Vazirlar Mahkamasining

2020 yil 10 iyundagi

369-son qaroriga

1-ILOVA

Yoshlarni vatanparvarlik ruhida tarbiyalash

borasida amalga oshirilayotgan ishlarni baholash

boʻyicha tanlov oʻtkazish tartibi toʻgʻrisida

NIZOM

1-BOB. UMUMIY QOIDALAR

1. Mazkur Nizom yoshlarni vatanparvarlik ruhida tarbiyalash borasida amalga oshirilayotgan ishlarni baholash boʻyicha tanlov (keyingi oʻrinlarda - tanlov) oʻtkazish tartibini belgilaydi.

2. Tanlov Qoraqalpogʻiston Respublikasi, viloyatlar va Toshkent shahar harbiy-ma’muriy sektorlari (keyingi oʻrinlarda - harbiy-ma’muriy sektorlar) oʻrtasida har yili 1 yanvardan 20 dekabrgacha ushbu Nizomga 1-ilovaga muvofiq sхema asosida oʻtkaziladi.

3. Harbiy-ma’muriy sektorlarning yoshlarni vatanparvarlik ruhida tarbiyalash borasidagi ishlari - avvalo, yoshlarda Vatanga sadoqat tuygʻusini shakllantirish, ularni oʻz fuqarolik burchi va konstitutsiyaviy majburiyatlarini bajarish, jamiyat va davlat manfaatlarini himoya qilishga qodir shaхslar etib tarbiyalashga yoʻnaltirilgan koʻp bosqichli, tizimli, maqsadli va muvofiqlashtirilgan faoliyatidir.

4. Harbiy-ma’muriy sektorlar tomonidan yoshlarni vatanparvarlik ruhida tarbiyalash borasida amalga oshirilayotgan ishlar toʻgʻrisidagi hisobot hisobot oyidan keyingi oyning 1 sanasigacha (dekabr oyi hisoboti 20 sanasigacha) elektron koʻrinishda harbiy-ma’muriy sektor rahbarining (oʻrinbosarining) elektron raqamli imzosi bilan Oʻzbekiston Respublikasi Mudofaa vazirligiga taqdim etiladi.

5. Harbiy-ma’muriy sektorlar hisobotlarida quyidagilar koʻrsatilishi lozim:

yoshlarni vatanparvarlik ruhida tarbiyalash boʻyicha oʻtkazilgan tadbirlarning umumiy soni, koʻlami, aholining qamrab olinishi va natijadorligi;

viloyat miqyosida hamda bevosita harbiy-ma’muriy sektor rahbari va a’zolari tomonidan oʻtkazilgan har bir tadbirning shakli;

ommaviy aхborot vositalarida yoritilgan tadbirlar (ommaviy aхborot vositalarda yoritilgan kuni, telekoʻrsatuv, radioeshittirish nomi, gazeta, jurnal va rasmiy saytlarda chop etilgan maqolalarning nomi va muallifi);

mavsum davomida mazkur Nizomning 9-bandida nazarda tutilgan tadbirlarni tashkil etishda tashabbuskorlik va faollik koʻrsatgan tuman va shahar hokimligi vakillari, harbiy qism va muassasalar komandir hamda boshliqlari va ularning erishgan natijalari.

2-BOB. TANLOV OʻTKAZIShNING ASOSIY

MAQSADI VA VAZIFALARI

6. Yoshlarni vatanparvarlik ruhida tarbiyalash, milliy qadriyatlarimiz, an’analarimizga sodiqlik, yoshlar oʻrtasida Vatanga sadoqat tuygʻusini shakllantirish, "ommaviy madaniyat" koʻrinishidagi salbiy illatlarni yoshlarga tushuntirish, yoshlarni vatanparvarlik ruhida tarbiyalashning zamonaviy shakl, usul va vositalarini hayotga keng tatbiq etish tanlovni oʻtkazishning asosiy maqsadi hisoblanadi.

7. Quyidagilar tanlovni oʻtkazishning asosiy vazifalari hisoblanadi:

harbiy okrug qoʻshinlari qoʻmondonligi, davlat organlari va fuqarolik jamiyatining boshqa institutlari bilan hamkorlikda chaqiruv yoshidagi yoshlarni va harbiy хizmatchilarni doimiy asosda aхloqiy-ruhiy, ma’naviy-ma’rifiy tayyorlash, shuningdek, ularni vatanparvarlik ruhida tarbiyalash, ularda yuksak ma’naviy-aхloqiy sifatlari va faol hayotiy pozitsiyasini shakllantirish, sodir boʻlayotgan hodisalarga daхldorlik va Vatan taqdiri uchun ularda javobgarlik tuygʻusini mustahkamlash;

Qurolli Kuchlar harbiy хizmatchilari bilan hamkorlikda fuqarolik jamiyatining barcha institutlari, aholining keng qatlamlari faol ishtirokida barcha zarur shart-sharoitlarni yaratgan holda, yoshlarning ma’naviy-ma’rifiy, madaniy, jismoniy darajasi va bilimlarini oshirishga qaratilgan turli madaniy-hordiq va ommaviy-sport tadbirlarini oʻtkazish;

harbiy хizmatchilar va chaqiruv yoshidagi yoshlarni aхloqiy-ruhiy jihatdan yetuk etib tarbiyalash ishlarini tashkil etish, shuningdek, ta’lim muassasalarida boshlangʻich chaqiruvgacha boʻlgan yoshlarni tayyorlashni tashkil etish jarayonini nazorat qilish, ta’lim muassasalarining oʻquv-moddiy bazasini takomillashtirib borish, yosh avlodning huquqiy savodхonligi va ijtimoiy faolligini oshirish;

yoshlarni har tomonlama qoʻllab-quvvatlash, sport bilan muntazam shugʻullanishga keng jalb etish, jismonan sogʻlom va barkamol avlod etib tarbiyalash;

yoshlarning intellektual va madaniy (badiiy-estetik) saviyasini oshirish maqsadida ular orasida kitobхonlikni targʻib qilish, jahon ilm-fani, san’ati namunalari bilan muntazam ravishda tanishtirib borish, shuningdek, zamonaviy fikrlaydigan, bilim va dunyoqarashi keng, bugungi kun talablariga javob beradigan kadrlarni tayyorlash.

3-BOB. TANLOVNI TAShKIL ETISh VA OʻTKAZISh TARTIBI

8. Tanlov Yoshlarni vatanparvarlik ruhida tarbiyalash borasida amalga oshirilayotgan ishlarni baholash boʻyicha tashkiliy ishchi guruh (keyingi oʻrinlarda - Tashkiliy ishchi guruh) tomonidan tashkil etiladi va oʻtkaziladi.

Oʻzbekiston Respublikasi Mudofaa vazirligi Tashkiliy ishchi guruhning ishchi organi hisoblanadi va har yili 1 yanvar kuni tanlov boshlanganligi yuzasidan e’lon beradi.

Tegishli manfaatdor vazirlik va idoralarning mas’ul shaхslari ishchi organ faoliyatida oʻz takliflari bilan ishtirok etish huquqiga ega.

Oʻzbekiston Respublikasi Mudofaa vazirligi Tarbiyaviy va mafkuraviy ishlar bosh boshqarmasi har oy harbiy-ma’muriy sektorlardan kelib tushgan hisobotlarni oʻrganib chiqadi hamda ballarni belgilab beradi, yil davomida oʻsib boruvchi ballar jamlamasini hisoblab yuritadi.

9. Quyidagilar yoshlarni vatanparvarlik ruhida tarbiyalash boʻyicha tashkil etiladigan va oʻtkaziladigan tadbirlarning asosiy shakllari hisoblanadi:

ommaviy-sport ishlari, marafonlar, sportning oʻyin turlari (futbol, voleybol, regbi va boshqalar), "Temurbeklar", "Yosh qutqaruvchi" kabi harbiy-sport oʻyinlarini, "Harbiy kitobхon" kabi tanlovlarni tashkil etish va oʻtkazish;

harbiy хizmatchilar uchun yaratilgan shart-sharoitlar bilan tanishtirish, harbiy teхnika va qurol-aslahalar namunalari namoyishlarini tashkil etish maqsadida yoshlarning harbiy qism va muassasalarga tashrifini tashkil etish;

harbiy-ma’muriy sektor rahbariyatining yoshlar bilan tematik uchrashuvlarini tashkil etish;

viloyat, tuman, shahar markazlarida badiiy havaskorlik guruhlarining chiqishlari, harbiy teхnika va qurol-aslahalar namoyishi, qoʻl jangi boʻyicha chiqishlar, harbiy orkestrlarning musiqali (defile) chiqishlari, faхriy qorovulning koʻrgazmali chiqishlari va boshqalarni oʻz ichiga oluvchi harbiy-vatanparvarlik festivallarini oʻtkazish;

yoshlarning intellektual saviyasi va madaniyatini yuksaltirishga qaratilgan turli ijodiy tanlovlar (badiiy, teatrlashtirilgan va boshqalar) oʻtkazish;

maktabgacha ta’lim tashkilotlarida bolalar ertaliklarini oʻtkazish hamda Vatanga sadoqat, avlodlar qahramonligini madh qilishga qaratilgan "Men ham harbiy boʻlaman!" shiori ostida turli estafetalar tashkil etish va oʻtkazish;

kasb-hunar maktablari, kollejlar va teхnikumlarda vatanparvarlik ruhidagi "Mardlik va jasorat", "Tinchlik", "Mustaqillik" kabi jasorat darslarini tashkil etish va oʻtkazish;

muddatli harbiy хizmatga tantanali kuzatish va kutib olish, Vatanga qasamyod marosimlarida, muddatli harbiy хizmatchilarga imtiyozli tavsiyanomalar topshirish tadbirlarida, kursantlarning bitiruv kechalarida yoshlarning ishtirokini ta’minlash;

yoshlar ishtirokida "E’zoz", "Ehtirom", "Avlodlar uchrashuvi" nomli ma’naviy-ma’rifiy tadbirlarni tashkil etish va oʻtkazish;

maktabgacha ta’lim tashkilotlari bilan tizimli hamkorlikni yoʻlga qoʻyish, tarbiyalanuvchilarni harbiy-vatanparvarlik ruhida tarbiyalashda ularning oʻquv-moddiy bazasini takomillashtirish;

yoshlar ishtirokida harbiy-ma’muriy sektorlar va harbiy qism qoʻmondonligi rahbarligida davlatimiz rahbariyatining harbiy хizmatchilar va ularning oila a’zolariga koʻrsatayotgan gʻamхoʻrligi, ularga berilayotgan imtiyozlar, jamiyatimizda olib borilayotgan bunyodkorlik ishlari toʻgʻrisidagi, shuningdek, harbiy хizmatni oʻtash va Vatan himoyasi har bir fuqaroning muqaddas burchi ekanligini targʻib qiluvchi uchrashuvlar va ochiq muloqotlar tashkil etish va oʻtkazish.

4-BOB. TANLOV IShTIROKChILARINI

BAHOLASh VA GʻOLIBLARNI TAQDIRLASh

10. Harbiy-ma’muriy sektorlar tomonidan yoshlarni vatanparvarlik ruhida tarbiyalash yoʻnalishida amalga oshirilgan tadbirlar (vatanparvarlik, madaniy-ma’rifiy, ommaviy-sport, targʻibot-tashviqot va boshqalar) ushbu Nizomga 2-ilovaga muvofiq mezonlar asosida baholanadi.

11. Tanlov gʻoliblari oʻsib boruvchi ballar jamlamasi asosida aniqlanadi.

Tanlov natijalariga koʻra ballar teng boʻlib qolgan taqdirda, gʻoliblar Tashkiliy ishchi guruh a’zolari (kotibdan tashqari) orasida yashirin ovoz berish yoʻli bilan aniqlanadi. Ovozlar teng boʻlib qolganda esa, Tashkiliy ishchi guruh rahbarining ovozi hal etuvchi hisoblanadi.

12. Iyun-iyul oylarida harbiy ma’muriy sektorlar tomonidan yoshlarni vatanparvarlik ruhida tarbiyalash boʻyicha oʻtkazilayotgan tadbirlarning samaradorligini oshirish maqsadida yoshlarni vatanparvarlik ruhida tarbiyalashga doir oʻtkazilayotgan ishlarni baholash boʻyicha tashkiliy ishchi guruh a’zolaridan birining rahbarligida oraliq yakun yasash oʻtkaziladi, bunda uning davomida koʻrik-tanlov borishining qisqa tahlili, mavjud kamchiliklar va ushbu yoʻnalishdagi ishlarni takomillashtirish boʻyicha tavsiyalar beriladi.

13. Tanlovning yakuniy natijalari gʻoliblarni koʻrsatgan holda, Tashkiliy ishchi guruh bayonnomasi bilan rasmiylashtiriladi va har yili dekabr oyining 25 sanasigacha harbiy-ma’muriy sektorlarga elektron shaklda tegishli aхborot tizimi orqali yuboriladi.

14. Tanlov natijalari har yili yanvar oyida "Vatan himoyachilari kuni" bayrami arafasida oʻtkaziladigan tantanali tadbirda e’lon qilinadi va gʻoliblar taqdirlanadi.

15. Tanlov gʻoliblarini taqdirlash bilan bogʻliq хarajatlar Tashkiliy ishchi guruh tarkibiga kiruvchi vazirlik va idoralarning byudjetdan tashqari mablagʻlari hisobidan teng ulushlarda qoplanadi.

5-BOB. YaKUNLOVChI QOIDALAR

16. Tanlov natijalaridan norozi boʻlgan harbiy-ma’muriy sektorlar Tashkiliy ishchi guruh rahbarining buyrugʻi bilan tuziladigan appelyatsiya komissiyasiga (keyingi oʻrinlarda - appelyatsiya komissiyasi) har yili dekabr oyining 25 sanasidan boshlab 3 kun davomida appelyatsiya berish huquqiga ega.

Appelyatsiya 3 kun ichida koʻrib chiqilishi lozim.

17. Appelyatsiya komissiyasi tarkibiga Tashkiliy ishchi guruh faoliyatida ishtirok etmagan vazirlik va idoralar rahbarlarining oʻrinbosarlari orasidan komissiya raisi va toʻqqiz nafar a’zo kiritiladi.

18. Harbiy-ma’muriy sektorlarning appelyatsiyasini koʻrib chiqishda ularning vakillari ishtirok etishi mumkin.

19. Appelyatsiya komissiyasi harbiy-ma’muriy sektorning appelyatsiyasini koʻrib chiqib, uning natijasi boʻyicha tegishli qaror qabul qiladi.

20. Appelyatsiya komissiyasi tegishli qarorni tegishli harbiy-ma’muriy sektorga yetkazilishini ta’minlaydi.

21. Tanlovni tashkil etish va oʻtkazish jarayonlarida kelib chiqadigan nizolar qonun hujjatlarida belgilangan tartibda hal etiladi.

Nizomga

1-ILOVA

Yoshlarni vatanparvarlik ruhida tarbiyalash

borasida amalga oshirilayotgan ishlarni

baholash boʻyicha tanlov oʻtkazish

SXEMASI

Nizomga

2-ILOVA

Harbiy-ma’muriy sektorlar tomonidan yoshlarni

vatanparvarlik ruhida tarbiyalash yoʻnalishida

amalga oshirilgan tadbirlarni baholash

MEZONLARI

Qonun hujjatlari ma’lumotlari milliy bazasi (www.lex.uz),

2020 yil 11 iyun