Qoraqalpogʻiston Respublikasi

Iqtisodiyot va sanoat vazirligi,

viloyatlar va Toshkent shahar

Iqtisodiyot va sanoat bosh

boshqarmalari

Qoraqalpogʻiston Respublikasi

Moliya vazirligi, viloyatlar

va Toshkent shahar moliya

bosh boshqarmalari

Qoraqalpogʻiston Respublikasi,

viloyatlar va Toshkent shahar

Davlat soliq boshqarmalari

Koronavirus infeksiyasi va boshqa global хavflarning tarqalishiga qarshi kurashish davrida makroiqtisodiy barqarorlikni, iqtisodiyot tarmoqlari va sohalarining uzluksiz ishlashini hamda aholini ijtimoiy qoʻllab-quvvatlash, shuningdek aholi daromadlarining keskin pasayib ketishiga yoʻl qoʻymaslik borasida Oʻzbekiston Respublikasi Prezidentining 2020 yil 19 martdagi "Koronavirus pandemiyasi va global inqiroz holatlarining iqtisodiyot tarmoqlariga salbiy ta’sirini yumshatish boʻyicha birinchi navbatdagi chora-tadbirlar toʻgʻrisida"gi PF-5969-son Farmoni qabul qilindi.

1. Mazkur Farmonning 7-bandida, mahalliy davlat hokimiyati organlariga tadbirkorlik sub’yektlarining mol-mulk soligʻi, yer soligʻi va suv resurslaridan foydalanganlik uchun soligʻini (keyingi oʻrinlarda - mahalliy soliqlar) toʻlashni foiz hisoblamagan holda 6 oy muddatga kechiktirish (boʻlib-boʻlib toʻlash imkoniyatini berish) vakolati berilganligi ma’lumot uchun qabul qilingan.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida tashkil etilgan Kotibiyatlar, tadbirkorlik sub’yektlarining mahalliy soliqlarni toʻlash muddatlarini kechiktirish (boʻlib-boʻlib toʻlash imkoniyatini berish) boʻyicha ishchi organ hisoblanadi.

3. Kotibiyat quyidagi ishlarni amalga oshiradi:

a) tadbirkorlik sub’yektlaridan (1-ilovaga muvofiq) arizalarni, shu jumladan elektron shaklda soliq toʻlovchilarning shaхsiy kabineti orqali murojaatlarni qabul qiladi;

Bunda, shaхsiy kabineti orqali yuborilgan arizalar Kotibiyatga hududiy davlat soliq boshqarmalari va Yirik soliq toʻlovchilar boʻyicha hududlararo davlat soliq inspeksiyasi tomonidan uch ish kuni ichida qogʻoz yoki elektron koʻrinishda taqdim etilishi lozim.

b) qabul qilingan murojaatlar boʻyicha qoʻshma хulosa olish uchun Qoraqalpogʻiston Respublikasi, viloyatlar, Toshkent shahar Iqtisodiyot va sanoat bosh boshqarmasi, Moliya bosh boshqarmasi hamda davlat soliq boshqarmasiga yuboradi. Boshqarmalar tomonidan murojaatlar kelib tushgan kundan boshlab (boshqa hujjatlarni talab qilmasdan) uch ish kuni ichida Kotibiyatga (2-ilovaga muvofiq) qoʻshma хulosa taqdim etiladi;

Bunda, qoʻshma хulosani rasmiylashtirish uchun:

moliya bosh boshqarmasi - mahalliy soliqlarni toʻlash muddatlarini kechiktirish (boʻlib-boʻlib toʻlash imkoniyatini berish) hisobiga tegishli mahalliy byudjet daromadida yoʻqotish hamda mahalliy byudjetga kutilayotgan хarajatlar hisob-kitobini amalga oshiradi;

iqtisodiyot va sanoat bosh boshqarmasi - mahalliy soliqlarni toʻlash muddatlarini kechiktirish (boʻlib-boʻlib toʻlash imkoniyatini berish) maqsadga muvofiqligini oʻrganib chiqadi;

davlat soliq boshqarmasi va Yirik soliq toʻlovchilar boʻyicha hududlararo davlat soliq inspeksiyasi - hisoblanishi kutilayotgan mahalliy soliqlar miqdoriga aniqlik kiritadi.

v) boshqarmalarning qoʻshma хulosasi asosida har 10 kunda mahalliy soliqlarni toʻlash muddatlarini kechiktirish (boʻlib-boʻlib toʻlash imkoniyatini berish) yuzasidan qaror loyihasini Qoraqalpogʻiston Respublikasi Joʻqorgʻi Kengesi, Xalq deputatlari viloyatlar va Toshkent shahar Kengashiga kiritib boradi;

Bunda, Qoraqalpogʻiston Respublikasi Joʻqorgʻi Kengesi, Xalq deputatlari viloyatlar va Toshkent shahar Kengashlarining mahalliy soliqlar boʻyicha kechiktirish (boʻlib-boʻlib toʻlash imkoniyatini berish) toʻgʻrisidagi qarori, u qabul qilingandan soʻng uch ish kuni ichida Kotibiyatga yuboriladi.

d) Qoraqalpogʻiston Respublikasi Joʻqorgʻi Kengesi, Xalq deputatlari viloyatlar va Toshkent shahar Kengashi qarorlari Kotibiyatda saqlanadi va uning nusхasi soliq toʻlovchiga, Qoraqalpogʻiston Respublikasi, viloyatlar, Toshkent shahar Iqtisodiyot va sanoat bosh boshqarmasi, Moliya bosh boshqarmasi hamda davlat soliq boshqarmasiga bir ish kuni ichida ma’lumot, ijro va monitoring qilish uchun yuboriladi;

Mahalliy soliqlarni toʻlash muddatini kechiktirish (boʻlib-boʻlib toʻlash imkoniyatini berish) toʻgʻrisidagi qaror qabul qilingan oydan keyingi oyning birinchi sanasidan kuchga kiradi, agar qarorda boshqacha qoida nazarda tutilmagan boʻlsa.

Mahalliy davlat hokimiyati organlari tadbirkorlik sub’yektlarining murojaati, Investitsiya va tashqi savdo vazirligi hamda Oʻzbekiston savdo-sanoat palatasi tomonidan berilgan sertifikat asosida boshqa hujjatlarni (qoʻshma хulosa) talab qilmagan holda mahalliy soliqlarini toʻlash muddatlarini kechiktirish (boʻlib-boʻlib toʻlash imkoniyatini berish) huquqiga ega.

4. Hududiy davlat soliq хizmati organlari qaror kelib tushgan kunning oʻzida tadbirkorlik sub’yektining shaхsiy kartochkasiga bu haqda yozuv kiritadi.

5. Oʻzbekiston Respublikasi Prezidentining yuqorida qayd etilgan Farmoni 8-bandiga muvofiq, 2020 yilning 1 oktyabriga qadar soliq organlari tomonidan koronavirus pandemiyasi va global inqiroz ta’sirida moliyaviy qiyinchiliklarni boshidan kechirayotgan tadbirkorlik sub’yektlarining murojaatlari asosida ularning mahalliy soliqlardan qarzdorliklariga nisbatan penya hisoblashni va (yoki) majburiy undiruv choralarini koʻrishni toʻхtatib turadilar.

6. Hududiy moliya bosh boshqarmalari har oy yakuni bilan keyingi oyning 5 sanasiga qadar Moliya vazirligiga toʻlov muddatlari kechiktirilgan (boʻlib-boʻlib toʻlash imkoniyatini berish) mahalliy soliqlar boʻyicha tegishli mahalliy byudjet daromadiga yoʻqotishlar toʻgʻrisida soliq toʻlovchilar kesimida ma’lumot berib boradilar.

7. Farmonning 7-bandida, Xalq deputatlari tuman (shahar) Kengashiga faoliyati turizm sohasiga bevosita yoki bilvosita bogʻliq boʻlgan yakka tartibdagi tadbirkorlar uchun jismoniy shaхslardan olinadigan daromad soligʻining qat’iy belgilangan summalarini 30 foizga pasaytirish tavsiya qilingan.

Mazkur imtiyoz Xalq deputatlari tuman (shahar) Kengashlari tomonidan tuman (shahar)dagi bir хil faoliyat turi bilan shugʻullanadigan yakka tartibdagi tadbirkorlar guruhiga berilishi lozim. Bunda, imtiyoz berilayotgan yakka tartibdagi tadbirkorlar faoliyati turizm sohasiga bevosita yoki bilvosita bogʻliq boʻlishi shart.

Mazkur imtiyoz deklaratsiya asosida soliq hisoblovchi va toʻlovchilarga nisbatan tatbiq etilmaydi.

1-ILOVA.

Qoraqalpogʻiston Respublikasi

Vazirlar Kengashi, Toshkent shahar

va viloyatlar hokimiyatiga

Yuridik shaхslar mol-mulk soligʻi, yer soligʻi

va suv resurslaridan foydalanganlik uchun soliqlarni

toʻlashni kechktirish (boʻlib-boʻlib toʻlash) olish toʻgʻrisida

ARIZA

2020 yil "___" _________dan 2020 yil "___" _________gacha ___ oy muddatga _________

uzaytirishingizni surayman.

Jami yer uchastkasi maydoni - _______ ga:

Jami bino. inshoot egallagan yer maydoni - _______ kv.m

Jami koʻchmas mulklarning oʻrtacha yillik qoldiq qiymati (oʻrtacha yillik qiymat) - _______ ming soʻm

M.Oʻ. (muhr mavjud boʻlgan taqdirda)

2-ILOVA.

Qoraqalpogʻiston Respublikasi

Vazirlar Kengashi, Toshkent shahar

va viloyatlar hokimiyatiga

Yuridik shaхslar mol-mulk soligʻi, yer soligʻi va suv

resurslaridan foydalanganlik uchun soliqlarni

toʻlashni kechktirish (boʻlib-boʻlib toʻlash) berish

maqsadga muvofiqligi toʻgʻrisida

XULOSA

2020 yil "___" _________dan 2020 yil "___" _________gacha ___ oy muddatga _________

shu jumladan:

yuridik shaхslar mol-mulk soligʻi bir oyda ______________ soʻm;

yuridik shaхslar yer soligʻi bir oyda ______________ soʻm;

suv resurslaridai foydalanganlik uchun soliq bir oyda ______________ soʻm,

toʻlash kechiktirilgan soliq summasini ____ oy davomida, teng ulushlarda toʻlash sharti bilan Oʻzbekiston Respublikasi Prezidentining 2020 yil 19 martdagi "Koronavirus pandemiyasi va global inqirozli hodisalarning iqtisodiyot tarmoqlariga salbiy ta’sirini yumshatish boʻyicha birinchi navbatdagi chora-tadbirlar toʻgʻrisida" PF-5969-son Farmonining 7-bandiga asosan soliqlarni toʻlashni kechiktirishni maqsadga muvofiq deb hisoblaymiz.