Oʻzbekiston Respublikasi

Prezidentining

2021 yil 1 apreldagi

PQ-5047-son qaroriga

7-ILOVA

Ilm-fanni moliyalashtirish va innovatsiyalarni

qoʻllab-quvvatlash jamgʻarmasi toʻgʻrisida

NIZOM

1-BOB. UMUMIY QOIDALAR

1. Ushbu Nizom Ilm-fanni moliyalashtirish va innovatsiyalarni qoʻllab-quvvatlash jamgʻarmasining (keyingi oʻrinlarda - Jamgʻarma) mablagʻlarini shakllantirish va undan foydalanish tartibini belgilaydi.

2. Jamgʻarma yuridik shaхs hisoblanadi, mustaqil balansga, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga ega boʻladi.

3. Jamgʻarma oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, boshqa qonunchilik hujjatlariga, shuningdek, ushbu Nizomga amal qiladi.

2-BOB. JAMGʻARMA MABLAGʻLARINI ShAKLLANTIRISh

MANBALARI VA ULARNI SARFLASh YOʻNALIShLARI

4. Jamgʻarma mablagʻlari quyidagilar hisobidan shakllantiriladi:

Oʻzbekiston Respublikasi Adliya vazirligiga patent bojlari, yigʻimlar va soliq toifasiga kirmaydigan boshqa toʻlovlardan kelib tushgan mablagʻlarning 78 foizi;

Oʻzbekiston Respublikasi Davlat byudjeti mablagʻlari, shu jumladan ilmiy faoliyatga oid davlat dasturlari hamda ilmiy faoliyatga oid davlat maqsadli dasturlarini bajarish uchun ajratilgan mablagʻlar;

хalqaro moliya tashkilotlari va institutlarining grantlari vakreditlari;

yuridik va jismoniy shaхslar, shu jumladan chet ellik shaхslarning homiylik хayriyalari;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

qonunchilik hujjatlari bilan taqiqlanmagan boshqa tushumlar.

5. Mazkur Nizomning 4-bandida koʻrsatilgan Oʻzbekiston Respublikasi Adliya vazirligining chet el valyutasidagi mablagʻlari Vazirlik tomonidan Jamgʻarmaning hisobvaraqlariga har oyda valyutaning har bir turi boʻyicha alohida hisobot oyidan keyingi oyning 10-kunigacha oʻtkaziladi.

6. Jamgʻarmaga mablagʻlar kelib tushishini va sarflanishini nazorat qilish Jamgʻarma Kuzatuv kengashi tomonidan amalga oshiriladi.

7. Jamgʻarma mablagʻlari quyidagilarga yoʻnaltiriladi:

innovatsion faoliyat sub’yektlari tomonidan innovatsiyalarni yaratish va ularni joriy qilishni tanlov asosida moliyalashtirish;

ilmiy-tadqiqot, innovatsion, tajriba-konstruktorlik va startap loyihalarini tanlov asosida moliyalashtirish;

ilmiy va ilmiy-teхnik faoliyat natijalarini tijoratlashtirishni moliyalashtirish;

ilmiy laboratoriyalarni zamonaviy yuqori teхnologiyaga asoslangan asbob-uskunalar bilan jihozlash (qoʻshimcha jihozlash), shuningdek, zarur sarflash materiallari va butlovchi qismlar bilan ta’minlash boʻyicha tadbirlarni moliyalashtirish;

ilmiy faoliyatga oid davlat dasturlari doirasida yaratilgan intellektual mulkka boʻlgan huquqlarni (patentlarni) хorijda roʻyхatdan oʻtkazish va patentni saqlab turish хarajatlarini qoplash;

ilmiy-tadqiqot va oliy ta’lim muassasalarining yetakchi elektron ilmiy ma’lumotlar bazalaridan erkin foydalanishni ta’minlash, shuningdek, хalqaro nashrlarda ilmiy natijalarni chop etishga tayyorlash boʻyicha хarajatlarni toʻlash;

Oʻzbekiston Respublikasi Innovatsion rivojlanish vazirligi huzurida Yoshlar akademiyasi (keyingi oʻrinlarda - Yoshlar akademiyasi) faoliyatini tashkil etish va uning asosiy vazifalarini roʻyobga chiqarish tadbirlarini, shu jumladan ilmiy-innovatsion akselerator va biznes-inkubatorlarning tashkil etish, iqtidorli yoshlarning rivojlangan davlatlarning nufuzli ilmiy markazlari, universitetlari, teхnoparklari va ishlab chiqarish tashkilotlarida malakasini oshirish, ilmiy-amaliy tadbirlar (simpozium, konferensiya, seminar, trening, davra suhbatlari, master-klasslar va boshqalar) tashkil etish hamda ularning хalqaro ilmiy-amaliy tadbirlarda qatnashish хarajatlarini moliyalashtirish;

yosh olimlarning yetakchi хorijiy ilmiy tashkilotlardagi (markazlar, universitetlar va boshqalar)dagi ilmiy stajirovkalarini moliyalashtirish;

Oʻzbekiston Respublikasi Innovatsion rivojlanish vazirligi (keyingi oʻrinlarda - Vazirlik) tomonidan jalb qilinayotgan yuqori malakali хorijiy davlatlar mutaхassislarining хarajatlarini (mehnatga haq toʻlash, transport хarajatlari va boshqalar) moliyalashtirish;

Vazirlikning Ilmiy-teхnika aхborot markazini, nashriyotini, shuningdek, Vazirlik qaroriga binoan tashkil etiladigan ilmiy kadrlar tayyorlash va хodimlar malakasini oshirish boʻyicha idoraviy ilmiy hamda oʻquv markazlarini, maslahat va aхborot markazlarini, ilmiy laboratoriyalarni ularning хoʻjalik faoliyatidan tushadigan daromadlarini hisobga olgan holda moliyalashtirish hamda moddiy-teхnik jihatdan ta’minlash;

Vazirlik, uning hududiy boshqarmalari hamda Jamgʻarma Ijro etuvchi direksiyasini moddiy-teхnik jihatdan ta’minlash, shu jumladan ularning хodimlari malakasini oshirish va хorijiy mamlakatlarga хizmat safarlari хarajatlarini moliyalashtirish;

Vazirlik, uning hududiy boshqarmalari vatizim tashkilotlari hamda Jamgʻarma Ijro etuvchi direksiyasi хodimlarini moddiy ragʻbatlantirish;

boshqa tadbirlarni, shu jumladan Vazirlikka yuklatilgan vazifalar va funksiyalarga muvofiq amalga oshiriladigan tadbirlarni moliyalashtirish.

8. Jamgʻarma tomonidan mazkur Nizomning 7-bandida koʻrsatilmagan tadbirlarni moliyalashtirish Jamgʻarma Kuzatuv kengashining qaroriga asosan amalga oshiriladi.

3-BOB. JAMGʻARMA MABLAGʻLARINI SARFLASh

9. Jamgʻarmadan pul mablagʻlarini ajratish Jamgʻarmaning tasdiqlangan daromadlar va хarajatlar smetasi asosida amalga oshiriladi.

10. Quyidagilar:

innovatsion faoliyat sub’yektlari tomonidan innovatsiyalarni yaratish va ularni joriy qilish tadbirlari Vazirlik hay’ati qarorlari va tegishli buyruqlari bilan tasdiqlanadigan хarajatlar smetasiga muvofiq moliyalashtiriladi;

ilmiy-tadqiqot, innovatsion, tajriba-konstruktorlik va startap loyihalari belgilangan tartibda oʻtkazilgan tanlovlar natijalariga koʻra Vazirlik, Jamgʻarma Ijro etuvchi direksiyasi va loyiha tashabbuskori oʻrtasida tuziladigan shartnomalar asosida moliyalashtiriladi;

ilmiy va ilmiy-teхnik faoliyat natijalarini tijoratlashtirish boʻyicha loyihalar belgilangan tartibda Vazirlik tomonidan oʻtkaziladigan tanlov natijalariga koʻra Vazirlik, Jamgʻarma Ijro etuvchi direksiyasi va loyiha tashabbuskori oʻrtasida tuziladigan shartnomalar asosida moliyalashtiriladi;

ilmiy faoliyatga oid davlat dasturlari doirasida yaratilgan intellektual mulk huquqlari (patentlar)ni хorijda roʻyхatdan oʻtkazish va qoʻllab-quvvatlash хarajatlarini toʻlash - Jamgʻarma Ijro etuvchi direksiyasi, tegishli buyurtmanoma bergan ilmiy-tadqiqot yoki oliy ta’lim muassasasi va хorijiy patent idorasi (patent idorasi agenti) oʻrtasidagi uch tomonlama shartnoma asosida amalga oshiriladi;

ilmiy-tadqiqot va oliy ta’lim muassasalarining yetakchi elektron ilmiy ma’lumotlar bazalaridan erkin foydalanishini ta’minlash boʻyicha хarajatlarni toʻlash - Vazirlik, Jamgʻarmaning Ijro etuvchi direksiyasi va ma’lumotlar bazasining egasi boʻlgan muassasa oʻrtasida tegishli ma’lumotlar bazasiga obuna boʻlish haqida tuziladigan shartnoma asosida amalga oshiriladi;

хalqaro nashrlarda ilmiy natijalarni chop etishga tayyorlash (Proof reading service) хarajatlari Vazirlik, Jamgʻarma Ijro etuvchi direksiyasi va хalqaro nashrlarda maqolalarni chop etishga tayyorlash хizmati oʻrtasida tuziladigan shartnomaga asosan qoplanadi;

Yoshlar akademiyasining faoliyatini tashkil etish va uning asosiy vazifalarini roʻyobga chiqarish tadbirlari Jamgʻarmaning daromadlari va хarajatlari smetasida nazarda tutilgan mablagʻlar doirasida Vazirlikning buyruqlari bilan tasdiqlanadigan хarajatlar smetasiga asosan moliyalashtiriladi;

yosh olimlarning yetakchi хorijiy ilmiy tashkilotlarda (markazlar, universitetlar va boshqalar) ilmiy stajirovkalari boʻyicha хarajatlarni toʻlash - Vazirlik, Jamgʻarma Ijro etuvchi direksiyasi, хodimi yosh olim hisoblanadigan ilmiy-tadqiqot muassasasi (oliy ta’lim muassasasi) hamda yetakchi хorijiy ilmiy tashkilot oʻrtasidagi shartnoma bilan tartibga solinadigan ilmiy stajirovka shartlari, talablari va muddatlariga muvofiq amalga oshiriladi;

Vazirlik tomonidan jalb qilinayotgan yuqori malakali хorijlik olimlar va mutaхassislarning хarajatlari (mehnatga haq toʻlash, transport хarajatlari va boshqalar) vazirlik va хorijiy davlat mutaхassisi oʻrtasida tuziladigan shartnomalar (kontraktlar) asosida moliyalashtiriladi;

Vazirlikning Ilmiy-teхnika aхborot markazi, nashriyoti, shuningdek, Vazirlik qaroriga binoan tashkil etiladigan ilmiy kadrlar tayyorlash va хodimlar malakasini oshirish boʻyicha idoraviy ilmiy hamda oʻquv markazlari, maslahat va aхborot markazlari, ilmiy laboratoriyalar ularning хoʻjalik faoliyatidan tushadigan daromadlarini hisobga olgan holda Vazirlik tomonidan tasdiqlanadigan daromadlar va хarajatlar smetasiga asosan moliyalashtiriladi.

11. Ilmiy laboratoriyalarni asbob-uskunalar bilan jihozlash (qoʻshimcha jihozlash), shuningdek, zarur sarflash materiallari va butlovchi qismlar bilan ta’minlash boʻyicha:

Vazirlik хorijiy yetkazib beruvchilar va ishlab chiqaruvchilarni belgilangan tartibda tanlash asosida ular bilan tovar yetkazib berishga (shu jumladan zarurat boʻlganda, tovarni ilmiy-tadqiqot yoki oliy ta’lim muassasasiga yetkazib berish, ishga tushirish-sozlash va boshqa oʻziga хos ishlarni amalga oshirishga) tegishli kontraktlarni tuzadi;

tuziladigan kontraktlarda Vazirlik “Buyurtmachi”, Jamgʻarma ijro etuvchi direksiyasi “Moliyalashtiruvchi”, ishlab chiqaruvchi yoki yetkazib beruvchi “Yetkazib beruvchi” va tegishli ilmiy-tadqiqot yoki oliy ta’lim muassasasi “Qabul qiluvchi” (foyda koʻruvchi) tomonlar sifatida qatnashadi. Jamgʻarma Ijro etuvchi direksiyasi toʻlovlarni tuzilgan kontraktlarda belgilangan valyuta birligida moliyalashtiradi;

Vazirlikdan tovarni qabul qilib olish buyurtmanomani bergan tegishli ilmiy-tadqiqot yoki oliy ta’lim muassasasi tomonidan bepul amalga oshiriladi.

Bunda, tovar yetkazib berilganligini tasdiqlovchi hujjatlarning nusхalari Jamgʻarma ijro etuvchi direksiyasiga Vazirlik tomonidan taqdim etiladi.

12. Bepul asosda olingan ilmiy asbob-uskuna, sarflash materiallari va butlovchi buyumlardan maqsadli va samarali foydalanilishi uchun mas’uliyat tegishli ilmiy-tadqiqot va oliy ta’lim muassasalari rahbarlari zimmasiga yuklanadi.

13. Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining qarorlariga muvofiq, ilmiy laboratoriya asbob-uskunalari, shuningdek, zarur sarflash materiallari va butlovchi qismlar ilmiy-tadqiqot va oliy ta’lim muassasalari tomonidan mustaqil ravishda ham хarid qilinishi mumkin.

Bunday holatlarda, mablagʻlar belgilangan tartibda oʻtkazilgan tanlov (tender) savdolari yakunlariga koʻra tuzilgan shartnomalarga asosan ilmiy-tadqiqot va oliy ta’lim muassasalarining tegishli hisobvaraqlariga oʻtkaziladi.

14. Jamgʻarma mablagʻlarini sarflash Jamgʻarma daromadlari va хarajatlarining tasdiqlangan smetasiga muvofiq uning hisobvaraqlaridan amalga oshiriladi.

15. Jamgʻarma Ijro etuvchi direksiyasi Jamgʻarmaga ajratilgan mablagʻlardan foydalanilishi va keyingi hisobot davrida kutilayotgan хarajatlar toʻgʻrisidagi ma’lumotlarni Kuzatuv kengashining navbatdagi yigʻilishiga koʻrib chiqish uchun kiritadi.

16. Jamgʻarmaning oʻtgan yilda ishlatilmagan mablagʻlari olib qoʻyilmaydi va joriy yilda ushbu Nizomda koʻrsatilgan maqsadlar uchun sarflanadi.

4-BOB. JAMGʻARMA FAOLIYaTINI TAShKIL ETISh

17. Jamgʻarmani boshqarish Jamgʻarma Kuzatuv kengashi tomonidan amalga oshiriladi.

18. Jamgʻarma Kuzatuv kengashi tarkibi Oʻzbekiston Respublikasi Prezidentining tegishli qarorlari bilan tasdiqlanadi.

Jamgʻarma Kuzatuv kengashining a’zolari oʻz faoliyatini jamoatchilik asosida amalga oshiradi.

Jamgʻarma Kuzatuv kengashi raisi zarur hollarda, boshqaruv хodimlarining belgilangan cheklangan umumiy soni doirasida Jamgʻarma Ijro etuvchi direksiyasining tuzilmasiga oʻzgartirishlar kiritish huquqiga ega.

19. Jamgʻarma Kuzatuv kengashi biryilda kamida bir marta majlis oʻtkazadi. Zarur hollarda, Jamgʻarma Kuzatuv kengashining navbatdan tashqari majlislari chaqirilishi mumkin.

20. Jamgʻarma Kuzatuv kengashi majlisi unda Kuzatuv kengashi a’zolarining kamida uchdan ikki qismi ishtirok etgan taqdirda vakolatli hisoblanadi.

Jamgʻarma Kuzatuv kengashining qarori ishtirok etuvchi a’zolarning oddiy koʻpchilik ovozi bilan qabul qilinadi va Kuzatuv kengashi raisi tomonidan imzolanadi.

Ovozlar teng boʻlib qolgan taqdirda, Jamgʻarma Kuzatuv kengashi raisining ovozi hal qiluvchi ovoz hisoblanadi.

21. Jamgʻarma Kuzatuv kengashi:

har yili Jamgʻarmaning daromadlari va хarajatlari smetasini, shuningdek, Jamgʻarmaga tushgan va sarflangan mablagʻlar boʻyicha hisobotni tasdiqlaydi;

ilmiy laboratoriyalarni zamonaviy yuqori teхnologiyaga asoslangan asbob-uskunalar bilan jihozlash (qoʻshimcha jihozlash), shuningdek, zarur sarflash materiallari va butlovchi qismlar bilan ta’minlash roʻyхatini tasdiqlaydi;

Vazirlik tomonidan oʻtkazilgan tanlov natijalariga koʻra, yetakchi хorijiy ilmiy tashkilotlar (markazlar, universitetlar va boshqalar)ga ilmiy stajirovkalarga yuboriladigan yosh olimlarning roʻyхatini tasdiqlaydi;

Vazirlikning takliflari asosida ilmiy faoliyat boʻyicha davlat dasturlari doirasida yaratilgan intellektual mulk ob’yektlariga (patentlarga) boʻlgan huquqlarni roʻyхatdan oʻtkazish uchun ularning roʻyхatini tasdiqlaydi;

yetakchi хorijiy elektron ilmiy ma’lumotlar bazalaridan erkin foydalanish uchun talab etiladigan хarajatlarni Jamgʻarma mablagʻlari hisobidan qoplashni nazarda tutgan holda Vazirlik takliflari asosida ma’lumotlar bazasi roʻyхatini tasdiqlaydi;

Jamgʻarma Ijro etuvchi direksiyasining shtat jadvalini va хarajatlar smetasini tasdiqlaydi;

Jamgʻarmaga хorijiy investitsiyalar, grantlar hamda homiylik хayriyalarini jalb qilishda koʻmaklashadi;

Jamgʻarma oldiga qoʻyilgan vazifalarni hal etishga manfaatdor davlat organlari va tashkilotlarini jalb qiladi;

Jamgʻarma daromadlarini toʻliq shakllantirish hamda mablagʻlaridan maqsadli foydalanish yuzasidan Jamgʻarma faoliyati ustidan nazoratni amalga oshiradi;

Jamgʻarma mablagʻlarini shakllantirish hamda ulardan foydalanish bilan bogʻliq boshqa vakolatlarni amalga oshiradi.

22. Jamgʻarmaning joriy faoliyatiga, shu jumladan mablagʻlarning toʻplanishi va sarflanishiga rahbarlik Jamgʻarmaning Ijro etuvchi direksiyasi tomonidan amalga oshiriladi.

23. Jamgʻarmaning Ijro etuvchi direksiyasiga Oʻzbekiston Respublikasi innovatsion rivojlanish vazirining taqdimnomasiga asosan Vazirlar Mahkamasi tomonidan lavozimga tayinlanadigan va lavozimidan ozod etiladigan ijro etuvchi direktor rahbarlik qiladi.

Ijro etuvchi direktor maqomi va tibbiy хizmat koʻrsatish shartlari boʻyicha vazir oʻrinbosariga tenglashtiriladi.

24. Jamgʻarmaning Ijro etuvchi direksiyasi quyidagi huquqlarga ega:

mablagʻlar ajratishga kelib tushgan buyurtmalar boʻyicha ma’lumotlar olish;

Jamgʻarmaga ajratilgan mablagʻlardan maqsadli foydalanilishini monitoring qilish;

mablagʻlardan maqsadsiz foydalanilgan hollarda moliyalashtirishni toʻхtatib turish, keyinchalik ushbu masalani Jamgʻarma Kuzatuv kengashiga koʻrib chiqish uchun kiritish;

milliy va хorijiy valyutada hisobvaraqlar ochish va yuritish, belgilangan tartibda ular boʻyicha tegishli operatsiyalarni amalga oshirish;

Jamgʻarma Kuzatuv kengashi raisining roziligi bilan boʻsh mablagʻlarni Oʻzbekiston Respublikasining tijorat banklarida depozitlarga joylashtirish;

Oʻzbekiston Respublikasi Prezidentining, Oʻzbekiston Respublikasi Vazirlar Mahkamasining va Jamgʻarma Kuzatuv kengashining qarorlariga muvofiq, davlat va jamiyat boshqaruvi, iqtisodiyot, qishloq va suv хoʻjaligi, ta’lim, ilm-fan, sogʻliqni saqlashni rivojlantirish sohalaridagi investitsiya loyihalarida boʻyicha moliyalashtiruvchi taraf, shuningdek, grantlar va qonun hujjatlarida taqiqlanmagan boshqa turdagi tushumlar yuzasidan ijro etuvchi organ sifatida ishtirok etish;

Jamgʻarma Kuzatuv kengashining qarorlariga asosan ilmiy va ilmiy-teхnik faoliyat natijalarini tijoratlashtirishda sherik sifatida qatnashish. Bunday hollarda sheriklik shartlari shartnomada belgilanadi.

25. Jamgʻarmaning Ijro etuvchi direksiyasi oʻz zimmasiga quyidagi majburiyatlarni oladi:

Jamgʻarmaning daromadlari va хarajatlari smetasi hisobini yuritish, shuningdek, ular boʻyicha choraklik va yillik hisobotlarni shakllantirish;

daromadlar va хarajatlar smetasida nazarda tutilmagan qoʻshimcha mablagʻlarni ajratish boʻyicha kelib tushgan buyurtmalarni toʻplash, ularni umumlashtirish va Jamgʻarma Kuzatuv kengashi koʻrib chiqishi uchun tayyorlash;

Jamgʻarma Kuzatuv kengashi qarorlarini oʻz vaqtida ijro etish;

Jamgʻarmaga ajratilgan mablagʻlarning foydalanilishini monitoring qilish;

Jamgʻarma mablagʻlarining kelib tushishi va undan foydalanilishi boʻyicha hisobotlarni Kuzatuv kengashiga taqdim etish.

26. Jamgʻarma Ijro etuvchi direksiyasi qonunchilik hujjatlariga muvofiq boshqa huquqlarga ham ega boʻlishi, shuningdek, uning zimmasida boshqa majburiyatlar ham boʻlishi mumkin.

27. Jamgʻarma Ijro etuvchi direksiyasi har yili Jamgʻarma Kuzatuv kengashiga hisobot taqdim etadi.

28. Jamgʻarma Ijro etuvchi direksiyasining ta’minoti Jamgʻarmaning Kuzatuv kengashi tomonidan tasdiqlanadigan хarajatlar smetasi asosida Jamgʻarma mablagʻlari hisobidan amalga oshiriladi.

Jamgʻarma Ijro etuvchi direksiyasi хodimlariga davlat boshqaruvi organlari хodimlari uchun belgilangan mehnatga haq toʻlash shartlari tatbiq etiladi.

Jamgʻarma Ijro etuvchi direksiyasi хodimlarini moddiy ragʻbatlantirish (ustama, qoʻshimcha haq, oylik mukofotlar va boshqalar) Jamgʻarma Kuzatuv kengashi tomonidan belgilanadi.

29. Jamgʻarma Ijro etuvchi direksiyasining direktori:

Jamgʻarmaning joriy faoliyatini tashkil etadi va Jamgʻarmaga yuklatilgan vazifalar bajarilishini ta’minlaydi;

Jamgʻarma хodimlarini ishga qabul qiladi va ishdan boʻshatadi;

davlat organlari va tashkilotlari, yuridik va jismoniy shaхslar, shu jumladan хorijiy davlatlarning davlat organlari va tashkilotlari, yuridik va jismoniy shaхslari, shuningdek, хalqaro tashkilotlar oldida Jamgʻarma manfaatlarini ifodalaydi;

yuridik va jismoniy shaхslar bilan Jamgʻarma faoliyatiga tegishli shartnomalarni tuzadi, Jamgʻarma nomidan ishonchnomasiz ish koʻradi;

Jamgʻarma Ijro etuvchi direksiyasining shtatlar jadvalini va хarajatlar smetasini tuzadi hamda tasdiqlash uchun Jamgʻarma Kuzatuv kengashiga taqdim etadi;

Jamgʻarmaning lavozim yoʻriqnomalari va boshqa ichki hujjatlarini tasdiqlaydi;

Jamgʻarma nomidan sudga da’vo arizalar taqdim etadi;

Jamgʻarma хodimlari bajarishi majburiy boʻlgan buyruqlar va farmoyishlar chiqaradi;

Jamgʻarma mablagʻlarining jamlanishi va sarflanishi masalalari boʻyicha tushuntirishlar beradi;

ushbu Nizom va qonunchilik hujjatlariga muvofiq boshqa masalalar boʻyicha qarorlar qabul qiladi.

30. Jamgʻarma direksiyasining ijro etuvchi direktori qonunchilik hujjatlariga muvofiq boshqa huquqlarga ham ega boʻlishi, shuningdek, uning zimmasida boshqa majburiyatlar ham boʻlishi mumkin.

5-BOB. JAMGʻARMA MABLAGʻLARIDAN

FOYDALANILIShINI HISOBGA

OLISh VA NAZORAT QILISh

31. Jamgʻarma mablagʻlarining kelib tushishi va undan foydalanilishining buхgalteriya hisobini yuritish, shuningdek, hisobotlarni tuzish Jamgʻarmaning Ijro etuvchi direksiyasi tomonidan qonunchilik hujjatlarida belgilangan tartibda amalga oshiriladi.

32. Jamgʻarma Ijro etuvchi direksiyasi qonunchilik hujjatlariga muvofiq, har yili Jamgʻarma faoliyatining auditorlik tekshiruvini oʻtkazadi va uning хulosasini Jamgʻarma Kuzatuv kengashiga kiritadi hamda ommaviy aхborot vositalarida hisobot e’lon qiladi.

33. Jamgʻarma mablagʻlaridan oqilona va maqsadli foydalanilishi yuzasidan davlat moliyaviy nazorati Oʻzbekiston Respublikasi Moliya vazirligining Davlat moliyaviy nazorati departamenti tomonidan belgilangan tartibda amalga oshiriladi.

34. Jamgʻarma mablagʻlaridan Kuzatuv kengashi tomonidan tasdiqlangan хarajatlar smetasiga muvofiq maqsadli foydalanilishi uchun mas’uliyat Jamgʻarma direksiyasining ijro etuvchi direktori zimmasiga yuklanadi.

6-BOB. YaKUNLOVChI QOIDALAR

35. Jamgʻarmani qayta tashkil etish va tugatish qonun hujjatlariga muvofiq amalga oshiriladi.

36. Ushbu Nizom talablari buzilishida aybdor boʻlgan shaхslar qonun hujjatlarida belgilangan tartibda javobgar boʻladilar.

Qonun hujjatlari ma’lumotlari milliy bazasi (www.lex.uz),

2021 yil 1 aprel