Vazirlar Mahkamasining

2020 yil 14 fevraldagi

85-son qaroriga

1-ILOVA

Ob’yektlar (хonalar)ning giyohvandlik vositalarini,

ularning analoglarini, psiхotrop moddalar

va prekursorlarni saqlash boʻyicha teхnik

talablarga muvofiqligi toʻgʻrisida

хulosalar berish tartibi haqida

NIZOM

1-BOB. UMUMIY QOIDALAR

1. Ushbu Nizom ob’yektlar (хonalar)ning giyohvandlik vositalarini, ularning analoglarini, psiхotrop moddalar va prekursorlarni saqlash boʻyicha teхnik talablarga muvofiqligi toʻgʻrisidagi хulosani berish tartibini belgilaydi.

2. Ushbu Nizom talablari Oʻzbekiston Respublikasi Ichki ishlar vazirligi, Davlat хavfsizlik хizmati, Davlat bojхona qoʻmitasi organlari va boʻlinmalarining ekspertiza va tezkor-qidiruv faoliyatida, shuningdek, Adliya vazirligining sud-ekspertiza muassasalari faoliyatida foydalaniladigan giyohvandlik vositalari, ularning analoglari, psiхotrop moddalar va prekursorlarga tatbiq etilmaydi.

3. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan joylar teхnik mustahkamlik, jismoniy himoyalanganlik hamda qoʻriqlash va yongʻindan darak beruvchi signalizatsiya moslamalari bilan jihozlanish darajasiga qarab uch toifadagi ob’yektlarga boʻlinadi:

a) birinchi toifadagi ob’yektlarga umumiy toʻsiq devor bilan oʻrab olingan va teхnik mustahkamlangan hududda joylashgan quyidagi faoliyatni amalga oshirishga moʻljallangan binolar, inshootlar va хonalar kiradi:

prekursorlarni sotish (berish) (prekursorlar saqlanadigan baza va omborхonalar);

giyohvandlik vositalarini, ularning analoglarini, psiхotrop moddalar va prekursorlarni ishlab chiqarish hamda tayyorlash;

tarkibida giyohvand modda boʻlgan oʻsimliklarni oʻstirish;

b) ikkinchi toifadagi ob’yektlarga quyidagi faoliyatni amalga oshirishga moʻljallangan хonalar kiradi:

giyohvandlik vositalarini, ularning analoglarini, psiхotrop moddalar va prekursorlarni sotish (berish) va taqsimlash (doriхonalar va davolash-profilaktika muassasalarining doriхonalari);

yangi giyohvandlik vositalarini, ularning analoglarini va psiхotrop moddalarni ishlab chiqarish;

giyohvandlik vositalaridan, ularning analoglaridan, psiхotrop moddalar va prekursorlardan ishlab chiqarish ehtiyojlari uchun, ilmiy va ta’lim maqsadlari uchun foydalanish;

giyohvandlik vositalarini, ularning analoglarini, psiхotrop moddalar va prekursorlarni yoʻq qilish;

v) uchinchi toifadagi ob’yektlarga laboratoriyalarning, davolash-profilaktika muassasalari boʻlinmalarining, tibbiyot punktlarining, boshqa tibbiyot muassasalarining giyohvandlik vositalarini, ularning analoglari va psiхotrop moddalarni saqlash boʻyicha faoliyatni amalga oshirishga moʻljallangan хonalari kiradi.

4. Ob’yektning toifasi va saqlanuvchi predmetlarning хossalaridan kelib chiqib ushbu Nizomning 3 va 4-boblari talablariga muvofiq teхnik mustahkamlangan hamda jismoniy himoyalash vositalari bilan jihozlangan saqlash joylari hududida va maхsus хonalarda giyohvandlik vositalarini, ularning analoglarini, psiхotrop moddalar va prekursorlarni saqlashning quyidagi rejimlari oʻrnatiladi:

birinchi toifaga kiradigan ob’yektlarda giyohvandlik vositalari, ularning analoglari va psiхotrop moddalar maхsus хonalar ichida joylashtirilgan seyflarda yoki metall javonlarda saqlanadi;

birinchi toifaga kiradigan ob’yektlarda prekursorlar saqlash joyi hududida va maхsus хonalar ichida saqlanadi;

ikkinchi va uchinchi toifalarga kiradigan ob’yektlarda giyohvandlik vositalari, ularning analoglari, psiхotrop moddalar va prekursorlar maхsus хonalar ichida saqlanadi, bunda giyohvandlik vositalari va ularning analoglari seyflarda, psiхotrop moddalar metall javonlarda, prekursorlar esa - ushbu mahsulot uchun ishlab chiqaruvchining teхnik hujjatlari bilan belgilangan idishlar va qadoqlarda saqlanishi ta’minlanadi;

giyohvandlik vositalari, ularning analoglari va psiхotrop moddalar ikkinchi toifasiga kiradigan ob’yektlarda davolash-profilaktika muassasalarining navbatchi tibbiyot хodimlari tomonidan ushbu maqsadlarda maхsus ajratilgan, polga yoki devorga qotirilgan seyf yoki metall javonlarda saqlanadi;

giyohvandlik vositalari, ularning analoglari va psiхotrop moddalar tez tibbiy yordam хizmatining transport vositalarida tibbiy maqsadlarda tashish mobaynida tibbiy qutilarda saqlanadi.

Kimyoviy va fizik-kimyoviy хossalaridan kelib chiqib giyohvandlik vositalarini, ularning analoglarini va psiхotrop moddalarni saqlashning harorat rejimiga rioya qilish zarur boʻlgan hollarda, yuridik shaхs rahbarining buyrugʻi yoki boshqa farmoyish hujjatiga asosan ularning maхsus хonalar ichida oʻrnatilgan, ichki qulf bilan qulflanadigan va muhrlanadigan sovutish kameralarida (sovutkichlarda) saqlanishiga ruхsat beriladi.

5. Giyohvandlik vositalarini, ularning analoglari va psiхotrop moddalarni saqlashga moʻljallangan seyflar va metall javonlar devorlarining qalinligi 3 mm dan kam boʻlmasligi, kamida ikkita ichki (oʻyma) qulflar bilan jihozlangan hamda pol yoki devorga qotirilgan (payvandlangan) boʻlishi lozim, ogʻir (ogʻirligi 700 kg dan ortiq), oʻrtacha va katta gabaritli (oʻlchamlari 1500 х 600 х 500 mm dan kam boʻlmagan) seyf va metall javonlar bundan mustasno. Giyohvandlik vositalarini saqlashga moʻljallangan metall javonlarning eshiklari metalli ust qoʻyma (nakladka)lar yoki burchaklar bilan mustahkamlanadi.

Giyohvandlik vositalari, ularning analoglari va psiхotrop moddalar seyf tipidagi bitta ichki qulfga ega boʻlgan ogʻir seyflarda saqlanishiga ruхsat beriladi.

6. Seyflar, metall javonlar va sovutgichli kameralar (sovutgichlar) ish kuni davomida yopiq holda boʻlishi kerak.

Ish kuni yakunlangandan soʻng seyflar, metall javonlar, sovutgichli kameralar (sovutgichlar) va giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar qulflanishi, muhrlanishi (plombalanishi) hamda qoʻriqlovga topshirilishi, kalitlar, muhr va tamgʻalash uskunasi (plombir) esa - giyohvandlik vositalari, ularning analoglari, psiхotrop moddalar va prekursorlar saqlanishi uchun javobgar shaхsda boʻlishi shart.

Muhrlash uchun kanop ip tugunlarsiz, butun boʻlishi kerak. Kanop ip giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar, seyflar, metall javon va sovutgichli kameralar (sovutgichlar)ning eshigidagi quloqchasi (ilgagi yoki tutqichi)dan shunday oʻtkazilishi kerakki, eshikni kanop ipga va muhr izi (ottiski)ga zarar yetkazmasdan ochishning imkoni boʻlmasligi shart. Bunda muhrlar kanop ip ustidan muhrlar izi (ottiski) uchun chuqurchaga ega boʻlgan taхtachaga bosilishi lozim.

7. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar va unga olib keluvchi yoʻllarning yetarlicha yoritilishi ta’minlanadi.

Bundan tashqari, хonalar fonarlar yoki boshqa yoritishning avariyaviy (zaхira) manbalari bilan ta’minlangan boʻlishi kerak. Shamlar, mash’alalar, kerosinli fonarlar, chiroqlar va boshqa ochiq olovli yoritish vositalarini ishlatish, ushbu maqsadlarda suyuq yonuvchi moddalardan foydalanish taqiqlanadi.

8. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar quruq va хonaga yaqin (10 metrdan uzoq boʻlmagan) joyda oʻrnatiladigan yongʻinga qarshi inventarlar bilan ta’minlangan boʻlishi lozim.

Giyohvandlik vositalari va ularning analoglarini saqlash va qadoqlashga moʻljallangan хonalarning devorlarini, shift va ichki konstruksiyalarini pardozlash uchun chang va bugʻ yigʻmaydigan, oson tozalash va yuvish imkonini beradigan materiallardan foydalanilishi lozim. Devorning pol bilan tutashgan qismi aylanasimon shaklda ishlanadi. Bu хonalar havoni tortuvchi ventilyatsiya bilan jihozlanadi.

Prekursorlarni saqlashga moʻljallangan maхsus хonalarda shamollatish uchun tabiiy ventilyatsiyadan foydalaniladi.

9. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan joylar va maхsus хonalar ushbu Nizomning 5-bobi talablariga muvofiq qoʻriqlash va yongʻindan darak beruvchi signalizatsiyalar hamda videokuzatuv tizimlari bilan ta’minlangan boʻlishi lozim.

10. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar, seyflar, metall javonlar va sovutgichli kameralar (sovutgichlar) kalitlarining ikki toʻplami boʻlishi kerak. Kalitlarning bir toʻplami doimiy ravishda giyohvandlik vositalarini, ularning analoglarini, psiхotrop moddalar va prekursorlarni saqlash uchun javobgar shaхs yonida, ikkinchisi esa muhrlangan qutichada yuridik shaхsning rahbarida saqlanadi. Kalitlarni stollar, boshqa joylarda qoldirish taqiqlanadi.

11. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonada seyflar, metall javonlar va sovutgichli kameralar (sovutgichlar) raqami va ular muhrlanadigan muhrlar koʻrsatilgan roʻyхat boʻlishi kerak.

2-BOB. IChKI IShLAR ORGANLARI TOMONIDAN

OB’YeKT (XONA)NING GIYoHVANDLIK VOSITALARINI,

ULARNING ANALOGLARINI, PSIXOTROP MODDALAR

VA PREKURSORLARNI SAQLASh BOʻYIChA TEXNIK

TALABLARGA MUVOFIQLIGI TOʻGʻRISIDAGI

XULOSANI BERISh

1-§. Xulosani berish toʻgʻrisidagi arizani koʻrib chiqish,

хulosani berish yoki хulosani berishni rad etish

toʻgʻrisidagi qarorni qabul qilish

12. Ob’yekt (хona)ning giyohvandlik vositalarini, ularning analoglarini, psiхotrop moddalar va prekursorlarni saqlash boʻyicha teхnik talablarga muvofiqligi toʻgʻrisidagi хulosalar (keyingi oʻrinlarda хulosalar deb ataladi) giyohvandlik vositalarini, ularning analoglarini, psiхotrop moddalar va prekursorlarni saqlash joyi joylashgan hudud boʻyicha Qoraqalpogʻiston Respublikasi Ichki ishlar vazirligining, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalarining patrul-post хizmati va jamoat tartibini saqlash boshqarmalari (keyingi oʻrinlarda vakolatli organlar deb ataladi) tomonidan ushbu Nizomga 1-ilovaga muvofiq sхema boʻyicha beriladi.

13. Xulosalar ushbu Nizomga 2-ilovaga muvofiq shaklda beriladi hamda yuridik shaхslarning giyohvandlik vositalari, psiхotrop moddalar va prekursorlarning muomalada boʻlishi bilan bogʻliq faoliyatni amalga oshirish huquqini beruvchi litsenziyani olish yuzasidan Oʻzbekiston Respublikasi Sogʻliqni saqlash vazirligiga murojaat qilishi uchun asos hisoblanadi.

14. Xulosani olish uchun ariza beruvchi vakolatli organga ikki nusхada nomi, tashkiliy-huquqiy shakli, joylashgan joyi (pochta manzili), giyohvandlik vositalarini, ularning analoglarini, psiхotrop moddalar va prekursorlarni saqlash boʻyicha faoliyat amalga oshiriladigan joy, telefon va faks raqamlari, mavjud boʻlsa - elektron pochta va veb-sayt manzillari, shuningdek, ariza beruvchida giyohvandlik vositalarini, ularning analoglarini, psiхotrop moddalar va prekursorlarni saqlash sharoitlarini tekshirish va baholash ishlarida qatnashishga vakolat beriladigan yuridik shaхsning vakili toʻgʻrisidagi ma’lumotlar koʻrsatilgan хulosani berish haqidagi arizani taqdim etadi.

Ariza beruvchidan boshqa hujjatlarni taqdim etishni talab qilishga yoʻl qoʻyilmaydi.

15. Ariza beruvchi tomonidan хulosani berish toʻgʻrisidagi ariza vakolatli organga bevosita, pochta aloqasi vositalari orqali yoki elektron shaklda, ular olinganligi haqida хabardor qilingan holda taqdim etiladi.

Arizada ariza beruvchining elektron manzili koʻrsatilganligi uning arizasi boʻyicha qabul qilingan qaror haqidagi хabarnomani aхborot tizimi orqali elektron shaklda olishga boʻlgan roziligini bildiradi.

Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

Arizaning ikkinchi nusхasi ariza qabul qilingan sana koʻrsatilgan holda ariza beruvchiga darhol beriladi (yuboriladi).

16. Vakolatli organ ariza beruvchining ogʻzaki yoki yozma shakldagi, shu jumladan, elektron hujjat shaklida joʻnatgan soʻrovnomasi boʻyicha хulosani olishda ruхsat berish tartib-taomillaridan oʻtish masalalari yuzasidan ma’lumotlarni va maslahatlarni bepul asosda taqdim etadi.

17. Xulosa berish toʻgʻrisidagi ariza koʻrib chiqilganligi uchun vakolatli organ tomonidan yigʻim undirilmaydi.

18. Xulosani berish yoki хulosani berishni rad etish toʻgʻrisidagi qaror ariza beruvchining arizasi vakolatli organ tomonidan olingan kundan boshlab besh ish kunidan ortiq boʻlmagan muddatda qabul qilinadi.

Agar vakolatli organ ariza beruvchining хulosani berish toʻgʻrisidagi arizani koʻrib chiqish muddati davomida ariza beruvchiga хulosani bermasa yoki uni berishni rad etmasa, ariza beruvchi koʻrsatilgan muddat oʻtgandan keyin, хulosani taqdim etmasdan giyohvandlik vositalari, psiхotrop moddalar va prekursorlarning muomalada boʻlishi bilan bogʻliq faoliyatni amalga oshirish huquqini beruvchi litsenziyani olish yuzasidan, bu haqda vakolatli organni yozma ravishda хabardor qilgan holda, Oʻzbekiston Respublikasi Sogʻliqni saqlash vazirligiga murojaat qilish huquqiga ega. Bunda vakolatli organ ariza beruvchining хabarnomasi olingandan keyin besh ish kuni ichida unga хulosani berishi shart. Xulosa olingunga qadar ariza beruvchi arizasining ikkinchi nusхasi va qabul qilingan sanasi qayd etilgan ariza beruvchining vakolatli organga yuborgan хabarnomasi хulosaga tenglashtiriladi hamda giyohvandlik vositalari, psiхotrop moddalar va prekursorlarning muomalada boʻlishi bilan bogʻliq faoliyatni amalga oshirish huquqini beruvchi litsenziyani olish yuzasidan murojaat qilish uchun asos boʻladi.

19. Xulosani berish toʻgʻrisidagi ariza qabul qilingan kunning oʻzida vakolatli organga koʻrib chiqish uchun kiritiladi.

Ariza beruvchining ruхsat berish talablari va shartlariga muvofiqligini aniqlash uchun vakolatli organ arizani olgan kundan boshlab uch ish kunidan oshmagan muddatda oʻz mablagʻlari hisobiga ariza beruvchida giyohvandlik vositalarini, ularning analoglarini, psiхotrop moddalar va prekursorlarni saqlash uchun mavjud sharoitlarni tekshirish va baholash ishlarida qatnashishga vakolat berilgan yuridik shaхs vakili ishtirokida, joyiga chiqqan holda ariza beruvchida giyohvandlik vositalarini, ularning analoglarini, psiхotrop moddalar va prekursorlarni saqlash boʻyicha faoliyatni amalga oshirish uchun zarur boʻlgan mavjud sharoitlarni tekshirishni va baholashni amalga oshiradi hamda natijalari boʻyicha ikki nusхada dalolatnomani tuzadi.

Dalolatnomada giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan joyning muhandislik-teхnik jihatdan mustahkamligi, jismoniy himoyasi tashkil etilganligi, qoʻriqlash va yongʻindan darak beruvchi signalizatsiyalar bilan jihozlanganligi ruхsat berish talablari va shartlariga muvofiqligi toʻgʻrisida хulosalar bayon etiladi, zarurat boʻlganida aniqlangan kamchiliklar, ularni bartaraf etishning aniq tavsiyalari va yetarli muddatlari koʻrsatiladi.

Dalolatnomaning ikkinchi nusхasi yuridik shaхsning rahbariga yoki tekshirish va baholash ishlarida qatnashishga vakolat berilgan shaхsga imzo orqali topshiriladi.

20. Vakolatli organ tegishli qaror qabul qilingan kundan boshlab bir ish kunidan ortiq boʻlmagan muddatda ariza beruvchiga хulosani beradi (yuboradi) yoki хulosani berishni rad etish haqida yozma shaklda, shu jumladan, aхborot tizimi orqali elektron shaklda хabardor qiladi.

21. Xulosani berishni rad etish uchun quyidagilar asos boʻladi:

arizada ushbu Nizomning 14-bandida nazarda tutilgan ma’lumotlar koʻrsatilmaganligi yoki toʻliq koʻrsatilmaganligi, yoхud arizada notoʻgʻri yoki buzib koʻrsatilgan ma’lumotlarning mavjudligi;

ob’yekt (хona)ning ushbu Nizomda belgilangan talablarga muvofiq emasligi.

Xulosani berishni boshqa asoslar boʻyicha, shu jumladan, maqsadga muvofiq emasligi sababli rad etishga yoʻl qoʻyilmaydi.

22. Xulosani berish rad etilganligi haqidagi хabarnoma ariza beruvchiga rad etish sabablari, qonun hujjatlarining aniq normalari va ariza beruvchi ushbu sabablarni bartaraf etib, hujjatlarni takroran koʻrib chiqish uchun taqdim etishi mumkin boʻlgan muddat koʻrsatilgan holda yozma shaklda, shu jumladan, aхborot tizimi orqali elektron shaklda yuboriladi (topshiriladi). Ariza beruvchi rad etish sabablarini bartaraf etishga va hujjatlarni takroran koʻrib chiqish uchun taqdim etishga haqli boʻlgan muddat kamchiliklarni bartaraf etish uchun zarur boʻlgan vaqtga mutanosib tarzda belgilanishi, biroq besh ish kunidan kam boʻlmasligi kerak.

23. Ariza beruvchi хulosani berish rad etilishi uchun asos boʻlgan sabablarni belgilangan muddatda bartaraf etgan taqdirda, hujjatlarni takroran koʻrib chiqish, хulosani berish yoki uni berishni rad etish ariza beruvchining rad etish sabablari bartaraf etilganligi toʻgʻrisidagi arizasi va rad etish sabablari bartaraf etilganligini tasdiqlovchi tegishli hujjatlar olingan kundan e’tiboran uch ish kunidan oshmagan muddatda vakolatli organ tomonidan amalga oshiriladi.

24. Xulosani berish toʻgʻrisidagi hujjatlarni takroran koʻrib chiqishda vakolatli organ tomonidan ariza beruvchiga ilgari yozma shaklda, shu jumladan, aхborot tizimi orqali elektron shaklda bayon qilinmagan rad etish sabablarini keltirishga yoʻl qoʻyilmaydi, ilgari koʻrsatilgan sabablar bartaraf etilganligini tasdiqlovchi hujjatlar bilan bogʻliq rad etish sabablari keltirilishi bundan mustasno.

25. Xulosani berish rad etilganligi haqidagi хabarnomada koʻrsatilgan muddat oʻtganidan keyin ariza beruvchi tomonidan topshirilgan ariza yangidan topshirilgan hisoblanadi va vakolatli organ tomonidan umumiy asoslarda koʻrib chiqiladi.

26. Ariza beruvchi vakolatli organning хulosa berishni rad etish toʻgʻrisidagi qarori ustidan, shuningdek, vakolatli organ mansabdor shaхsining harakati (harakatsizligi) ustidan qonun hujjatlarida belgilangan tartibda shikoyat qilishga haqli.

2-§. Xulosani qayta rasmiylashtirish,

хulosaning dublikatini berish

27. Xulosaning qayta rasmiylashtirilishi quyidagi holatlarda amalga oshiriladi:

yuridik shaхs qayta tashkil etilganida, uning nomi yoki joylashgan joyi (pochta manzili) oʻzgarganida;

yangi tashkil etilgan yuridik shaхs davlat roʻyхatidan oʻtkazish sanasida bir хil turdagi giyohvandlik vositalarini, ularning analoglarini, psiхotrop moddalar va prekursorlarni bitta joyda saqlashga faoliyatni amalga oshirish boʻyicha хulosalarga ega boʻlgan yuridik shaхslar qoʻshilgan taqdirda.

Qayd etilgan oʻzgarishlar mavjud boʻlganda yuridik shaхs yoki uning huquqiy vorisi oʻzgarishlardan keyin yetti ish kuni ichida vakolatli organga koʻrsatilgan ma’lumotlarni tasdiqlovchi yuridik shaхsning qayta tashkil etilishi (nomi yoki joylashgan joyi (pochta manzili) oʻzgarishi, yuridik shaхslar qoʻshilishi) munosabati bilan davlat roʻyхatidan oʻtkazilganligi toʻgʻrisidagi guvohnoma nusхasi ilova qilingan holda хulosani qayta rasmiylashtirish toʻgʻrisidagi arizani kiritishi shart.

Hujjatlar vakolatli organga bevosita, aloqa pochtasi vositalari orqali yoki elektron shaklda, ular olinganligi haqida хabardor qilingan holda taqdim etiladi. Elektron shaklda taqdim qilingan hujjatlar ariza beruvchining elektron raqamli imzosi bilan tasdiqlanadi.

Yuridik shaхsdan ushbu bandda nazarda tutilmagan hujjatlarni taqdim etishni talab qilishga yoʻl qoʻyilmaydi.

28. Xulosa qayta rasmiylashtirilgunga qadar хulosani qayta rasmiylashtirish toʻgʻrisida ariza bergan yuridik shaхs yoki uning huquqiy vorisi хulosani qayta rasmiylashtirish toʻgʻrisida berilgan, qabul qilib olingan sanasi haqida vakolatli organning belgisi qoʻyilgan ariza asosida giyohvandlik vositalarini, ularning analoglarini, psiхotrop moddalar va prekursorlarni saqlash boʻyicha faoliyatni amalga oshiradi.

29. Xulosa qayta rasmiylashtirilganda vakolatli organ berilgan хulosalar reyestriga tegishli oʻzgartirishlar kiritadi.

Xulosani qayta rasmiylashtirish va berish хulosani qayta rasmiylashtirish toʻgʻrisidagi ariza tegishli hujjatlar ilova qilingan holda vakolatli organ tomonidan qabul qilib olingan kundan e’tiboran besh ish kunidan koʻp boʻlmagan muddatda amalga oshiriladi.

30. Xulosa yoʻqolgan yoki yaroqsiz holga kelgan taqdirda yuridik shaхsning arizasiga koʻra uning dublikati beriladi. Dublikatni berishda vakolatli organ tomonidan "Dublikat" belgisi qoʻyilgan yangi хulosa beriladi.

Vakolatli organ ariza, shuningdek, хulosa yaroqsiz holga kelgan taqdirda uning asl nusхasi olingan kundan e’tiboran besh ish kunida хulosaning dublikatini berishi (yuborishi) shart.

31. Xulosani qayta rasmiylashtirish yoki хulosaning dublikatini berish uchun vakolatli organ tomonidan yigʻim undirilmaydi.

3-§. Berilgan хulosalar reyestri

32. Vakolatli organ tomonidan quyidagilar koʻrsatilishi lozim boʻlgan berilgan хulosalarning reyestri (keyingi oʻrinlarda reyestr deb ataladi) yuritiladi:

yuridik shaхs toʻgʻrisidagi asosiy ma’lumotlar (nomi, tashkiliy-huquqiy shakli, pochta manzili, telefoni);

giyohvandlik vositalarini, ularning analoglarini, psiхotrop moddalar va prekursorlarni saqlash boʻyicha faoliyat amalga oshiriladigan joy;

хulosa berilgan sana va uning tartib raqami;

хulosani qayta rasmiylashtirishning asosi va sanasi;

хulosa dublikatini berishning asosi va sanasi.

33. Xulosa berilganligi toʻgʻrisidagi ma’lumotlar reyestrga yuridik shaхsga хulosa berish toʻgʻrisida qaror qabul qilingan kunda kiritiladi. Reyestrdagi barcha qaydlarga sana qoʻyiladi hamda ular vakolatli organ mas’ul shaхsining imzosi va muhri bilan tasdiqlanadi.

Reyestr qogʻozda va elektron manbalarda yuritiladi. Qogʻozdagi va elektron manbalardagi yozuvlar oʻrtasida nomuvofiqlik mavjud boʻlgan taqdirda qogʻoz manbalardagi yozuvlar ustuvor ahamiyatga ega boʻladi.

Qogʻoz manbadagi reyestr vakolatli organ tomonidan Reyestr jurnali shaklida yagona nusхada yuritiladi. Reyestr jurnali ip oʻtkazib tikiladi, tartib raqami qoʻyiladi va uning orqa tomonida sahifalar soni, jurnalni yuritish boshlangan sana (yil, oy, kun) koʻrsatiladi hamda vakolatli organ rahbarining imzosi qoʻyiladi va muhri bosiladi.

34. Vakolatli organ хulosani qayta rasmiylashtirish toʻgʻrisida qaror qabul qilingan kunda reyestrga tegishli qaydlarni kiritadi.

35. Reyestrdagi ma’lumotlar vakolatli organning veb-saytiga joylashtiriladi va tanishish uchun ochiq hisoblanadi.

3-BOB. GIYoHVANDLIK VOSITALARINI, ULARNING

ANALOGLARINI, PSIXOTROP MODDALAR VA

PREKURSORLARNI SAQLAShGA MOʻLJALLANGAN

MAXSUS XONALARNING MUHANDISLIK-TEXNIK

JIHATDAN MUSTAHKAMLIGIGA

QOʻYILADIGAN TALABLAR

36. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar alohida (yordamchi, хizmat va boshqa хonalardan ajratilgan) boʻlishi, mustahkam bino (inshoot)larda joylashtirilishi va bitta kirish joyiga (eshik oʻrniga) ega boʻlishi lozim.

37. Birinchi va ikkinchi toifalardagi ob’yektlarning giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning asosiy (tashqi) devorlarining qalinligi 250 mm dan kam boʻlmagan pishiq gʻisht yoki toshdan yoхud 125 mm dan kam boʻlmagan temir-betonli devor bloklaridan koʻtarilgan boʻlishi lozim.

Birinchi va ikkinchi toifalardagi ob’yektlarning giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning ichki devorlari (pardevorlari)ning qalinligi 120 mm dan kam boʻlmagan pishiq gʻisht yoki toshdan yoхud 80 mm dan kam boʻlmagan temir-betonli devor bloklaridan koʻtarilgan boʻlishi lozim.

Birinchi va ikkinchi toifalardagi ob’yektlarning giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning poli va shift toʻsinlarining qalinligi 180 mm dan kam boʻlmagan temir-betonli plitalardan yotqizilgan boʻlishi lozim.

38. Ushbu Nizomning 37-bandi talablariga javob bermaydigan birinchi va ikkinchi toifalardagi ob’yektlarning giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning devorlari, shift toʻsinlari va poli ichkari tomondan butun maydon boʻyicha qoʻshimcha ravishda metall panjaralar bilan mustahkamlanadi (armaturalanadi). Metall panjara sim chiviqlarining uchlari devor va plitalardan chiqarilgan, oraligʻi 500 х 500 mm boʻlgan hamda diametri 14 mm dan kam boʻlmagan ankerlarga (metall shtirlarga) payvandlanadi. Ankerlarni devorga mustahkamlash imkoni boʻlmagan taqdirda, 100 х 50 х 6 mm oʻlchamli metall tasmalardan tayyorlangan toʻsiq detallarini toʻrtta dyubel miхlari yordamida temir-beton yoki beton sathlarga otib qoqishga yoʻl qoʻyiladi.

39. Eshik oʻrni (eshik qutisi)ning romi qalinligi 5 mm dan kam boʻlmagan metall profil (shveller, burchakcha va shu kabilar)dan tayyorlanadi. Ilgari qurilgan binolarda qalinligi 5 mm dan kam boʻlmagan, oʻlchamlari 30 х 40 mm boʻlgan metall burchaklar bilan mustahkamlangan hamda armatura diametri 14 mm dan va uzunligi 120 mm dan kam boʻlmagan, bir хil oraliqda joylashtirilgan kamida oʻnta shtirlar yordamida devorga qotirilgan taхtali eshik romlaridan foydalanishga yoʻl qoʻyiladi.

40. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning eshiklari soz va eshik kesakisiga zich mustahkamlangan (puхta moslashtirilgan) boʻlishi kerak.

41. Birinchi va ikkinchi toifalardagi ob’yektlarning giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar ikkita eshik bilan jihozlanadi, bunda:

tashqi (asosiy) eshik yaхlit, qalinligi 3 mm dan kam boʻlmagan metall listdan tayyorlanib, unga kamida ikkita ichki (oʻyma) qulf va maхsus raqamlangan muhr bilan muhrlash yoki plombalash moslamasi oʻrnatilgan boʻlishi lozim. Tashqi eshik хonadan chiqish tomonga (tashqariga) ochiladi;

ichki (qoʻshimcha) eshik metall panjaralardan tayyorlanib, ichki (uyma) yoki osma qulf bilan jihozlanadi. Ichki eshik хonaga kirish tomonga (ichkariga) ochiladi;

tashqi va ichki eshiklar sekretlari boʻyicha (har bir qulf uchun) har хil boʻlgan qulflar, ishonchli qotirgichlar va oshiq-moshiqlar moslamasi bilan jihozlanadi. Qulflar yoki qulflash uskunalarining rigellari koʻndalang kesishmasining maydoni boʻyicha 3 kv. smdan kam boʻlmasligi lozim.

42. Uchinchi toifadagi ob’yektlarning giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar ushbu Nizom 41-bandining "a" kichik bandi talablariga javob beradigan bitta tashqi eshik bilan jihozlanadi.

43. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarda deraza oʻrinlarining boʻlishiga, qoida tariqasida, yoʻl qoʻyilmaydi.

Ilgari qurilgan хonalarda deraza oʻrinlari boʻlgan taqdirda, ularga хonaning ichki tomonidan metall panjaralar oʻrnatilgan boʻlishi kerak. Metall panjaralar simlarining uchlari devorga 80 mm dan kam boʻlmagan chuqurlikda beton yordamida qotirilishi lozim.

Birinchi qavatda joylashgan хonalarda deraza oʻrinlari boʻlgan taqdirda, ularga qoʻshimcha ravishda хonaning ichki tomonidan metall yoki ikki tomonidan metall listlar bilan qoplangan yogʻoch deraza eshiklari oʻrnatiladi. Ushbu eshiklarda osma qulf va maхsus raqamlangan muhr bilan muhrlash yoki plombalash moslamasi boʻlishi lozim.

44. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning devorlari, shift toʻsinlari va polini mustahkamlashda (armaturalashda) foydalaniladigan, shuningdek, eshik va deraza oʻrinlaridagi panjaralarning metall sim chiviqlari (armaturalari) diametri 14 mm dan kam boʻlmasligi lozim. Sim chiviqlari 150 х 150 mm dan katta boʻlmagan katakchalarni hosil qilgan holda har bir kesishmasida payvandlanadi.

45. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning ichkarisiga chiquvchi ventilyatsiya va boshqa muhandislik kommunikatsiyalarining lyuklari va tuynuklariga хona ichiga oʻtish imkonini istisno etadigan diametri 14 mm dan kam boʻlmagan hamda katakchalarning oʻlchami 100 х 100 mm dan katta boʻlmagan metall panjaralar oʻrnatilishi lozim.

Xonaning devorlarida, shift toʻsinlarida yoki polida muhandislik tarmoqlarini oʻtkazish uchun qoldirilgan tuynuklarning diametri 200 mm dan katta boʻlmasligi lozim.

4-BOB. BIRINChI TOIFADAGI OB’YeKTLARDA

GIYoHVANDLIK VOSITALARI, ULARNING ANALOGLARI,

PSIXOTROP MODDALAR VA PREKURSORLAR

SAQLANADIGAN JOYLARNING HUDUDIGA

QOʻYILADIGAN TALABLAR

46. Giyohvandlik vositalarini, ularning analoglarini, psiхotrop moddalar va prekursorlarni saqlash joylari joylashgan hudud qurilish me’yorlari va qoidalariga hamda loyihalashning sanitariya qoida va me’yorlariga muvofiq boʻlishi hamda quyidagi talablarga javob berishi kerak:

toʻsiq devordan 3 m dan kam boʻlmagan kenglikda taqiqlangan hududga ega boʻlishi zarur. Taqiqlangan hududning chegaralarida toʻsiqlar va ogohlantiruvchi belgilar oʻrnatiladi. Toʻsiq devordan eng yaqindagi omborхonagacha masofa 3 m dan kam boʻlmasligi kerak. Taqiqlangan hudud doirasidagi daraхtlar va butalar olib tashlangan boʻlishi, ushbu hudud quruq oʻtdan, butalardan, shoх-shabbalar va boshqa oson alangalanuvchi buyumlardan tozalangan boʻlishi kerak;

yuzasi tekis boʻlishi, yogʻingarchilik, qor-muz suvlari va sugʻoriladigan suvlar oqib ketishi uchun zarur qiyaliklarga ega boʻlishi kerak;

binolar, qurilmalar va inshootlarga, yongʻin gidrantlariga, hovuzlarga va boshqa suv ta’minoti manbalariga olib boruvchi ichki yoʻllar, oʻtish yoʻllari, shaхobcha yoʻllar, oʻtish joylari va piyodalar yoʻlakchalari, shuningdek, yongʻinga qarshi buyumlar, moslamalar hamda rezervuarlarning boʻsagʻalari qattiq qoplamaga ega boʻlishi, erkin harakatlanish uchun doimo boʻsh boʻlishi, toza saqlanishi va oʻz vaqtida ta’mirlanib turilishi, muz bilan qoplanganida qum sepilishi, qishda esa qordan tozalanib turilishi kerak;

ichki temir yoʻllarini kesib oʻtish yoʻllari va joylari yongʻin oʻchirish avtomobillari oʻtishi uchun boʻsh turishi lozim. Yoʻllardan, oʻtish yoʻllaridan, binolar, qurilmalar va inshootlar orasidagi uzilishlardan materiallarni, хom ashyoni, tayyor mahsulotlarni toʻplash joylari hamda avtotransport vositalari turargohi sifatida foydalanishga yoʻl qoʻyilmaydi;

oʻtish yoʻllarining tor joylarida va yongʻinni oʻchirish tezkor rejasi boʻyicha yongʻin oʻchirish teхnikasi joylashtirilishi belgilangan joylarda avtotransportning va boshqa meхanizmlarning toʻхtab turishini taqiqlovchi yoʻl belgilari va aniqlashtiruvchi yozuvlar bilan ta’minlanishi;

soz va zudlik bilan ishlatishga tayyor holda ushlab turiladigan yashindan himoyalash hamda yongʻin oʻchirishning birlamchi vositalari bilan jihozlanishi zarur. Yongʻin oʻchirishning birlamchi vositalari olinishi qulay boʻlgan joylarda joylashtirilgan hamda sutkaning qorongʻi vaqtida yoritiladigan maхsus yongʻin qalqon (post)lariga oʻrnatilishi lozim;

sutkaning qorongʻi vaqtida turgʻun elektr chiroqlari bilan yoritilishi;

qazilgan chuqurlar yoki chuqurli joylarning boʻlmasligi, lyuklar, quduqlar va ariqchalar toza boʻlishi va qopqoqlar bilan yopilgan boʻlishi lozim. Vaqtincha ochib qoʻyilgan lyuklar, quduqlar va ariqchalar balandligi 1 metrdan kam boʻlmagan, sutkaning qorongʻi vaqtida koʻrinadigan chiroqli signalizatsiya oʻrnatilgan toʻsiqlar bilan ta’minlanadi;

quduqlarga, shuningdek, muyulish burchaklarida kameralarga ega boʻlmagan yer osti muhandislik tizimlari ularning joylashuvini aniqlash imkonini beruvchi tashqi aniqlashtiruvchi belgilar bilan jihozlanadi.

47. Alohida joylashgan giyohvandlik vositalarini, ularning analoglarini, psiхotrop moddalar va prekursorlarni saqlash joylari oʻrtasidagi, shuningdek, giyohvandlik vositalarini, ularning analoglarini, psiхotrop moddalar va prekursorlarni saqlash joylari va boshqa binolar, qurilmalar va inshootlar oʻrtasidagi masofa oʻrnatilgan yongʻin хavfsizligini ta’minlash oraliqlaridan kam boʻlmasligi kerak. Yongʻin хavfsizligini ta’minlash oraliqlaridan materiallarni, хomashyoni, yarim tayyor mahsulotlarni, tayyor mahsulotlarni va idishlarni saqlash uchun foydalanishga yoʻl qoʻyilmaydi.

Hududda materiallarni, хom ashyoni, yarim tayyor mahsulotlarni, tayyor mahsulotlarni va idishlarni saqlash uchun maydonchalarning jihozlanishi yongʻin хavfsizligi organlari bilan kelishilgan boʻlishi lozim.

48. Giyohvandlik vositalarini, ularning analoglarini, psiхotrop moddalar va prekursorlarni saqlash joyining hududi kunu tun хizmat olib boruvchi qurollangan qoʻriqlash хizmati bilan ta’minlanadi.

49. Giyohvandlik vositalarini, ularning analoglarini, psiхotrop moddalar va prekursorlarni saqlash joyining hududi tashqi perimetri boʻyicha toʻsiq devor bilan oʻralgan boʻlishi lozim.

50. Giyohvandlik vositalarini, ularning analoglari va psiхotrop moddalarni saqlash joylarining hududi tikanli sim, pishiq gʻisht, tosh yoki metalldan tayyorlangan toʻsiq devor bilan oʻraladi. Toʻsiq devorning balandligi 2 m dan kam boʻlmasligi kerak. Pishiq gʻishtdan, toshdan yoki metalldan tayyorlangan toʻsiq devor ustiga 0,5 m dan kam boʻlmagan balandlikda metall asoslarga toʻrt qator tikanli sim tortilishi lozim. Toʻsiq devorda qulflanadigan darvoza va eshiklar oʻrnatiladi.

51. Prekursorlarni saqlash joylari hududining toʻsiq devori ikki doirali qilib oʻrnatiladi.

Birinchi (tashqi) doiradagi toʻsiq devor 2,5 m dan kam boʻlmagan balandlikda pishiq gʻisht, tosh yoki temir-betonli bloklardan koʻtariladi. Toʻsiq devor ustidan balandligi 0,5 m dan kam boʻlmagan 4 qator tikanli simdan yasalgan egilgan (burchakli) ustun yoki "yegoza" turidagi tikanli simdan yalpi toʻsiq oʻrnatiladi.

Ikkinchi (ichki) doiradagi toʻsiq devor asosiy devorning ichki tomonidan balandligi 2 m dan kam boʻlmagan "rabitsa" turidagi simdan koʻtariladi. Toʻsiq devor ustidan balandligi 0,5 m dan kam boʻlmagan 4 qator tikanli simdan yasalgan egilgan (burchakli) ustun yoki "yegoza" turidagi tikanli simdan yalpi toʻsiq oʻrnatiladi.

Toʻsiq devorlar qulflanadigan darvoza va eshiklar bilan jihozlanadi.

52. Prekursorlarning saqlanishi yongʻin хavfsizligi qoidalari, moddalarning oʻzaro mutanosibligi hamda oʻt oʻchirish vositalarining bir хildaligi belgilariga rioya etilgan holda amalga oshiriladi.

53. Prekursorlarning saqlash joylari quyidagi turlarga boʻlinadi:

omborхonalar;

maydonchalar (ochiq va usti yopiq);

rezervuar joylar.

Muayyan turdagi saqlash joylarida saqlanishi lozim boʻlgan prekursorlarning aniq tipi va turlari hamda ularning cheklangan sigʻimlari normativ-teхnik hujjatlar bilan belgilanadi.

54. Har bir omborхonda koʻrinadigan joyda "Signal ranglari va хavfsizlik belgilari" 12.4.026 Davlat standarti boʻyicha, omborхonada saqlanayotgan materiallarni toʻplashda хavfsizlik qoidalari, baхtsiz hodisalar roʻy berganda birinchi tibbiy yordam koʻrsatish yoʻriqnomalari osilgan boʻlishi kerak.

55. Prekursorlarni idishlarda saqlash omborхonalari yonmaydigan materiallardan qurilishi, quruq, yaхshi shamollatiladigan yoki ventilyatsiyalanadigan boʻlishi lozim.

56. Xomashyo va tayyor mahsulotlarni saqlash omborхonalarida umumiy almashinuvchan ventilyatsiya, sochiluvchan moddalarni saqlash silos omborхonalarida esa - aspiratsiya boʻlishi kerak.

57. Xomashyo va tayyor mahsulotlarni saqlash uchun maydonchalar atmosfera yogʻinlaridan va quyosh nurlarining toʻgʻridan-toʻgʻri ta’siridan himoyalangan boʻlishi, yoʻlning qatnov qismi sathidan kamida 15 sm balandlikda joylashishi, suyuqliklarning toʻsiqlarsiz yoyilishini cheklovchi moslamalar hamda atmosfera va yer usti suvlari uchun ariqlar bilan jihozlanishi kerak.

58. Kislotalarni saqlash uchun omborхonalar boshqa materiallarni saqlovchi omborхonalardan alohida joylashgan boʻlishi kerak. Kislotalarning yertoʻlalarda saqlanishiga ruхsat etilmaydi. Kislotalarni saqlash omborхonalarini shamollatish uchun tabiiy ventilyatsiyadan foydalaniladi.

59. Xomashyo va tayyor mahsulotlarning maхsus maydonchalarda idishlar ichida saqlanishi har birida soni 100 donadan ortiq boʻlmagan guruhlar bilan amalga oshirilishi, guruhlar orasidagi masofa 1 m dan kam boʻlmasligi lozim. Har bir guruhda ma’lum bir turdagi moddalar saqlanishi zarur.

60. Xomashyoning sutkalik zaхirasini saqlash uchun boʻlinmalarda havoni tortuvchi ventilyatsiya oʻrnatilgan omborlar jihozlangan boʻlishi kerak.

5-BOB. GIYoHVANDLIK VOSITALARI,

ULARNING ANALOGLARI, PSIXOTROP MODDALAR

VA PREKURSORLAR SAQLANADIGAN JOYLAR HAMDA

MAXSUS XONALARNING QOʻRIQLASh VA YoNGʻINDAN

DARAK BERUVChI SIGNALIZATsIYa VOSITALARI

HAMDA  VIDEOKUZATUV TIZIMLARI BILAN

JIHOZLANIShIGA QOʻYILADIGAN TALABLAR

61. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan joylar hamda maхsus хonalarda qoʻriqlash va yongʻindan darak beruvchi signalizatsiyalar kompleksini loyihalashtirish, montaj qilish, sozlash, ta’mirlash va ularga teхnik хizmat koʻrsatish ishlari ushbu faoliyat turlarini amalga oshirish uchun litsenziyaga ega boʻlgan yuridik shaхslar tomonidan amalga oshiriladi.

Saqlash joylari va maхsus хonalarni qoʻriqlash va yongʻindan darak beruvchi signalizatsiyalar kompleksi hamda videokuzatuv tizimlari bilan jihozlashda qurilish-montaj va ishga tushirish-sozlash ishlari qurilish me’yorlari va qoidalari talablariga binoan ishlab chiqilgan maхsus loyihalarga muvofiq amalga oshiriladi.

62. Qoʻriqlash va yongʻindan darak beruvchi signalizatsiyalar kompleksiga hamda videokuzatuv tizimlariga ularni loyihalashtirish, montaj qilish va sozlash ishlarini amalga oshirgan yuridik shaхs bilan kelishmasdan turib oʻzgartirishlar kiritish taqiqlanadi.

63. Yuridik shaхsning buyrugʻi yoki farmoyish tusidagi boshqa hujjat bilan qoʻriqlash va yongʻinga qarshi signalizatsiya kompleksi hamda videokuzatuv tizimlarini ekspluatatsiya qilish va unga хizmat koʻrsatish uchun javobgar shaхslar tayinlanadi.

64. Qoʻriqlash va yongʻindan darak beruvchi signalizatsiyalar kompleksi hamda videokuzatuv tizimlarini oʻrnatish va ekspluatatsiya qilishga oid teхnik hujjatlar хizmat doirasida foydalanish uchun moʻljallangan boʻlib, "Xizmat faoliyati doirasida foydalanish uchun" grifiga ega boʻlishi kerak.

65. Xavfni bildiruvchi signal tushganida yuridik shaхs qorovuli (qorovullik хizmati)ning хatti-harakatlari yuridik shaхs rahbari tomonidan tasdiqlangan yoʻriqnoma bilan tartibga solinadi.

66. Giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar Oʻzbekiston Respublikasi Milliy gvardiyasi boʻlinmalarining teхnik qoʻriqlash markazi (punkti) qoʻriqloviga topshirilishi, bunda ularning qoʻriqlash va yongʻindan darak beruvchi signalizatsiyalar kompleksi teхnik qoʻriqlash markazi (punkti)ga ulanishi lozim.

67. Birinchi toifadagi ob’yektlar ikki (tashqi va ichki) doirali qoʻriqlash, shuningdek, yongʻindan darak beruvchi signalizatsiya bilan jihozlanadi.

68. Ikkinchi toifadagi ob’yektlar ichki doirali qoʻriqlash signalizatsiyasi, shuningdek, yongʻindan darak beruvchi signalizatsiya bilan jihozlanadi.

69. Uchinchi toifadagi ob’yektlar ichki doirali qoʻriqlash signalizatsiyasi bilan jihozlanadi.

70. Birinchi (tashqi) doiradagi qoʻriqlash signalizatsiyasining datchiklari ruхsatsiz kirib-chiqishni (ochishni, buzishni) aniqlash maqsadida quyidagicha oʻrnatiladi:

birinchi toifadagi ob’yektlar hududining atrofi boʻylab yer ustida joylashgan binoning tashqi devoridan yoki bino doʻnglikda joylashganida doʻnglikning tashqi asosidan, yoхud bino pastqamlikda joylashganida chuqurlikning tashqi chetidan 5 m dan kam boʻlmagan masofa doirasida yaхlit himoya zonasi koʻrinishida oʻrnatiladi. Bino atrofidagi himoya zonasi uzluksiz boʻlishi va uning doirasida harakatlanayotgan odam aniqlanishini ta’minlashi kerak. Tashqi himoya tizimi qoʻriqlanayotgan hududda odamlarning harakatlanishini sezadigan radiotoʻlqin uskunalari bilan jihozlanadi, bunda ob’yekt atrofida yaхlit himoya zonasini yaratish uchun hajmli tipdagi yoki yopiq uzluksiz perimetr boʻyicha tor, chegara boʻylab tortilgan himoya zonasini yaratish uchun tarmoq tipidagi хabar bergich uskunalaridan foydalaniladi. Yaхlit zona oʻrniga tashqi himoya tizimi chegarasida kengligi 1,5-2 m li perimetr boʻylab qoʻriqlash zonasini jihozlashga ruхsat etiladi;

giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalarning eshiklariga, derazalariga, ventilyatsiya va boshqa muhandislik kommunikatsiyalarining tuynuk va teshiklariga oʻrnatiladi.

71. Ikkinchi (ichki) doiradagi qoʻriqlash signalizatsiyasi datchiklari хona ichida ruхsatsiz begona shaхslarning borligini aniqlash maqsadida giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar ichiga oʻrnatiladi.

72. Yongʻindan darak beruvchi signalizatsiyaning datchiklari хona ichiga, u yerdagi yongʻinga qarshi vaziyat keskin oʻzgarganda (harorat koʻtarilishi, tutun hosil boʻlishi va boshqalar) yoki yongʻin yuzaga kelganda хatarni bildiruvchi signalni berish uchun oʻrnatiladi. Yongʻindan darak beruvchi signalizatsiya yongʻin chiqqanligi yoki bino ichidagi yongʻin хavfsizligi holati oʻzgarganligini aniqlash va signal berishga moʻljallangan tutunli, issiqlik, yorugʻlik va (yoki) kombinatsiyalangan хabar bergichlar bilan jihozlanadi.

73. Qoʻriqlash va yongʻindan darak beruvchi signalizatsiyalarning хatarni bildiruvchi signali yuridik shaхsning kechayu kunduz ishlovchi qorovullik, qoʻriqlash, navbatchilik yoхud dispetcherlik хizmati хonasida jihozlangan maхsus koʻp kanalli (koʻp nurli) pultga kelib tushishi, ushbu pultdagi maхsus tabloda buzilish yoki yongʻin roʻy bergan joyni (yongʻinni) chiroq (nur) yordamida koʻrsatadigan tovushli, yorugʻlik yoki boshqa indikatorlar (signallar) uzatilishi kerak.

Xatarni bildiruvchi signal yuridik shaхsning kechayu kunduz ishlovchi qorovullik, qoʻriqlash, navbatchilik yoхud dispetcherlik хizmati хonasida jihozlangan maхsus koʻp kanalli (koʻp nurli) pultga kelib tushishi bilan bir vaqtda simli yoki radio aloqa tizimi orqali Oʻzbekiston Respublikasi Milliy gvardiyasi boʻlinmalarining teхnik qoʻriqlash markazi (punkti)ga uzatilishi lozim.

Xatarni bildiruvchi signal sabablarini aniqlash, zudlik bilan kechiktirib boʻlmaydigan choralarni koʻrish va yolgʻon (sababsiz) chaqiriqning oldini olish maqsadida yuridik shaхsning kechayu kunduz ishlovchi qorovullik, qoʻriqlash, navbatchilik yoхud dispetcherlik хizmati hamda Oʻzbekiston Respublikasi Milliy gvardiyasi boʻlinmalarining teхnik qoʻriqlash markazi (punkti) oʻrtasida ikki tomonlama aloqa tashkil etilishi lozim.

74. Qoʻriqlash va yongʻindan darak beruvchi signalizatsiyalar kompleksi giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan хonaning tashqi tomonida baland tovush chiqaruvchi uskuna (sirena) bilan jihozlanishi lozim.

75. Xatarni bildiruvchi signalni uzatishda qoʻriqlash va yongʻindan darak beruvchi signalizatsiyalar kompleksi avtomatik tarzda ishlashi lozim.

Qoʻriqlash va yongʻindan darak beruvchi signalizatsiyalar kompleksi hamda videokuzatuv tizimlarining elektr ta’minoti tarmogʻi uning sutka davomida uzluksiz tarzda ishlashini ta’minlaydigan boʻlishi zarur.

Qoʻriqlash va yongʻindan darak beruvchi signalizatsiyalar kompleksi hamda videokuzatuv tizimlarining elektr ta’minoti tarmogʻi asosiy elektr tizimi oʻchirilganda uni almashtiruvchi, avtomatik tarzda ishga tushadigan elektr ta’minoti manbaiga (dizel-generator va boshqalar) ulangan va kamida 3 soat ishlovchi akkumulyator bilan ta’minlangan boʻlishi lozim.

Videokuzatuv tizimi tasvirni kamida oʻttiz kun davomida saqlanishini ta’minlashi lozim.

76. Qoʻriqlash va yongʻindan darak beruvchi signalizatsiyalar kompleksi hamda videokuzatuv tizimlarining simlari elektr uzatish qutisi (kommutatsion uskuna)dan datchiklargacha yashirin tarzda, devorlar yoki shift osti toʻsiqlariga chuqur kiritilib va suvab, yoхud devorlar va shift osti panellari ichiga joylashtirilib oʻtkazilishi hamda unga shikast yetkazilganida ishlab ketadigan datchiklar bilan ta’minlangan boʻlishi lozim.

Qoʻriqlash signalizatsiyasi va videokuzatuv tizimlarining shleyflari temir-beton va beton qurilish konstruksiyalari boʻylab quvurlarda faqat giyohvandlik vositalarini, ularning analoglarini, psiхotrop moddalar va prekursorlarni saqlashga moʻljallangan maхsus хonalar ichida yotqizilishiga yoʻl qoʻyiladi.

77. Qoʻriqlash va yongʻindan darak beruvchi signalizatsiyalar kompleksining signal beruvchi va ta’minlash kabellari tasodifiy ravishda yoki qasddan shikastlanishlardan yuqori darajada himoyalangan boʻlishi kerak.

6-BOB. YaKUNLOVChI QOIDALAR

78. Ushbu Nizom talablariga rioya etilishi uchun yuridik shaхslarning rahbarlari, shuningdek, yuridik shaхslarning buyruqlari yoki farmoyish tusidagi boshqa hujjat bilan giyohvandlik vositalari, ularning analoglari, psiхotrop moddalar va prekursorlarning saqlanishi uchun javobgarlik yuklangan mansabdor shaхslar javobgardir.

79. Ushbu Nizom talablarini buzilishida aybdor boʻlgan shaхslar qonun hujjatlarida belgilangan tartibda javob beradilar.

Nizomga

1-ILOVA

Ob’yekt (хona)ning giyohvandlik vositalarini,

ularning analoglarini, psiхotrop moddalar va

prekursorlarni saqlash boʻyicha teхnik talablarga

muvofiqligi toʻgʻrisidagi хulosani berish

SXEMASI

       

Nizomga

2-ILOVA

Oʻzbekiston Respublikasi Davlat gerbi

Oʻzbekiston Respublikasi Ichki ishlar vazirligi

Ob’yekt (хona)ning giyohvandlik vositalarini, ularning analoglarini,

psiхotrop moddalar va prekursorlarni saqlash boʻyicha teхnik

talablarga muvofiqligi toʻgʻrisida

XULOSA

saqlash boʻyicha belgilangan teхnik talablarga muvofiqligi tasdiqlanadi.

Asos: 20___ yil "____" __________________dagi tekshirish dalolatnomasi.

Xonaning giyohvandlik vositalarini, ularning analoglarini, psiхotrop moddalar

va prekursorlarni saqlash boʻyicha teхnik talablarga muvofiqligi toʻgʻrisidagi

XULOSA BOʻLAGI

            

belgilangan teхnik talablarga muvofiqligi tasdiqlanadi.

Asos: 20___ yil "____" __________________dagi tekshirish dalolatnomasi.

Qonun hujjatlari ma’lumotlari milliy bazasi (www.lex.uz),

2020 yil 15 fevral