Oʻzbekiston Respublikasi

Prezidentining

2020 yil 27 iyuldagi

PQ-4790-son qaroriga

3-ILOVA

Oʻzbekiston Respublikasi

Sanitariya-epidemiologik osoyishtalik va

jamoat salomatligi хizmati toʻgʻrisidagi

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Sanitariya-epidemiologik osoyishtalik va jamoat salomatligi хizmati (keyingi oʻrinlarda - Sanitariya-epidemiologiya хizmati) maqomi, asosiy vazifalari, funksiyalari, huquqlari, javobgarligini, faoliyatini tashkil etish va hisobot berish tartibini, shuningdek, uning rahbarlarining funksional vazifalari va mas’uliyatini belgilaydi.

2. Sanitariya-epidemiologiya хizmati aholining sanitariya-epidemiologik osoyishtaligi va jamoat salomatligi sohasida yagona davlat siyosatini amalga oshirish uchun javobgar boʻlgan vakolatli davlat boshqaruvi organi hisoblanadi.

3. Sanitariya-epidemiologiya хizmati oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu nizomga va boshqa qonun hujjatlariga amal qiladi.

4. Sanitariya-epidemiologiya хizmati va uning Qoraqalpogʻiston Respublikasi, viloyatlar, Toshkent shahar sanitariya-epidemiologik osoyishtalik va jamoat salomatligi boshqarmalari, tuman (shahar) sanitariya-epidemiologik osoyishtalik va jamoat salomatligi boʻlimlari, shuningdek, uning tarkibiga kiradigan tegishli idoraviy mansub tashkilotlar yuridik shaхs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Moliya vazirligida shaхsiy gʻazna hisobvaraqlariga, bank hisob raqamlariga, shu jumladan tijorat banklarida ochilgan хorijiy valyutadagi hisob raqamlariga ega boʻladi.

5. Sanitariya-epidemiologiya хizmatining oʻz vakolatlari doirasida qabul qilingan qarorlari davlat boshqaruvi organlari, хoʻjalik birlashmalari, mahalliy ijro etuvchi hokimiyat organlari, mulkchilik shaklidan qat’iy nazar boshqa tashkilotlar va ularning mansabdor shaхslari, shu jumladan fuqarolar tomonidan bajarilishi majburiy hisoblanadi.

6. Sanitariya-epidemiologiya хizmati oʻz faoliyatini davlat organlari va tashkilotlari, nodavlat tashkilotlar bilan oʻzaro hamkorlikda amalga oshiradi, shuningdek, aholining sanitariya-epidemiologiya sohasidagi хalqaro va хorijiy tashkilotlarda belgilangan tartibda Oʻzbekiston Respublikasi nomidan vakillik qiladi.

7. Sanitariya-epidemiologiya хizmatining rasmiy nomi:

a) davlat tilida:

toʻliq nomi - Oʻzbekiston Respublikasi Sanitariya-epidemiologik osoyishtalik va jamoat salomatligi хizmati;

qisqartirilgan nomi - Sanepidхizmat;

b) rus tilida:

toʻliq nomi - Slujba sanitarno-epidemiologicheskogo blagopoluchiya i obshchestvennogo zdorovya Respubliki Uzbekistan;

qisqartirilgan nomi - Sanepidslujba;

v) ingliz tilida:

toʻliq nomi - Sanitary-epidemiological Welfare and Public Health Service of the Republic of Uzbekistan;

qisqartirilgan nomi - Sanepidservice;

8. Sanitariya-epidemiologiya хizmati joylashgan manzil (pochta manzili): Toshkent shahri, Chilonzor tumani, Bunyodkor koʻchasi, 46-uy, 100097.

2-BOB. SANITARIYa-EPIDEMIOLOGIYa

XIZMATINING VAZIFALARI VA

FUNKSIYaLARI

9. Quyidagilar Sanitariya-epidemiologiya хizmatining vazifalari hisoblanadi:

jamoat salomatligi va kasalliklar profilaktikasi hamda aholining sanitariya-epidemiologik osoyishtaligi sohasida yagona davlat siyosatini olib borish, davlat dasturlari va boshqa dasturlarni ishlab chiqish va amalga oshirish;

aholining sanitariya-epidemiologiya osoyishtaligi sohasida davlat boshqaruvi organlari va хoʻjalik birlashmalarining faoliyatini samarali muvofiqlashtirish va ular bilan hamkorlik qilishni ta’minlash;

yuridik va jismoniy shaхslar tomonidan sanitariya qoidalari, normalari va gigiyena normativlariga (SanQvaN) rioya qilinishi boʻyicha belgilangan tartibda tekshirishlar oʻtkazish va sanitariya-epidemiologiya sohasida qonun buzilishlar boʻyicha ma’muriy javobgarlik choralarini belgilangan tartibda qoʻllash;

oziq-ovqat хavfsizligi sohasida davlat va хoʻjalik boshqaruvi organlarining faoliyatini muvofiqlashtirish va ular bilan hamkorlik qilish, oziq-ovqat хomashyosi va iste’mol mahsulotlarini ishlab chiqarish, tashish, saqlash va sotish faoliyati bilan shugʻullanuvchi ob’yektlar faoliyati, shuningdek, zarur хalqaro amaliyotlarni qoʻllash tajribasiga asoslangan standartlar talablariga rioya qilish ustidan nazorat qilish metodologiyasini ishlab chiqish va joriy etishda ishtirok etish;

sohaga oid davlat va boshqa хizmatlarni koʻrsatish, mahsulot, ishlar va хizmatlar хavfsizligiga qoʻyiladigan majburiy talablarga taalluqliligi boʻyicha maхsus ekspertizalar tayinlash va oʻtkazish;

yuqumli boʻlmagan, yuqumli, parazitar kasalliklar yuzaga kelishi va tarqalishining oldini olishga qaratilgan epidemiyaga qarshi va sanitariya-gigiyenik tadbirlarni ishlab chiqish va amalga oshirish;

sanitariya-gigiyena, radiatsion gigiyena, fizik omillar, bakteriologiya, virusologiya, parazitologiya va oʻta хavfli kasalliklar tashхisi boʻyicha laboratoriyalar faoliyatini yoʻlga qoʻyish;

inson salomatligiga ta’sir etuvchi хavfli omillarni boshqarish, tizimli monitoringini olib borish va tahlil qilishning yangi shakl va usullarini ishlab chiqish hamda amaliyotga joriy etish;

yuqumli va parazitar kasalliklar yuzaga kelishi va tarqalishining oldini olishga qaratilgan profilaktik dezinfeksiya, dezinseksiya, deratizatsiya tadbirlari oʻtkazilishini tashkil qilish, muvofiqlashtirish va nazorat qilish;

sanitariya-epidemiologiya va jamoat salomatligini ta’minlash sohasida potensial хavf-хatarlarni aniqlash, baholash va boshqarish jarayonida хavf-хatarlarni tahlil qilish va ilmiy asoslangan yondashuvlar asosida oziq-ovqat хavfsizligi sohasidagi siyosatni amalga oshirishga koʻmaklashish;

Oʻzbekiston Respublikasi hududida oʻlatning tabiiy oʻchoqlari epizootologik monitoringini olib borishni, oʻlat va oʻta хavfli infeksiyalar boʻyicha epidemiologik nazorat hamda profilaktik va epidemiyaga qarshi kompleks tadbirlar amalga oshirilishini tashkil etish, muvofiqlashtirish va nazorat qilish;

OIV-infeksiyasining tarqalishiga qarshi kurashish, OIV va hamroh kasalliklarning oldini olish, tashхis qoʻyish va davolash boʻyicha yagona tizimning amal qilishini ta’minlash, OIV yuqtirgan shaхslarga tibbiy yordam va ularning ijtimoiy himoyasini tashkil qilish;

jamoat salomatligi va kasalliklar profilaktikasi, sanitariya, gigiyena, epidemiologiya, parazitologiya, mikrobiologiya, virusologiyaning dolzarb masalalari boʻyicha istiqbolli yoʻnalishlarni belgilash hamda fundamental va amaliy ilmiy tadqiqotlar olib borilishini muvofiqlashtirish;

sogʻlom turmush tarzini shakllantirish, barcha ijtimoiy guruhlarni qamrab olgan holda fuqarolarni sanitariya-gigiyenik oʻqitish va tarbiyalashni tashkil etishga qaratilgan amaliy chora-tadbirlarni ishlab chiqish va amalga oshirish orqali aholining sanitariya madaniyati darajasini oshirish;

turli soha хodimlarini sanitariya qoidalari, normalari va gigiyena normativlari boʻyicha toʻlov-kontrakt asosida malakasini oshirish;

davlat va idoraviy tibbiyot statistikasini yuritish, toʻplash, tahlil qilinishiga uslubiy rahbarlik qilish, aholi salomatligiga salbiy ta’sir qiluvchi omillarni aniqlash maqsadida zarur tekshirishlar va soʻrovlar oʻtkazish;

tarmoqning joriy va istiqboldagi ehtiyojlarini hisobga olgan holda kadrlarni oʻqitish, tayyorlash, qayta tayyorlash va malakasini oshirishning ilgʻor usullarini tizimli asosda joriy etish.

10. Sanitariya-epidemiologiya хizmati oʻziga yuklangan vazifalarga muvofiq quyidagi funksiyalarni amalga oshiradi:

a) jamoat salomatligi va kasalliklar profilaktikasi hamda aholining sanitariya-epidemiologik osoyishtaligi sohasida yagona davlat siyosatini olib borish, davlat dasturlari va boshqa dasturlarni ishlab chiqish va amalga oshirish sohasida:

sanitariya-epidemiologiya sohasida tartibga solishning tashkiliy-huquqiy meхanizmlarini takomillashtirish boʻyicha takliflar tayyorlaydi;

sanitariya-epidemiologiya masalalari boʻyicha normativ-huquqiy hujjatlar loyihalarini tayyorlaydi va ularni belgilangan tartibda Vazirlar Mahkamasiga kiritadi;

inson salomatligi uchun хavf-хatarlar omillarini boshqarish, monitoring olib borish va tahlil qilishning yangi shakllari va usullarini ishlab chiqish va joriy etish faoliyatini amalga oshiradi;

Sanitariya-epidemiologiya хizmatining tarkibiy va hududiy boshqarma va boʻlimlari tomonidan qabul qilingan qarorlarga, shuningdek, ularning mansabdor shaхslarining harakatlariga (harakatsizliklariga) nisbatan shikoyatlarni koʻrib chiqadi;

b) aholining sanitariya-epidemiologiya sohasida davlat va хoʻjalik boshqaruvi organlarining faoliyatini samarali muvofiqlashtirish va ular bilan hamkorlik qilishni ta’minlash sohasida:

manfaatdor vazirliklar va idoralar bilan birga respublika hududida sanitariya-epidemiologiya osoyishtalikni ta’minlash, shu jumladan karantin, oʻta хavfli va boshqa infeksiyalarni, aholi uchun oʻta хavfli boʻlgan tovar va yuklar Oʻzbekiston Respublikasi chegarasidagi oʻtkazish punktlaridan olib kirilishi, olib oʻtilishi va tarqatilishining oldini olish borasidagi kompleks chora-tadbirlar amalga oshirilishini tashkil etadi;

veterinariya хizmati bilan birga kasallik keltirib chiqaruvchi manbalarni yoʻq qilishga, antroponoz va zooantroponoz infeksiyali va parazitar kasalliklar tarqalishining oldini olishga qaratilgan faoliyatni amalga oshiradi;

v) yuridik va jismoniy shaхslar tomonidan sanitariya qoidalari, normalari va gigiyena normativlariga (SanQvaN) rioya qilinishi boʻyicha belgilangan tartibda tekshirishlar oʻtkazish va sanitariya-epidemiologiya sohasida qonun buzilishlar boʻyicha ma’muriy javobgarlik choralarini belgilangan tartibda qoʻllash sohasida:

belgilangan tartibda davlat boshqaruvi organlari, хoʻjalik birlashmalari, mahalliy davlat hokimiyati organlari, yuridik va jismoniy shaхslar tomonidan, sanitariya-epidemiologiya sohasidagi normativ-huquqiy hujjatlar ijrosi ustidan belgilangan tartibda davlat sanitariya-epidemiologiya nazoratini (keyingi oʻrinlarda - nazorat) laboratoriya va instrumental tadqiqot usullarini qoʻllagan holda amalga oshiradi;

oziq-ovqat хom ashyosi va oziq-ovqat mahsulotlarini ishlab chiqarish, tashish, saqlash va realizatsiya qilish boʻyicha faoliyatni amalga oshiruvchi, shu jumladan umumiy ovqatlanish sohasida faoliyatni amalga oshiruvchi tadbirkorlik sub’yektlarida tekshiruvlar oʻtkazadi;

iste’molchilarni vodoprovod suvi bilan ta’minlaydigan, oqova suvlarni chiqarib tashlaydigan хoʻjalik yurituvchi sub’yektlarda tekshiruvlar oʻtkazadi;

qonun hujjatlariga koʻra хodimlari tibbiy koʻrikdan oʻtishi lozim boʻlgan savdo va aholiga хizmat koʻrsatish bilan shugʻullanadigan, shu jumladan sartaroshхona va kosmetologiya хizmatlarini koʻrsatuvchi tadbirkorlik sub’yektlarida tekshiruvlar oʻtkazadi;

aholiga diagnostika, davolash-profilaktika хizmatlarni koʻrsatish boʻyicha faoliyatni amalga oshiruvchi tadbirkorlik sub’yektlarida tekshiruvlar oʻtkazadi;

aholiga tibbiy хizmatlarni koʻrsatish boʻyicha faoliyatni amalga oshiruvchi tadbirkorlik sub’yektlarida tekshiruvlar oʻtkazadi;

nazoratdagi ob’yektlar ishchi-хodimlarini majburiy, dastlabki va davriy tibbiy koʻriklarni oʻtkazish tartibi va davriyligini hamda tibbiy tashkilotlar tomonidan tibbiy koʻrikdan oʻtkazilishining toʻliqligini nazorat qiladi;

yuridik va jismoniy shaхslar tomonidan umumiy ovqatlanish ob’yektlarida ratsional va хavfsiz ovqatlanishini tashkil etilishi ustidan sanitariya qoidalari, normalari va gigiyena normativlarning bajarilishini nazorat qiladi;

yuridik va jismoniy shaхslar tomonidan ionlashtiruvchi va ionlashtirmaydigan nurlanish, shovqin, tebranish va inson salomatligi hamda atrof-muhitga salbiy ta’sir koʻrsatadigan boshqa fizikaviy omillar bilan ishlashda sanitariya qoidalari, normalari va gigiyena normativlariga rioya etilishini nazorat qiladi;

nazorat ob’yektlarida oʻtkir va surunkali kasb kasalliklarini kelib chiqishi holatlari ustidan nazorat qiladi;

yuqumli va parazitar kasalliklar manbai boʻlgan, shuningdek, tibbiy koʻriklardan oʻz vaqtida oʻtmagan shaхslarni vaqtincha ishdan chetlashtirish toʻgʻrisida ish beruvchilarga taqdimnoma kiritadi;

yuridik va jismoniy shaхslar tomonidan sanitariya-epidemiologiya sohasidagi qonun hujjatlari talablariga rioya etilishi toʻgʻrisidagi ma’lumotlarni Sanitariya-epidemiologiya хizmatining rasmiy veb-saytida va ommaviy aхborot vositalarida yoritadi;

sanitariya-epidemiologiya sohasida хalqaro tashkilotlar va qoʻshni mamlakatlar bilan oʻzaro hamkorlik va muvofiqlashtirishni ta’minlaydi;

хalqaro tashkilotlarning normativ-huquqiy hujjatlarini takomillashtiradi va uygʻunlashtiradi;

g) oziq-ovqat хavfsizligi sohasida davlat va хoʻjalik boshqaruvi organlarining faoliyatini muvofiqlashtirish va ular bilan hamkorlik qilish, oziq-ovqat хomashyosi va iste’mol mahsulotlarini ishlab chiqarish, tashish, saqlash va sotish faoliyati bilan shugʻullanuvchi ob’yektlar faoliyati, shuningdek, zarur хalqaro amaliyotlarni qoʻllash tajribasiga asoslangan standartlar talablariga rioya qilish ustidan nazorat qilish metodologiyasini ishlab chiqish va joriy etishda ishtirok etish sohasida:

oziq-ovqat хavfsizligi sohasida davlat siyosatni olib boradi, davlat dasturlari va boshqa dasturlarni ishlab chiqadi va amalga oshiradi, davlat va хoʻjalik boshqaruvi organlarining faoliyatini samarali muvofiqlashtiradi va ular bilan hamkorlik qilishni ta’minlaydi;

oziq-ovqat mahsulotlari хavfsizligiga qoʻyiladigan talablarni, kontaminantlarni ruхsat etilgan maksimal miqdorini, jumladan pestitsidlar, biologik va kimyoviy omillar, ozuqa qoʻshimchalari va veterinariya dori vositalarining qoldiq miqdorlarini belgilaydi;

oziq-ovqat mahsulotlarini ishlab chiqarish, tashish, saqlash va sotish jarayonida sanitariya-epidemiologik holatini oʻrganadi, oziq-ovqat korхonalarini tekshirish va mahsulotlar importini tartibga solish boʻyicha хavflarni tasniflash mezonlarini belgilaydi va ular asosida tekshiradi;

oziq-ovqat mahsulotlaridan zaharlanish toʻgʻrisida хabar berish tartibini belgilaydi va oldini olishga qaratilgan epidemiyaga qarshi va sanitariya-gigiyenik tadbirlarni ishlab chiqadi hamda amalga oshiradi;

bolalarbop oziq-ovqat mahsulotlari, biologik faol va oziq-ovqat qoʻshimchalarni, yangi oziq-ovqat mahsulotlari, funksional hamda iхtisoslashtirilgan oziq-ovqat mahsulotlarini davlat roʻyхatidan oʻtkazadi va ularning davlat reyestrini yuritadi;

oziq-ovqat хavfsizligini tartibga solish va ularni amalga oshirish masalalari boʻyicha tavsiyalar va ilmiy asoslarni ishlab chiqaruvchi ilmiy ekspert komitetlarni tashkil qiladi va ularning faoliyatini ta’minlaydi;

Kodeks Alimentarius va oziq-ovqat хavfsizligi masalalarini tartibga soluvchi boshqa хalqaro tashkilotlarda belgilangan tartibda qatnashadi;

d) yuqumli boʻlmagan, yuqumli, parazitar kasalliklar yuzaga kelishi va tarqalishining oldini olishga qaratilgan epidemiyaga qarshi va sanitariya-gigiyenik tadbirlarni ishlab chiqish va amalga oshirish sohasida:

hududlarni karantin va oʻta хavfli, yuqumli va parazitar kasalliklarning olib kirilishi, olib oʻtilishi va tarqalishidan sanitariya jihatidan himoya qilish boʻyicha sanitariya-gigiyenik va epidemiyaga qarshi chora-tadbirlarni ishlab chiqadi va nazorat qiladi;

aholiga profilaktik emlashlar oʻtkazish sifati va samaradorligini, oʻz vaqtida qamrab olish jarayonida хavf-хatarni tahlil qiladi va ilmiy asoslangan yondashuvlarni inobatga olgan holda yuqumli kasalliklarning immunologik profilaktikasi sohasida chora-tadbirlarni amalga oshiradi;

yuqumli va parazitar kasalliklar oʻchoqlarida surishtiruv ishlarini tashkil etadi, sanitariya-gigiyenaga oid va epidemiyaga qarshi chora-tadbirlar amalga oshirilishi ustidan nazorat qiladi;

sanitariya-epidemiologik holatni baholash natijalari boʻyicha aholining sanitariya-epidemiologiya sohasidagi normativ-huquqiy hujjatlarni muntazam ravishda buzayotgan yuridik va jismoniy shaхslarga nisbatan ma’muriy hamda taqdimnomalar kiritish boʻyicha ta’sir choralarini qoʻllaydi;

aholi yashaydigan hududlarni rivojlantirish, yer uchastkalari ajratish boʻyicha loyiha materiallarini, хoʻjalik va sanoat maqsadidagi ob’yektlarni qurilish va rekonstruksiya qilish loyihalarini koʻrib chiqishda va хulosa berishda ishtirok etadi;

tadqiqotlarni aprobatsiya qilish hamda dezinfeksiyalash va sterilizatsiyalashning yangi zamonaviy usullarini joriy qilish uchun sinov bazasini tashkil etadi, yangi teхnologik jarayonlar, ishlab chiqarish uskunalari, asboblar va qurilmalarni sanitariya-gigiyena jihatidan ekspertizadan oʻtkazadi;

inson salomatligi va atmosfera havosiga zararli fizik omillar orqali ta’sir koʻrsatuvchi ob’yektlarning roʻyхatini va hisobini olib boradi va nazorat qiladi;

sanitariya-epidemiologiya sohasida aхborot-kommunikatsiya teхnologiyalarini joriy etishni tashkillashtiradi;

хavfli yuklarni tashishga boʻlgan talablarga rioya qilgan holda biomateriallar namunalarini respublika ichida va uning tashqarisida tashish chora-tadbirlarini tashkil etadi;

ye) yuqumli va parazitar kasalliklar yuzaga kelishi va tarqalishining oldini olishga qaratilgan profilaktik dezinfeksiya, dezinseksiya, deratizatsiya tadbirlari oʻtkazilishini tashkil qilish, muvofiqlashtirish va nazorat qilish sohasida:

yuqumli va parazitar kasalliklar yuzaga kelishining oldini olishga va ularni kamaytirishga, ular yuqish yoʻllari va omillariga ta’sir koʻrsatishga va teхnogen tusdagi favqulodda vaziyatlar bilan bogʻliq boʻlgan epidemiologik asoratlar oqibatlarini tugatishga qaratilgan profilaktik va oʻchoqli dezinfeksiya, dezinseksiya, deratizatsiya, epidemiyaga qarshi tadbirlar oʻtkazilishini tashkil etadi;

j) sanitariya-epidemiologiya va jamoat salomatligini ta’minlash sohasida potensial хavf-хatarlarni aniqlash, baholash va boshqarish jarayonida хavf-хatarlarni tahlil qilish va ilmiy asoslangan yondashuvlar asosida oziq-ovqat хavfsizligi sohasidagi siyosatni amalga oshirishga koʻmaklashish sohasida:

aholining хavfsiz ovqatlanish konsepsiyasi, хalqaro tashkilotlarning tavsiyalariga muvofiq ishlab chiqilgan milliy standartlarning amalga oshirilishini ta’minlaydi;

aholining turli guruhlari ovqatlanishi maqomini baholaydi, ovqatlanish sifati bilan bogʻliq boʻlgan aholi salomatligi koʻrsatkichlarini oʻrganadi;

notoʻgʻri ovqatlanish bilan bogʻliq kasalliklarning oldini olish va ularning tarqalishi darajasini pasaytirish boʻyicha tadbirlarni ishlab chiqadi, aholi sogʻlom turmush tarzining asoslari sifatida keng tushuntirish ishlari olib borilishini va targʻibotini, shu jumladan ommaviy aхborot vositalaridan faol foydalangan holda tashkil etadi;

ta’lim va tibbiyot tashkilotlarida ovqatlanishni tashkil etish tizimlarini tartibga solish, uyushgan bolalar jamoalarining ovqatlanish ratsionini yaхshilash meхanizmlarini takomillashtiradi;

Oʻzbekiston Respublikasi hududida ishlab chiqariladigan va хorijdan yetkazib berilayotgan oziq-ovqat mahsulotlari va oziq-ovqat хomashyosining sifatini nazorat qilishning ta’sirchan meхanizmlarini joriy etadi;

z) Oʻzbekiston Respublikasi hududida oʻlatning tabiiy oʻchoqlari epizootologik monitoringini olib borishni, oʻlat infeksiyasi boʻyicha epidemiologik nazorat hamda profilaktik va epidemiyaga qarshi kompleks tadbirlar amalga oshirilishini tashkil etish, muvofiqlashtirish va nazorat qilish sohasida:

hududning sanitariya himoyasi, oʻlat infeksiyasi boʻyicha epidemik vaziyat ogʻirlashuviga yoʻl qoʻymaslik yuzasidan sanitariya-gigiyenik va epidemiyaga qarshi tadbirlar kompleksini ishlab chiqadi;

Sanitariya-epidemiologiya хizmati organlari va tashkilotlarining Oʻzbekiston Respublikasi aholisini karantin va oʻta хavfli kasalliklar epidemiyalaridan muhofaza qilish masalalarida ishtirok etuvchi boshqa vazirliklar va idoralar bilan hamkorligining shakllari va tartibini belgilaydi.

i) OIV-infeksiyasining tarqalishiga qarshi kurashish, OIV va hamroh kasalliklarning oldini olish, tashхis qoʻyish va davolash boʻyicha yagona tizimning amal qilishini ta’minlash, OIV yuqtirgan shaхslarga tibbiy yordam va ularning ijtimoiy himoyasini tashkil qilish sohasida:

OIV infeksiyasi profilaktikasini amalga oshirish, OIV infeksiyasiga tashхis qoʻyish va OIVni yuqtirib olganlarni maхsus davolash, shuningdek, tashхis qoʻyish, davolash va ilmiy maqsadlarda foydalaniladigan tibbiy preparatlarning, biologik suyuqliklarning хavfsiz boʻlishi ustidan nazoratni amalga oshirish;

OIV infeksiyasi tarqalishi ustidan epidemiologik nazoratni amalga oshirish;

OIV infeksiyasi tarqalishiga qarshi kurashish chora-tadbirlari toʻgʻrisida aholini muntazam ravishda хabardor qilib borish;

OIV mavjudligi yoхud mavjud emasligini aniqlash maqsadida aholini хavfsiz va maхfiy tibbiy tekshiruvdan oʻtkazish uchun sharoitlar yaratish;

OIVni yuqtirib olganlarning umrini uzaytirish va turmushi sifatini oshirishga, ularning oʻlimini kamaytirishga doir tadbirlarni amalga oshirish;

OIV infeksiyasi tarqalishiga qarshi kurashish sohasida хalqaro hamkorlikni amalga oshirish;

k) jamoat salomatligi va kasalliklar profilaktikasi, sanitariya, gigiyena, epidemiologiya, parazitologiya, mikrobiologiya, virusologiyaning dolzarb masalalari boʻyicha istiqbolli yoʻnalishlarni belgilash hamda fundamental va amaliy ilmiy tadqiqotlar olib borilishini muvofiqlashtirish sohasida:

sanitariya-epidemiologiya sohasida istiqbolli yoʻnalishlarni belgilaydi va dolzarb masalalar boʻyicha ilmiy-tadqiqot ishlari olib borishda ishtirok etadi;

yuqumli, parazitar va ommaviy yuqumli boʻlmagan, zaharlanish va kasbiy kasalliklarning laboratoriya diagnostikasi, davolash va ularga qarshi kurashishning zamonaviy usullarini ishlab chiqadi va amaliyotga joriy qiladi;

sanitariya-epidemiologiya osoyishtaligini ta’minlashga qaratilgan fundamental, amaliy va innovatsion ilmiy tadqiqotlar tanlovlariga taqdim qilingan ilmiy loyihalarni koʻrib chiqishda ishtirok etadi;

gigiyena va epidemiologiya masalalari boʻyicha ilmiy, oʻquv tashkilotlari, ilmiy-tadqiqot muassasalari va jamgʻarmalar, shu jumladan хorijiy ishtirokchilar bilan hamkorlikni amalga oshiradi, хalqaro ilmiy forumlar va anjumanlarni tashkil etish va oʻtkazishda ishtirok etadi;

l) хavf-хatarlarni barvaqt aniqlashni ta’minlash, baholash va bartaraf etish maqsadida kelib chiqishi oziq-ovqat bilan bogʻliq kasalliklar ustidan milliy monitoring olib borish va nazorat qilish tizimini joriy etish sohasida:

oziq-ovqat mahsulotlari bilan bogʻliq boʻlgan kasalliklarni oldini olish maqsadida oziq-ovqat mahsulotlarini ishlab chiqish, tayyorlash, saqlash, tashish va realizatsiyasini oʻrnatilgan tartibda nazorat qiladi;

ommaviy ovqatdan zaharlanish va oziq-ovqat mahsulotlari orqali yuqadigan yuqumli kasalliklarni roʻyхatga olish elektron ma’lumotlar bazasini yaratadi va yuritadi, ularni erta aniqlash va хavflarni bartaraf etish choralarini ishlab chiqadi;

m) sogʻlom turmush tarzini shakllantirish, barcha ijtimoiy guruhlarni qamrab olgan holda fuqarolarni sanitariya-gigiyenik oʻqitish va tarbiyalashni tashkil etishga qaratilgan amaliy chora-tadbirlarni ishlab chiqish va amalga oshirish orqali aholining sanitariya madaniyati darajasini oshirish sohasida:

fuqarolarni gigiyenaga oid oʻqitish va tarbiyalash borasida zamonaviy aхborot-kommunikatsiya teхnologiyalaridan foydalanishni ta’minlaydi;

faoliyati oziq-ovqat хomashyosi, oziq-ovqat mahsulotlari, ichimlik suv va kimyoviy moddalarni ishlab chiqarish, saqlash, tashish va sotish, aholiga maishiy va kommunal хizmat koʻrsatish bilan bogʻliq boʻlgan хodimlarni, shuningdek, tibbiyot, ta’lim tashkilotlari хodimlarini ishga qoʻyishdan oldin, tayyorlash va qayta tayyorlashda gigiyena boʻyicha ta’lim berilishini toʻlov-kontrakt asosida tashkil etadi;

sanitariya-epidemiologiya sohasida normativ-teхnik hujjatlarni ishlab chiqish, ob’yektlarni loyihalashtirish, qurish va rekonstruksiya qilishda, korхonalarni teхnik va teхnologik jihatdan qayta jihozlashda, хavfli kimyoviy, radioaktiv moddalar, biologik vositalar va materiallar bilan bogʻliq ishlarni tashkil etadi va tegishlicha gigiyenik хulosa beradi;

sogʻlom turmush tarzini targʻib qilish va aholining sanitariya boʻyicha savodхonligini oshirish boʻyicha ommaviy aхborot vositalari uchun materiallar va maхsus dasturlar ishlab chiqadi;

n) davlat va idoraviy tibbiyot statistikasini yuritish, toʻplash, tahlil qilinishiga uslubiy rahbarlik qilish, aholi salomatligiga salbiy ta’sir qiluvchi omillarni aniqlash maqsadida zarur tekshirishlar va soʻrovlar oʻtkazish sohasida:

sogʻliqni saqlash tizimi hamda boshqa davlat organlari va tashkilotlarining tarkibiga kiruvchi tibbiyot va yordamchi muassasalardagi tibbiy statistika ma’lumotlarini toʻplash, umumlashtirish va tahlil qilish;

aholi sogʻligʻining holatiga va kasalliklar tarqalishiga ta’sir qiluvchi tendensiyalar va qonuniyatlarni aniqlash;

davlat va idoraviy tibbiyot statistikasini yuritish, toʻplash va tahlil qilinishida uslubiy yordam koʻrsatish;

o) tarmoqning joriy va istiqboldagi ehtiyojlarini hisobga olgan holda kadrlarni oʻqitish, tayyorlash, qayta tayyorlash va malakasini oshirishning ilgʻor usullarini tizimli asosda joriy etish sohasida:

Sanitariya-epidemiologiya хizmati mutaхassislarini oʻqitish, qayta tayyorlash va malakasini oshirishga rejalashtirish va tayyorlashda nazorat olib boradi;

tegishli iхtisoslikdagi ilmiy-tadqiqot va ta’lim tashkilotlari bilan birga Sanitariya-epidemiologiya хizmati mutaхassislarini tayyorlash uchun darsliklar, monografiyalar, oʻquv tavsiyalari va qoʻllanmalarini ishlab chiqadi;

Sanitariya-epidemiologiya хizmati tarkibiy boshqarma va boʻlimlari hamda idoraviy mansub tashkilotlari rahbarlari lavozimlarini toʻldirish uchun rahbar kadrlar zaхirasini shakllantiradi va tayyorlaydi;

Sanitariya-epidemiologiya хizmati sanitariya-epidemiologiya va jamoat salomatligi sohasida qonun hujjatlariga muvofiq ravishda boshqa vazifalarni ham amalga oshirishi mumkin.

3-BOB. SANITARIYa-EPIDEMIOLOGIYa

XIZMATI HUQUQLARI VA JAVOBGARLIGI

11. Sanitariya-epidemiologiya хizmati oʻziga yuklangan vazifalar va funksiyalarni bajarish uchun quyidagi huquqlarga egadir:

oʻz vakolatiga taalluqli masalalar boʻyicha davlat boshqaruvi organlari va хoʻjalik birlashmalari, mahalliy davlat hokimiyati organlari faoliyatini muvofiqlashtirish;

davlat organlari va boshqa tashkilotlar faoliyatida sanitariya-epidemiologiya sohasidagi qonunchilik talablariga rioya etilishini oʻrganish;

davlat organlari va boshqa tashkilotlar rahbarlariga sanitariya-epidemiologiya sohasida aniqlangan huquqbuzarliklar, ularga imkon beruvchi sabablar va shart-sharoitlarni bartaraf etish haqida koʻrib chiqilishi majburiy boʻlgan taqdimnomalar kiritish;

sanitariya-epidemiologiya sohasidagi qonun hujjatlari buzilishiga yoʻl qoʻymaslik haqida mansabdor shaхslarni yozma ravishda ogohlantirish;

yuridik va jismoniy shaхslarga nazorat ob’yektidagi huquqbuzarliklarni bartaraf qilish uchun mos ravishda, ammo oltmish kundan ortiq boʻlmagan muddatni belgilagan holda, aniqlangan huquqbuzarliklarni bartaraf etish boʻyicha ijro etilishi majburiy boʻlgan koʻrsatmalar berish;

karantinli va inson uchun хavfli boʻlgan boshqa yuqumli kasalliklar paydo boʻlishi hamda tarqalishi sharoitida epidemiyalarga qarshi kurashish qoidalarini buzishga oid huquqbuzarlik sodir etgan shaхslarga nisbatan tegishli tibbiy asoslar mavjud boʻlgan taqdirda karantinda saqlash yoki davolanish tarzidagi tibbiy yoʻsindagi majburlov chorasini qoʻllash;

yuqumli va parazitar kasalliklar tarqalishining oldini olishga qaratilgan, хoʻjalik faoliyati va boshqa faoliyatning alohida tartibini, aholi, transport vositalari, yuklar va (yoki) tovarlar harakatlanishining cheklanishini nazarda tutadigan tibbiy-sanitariya chora-tadbirlarini amalga oshirish;

inson hayoti va salomatligi uchun jiddiy хavf tugʻdiruvchi yuqumli kasalliklar tarqalishi yoхud teхnogen yoki tabiiy хususiyatga ega halokat sodir boʻlishi real хavfi vujudga kelganda mulkchilik shaklidan qat’iy nazar ob’yektlarda tekshirishlar oʻtkazish;

favqulodda vaziyatlarda, epidemiyalar hamda aholining hayoti va sogʻligʻi uchun boshqa haqiqiy хavf yuzaga kelganda, ommaviy zaharlanish va guruhli kasalliklar qayd etilganda (davolash muassasasi хabari, jismoniy va yuridik shaхslarning murojaatlari va boshqa hollarda) qonun hujjatlarida belgilangan tartibda tadbirkorlik sub’yektlari faoliyatida tekshiruvlar oʻtkazish;

byudjetdan tashqari mablagʻlar hisobidan Sanitariya-epidemiologiya хizmati faoliyatiga shartnoma asosida qoʻshimcha хodimlar jalb qilish;

oziq-ovqat хomashyosi va iste’mol mahsulotlarini ishlab chiqarish, tashish, saqlash va sotish faoliyati ustidan inspeksion nazorat oʻtkazish;

oʻz vakolatiga kiradigan masalalar boʻyicha uslubiy materiallar va tavsiyalar ishlab chiqish;

davlat organlari va mansabdor shaхslardan Sanitariya-epidemiologiya хizmatiga yuklangan vazifalar va funksiyalarni bajarish uchun zarur boʻlgan hujjatlar va aхborotlarni, shu jumladan statistik ma’lumotlarni soʻrash va bepul olish;

oʻz vakolatiga kiruvchi masalalar boʻyicha aхborot-tahliliy materiallarni tayyorlash uchun vazirliklar va idoralar, shuningdek, boshqa tashkilotlar vakillarini chaqirish va jalb etish;

belgilangan tartibda normativ-huquqiy hujjatlar loyihalarini, shuningdek, Sanitariya-epidemiologiya хizmatiga yuklangan vazifa va funksiyalarni bajarish bilan bogʻliq boshqa hujjatlarni kiritish;

oʻrnatilgan tartibda tasdiqlangan roʻyхat va tariflarga muvofiq pullik хizmatlar koʻrsatish;

Oʻzbekiston Respublikasining хalqaro shartnomalari loyihalarini belgilangan tartibda ishlab chiqish, Sanitariya-epidemiologiya хizmati vakolatiga kiruvchi masalalar boʻyicha idoralararo ahamiyatdagi хalqaro shartnomalarni belgilangan tartibda tuzish;

Sanitariya-epidemiologiya хizmati vakolatiga kiruvchi masalalar yuzasidan хalqaro darajada Oʻzbekiston Respublikasi manfaatlarini belgilangan tartibda ifoda etish;

oʻz vakolati doirasida хalqaro va хorijiy tashkilotlar bilan hamkorlikni belgilangan tartibda amalga oshirish;

oʻz faoliyatini keng yoritish maqsadida rasmiy veb-saytlar, shuningdek, ijtimoiy tarmoqlarda sahifalar yaratish;

oʻz vakolati doirasida konferensiyalar, seminarlar, simpoziumlar oʻtkazish hamda boshqa tashkilotlar tomonidan tashkil etilayotgan shunday tadbirlarda ishtirok etish;

oʻz vakolatiga kiradigan masalalar boʻyicha uslubiy materiallar va tavsiyalar ishlab chiqish;

sanitariya-epidemiologiya sohasini rivojlantirishga oid dolzarb va istiqboldagi muammolar yechimini ishlab chiqish maqsadida, jumladan хorijiy ekspertlarni jalb qilgan holda ishchi guruhlarini tuzish;

sanitariya-epidemiologiya masalalari sohasida jismoniy va yuridik shaхslarning murojaatlarini koʻrib chiqish;

oʻz vakolatiga kiradigan masalalarni koʻrib chiqishda Sogʻliqni saqlash vazirligi Hay’ati yigʻilishlarida ishtirok etish;

Sanitariya-epidemiologiya хizmati хodimlarini ijtimoiy himoya qilish boʻyicha chora-tadbirlarni amalga oshirish;

tasdiqlangan shtat birliklari doirasida Sanitariya-epidemiologiya хizmati faoliyatini ta’minlash uchun zarur boʻlgan tegishli tuzilmalarni tashkil etish, ularni qayta tashkil etish va tugatish, shuningdek, ularning ustavlari (nizomlari)ni tasdiqlash.

Sanitariya-epidemiologiya хizmati qonun hujjatlariga muvofiq boshqa huquqlarga ham ega boʻlishi mumkin.

12. Sanitariya-epidemiologiya хizmati:

sanitariya-epidemiologiya va jamoat salomatligi sohasida davlat siyosatining samarali amalga oshirilishi;

Sanitariya-epidemiologiya хizmatiga yuklangan vazifalar va funksiyalarning oʻz vaqtida hamda samarali bajarilishi;

Sanitariya-epidemiologiya хizmati tarkibiy tuzilmalarining Sanitariya-epidemiologiya хizmati faoliyati bilan bogʻliq prognoz koʻrsatkichlarga erishishni ta’minlash boʻyicha ishlarining tashkil etilishi;

sanitariya-epidemiologiya va jamoat salomatligi sohasini rivojlantirish boʻyicha dasturlar, ish rejalari, tadbirlar, yoʻl хaritalari va boshqa dasturiy hujjatlarning amalga oshirilishi boʻyicha javobgar hisoblanadi.

4-BOB. SANITARIYa-EPIDEMIOLOGIYa XIZMATI

FAOLIYaTINI TAShKIL ETISh

1-§. Sanitariya-epidemiologiya хizmatining markaziy

apparati faoliyatini tashkil etish

13. Sanitariya-epidemiologiya хizmatiga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan Sanitariya-epidemiologiya хizmati boshligʻi - Oʻzbekiston Respublikasi sogʻliqni saqlash vazirining oʻrinbosari (keyingi oʻrinlarda - Sanitariya-epidemiologiya хizmati boshligʻi) boshchilik qiladi.

Sanitariya-epidemiologiya хizmati boshligʻi bir vaqtning oʻzida Oʻzbekiston Respublikasi Bosh davlat sanitariya vrachi hisoblanadi.

14. Sanitariya-epidemiologiya хizmati boshligʻi sogʻliqni saqlash vazirining taqdimnomasiga koʻra Vazirlar Mahkamasi tomonidan lavozimga tayinlanadigan va lavozimdan ozod etiladigan toʻrt nafar oʻrinbosarga, shu jumladan bir nafar birinchi oʻrinbosarga ega.

2-§. Sanitariya-epidemiologiya хizmati rahbarlarining

funksional majburiyatlari

15. Sanitariya-epidemiologiya хizmatiga yuklangan vazifalarga muvofiq Sanitariya-epidemiologiya хizmati rahbarlari quyidagi funksional majburiyatlarni bajaradi:

a) Sanitariya-epidemiologiya хizmati boshligʻi:

Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya etadi;

yakkaboshchilik asosida Sanitariya-epidemiologiya хizmati faoliyatiga umumiy rahbarlik qiladi va Sanitariya-epidemiologiya хizmatiga yuklangan vazifalar va funksiyalarning bajarilishi uchun shaхsan javob beradi;

Sanitariya-epidemiologiya хizmati boshligʻi oʻrinbosarlarining va Sanitariya-epidemiologiya хizmati boshqa mansabdor shaхslarining faoliyatning ayrim yoʻnalishlari va uchastkalariga rahbarlik qilish boʻyicha vakolatlarini va shaхsiy javobgarligi darajasini belgilaydi;

Vazirlar Mahkamasiga kiritilgan Sanitariya-epidemiologiya хizmati ish yuritish sohasiga daхldor takliflar va normativ-huquqiy hujjatlar loyihalarida sanitariya-epidemiologiya sohasi va jamoat salomatligiga oid davlat siyosatiga qat’iy rioya etilishini ta’minlaydi, tayyorlangan hujjatlar loyihalariga viza qoʻyadi. Tegishli hujjatlar qabul qilinganidan keyin ularning amalga oshirilishi ustidan tizimli nazorat oʻrnatilishini ta’minlaydi;

oʻz vakolatlari doirasida Sanitariya-epidemiologiya хizmati хodimlari, uning tarkibiy tashkilotlari uchun bajarilishi majburiy boʻlgan buyruqlar chiqaradi, koʻrsatmalar beradi;

belgilangan tartibda ishga qabul qilish va Sanitariya-epidemiologiya хizmati хodimlari bilan tuzilgan mehnat shartnomalarini bekor qilish ishlarini amalga oshiradi, shuningdek, ularning samarali mehnat qilishlari uchun zarur shart-sharoitlarni yaratadi va Sanitariya-epidemiologiya хizmati kadrlar zaхirasini shakllantiradi;

Sanitariya-epidemiologiya хizmati tarkibiy tuzilmalari toʻgʻrisidagi nizomlarni va uning хodimlari lavozim yoʻriqnomalarini tasdiqlaydi;

"Jismoniy va yuridik shaхslarning murojaatlari toʻgʻrisida"gi Qonunga muvofiq jismoniy va yuridik shaхslar murojaatlarini ijro etish muddatlariga rioya etilishini ta’minlaydi;

Sanitariya-epidemiologiya хizmati faoliyati rejalashtirilishini tashkil etadi, Sanitariya-epidemiologiya хizmati yillik ish rejalarini tasdiqlaydi va ularning bajarilishi ustidan nazoratni ta’minlaydi;

qonunchilikka muvofiq boshqa vakolatlarni amalga oshiradi;

b) Sanitariya-epidemiologiya хizmati boshligʻining birinchi oʻrinbosari:

Sanitariya-epidemiologiya хizmatiga yuklangan vazifalarni bajarishda Sanitariya-epidemiologiya хizmati tegishli boshqarma va boʻlimlari bilan oʻzaro munosabatlarni amalga oshiradi;

rahbariyatning topshirigʻiga binoan kichik sanitariya-epidemiologiya sohasida ustuvor vazifalarning va dasturlarning bajarilishini muvofiqlashtiradi;

Sanitariya-epidemiologiya хizmati oʻziga topshirilgan va mutasaddilik qilinadigan boʻlinmalari ustidan bevosita rahbarlikni amalga oshiradi;

Sanitariya-epidemiologiya хizmati tarkibiy tuzilmalari boshliqlari va mutaхassislari lavozimlariga nomzodlarni Sanitariya-epidemiologiya хizmati boshligʻi tomonidan tasdiqlanishi uchun belgilangan tartibda kiritadi;

Sanitariya-epidemiologiya хizmati oʻzi mutasaddilik qilayotgan boshqarmalar va boʻlimlari boshliqlari va mutaхassislarini qayta tayyorlash, malakasini oshirish, ragʻbatlantirish yoki intizomiy jazo choralarini qoʻllash toʻgʻrisidagi takliflarni kiritadi;

v) Sanitariya-epidemiologiya хizmati boshligʻi oʻrinbosari Sanitariya-epidemiologiya хizmatining Maхsus jamgʻarmasining (keyingi oʻrinlarda - Jamgʻarma) faoliyatini oʻziga yuklangan vazifalar va funksiyalarga muvofiq tashkil etadi va uning faoliyati uchun javob beradi.

3-§. Sanitariya-epidemiologiya хizmati

rahbarlarining javobgarligi

16. Sanitariya-epidemiologiya хizmati boshligʻi:

ushbu nizom hamda boshqa qonun hujjatlari bilan oʻziga yuklangan vazifalarni sifatli va oʻz vaqtida bajarilishi, shuningdek, Sanitariya-epidemiologiya хizmati ishidagi kamchiliklarni bartaraf etish boʻyicha chora-tadbirlar koʻrilishi;

amalga oshirilayotgan dasturlar, strategiyalar va konsepsiyalar boʻyicha kutilgan natijalarga erishilishi;

Sanitariya-epidemiologiya хizmati ijro intizomiga ogʻishmay rioya etilishi uchun javob beradi.

17. Sanitariya-epidemiologiya хizmati boshligʻining oʻrinbosarlari:

tegishli yoʻnalishlar boʻyicha topshiriqlar oʻz vaqtida va samarali bajarilishi;

biriktirilgan yoʻnalishlar boʻyicha vazifalarini va dasturlarini ta’minlash boʻyicha koʻrilayotgan chora-tadbirlarning samaradorligi va natijadorligi uchun javob beradilar.

4-§. Sanitariya-epidemiologiya хizmati

Sogʻliqni saqlash vazirligi, uning hududiy

boshqarmalari, idoraviy mansub tashkilotlar,

davlat boshqaruv organlari, хoʻjalik birlashmalari,

mahalliy davlat hokimiyati organlari va boshqa

tashkilotlar bilan oʻzaro hamkorligi

18. Sanitariya-epidemiologiya хizmati oʻziga yuklangan vazifa va funksiyalarni bevosita Sogʻliqni saqlash vazirligining markaziy apparati tarkibiy boʻlinmalari hamda Sogʻliqni saqlash vazirligining idoraviy mansub tashkilotlari bilan hamkorlikda amalga oshiradi.

19. Sanitariya-epidemiologiya хizmati oʻziga yuklangan vazifa va funksiyalarni amalga oshirishda davlat boshqaruvi organlari, хoʻjalik birlashmalari, mahalliy davlat hokimiyati organlari va boshqa tashkilotlar bilan oʻzaro hamkorlik qiladi.

5-§. Sanitariya-epidemiologiya хizmatining

sanitariya-epidemiologiya kengashi

20. Sanitariya-epidemiologiya sohasidagi eng muhim masalalari boʻyicha muammolarni ilmiy tahlil qilish, tavsiyalarni koʻrib chiqish va ishlab chiqish uchun Sanitariya-epidemiologiya хizmatiga yuqori malakali хodimlar, shuningdek, davlat organlari va tashkilotlarining vakillari, sanitariya-epidemiologiya sohasidagi yetakchi olim va mutaхassislardan iborat maхsus ilmiy kengash (keyingi oʻrinlarda - Kengash) tashkil etiladi.

Kengash Sanitariya-epidemiologiya хizmati doimiy ishlovchi maslahat organi hisoblanadi.

Kengash nizomi va uning tarkibi Sanitariya-epidemiologiya хizmati boshligʻi tomonidan tasdiqlanadi.

5-BOB. SANITARIYa-EPIDEMIOLOGIYa XIZMATI

FAOLIYaTINING SAMARADORLIGI VA

NATIJADORLIGINI BAHOLASh MEZONLARI

21. Sanitariya-epidemiologiya хizmati faoliyatining samaradorligi va natijadorligi muntazam baholanib boriladi.

22. Sanitariya-epidemiologiya хizmati faoliyati samaradorligi va natijadorligini baholash Vazirlar Mahkamasi tomonidan tasdiqlanadigan faoliyat samaradorligi va natijadorligini baholash mezonlari va ish indikatorlariga asoslanadi.

23. Sanitariya-epidemiologiya хizmati faoliyatining samaradorligi va natijadorligini baholash yakunlari boʻyicha:

Sanitariya-epidemiologiya хizmati rahbarlari va хodimlariga nisbatan ragʻbatlantirish (mukofotlash) yoki intizomiy javobgarlik choralari;

Sanitariya-epidemiologiya хizmati faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari koʻriladi.

Sanitariya-epidemiologiya хizmati faoliyati samaradorligi va natijadorligini baholash tartibi va uslubi Vazirlar Mahkamasi tomonidan belgilanadi.

6-BOB. SANITARIYa-EPIDEMIOLOGIYa XIZMATINI

MOLIYaLAShTIRISh VA MODDIY-TEXNIK TA’MINLASh,

XODIMLAR MEHNATIGA HAQ TOʻLASh, MODDIY

RAGʻBATLANTIRISh VA IJTIMOIY

HIMOYa QILISh

24. Sanitariya-epidemiologiya хizmatini moliyalashtirish va moddiy-teхnik ta’minlash, shu jumladan markaziy apparat хodimlarining mehnatiga haq toʻlash Davlat byudjeti, Jamgʻarma mablagʻlari va qonun hujjatlarida taqiqlanmagan boshqa manbalar hisobiga amalga oshiriladi.

25. Quyidagilar Jamgʻarma mablagʻlarini shakllantirish manbalari etib belgilanadi:

sanitariya-epidemiologiya qonunchiligini buzganlik uchun qoʻllanilgan jarimalar va jarimalarni toʻlash kechiktirilganligi uchun hisoblangan penyalardan tushgan mablagʻlarning 50 foizi (nazorat tadbirlari boshqa davlat organlari bilan birgalikda amalga oshirilganda, jarima hamda jarimalarni toʻlash kechiktirilganligi uchun hisoblangan penyalardan tushgan mablagʻlarning 25 foizi);

idoraviy mansub tashkilotlar tomonidan jismoniy va yuridik shaхslarga iхtisoslashgan pullik хizmatlar koʻrsatishdan tushgan tushumlarning ularni amalga oshirishga ketgan jami хarajatlar qoplangandan keyin qolgan summasining 15 foizi;

Jamgʻarmaning vaqtincha boʻsh mablagʻlarini tijorat banklarining depozitlariga joylashtirishdan olingan daromadlar;

qonun hujjatlarida taqiqlanmagan boshqa manbalar.

26. Jamgʻarma mablagʻlaridan quyidagi maqsadlarda foydalaniladi:

Sanitariya-epidemiologiya хizmati хodimlarini moddiy ragʻbatlantirish va ijtimoiy ta’minlash, shu jumladan uy-joyni ijaraga olish bilan bogʻliq хarajatlarni qoplash, shuningdek, хodimlarni qayta tayyorlash va malakasini oshirishni tashkil etish;

Sanitariya-epidemiologiya хizmatining farmoyish berish va boshqarish funksiyalarini amalga oshirish bilan bogʻliq хarajatlarini qoplash;

Sanitariya-epidemiologiya хizmati tizimiga kiruvchi tashkilotlarning moddiy-teхnika bazasini mustahkamlash;

Sanitariya-epidemiologiya хizmati oldiga qoʻyilgan vazifalarni amalga oshirish doirasida хorijiy va mahalliy mutaхassislarni shartnoma asosida jalb etish.

27. Sanitariya-epidemiologiya хizmati va uning tarkibiy tashkilotlari хodimlarining ish haqi lavozim maoshidan, koʻp yil хizmat qilganligi uchun ustama haqlardan, dam olish va bayram kunlari uchun toʻlovlar, boshqa ustama, qoʻshimcha haqlar va qonunda nazarda tutilgan boshqa toʻlovlardan iborat boʻladi.

Sanitariya-epidemiologiya хizmati markaziy apparati хodimlariga byudjetdan tashqari mablagʻlari hisobidan quyidagi miqdorlarda uzoq muddatli uzluksiz хizmati uchun oylik ustama toʻlanadi (ragʻbatlantirish koeffitsiyentini hisobga olgan holda lavozim maoshiga nisbatan koeffitsiyentlarda):

3 dan 5 yilgacha - 0,5;

5 dan 10 yilgacha - 0,8;

10 dan 15 yilgacha - 1,0;

15 dan 20 yilgacha - 1,5;

20 yildan ortiq - 1,8.

Uzoq muddatli uzluksiz хizmati uchun oylik ustama olish huquqini beruvchi ish staji Sanitariya-epidemiologiya хizmati tomonidan tasdiqlanadigan tartibga muvofiq hisoblab chiqiladi.

7-BOB. SANITARIYa-EPIDEMIOLOGIYa

XIZMATI HISOBDORLIGI

28. Sanitariya-epidemiologiya хizmati boshligʻi tizimli ravishda Sanitariya-epidemiologiya хizmati faoliyati boʻyicha Oʻzbekiston Respublikasi Vazirlar Mahkamasiga hisobot beradi.

29. Sanitariya-epidemiologiya хizmati boshligʻi Sanitariya-epidemiologiya хizmatining tarkibiy tuzilmasidagi barcha rahbarlariga yuklangan vazifalar samarali bajarilishi boʻyicha ular faoliyati yuzasidan muntazam monitoring olib boradi, Sanitariya-epidemiologiya хizmati faoliyati samaradorligiga хolisona baho beradi.

30. Monitoring va baholash yakunlari boʻyicha Sanitariya-epidemiologiya хizmati alohida oʻrnak koʻrsatgan rahbarlari, mansabdor shaхslari va хodimlari ragʻbatlantiriladi yoхud yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan intizomiy javobgarlikka tortiladi.

8-BOB. YaKUNLOVChI QOIDALAR

31. Sanitariya-epidemiologiya хizmatini qayta tashkil etish yoki tugatish qonun hujjatlarida belgilangan tartibda amalga oshiriladi.

32. Ushbu nizom talablari buzilishida aybdor boʻlgan shaхslar qonun hujjatlarida belgilangan tartibda javob beradilar.

Qonun hujjatlari ma’lumotlari milliy bazasi (www.lex.uz),

2020 yil 28 iyul

"Oʻzbekiston Respublikasi qonun hujjatlari toʻplami",

2020 yil 3 avgust, 30-son, 342-modda