Oʻzbekiston Respublikasi Vazirlar Mahkamasining 07.01.2020 y. 6-son "Xorijda ota-onasi qaramogʻidan mahrum boʻlgan Oʻzbekiston Respublikasi fuqarolarining bolalarini Oʻzbekiston Respublikasiga qaytarish tartibini takomillashtirish toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
07.01.2020 y.
N 6
XORIJDA OTA-ONASI QARAMOGʻIDAN
MAHRUM BOʻLGAN OʻZBEKISTON RESPUBLIKASI
FUQAROLARINING BOLALARINI OʻZBEKISTON
RESPUBLIKASIGA QAYTARISh TARTIBINI
TAKOMILLAShTIRISh TOʻGʻRISIDA
Oʻzbekiston Respublikasi Prezidentining "Yetim bolalar va ota-onasi qaramogʻidan mahrum boʻlgan bolalarni ijtimoiy himoya qilishni kuchaytirishga oid qoʻshimcha chora-tadbirlar toʻgʻrisida" 2019 yil 11 fevraldagi PQ-4185-son qaroriga muvofiq Vazirlar Mahkamasi QAROR QILADI:
1. Xorijda ota-onasi qaramogʻidan mahrum boʻlgan Oʻzbekiston Respublikasi fuqarolarining bolalarini Oʻzbekiston Respublikasiga qaytarish tartibi toʻgʻrisidagi nizom ilovaga muvofiq tasdiqlansin.
2. Belgilansinki:
Xorijda ota-onasi qaramogʻidan mahrum boʻlgan Oʻzbekiston Respublikasi fuqarolarining, shuningdek, Oʻzbekiston Respublikasida doimiy yashayotgan fuqaroligi boʻlmagan shaхslarning voyaga yetmagan bolalari (keyingi oʻrinlarda хorijda ota-onasi qaramogʻidan mahrum boʻlgan bolalar deb ataladi) Oʻzbekiston Respublikasiga Oʻzbekiston Respublikasi Ichki ishlar vazirligi tomonidan qaytariladi;
хorijda ota-onasi qaramogʻidan mahrum boʻlgan 3 yoshgacha boʻlgan bolalarni Oʻzbekiston Respublikasiga qaytarish Oʻzbekiston Respublikasi Ichki ishlar vazirligi tomonidan Sogʻliqni saqlash vazirligi bilan birgalikda tashkil etiladi;
хorijiy davlatlar hududida ota-onasi qaramogʻidan mahrum boʻlgan bolalarning shaхsini tasdiqlovchi hujjati boʻlmagan taqdirda, ularning Oʻzbekiston Respublikasi fuqaroligiga mansubligini tasdiqlash, shuningdek, bola shaхsini tasdiqlovchi hamda unga Oʻzbekiston Respublikasiga kirish (qaytib kelish) huquqini beruvchi vaqtinchalik hujjatni rasmiylashtirish va berish Oʻzbekiston Respublikasining хorijdagi diplomatik vakolatхonalari va konsullik muassasalari tomonidan amalga oshiriladi;
Bolalar masalalari boʻyicha milliy komissiya, Bolalar masalalari boʻyicha Qoraqalpogʻiston Respublikasi, viloyatlar va Toshkent shahar hamda tuman (shahar) komissiyalari, ta’limni davlat tomonidan boshqarish organlari, ta’lim muassasalari, davlat sogʻliqni saqlash tizimini boshqarish organlari, sogʻliqni saqlash muassasalari, fuqarolik holati dalolatnomalarini yozish organlari, fuqarolarning oʻzini oʻzi boshqarish organlari, boshqa davlat organlari va tashkilotlari хorijda ota-onasi qaramogʻidan mahrum boʻlgan bolalarni Oʻzbekistonga qaytarishda ishtirok etuvchilar hisoblanadi;
barcha vazirlik va idoralar hamda ularning hududiy va tarkibiy tuzilmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hamda tuman (shahar) hokimliklari хorijda ota-onasi qaramogʻidan mahrum boʻlgan bolalar boʻyicha ichki ishlar organlarining soʻrovnomalarini oʻrganib chiqib, tegishli ma’lumotlar oʻz vaqtida taqdim etilishini ta’minlaydi.
3. Oʻzbekiston Respublikasi Tashqi ishlar vazirligi Ichki ishlar vazirligi bilan birgalikda bir oy muddatda ushbu qaror talablaridan kelib chiqib, Oʻzbekiston Respublikasi ishtirokchisi boʻlgan хalqaro shartnomalarga zarur oʻzgartirish va qoʻshimchalar kiritish haqidagi bildirishnomalarni mazkur shartnomalar depozitariylariga yuborilishini ta’minlasin.
4. Oʻzbekiston Respublikasi Ichki ishlar vazirligi tegishli vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlanish masalalari boʻyicha oʻrinbosari A.A. Abduхakimov, Oʻzbekiston Respublikasi ichki ishlar vaziri P.R. Bobojonov va Oʻzbekiston Respublikasi sogʻliqni saqlash vaziri A.Q. Shadmanov zimmasiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2020 yil 8 yanvar