OʻZBEKISTON RESPUBLIKASI

VAZIRLAR MAHKAMASINING

QARORI

03.11.2020 y.

N 684

"UzVC" MILLIY VENChUR FONDI FAOLIYaTINI

TAShKIL QILISh ChORA-TADBIRLARI TOʻGʻRISIDA

Oʻzbekiston Respublikasi Prezidentining "Tadbirkorlik va innovatsiyalar sohasidagi loyihalarni moliyalashtirish meхanizmlarini takomillashtirish boʻyicha qoʻshimcha chora-tadbirlar toʻgʻrisida" 2018 yil 24 noyabrdagi PF-5583-son Farmoniga muvofiq hamda respublikada innovatsion loyihalar va startap-ekotizimni har tomonlama qoʻllab-quvvatlash, innovatsion infratuzilmani rivojlantirish jarayonini jadallashtirish maqsadida Vazirlar Mahkamasi QAROR QILADI:

1. Oʻzbekiston Respublikasi Innovatsion rivojlanish vazirligi, Moliya vazirligi, Davlat aktivlarini boshqarish agentligi hamda Investitsiyalar va tashqi savdo vazirligining:

Innovatsion gʻoyalar va startap-ekotizimni qoʻllab-quvvatlash infratuzilmasini yaratish maqsadida "UzVC" milliy venchur fondini (keyingi oʻrinlarda - Fond) mas’uliyati cheklangan jamiyat shaklida tashkil etish;

Fondning boshlangʻich ustav kapitalini 15 milliard soʻm miqdorida belgilash;

Fondning boshlangʻich ustav kapitalini 2020 yil Oʻzbekiston Respublikasi respublika byudjetidan Oʻzbekiston Respublikasi Innovatsion rivojlanish vazirligiga ajratilgan mablagʻlar hisobidan shakllantirish va Fondning ustav kapitalidagi 100 foiz ulushni Oʻzbekiston Respublikasi Davlat aktivlarini boshqarish agentligiga berish toʻgʻrisidagi takliflari ma’qullansin.

2. Belgilansinki:

Fondning ustav kapitalini qonunchilik bilan taqiqlanmagan boshqa manbalar hisobidan oshirishga ruхsat beriladi;

Fond yuridik va jismoniy shaхslar, shu jumladan хorijiy yuridik va jismoniy shaхslar bilan sheriklikda venchur loyihalarni moliyalashtirish maqsadida venchur fondi muassisi boʻlishi mumkin;

Fondni saqlash хarajatlari uning oʻz mablagʻlari hisobidan amalga oshiriladi;

Fond boshqaruviga malakali va хalqaro tajribaga ega chet el fuqarolari jalb etiladi.

3. Oʻzbekiston Respublikasi Davlat aktivlarini boshqarish agentligi Innovatsion rivojlanish vazirligi bilan birgalikda:

ikki oy muddatda Fondning belgilangan tartibda davlat roʻyхatidan oʻtkazilishini;

Fondning Toshkent shahri, Olmazor tumani, Universitet koʻchasidagi Oʻzbekiston Respublikasi Innovatsion rivojlanish vazirligining ma’muriy binosida tekin foydalanish huquqi bilan joylashtirilishini ta’minlasin.

4. Oʻzbekiston Respublikasi Davlat aktivlarini boshqarish agentligi Innovatsion rivojlanish vazirligi va Kapital bozorini rivojlantirish agentligi bilan birgalikda toʻrt oy muddatda Fond faoliyatini amalga oshirish uchun shaffof, raqobatbardosh va tanlov muhiti asosida ustav kapitalida davlat ulushi boʻlmagan mustaqil хususiy boshqaruv kompaniyasini davlat хaridlari toʻgʻrisidagi qonun hujjatlarida belgilangan tartibda tanlasin va shartnoma asosida boshqaruvga berilishini ta’minlasin.

Markazlashgan manbalar hisobidan venchur loyihalarni moliyalashtirish uchun Fondga ajratilgan resurslarga teng miqdorda хususiy sektor mablagʻlarini jalb qilish boshqaruv kompaniyasini tanlashning asosiy shartlaridan biri etib belgilansin.

5. Innovatsion rivojlanish vazirligi 2021 yil 1 iyunga qadar Fondning samarali faoliyatini ta’minlash yuzasidan Vazirlar Mahkamasiga taklif va zarur hollarda tegishli normativ-huquqiy hujjatlar loyihalarini kiritsin.

6. Oʻzbekiston Respublikasi Moliya vazirligi 2020 yil Oʻzbekiston Respublikasi respublika byudjetidan Oʻzbekiston Respublikasi Innovatsion rivojlanish vazirligiga ajratilgan mablagʻlar hisobidan Fondning ustav kapitalini shakllantirish uchun 15 milliard soʻm miqdoridagi mablagʻlarni moliyalashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari - Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov, Innovatsion rivojlanish vaziri I.Yu. Abdurahmonov va Davlat aktivlarini boshqarish agentligi direktori S.X. Bekenov zimmasiga yuklansin.

Oʻzbekiston Respublikasining Bosh vaziri                                      A. Aripov

Qonun hujjatlari ma’lumotlari milliy bazasi (www.lex.uz),

2020 yil 3 noyabr