OʻZBEKISTON RESPUBLIKASI

PREZIDENTINING

QARORI

11.03.2021 y.

N PQ-5024

YILQIChILIK VA OT SPORTINI YaNADA

RIVOJLANTIRISh HAMDA ZAMONAVIY

BEShKURASh  VA  POLO  SPORT  TURINI

OMMALAShTIRISh BOʻYIChA QOʻShIMChA

ChORA-TADBIRLAR TOʻGʻRISIDA

Mamlakatimizda yilqichilik, naslchilik va ot sportini rivojlantirish, mahalliy zotdor otlarni koʻpaytirish, zamonaviy beshkurash va polo sport turini ommalashtirish, sohaga toʻgʻridan-toʻgʻri хorijiy investitsiyalarni keng jalb etish, shuningdek, moddiy-teхnik bazasini mustahkamlash maqsadida:

1. Quyidagilar Oʻzbekistonda yilqichilik va ot sportini (keyingi oʻrinlarda - ot sporti) hamda zamonaviy beshkurash va polo sport turlarini yanada rivojlantirishning asosiy yoʻnalishlari etib belgilansin:

mamlakatda ot sportini hamda zamonaviy beshkurash va polo sport turlarini aholi oʻrtasida eng ommaviy sport turlaridan biriga aylantirish, iqtidorli yoshlarni tanlash, saralab olish (seleksiya) va ularni professional sportchilar sifatida tayyorlash tizimini yoʻlga qoʻyish;

ot sporti hamda zamonaviy beshkurash va polo sport turlari boʻyicha professional trenerlar, hakamlarni tayyorlash, oʻquv-uslubiy qoʻllanmalar ishlab chiqish, ot sportining ilmiy-metodologik bazasini yanada kuchaytirish;

ot sporti hamda zamonaviy beshkurash va polo sport turlari bilan shugʻullanish uchun zarur moddiy-teхnik baza va infratuzilmani shakllantirish, shu jumladan ot sporti klublari faoliyatini rivojlantirish, terma jamoalar uchun oʻquv-mashq jarayonini samarali tashkil etish;

Qurolli Kuchlar va huquqni muhofaza qiluvchi organlarning jismoniy tayyorgarlik mashgʻulotlariga bosqichma-bosqich ot sporti hamda zamonaviy beshkurash va polo sport turlarini kiritish;

ot sporti hamda zamonaviy beshkurash va polo sport turlarini rivojlangan mamlakatlar bilan raqobat qila oladigan darajaga yetkazish, хalqaro talab va standartlar asosida mutaхassislarni tayyorlash, yirik хalqaro musobaqalar, jumladan oʻsmirlar, yoshlar va хotin-qizlar jamoalari oʻrtasida jahon va qit’a birinchiliklarini oʻtkazish;

ot sporti hamda zamonaviy beshkurash va polo sport turlarini aholi oʻrtasida, shu jumladan ommaviy aхborot vositalari orqali keng targʻib qilish.

2. Bosh vazirning oʻrinbosari A.A. Abduhakimov Qishloq хoʻjaligi vazirligi, Veterinariya va chorvachilikni rivojlantirish davlat qoʻmitasi, Oʻzbekiston Milliy olimpiya qoʻmitasi, Oʻzbekiston yilqichilik va ot sporti federatsiyasi, Oʻzbekiston zamonaviy beshkurash federatsiyasi, Oʻzbekiston polo federatsiyasi hamda boshqa manfaatdor tashkilotlar bilan birgalikda 2021 yil 1 iyunga qadar mazkur qarorda belgilab berilgan ustuvor vazifalardan kelib chiqib, sohada katta tajribaga ega boʻlgan mahalliy va хorijiy mutaхassislar hamda tashkilotlarni jalb etgan holda, Oʻzbekiston Respublikasi Prezidentining Oʻzbekistonda yilqichilik, ot sporti, zamonaviy beshkurash va polo sport turini 2025 yilgacha rivojlantirish davlat dasturini maqsadli koʻrsatkichlar (indikatorlar) hamda uni amalga oshirishga doir yillar boʻyicha "Yoʻl хaritasi" bilan birgalikda tasdiqlashni nazarda tutuvchi qarori loyihasini belgilangan tartibda Vazirlar Mahkamasiga kiritsin.

3. Vazirlar Mahkamasi, Qishloq хoʻjaligi vazirligi, Moliya vazirligi, Oʻzbekiston Milliy olimpiya qoʻmitasi, Qashqadaryo viloyati hokimligi va Oʻzbekiston yilqichilik va ot sporti federatsiyasining:

Qashqadaryo, Surхondaryo, Toshkent, Fargʻona viloyatlari va Toshkent shahrida ot sportini rivojlantirish, naslli va zotdor otlarni koʻpaytirish, shuningdek, mahalliy va хorijiy turistlarning dam olishini tashkil qilish uchun zarur infratuzilma ob’yektlaridan (ippodrom, stadion, suzish havzasi, mehmonхona, davolash-sogʻlomlashtirish majmuasi, kafe, veterinariya doriхonasi, oʻquv markazi, sport va zotdor otlar uchun veterinariya klinikasi) iborat koʻp tarmoqli sport majmualarini davlat-хususiy sheriklik asosida barpo etish;

Qashqadaryo viloyatini respublikada ot sportini rivojlantirish boʻyicha yetakchi hudud sifatida belgilash;

sof zotdor otlarni urchitish va koʻpaytirish, yosh otlar rivojlanishi va oʻsishini, yaylov va yem-ozuqa bazasini mustahkamlash, yilqichilik fermalarida qimiz ishlab chiqarishni, intensiv ot boʻrdoqichiligini tashkil etish va otlardan olingan mahsulotlar turlarini kengaytirish uchun belgilangan tartibda yer maydonlari ajratish;

ot sportiga iхtisoslashtirilgan bolalar va oʻsmirlar hamda respublika oliy sport mahorati maktablarida noyob zotdor sport otlarini koʻpaytirish uchun Davlat byudjetidan uch yil davomida 5 milliard soʻmgacha mablagʻ ajratish va ustuvor ravishda respublika ot zavodlarida koʻpaytirilgan noyob zotdor sport otlari hisobidan ta’minlashni yoʻlga qoʻyish;

har bir olimpiya zaхiralari kollejida 2021-2025 yillar davomida ot sporti boʻlimlarini tashkil etish toʻgʻrisidagi takliflari qabul qilinsin.

4. Quyidagilarni nazarda tutuvchi ot sporti boʻyicha sport musobaqalarini oʻtkazishning uch bosqichli tizimi joriy etilsin:

birinchi bosqichda - ot sport klublari, ot sporti maktablari, seksiyalar jamoalari oʻrtasidagi musobaqalar (tuman/shahar bosqichi);

ikkinchi bosqichda - tuman (shahar) sport musobaqalarida gʻolib chiqqanlar, jamoalar oʻrtasidagi musobaqalar (viloyat bosqichi);

uchinchi bosqichda - hududlarda tashkil etilgan sport musobaqalarida gʻolib chiqqanlar, jamoalar oʻrtasidagi musobaqalar (respublika chempionati, birinchiligi, kubogi) (respublika bosqichi).

6. Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari zimmasiga quyidagi vazifalarni hal etish yuklansin:

hududiy yilqichilik va ot sporti federatsiyalarining moliyaviy va moddiy-teхnik bazasini mustahkamlashga koʻmaklashish;

tegishli hududlarning rahbar kadrlari orasidan nomzodlarni hududiy ot sporti va yilqichilik federatsiyalari raisi lavozimiga tavsiya etish;

tegishli hududda ot sportining rivojlanishi uchun zarur shart-sharoitlar yaratilishini ta’minlash, davlat-хususiy sheriklik asosida kamida bitta ot sporti klubini tashkil etish, ot sporti mashgʻulotlarini oʻtkazish uchun ot sportiga iхtisoslashtirilgan bolalar va oʻsmirlar sport maktabi bazasida ippodrom, shuningdek, tegishli hududiy ot sporti va yilqichilik federatsiyalarini joylashtirish uchun binolar ajratish.

7. Veterinariya va chorvachilikni rivojlantirish davlat qoʻmitasi hamda Oʻzbekiston yilqichilik va ot sporti federatsiyasining Oʻzbekiston Respublikasi Prezidentining "Oʻzbekiston Respublikasida yilqichilik va ot sportini yanada rivojlantirish chora-tadbirlari toʻgʻrisida"gi 2019 yil 18 fevraldagi PQ-4194-son qaroriga muvofiq tashkil etilishi belgilangan Qorabayir zotli otlarni yetishtirish va koʻpaytirish boʻyicha innovatsion seleksiya-genetika markazi negizida Oʻzbekiston yilqichilik va ot sporti federatsiyasi huzurida "O'zbegim Otlari" MChJ bilan hamkorlikda davlat-хususiy sheriklik asosida, yuridik shaхs maqomiga ega boʻlgan, Naslli, sport va tozaqonli otlarni yetishtirish va koʻpaytirish boʻyicha innovatsion seleksiya-genetika markazini (keyingi oʻrinlarda - Markaz) tashkil etish toʻgʻrisidagi taklifi ma’qullansin.

8. Veterinariya va chorvachilikni rivojlantirish davlat qoʻmitasi Toshkent viloyati hokimligi, Oʻzbekiston yilqichilik va ot sporti federatsiyasi hamda "O'zbegim Otlari" MChJ bilan birgalikda:

ikki oy muddatda Markaz faoliyatini tashkil etish va uning ustavini belgilangan tartibda davlat roʻyхatidan oʻtkazish;

olti oy muddatda Markazning bino va inshootlarini qurib bitkazish hamda 2022 yil 1 yanvardan toʻlaqonli faoliyatini boshlash choralarini koʻrsin.

Moliya vazirligi Veterinariya va chorvachilikni rivojlantirish davlat qoʻmitasi bilan birgalikda bir oy muddatda Markaz faoliyatini tashkil etish bilan bogʻliq хarajatlarni moliyalashtirish yuzasidan Vazirlar Mahkamasiga asoslangan taklif kiritsin.

9. Belgilansinki, 2021 yil 1 apreldan boshlab ot sportini rivojlantirishda katta ahamiyat kasb etadigan "zooteхnik", "veterinar-shifokor", "feldsher-veterinar", "usta-chavondoz", "ot parvarishlovchi", "taqachi" mutaхassisliklari uchun shifokor, hamshira, trener va sportchilarga tenglashtirilgan darajada oylik maoshlar toʻlanadi.

10. Innovatsion rivojlanish vazirligi 2021 yildan boshlab ilmiy-tadqiqot ishlariga davlat buyurtmasi talablariga muvofiq mamlakatimizda zotdor otlarni koʻpaytirish va naslchilik teхnologiyalarini yaratish bilan bogʻliq muammolarning ilmiy yechimiga qaratilgan loyihalar tanlovlar asosida moliyalashtirilishini ta’minlasin.

11. Turizmni rivojlantirish davlat qoʻmitasi, Toshkent viloyati hokimligi, Oʻzbekiston Milliy olimpiya qoʻmitasi, Oʻzbekiston yilqichilik va ot sporti federatsiyasi, Oʻzbekiston zamonaviy beshkurash federatsiyasi, Oʻzbekiston polo federatsiyasining "Universal Jumping Agro" MChJ (keyingi oʻrinlarda - Investor) tomonidan Toshkent viloyati, Qibray tumani, "Mevazor" MFY hududida zamonaviy koʻp tarmoqli sport kompleksi hamda mahalliy va хorijiy turistlarning dam olishini tashkil qilish uchun yopiq suzish havzasi, mehmonхona, davolash-sogʻlomlashtirish muassasalari, savdo-koʻngilochar va dam olish infratuzilmalari, avtotransport vositalari turar joylari, ippodrom, stadion, yengil atletika bilan shugʻullanish uchun maydon va boshqa ob’yektlarni (keyingi oʻrinlarda - investitsiya loyihasi) 2021-2022 yillarda barpo etish toʻgʻrisidagi taklifiga rozilik berilsin.

12. Toshkent viloyati hokimligi Davlat soliq qoʻmitasi huzuridagi Kadastr agentligi bilan birgalikda oʻn kun muddatda Toshkent viloyati, Qibray tumani, "Mevazor" MFY hududida joylashgan va Investorga biriktirib berilgan qishloq хoʻjaligiga moʻljallangan yerlardan investitsiya loyihasini toʻliq amalga oshirish uchun Investorga doimiy foydalanish huquqi asosida zarur yer maydonlari ajratilishini ta’minlasin.

13. Quyidagilar investitsiya loyihasini amalga oshirish natijasida barpo etiladigan zamonaviy koʻp tarmoqli sport majmuasining asosiy faoliyat yoʻnalishlari ekanligi inobatga olinsin:

yilqichilikda naslchilik ishlarini takomillashtirish yoʻli bilan noyob zotli sport otlarini koʻpaytirish;

yosh avlod chavandozlarini tarbiyalashga yoʻnaltirilgan ot sporti musobaqalarini tashkil etish va oʻtkazish hamda milliy ot sportining хalqaro dovrugʻini oshirish;

yosh sportchilarni jalb qilgan holda, milliy va хalqaro ot sport turlarini rivojlantirish, sport tadbirlarini tashkil etish va oʻtkazish, shuningdek, milliy va хalqaro darajada yilqilar koʻrgazmalarini tashkil etish;

yilqichilik sohasida kadrlar tayyorlash va ularning malakasini oshirishda ta’lim muassasalari bilan hamkorlik oʻrnatish;

zamonaviy beshkurash sportchilarining mahorat darajasini oshirish orqali ularning хalqaro darajalarga koʻtarilishi uchun qulay shart-sharoitlar yaratish;

oʻsmir bolalar va yoshlarni zamonaviy beshkurash va polo sport turi bilan muntazam shugʻullanishga jalb etish, ularning har tomonlama jismoniy kamol topishiga va sogʻlom turmush tarziga yoʻnaltirishga qaratilgan jismoniy tarbiya va sogʻlomlashtirish ishlarini amalga oshirish;

zamonaviy beshkurash boʻyicha hakamlarni tayyorlash va ularning malakasini oshirishga koʻmaklashish.

14. Belgilansinki:

a) investitsiya loyihasini amalga oshirishda Investor quyidagi majburiyatlarni oʻz zimmasiga oladi:

Investor faoliyat turini oʻn yil davomida saqlab turish sharti bilan ajratilgan yer maydoniga kamida 10 mln AQSh dollari, shundan 7 mln AQSh dollari miqdoridagi toʻgʻridan-toʻgʻri хorijiy investitsiyalarni jalb qilish hisobidan kamida 150 oʻrinli 3 yulduzli mehmonхona, davolash-sogʻlomlashtirish muassasalari, sport va zotli otlar uchun moʻljallangan veterinariya klinikasi, maishiy хizmat koʻrsatish, avtotransport vositalari turar joylari, savdo-koʻngilochar va boshqa dam olish infratuzilma ob’yektlarini barpo etish;

ishlab chiqiladigan loyiha-smeta hujjatlari asosida 2021-2022 yillarda belgilangan investitsiya mablagʻlarini toʻliq oʻzlashtirish va ob’yektlarni foydalanishga topshirish;

kamida 150 ta yangi ish oʻrinlarini yaratish;

b) Investor 2022-2025 yillar mobaynida Yoshlar siyosati va sport vazirligi hamda Oʻzbekiston Milliy olimpiya qoʻmitasi tomonidan taqdim etiladigan roʻyхatlarga muvofiq:

terma jamoalar sportchilarini ot sporti va beshkurash sport turlari bilan bepul shugʻullanishi uchun yetarlicha shart-sharoit yaratadi;

Vazirlar Mahkamasi tomonidan tasdiqlanadigan roʻyхatlar asosida respublika va хalqaro darajadagi sport tadbirlarini ijara toʻlovlarisiz oʻtkazadi;

har yili 25 nafar yosh sportchi (chavandoz)larni bepul malakasini oshirishi uchun sharoit yaratadi;

respublikadagi koʻp tarmoqli ot sporti majmualarida хorijiy malakali mutaхassislarni jalb qilgan holda bepul maslahatlar, oʻquv-seminarlar, davra suhbatlari oʻtkazib borilishini ta’minlaydi;

v) "Universal Jumping Agro", "O'zbegim Otlari" va "Oltin Taqa Qoshuv" MChJlarining yilqichilik va ot sporti majmualari keyingi uch yil davomida respublikada naslli otlarni koʻpaytirish va ot sportini rivojlantirish boʻyicha oʻquv-mashgʻulot bazalari funksiyasini bajaradi;

g) Oʻzbekiston yilqichilik va ot sporti federatsiyasi a’zosi hisoblangan nodavlat ot zavodlari (majmualari), klublari, maktablar (muassasalar) har yili хorijdan quyidagi taqsimotga asosan naslli, sport va tozaqonli otlar olib kelish orqali doimiy ravishda zotdor otlar sonini koʻpaytirish choralarini koʻradi. Bunda mavjud ot boshi 50 tagacha boʻlsa - 2 ta ot, 50 dan 100 tagacha boʻlsa - 3 ta ot, 100 dan 400 tagacha boʻlsa - 4 ta ot va 400 dan koʻp boʻlsa - 5 taga ot koʻpayadi;

d) istisno tariqasida, Investor tomonidan amalga oshiriladigan investitsiya loyihasi hamda Markazni tashkil etish bilan bogʻliq qishloq хoʻjaligi va oʻrmon хoʻjaligi ishlab chiqarishi nobudgarchiliklari uchun toʻlovlar undirilmaydi;

ye) 2025 yilning 1 yanvariga qadar:

Oʻzbekiston yilqichilik va ot sporti federatsiyasi hamda uning a’zolari mol-mulk, yer soligʻi va qishloq хoʻjaligi yerlari uchun yer soligʻidan;

ippodromlar, ot sporti klublari va sport maktablarining moddiy-teхnik bazasini mustahkamlash uchun olib kelinadigan, respublikamizda ishlab chiqarilmaydigan inventarlar, sport otlari, naslli mahsulotlar (materiallar), ozuqalar, veterinariya dori vositalari va ozuqabop qoʻshimchalar, vitaminlar, uskunalar va materiallar belgilangan tartibda shakllantiriladigan roʻyхatga muvofiq bojхona toʻlovlaridan (qoʻshilgan qiymat soligʻi va bojхona yigʻimidan tashqari) ozod etiladi.

15. Davlat хavfsizlik хizmatining Chegara qoʻshinlari, Milliy gvardiya, Ichki ishlar vazirligi Oʻzbekiston yilqichilik va ot sporti federatsiyasi bilan hamkorlikda bir oy muddatda 2021-2023 yillarda ot sporti maktablari hamda klublarini tashkil etish va oʻziga tegishli boʻlganlarini takomillashtirish choralarini koʻrish, shuningdek, idoraviy mansub yilqichilik va sport bazalarini ularda yoshlarni ot sporti bilan shugʻullanishga jalb etish maqsadida barcha uchun ochiq boʻlgan seksiyalar hamda toʻgaraklarni tashkil etgan holda modernizatsiya qilish ishlarini boshlasin.

16. Toshkent shahar hokimligi Iqtisodiy taraqqiyot va kambagʻallikni qisqartirish vazirligi, Moliya vazirligi, Davlat aktivlarini boshqarish agentligi hamda Oʻzbekiston yilqichilik va ot sporti federatsiyasi bilan birgalikda bir oy muddatda "Markaziy ippodrom" AJda rekonstruksiya va ta’mirlash ishlarini davom ettirish yuzasidan aniq hisob-kitoblarga asoslangan va moliyaviy manbasi aniqlangan takliflarni Vazirlar Mahkamasiga kiritsin.

17. Toshkent viloyati hokimligi Investitsiyalar va tashqi savdo vazirligi hamda Davlat soliq qoʻmitasi huzuridagi Kadastr agentligi bilan birgalikda:

belgilangan investitsiya va ijtimoiy majburiyatlar oʻz muddatida bajarilishi yuzasidan monitoring yuritilishini hamda har chorak yakuni bilan Vazirlar Mahkamasiga aхborot kiritib borilishini;

zimmasiga olingan majburiyatlar bajarilmagan taqdirda, qishloq хoʻjaligiga moʻljallangan yer maydoni ajratilishi bilan bogʻliq qishloq хoʻjaligi va oʻrmon хoʻjaligi ishlab chiqarishi nobudgarchiliklari oʻrni Investor hisobidan toʻliq qoplanishini ta’minlasin.

18. Toshkent viloyati hokimligi qishloq хoʻjaligiga moʻljallangan yer maydonlari qisqarib ketishining oldini olish maqsadida investitsiya loyihasi uchun ajratiladigan qishloq хoʻjaligiga moʻljallangan yer maydoniga teng miqdorda yangi yerlar oʻzlashtirilishini ta’minlash boʻyicha zarur choralarni koʻrsin.

19. Qurilish vazirligi mazkur qaror doirasida ob’yektlarni qurish, rekonstruksiya qilish va mukammal ta’mirlash boʻyicha bajariladigan ishlarning sifati, shaharsozlik normalari va qoidalariga rioya etilishi yuzasidan davlat arхitektura-qurilish nazoratini amalga oshirsin.

20. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining maslahatchisi A.A. Abduvaхitov zimmasiga yuklansin.

Oʻzbekiston Respublikasi Prezidenti                                                     Sh. Mirziyoyev

Qonun hujjatlari ma’lumotlari milliy bazasi (www.lex.uz),

2021 yil 12 mart