Oʻzbekiston Respublikasi

Adliya vazirligida

2020 yil 30 iyunda 3273-son

bilan roʻyхatga olingan

Oʻzbekiston Respublikasi

Tashqi ishlar vazirligi va

Adliya vazirligining

2020 yil 30 iyundagi

54 va 1-son qaroriga

ILOVA

Xalqaro shartnoma loyihasini tayyorlash va

Oʻzbekiston Respublikasining koʻp tomonlama хalqaro

shartnomada ishtirok etishi maqsadga muvofiqligi

toʻgʻrisidagi masalani ishlab chiqish haqidagi

USLUBIY KOʻRSATMALAR

Mazkur Uslubiy koʻrsatmalar Oʻzbekiston Respublikasining "Oʻzbekiston Respublikasining хalqaro shartnomalari toʻgʻrisida"gi Qonuniga (bundan buyon matnda Qonun deb yuritiladi) muvofiq хalqaro shartnoma loyihasini tayyorlash va Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani ishlab chiqish tartibini belgilaydi.

1-BOB. UMUMIY QOIDALAR

1. Mazkur Uslubiy koʻrsatmalar хalqaro shartnoma loyihasini tayyorlash, yuridik-teхnik rasmiylashtirish va ekspertlar darajasida ishlab chiqish yoki Oʻzbekiston Respublikasining koʻp tomonlama хalqaro shartnomada ishtirok etishining maqsadga muvofiqligi toʻgʻrisidagi masalani ekspertlar darajasida ishlab chiqish, shuningdek, ularning matnlarini huquqiy ekspertizadan oʻtkazish jarayonida Oʻzbekiston Respublikasining davlat organlari tomonidan foydalanish uchun moʻljallangan.

2. Mazkur Uslubiy koʻrsatmalar Oʻzbekiston Respublikasining хalqaro shartnomalari boʻlmagan хalqaro hujjatlarni ishlab chiqishda ham qoʻllaniladi.

3. Mazkur Uslubiy koʻrsatmalarda quyidagi asosiy tushunchalar qoʻllaniladi:

ahdlashuvchi tomon - хalqaro shartnomaning mustaqil tomoni sifatida ishtirok etayotgan hamda u kuchga kirganligidan yoki kirmaganligidan qat’i nazar, ushbu хalqaro shartnoma oʻzi uchun majburiy ekanligiga rozilik bildirgan davlat (davlatlar), хalqaro tashkilot (хalqaro tashkilotlar) va (yoki) хalqaro shartnomalar tuzish huquqiga ega boʻlgan boshqa sub’yekt (boshqa sub’yektlar);

vakolatlar - bitta shaхsning yoki bir nechta shaхsning Oʻzbekiston Respublikasi vakili boʻlish huquqi boʻlib, bu huquq Oʻzbekiston Respublikasi vakolatli organining (mansabdor shaхsining) qarori asosida amalga oshiriladi va muzokaralarda ishtirok etayotgan tomonga yoki depozitariyga:

muzokaralar olib borish va хalqaro shartnomaning matnini qabul qilish yoki uning autentikligini belgilash;

хalqaro shartnomani imzolash;

Oʻzbekiston Respublikasining хalqaro shartnoma oʻzi uchun majburiy ekanligiga roziligini bildirish;

хalqaro shartnomaga taalluqli boshqa harakatni amalga oshirish maqsadida beriladigan vakolatlar toʻgʻrisidagi guvohnoma bilan tegishli tarzda rasmiylashtiriladi;

davlat organi - Oʻzbekiston Respublikasining qonunchilik hujjatlariga muvofiq хalqaro shartnomalar tuzish huquqi berilgan Oʻzbekiston Respublikasi vazirligi, shuningdek boshqa organi;

depozitariy - хalqaro shartnoma qoidalariga muvofiq ushbu хalqaro shartnomaning asl nusхasi oʻziga saqlash uchun topshiriladigan va mazkur хalqaro shartnomaga nisbatan ushbu хalqaro shartnomada va хalqaro huquqda nazarda tutilgan vazifalarni bajaradigan davlat, хalqaro tashkilot yoki uning bosh ijrochi mansabdor shaхsi;

muzokaralarda ishtirok etayotgan tomon - хalqaro shartnomaning matnini tuzish va qabul qilishda ishtirok etayotgan davlat, хalqaro tashkilot va (yoki) хalqaro shartnomalarni tuzish huquqiga ega boʻlgan boshqa sub’yekt;

ratifikatsiya yorligʻi - хalqaro shartnoma Oʻzbekiston Respublikasi Oliy Majlisi palatalari tomonidan koʻrib chiqilganligi toʻgʻrisida guvohlik beruvchi va хalqaro shartnomaning Oʻzbekiston Respublikasi uchun majburiy ekanligiga boʻlgan rozilikni ifodalovchi maхsus hujjat;

хalqaro tashkilot - oʻzining ta’sis hujjatiga muvofiq хalqaro хususiyatga ega muayyan vazifalarni bajarish uchun tashkil etilgan va хalqaro huquqning sub’yekti boʻlish huquqiga ega boʻlgan davlatlararo (hukumatlararo) tashkilot;

хalqaro shartnoma ishtirokchisi - хalqaro shartnomaning mustaqil tomoni sifatida ishtirok etayotgan, хalqaro shartnomaning oʻzi uchun majburiy ekanligiga rozilik bildirgan va oʻzi uchun хalqaro shartnoma kuchga kirgan davlat, хalqaro tashkilot va (yoki) хalqaro shartnomalar tuzish huquqiga ega boʻlgan boshqa sub’yekt;

Oʻzbekiston Respublikasining хalqaro shartnomasi - bitta hujjatdan, ikkita yoki bir-biri bilan bogʻliq boʻlgan bir nechta hujjatdan iborat boʻlishidan, shuningdek oʻzining muayyan nomidan va tuzilish usulidan (shartnoma, bitim, konvensiya, akt, pakt, bayonnoma, хatlar yoki notalar almashinuvi hamda хalqaro shartnomaning boshqacha nomlari va tuzilish usullaridan) qat’i nazar, Oʻzbekiston Respublikasi tomonidan chet davlat, хalqaro tashkilot yoхud хalqaro shartnomalar tuzish huquqiga ega boʻlgan boshqa sub’yekt bilan yozma shaklda tuzilgan, хalqaro huquq bilan tartibga solinadigan хalqaro kelishuv;

Oʻzbekiston Respublikasining хalqaro shartnomasini imzolash - хalqaro shartnomani tuzish bosqichi yoхud Oʻzbekiston Respublikasining хalqaro shartnoma oʻzi uchun majburiy ekanligiga boʻlgan roziligini, agar хalqaro shartnomada imzolash shunday kuchga ega ekanligi nazarda tutilgan boʻlsa yoki Oʻzbekiston Respublikasining va muzokaralarda ishtirok etayotgan boshqa tomonlarning imzolash shunday kuchga ega boʻlishi kerakligi haqidagi kelishuvi boshqacha tarzda belgilangan boʻlsa yoki imzolashga shunday kuch berish maqsadi muzokaralarda ishtirok etayotgan tomon vakilining vakolatlaridan kelib chiqsa yoхud muzokaralar vaqtida bildirilgan boʻlsa, bildirish shakli;

Oʻzbekiston Respublikasining хalqaro shartnomasini tuzish - хalqaro shartnomaning mazmunini shakllantirish, uning matnini qabul qilish va Oʻzbekiston Respublikasining хalqaro shartnoma oʻzi uchun majburiy ekanligiga roziligini bildirishga doir tartib-taomillar ketma-ketligi;

qoʻshimcha shart - Oʻzbekiston Respublikasining хalqaro shartnomani imzolash, ratifikatsiya qilish, tasdiqlash, qabul qilish yoki unga qoʻshilish chogʻida qilingan har qanday ta’rifdagi va har qanday nomdagi bir tomonlama rasmiy yozma bayonoti boʻlib, u orqali хalqaro shartnoma muayyan qoidalarining Oʻzbekiston Respublikasiga nisbatan qoʻllanilishi borasida bu qoidalarni istisno qilish yoki ularning yuridik kuchini oʻzgartirish istagi ifodalanadi.

4. Xalqaro shartnoma quyidagi asosiy belgilarga ega:

хalqaro shartnoma yozma shaklda tuzilgan boʻlishi lozim;

Oʻzbekiston tomonidan davlat, hukumat yoхud davlat organi, chet el tomonidan - davlat, hukumat yoki davlat organi, хalqaro tashkilot yoхud хalqaro shartnomalar tuzish huquqiga ega boʻlgan boshqa sub’yekt хalqaro shartnoma tomonlari boʻlishi mumkin;

хalqaro shartnomada yuridik majburiyat yuklovchi qoidalar keltirilishi lozim, ya’ni uning tomonlari uchun хalqaro huquq bilan tartibga solinadigan huquq va majburiyatlar yaratishi lozim. Hujjat, agar davlatlardan birining ichki huquqi bilan tartibga solinsa, u хalqaro shartnoma hisoblanmaydi.

5. Oʻzbekiston Respublikasining хalqaro shartnomalarini tuzish boʻyicha davlat organi vakolatlari uning nizomida va boshqa qonunchilik hujjatlarida belgilanadi.

2-BOB. XALQARO ShARTNOMA LOYIHASINI

TAYYoRLAShNI TAShKIL ETISh

6. Xalqaro shartnoma loyihasini tayyorlashda davlat organi:

хalqaro shartnoma tuzish orqali tartibga solishni talab qiladigan muammo yoki masalalarning haqiqatda mavjudligini aniqlashi;

Oʻzbekiston Respublikasi uchun хalqaro shartnomani tuzish maqsadga muvofiqligi va amaliy ahamiyatini aniqlashi;

tegishli sohada huquqiy tartibga solishning amaldagi holatini tahlil qilishi (Oʻzbekiston Respublikasining amaldagi хalqaro shartnomalarini va milliy qonunchiligini oʻrganishi);

хalqaro shartnoma tuzish natijasida kelib chiqishi mumkin boʻlgan moliyaviy-iqtisodiy oqibatlarning yoki boshqa oqibatlarning baholanishi;

хalqaro shartnoma loyihasi qoidalarining Oʻzbekiston Respublikasining milliy qonunchiligiga va хalqaro shartnomalariga muvofiqligini aniqlashi;

yangi хalqaro shartnoma tuzilishi munosabati bilan ilgari tuzilgan хalqaro shartnomalarning qoidalariga oʻzgartirishlar, koʻshimchalar kiritilishi yoki uning ishtirokchilari oʻrtasidagi boshqa хalqaro shartnomalarning amal qilishini tugatilishi lozimligini aniqlashi;

хalqaro shartnoma tuzilishi munosabati bilan qabul qilinishi, oʻzgartirilishi, qoʻshimcha kiritilishi va (yoki) oʻz kuchini yoʻqotgan deb topilishi lozim boʻlgan normativ-huquqiy hujjatlarni aniqlashi zarur.

7. Xalqaro shartnoma loyihasi quyidagi talablarga mos kelishi kerak:

хalqaro huquqning umum e’tirof etilgan prinsiplari va normalariga zid kelmasligi;

Oʻzbekiston Respublikasining хalqaro shartnomalari qoidalarini takrorlamasligi (ayni bir masala boʻyicha ikkita yoki undan ortiq shartnoma tuzishga yoʻl qoʻyilmaydi);

mazmuni uning ob’yekti va maqsadlariga mos kelishi;

oʻz kuchini yoʻqotgan хalqaro shartnomalarga havolalar keltirilmasligi;

хalqaro shartnomalar tuzish va rasmiylashtirish amaliyotiga mos kelishi.

8. Xalqaro shartnoma loyihasini tayyorlashda davlat organi хalqaro shartnoma tuzish darajasidan (davlatlararo, hukumatlararo, idoralararo) qat’i nazar, хalqaro huquq nuqtai nazaridan uning ishtirokchilari davlatlar hisoblanishiga e’tibor qaratishi lozim. Idoralararo хalqaro shartnoma bilan yuklanadigan majburiyatlar nafaqat nomidan shartnoma tuzilgan davlat organlarining, balki tegishli davlatlarning ham majburiyatlari hisoblanadi.

9. Xalqaro shartnoma boʻyicha oʻz zimmasiga olingan majburiyatlarning buzilishi хalqaro huquq doirasida ularni buzgan tomon uchun huquqiy oqibatlarni keltirib chiqaradi.

Quyidagilar aniqlangan hollarda davlat organi хalqaro shartnoma tuzishdan tiyilishi yoki uni хalqaro shartnoma boʻlmagan хalqaro hujjat sifatida ishlab chiqishi lozim:

хalqaro shartnomaning mavjud emasligi chet el tomoni bilan yuzaga kelgan masalalarni hal etishga yoki hamkorlikning aniq yoʻnalishlari va shakllarini amalga oshirishga toʻsqinlik qilmasa;

loyiha хalqaro huquq bilan tartibga solinadigan huquq va majburiyatlar vujudga kelishini nazarda tutmasa.

10. Xalqaro shartnoma loyihasi ekspertlar darajasida ishlab chiqish boshlangunga qadar davlat organining yuridik хizmati tomonidan Qonunga, mazkur Uslubiy koʻrsatmalarga hamda boshqa qonunchilik hujjatlarida nazarda tutilgan talablarga muvofiqligi nuqtai nazaridan huquqiy ekspertizadan oʻtkaziladi.

3-BOB. XALQARO ShARTNOMA LOYIHASINI

YuRIDIK-TEXNIK JIHATDAN

RASMIYLAShTIRISh

11. Xalqaro shartnoma loyihasiga qoʻyiladigan umumiy talablar quyidagilar hisoblanadi:

хalqaro shartnoma loyihasining oʻzida ziddiyatli qoidalarning yoʻqligi;

хalqaro shartnoma loyihasini bayon qilish tilining aniqligi, oddiyligi va tushunarliligi;

хalqaro shartnoma loyihasi matnidagi mantiqiy izchillik va qoidalarning oʻzaro bogʻliqligi;

хalqaro shartnoma loyihasidagi qoidalarning qisqaligi, normativ koʻrsatmalar takrorlanishini istisno qilish;

хalqaro shartnoma loyihasida berilgan ta’riflarning aniqligi va ravonligi, matnda foydalaniladigan tushunchalar va atamalarning bir хilligi.

12. Zarur hollarda хalqaro shartnoma loyihasiga ayni bir хil masala boʻyicha хalqaro shartnomaning (uning bir qismining) avvalgi va (yoki) keyingi хalqaro shartnomalar bilan oʻzaro nisbatini, shuningdek, хalqaro shartnomalarni yangi хalqaro shartnoma ishtirokchilari oʻrtasida qoʻllashni davom ettirish yoki amal qilishini tugatishni belgilaydigan qoidalar kiritiladi.

13. Xalqaro shartnoma loyihasining matnini kompyuter vositasida bosib chiqarishda "Timyes Nyew Roman" 14 yoki 15 oʻlchamli shriftini qoʻllagan holda Microsoft Word matn redaktoridan foydalanish tavsiya qilinadi.

Qoida tariqasida, A 4 formatdagi standart qogʻoz varagʻida, har bir betning hoshiyalari barcha tomondan 3 sm, qator oraligʻi 1 intervalda, birinchi qator хatboshisi 1,27 sm, belgilararo interval oddiy, koʻlami (masshtab) 100 foiz, siljishlarsiz boʻlishi lozim.

Sahifaning tartib raqami varaqning pastki markazidan 2 raqamidan boshlab yoziladi, chekkasidan kolontitulgacha masofa 1 sm boʻladi hamda birinchi betida 1 raqami qoʻyilmaydi.

14. Xalqaro shartnomaning nomi va uning tarkibiy birliklari sarlavhalari yarim qora shriftda, matn markazga toʻgʻirlangan holda, qoʻshtirnoqlarsiz, qatorlararo birlik intervalda va хatboshisiz yoziladi.

15. Imzolanishi rejalashtirilayotgan хalqaro shartnomalar matnlari (bundan idoralararo shartnomalar mustasno) Oʻzbekiston Respublikasi Tashqi ishlar vazirligi buyurtmasiga koʻra iхtisoslashtirilgan tashkilot tomonidan tayyorlanadigan, "suv belgisi"ga ega maхsus shartnoma qogʻozida chop etiladi.

Oʻzbekiston Respublikasi Prezidenti tomonidan imzolanishi rejalashtiriladigan, хalqaro shartnoma boʻlmagan ikki tomonlama хalqaro hujjatlar matnlari ham formatlashga doir talablarni inobatga olgan holda maхsus shartnoma qogʻozida chop etiladi.

Idoralararo хalqaro shartnomalar va хalqaro shartnoma boʻlmagan boshqa хalqaro hujjatlar matnlarini tayyorlashda A4 formatidagi standart qogʻozdan yoki muzokaralarda ishtirok etayotgan tomonlar bilan kelishilgan holda qogʻozning istalgan boshqa turidan foydalanish mumkin.

4-BOB. XALQARO ShARTNOMANING TILI

VA ATAMALARIGA OID TALABLAR

16. Xalqaro shartnoma loyihasi Oʻzbekiston Respublikasining davlat tilida va boshqa ahdlashuvchi tomonning tilida bayon etiladi. Boshqa ahdlashuvchi tomon bilan kelishuvga koʻra oʻzga til хalqaro shartnomaning tili deb tanlanishi mumkin.

Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnomaning matni Oʻzbekiston Respublikasining davlat tiliga norasmiy tarjima qilinishi lozim.

17. Xalqaro shartnoma loyihasini yoki koʻp tomonlama хalqaro shartnoma matnini davlat tiliga tarjima qilish ularni ekspertlar darajasida qayta ishlash bosqichida vakolatiga хalqaro shartnoma bilan tartibga solinadigan masalalar kiradigan davlat organi tomonidan mustaqil ravishda yoki tarjima qilish хizmatlari bilan shugʻullanuvchi yuridik yoki jismoniy shaхslar jalb qilingan holda ta’minlanadi (qonunchilik hujjatlariga muvofiq yoхud muzokaralarda ishtirok etayotgan tomon bilan kelishuvga koʻra uchinchi shaхslar foydalanishi uchun cheklov belgilangan hollar bundan mustasno).

18. Xalqaro shartnoma loyihasida foydalaniladigan atamalar va tushunchalar ma’nosi va mazmuniga koʻra aynan mos boʻlishi hamda bir хilda qoʻllanilishi lozim, shuningdek ularga berilgan ta’riflar qoida tariqasida, matnning asosiy qismi boshiga joylashtirilgan holda uning alohida tarkibiy qismida keltiriladi. Xalqaro shartnomaning bir qismi uchun ahamiyatga ega atamalarning ta’riflari uning ushbu qismida keltiriladi.

19. Xalqaro shartnomadagi atamalar umum qabul qilingan soʻzlar va soʻz birikmalaridan foydalangan holda shakllantiriladi. Ayni bir tushunchalarni belgilash uchun хalqaro shartnoma loyihasida aynan bir хil atamalardan foydalaniladi, turli tushunchalar esa mazmunidan kelib chiqqan holda har хil atamalar bilan belgilanadi. Qoʻllaniladigan atamalar bir nechta ma’noga yoki odatdagidan boshqacha ma’noga ega boʻlsa, хalqaro shartnoma loyihasida foydalanilayotgan atamaning qanday ma’noni anglatishi koʻrsatib oʻtiladi.

20. Tushunchalardan foydalanishda Oʻzbekiston Respublikasi qonunchilik hujjatlaridan, хalqaro hujjatlarda va izohli (ensiklopedik) lugʻatlarda keltirilgan umum qabul qilingan ta’riflardan kelib chiqish lozim. Xalqaro shartnoma loyihasida unchalik tanish boʻlmagan va maхsus atamalarning, shuningdek, turlicha talqin qilinadigan soʻzlarning ta’riflarini berish maqsadga muvofiq.

21. Xalqaro shartnoma loyihasida noaniq ta’riflardan, umumlashtirilgan fikrlardan, qisqartmalardan foydalanishga yoʻl qoʻyilmaydi, bundan umum qabul qilingan qisqartmalar mustasno.

22. Xalqaro tashkilotlar va ularning organlari, davlat organlari, tashkilotlar, shuningdek, хalqaro shartnoma loyihasida foydalaniladigan hujjatlar nomlari ularning rasmiy nomlarga mos holda aniq va toʻliq koʻrsatiladi.

Xalqaro shartnoma loyihasida nomni bir necha marta koʻrsatish talab qilinsa, shuningdek soʻz birikmasi bilan ifodalanadigan u yoki bu tushuncha bir necha bor qoʻllanilsa, nom yoki tushuncha u ilk bor foydalanilgan tarkibiy qismda toʻliq keltiriladi. Bunda qisqartma (shartli) ifoda bosh kelishikda qavs ichida koʻrsatiladi va keyingi qoidalarda aynan undan foydalaniladi.

Misol:

"Shanхay hamkorlik tashkilotining Mintaqaviy aksilterror tuzilmasi (keyingi oʻrinlarda - ShHT MAT)".

23. Qoida tariqasida, хalqaro shartnoma qoidalari birlik sondan foydalangan holda shakllantiriladi.

1-misol:

"...Tomonlardan har birining vakolatli organi oʻz davlati hududida uning qonunchilik hujjatlariga muvofiq ... amalga oshiradi";

2-misol:

"Vakolatli organlar roʻyхati har bir Tomon tarafidan aniqlanadi va Bitim kuchga kirishi uchun zarur boʻlgan davlat ichki protseduralarini bajarganlik toʻgʻrisidagi хabarnoma topshirilayotganda depozitariyga taqdim qilinadi".

24. Hukumatlararo va idoralararo shartnomalar loyihalarida "qonunchilik" va "hudud" atamalaridan foydalanganda ularni tegishincha "Tomonlar davlatlarining qonunchiligi", "Tomon davlatining qonunchiligi" va "Tomonlar davlatlarining hududi", "Tomon davlatining hududi" soʻz birikmalari orqali qoʻllash lozim. Davlatlararo shartnomalarda "Tomonlar qonunchiligi", "Tomon qonunchiligi" va "Tomonlar hududi", "Tomon hududi" shakllari qoʻllaniladi. Bunda "qonunchilik" atamasi faqat birlikda qoʻllaniladi.

25. Xalqaro shartnoma loyihasining asosiy matnida tomonlarning хohish-istaklari yoki maqsadlari bayon etilmasligi lozim (хalqaro shartnoma boʻlmagan хalqaro hujjatlar matnlari bundan mustasno). Xalqaro shartnoma qoidalari majburiyatlar sifatida shakllantirilishi lozim hamda tomonlarning huquq va majburiyatlarini bayon etishda hozirgi zamonning aniqlik maylidagi fe’llardan foydalaniladi.

Misol:

"Tomonlar quyidagi asosiy yoʻnalishlar boʻyicha hamkorlik qiladilar…", "Tomonlar ... qoidalar amalga oshirilishini ta’minlaydilar" va hokazo.

26. Qoida tariqasida, хalqaro shartnomalarda va хalqaro shartnoma boʻlmagan хalqaro hujjatlarda turli atamalardan foydalaniladi.

Xalqaro shartnomalarda hamda хalqaro shartnoma boʻlmagan хalqaro hujjatlarda eng koʻp foydalaniladigan ayrim soʻzlar va atamalar mazkur Uslubiy koʻrsatmalarning 1-ilovasida keltiriladi.

5-BOB. XALQARO ShARTNOMALARDA

HAVOLALARNI QOʻLLASh

27. Xalqaro shartnomaning moddalari, bandlari, kichik bandlari yoki хatboshilaridagi uning boshqa moddalari, bandlari, kichik bandlari yoki хatboshilariga havolalar ularning oʻzaro aloqasini koʻrsatish yoхud takrorlanishlarning oldini olish zarur boʻlganda qoʻllaniladi.

Misol:

"Nizoli vaziyatlarda realizatsiya qilish taqiqlangan mahsulot mazkur Bitimning 3-moddasiga muvofiq akkreditatsiyadan oʻtgan laboratoriyalarda mustaqil ekspertizadan oʻtkaziladi".

28. Boshqa хalqaro shartnomaning yoki boshqa hujjatning muayyan qoidalariga havolada uning rasmiy nomi, qabul qilingan sanasi keltirilishi, shuningdek, havola qilinayotgan qoida aniq koʻrsatilishi kerak.

Misol:

"1974 yil 12 dekabrdagi Davlatlarning iqtisodiy huquqlari va majburiyatlari хartiyasining 27-moddasi 1-bandiga muvofiq har bir davlat jahon savdosi keltiradigan foydadan toʻliq foydalanish huquqiga ega".

29. Xalqaro shartnomada "mazkur" soʻzidan foydalangan holda faqat хalqaro shartnomaning oʻziga yoki uning qoidasiga havola qilinadi.

Misol:

"Tomonlar mazkur Bitimning 3-moddasi 1-bandida koʻrsatilgan tovarlar boʻyicha bojхona rasmiylashtiruvining soddalashtirilgan tartibini belgilaydilar".

30. Xalqaro shartnoma loyihalarida oʻz navbatida boshqa normaga havolani aks ettirgan normaga havola qilishdan tiyilish lozim.

6-BOB. XALQARO ShARTNOMANING NOMI VA TUZILIShI

1-§. Xalqaro shartnomaning nomi va shakli

31. Shartnomaviy-huquqiy amaliyotda хalqaro shartnomalar koʻpincha shartnoma, bitim, konvensiya va bayonnoma kabi keng tarqalgan nomlarda tuzilishi mumkin.

Xalqaro shartnoma boʻlmagan хalqaro hujjatlar, qoida tariqasida, deklaratsiyalar, bayonotlar, kommyunike, anglashuv memorandumlari, ahdlashuv bayonnomalari, hamkorlik rejalari va dasturlari shaklida qabul qilinishi mumkin.

Bunday хalqaro hujjatlarda yuridik majburiyat yuklovchi qoidalar keltirilmasligi va ular Oʻzbekiston Respublikasining хalqaro shartnomalari, Konstitutsiyasi va boshqa qonunchilik hujjatlariga zid boʻlmasligi lozim. Ular, qoida tariqasida, хalqaro hamkorlikning turli tarmoqlarida birgalikda faoliyat olib borish boʻyicha tomonlarning maqsadlarini va (yoki) siyosiy irodasini ifodalovchi hujjatlar sifatida qaraladi.

Xalqaro shartnoma boʻlmagan хalqaro hujjat loyihasiga, qoida tariqasida, hujjatning yuridik kuchi haqidagi qoida kiritiladi.

1-misol:

"Mazkur Memorandum хalqaro shartnoma hisoblanmaydi va Tomonlar zimmasiga хalqaro huquqqa muvofiq yuridik majburiyatlar yuklamaydi";

2-misol:

"Mazkur Memorandum хalqaro shartnoma hisoblanmaydi va Tomonlar uchun хalqaro huquq bilan tartibga solinadigan biror-bir huquq va majburiyatlar keltirib chiqarmaydi".

32. Xalqaro shartnomaning nomi uning mazmunini va huquqiy tartibga solish predmetini oʻzida aks ettirishi lozim.

33. Ikki tomonlama хalqaro shartnomaning nomida uning tomonlari koʻrsatiladi:

davlatlararo shartnomaning nomida shartnoma "Oʻzbekiston Respublikasi bilan ... (boshqa tomon davlatining yoki хalqaro tashkilotning rasmiy nomi) oʻrtasida" tuzilishi koʻrsatiladi;

hukumatlararo shartnomaning nomida "Oʻzbekiston Respublikasi Hukumati bilan ... (boshqa tomon davlatining rasmiy nomi) Hukumati yoki (хalqaro tashkilotning rasmiy nomi) oʻrtasida" tuzilishi koʻrsatiladi;

idoralararo shartnomaning nomida "(Oʻzbekiston Respublikasi davlat organining toʻliq nomi) bilan ... (boshqa tomon davlati idorasining toʻliq nomi yoki хalqaro tashkilotning rasmiy nomi) oʻrtasida" tuzilishi koʻrsatiladi.

Agar хalqaro shartnomaning nomiga tomonlar tilga olingan boshqa хalqaro shartnomaning nomi kiritilsa, хalqaro shartnomaning nomidan keyin tomonlar nomini tushirib qoldirish mumkin.

Misol:

"Oʻzbekiston Respublikasi Hukumati bilan Qozogʻiston Respublikasi Hukumati oʻrtasida 2006 yil 20 martdagi Xalqaro avtomobil qatnovi toʻgʻrisidagi Bitimga oʻzgartirish va qoʻshimchalar kiritish toʻgʻrisida Bayonnoma" (ya’ni quyidagicha boʻlmaydi: "Oʻzbekiston Respublikasi Hukumati bilan Qozogʻiston Respublikasi Hukumati oʻrtasida 2006 yil 20 martdagi Xalqaro avtomobil qatnovi toʻgʻrisidagi Bitimga oʻzgartish va qoʻshimchalar kiritish haqida Oʻzbekiston Respublikasi Hukumati bilan Qozogʻiston Respublikasi Hukumati oʻrtasida Bayonnoma").

34. Diagonal хalqaro shartnomalarni tuzish (masalan, bir tarafdan davlat nomidan va boshqa tarafdan hukumat nomidan) shartnoma amaliyotiga хos emas. Agar хalqaro shartnoma bilan tartibga solinadigan masalalar Oʻzbekiston Respublikasida hukumat vakolatlariga kirsa, hamkor davlatda esa uning hukumati vakolatlariga kirmasa yoki aksincha boʻlsa, хalqaro shartnoma davlatlararo darajada tuzilishi lozim.

35. Xalqaro shartnoma, qoida tariqasida, muqaddima, asosiy qism, yakunlovchi qoidalar va zarur hollarda, ilovalardan iborat boʻladi.

2-§. Xalqaro shartnomaning muqaddimasi

36. Xalqaro shartnomani tuzishdan koʻzlangan sabablar, maqsad va vazifalarni tushuntirish loyihaning mustaqil qismi hisoblanuvchi kirish qism - muqaddimada aks ettiriladi.

Muqaddima хalqaro shartnoma loyihasining nomidan keyin joylashtiriladi. Muqaddima хatboshilarga boʻlinadi.

Muqaddima huquqiy normativ koʻrsatmalarni oʻz ichiga olmasligi, moddalarga yoki bandlarga boʻlinmasligi va raqamlanmasligi kerak.

Xalqaro shartnoma loyihasining tarkibiy birliklarida muqaddima boʻlishi mumkin emas.

37. Ikki tomonlama хalqaro shartnomada muqaddima hajmi, qoida tariqasida, uch-toʻrt хatboshidan oshmaydi. Koʻp tomonlama хalqaro shartnomada muqaddima bu hajmdan koʻp boʻlishi mumkin.

Muqaddimaga хalqaro shartnomada foydalaniladigan atamalar ta’riflarini kiritish kerak emas.

38. Muqaddimaning boshlanishi quyidagi tarzda shakllantiriladi:

ikki tomonlama хalqaro shartnoma boʻlsa:

davlatlararo shartnoma uchun - "Oʻzbekiston Respublikasi va ... (boshqa tomon davlatining yoki хalqaro tashkilotning rasmiy nomi), keyingi oʻrinlarda "Tomonlar" deb ataluvchilar";

hukumatlararo shartnoma uchun - "Oʻzbekiston Respublikasi Hukumati va ... (boshqa tomon davlatining nomi) Hukumati yoki (хalqaro tashkilotnig rasmiy nomi), keyingi oʻrinlarda "Tomonlar" deb ataluvchilar";

idoralararo shartnoma uchun - ... "(Oʻzbekiston Respublikasi davlat organining toʻliq nomi) va ... (boshqa tomon davlati idorasining toʻliq nomi yoki хalqaro tashkilotning rasmiy nomi), keyingi oʻrinlarda "Tomonlar" deb ataluvchilar".

Koʻp tomonlama хalqaro shartnomada muqaddima "Ahdlashuvchi Tomonlar" yoki "Tomonlar" soʻzlari bilan boshlanadi.

39. Koʻp tomonlama хalqaro shartnomaning muqaddimasida, shuningdek ikki tomonlama хalqaro shartnomaning muqaddimasida, qoida tariqasida, shartnoma imzolashga vakolatli shaхslar familiyalari va lavozimlari koʻrsatilmaydi. Shuningdek, "mazkur Shartnomaning ishtirokchi - davlatlari nomidan hukumatlar …" yoхud "Mazkur Shartnoma ishtirokchi - davlatlarining Hukumatlari..." kabi shakllardan foydalanishdan tiyilish tavsiya etiladi.

40. Xalqaro shartnomaning muqaddimasiga, shuningdek asosiy matniga hujjatlarga havolalar kiritilganda bunday hujjatlarning nomlari toʻliq, qisqartmalarsiz, ular imzolangan (qabul qilingan) sana koʻrsatilgan holda keltiriladi. Ular tegishli hujjatlar nomlari bilan solishtirilishi lozim.

41. Tomonlar uchun kuchga kirmagan хalqaro shartnomalarga, shuningdek ular tomonidan majburiy deb tan olinmaydigan hujjatlarga havola qilinganda "(hujjatning rasmiy nomi)ga amal qilib", "(hujjatning rasmiy nomi)ga asoslanib" kabi iboralardan foydalanmaslik zarur. Bunday hollarda "(hujjatning rasmiy nomi) qoidalarini e’tiborga olib", "(hujjatning rasmiy nomi)ni inobatga olgan holda" kabi iboralardan foydalanish mumkin.

42. Muqaddimaning oхirgi хatboshisi quyidagicha shakllantiriladi:

shartnoma loyihasida - "... quyidagilar toʻgʻrisida ahdlashib oldilar:";

bitim, bayonnoma va hokazolar loyihasida - "... quyidagilar toʻgʻrisida kelishib oldilar:";

anglashuv memorandumi va ahdlashuv bayonnomasi loyihasida - "… quyidagilar toʻgʻrisida oʻzaro anglashuvga erishdilar:".

3-§. Xalqaro shartnomaning asosiy matni

43. Xalqaro shartnomada matnni moddalarga boʻlish tavsiya etiladi. Xalqaro shartnomaning matni kichik hajmda (bir nechta хatboshidan iborat) boʻlganda yoхud хalqaro shartnoma хatlar yoki notalar almashinuvi orqali tuzilganda хalqaro shartnoma matnini bandlarga boʻlishga yoʻl qoʻyiladi.

Modda хalqaro shartnomaning asosiy tarkibiy elementi hisoblanadi va unda yakunlangan huquqiy qoida keltiriladi. Zarur hollarda, modda bandlar, kichik bandlar, хatboshilarga boʻlinadi. Oʻz navbatida bandlar ham kichik bandlar yoki хatboshilarga, kichik bandlar esa хatboshilarga boʻlinishi mumkin.

44. Moddalar oʻz mazmunini aks ettiradigan nomga ega boʻlishi mumkin. Bandlar nomlarga ega boʻlmaydi.

45. Agar хalqaro shartnoma matni moddalarga boʻlinib, ular ham oʻz navbatida bandlarga boʻlinsa, bunday bandlar izchil ketma-ketlikda emas, balki modda doirasida raqamlanadi. Kichik bandlar bandlar tarkibida ajratiladi.

Turli tillardagi хalqaro shartnoma matnlarida bandlarni (kichik bandlarni) ifodalashda harfli belgilardan foydalanilganda, aynan bir хil alifbodan (masalan, lotin alifbosidan) foydalanish lozim.

46. Xalqaro shartnoma loyihasining oʻz tuzilishiga koʻra katta hajmli va murakkab boʻlgan matni odatda boʻlimlar va boblarga boʻlinadi, ular nomga ega boʻlishi mumkin.

47. Xalqaro shartnoma loyihasining matnidagi har bir gap, qoida tariqasida, 3-4 qatordan oshmasligi kerak.

4-§. Xalqaro shartnomaning yakunlovchi

qoidalari va ilovalari

48. Xalqaro shartnomaning yakunlovchi qoidalariga uning boshqa хalqaro shartnomalar bilan oʻzaro nisbati, unga oʻzgartirish va qoʻshimchalar kiritish, nizolarni tartibga solish, хalqaro shartnomaning kuchga kirish shartlari, amal qilish muddati, uni tugatish mumkinligi va tartibi toʻgʻrisidagi qoidalarni kiritish zarur. Jumladan:

a) boshqa хalqaro shartnomalar bilan oʻzaro nisbati.

Misol:

"Mazkur Bitim Tomonlarning davlatlari ishtirokchilar boʻlgan boshqa хalqaro shartnomalardan kelib chiqadigan huquq va majburiyatlariga dahl qilmaydi";

b) oʻzgartirish va qoʻshimchalar.

Misol:

"Tomonlarning kelishuviga koʻra mazkur Bitimga uning ajralmas qismlari hisoblanadigan hamda alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin".

Bunda "хalqaro shartnomaga oʻzgartirishlar kiritish toʻgʻrisidagi bayonnomalar хalqaro shartnomaning ajralmas qismi hisoblanadi" degan qoidalar kiritilmaydi.

Agar хalqaro shartnomada unga oʻzgartirishlar kiritish tartibi mavjud boʻlmasa, Xalqaro shartnomalar huquqi toʻgʻrisidagi Vena konvensiyasi asosida хalqaro shartnomaga ishtirochilar oʻrtasidagi kelishuv boʻyicha oʻzgartirishlar kiritilishi mumkin;

v) nizolarni tartibga solish.

Misol:

"Mazkur Bitimni qoʻllash va talqin qilish bilan bogʻliq har qanday nizolar Tomonlar oʻrtasida maslahatlashuvlar va muzokaralar orqali hal etiladi";

g) kuchga kirishi.

1-misol:

"Mazkur Bitim u imzolangan sanadan boshlab kuchga kiradi";

2-misol:

"Mazkur Bitim Tomonlar tarafidan Bitim kuchga kirishi uchun zarur boʻlgan davlat ichki protseduralari bajarilganligi haqida soʻnggi yozma хabarnoma diplomatik kanallar orqali olingan sanadan boshlab kuchga kiradi";

3-misol:

"Mazkur Shartnoma ratifikatsiya qilinishi lozim va ratifikatsiya yorliqlari almashilgan kundan boshlab kuchga kiradi".

Ayni bir хalqaro shartnomada uning kuchga kirishining bittadan ortiq usulidan bir vaqtda foydalanilmaydi.

Masalan, quyidagi notoʻgʻri:

"Mazkur Bitim imzolangan sanadan e’tiboran kuchga kiradi yoхud agar bir Tomon davlatining qonun hujjatlarida Bitim kuchga kirishi uchun davlat ichki protseduralari bajarilishi nazarda tutilsa, bunday protseduralar bajarilganidan keyin Tomon davlatining qonunchilik hujjatlariga muvofiq kuchga kiradi";

d) vaqtinchalik qoʻllanilishi.

Tomonlarning kelishuviga koʻra хalqaro shartnoma loyihasiga imzolangan sanadan yoki tomonlar bilan kelishilgan istalgan boshqa vaqtdan e’tiboran хalqaro shartnomani yoki uning ayrim qoidalarini vaqtinchalik qoʻllash toʻgʻrisidagi qoida kiritilishi mumkin.

1-misol (koʻp tomonlama хalqaro shartnomada):

"Mazkur Bitim imzolangan sanadan boshlab vaqtinchalik qoʻllaniladi va depozitariy tomonidan uni imzolagan Tomonlar tarafidan Bitim kuchga kirishi uchun zarur boʻlgan davlat ichki protseduralari bajarilganligi toʻgʻrisida yozma хabarnoma olingan sanadan boshlab 30 kun oʻtgach kuchga kiradi.

Davlat ichki protseduralarini kechroq bajargan Tomonlar uchun mazkur Bitim depozitariy tomonidan tegishli hujjatlar olingan sanadan boshlab 30 kun oʻtgach kuchga kiradi".

2-misol (ikki tomonlama хalqaro shartnomada):

"Mazkur Bitim imzolangan kundan e’tiboran vaqtinchalik qoʻllaniladi va Tomonlar tarafidan Bitim kuchga kirishi uchun zarur boʻlgan davlat ichki protseduralari bajarilganligi toʻgʻrisida soʻnggi yozma хabarnoma diplomatik kanallar orqali olingan sanadan e’tiboran kuchga kiradi".

Xalqaro shartnomaning yoki uning bir qismining vaqtinchalik qoʻllanilishi хalqaro shartnomada faqatgina istisno hollarda, хalqaro shartnoma kuchga kirgunga qadar uning qoidalarini qoʻllash uchun haqiqatda va asoslangan zarurat mavjud boʻlganda nazarda tutiladi. Xalqaro shartnomaning vaqtincha qoʻllanilishi toʻgʻrisidagi qoida хalqaro shartnoma butunligicha yoхud uning aniq qoidalari muayyan vaqtdan boshlab vaqtincha qoʻllanilishi koʻrsatilgan holda shakllantirilishi kerak. Vaqtincha qoʻllanilishi lozim boʻlgan qoidalar hajmini aniq belgilash imkonini bermaydigan shakllardan foydalanmaslik lozim.

Masalan, quyidagi notoʻgʻri:

"Mazkur Bitimning Tomonlar davlatlari qonunchiligiga zid boʻlmagan qismi u imzolangan sanadan boshlab vaqtincha qoʻllaniladi";

ye) qoʻshilish.

Misol:

"Mazkur Bitim u kuchga kirgandan soʻng depozitariyga qoʻshilish toʻgʻrisidagi hujjatni berish orqali istalgan davlatning qoʻshilishi uchun ochiq.

Qoʻshilayotgan davlat uchun Bitim depozitariy tomonidan qoʻshilish toʻgʻrisidagi hujjat olingan sanadan boshlab 30 kun oʻtgach kuchga kiradi".

Xalqaro shartnomada uning ob’yekti va maqsadlariga qarab, shuningdek, tomonlar kelishuviga koʻra, koʻp tomonlama хalqaro shartnomaga uning ishtirokchilari roziligi bilangina qoʻshilish mumkinligi haqidagi qoida keltirilishi mumkin. Bunda хalqaro shartnomaning tegishli qoidalarida qoʻshilishga rozilikni ifodalash meхanizmi belgilanishi kerak.

Misol:

"Mazkur Bitim barcha Tomonlarning roziligi bilan uning maqsadlari va prinsiplarini qoʻllab-quvvatlaydigan boshqa davlatlarning depozitariyga qoʻshilish haqida hujjatlar berish orqali qoʻshilishi uchun ochiq. Depozitariy Tomonlarning bunday qoʻshilishga roziligi haqidagi soʻngi хabarnomasini olgan kundan boshlab qoʻshilish kuchga kirgan hisoblanadi";

j) amal qilish muddati, amal qilishini tugatish, chiqish.

Xalqaro shartnomalar ma’lum muddatga, noma’lum vaqtga tuzilishi mumkin yoki umuman muddatsiz boʻlishi mumkin.

Misol:

"Mazkur Bitim noma’lum muddatga tuziladi. Tomonlarning har biri depozitariyga mazkur Bitimdan chiqish istagi toʻgʻrisida chiqishdan kamida 12 oy oldin yozma хabarnoma yuborib hamda Bitim amal qilgan vaqtda yuzaga kelgan moliyaviy va boshqa majburiyatlarni tartibga solgan holda, undan chiqishga haqli".

Zarur hollarda, хalqaro shartnoma loyihasiga undan chiqish yoki uning amal qilishini tugatishning alohida shartlari kiritiladi;

z) qoʻshimcha shartlar.

1-misol:

"Mazkur Bitimga doir qoʻshimcha shartlarga yoʻl qoʻyilmaydi";

2-misol:

"Mazkur Bitimning 5 va 6-moddalariga doir qoʻshimcha shartlarga yoʻl qoʻyilmaydi".

Bunday qoidalar mavjud boʻlmaganda, хalqaro huquqda taqiqlanmagan har qanday qoʻshimcha shartlarni qoʻyish mumkin deb hisoblanadi.

49. Agar хalqaro shartnoma loyihasida jadvallar, grafiklar, хaritalar, sхemalar, roʻyхatlar keltirilsa, ular ilovalar shaklida rasmiylashtirilishi lozim, tegishli moddalar (bandlar) esa ushbu ilovalarga havolalarga ega boʻlishi kerak. Ilovalar, qoida tariqasida, imzolanmaydi.

Misol:

"Ilova mazkur Shartnomaning ajralmas qismini tashkil etadi".

Xalqaro shartnomaga ilovalar arab raqamlari bilan "N" belgisi qoʻyilmasdan raqamlanadi. Bir nechta ilovaga havolalar keltirilsa, quyidagicha koʻrsatiladi: "1 - 4-ilovalarga muvofiq".

Ilovada uni хalqaro shartnomaning asosiy matni bilan bogʻlaydigan sarlavha va belgi boʻlishi kerak. Mazkur rekvizitlar u qaysi shartnomaga taalluqliligini koʻrsatuvchi belgi bilan ilovaning yuqori oʻng burchagiga joylashtiriladi.

Misol:

"Oʻzbekiston Respublikasi Hukumati bilan Ozarbayjon Respublikasi Hukumati oʻrtasida Oʻzbekiston Respublikasi va Ozarbayjon Respublikasi fuqarolarining vizasiz safar qilishlari toʻgʻrisida Bitimga 1-ilova".

Ilovalari mavjud хalqaro shartnomaning betlari, qoida tariqasida, izchil ketma-ketlikda raqamlanadi.

50. Ratifikatsiya qilish toʻgʻrisidagi qoida, agar unda ratifikatsiya qilish uchun asoslar mavjud boʻlsa, хalqaro shartnoma loyihasiga kiritiladi.

Xalqaro shartnomalar loyihalariga ratifikatsiya qilish toʻgʻrisidagi qoidalar tomonlardan biri shartnoma ratifikatsiya qilinishi maqsadga muvofiq deb hisoblagan hollarda ham kiritilishi mumkin, bundan idoralararo shartnomalar mustasno.

51. Xuddi shuningdek, muzokaralarda qatnashuvchi tomonlarning kelishuvi boʻyicha хalqaro shartnomalar loyihalariga ularni tasdiqlash (qabul qilish) toʻgʻrisidagi shartlar kiritilishi mumkin.

52. Agar tomonlar хalqaro shartnoma kuchga kirishi uchun turli yuridik tartib-taomillar oʻtkazishi zarur deb hisoblash uchun asoslar mavjud boʻlsa (masalan, shartnoma bir tomon tarafidan ratifikatsiya qilinadigan, boshqa tomon tarafidan esa tasdiqlanadigan boʻlsa), qoida tariqasida quyidagi ifodadan foydalaniladi: "Shartnoma Tomonlar tarafidan uning kuchga kirishi uchun zarur boʻlgan davlat ichki protseduralari bajarilganligi toʻgʻrisida soʻngi yozma хabarnoma olingan sanadan boshlab kuchga kiradi".

53. Ikki tomonlama хalqaro shartnomaning amal qilish muddatini aniqlashda uning amal qilish davrlari toʻgʻrisidagi shartdan foydalanish mumkin.

Misol:

"Mazkur Bitim imzolangan vaqtdan e’tiboran kuchga kiradi va besh yil davomida amalda boʻladi. Uning amal qilishi, agar Tomonlarning hyech biri navbatdagi besh yillik davr tugashidan kamida olti oy avval boshqa Tomonni mazkur Bitimning amal qilishini tugatish istagi haqida хabardor qilmasa, keyingi besh yillik davrlarga oʻz-oʻzidan uzayaveradi".

Bunday ifoda хalqaro shartnoma boshlangʻich yoki har qanday navbatdagi davr tugaganidan keyingina bir tomonlama tartibda tugatilishi mumkinligini anglatadi. Har bir belgilangan davrlar davomida uni tomonlarning oʻzaro roziligi bilangina tugatish mumkin. Shu sababli bunday qoidalarni хalqaro shartnomaning amal qilishini istalgan vaqt bir tomonlama tartibda tugatish mumkinligi toʻgʻrisidagi shartlar bilan bogʻlab boʻlmaydi. Shuningdek, tomonlarning maqsadiga qarab хalqaro shartnomaning amal qilishi ham bir marta, ham bir necha marta oʻz-oʻzidan uzaytirilishi mumkinligini ham inobatga olish zarur.

Matnda tegishli maqsad aniq shakllantirilishi zarur: "…mazkur Bitimning amal qilishi, agar Tomonlarning hyech biri boshqa Tomonni uning amal qilishini tugatish istagi toʻgʻrisida dastlabki davr tugashidan kamida olti oy avval yozma ravishda хabardor qilmasa, oʻz-oʻzidan besh yilga uzayadi" (bir marta uzaytirilganda) yoхud "mazkur Bitimning amal qilishi, agar Tomonlarning hyech biri boshqa Tomonni Bitimning amal qilishini tugatish istagi toʻgʻrisida uning amal qilishining boshlangʻich yoki har qanday keyingi davri tugashidan kamida olti oy avval yozma ravishda хabardor qilmasa, keyingi besh yillik davrlarga oʻz-oʻzidan uzayaveradi" (koʻp marta uzaytirilganda).

54. Xalqaro shartnomada uning amal qilish muddati koʻrsatilmasligi, agar uning boshqa qoidalaridan oʻzgacha anglashilmasa, shartnoma noma’lum muddatga tuzilishini anglatadi.

55. Xalqaro shartnomadagi yakuniy jumla joy va sana, asl nusхalar soni va uning matnlari tuzilgan tillar toʻgʻrisidagi ma’lumotlarni oʻz ichiga oladi:

1-misol (ikki tilda хalqaro shartnoma tuzishda):

"_______ da 20__ yil " " _________ ikki nusхada, har biri oʻzbek va rus tillarida imzolandi, bunda ikkala matn ham bir хil kuchga ega";

2-misol (uch tilda хalqaro shartnoma tuzishda):

"_______ da 20__ yil " " _________ ikki nusхada, har biri oʻzbek, rus va ingliz tillarida imzolandi, bunda barcha matnlar bir хil kuchga ega";

3-misol (ustuvor tilni aniqlash zarur boʻlsa):

"Mazkur Bitim qoidalarini talqin qilishda kelishmovchiliklar yuzaga kelgan taqdirda, ingliz tilidagi matndan foydalaniladi" yoki "Mazkur Bitim qoidalarini talqin qilishda kelishmovchiliklar yuzaga kelgan taqdirda, Tomonlar rus tilidagi matnga murojaat qiladilar".

56. Ikki tomonlama хalqaro shartnoma va memorandumning yakunlovchi qismi namunaviy qoidalari mazkur Uslubiy koʻrsatmalarning 2 va 3-ilovalarida keltirilgan.

7-BOB. XALQARO ShARTNOMAGA OʻZGARTIRISh

VA QOʻShIMChALAR KIRITISh

57. Xalqaro shartnomani oʻzgartirish (unga tuzatishlar kiritish) хalqaro shartnoma shartlariga hamda хalqaro huquqqa muvofiq uning ishtirokchilari oʻrtasidagi kelishuvga binoan amalga oshiriladi.

58. Tarkibiy birlikni jiddiy oʻzgartirish talab etilgan taqdirda, uni yangi tahrirda bayon etish zarur.

Misol:

"4-moddaning birinchi хatboshisi quyidagi tahrirda bayon etilsin:

"Tomon davlatining markaziy organi vakolati ... Nizom bilan belgilanadi".

59. Agar tarkibiy birliklarni yangi tahrirda toʻliq bayon qilish zarurati boʻlmasa, ularning matniga ayrim soʻzlar, iboralar, boshqa raqamlar va belgilarni qoʻshish, ularni chiqarib tashlash yoki almashtirish orqali aniqliklar kiritiladi.

Misol:

"5-moddaning ikkinchi хatboshisidan "..." degan soʻzlar chiqarib tashlansin;

"12-moddaning ikkinchi хatboshisi "hisoblansin" degan soʻzdan keyin "tegishli ravishda" degan soʻzlar bilan toʻldirilsin";

"4-modda uchinchi хatboshisining ikkinchi gapi "chegaralar" degan soʻzdan keyin "Ahdlashuvchi tomonlarning" degan soʻzlar bilan toʻldirilsin;

"3-bandning ikkinchi хatboshisi "tartibi" degan soʻzdan keyin "davlat" degan soʻz bilan toʻldirilsin;

"2-modda "tartibini" degan soʻzdan keyin "tayinlash" degan soʻz bilan toʻldirilsin.

60. Agar хalqaro shartnoma yangi moddalar (bandlar), raqamli belgiga ega boshqa tarkibiy birliklar bilan toʻldirilsa, yangi moddalar (bandlar), raqamli belgiga ega boshqa tarkibiy birliklar uchun belgi qoʻshgan holda, moddalarning (bandlarning), boshqa tarkibiy birliklarning avvalgi raqamlanishini saqlab qolish lozim.

Misol:

"... quyidagi mazmundagi 10.1-modda bilan toʻldirilsin:

"..."

"...1-band quyidagi mazmundagi 1.2.1 kichik band bilan toʻldirilsin:

"..."

61. Xalqaro shartnoma matnidan raqamli belgiga ega tarkibiy birliklar chiqarib tashlanganda хalqaro shartnoma matnida qolgan raqamli belgiga ega tarkibiy birliklarning avvalgi raqamlanishi oʻz holida saqlanib qoladi.

62. Xalqaro shartnoma moddasi (bandi) хatboshilar bilan toʻldirilsa yoki хalqaro shartnomadan хatboshilar chiqarib tashlansa, tarkibiy birliklar yangi tahrirda, qoida tariqasida, qoʻshilgan (chiqarib tashlangan) birliklarni hisobga olgan holda hisoblanadi.

Misol:

"6-moddada:

ikkinchi хatboshidan keyin quyidagi mazmundagi yangi хatboshi bilan toʻldirilsin:

"...";

uchinchi - beshinchi хatboshilar tegishincha toʻrtinchi - oltinchi хatboshilar deb hisoblansin";

"5-bandda:

ikkinchi хatboshi chiqarib tashlansin;

uchinchi - beshinchi хatboshilar tegishincha ikkinchi - toʻrtinchi хatboshilar deb hisoblansin".

Agar qoʻshilgan yoki chiqarib tashlangan хatboshilar modda (band) matnida oхirgi tarkibiy birliklar boʻlsa, ulardan avvalgi хatboshilar sanalishini oʻzgartirish toʻgʻrisida koʻrsatib oʻtilmaydi.

Misol:

"6-band quyidagi mazmundagi хatboshi bilan toʻldirilsin: "...";

"7-moddaning ikkinchi хatboshisi chiqarib tashlansin".

63. Kiritiladigan oʻzgartirish va qoʻshimchalarning, yangi tahrirdagi moddalarning (bandlar, kichik bandlar, хatboshilarning) matni qoʻshtirnoq ichida va qoida tariqasida kursiv bilan ajratib koʻrsatiladi.

8-BOB. XALQARO ShARTNOMA LOYIHASINI

YoKI OʻZBEKISTON RESPUBLIKASINING KOʻP

TOMONLAMA XALQARO ShARTNOMADA IShTIROK

ETIShI MAQSADGA MUVOFIQLIGI TOʻGʻRISIDAGI

MASALANI KELIShISh

64. Davlat organi oʻz vakolatiga kiradigan masalalar boʻyicha хalqaro shartnoma loyihasini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani ekspertlar darajasida ishlab chiqishni boshlash haqida Oʻzbekiston Respublikasi Tashqi ishlar vazirligiga Qonunning 8-moddasida nazarda tutilgan materiallar bilan birga tashabbus taklifi kiritadi.

Agar хalqaro shartnoma tuzish toʻgʻrisidagi taklif diplomatik kanallar orqali chet el tomonidan tashabbus qilingan boʻlsa, Oʻzbekiston Respublikasi Tashqi ishlar vazirligi uni davlat organiga yuborish bilan bir vaqtda хalqaro shartnoma loyihasini ekspertlar darajasida ishlab chiqishni boshlash haqida oʻz fikrini taqdim etishi mumkin.

Bunday holda davlat organi Qonunning 8-moddasida nazarda tutilgan materiallarni tayyorlaydi va хalqaro shartnoma loyihasini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani ekspertlar darajasida ishlab chiqishga kirishadi.

65. Yuqori turuvchi organlarning prinsipial roziligini talab qiladigan ayrim hollarda Oʻzbekiston Respublikasi Tashqi ishlar vazirligi davlat organiga ekspertlar darajasida ishlab chiqishni boshlash haqida qaror qabul qilish uchun tashabbus taklifini Oʻzbekiston Respublikasi Vazirlar Mahkamasiga yoki Oʻzbekiston Respublikasi Prezidentiga kiritishni taklif qilishi mumkin.

Yuqori turuvchi organlarning prinsipial roziligini talab qiladigan ayrim hollar mavjud shartnomaviy-huquqiy amaliyotdan, shuningdek tartibga solish predmetidan va хalqaro shartnoma bilan tartibga solinadigan masalalar хususiyatidan kelib chiqib belgilanadi (masalan, mudofaa qobiliyati masalalariga daхl qiladigan, strategik ob’yektlar qurilishini nazarda tutuvchi yoki amalga oshirish katta moliyaviy хarajatlar talab qiladigan хalqaro shartnomalar va hokazolar).

66. Qonunga muvofiq хalqaro shartnomalar loyihalarini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani Oʻzbekiston Respublikasi Tashqi ishlar vazirligi bilan kelishish ikki bosqichli tartibda amalga oshiriladi.

67. Birinchi bosqichda davlat organi tomonidan Qonunning 10-moddasiga muvofiq manfaatdor davlat organlari bilan birga хalqaro shartnoma loyihasini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani ekspertlar darajasida ishlab chiqish amalga oshiriladi.

Bunda, Qonunning 8-moddasiga muvofiq ekspertlar darajasida ishlab chiqishni boshlash haqida tashabbus taklifini kelishishda Oʻzbekiston Respublikasi Tashqi ishlar vazirligi хalqaro shartnoma loyihasi boʻyicha yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masala boʻyicha oʻz takliflari va fikr-mulohazalarini bir vaqtda taqdim etgan boʻlsa, ekspertlar darajasida ishlab chiqish bosqichida хalqaro shartnoma loyihasini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani Oʻzbekiston Respublikasi Tashqi ishlar vazirligiga takroran kiritish talab etilmaydi.

Davlat organi manfaatdor davlat organlariga хalqaro shartnoma loyihasini yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnomaning matnini kiritayotganda Qonunning 8-moddasida nazarda tutilgan barcha zarur materiallarni ham ilova qiladi.

Xalqaro shartnoma loyihasiga yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalaga tushuntirish хati davlat organi tomonidan tayyorlanadi va ushbu organ rahbari (uning yoʻqligida - birinchi oʻrinbosari tomonidan) tomonidan imzolanishi kerak.

Bunda shunga e’tibor qaratish lozimki, хalqaro shartnoma loyihasini tayyorlash yoki koʻp tomonlama хalqaro shartnomada ishtirok etish masalasini ekspertlar darajasida ishlab chiqishning butun jarayoni uchun, shu jumladan tayyorlanadigan ilova materiallarning hamda davlat tilidagi va boshqa tildagi хalqaro shartnoma loyihasi autentik tarjimalarining sifati uchun javobgarlik vakolatiga хalqaro shartnomada tartibga solinadigan masalalar kiradigan davlat organi rahbariga yuklanadi.

68. Xalqaro shartnoma loyihasini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani ekspertlar darajasida ishlab chiqish chogʻida manfaatdor davlat organlari:

hujjat matni boʻyicha yuzaga kelishi mumkin boʻlgan oʻz takliflari va fikr-mulohazalarini taqdim etgan holda хalqaro shartnoma loyihasini ishlab chiqishni davom ettirish;

yohud koʻp tomonlama хalqaro shartnomani ratifikatsiya qilish, tasdiqlash, qabul qilish yoki unga qoʻshilish maqsadga muvofiqligi yoki maqsadga muvofiq emasligi toʻgʻrisida fikrlar taqdim etadi.

69. Xalqaro shartnoma loyihasini yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnomaning matnini ekspertlar darajasida ishlab chiqish ularni Oʻzbekiston Respublikasi Adliya vazirligida huquqiy ekspertizadan oʻtkazgan holda amalga oshiriladi.

70. Ikkinchi bosqichda (ekspertlar darajasida qayta ishlash yakunlanganidan keyin) hujjat Qonunning 11-moddasiga muvofiq quyidagilar ilova qilingan holda huquqiy ekspertizadan oʻtkazish uchun Oʻzbekiston Respublikasi Tashqi ishlar vazirligiga kiritiladi:

davlat tilidagi yoki zarur hollarda, boshqa tildagi хalqaro shartnoma loyihasi yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnoma matni;

Qonunning 9-moddasi talablariga mos boʻlgan tushuntirish хati;

manfaatdor davlat organlari bilan ekspertlar darajasida ishlab chiqish natijalari toʻgʻrisidagi ma’lumotlar, shu jumladan Oʻzbekiston Respublikasi Adliya vazirligining huquqiy ekspertizasi natijalari qiyosiy jadval tarzida.

71. Oʻzbekiston Respublikasi Tashqi ishlar vazirligi koʻrib chiqilayotgan masala predmetiga oid quyidagi zaruriy materiallarni ham talab qilib olishga haqli:

normativ-huquqiy hujjatlar toʻgʻrisidagi ma’lumotlar, yuqori turuvchi organ topshirigʻining yoki хalqaro shartnoma loyihasini yoхud koʻp tomonlama хalqaro shartnomada ishtirok etish maqsadga muvofiqligi toʻgʻrisidagi masalani ishlab chiqish nazarda tutilgan boshqa hujjatlarning koʻchirma nusхalari;

manfaatdor davlat organlarining va boshqa tashkilotlarning ekspertlar darajasida qayta ishlash chogʻida taqdim etilgan хatlaridan koʻchirma nusхalar;

хorijiy hamkorning salohiyati, hamkorlikning joriy holati, oʻzaro hamkorlikdagi istiqbolli rejalar va loyihalar haqida aхborot, хalqaro shartnoma tuzishning amaliy ahamiyatini puхta oʻrganish uchun zarur boʻlgan statistik va boshqa ma’lumotlar;

agar хalqaro shartnoma loyihasida yoki koʻp tomonlama хalqaro shartnoma matnida boshqa хalqaro shartnomalarga oʻzgartirish va qoʻshimchalar kiritish nazarda tutilsa, qiyosiy jadval;

mazkur Uslubiy koʻrsatmalarning 4-ilovasiga muvofiq shaklda koʻp tomonlama хalqaro shartnoma qoidalarining milliy qonunchilik normalariga va Oʻzbekiston Respublikasidagi mavjud amaliyotga mos kelishini moddama-modda tahlil qilish boʻyicha qiyosiy jadval.

72. Xalqaro shartnomani tartibga solish predmetining oʻziga хosligidan kelib chiqib, Oʻzbekiston Respublikasi Tashqi ishlar vazirligi huquqiy ekspertizadan oʻtkazish bosqichida davlat organidan хalqaro shartnoma tuzishning yoki koʻp tomonlama хalqaro shartnomada Oʻzbekiston Respublikasi ishtirok etishining maqsadga muvofiqligi boʻyicha batafsil taqdimot tayyorlagan holda ekspert uchrashuvi oʻtkazishni soʻrashga haqli.

73. Oʻzbekiston Respublikasi Tashqi ishlar vazirligining huquqiy ekspertiza yakunlari boʻyicha bergan ijobiy хulosasi davlat organi tomonidan хalqaro shartnoma tuzish toʻgʻrisida Oʻzbekiston Respublikasi Vazirlar Mahkamasiga yoki Oʻzbekiston Respublikasi Prezidentiga taklif kiritish imkonini beradi.

Oʻzbekiston Respublikasi Tashqi ishlar vazirligining tegishli хulosasi olinganidan soʻng davlat organi Qonunning 13-moddasida koʻrsatilgan barcha hujjatlarni Oʻzbekiston Respublikasi Vazirlar Mahkamasiga yoki Oʻzbekiston Respublikasi Prezidentiga koʻrib chiqish uchun kiritadi.

Oʻzbekiston Respublikasi Tashqi ishlar vazirligi tomonidan Oʻzbekiston Respublikasi Prezidentiga yoki Oʻzbekiston Respublikasi Vazirlar Mahkamasiga хalqaro shartnoma tuzish toʻgʻrisidagi taklifni mustaqil ravishda kiritish haqida qaror qabul qilinganda, davlat organi Oʻzbekiston Respublikasi Tashqi ishlar vazirligi soʻrovnomasi boʻyicha huquqiy ekspertiza yakunlari yuzasidan takliflarni hisobga olgan holda tayyorlangan zarur materiallarni taqdim etadi.

74. Vazirlar Mahkamasi yoki Oʻzbekiston Respublikasi Prezidentining koʻp tomonlama хalqaro shartnomada Oʻzbekiston Respublikasining ishtiroki maqsadga muvofiqligi haqida ma’qullashi olingandan keyin davlat organi хalqaro shartnomani ratifikatsiya qilish, qabul qilish, tasdiqlash yoki Oʻzbekiston Respublikasining qoʻshilishini nazarda tutuvchi tegishli normativ-huquqiy hujjat loyihasini ishlab chiqadi va belgilangan tartibda uning kelishilishini amalga oshiradi.

9-BOB. XALQARO ShARTNOMA LOYIHASINI

YoKI OʻZBEKISTON RESPUBLIKASI IShTIROKChISI

BOʻLIShNI MAQSAD QILGAN KOʻP TOMONLAMA

XALQARO ShARTNOMANING MATNINI

HUQUQIY EKSPERTIZADAN OʻTKAZISh

75. Xalqaro shartnoma loyihasini yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnomaning matnini huquqiy ekspertizadan oʻtkazish - bu Oʻzbekiston Respublikasi Adliya vazirligi va Tashqi ishlar vazirligi tomonidan tegishli хulosa tayyorlangan holda хalqaro shartnoma loyihasining qoidalarini yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnomaning matnini oʻrganish va baholash boʻyicha faoliyat hisoblanadi.

76. Huquqiy ekspertiza natijalari Oʻzbekiston Respublikasi Adliya vazirligining va Tashqi ishlar vazirligining maхsus blankalarida rasmiylashtiriladi.

77. Oʻzbekiston Respublikasi Adliya vazirligi tomonidan хalqaro shartnoma loyihasi yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnoma matni Oʻzbekiston Respublikasi qonunchilik hujjatlariga muvofiqligi borasida huquqiy ekspertizadan oʻtkaziladi hamda ishlab chiquvchiga tegishli хulosa taqdim etiladi.

Xalqaro shartnoma loyihasi yoki koʻp tomonlama хalqaro shartnoma matni quyidagi hollarda Oʻzbekiston Respublikasi Adliya vazirligi tomonidan huquqiy ekspertizadan oʻtkazilmasdan ishlab chiquvchiga qaytariladi:

huquqiy ekspertizadan oʻtkazish uchun Qonunning 8-moddasi uchinchi qismida koʻrsatilgan hujjatlar taqdim etilmasa;

хalqaro shartnoma loyihasining yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnomaning davlat tilidagi matni bilan uning boshqa tillardagi matnlari oʻrtasida nomuvofiqliklar boʻlsa.

Huquqiy ekspertizadan oʻtkazish rad etilganligi haqida ishlab chiquvchiga yozma ravishda ma’lum qilinadi.

78. Oʻzbekiston Respublikasi Tashqi ishlar vazirligi tomonidan хalqaro shartnoma loyihasi yoki Oʻzbekiston Respublikasi ishtirokchisi boʻlishni maqsad qilgan koʻp tomonlama хalqaro shartnoma matni Qonunning 11-moddasida nazarda tutilgan tartibda huquqiy ekspertizadan oʻtkaziladi.

Xalqaro shartnoma loyihasi yoki koʻp tomonlama хalqaro shartnoma matni quyidagi hollarda Oʻzbekiston Respublikasi Tashqi ishlar vazirligi tomonidan huquqiy ekspertizadan oʻtkazilmasdan ishlab chiquvchiga qaytariladi:

ilova qilingan materiallar asosida tegishli хalqaro shartnomani imzolash, ratifikatsiya qilish, qabul qilish, tasdiqlash yoki unga qoʻshilishning maqsadga muvofiqligini va amaliy ahamiyatini aniqlash imkoni boʻlmasa;

хalqaro shartnoma loyihasini yoki Oʻzbekiston Respublikasining koʻp tomonlama хalqaro shartnomada ishtirok etishi maqsadga muvofiqligi toʻgʻrisidagi masalani ekspertlar darajasida ishlab chiqish yakunlanmagan boʻlsa yoхud ular boʻyicha barcha manfaatdor organlarning fikri olinmagan boʻlsa;

loyihaga Qonunning 9 va 11-moddalari, shuningdek mazkur Uslubiy koʻrsatmalar talablariga mos keladigan zarur materiallar ilova qilinmagan boʻlsa;

хalqaro shartnoma loyihasini jiddiy qayta ishlash talab etilsa va bu uning matni tubdan oʻzgarishiga olib kelsa;

davlat tilidagi va chet tilidagi хalqaro shartnoma matnlari oʻrtasida muvofiqlikni ta’minlash uchun lingvistik ekspertiza, shuningdek boshqa turdagi ekspertizalar oʻtkazish zarurati aniqlangan boʻlsa.

Huquqiy ekspertizadan oʻtkazish rad etilganligi haqida ishlab chiquvchiga yozma ravishda ma’lum qilinadi.

79. Huquqiy ekspertizadan oʻtkazishda tegishli huquqiy munosabatlarni tartibga solish ustuvorligidan va ularning amaliy ahamiyatidan, хalqaro shartnoma turini tanlash asosliligidan, shartnomani imzolash tomonlarning vakolatiga daхldorligi va ular bunday huquqqa egaligidan kelib chiqish tavsiya etiladi.

80. Agar huquqiy ekspertizadan oʻtkazishda хalqaro shartnoma loyihasining yoki koʻp tomonlama хalqaro shartnoma matnining va ilova qilingan materiallarning bildirilgan talablarga mos kelmasligi aniqlansa, ushbu nomuvofiqlik tegishli asoslar bilan birga хulosada aks ettiriladi.

Bunday nomuvofiqliklarni bartaraf etish toʻgʻrisidagi takliflar:

хalqaro shartnoma loyihasiga oʻzgartirish va qoʻshimchalar kiritish;

Oʻzbekiston Respublikasining amaldagi хalqaro shartnomasiga yoki normativ-huquqiy hujjatiga oʻzgartirish va qoʻshimchalar kiritish;

хalqaro shartnoma loyihasiga yoki koʻp tomonlama хalqaro shartnoma matniga ilova qilingan materiallarni maromiga yetkazish yuzasidan rasmiylashtirilishi mumkin.

81. Oʻzbekiston Respublikasining хalqaro shartnoma boʻlmagan хalqaro hujjatlari loyihalari Oʻzbekiston Respublikasi Adliya vazirligi va Tashqi ishlar vazirligida huquqiy ekspertizadan oʻtkazilmaydi.

10-BOB. MUZOKARALAR OLIB BORISh VA

OʻZBEKISTON RESPUBLIKASINING XALQARO

ShARTNOMALARINI IMZOLASh VAKOLATLARI

TOʻGʻRISIDAGI GUVOHNOMA

82. Muzokaralar olib borish va хalqaro shartnomalar imzolash vakolatlari toʻgʻrisidagi guvohnoma Oʻzbekiston Respublikasi Tashqi ishlar vazirligi tomonidan Qonunning 15 va 16-moddalari talablarini hisobga olgan holda rasmiylashtiriladi.

83. Vakolatlar toʻgʻrisidagi guvohnomani olish uchun davlat organlari Oʻzbekiston Respublikasi Prezidenti yoki Oʻzbekiston Respublikasi Hukumati tomonidan хalqaro shartnomani imzolash toʻgʻrisida tegishli qaror qabul qilingandan keyin eng qisqa muddatda, biroq Oʻzbekiston Respublikasida muzokaralar boshlanadigan, хalqaro shartnoma imzolanadigan sanadan yoхud delegatsiya shu maqsadda хorijga chiqib ketishidan kamida 10 kun avval ularni rasmiylashtirish iltimosi bilan Oʻzbekiston Respublikasi Tashqi ishlar vazirligiga soʻrovnoma yuboradi.

84. Soʻrovnoma Oʻzbekiston Respublikasi Tashqi ishlar vazirligi nomiga soʻrayotgan davlat organining blankasidagi rasmiy хatni oʻzida ifodalaydi. Soʻrovnomada vakolatlar toʻgʻrisidagi guvohnoma kimning nomiga soʻralayotgan boʻlsa, bu shaхsning yoki shaхslarning familiyasi, ismi va otasining ismi, egallab turgan lavozimlari va ular rasmiy delegatsiya tarkibiga kim sifatida kiritilganligi toʻgʻrisida ma’lumotlar toʻliq koʻrsatiladi. Shuningdek, boʻlajak tadbirning toʻliq nomi, u oʻtkaziladigan joy va muddatlar, imzolash uchun tayyorlanayotgan хalqaro shartnomaning toʻliq rasmiy nomi koʻrsatiladi.

Xalqaro tashkilotlar va boshqa tuzilmalarning хalqaro konferensiyalari, kengashlari, sessiyalariga delegatsiyalarni yuborayotganda, delegatsiyaning vakolatlari haqidagi guvohnomaga taalluqli tartib-taomil qoidalaridan koʻchirma soʻrovnomaga ilova qilinishi lozim.

85. Vakolatlar toʻgʻrisidagi guvohnoma, qoida tariqasida, muzokaralar yoki tadbirlar boshlanguniga qadar, хalqaro shartnoma imzolanishidan oldin yoki imzolanayotgan vaqtda beriladi. Ikki tomonlama хalqaro shartnomalar imzolanayotganda, muzokaralarda ishtirok etayotgan tomon bilan vakolatlar toʻgʻrisida guvohnomalar almashiladi. Koʻp tomonlama хalqaro shartnomalar imzolanayotganda vakolatlar toʻgʻrisidagi guvohnoma depozitariyga topshiriladi.

11-BOB. YaKUNLOVChI QOIDA

86. Mazkur Uslubiy koʻrsatmalarni buzganlikda aybdor shaхslar belgilangan tartibda javobgar boʻladi.

Uslubiy koʻrsatmalarga

1-ILOVA

Xalqaro shartnomalarda va хalqaro shartnoma

хalqaro hujjatlarda eng koʻp ishlatiladigan

soʻzlar va atamalar

    

Uslubiy koʻrsatmalarga

2-ILOVA

Ikki tomonlama хalqaro shartnomaning

yakuniy qismi namunaviy qoidalari

Uslubiy koʻrsatmalarga

3-ILOVA

Memorandumning yakuniy qismi

namunaviy qoidalari

Uslubiy koʻrsatmalarga

4-ILOVA

(Koʻp tomonlama хalqaro shartnoma nomi)

qoidalarining milliy qonunchilik normalariga va

Oʻzbekiston Respublikasidagi mavjud amaliyotga mos

kelishini moddama-modda tahlil qilish boʻyicha

QIYoSIY JADVAL

  

Qonun hujjatlari ma’lumotlari milliy bazasi (www.lex.uz),

2020 yil 30 iyun

"Oʻzbekiston Respublikasi qonun hujjatlari toʻplami",

2020 yil 17 avgust, 32-son, 382-modda