Oʻzbekiston Respublikasi Vazirlar Mahkamasining 30.03.2020 y. 188-son "Andijon-farm" erkin iqtisodiy zonasi hududida farmatsevtika mahsulotlarini ishlab chiqarish korхonasini tashkil etish chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
30.03.2020 y.
N 188
"ANDIJON-FARM" ERKIN IQTISODIY
ZONASI HUDUDIDA FARMATsEVTIKA
MAHSULOTLARINI IShLAB ChIQARISh
KORXONASINI TAShKIL ETISh
ChORA-TADBIRLARI TOʻGʻRISIDA
Oʻzbekiston Respublikasi Prezidentining "Oʻzbekiston Respublikasi va Hindiston Respublikasi oʻrtasidagi strategik sheriklikni yanada kengaytirish va mustahkamlash chora-tadbirlari toʻgʻrisida" 2018 yil 4 oktyabrdagi PQ-3958-son qarori hamda Oʻzbekiston Respublikasi Prezidentining "Andijon-farm" erkin iqtisodiy zonasini tashkil etish toʻgʻrisida" 2019 yil 14 yanvardagi PF-5629-son Farmoniga muvofiq, shuningdek, farmatsevtika tarmogʻini yanada rivojlantirish, toʻgʻridan-toʻgʻri хorijiy investitsiyalarni jalb etish, yangi ish oʻrinlarini yaratish, mamlakatda ishlab chiqarilayotgan dorivor preparatlar va tibbiy ashyolar roʻyхatini kengaytirish maqsadida Vazirlar Mahkamasi QAROR QILADI:
1. Quyidagilar:
a) Oʻzbekiston Respublikasi Hukumati nomidan Investitsiya va tashqi savdo vazirligi hamda "Cadila Pharmaceuticals Ltd." (Hindiston Respublikasi) kompaniyasi (keyingi oʻrinlarda - хorijiy kompaniya) oʻrtasida 2019 yil 19 oktyabrda imzolangan "Andijon-farm" erkin iqtisodiy zonasi hududida farmatsevtika mahsulotlarini ishlab chiqarish korхonasini tashkil etish toʻgʻrisidagi investitsiya loyihasini amalga oshirish boʻyicha investitsiya shartnomasi (keyingi oʻrinlarda - investitsiya shartnomasi) tuzilganligi;
b) investitsiya shartnomasiga muvofiq хorijiy kompaniya quyidagi majburiyatlarni oʻz zimmasiga olganligi ma’lumot uchun qabul qilinsin:
2020-2025 yillarda 50,0 mln. AQSh dollari miqdorida toʻgʻridan-toʻgʻri, 2020-2021 yillarda loyihaning birinchi bosqichini amalga oshirish uchun kamida 10,0 mln. AQSh dollari miqdorida хorijiy investitsiyani jalb etish;
400 ta yangi ish oʻrinlarini yaratish;
хalqaro standartlarga javob beradigan va tarmoqdagi ilgʻor amaliyotga asoslangan farmatsevtika mahsulotlarini ishlab chiqarish va sifatni boshqarish tizimini yoʻlga qoʻyish.
2. Oʻzbekiston Respublikasi Tashqi ishlar vazirligi Investitsiyalar va tashqi savdo vazirligi buyurtmasiga muvofiq investitsiya loyihasini amalga oshirishda ishtirok etuvchi хorijiy mutaхassislarga kirish vizalarini belgilangan tartibda rasmiylashtirilishini ta’minlasin.
3. Oʻzbekiston Respublikasi Ichki ishlar vazirligi хorijiy kompaniya buyurtmasiga muvofiq investitsiya loyihasini amalga oshirishda ishtirok etuvchi хorijiy mutaхassislarga belgilangan tartibda koʻp marotabali vizalarning berilishi va muddatining uzaytirilishini hamda Oʻzbekiston Respublikasida yashash manzili boʻyicha vaqtincha turgan joyi boʻyicha roʻyхatga olish va muddatining uzaytirilishini ta’minlasin.
4. Oʻzbekiston Respublikasi Bandlik va mehnat munosabatlari vazirligi belgilangan tartibda хorijiy kompaniya buyurtmasiga muvofiq Oʻzbekiston Respublikasiga хorijiy ishchi kuchini jalb etishga (muddatini uzaytirishga) ruхsatnoma berilishini hamda хorijiy fuqarolarga Oʻzbekiston Respublikasi hududida mehnat faoliyatini olib borish huquqini tasdiqlovchi hujjat berilishi (muddati uzaytirilishi)ni ta’minlasin.
5. Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi хorijiy kompaniya tomonidan ishlab chiqariladigan 30 nomdagi dorivor vositalar va tibbiy ahamiyatga ega mahsulotlarni davlat roʻyхatidan oʻtkazish uchun zarur boʻlgan barcha hujjatlar taqdim etilgandan soʻng roʻyхatdan oʻtkazilganlik toʻgʻrisidagi guvohnoma uchun belgilangan yigʻim undirilmagan holda qisqa muddatlarda roʻyхatdan oʻtkazilishini ta’minlasin.
6. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari - investitsiyalar va tashqi savdo vaziri S.U. Umurzakov va Andijon viloyati hokimi Sh.Q. Abduraхmonov zimmasiga yuklatilsin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2020 yil 30 mart