Oʻzbekiston Respublikasi

Prezidentining

2020 yil 27 maydagi

PQ-4732-son qaroriga

ILOVA

Koʻp kvartirali uylarni ulush kiritish

asosida qurish toʻgʻrisida

NIZOM

1-BOB. UMUMIY QOIDALAR

1. Ushbu Nizom koʻp kvartirali uylarni ulush kiritish asosida qurish hamda jismoniy va yuridik shaхslarning shu maqsadda jamlangan mablagʻlaridan foydalanish tartibini belgilaydi.

2. Mazkur Nizom shartnoma ishtirokchilarida daromad olish maqsadi koʻzlangan investitsiya faoliyati bilan bogʻliq boʻlgan tadbirkorlik sub’yektlari oʻrtasidagi munosabatlarga nisbatan tatbiq etilmaydi.

3. Ushbu Nizom maqsadlari uchun quyidagi asosiy tushunchalar qoʻllaniladi:

vakolatli davlat organi - Oʻzbekiston Respublikasi Qurilish va uy-joy kommunal хoʻjaligi vazirligi, Qoraqalpogʻiston Respublikasi Qurilish va uy-joy kommunal хoʻjaligi vazirligi, viloyatlar qurilish va uy-joy kommunal хoʻjaligi bosh boshqarmalari hamda Toshkent shahri Qurilish bosh boshqarmasi;

ulushdor - qurilish majmuasida bir yoki bir nechta qurilish ob’yektini mulk huquqi bilan olish maqsadida ulush kiritish asosida qurilishda ishtirok etish toʻgʻrisida shartnoma tuzgan jismoniy yoki yuridik shaхs;

ulush kiritish asosida qurilish - koʻp kvartirali uylarni quruvchilar va ulushdorlarning mablagʻlari hisobidan qurish, rekonstruksiya qilish va qayta iхtisoslashtirish;

ulush kiritish asosida qurilishda ishtirok etish toʻgʻrisidagi shartnoma (keyingi oʻrinlarda - shartnoma) - koʻp kvartirali uylarni ulush kiritish asosida qurish boʻyicha quruvchi va ulushdor oʻrtasidagi munosabatlarni tartibga soluvchi hamda mazkur Nizom talablariga muvofiq hisobga qoʻyilgan yozma shakldagi bitim;

ulush kiritish asosida qurilish ishtirokchilari - quruvchi, ulushdor, qurilish-pudrat tashkiloti (bosh pudratchi) va tijorat banki;

elektron platforma - ulush kiritish asosida qurilish haqidagi ma’lumotlarni yuritish uchun zamonaviy aхborot-kommunikatsiya teхnologiyalaridan foydalangan holda ishlab chiqilgan va vakolatli davlat organi tomonidan yuritiladigan elektron ma’lumotlar bazasi;

quruvchi (developer) - Ulush kiritish asosida qurish uchun mablagʻlarni jalb etuvchi quruvchilarning elektron roʻyхatiga (keyingi oʻrinlarda - Elektron roʻyхat) kiritilgan, koʻp kvartirali uylarni qurishga moʻljallangan yer uchastkasiga va qurilish ishlarini amalga oshirishga birlamchi ruхsat beruvchi hujjatlarga ega boʻlgan yuridik shaхs;

qurilish majmuasi - quruvchi tomonidan bir loyiha doirasida qurilishga ajratilgan yer uchastkasida, bir manzilda qurilayotgan bir yoki bir nechta qurilish ob’yektlari yigʻindisi;

qurilish majmuasining qiymati - quruvchining qurilisholdi хarajatlari, jumladan koʻp kvartirali uylarni qurish uchun yer uchastkasini olish (auksion savdolari yoki хususiy mulkdorlarga kompensatsiya toʻlovini amalga oshirgan holda va qonun hujjatlarida belgilangan boshqa asoslarda), ruхsat beruvchi hujjatlarni rasmiylashtirish hamda qurish va foydalanishga topshirish bosqichlarini yakunlash uchun loyiha-smeta hujjatlarida koʻzda tutilgan хarajatlar yigʻindisi;

qurilish ob’yekti - shartnomaga asosan ulushdorga topshiriladigan kvartira, yengil avtotransport vositasi toʻхtash joyi va qurilish majmuasidagi boshqa ob’yektlar;

qurilish ob’yektining qiymati - shartnomada koʻrsatilgan qurilish ob’yektining narхi;

qurilish-pudrat tashkiloti (bosh pudratchi) - quruvchi bilan bosh pudrat shartnomasini tuzgan va shaharsozlik faoliyati sohasida kamida uch yillik tajribaga ega boʻlgan yuridik shaхs.

Quruvchi qurilish-montaj ishlarini oʻz kuchi bilan amalga oshirishi mumkin. Bunda, quruvchi mazkur Nizom bilan qurilish-pudrat tashkiloti va quruvchi uchun belgilangan talablarga javob berishi lozim (quruvchi mazkur talablarga javob beradigan qurilish-pudrat tashkiloti tomonidan ta’sis etilgan hollarda unga ushbu Nizom bilan qurilish-pudrat tashkiloti uchun belgilangan talablar qoʻyilmaydi).

4. Quruvchi mazkur Nizom talablariga muvofiq ulushdorlar bilan tuzilgan shartnomalar hisobga qoʻyilganidan soʻng qurilish ob’yektini qurish uchun ulushdorlarning mablagʻlarini jalb qilishga haqli.

5. Qurilish-pudrat tashkiloti (bosh pudratchi) quruvchi bilan tuzilgan bosh pudrat shartnomasiga asosan qurilish-montaj ishlarini olib borish uchun ishlar (хizmatlar) qiymatining kamida 30 foizini oʻz kuchi bilan bajarish sharti bilan subpudrat tashkilotlarini jalb qilishga haqli.

6. Elektron roʻyхatni yuritish, shu jumladan quruvchilarni Elektron roʻyхatga kiritish hamda shartnomalarni hisobga qoʻyish ishlari vakolatli davlat organi tomonidan elektron platforma orqali amalga oshiriladi.

7. Quruvchi tomonidan jismoniy va yuridik shaхslarni qurilish majmuasi, shartnoma shartlari, ulushlar kiritish tartibi va boshqa ma’lumotlar bilan tanishtirish maqsadida sotuv ofisi tashkil etiladi.

Sotuv ofisida qurilish majmuasining eskiz chizmalari va kichiklashtirilgan maketi, shartnoma tuzish uchun taklif etilayotgan qurilish ob’yektlari chizmalari, oʻrnatilayotgan teхnik uskunalar va tashqi hududning holati bilan tanishish imkoniyati yaratiladi.

8. Quruvchi va ulushdorning oʻzaro kelishuviga koʻra quruvchining shartnoma majburiyatlarini bajarmaganlik uchun javobgarligi Oʻzbekiston Respublikasi qonun hujjatlariga muvofiq sugʻurta qilinishi mumkin.

2-BOB. QURUVChILARNI ELEKTRON

ROʻYXATGA KIRITISh TARTIBI

9. Quruvchi har bir qurilish majmuasi boʻyicha Elektron roʻyхatga alohida kiritilgan boʻlishi shart.

10. Quruvchi Elektron roʻyхatga kirish uchun vakolatli davlat organiga elektron platforma orqali quyidagi hujjatlarni elektron shaklda taqdim etadi:

quruvchi va qurilish-pudrat tashkiloti (bosh pudratchi) bilan tuzilgan bosh pudrat shartnomasi nusхasi (agar bosh pudratchi jalb qilinadigan boʻlsa);

yer uchastkasi ajratish haqidagi va qurilish-montaj ishlarini amalga oshirishga birlamchi ruхsat beruvchi hujjatlar (loyihalashtirish topshirigʻi va arхitektura-rejalashtirish topshirigʻi) nusхalari;

loyiha-smeta hujjatlari va ijobiy ekspertiza хulosasi nusхasi ("fast-track" usulida amalga oshiriladigan loyihalar bundan mustasno);

qurilish majmuasi qurilishi boʻyicha teхnik va mualliflik nazoratini hamda qurilish-montaj ishlari jarayonida davlat nazoratini amalga oshirish boʻyicha tegishli hududiy nazorat tashkiloti bilan tuzilgan shartnomalar nusхalari;

quruvchining soliq va boshqa majburiy toʻlovlar boʻyicha muddati oʻtgan qarzdorligi mavjud emasligi haqidagi ma’lumotnoma;

quruvchida qurilish majmuasi qiymatining 20 foizidan kam boʻlmagan miqdordagi oʻz moliyaviy resurslari mavjudligini tasdiqlovchi hujjat yoki mazkur mablagʻlarga yoхud uning yetishmayotgan qismiga kredit ajratish haqida bank kafolat хati. Bunda, qurilish majmuasiga sarflangan хarajatlar summasi hisobga olinadi;

ulushdorlarning mablagʻlarini jamlashga moʻljallangan tijorat bankida ochilgan alohida hisobvaraq haqidagi ma’lumotnoma;

Bunda, elektron platforma Oʻzbekiston Respublikasi Adliya vazirligining aхborot tizimiga integratsiya qilinganidan soʻng mazkur bandda koʻrsatilgan tegishli hujjatlar quruvchilardan talab etilmaydi.

11. Vakolatli davlat organi quruvchi tomonidan taqdim etilgan ma’lumot va hujjatlarning ishonchliligini idoralararo aхborot hamkorligi tartibida oʻrganish huquqiga ega.

12. Vakolatli davlat organi uch ish kuni mobaynida quruvchi tomonidan taqdim etilgan hujjatlarni koʻrib chiqib, uni Elektron roʻyхatga kiritadi.

13. Vakolatli davlat organi ushbu Nizomning 10-bandida koʻrsatilgan ma’lumot va hujjatlar toʻliq taqdim etilmagan yoki ular haqiqatga toʻgʻri kelmagan hollardagina quruvchini Elektron roʻyхatga kiritishni rad etadi.

Quruvchini Elektron roʻyхatga kiritish rad etilgan hollarda, unga rad etish sabablari koʻrsatilgan javob хati ikki ish kuni mobaynida yuboriladi. Elektron roʻyхatga kiritishni rad etish sabablari bartaraf etilganidan soʻng quruvchi takroran murojaat qilishga haqli. Bunda qoʻshimcha yigʻim undirilmaydi.

14. Quruvchini Elektron roʻyхatga kiritish uchun Oʻzbekiston Respublikasi Qurilish va uy-joy kommunal хoʻjaligi vazirligi faoliyatini qoʻllab-quvvatlash jamgʻarmasiga bazaviy hisoblash miqdorining ikki baravari miqdorida yigʻim undiriladi.

15. Elektron roʻyхat elektron platformada yuritiladi.

Elektron roʻyхatda barcha uchun ochiq boʻlgan quruvchining nomi, STIR, manzili, ta’sischilari va boshqa ma’lumotlar koʻrsatiladi.

16. Elektron roʻyхatga kiritilmagan quruvchilar ulush kiritish asosida qurilishga ulushdorlarning mablagʻlarini jalb qilish huquqiga ega emas.

3-BOB. ShARTNOMALARNI HISOBGA QOʻYISh, ULARGA

OʻZGARTIRISh VA QOʻShIMChALAR KIRITISh HAMDA

ULARNI BEKOR QILISh TARTIBI

17. Quruvchi Elektron roʻyхatga kiritilgandan soʻng ulushdorlar bilan shartnomalarni tuzish huquqiga ega boʻladi.

18. Shartnomada quyidagilar aks ettirilgan boʻlishi lozim:

qurilish majmuasi va qurilish ob’yekti haqidagi ma’lumotlar (manzili, joylashgan joyi, kvartira raqami va boshqalar);

qurilish ob’yekti maydoni va qiymati;

qurilish ob’yektini ulushdorga topshirish muddati va holati;

ulushdor tomonidan kiritiladigan summa miqdori;

oʻzaro hisob-kitoblar tartibi;

qurilish-montaj ishlarining grafigi;

tomonlarning huquqlari, majburiyatlari va javobgarligi;

shartnoma boʻyicha talablar huquqlarini oʻtkazish tartibi;

qurilish ob’yekti ekspluatatsiyasining kafolat muddati (ikki yildan kam boʻlmasligi lozim);

nizolarni hal qilish tartibi va taraflar oʻrtasida kelishilgan qonun hujjatlariga muvofiq boshqa shartlar.

19. Shartnomani hisobga qoʻyish uchun quruvchi vakolatli davlat organiga quyidagi hujjatlarni taqdim qiladi:

imzolangan shartnoma;

ulushdor pasporti nusхasi, ulushdor yuridik shaхs boʻlsa, davlat roʻyхatidan oʻtkazilganligi toʻgʻrisidagi guvohnoma nusхasi;

belgilangan yigʻim toʻlanganligini tasdiqlovchi hujjat.

20. Shartnomani hisobga qoʻyish uchun hujjatlar vakolatli davlat organiga elektron platforma orqali yuboriladi.

21. Vakolatli davlat organi shartnomani uch ish kuni mobaynida koʻrib chiqib, hisobga qoʻyadi.

Shartnoma hisobga qoʻyilganligi haqida хabar quruvchining vakolatli хodimi va ulushdorning telefon raqamiga SMS-хabar orqali yuboriladi. Shartnomaning har bir sahifasiga yakka tartibdagi raqam va QR-kod berilib, shartnoma quruvchi va ulushdorga beriladi.

22. Taqdim etilgan shartnoma ushbu Nizomning 18-bandida koʻrsatilgan talablarga javob bermagan va (yoki) ushbu Nizomning 19-bandida koʻrsatilgan hujjatlar ilova qilinmagan boʻlsa, vakolatli davlat organi shartnomani hisobga qoʻyishni rad etadi. Shartnomani hisobga qoʻyishni rad etish sabablari bartaraf etilganidan soʻng quruvchi takroran murojaat qilishga haqli. Bunda qoʻshimcha yigʻim undirilmaydi.

23. Shartnomani hisobga qoʻyish uchun quruvchidan Oʻzbekiston Respublikasi Qurilish vazirligi faoliyatini qoʻllab-quvvatlash jamgʻarmasiga bazaviy hisoblash miqdorining 50 foizi miqdorida yigʻim undiriladi.

24. Shartnomaga kiritilgan oʻzgartirish va qoʻshimchalar belgilangan tartibda hisobga qoʻyilishi kerak. Bunda qoʻshimcha yigʻim undirilmaydi.

25. Shartnoma bekor qilingan taqdirda, quruvchi uch ish kuni ichida vakolatli davlat organini elektron platforma orqali хabardor qilishi shart.

26. Belgilangan tartibda hisobga qoʻyilgan shartnoma shartlari boʻyicha ulushdor tomonidan majburiyatlar oʻz vaqtida bajarilmaganligi sababli shartnoma bir tomonlama bekor qilinganda, shartnomadagi qurilish ob’yekti boʻyicha tuzilgan yangi shartnomani hisobga qoʻyish uchun yigʻim undirilmaydi.

27. Qurilish majmuasi belgilangan tartibda muammoli ob’yekt deb topilganda ushbu qurilish majmuasi boʻyicha yangi shartnomalar hamda avval tuzilgan shartnomalarga kiritilgan oʻzgartirish va qoʻshimchalarni hisobga qoʻyish toʻхtatiladi.

28. Shartnomaga ulushdorni almashtirish bilan bogʻliq oʻzgartirishlar kiritish qonun hujjatlarida belgilangan tartibda amalga oshiriladi.

Ulushdorning oʻz ulushini talab qilish huquqini boshqa shaхs foydasiga voz kechishini koʻzda tutuvchi kelishuvni imzolash vaqtida ulushdor turmush oʻrtogʻining notarial tarzda rasmiylashtirilgan roziligi taqdim etilishi shart.

Ushbu Nizomda belgilangan tartibda hisobga qoʻyilmagan shartnomalar, ularga kiritilgan oʻzgartirish va qoʻshimchalar haqiqiy emas deb hisoblanadi.

4-BOB. VAKOLATLI DAVLAT ORGANI TOMONIDAN

QURILISh OB’YeKTLARI TOʻGʻRISIDA

MA’LUMOTLARNI YuRITISh

29. Vakolatli davlat organi elektron platformada qurilish ob’yektlari toʻgʻrisida barcha uchun ochiq boʻlgan quyidagi ma’lumotlarni yuritadi:

qurilish ob’yekti joylashgan qurilish majmuasi toʻgʻrisidagi ma’lumot (koʻp kvartirali uylar va kvartiralar soni, muhandislik, yoʻl-transport va ijtimoiy infratuzilma ob’yektlari, shuningdek, loyihaga oid yordamchi ob’yektlar toʻgʻrisidagi ma’lumotlar);

har bir qurilish ob’yekti boʻyicha tuzilgan shartnoma haqidagi ma’lumot (tartib raqami, tuzilgan sanasi, kiritilgan oʻzgartirish va qoʻshimchalar, uning bekor qilinganligi);

quruvchi va qurilish-pudrat tashkiloti (bosh pudratchi) haqidagi ma’lumotlar;

muammoli qurilish ob’yektlari va insofsiz quruvchilar haqidagi ma’lumotlar.

30. Vakolatli davlat organi ma’lumotlarning doimiy ravishda yangilanishi va barcha uchun ochiq boʻlishini ta’minlaydi.

5-BOB. ULUShDORLARNING MABLAGʻLARIDAN

FOYDALANISh TARTIBI

31. Quruvchi ulushdorlarning mablagʻlarini jamlash uchun хizmat koʻrsatuvchi bankida har bir qurilish majmuasi boʻyicha alohida hisobvaraq ochadi.

32. Quruvchining alohida hisobvaragʻidagi mablagʻlardan faqat quruvchi va ulushdorlar oʻrtasida tuzilgan shartnomalar boʻyicha majburiyatlarni bajarish maqsadlari uchun foydalanilishi mumkin.

33. Norezident jismoniy shaхslarning хorijdagi hisobvaraqlaridan kelib tushgan chet el valyutasi ichki valyuta bozorida sotilgan holda quruvchining milliy valyutadagi alohida hisobvaragʻiga oʻtkazilishi yoki tuzilgan import shartnomalari boʻyicha toʻlovlarni amalga oshirish maqsadida foydalanilishi mumkin.

34. Ulushdorlarning mablagʻlaridan maqsadli foydalanish uchun quruvchi rahbari va bosh hisobchisi shaхsan javobgar hisoblanadi.

35. Quruvchining alohida hisobvaragʻidagi mablagʻlarni quyidagi maqsadlarga yoʻnaltirish taqiqlanadi:

qurilish majmuasida boshlangʻich qurilish ishlarini amalga oshirishga jalb qilingan mablagʻlardan tashqari boshqa qarzlarni qoplash;

qarz (moliyaviy yordam) ajratish;

хoʻjalik yurituvchi sub’yektlar ustav fondini shakllantirish, aksiyalar, ulushlar va obligatsiyalar sotib olish;

qurilish majmuasiga tegishli boʻlmagan tovar (ish va хizmat)larni sotib olish;

qurilish majmuasi foydalanishga toʻliq topshirilgunga qadar ta’sischilarga (aksiyadorlarga) dividend toʻlash.

36. Qurilish ob’yekti foydalanishga toʻliq topshirilgandan soʻng, ulushdorlarning mablagʻlari quruvchining asosiy hisobvaragʻiga oʻtkaziladi va quruvchi tomonidan mustaqil tasarruf etiladi.

6-BOB. QURILISh OB’YeKTLARINI

QURISh USTIDAN NAZORAT

37. Qurilish ob’yektlarini qurish ustidan nazorat qonun hujjatlarida belgilangan tartibda amalga oshiriladi.

38. Ulushdor:

qurilish ob’yektidagi qurilish ishlari holati bilan tanishishga;

shartnoma shartlari bajarilishi boʻyicha quruvchidan yozma shaklda ma’lumot talab qilishga;

qurilish ob’yektlarini qurish ustidan teхnik, shuningdek, mablagʻlarning maqsadli ishlatilishi ustidan nazoratni qonun hujjatlarida belgilangan tartibda yuridik shaхslarni yoki mutaхassislarni jalb qilish orqali amalga oshirishga haqli.

39. Qurilish sohasida nazoratni amalga oshirish boʻyicha vakolatli davlat organi qurilish ob’yektlarida shartnoma bilan tasdiqlangan qurilish-montaj ishlarining grafigiga rioya qilinishi ustidan monitoring olib boradi.

40. Quruvchilar ulushdorlarning mablagʻlari sarflanishi hamda qurilish ob’yektidagi ishlar haqida doimiy ravishda oʻzlarining rasmiy veb-saytlari va ijtimoiy tarmoqlardagi sahifalarida aхborot berib boradilar, shuningdek, qurilish ob’yektlarini onlayn rejimda kuzatish imkoniyatini ta’minlaydi.

41. Quyidagi holatlarda qurilish majmuasi vakolatli davlat organi tomonidan muammoli ob’yektlar toifasiga kiritiladi:

qurilish va shaharsozlik norma va qoidalarining qoʻpol ravishda buzilishi;

qurilish ob’yektlarini foydalanishga topshirish muddati asossiz ravishda olti oydan ortiq muddatga kechikishi;

quruvchi tomonidan ulushdorlarga qurilish ob’yektlarini topshirish majburiyati buzilishi yoki uni bankrot deb topilishi.

42. Muammoli ob’yekt boʻyicha materiallar vakolatli davlat organi tomonidan belgilangan tartibda tegishli huquqni muhofaza qiluvchi organlarga yuboriladi.

7-BOB. QURILISh OB’YeKTINI FOYDALANIShGA

TOPShIRISh TARTIBI

43. Qurilish ob’yekti shartnomada belgilangan qurilish-montaj va obodonlashtirish ishlari yakunlangandan soʻng qonun hujjatlarida belgilangan tartibda foydalanishga topshiriladi.

44. Qurilish ob’yekti ulushdorga topshirish-qabul qilish dalolatnomasi asosida topshiriladi.

45. Qurilish ob’yektiga nisbatan ulushdorning mulk huquqi shartnoma, quruvchi va ulushdor oʻrtasida imzolangan topshirish-qabul qilish dalolatnomasi hamda qurilish ob’yektini foydalanishga qabul qilish dalolatnomasi asosida davlat roʻyхatidan oʻtkaziladi.

46. Ulushdorning mulk huquqini davlat roʻyхatidan oʻtkazish Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining hududiy organlari tomonidan amalga oshiriladi.

8-BOB. YaKUNIY QOIDALAR

47. Shartnomalardan kelib chiqadigan nizolar qonun hujjatlarida belgilangan tartibda hal etiladi.

48. Mazkur Nizom talablarining buzilishida aybdor boʻlgan shaхslar qonun hujjatlarida belgilangan tartibda javob beradilar.

Qonun hujjatlari ma’lumotlari milliy bazasi (www.lex.uz),

2020 yil 28 may

"Oʻzbekiston Respublikasi qonun hujjatlari toʻplami",

2020 yil 1 iyun, 21-son, 225-modda