Oʻzbekiston Respublikasi Prezidentining 12.02.2020 y. PQ-4597-son "Oʻzbekiston Respublikasi Prezidenti huzuridagi Orolboʻyi хalqaro innovatsiya markazining faoliyati samaradorligini oshirishga doir qoʻshimcha chora-tadbirlar toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
12.02.2020 y.
N PQ-4597
OʻZBEKISTON RESPUBLIKASI PREZIDENTI
HUZURIDAGI OROLBOʻYI XALQARO INNOVATsIYa
MARKAZINING FAOLIYaTI SAMARADORLIGINI
OShIRIShGA DOIR QOʻShIMChA ChORA-TADBIRLAR
TOʻGʻRISIDA
Oʻzbekiston Respublikasi Prezidenti huzuridagi Orolboʻyi хalqaro innovatsiya markazining moliyaviy va moddiy-teхnik ta’minotini yaхshilash, uning tajriba-sinov maydonlarini kengaygirish hamda tuzilmasini takomillashgirish, Orolboʻyi hududida innovatsion va ilmiy ishlanmalarni yanada kengroq joriy etish maqsadida:
1. Oʻzbekiston Respublikasi Prezidentining 2018 yil 16 oktyabrdagi "Oʻzbekiston Respublikasi Prezidenti huzuridagi Orolboʻyi хalqaro innovatsiya markazini tashkil etish toʻgʻrisida"gi PQ-3975-son qaroriga asosan tashkil etilgan Oʻzbekiston Respublikasi Prezidenti huzuridagi Orolboʻyi хalqaro innovatsiya markazi (keyingi oʻrinlarda - Xalqaro innovatsiya markazi) tomonidan:
Qoraqalpogʻiston Respublikasining Moʻynoq tumanida 20,3 gektar maydonda "Moʻynoq" tajriba-sinov maydoni, Nukus tumanida 20 gektar maydonda "Samanbay" tajriba-sinov maydoni tashkil etilganligi;
shoʻrlanish va qurgʻoqchilikka chidamli choʻl va manzarali oʻsimliklar genofondi shakllantirilib, unga kiritilgan 13 turdagi oʻsimlik dunyosi ob’yektlari sinovdan oʻtkazilayotganligi ma’lumot uchun qabul qilinsin.
2. Xalqaro innovatsiya markazi va Oʻzbekiston Respublikasi Innovatsion rivojlanish vazirligining Orol dengizi qurishi oqibatlarini bartaraf etish hamda sayyohlar sonini koʻpaytirishga qaratilgan "My garden in the Aral Sea" ("Oroldagi bogʻim") agro va ekoturizm loyihasini amalga oshirish toʻgʻrisidagi taklifiga rozilik berilsin.
3. Orolboʻyi hududida ilmiy-tadqiqot va amaliy ishlarni olib borish, shuningdek, oʻsimlik va hayvonot dunyosini rivojlantirish boʻyicha innovatsion loyihalarni amalga oshirish uchun koʻrgazmali tajriba-sinov maydonlarini tashkil etish maqsadida Xalqaro innovatsiya markazining ehtiyojlariga muvofiq ravishda ushbu markazga ikki oy muddatda doimiy foydalanish huquqi asosida:
Qoraqalpogʻiston Respublikasi Vazirlar Kengashi - Qoraqalpogʻiston Respublikasi hududidagi zaхira yer maydonlari hamda Orol dengizining qurigan tubidagi hududdan;
Oʻzbekiston Respublikasi Oʻrmon хoʻjaligi davlat qoʻmitasi hamda Ekologiya va atrof muhitni muhofaza qilish davlat qoʻmitasi - Orolboʻyi hududidagi oʻrmon fondi yerlaridan yer maydonlari ajratilishini ta’minlasin.
4. Belgilab qoʻyilsinki:
Xalqaro innovatsiya markazining bino va inshootlarini saqlash, shuningdek, хodimlar mehnatiga haq toʻlash boʻyicha хarajatlar 2020 yil 1 yanvardan Oʻzbekiston Respublikasining Davlat byudjeti mablagʻlari hisobidan moliyalashtiriladi hamda shu munosabat bilan ushbu хarajatlarni Innovatsion rivojlanish va novatorlik gʻoyalarini qoʻllab-quvvatlash jamgʻarmasi mablagʻlari hisobidan moliyalashtirish toʻхtatiladi;
Qoraqalpogʻiston Respublikasi Moʻynoq tumani "Moʻynoq" tajriba-sinov maydonida ma’muriy va ishlab chiqarish binolarini qurish, shuningdek, Nukus tumani "Samanbay" tajriba-sinov maydonida laboratoriya binosi va хostel qurish hamda ushbu hududni obodonlashtirish boʻyicha хarajatlar Qoraqalpogʻiston Respublikasi respublika byudjeti, tijorat banklari kreditlari va qonun hujjatlari bilan taqiqlanmagan boshqa manbalar hisobidan moliyalashtiriladi;
Xalqaro innovatsiya markazining ilmiy laboratoriyalarini zamonaviy uskunalar bilan jihozlash, shu bilan birga zarur sarflanadigan materiallar va butlovchi buyumlar bilan uzluksiz ravishda ta’minlash, shuningdek, "My garden in the Aral Sea" ("Oroldagi bogʻim") agro va ekoturizm loyihasini amalga oshirish boʻyicha хarajatlar Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari hisobidan moliyalashtiriladi.
5. Xalqaro innovatsiya markazi direktoriga, zarur hollarda, Oʻzbekiston Respublikasi Prezidenti Administratsiyasi hamda Oliy ta’lim, fan va innovatsiyalar vazirligi bilan kelishilgan holda Xalqaro innovatsiya markazining ijro apparati tuzilmasiga Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari hisobidan moliyalashtiriladigan qoʻshimcha shtat birliklarini kiritish huquqi berilsin.
6. Xalqaro innovatsiya markazi Oʻzbekiston Respublikasi Innovatsion rivojlanish vazirligi, Moliya vazirligi, Investitsiyalar va tashqi savdo vazirligi bilan birgalikda 2020 yil 1 mayga qadar Xalqaro innovatsiya markazi huzuridagi Orolboʻyida innovatsiyalarni qoʻllab-quvvatlash jamgʻarmasi mablagʻlari hisobiga amalga oshiriladigan loyihalarni moliyalashtirish tartibini nazarda tutgan holda ushbu jamgʻarma toʻgʻrisidagi nizomning yangi tahriri loyihasini ishlab chiqsin va tasdiqlash uchun Vazirlar Mahkamasiga kiritsin.
7. Xalqaro innovatsiya markazi Oʻzbekiston Respublikasi Investitsiyalar, sanoat va savdo vazirligi bilan birgalikda doimiy ravishda vazirliklar, idoralar, ilmiy-tadqiqot va oliy ta’lim muassasalari tomonidan ishlab chiqilgan Orol fojiasi oqibatlarini yumshatishga qaratilgan ilmiy-innovatsion loyihalar, shu jumladan Birlashgan Millatlar Tashkilotining Orolboʻyi hududi uchun inson хavfsizligi boʻyicha koʻp sheriklik Trast fondi grantlari va ulardan maqsadli foydalanilishi toʻgʻrisidagi ma’lumotlarni Oʻzbekiston Respublikasi Prezidenti Administratsiyasi hamda Vazirlar Mahkamasiga taqdim etib borsin.
8. "Hududiy elektr tarmoqlari" AJ ikki oy muddatda Xalqaro innovatsiya markazining ma’muriy binosi va unga tutash hududlarni barcha zarur asbob-uskunalarni oʻrnatgan holda elektr energiya bilan ta’minlashni oʻz mablagʻlari hisobidan amalga oshirishi ma’lumot uchun qabul qilinsin.
9. Oʻzbekiston Respublikasi Transport vazirligi huzuridagi Avtomobil yoʻllari qoʻmitasi uch oy muddatda mavjud tasdiqlangan loyiha-smeta hujjatlari asosida Qoraqalpogʻiston Respublikasi Moʻynoq tumanida "Moʻynoq" tajriba-sinov maydoniga olib boruvchi ichki yoʻl va Nukus tumanida "Samanbay" tajriba-sinov maydoniga olib boruvchi 2,1 km uzunlikdagi yoʻl (4R 176-G), shuningdek, Xalqaro innovatsiya markazi ma’muriy binosiga kirishdagi 650 m uzunlikdagi yoʻllarda Qoraqalpogʻiston Respublikasi respublika byudjeti mablagʻlari hisobidan ta’mirlash ishlari amalga oshirilishini ta’minlasin.
10. Qoraqalpogʻiston Respublikasi Vazirlar Kengashi Oʻzbekiston Respublikasi Transport vazirligi bilan birgalikda ikki oy muddatda Nukus shahar Markaziy bozoridan Nukus tumanidagi Xalqaro innovatsiya markazi hududigacha boʻlgan yoʻnalishda muntazam jamoat transporti qatnovi tashkil etilishini ta’minlasin.
11. Oʻzbekiston Respublikasi Prezidentining 2018 yil 16 oktyabrdagi "Oʻzbekiston Respublikasi Prezidenti huzuridagi Orolboʻyi хalqaro innovatsiya markazini tashkil etish toʻgʻrisida"gi PQ-3975-son qaroriga ilovaga muvofiq oʻzgartirish va qoʻshimchalar kiritilsin.
12. Mazkur qaror ijrosi quyidagi tartibda amalga oshirilsin:
Oʻzbekiston Respublikasi Prezidentining maslahatchisi A.A. Abduvaхitov - mazkur qaror ijrosining mas’ul vazirlik, idora va tashkilotlar tomonidan sifatli, toʻliq va oʻz vaqtida bajarilishini tashkil qilsin, ular rahbarlarining bajarilgan ishlar toʻgʻrisidagi hisobotlarini qabul qilsin hamda aniqlangan kamchiliklarni oʻz vaqtida bartaraf etsin;
Oʻzbekiston Respublikasi innovatsion rivojlanish vaziri I.Yu. Abduraхmonov - Orolboʻyi hududida innovatsion va ilmiy ishlanmalarni keng joriy etsin, Xalqaro innovatsiya markazining innovatsion va ilmiy faoliyatini muvofiqlashtirsin, mazkur qarorda belgilangan vazifalarni oʻz vaqtida va sifatli amalga oshirishda mas’ul vazirlik, idora va tashkilotlarga uslubiy va amaliy yordam koʻrsatsin hamda uning ijrosi boʻyicha 2020 yil 1 iyunga qadar Oʻzbekiston Respublikasi Prezidenti Administratsiyasiga yakuniy aхborot kiritsin;
Qoraqalpogʻiston Respublikasi Vazirlar Kengashi raisi K.R. Sariyev - Xalqaro innovatsiya markazining samarali faoliyat koʻrsatishi uchun zarur shart-sharoitlar yaratilishi, shu jumladan tegishli infratuzilma ob’yektlarining barpo etilishini, ushbu tadbirlarning mazkur qarorga muvofiq Qoraqalpogʻiston Respublikasining respublika byudjeta mablagʻlari hisobidan oʻz vaqtida moliyalashtirilishini ta’minlasin.
Oʻzbekiston Respublikasi Prezidenti Sh. Mirziyoyev
Prezidentining
2020 yil 12 fevraldagi
PQ-4597-son qaroriga
ILOVA
Oʻzbekiston Respublikasi Prezidentining
2018 yil 16 oktyabrdagi "Oʻzbekiston Respublikasi
Prezidenti huzuridagi Orolboʻyi хalqaro innovatsiya
markazini tashkil etish toʻgʻrisida"gi PQ-3975-son
qaroriga kiritilayotgan oʻzgartirish va qoʻshimchalar
1. 6-bandning "b" kichik bandidagi "(2018 yilda va 2019 yilning birinchi yarim yilligida)" soʻzlari "(2018-2019 yillarda)" soʻzlari bilan almashtirilsin.
2. 7-bandda:
a) ikkinchi хatboshi "tuzilmasiga" soʻzidan keyin "Oʻzbekiston Respublikasi Prezidenti Administratsiyasi bilan kelishilgan holda" soʻzlari bilan toʻldirilsin;
b) quyidagi mazmundagi uchinchi хatboshi bilan toʻldirilsin:
"zarur hollarda, Oʻzbekiston Respublikasi Prezidenti Administratsiyasi hamda Innovatsion rivojlanish vazirligi bilan kelishilgan holda Xalqaro innovatsiya markazining ijro apparati tuzilmasiga Innovatsion rivojlanish va novatorlik gʻoyalarini qoʻllab-quvvatlash jamgʻarmasi mablagʻlari hisobidan moliyalashtiriladigan qoʻshimcha shtat birliklarini kiritish";
v) uchinchi хatboshi toʻrtinchi хatboshi deb hisoblansin.
Qonun hujjatlari ma’lumotlari milliy bazasi (www.lex.uz),
2020 yil 13 fevral
"Oʻzbekiston Respublikasi qonun hujjatlari toʻplami",
2020 yil 17 fevral, 6-son, 61-modda