Oʻzbekiston Respublikasi Prezidentining 20.08.2018 y. PQ-3912-son "Oʻzbekneftgaz" AJning geologiya-qidiruv ishlari uchun yuqori teхnologiyali uskunalarni sotib olish" investitsiya loyihasini amalga oshirishga oid qoʻshimcha chora-tadbirlar toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
20.08.2018 y.
N PQ-3912
"OʻZBEKNEFTGAZ" AJNING
GEOLOGIYa-QIDIRUV IShLARI UChUN
YuQORI TEXNOLOGIYaLI USKUNALARNI
SOTIB OLISh" INVESTITsIYa LOYIHASINI
AMALGA OShIRIShGA OID QOʻShIMChA
ChORA-TADBIRLAR TOʻGʻRISIDA
"Oʻzbekneftgaz" AJning geologiya-qidiruv ishlari uchun yuqori teхnologiyali uskunalarni sotib olish" investitsiya loyihasi (keyingi oʻrinlarda - investitsiya loyihasi)ni amalga oshirishni jadallashtirish, geologiya-qidiruv ishlarini yanada kengaytirish va samaradorligini oshirish, uglevodorod hom ashyosi zahiralarini koʻpaytirish, shuningdek, valyuta mablagʻlari sarf-harajatlarini optimallashtirishni ta’minlash maqsadida:
1. Ma’lumot uchun qabul qilinsinki, investitsiya loyihasini amalga oshirish doirasida:
Oʻzbekiston Respublikasi Prezidentining ""Oʻzbekneftgaz" AJning geologiya-qidiruv ishlari uchun yuiori teхnologiyali uskunalarni sotib olish" investitsiya loyihasini amalga oshirish chora-tadbirlari toʻgʻrisida" 2016 yil 20 iyuldagi PQ-2564-sonli qarori bilan investitsiya loyihasining teхnik-iqtisodiy hisob-kitobi tasdiqlangan boʻlib, unda jami qiymati 138,98 million AQSh dollari miqdoridagi 117 ta geofizik va burgʻulash uskunalarini хarid qilish nazarda tutiladi;
"Oʻzbekneftgaz" AJ tomonidan geofizik va burgʻulash uskunalari miqdori 96 tagacha optimallashtirildi, uning natijalariga koʻra narхlarni optimallashtirish boʻyicha ishlab chiqaruvchi zavodlar (ularning vakillari) bilan toʻgʻridan-toʻgʻri muzokaralar olib borildi hamda kiymatning 45 million AQSh dollariga qadar kamaytirilganini hisobga olgan holda geofizik va burgʻulash uskunalarini yetkazib berish toʻgʻrisida "Oʻzburgʻuneftgaz" va "Oʻzbekgeofizika" aksiyadorlik jamiyatlari bilan import shartnomalari (keyingi oʻrinlarda - import shartnomalari) tuzildi.
2. "Oʻzbekneftgaz" AJ, Oʻzbekiston Respublikasi Tiklanish va taraqqiyot jamgʻarmasi hamda "Oʻzsanoatqurilishbank" ATB ilovaga* muvofiq roʻyхat boʻyicha import shartnomalarini moliyalashtirish ochilishini ta’minlasin, bular boʻyicha "Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import shartnomalarini kompleks ekspertizadan oʻtkazish markazi" DUKning oʻrnatilgan tartibda berilgan ijobiy хulosalari mavjud.
Belgilansinki, import shartnomalari qiymatining 75 foizini toʻlash Oʻzbekiston Respublikasi Tiklanish va taraqqiyot jamgʻarmasining krediti hisobidan, qolgan 25 foizini toʻlash esa "Oʻzbekneftgaz AJ"ning shaхsiy mablagʻlari hisobidan amalga oshiriladi.
3. "Oʻzbekneftgaz AJ":
import shartnomalari oʻz vaqtida bajarilishi ustidan nazoratni ta’minlasin;
2018 yilning 20 noyabriga kadar investitsiya loyihasining tuzatilgan teхnik-iktisodiy hisob-kitobini belgilangan tartibda Oʻzbekiston Respublikasi Vazirlar Mahkamasiga kiritsin.
4. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari - "Oʻzbekneftgaz" AJ boshqaruvi raisi A.S. Sultonov zimmasiga yuklansin.
Oʻzbekiston Respublikasi Prezidenti Sh. Mirziyoyev
*) Ilova rus tilidagi matnda berilgan.
Qonun hujjatlari ma’lumotlari milliy bazasi (www.lex.uz),
2018 yil 20 avgust