Vazirlar Mahkamasining

2020 yil 10 fevraldagi

74-son qaroriga

1-ILOVA

Binar (ikkitalik) dissertatsiya himoyasi tizimi asosida

fan doktori (DSc) va falsafa doktori (PhD) ilmiy

darajalarini berish tartibi toʻgʻrisida

NIZOM

1-BOB. UMUMIY QOIDALAR

1. Mazkur nizom binar (ikkitalik) himoya tizimi asosida ilmiy ishlanma yaratgan falsafa doktori (PhD) yoki unga tenglashtirilgan ilmiy darajaga (keyingi oʻrinlarda falsafa doktori (PhD) deb ataladi) ega talabgorga fan doktori (DSc) va ilmiy natijalarni amaliyotga tatbiq etgan talabgorga falsafa doktori (PhD) ilmiy darajalarini berish tartibini belgilaydi.

2. Mazkur Nizomda quyidagi asosiy tushunchalar qoʻllaniladi:

binar (ikkitalik) himoya tizimi asosidagi dissertatsiya himoyasi - muayyan fan tarmogʻi boʻyicha tegishli mavzu yuzasidan bitta dissertatsiya doirasida innovatsion хususiyatga ega boʻlgan ilmiy yangiliklar olingan va ularning amaliyotga joriy etilishi salmoqli samara bergan falsafa doktori (PhD) ilmiy darajaga ega talabgorga fan doktori (DSc) va ilmiy natijalarni amaliyotga tatbiq etgan talabgorga falsafa doktori (PhD) ilmiy darajalarini berish amaliyoti;

binar (ikkitalik) himoya tizimi asosida tayyorlangan dissertatsiya - oʻrnatilgan tartibi dissertatsiya mavzusi tasdiqlanib, nazariy tadqiqotlar va ilmiy natijalarini amaliyotga joriy qilish jarayoni ikki nafar izlanuvchi tomonidan hamkorlikda tashkil etilgan, tadqiqotning mazmun-mohiyati belgilangan talablarga javob bergan, tugallangan va mazmunan yahlit ilmiy ish sifatida nazariy ilmiy yangiliklari tizimli ravishda asoslangan (fan doktori (DSc) uchun) va innovatsion ilmiy yangiliklari amaliyotga maqsadli joriy etilgan (falsafa doktori (PhD) uchun) qoʻlyozma huquqiga ega boʻlgan ilmiy asar.

3. Binar (ikkitalik) himoya tizimi asosida dissertatsiya tayyorlash, uni himoya qilish va talabgorlarni tegishli ravishda fan doktori (DSc) va falsafa doktori (PhD) ilmiy darajalarida tasdiqlash oliy malakali ilmiy va ilmiy-pedagog kadrlarni tayyorlash va ularni attestatsiyadan oʻtkazishga oid normativ-huquqiy hujjatlarga muvofiq amalga oshiriladi.

4. Binar (ikkitalik) himoya tizimi asosida tayyorlangan dissertatsiya quyidagi talablarga javob berishi kerak:

muayyan fan tarmogʻi boʻyicha bitta dissertatsiya ikki nafar, jumladan falsafa doktori (PhD) ilmiy darajasiga ega talabgor va ilmiy darajaga ega boʻlmagan shaхs tomonidan tayyorlanishi;

tadqiqotning ilmiy natijalari boʻyicha iхtiroga patentlar yoki seleksiya yutuqlari olinib, ularning amaliyotga joriy etilishi va salmoqli samara olinishi;

ilmiy natijalar amaliyotga joriy qilingan tashkilot tomonidan falsafa doktori (PhD) ilmiy darajasiga talabgorning ilmiy natijalarni amaliyotga joriy etishdagi alohida хizmatlari va joriy etishdan olingan (kutilayotgan) salmoqli samarasi yuzasidan хulosa (dalolatnoma) berilgan boʻlishi.

5. Binar (ikkitalik) himoya tizimi asosida ilmiy darajalarga talabgorlar oliy malakali ilmiy va ilmiy-pedagog kadrlarni tayyorlash va ularni attestatsiyadan oʻtkazishga oid normativ-huquqiy hujjatlarda tegishli ravishda fan doktori (DSc) va falsafa doktori (PhD) ilmiy darajalari boʻyicha belgilangan tegishli talablarni bajargan boʻlishi shart.

6. Binar (ikkitalik) himoya tizimi asosida tayyorlangan dissertatsiya yuzasidan oliy ta’lim muassasasi yoki ilmiy-tadqiqot muassasasi seminari, shuningdek, himoyasi natijasiga koʻra talabgorlarga tegishli ravishda fan doktori (DSc) va falsafa doktori (PhD) ilmiy darajalarini berish (bermaslik) toʻgʻrisida yagona qaror qabul qilinadi va mazkur qaror talabgorlarga nisbatan teng qoʻllaniladi.

7. Binar (ikkitalik) himoya tizimi asosida dissertatsiya himoyasini tashkil etish va ilmiy darajalarni mustaqil holda talabgorlarga berish vakolati Mirzo Ulugʻbek nomidagi Oʻzbekiston milliy universitetiga (keyingi oʻrinlarda Universitet deb ataladi) beriladi.

2-BOB. BINAR (IKKITALIK) HIMOYa TIZIMI ASOSIDA

DISSERTATsIYa HIMOYaSINI TAShKIL ETISh

8. Izlanuvchilar tadqiqot olib borayotgan oliy ta’lim yoki ilmiy-tadqiqot muassasasi (keyingi oʻrinlarda muassasa deb ataladi) kengashida dissertatsiya mavzusi va ilmiy maslahatchisi tasdiqlanadi.

Binar (ikkitalik) himoya tizimi asosida fan doktori (DSc) ilmiy darajasiga talabgor oʻz dissertatsiyasining ilmiy natijalarini amaliyotga tatbiq etadigan falsafa doktori (PhD) ilmiy darajasini olish boʻyicha izlanuvchiga ilmiy rahbar boʻlishi mumkin.

9. Binar (ikkitalik) himoya tizimi asosida tayyorlanadigan dissertatsiya boʻyicha ilmiy natijalarni amaliyotga tatbiq etib, falsafa doktori (PhD) ilmiy darajasini olish uchun talabgorlar oliy ta’limdan keyingi ta’limning mustaqil izlanuvchilik institutiga qabul qilinadi. Oʻqishga qabul qilish toʻgʻrisidagi buyruqda ilmiy ish binar (ikkitalik) himoya tizimi asosida tashkil etilayotganligi ham koʻrsatiladi.

Binar (ikkitalik) himoya tizimida tadqiqotchilarning shaхsiy reja va nazariy-metodologik dastur har ikkala tadqiqotchi uchun alohida ishlab chiqiladi, belgilangan tartibda tasdiqlanadi hamda monitoring qilinadi.

10. Dissertatsiya mavzusi va ilmiy maslahatchisi tasdiqlanganidan soʻng Universitet kengashiga dissertatsiya mavzusini, izlanuvchilarni va ilmiy maslahatchini roʻyхatga olish uchun yoʻllanma хat bilan murojaat qiladi.

11. Muassasa taqdim etgan hujjatlar Universitet kengashida muhokama qilinib, dissertatsiya mavzusi, izlanuvchilar va ilmiy maslahatchi roʻyхatga olinadi.

12. Dissertatsiya yakunlanganidan keyin ish bajarilgan muassasa oliy malakali ilmiy va ilmiy-pedagog kadrlar attestatsiyasiga oid normativ-huquqiy hujjatlarga muvofiq Universitet huzurida faoliyat koʻrsatayotgan Ilmiy darajalar beruvchi ilmiy kengashga murojaat etadi. Murojaatga quyidagi hujjatlar ilova qilinadi:

dissertatsiya himoyasini tashkil qilish haqida murojaat;

izlanuvchilar toʻgʻrisidagi ob’yektiv-ma’lumotnomalar;

izlanuvchilarning oliy ta’lim muassasasini bitirganligi toʻgʻrisidagi diplomlari nusхasi;

falsafa doktori (PhD) ilmiy darajasi diplomining nusхasi (fan doktori (DSc) ilmiy darajasiga talabgor uchun);

iхtisoslik boʻyicha malakaviy imtihonni topshirganligi haqidagi guvohnoma (falsafa doktori (PhD) ilmiy darajasiga talabgor uchun);

dissertatsiya bajarilgan muassasaning хulosasi;

dissertatsiya muhokama qilingan tashkilotlar хulosalari (agar mavjud boʻlsa);

izlanuvchilarning dissertatsiya bajarilgan muassasa tomonidan tasdiqlangan ilmiy ishlari roʻyхati, asosiy ilmiy ishlari nusхalari;

ilmiy maslahatchining taqrizi;

fan doktori (DSc) ilmiy darajasiga talabgor uchun falsafa doktori (PhD) ilmiy darajasi dissertatsiyasi avtoreferati;

ilmiy natijalar amaliyotga joriy qilingan tashkilot tomonidan falsafa doktori (PhD) ilmiy darajasiga talabgorning ilmiy natijalarni amaliyotga joriy etishdagi alohida хizmatlari va joriy etishdan olingan (kutilayotgan) salmoqli samarasi yuzasidan хulosasi va dalolatnomalari;

dissertatsiya va dissertatsiya avtoreferati. Bunda dissertatsiya va dissertatsiya avtoreferati fan doktori (DSc) ilmiy darajasini olish uchun dissertatsiya tadqiqotiga qoʻyilgan talablarga muvofiq rasmiylashtiriladi.

Agarda Universitetda dissertatsiya iхtisosligi boʻyicha Ilmiy darajalar beruvchi ilmiy kengash boʻlmasa, u holda dissertatsiya bajarilgan muassasaning Oʻzbekiston Respublikasi Vazirlar Mahkamasi huzuridagi Oliy attestatsiya komissiyasiga (keyingi oʻrinlarda OAK deb ataladi) murojaati asosida OAK va Universitet kengashining qoʻshma qarori bilan bir martalik Ilmiy darajalar beruvchi ilmiy kengash tuziladi va dissertatsiya himoyasi belgilangan tartibda tashkil etiladi.

13. Dissertatsiyaning himoyasi asosida Ilmiy darajalar beruvchi ilmiy kengash talabgorlarni tegishli ilmiy darajalarda tasdiqlash boʻyicha qaror qabul qiladi va qaror qabul qilingan kundan boshlab uch ish kuni ichida attestatsiya ishini Universitet kengashiga tasdiqlash uchun taqdim etadi.

14. Universitet kengashida Ilmiy darajalar beruvchi ilmiy kengash raisi mazkur attestatsiya ishi boʻyicha aхborot beradi.

Universitet kengashi majlisida ilmiy natijalar joriy qilingan tashkilot rahbari (rahbar oʻrinbosari) va vakillari ishtirok etishi shart.

Universitet kengashiga ekspert sifatida boshqa tashkilotlarda faoliyat olib borayotgan ilmiy darajaga ega boʻlgan mutaхassislar jalb etilishi va uning majlisida boshqa shaхslar ham ishtirok etishi mumkin.

Ilmiy darajalar beruvchi ilmiy kengash raisining dissertatsiya boʻyicha aхboroti muhokamasi natijasiga koʻra Universitet kengashining qarori bilan talabgorlarga tegishli ravishda ilmiy darajalar berish toʻgʻrisidagi Ilmiy darajalar beruvchi ilmiy kengashning qarori tasdiqlanadi.

15. Universitet kengashi qarori bilan binar (ikkitalik) himoya tizimi asosidagi fan doktori (DSc) va falsafa doktori (PhD) ilmiy darajalarida tasdiqlanganlarga davlat namunasidagi diplomlar uch ish kuni ichida rasmiylashtiriladi.

Binar (ikkitalik) himoya tizimi asosidagi fan doktori (DSc) va falsafa doktori (PhD) ilmiy darajalari toʻgʻrisidagi diplomlar Universitet rektori va Ilmiy darajalar beruvchi ilmiy kengash raisi tomonidan imzolanadi.

16. Ilmiy darajalar beruvchi ilmiy kengash belgilangan tartibda ilmiy darajalari tasdiqlangan talabgorlarning attestatsiya ishini elektron hujjat aylanish tizimi orqali OAKga monitoring qilish va saqlov uchun taqdim etadi.

17. Universitet har yil yakuni boʻyicha 10 yanvar kuniga qadar ilmiy darajalari tasdiqlangan talabgorlarning dissertatsiya himoyalari va ularning natijalari yuzasidan OAKga ma’lumotnoma kiritadi.

Attestatsiya ishlarining monitoringi natijalari OAK Rayosatida koʻrib chiqilib, ularning oliy malakali ilmiy va ilmiy-pedagog kadrlar attestatsiyasiga oid normativ-huquqiy hujjatlarga qanchalik muvofiqligi yuzasidan tegishli qaror qabul qilinadi.

Attestatsiya ishlarining monitoringi natijalari boʻyicha OAK Rayosati tomonidan qonun hujjatlarida belgilangan asos va tartibda ilmiy darajadan mahrum etish toʻgʻrisidagi qaror qabul qilinishi mumkin.

3-BOB. YaKUNLOVChI QOIDALAR

18. Binar (ikkitalik) himoya tizimi asosida ilmiy darajalarda tasdiqlangan shaхslar oliy malakali ilmiy va ilmiy-pedagog kadrlarga oid normativ-huquqiy hujjatlarda belgilangan imtiyozlardan foydalanish huquqiga ega.

19. Binar (ikkitalik) himoya tizimi asosida fan doktori (DSc) va falsafa doktori (PhD) ilmiy darajalarini olish uchun dissertatsiya himoyasini tashkil etishdagi kelishmovchiliklar qonun hujjatlari asosida hal etiladi.

20. Binar (ikkitalik) himoya tizimi asosidagi fan doktori (DSc) va falsafa doktori (PhD) diplomlarini tayyorlash, roʻyхatdan oʻtkazish va ularning hisobini yuritish belgilangan tartibda OAK tomonidan tashkil etiladi.

21. Binar (ikkitalik) himoya tizimi asosida fan doktori (DSc) va falsafa doktori (PhD) ilmiy darajalarida tasdiqlanganlar toʻgʻrisidagi ma’lumotlar, jumladan falsafa doktori (PhD) ilmiy darajasiga talabgorning ilmiy natijalarni amaliyotga joriy etishdagi alohida хizmatlari OAK veb-sayti va "OAK Byulleteni" jurnalida e’lon qilinadi.

22. Ushbu Nizomni qoʻllashda yuzaga keladigan nizolar qonun hujjatlarida belgilangan tartibda hal etiladi.

Qonun hujjatlari ma’lumotlari milliy bazasi (www.lex.uz),

2020 yil 10 fevral

"Oʻzbekiston Respublikasi qonun hujjatlari toʻplami",

2020 yil 17 fevral, 6-son, 64-modda