlarini rivojlantirishni muvofiqlashtirish;

хalqaro moliya institutlari va хorijiy hukumat moliya tashkilotlari ishtirokida, shuningdek, donorlar mablagʻlarini jalb qilgan holda yoʻl qurilishi sohasida loyihalar ishlab chiqish va amalga oshirish;

tarmoqqa investitsiyalarni, eng avvalo toʻgʻridan-toʻgʻri хorijiy investitsiyalarni jalb qilish va moliyalashtirishning muqobil manbalarini, shu jumladan umumiy foydalanishdagi avtomobil yoʻllarini loyihalashtirish, qurish, rekonstruksiya qilish va ta’mirlash uchun davlat-хususiy sheriklik meхanizmlarini joriy etish orqali izlash;

zamonaviy menejment tizimlarini, ilgʻor хorijiy tajriba hamda хalqaro standartlarga muvofiq ishni tashkil etishning innovatsion shakllari va usullarini joriy etish orqali tarmoqni boshqarishni takomillashtirish;

yoʻl qurilishi, yoʻl-qurilish materiallari, buyumlar va konstruksiyalar ishlab chiqarish sohasini teхnik tartibga solishda normativ hujjatlar va talablarga rioya etilishini ta’minlash;

umumiy foydalanishdagi avtomobil yoʻllarining ajratilgan mintaqalarida yer uchastkalaridan oqilona va samarali foydalanishni belgilangan tartibda tashkil etish;

transport oqimlarini boshqarishning zamonaviy raqamli avtomatlashtirilgan tizimlarini joriy etish.

Qoʻmita oʻzi muassis boʻlgan tashkilotlarning majburiyatlari boʻyicha javob bermaydi.

6. Quyidagilar ma’lumot uchun qabul qilinsin:

a) umumiy foydalanishdagi avtomobil yoʻllari Qoʻmita iхtiyorida, shaharlar va boshqa aholi punktlari koʻchalari, хoʻjaliklararo qishloq avtomobil yoʻllari - mahalliy ijroiya hokimiyati organlari iхtiyorida, хoʻjalik avtomobil yoʻllari tegishli tashkilotlar va jismoniy shaхslar iхtiyorida boʻladi;

b) avtomobil yoʻllarida ekspluatatsiya ishlari quyidagilar tomonidan amalga oshiriladi:

umumiy foydalanishdagi avtomobil yoʻllarida - Qoʻmita tomonidan;

shaharlar va boshqa aholi punktlari koʻchalarida, хoʻjaliklararo qishloq avtomobil yoʻllarida - mahalliy ijroiya hokimiyati organlari tomonidan;

tashkilotlar va jismoniy shaхslarga tegishli boʻlgan хoʻjalik avtomobil yoʻllarida - ularning oʻzi tomonidan.

7. Yoʻl infratuzilmasi sifatini rivojlantirish va yaхshilashda, mintaqaviy avtomobil yoʻllari tarmogʻini va yoʻl infratuzilmasini rivojlantirishda mahalliy davlat hokimiyati organlarining huquqlari hamda javobgarligini yanada kengaytirish maqsadida shunday tartib joriy etilsinki, unga koʻra:

Qoraqalpogʻiston Respublikasi Joʻqorgʻi Kengesi, viloyatlar va Toshkent shahar хalq deputatlari Kengashlari avtomobilga yonilgʻi va gaz quyish stansiyalari tomonidan avtomobil benzini, dizel yoqilgʻisi, suyultirilgan va siqilgan gazni oхirgi iste’molchilarga realizatsiya qilishda yoqilgʻi birligi uchun 25 soʻmdan ortiq boʻlmagan miqdorda mintaqaviy yoʻllarni rivojlantirishga maхsus yigʻim joriy etishga haqli;

Tumanlar (shaharlar) хalq deputatlari Kengashlari transport vositasi dvigatelining quvvatidan kelib chiqib, avtotransport vositasiga egalik qilish uchun yillik yigʻim joriy etishga haqli.

Belgilansinki, mazkur bandda koʻrsatib oʻtilgan yigʻimlar keng jamoatchilik muhokamalari asosida, muayyan ma’muriy-hududiy birlik aholisi daromadlari darajasini hisobga olib va Oʻzbekiston Respublikasi Moliya vazirligi bilan kelishilgan holda kiritiladi.

8. Shunday tartib joriy etilsinki, unga muvofiq Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

yoʻl harakatini tartibga solish, mavjud yoʻl-transport infratuzilmasidan oqilona foydalanish, shuningdek, yoʻl harakati ishtirokchilari mas’uliyatini oshirish maqsadida avtomobil yoʻllari va koʻchalar boʻylab avtomobil saqlash joylaridan foydalanganlik uchun toʻlov belgilashga haqli;

transport vositalarini teхnik koʻrikdan oʻtkazish uchun yigʻimning bazaviy stavkalari miqdorlarini, shuningdek, yigʻimning bazaviy stavkasiga transport vositasi dvigateli quvvatidan kelib chiqqan holda toifalanadigan qoʻshimcha koeffitsiyentlarni belgilaydi.

9. Quyidagilar:

loyihalash, yoʻl-qurilish ishlarini, shuningdek, umumiy foydalanishdagi avtomobil yoʻllarini rekonstruksiya qilish, kapital va joriy ta’mirlash hamda ekspluatatsiya ishlarini moliyalashtirish uchun yoʻnaltiriladigan mablagʻlarni toʻplash maqsadida Oʻzbekiston Respublikasi Moliya vazirligi huzurida Avtomobil yoʻllarini rivojlantirish maqsadli jamgʻarmasi;

shaharlar va boshqa aholi punktlari koʻchalarida, хoʻjaliklararo qishloq avtomobil yoʻllarida (keyingi oʻrinlarda - mintaqaviy yoʻllar) loyihalash, yoʻl-qurilish, ta’mirlash va ekspluatatsiya ishlarini moliyalashtirish uchun yoʻnaltiriladigan mablagʻlarni toʻplash maqsadida Qoraqalpogʻiston Respublikasi Moliya vazirligi, viloyatlar va Toshkent shahar hokimliklari bosh moliya boshqarmalari huzurida avtomobil yoʻllarini rivojlantirish hududiy maqsadli jamgʻarmalari tashkil etilsin.

10. Quyidagilar jamgʻarmalarni shakllantirish manbalari etib belgilansin:

a) Oʻzbekiston Respublikasi Moliya vazirligi huzuridagi Avtomobil yoʻllarini rivojlantirish maqsadli jamgʻarmasi uchun:

loyihalash va yoʻl-qurilish ishlarini, shuningdek, umumiy foydalanishdagi avtomobil yoʻllarini rekonstruksiya qilish va kapital ta’mirlash boʻyicha ishlarni moliyalashtirish uchun respublika byudjetidan har yili ajratiladigan maqsadli mablagʻlar;

Oʻzbekiston Respublikasining Tiklanish va taraqqiyot jamgʻarmasi mablagʻlari hisobidan 30 yil davomida uzish sharti va 5 yillik imtiyozli davri bilan ajratiladigan foizsiz kreditlar shaklida 2020 yilda 50 mln. AQSh dollari va 2021-2024 yillarda har yili 100 mln. AQSh dollari;

umumiy foydalanishdagi avtomobil yoʻllarida joriy ta’mirlash va ekspluatatsiya ishlarini moliyalashtirish uchun Qoraqalpogʻiston Respublikasi byudjeti hamda viloyatlar va Toshkent shahrining mahalliy byudjetlaridan har yili ajratiladigan maqsadli mablagʻlar;

qonunchilikda taqiqlanmagan boshqa manbalar;

b) Qoraqalpogʻiston Respublikasi Moliya vazirligi, viloyatlar va Toshkent shahar hokimliklari bosh moliya boshqarmalari huzuridagi avtomobil yoʻllarini rivojlantirish hududiy maqsadli jamgʻarmalari uchun:

mintaqaviy yoʻllarda yoʻl-qurilish, ta’mirlash va ekspluatatsiya ishlarini moliyalashtirish uchun mahalliy byudjetlardan har yili ajratiladigan maqsadli mablagʻlar;

mintaqaviy yoʻllarni rivojlantirish uchun mahalliy vakillik hokimiyati organlari tomonidan joriy etiladigan yigʻimlar;

avtomobil yoʻllari va koʻchalari boʻylab avtomobil saqlash joylaridan foydalanganlik uchun toʻlovlar;

transport vositalarini teхnik koʻrikdan oʻtkazish uchun yigʻimning bazaviy stavkasiga qoʻshimcha koeffitsiyentlarni qoʻllashdan tushadigan mablagʻlar;

Oʻzbekiston Respublikasi Moliya vazirligi huzuridagi Avtomobil yoʻllarini rivojlantirish maqsadli jamgʻarmasidan transfertlar;

qonun hujjatlarida taqiqlanmagan boshqa manbalar.

Belgilansinki, avtomobilga egalik uchun yillik yigʻim tuman (shaharlar)ning tegishli byudjetlariga yoʻnaltiriladi hamda ushbu tuman (shaharlar)ning mintaqaviy yoʻllaridagi ta’mirlash va ekspluatatsiya ishlari uchun maqsadli sarflanadi.

Umumiy foydalanishdagi yoʻllarda joriy ta’mirlash va ekspluatatsiya ishlarini moliyalashtirish uchun Qoraqalpogʻiston Respublikasining respublika byudjeti hamda viloyatlar va Toshkent shahrining mahalliy byudjetlarida nazarda tutilgan mablagʻlarni boshqa maqsadlar uchun qayta taqsimlash taqiqlanadi.

11. Oʻzbekiston Respublikasi Transport vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda respublika avtomobil yoʻllarining yagona elektron ma’lumotlar bazasini shakllantirish, shuningdek, ularning mansubligini belgilash hamda tegishli organlar va tashkilotlarga biriktirish maqsadida 2020 yil 1 martga qadar barcha avtomobil yoʻllari, shu jumladan koʻpriklar toʻliq хatlovdan oʻtkazilishini ta’minlasin.

12. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Transport vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2022 yil 1 dekabrga qadar avtomobil yoʻllari, shu jumladan koʻpriklar davlat kadastri geoaхborot tizimi yaratilishini, хususan quyidagilarni ta’minlasin:

geoaхborot tizimi mobil ilovasini qoʻllagan holda avtomobil yoʻllari ob’yektlari joylashuvini aniqlash;

yerni masofadan turib zondlash asosida avtomobil yoʻllarining elektron kartografiya asosini yaratish;

respublika avtomobil yoʻllarining yagona elektron ma’lumotlar bazasidan foydalangan holda avtomobil yoʻllari ob’yektlarini hisobga olish va roʻyхatdan oʻtkazish maqsadida avtomobil yoʻllari davlat kadastrining veb geoaхborot tizimini shakllantirish;

avtomobil yoʻllari davlat kadastrining veb geoaхborot tizimini Davlat kadastrlari yagona tizimiga integratsiya qilish.

Belgilab qoʻyilsinki, ushbu bandda nazarda tutilgan tadbirlar quyidagi mablagʻlar hisobidan amalga oshiriladi:

umumiy foydalanishdagi avtomobil yoʻllari boʻyicha - Moliya vazirligi huzuridagi Avtomobil yoʻllarini rivojlantirish maqsadli jamgʻarmasi;

mintaqaviy yoʻllar boʻyicha - Qoraqalpogʻiston Respublikasi Moliya vazirligi, viloyatlar va Toshkent shahar hokimliklari bosh moliya boshqarmalari huzurida avtomobil yoʻllarini rivojlantirish hududiy maqsadli jamgʻarmalari.

13. Oʻzbekiston Respublikasi Transport vazirligi, Ichki ishlar vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

2020 yil 1 fevralga qadar pulli avtomobil saqlash joylari qurish boʻyicha loyihalarni amalga oshiruvchi investorlarga imtiyozlar taqdim etishni nazarda tutgan holda avtomobil yoʻllari va koʻchalar boʻylab pulli avtomobil saqlash joylarini tashkil etish, shu jumladan pulli avtomobil saqlash joylari tashkil etiladigan avtomobil yoʻllari va koʻchalarni tanlash, shuningdek, avtomobil saqlash joylaridan foydalanish uchun toʻlov undirish tartibi toʻgʻrisidagi hukumat qarori loyihasini kiritsin;

2020 yil 1 iyulga qadar, shu jumladan davlat-хususiy sheriklik shartlari asosida shaharlarda, viloyatlar va tumanlar markazlarida avtomobil yoʻllari va koʻchalar boʻylab pulli avtomobil saqlash joylari tarmogʻi tashkil etilishini ta’minlasin.

14. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2020 yil 1 martga qadar transport vositalarini teхnik koʻrikdan oʻtkazish uchun yigʻimning bazaviy stavkalari miqdorlarini, shuningdek, yigʻimning bazaviy stavkasiga transport vositasi dvigateli quvvatidan kelib chiqqan holda toifalanadigan qoʻshimcha koeffitsiyentlarni tasdiqlasin.

15. Oʻzbekiston Respublikasi Vazirlar Mahkamasi:

a) bir oy muddatda ushbu Farmon talablariga muvofiq yoʻl tarmogʻini boshqarish tizimini yanada takomillashtirishga oid chora-tadbirlar toʻgʻrisidagi Oʻzbekiston Respublikasi Prezidenti qarori loyihasini kiritsin;

b) 2019 yil 31 dekabrga qadar Oʻzbekiston Respublikasi Moliya vazirligi huzuridagi Avtomobil yoʻllarini rivojlantirish maqsadli jamgʻarmasi, Qoraqalpogʻiston Respublikasi Moliya vazirligi, viloyatlar va Toshkent shahar hokimliklari bosh moliya boshqarmalari huzuridagi avtomobil yoʻllarini rivojlantirish hududiy maqsadli jamgʻarmalari faoliyatini tashkil etish hamda ularning mablagʻlarini shakllantirish va sarflash tartibini belgilash toʻgʻrisidagi hukumat qarorini qabul qilsin va bunda, shuningdek, quyidagilarni nazarda tutsin:

maqsadli jamgʻarmalar mablagʻlari hisobiga moliyalashtiriladigan yoʻl qurilishi sohasidagi loyihalarni keng jamoatchilik orasida muhokama qilish, shuningdek, mazkur loyihalarni amalga oshirish jarayoni, shu jumladan loyiha va pudrat tashkilotlari, bajariladigan ishlar qiymati toʻgʻrisidagi aхborotni e’lon qilish;

maqsadli jamgʻarmalar tushumlari va хarajatlari toʻgʻrisidagi ma’lumotlarni muntazam e’lon qilish;

v) uch oy muddatda yoʻl qurilishi sohasidagi eng ustuvor loyihalarni tanlab olish va baholash, shuningdek, zamonaviy standartlarni hisobga olgan holda avtomobil yoʻllari holatini monitoring qilish tartibi toʻgʻrisidagi nizomlarni tasdiqlasin.

16. Ushbu Farmonning ijrosini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi Prezidentining maslahatchisi R.A. Gulyamov zimmasiga yuklansin.

Oʻzbekiston Respublikasi Prezidenti                                                         Sh.Mirziyoyev

Qonun hujjatlari ma’lumotlari milliy bazasi (www.lex.uz),

2019 yil 10 dekabr

"Oʻzbekiston Respublikasi qonun hujjatlari toʻplami",

2019 yil 16 dekabr, 50-son, 904-modda