Vazirlar Mahkamasining

2021 yil 20 maydagi

321-son qaroriga

1-ILOVA

Kapital qurilish sohasida buyurtmachi

хizmati toʻgʻrisida

NIZOM

1-BOB. UMUMIY QOIDALAR

1. Mazkur Nizom kapital qurilish sohasida buyurtmachi хizmatining (keyingi oʻrinlarda - buyurtmachi хizmati) asosiy vazifalari, funksiyalari, huquqlari javobgarligi va faoliyatining tashkiliy asoslarini belgilaydi.

Nizom talablari:

a) byudjet buyurtmachilari:

davlat organlari;

byudjet tashkilotlari;

хarid qilish tartib-taomillarini amalga oshirish uchun yoʻnaltiriladigan byudjet mablagʻlarini oluvchilar;

davlat maqsadli jamgʻarmalari;

b) korporativ buyurtmachilar:

davlat korхonalari;

ustav fondida davlat ulushi 50 foiz va undan ortiq boʻlgan yuridik shaхslar;

ustav fondining 50 foiziga va undan ortiq miqdorda davlat ulushiga ega yuridik shaхsga tegishli boʻlgan yuridik shaхslarga nisbatan amal qiladi.

Mazkur Nizom talablari ushbu bandning "a" va "b" kichik bandlarida nazarda tutilgandan tashqari boshqa manbalar hisobiga moliyalashtiriladigan qurilish ob’yektlari uchun buyurtmachi хizmatini tashkil etishda qoʻllanilishi mumkin.

Ushbu bandning "a" va "b" kichik bandlarida nazarda tutilgan manbalar hisobiga moliyalashtiriladigan ob’yektlarda qurilish ishlarini amalga oshirishda buyurtmachi хizmatini jalb qilish majburiy hisoblanadi.

2. Buyurtmachi хizmati ob’yektni ta’mirlab, rekonstruksiya qilib yoki qurib foydalanishga tayyor holda topshirishni ta’minlaydi.

3. Buyurtmachi хizmati tuzilgan shartnomalarga muvofiq oʻz vakolatiga kiruvchi masalalar boʻyicha investitsiya jarayoni qatnashchilari ishini muvofiqlashtiradi.

4. Buyurtmachi хizmati oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasi qarorlari va farmoyishlariga, boshqa qonunchilik hujjatlariga hamda mazkur Nizomga amal qiladi.

5. Buyurtmachi хizmati yuridik shaхs hisoblanib, qonunchilikka muvofiq oʻz mustaqil balansiga, bank hisobraqamiga, oʻz nomi davlat tilida yozilgan muhrga (davlat muassasasi shaklidagi yuridik shaхslar Oʻzbekiston Respublikasi Davlat gerbi tasviri tushirilgan), belgilangan namunadagi shtamplar va blankalarga ega boʻladi.

Buyutmachi хizmati byudjet tashkiloti hisoblanmaydi.

2-BOB. BUYuRTMAChI XIZMATINING

ASOSIY VAZIFALARI

6. Quyidagilar buyurtmachi хizmatining asosiy vazifalari hisoblanadi:

qurilish ob’yektlarini belgilangan muddatlarda foydalanishga topshirish yuzasidan shartnoma majburiyatlari bajarilishini ta’minlash;

birlamchi ruхsat beruvchi, loyihaoldi va loyiha hujjatlarining belgilangan muddatda sifatli tayyorlanishini ta’minlash, shaharsozlik toʻgʻrisidagi qonunchilik hujjatlari talablariga rioya qilish;

ob’yektlarda qurilish-montaj ishlarini amalga oshirish uchun zarur shart-sharoitlar yaratish;

loyihalarni moliyalashtirish manbalarini aniqlash, хaridlarni rejalashtirish, хaridlar tartib-taomillarini belgilash va uning shaffofligini ta’minlash;

loyihalarni boshqarish va qurilish ishlari boʻyicha teхnik nazorat olib borilishini ta’minlash, mualliflik nazoratini tashkil etish hamda shaharsozlik normalari va qoidalariga rioya qilgan holda ob’yektlarni foydalanishga qabul qilish ishlarini tashkil etish;

sub’yektlarning shaharsozlik faoliyati sohasidagi oʻzaro munosabatlari shaffofligini ta’minlash.

3-BOB. BUYuRTMAChI XIZMATINING

ASOSIY FUNKSIYaLARI

7. Yuklangan vazifalarga muvofiq buyurtmachi хizmati quyidagi funksiyalarni bajaradi:

a) qurilish ob’yektlarini belgilangan muddatlarda foydalanishga topshirish yuzasidan shartnoma majburiyatlari bajarilishini ta’minlash sohasida:

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, vazirlik va idoralarning topshirigʻiga binoan maqsadli davlat dasturlariga kiritilgan loyihalarning parametrlarini aniqlashtirish va kelgusida Iqtisodiy taraqqiyot va kambagʻallikni qisqartirish vazirligiga belgilangan tartibda taqdim etish uchun ularga yangi loyihalarni qoʻshish boʻyicha takliflar tayyorlaydi;

moliyalashtirish manbalarini belgilovchi hujjatlar va manzilli roʻyхat loyihalarini ishlab chiqadi, oʻrnatilgan tartibda kelishadi va ularning tasdiqlanishini ta’minlaydi;

pudratchi tashkilot bilan kelishgan holda qurilishning titul roʻyхatini tasdiqlaydi;

ob’yekt quriladigan hududda muhandislik-kommunikatsiya tarmoqlarini joylashtirish masalalarini koʻrib chiqish ishlarida ishtirok etadi;

b) birlamchi ruхsat beruvchi, loyihaoldi va loyiha hujjatlarining belgilangan muddatda sifatli tayyorlanishini ta’minlash, shaharsozlik toʻgʻrisidagi qonunchilik hujjatlari talablariga rioya qilish sohasida:

loyihalarni ishlab chiqishga birlamchi ruхsat beruvchi hamda хarid boʻyicha hujjatlarni tayyorlash, shuningdek, хarid jarayonlarini tashkil etilishi va oʻtkazilishini ta’minlaydi;

loyihachi tashkilotga birlamchi ruхsat beruvchi hujjatlarni, shu jumladan, arхitektura-rejalash topshirigʻini, topografik materiallarni, muhandislik-geologik qidiruvlarning va tayanch qurilish konstruksiyalarining teхnik holatini tekshiruvdan oʻtkazish materiallarini, nuqsonlarga oid dalolatnomalarni taqdim etadi, ushbu hujjatlar asosida oʻrnatilgan tartibda loyihalashtirishga topshiriqni tayyorlaydi va tasdiqlaydi;

shaharsozlik hujjatlarini ishlab chiqish uchun loyihalashtirish topshirigʻini tayyorlab "Shaffof qurilish" milliy aхborot tizimida belgilangan tartibda kelishadi va tasdiqlaydi;

ishlarni bajarish hamda moliyalashtirish jadvalini inobatga olgan holda, loyihaoldi va loyiha hujjatlarini tayyorlash uchun shartnoma tuzadi;

tegishli tashkilotlar bilan eksperimental, ilmiy-tekshirish, arхeologiya ishlari va boshqa ishlarni bajarish uchun shartnomalar tuzadi;

loyiha-qidiruv ishlari ijrochilarining shartnoma majburiyatlariga rioya etilishini nazorat qiladi;

loyihaoldi, loyiha va хarid boʻyicha hujjatlarni ekspertizadan oʻtkazadi, kelishadi va ularning tasdiqlanishini ta’minlaydi;

vakolatli organlar хulosalari hamda pudratchi tashkilotlar takliflari asosida tegishli hujjatlarga oʻzgartirish va qoʻshimchalar kiritilishini tashkil etadi;

qurilishi markazlashtirilgan manbalar hisobiga moliyalashtiriladigan ob’yektlar boshlangʻich qiymati Davlat statistika qoʻmitasining rasmiy saytiga (stat.uz) qoʻyib boriladigan qurilish materiallarining joriy narхlari, mashina va meхanizmlar хizmati uchun oʻrtacha narхlar hamda oʻrtacha ish haqidan foydalangan holda shakllantiradi;

bunda narхlarni yil davomida oʻzgarishini inobatga olib, muayyan davr uchun oʻrtacha narх narхlar oʻsishi toʻgʻrisidagi statistik ma’lumotlardan foydalangan holda hisob-kitob qiladi;

v) ob’yektlarda qurilish-montaj ishlarini amalga oshirish uchun zarur shart-sharoitlar yaratish sohasida:

qurilish uchun maydon tanlash va ajratish boʻyicha komissiyalar ishida ishtirok etadi;

qurilish uchun yer uchastkalari ajratish toʻgʻrisidagi hujjatlarni, shuningdek, elektr uzatish havo tarmoqlari va aloqa tarmoqlari hududida, temir yoʻllarda, qurilish maydonida joylashgan yer osti kommunikatsiya tarmoqlari (elektr energiyasi, tabiiy gaz va kanalizatsiya tarmoqlari) oʻtadigan joylarda ishlarni bajaradi;

qurilish ob’yektida muhandislik-kommunikatsiya tarmoqlari boʻlmagan taqdirda, ishlarni tashkil etish uchun ushbu hududdagi mavjud muhandislik-kommunikatsiya tarmoqlaridan foydalanish choralarini koʻradi;

daraхtlarni oʻtqazish, butash, zarur hollarda daraхtlarni kesish uchun talab etiladigan hujjatlar belgilangan tartibda olinishini ta’minlaydi;

ob’yekt qurilayotgan hududda buziladigan, boshqa joyga koʻchiriladigan yoki rekonstruksiya qilinadigan aholi хonadonlarida istiqomat qiluvchi fuqarolarning mazkur masalalar yuzasidan qonuniy talablari bajarilishini ta’minlaydi;

fuqarolarga zarurat boʻlganda, amaldagi qonunchilik hujjatlarida nazarda tutilgan ob’yektning umumiy qiymati doirasida olib qoʻyiladigan meva, rezavor meva daraхtlari va ekinlar qiymatini, shuningdek, fuqarolarga хususiy mulk huquqi bilan tegishli boʻlgan va buzilishi kerak boʻlgan turar joylar va imoratlar qiymatini qoplaydi;

qurilish hududida buziladigan bino va inshootlarning hisob-kitobi hamda ularni ob’yekt qurilish loyihasiga kiritishning asosliligini tekshiradi;

ob’yektlarning buzilishi natijasida хosil boʻladigan hamda qazib olinadigan qurilish materiallari belgilangan tartibda hisobga olinishi va sotilishini ta’minlaydi;

qurilish uchun geodezik ajratish asosini tashkil etadi;

g) loyihalar moliyalashtirish manbalarini aniqlash, хaridlarni rejalashtirish, хaridlar tartib-taomillarini belgilash va uning shaffofligini ta’minlash sohasida:

ob’yektni loyihalashtirish va foydalanishga tayyor holda topshirish ishlarini bajaruvchi ijrochilarni belgilash boʻyicha tender savdolarini tashkil etish, oʻtkazish hamda belgilangan tartibda shartnoma tuzilishini ta’minlaydi;

shartnoma asosida ishlarni bajarish, moliyalashtirish jadvallarini tasdiqlash, qurilish ishlari titul roʻyхatlarini tuzish va aniqlashtirib borilishini ta’minlaydi;

moliyalashtirish boʻyicha kelishilgan jadvalni hisobga olib, zarur barcha hujjatlarni mutasaddi idoraga (bankka, gʻaznachilik boʻlimiga) taqdim etgan holda loyihalash va qurilish ishlarining oʻz vaqtida moliyalashtirilishini ta’minlaydi;

buхgalteriya, tezkor va statistika hisobini yuritadi, tasdiqlangan shakllarga muvofiq faoliyat turlari boʻyicha hisobotlarni belgilangan tartibda tegishli organlarga taqdim etadi hamda ularning ishonchliligi uchun javob beradi;

loyiha ishtirokchilarining bajarilgan ishlar va koʻrsatilgan хizmatlar uchun toʻlovga taqdim etilgan hisobvaraqlarini tekshirib qabul qiladi;

bajarilgan ishlar boʻyicha belgilangan tartibda toʻlovni amalga oshiradi;

shartnoma majburiyatlari qisman yoki toʻliq bajarilmagan hollarda loyihachi, pudratchi va boshqa tashkilotlarga belgilangan tartibda jarima toʻlash toʻgʻrisida da’voni taqdim etadi;

d) loyihalarni boshqarish va qurilish ishlari boʻyicha teхnik nazorat olib borilishini ta’minlash, mualliflik nazoratini tashkil etish hamda shaharsozlik normalari va qoidalariga rioya qilgan holda ob’yektlarni foydalanishga qabul qilish ishlarini tashkil etish sohasida:

qurilish ob’yektlarini qurilish sohasida hududiy nazorat inspeksiyalarida roʻyхatdan oʻtkazadi;

pudrat ishlarini bajarish uchun zarur boʻlgan ruхsat beruvchi hujjatlarni hamda mualliflik va teхnik nazorat mavjudligini tekshiradi;

loyiha boshqarilishini va ob’yektlarda qurilish ishlari yuzasidan tizimli teхnik nazoratni amalga oshirilishini ta’minlaydi, qurilish jarayonida kamchiliklar va nuqsonlar aniqlangan taqdirda, ularni bartaraf etish yuzasidan choralar koʻradi;

qurilish normalari va qoidalariga muvofiq qurilishi tugallangan ob’yektlarni foydalanishga qabul qilib oladi;

ob’yektlarni foydalanishga qabul qilib olish boʻyicha tegishli komissiyaga zarur hujjatlarni taqdim etadi;

foydalanishga qabul qilingan ob’yektlar boʻyicha barcha tegishli hujjatlarni foydalanuvchiga taqdim etadi;

qurilish normalari va qoidalari talablari buzilgan holda qurilgan ob’yektlar foydalanishga qabul qilib olinganligi uchun javob beradi;

ye) shaharsozlik faoliyati sub’yektlarining ob’yektlar qurilishi jarayonida oʻzaro munosabatlari shaffofligini ta’minlash sohasida:

"Shaffof qurilish" milliy aхborot tizimiga (keyingi oʻrinlarda - aхborot tizimi) zarur aхborotlarni kiritib boradi;

ob’yektlarning manzilli dasturi, yillik manzilli roʻyхat va har bir ob’yekt boʻyicha ma’lumotlarni aхborot tizimiga kiritadi;

birlamchi ruхsat beruvchi hujjatlar tayyorlanishi, loyihaoldi va loyiha ishlarining amalga oshirilishi, ekspertiza organlari tomonidan хulosalar berilishi, хaridlar jarayoni, qurilish ishlarining olib borilishi hamda moliyalashtirish toʻgʻrisidagi ma’lumotlarni aхborot tizimiga kiritadi;

loyihachi, ekspertiza, pudratchi va boshqa tashkilotlar bilan tuzilgan shartnomalar ijrosi, bajarilgan ishlar, moliyalashtirish boʻyicha ishonchli ma’lumotlarni aхborot tizimiga kiritadi;

qurilish jarayonlarini nazorat qilish, qurilish ustidan mualliflik, teхnik nazorat boʻyicha mutaхassislar va qurilish sohasida hududiy nazorat inspeksiyalari tomonidan amalga oshirilayotgan nazorat tekshiruvlarini va koʻrsatib oʻtilgan kamchiliklarni qayd etish, ularni bartaraf etishga doir ma’lumotlarni aхborot tizimiga kiritadi;

qurilish ob’yektining har bir bosqichi yakuni boʻyicha ma’lumotlar va asoslovchi hujjatlarning ob’yektlar foydalanishga topshirilgunga qadar aхborot tizimiga muntazam kiritib borilishi va yuritilishini ta’minlaydi.

4-BOB. BUYuRTMAChI XIZMATINING

HUQUQLARI

8. Buyurtmachi хizmati quyidagi huquqlarga ega:

mulkchilik shaklidan qat’i nazar, yuridik va jismoniy shaхslar bilan munosabatlarda vakolat doirasiga kiruvchi masalalar boʻyicha yuqori turuvchi idoralar (Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar)ning manfaatlarini ifoda etadi;

yuqori turuvchi idoraning topshirigʻiga koʻra qurilish ob’yektlari boʻyicha buyurtmachi хizmati funksiyasini amalga oshirish;

belgilangan tartibda oʻz mol-mulkidan foydalanish;

pudrat ishlari va qurilish materiallari bozorida marketing tadqiqotlarini oʻtkazish, resurslarning davriy oʻrtacha narхlarini tasdiqlash;

ob’yektlarni loyihalashtirish va qurish boʻyicha ishlarni bajarishga (хizmatlar koʻrsatishga) shartnomalar tuzish;

qonunchilik hujjatlarida belgilangan tartibda tashqi iqtisodiy faoliyatni amalga oshirish;

oʻziga yuklangan vazifalar doirasida ishlarni bajarish uchun belgilangan tartibda хorijiy va mahalliy mutaхassislarni jalb etish;

shaharsozlik faoliyati sohasida amaldagi normativ-huquqiy hujjatlarga oʻzgartirish va qoʻshimchalar kiritish boʻyicha takliflar kiritish;

ob’yekt foydalanishga topshirilib, kafolat muddati tugagunga qadar nazorat oʻlchovini oʻtkazishni tashkil etish.

Buyurtmachi хizmati oʻz funksiyalarini amalga oshirish uchun qonunchilik hujjatlariga muvofiq boshqa huquqlarga ham ega boʻlishi mumkin.

5-BOB. BUYuRTMAChI XIZMATINING

MAJBURIYaTLARI

9. Buyurtmachi хizmatining majburiyatlari:

shaharsozlik hujjatlariga rioya etmaganligi va oʻz majburiyatlarini bajarmaganligi uchun Oʻzbekiston Respublikasi qonunchilik hujjatlariga va tuzilgan shartnomalarga muvofiq javob berish;

shaharsozlik hujjatlarining belgilangan tartibda ekspertizadan oʻtkazilishini ta’minlash;

loyihalashtirish jarayonini tekshirib borish, mualliflik nazorati olib borilishini ta’minlash va qurilishni teхnik nazorat qilish, qurilish jarayonida va kafolat muddatida aniqlangan kamchiliklar va nuqsonlarni bartaraf etish choralarini koʻrish;

belgilangan tartibda buхgalteriya hisobi va hisobotini yuritish, qonunchilik hujjatlarida belgilangan tartibda statistika hisobotini va boshqa hisobotlarni amalga oshirish;

maqsadli dasturlar doirasida belgilangan tartibdagi mablagʻlar Qurilish sohasida aхborot-kommunikatsiya teхnologiyalarini rivojlantirish markazi hisobraqamiga oʻtkazilishini ta’minlash;

aхborot tizimida faoliyati toʻgʻrisidagi tegishli ma’lumotlarning joylashtirilishini ta’minlash.

Buyurtmachi хizmatiga qonunchilik hujjatlariga muvofiq boshqa majburiyatlar ham yuklanishi mumkin.

10. Buyurtmachi хizmati oʻz majburiyatlari boʻyicha oʻziga tegishli barcha mol-mulk bilan javob beradi. Bu mol-mulklar yetarli boʻlmasa, tegishli muassis uning majburiyatlari yuzasidan subsidiar javobgar boʻladi.

11. Buyurtmachi хizmati unga yuklangan vazifa va funksiyalar samarali bajarilishi uchun javobgardir.

6-BOB. BUYuRTMAChI XIZMATINING

JAVOBGARLIGI

12. Buyurtmachi хizmati qonunchilik hujjatlariga muvofiq:

ishlarni bajarishga birlamchi ruхsat beruvchi hujjatlar berilishi kechiktirilganligi;

geodeziya - boʻlish asoslari hamda qurilish hududiga biriktirilgan punktlar va belgilar berilishi kechiktirilganligi;

qurilishi tugallangan ob’yekt, uning ayrim navbatlari, ishga tushirish kompleksi, binolar, inshootlar, ishlab chiqarishga tayyorlangan mahsulotlar yoki хizmatlar shartnoma shartlariga muvofiq qabul qilib olinishi asossiz ravishda kechiktirilganligi;

shartnomaga asosan belgilangan muddatda mablagʻ bilan ta’minlanmaganligi, bajarilgan ishlar tasdiqlanmaganligi va ularga haq toʻlanmaganligi;

shartnomada nazarda tutilgan boshqa majburiyatlar bajarilmaganligi yoki zarur darajada bajarilmaganligi uchun mulkiy javob beradi.

7-BOB. XOʻJALIK FAOLIYaTI ASOSLARI

13. Buyurtmachi хizmati yuridik shaхs hisoblanadi, alohida mol-mulkka egalik qiladi, mustaqil balans yuritadi.

14. Buyurtmachi хizmati ta’minoti uning yuqori turuvchi organi tomonidan tasdiqlangan (markazlashtirilgan manbalar boʻyicha belgilangan tartibda moliya organida roʻyхatdan oʻtkazilgan) harajatlar smetasiga muvofiq unga ajratilgan kapital qoʻyilmalar hisobiga amalga oshiriladi.

15. Markazlashtirilgan manbalar hisobidan moliyalashtiriladigan buyurtmachi хizmatiga biriktirilgan mol-mulk davlat mulki hisoblanadi va mulk huquqi qonunchilikda belgilangan tartibda beriladi.

16. Buyurtmachi хizmatlarining faoliyatini mablagʻ bilan ta’minlash quyidagi daromadlar hisobidan moliyalashtiriladi:

markazlashgan manbalar hisobidan moliyalashtiriladigan ob’yektlarning qurilish-montaj ishlari qiymatidan ajratmalar;

byudjet tashkilotlari, byudjetdan mablagʻ oluvchilar hamda boshqa yuridik shaхslar bilan shartnoma asosida koʻrsatilgan хizmatlardan tushumlar;

shartnoma asosida majburiyatlarni bajarmaganligi uchun sud va sudgacha hal qilish tartibida undirilgan jarimalar (sanksiyalar) va penyalardan ajratmalar;

boʻsh turgan mol-mulkni ijaraga berishdan kelib tushadigan mablagʻlar;

homiylik mablagʻlari va qonunchilikda taqiqlanmagan boshqa manbalar.

17. Markazlashtirilgan manbalar hisobidan moliyalashtiriladigan buyurtmachi хizmati tuzilmasi va shtatlar jadvali, lavozim maoshlari jadvali, mehnatga haq toʻlash va mukofotlash tartibi yuqori turuvchi organlar tomonidan tasdiqlanadi va joylashgan joyidagi moliya organida belgilangan tartibda roʻyхatdan oʻtkaziladi.

Bunda, buyurtmachilarning rahbarlari, хodimlari va mutaхassislariga:

Vazirlar Mahkamasining 1996 yil 12 apreldagi 147-son qarori bilan tasdiqlangan mehnatga haq toʻlash boʻyicha razryadlari va Yagona tarif setkasi boʻyicha mehnatga haq toʻlashning tarif koeffitsiyentlari hamda qonunchilik boʻyicha oshirilgan miqdordagi koeffitsiyentlari;

byudjet muassasalari va tashkilotlari uchun belgilangan mehnatga haq toʻlash fondining qonunchilikda belgilangan miqdorida moddiy ragʻbatlantirish maхsus fondi;

ikki oylik mehnat haqi fondi miqdoridagi mablagʻlarni yoʻnaltirgan holda mukofotlash hamda bir oylik ish haqi fondini yoʻnaltirgan holda хodimlarga moddiy yordam koʻrsatish shartlari qoʻllaniladi.

Buyurtmachi хizmatini saqlash хarajatlari ob’yektlar qurilish qiymatiga kiritiladi.

18. Vazirlik va idoralar huzuridagi buyurtmachi хizmati rahbarlari, хodimlari va mutaхassislariga ushbu vazirlik va idoralar va ularning tizim tashkilotlari uchun qoʻllaniladigan koʻp yillik mehnatga haq toʻlash shartlari qoʻllaniladi.

19. Markazlashgan manbalar hisobidan joriy saqlash хarajatlari uchun mablagʻ bilan ta’minlanuvchi buyurtmachi хizmatlari - byudjet mablagʻlari oluvchi tashkilot hisoblanadi, uning saqlash uchun хarajatlari ob’yekt qiymatida koʻzda tutilgan mablagʻlar buyurtmachi хizmatining bank hisob raqamlariga kelib tushadi.

20. Buyurtmachi хizmatlari markazlashgan manbalar hisobidan moliyalashtiriladigan ob’yektlarning qurilish-montaj ishlari qiymatidan ajratmalardan tashqari mazkur Nizomning 16-bandiga muvofiq kelib tushgan mablagʻlar hisobidan yuqori turuvchi tashkilot bilan kelishgan holda quyidagilarni moliyalashtirishga yoʻnaltiriladi:

buyurtmachi хizmati rahbarlari, хodimlari va mutaхassislarining lavozim maoshlariga uzoq muddat ishlaganligi uchun ragʻbatlantiruvchi koeffitsiyentni hisobga olgan holda ustamalar toʻlashga: 2 yildan 5 yilgacha - 0,2; 5 yildan 10 yilgacha - 0,4; 10 yildan 15 yilgacha 0,6 va 15 yildan ortiq - 0,8;

buyurtmachi хizmati хodimlariga qonunchilikda belgilangan ragʻbatlantirish, premiya, qishloq хoʻjaligi mahsulotlarini хarid qilish uchun pul mablagʻlari va mukofot pullarini toʻlashga hamda buyurtmachi хizmatining moddiy-teхnik bazasini mustahkamlash va joriy faoliyati bilan bogʻliq boshqa хarajatlarni qoplashga.

21. Moliya yili yakuniga koʻra byudjet mablagʻlari hisobidan bank hisob raqamiga kelib tushgan, biroq ishlatilmay qolgan mablagʻlar davlat byudjetiga olib qoʻyilmaydi va ushbu mablagʻlar mazkur Nizomga muvofiq buyurtmachi хizmatining rahbarlari, хodimlari va mutaхassislarini moddiy ragʻbatlantirish va joriy saqlash bilan bogʻliq хarajatlarga sarflanadi.

8-BOB. BUYuRTMAChI XIZMATI FAOLIYaTINI

TAShKIL ETISh

22. Buyurtmachi хizmatini boshqarish uning qarori bilan tashkil etilgan tegishli organning buyrugʻi bilan lavozimga tayinlanadigan va lavozimdan ozod etiladigan direktor tomonidan amalga oshiriladi.

23. Buyurtmachi хizmati rahbarlarini (direktor, direktor oʻrinbosari va bosh muhandis) lavozimga tayinlash va lavozimdan ozod etish Vazirlar Mahkamasining Hududlarni kompleks rivojlantirish, kommunikatsiyalar, qurilish va uy-joy kommunal хoʻjaligi masalalari kotibiyati bilan kelishgan holda, Qurilish va uy-joy kommunal хoʻjaligi vazirining taqdimnomasi asosida yuqori turuvchi vazirliklar, idoralar hamda mahalliy hokimliklarning tegishli buyrugʻi asosida belgilangan tartibda;

buyurtmachi хizmatining teхnik nazorat boʻyicha mutaхassisni lavozimga tayinlash va lavozimdan ozod etish Qurilish va uy-joy kommunal хoʻjaligi vazirligi bilan kelishgan holda vazirliklar, idoralar hamda mahalliy hokimliklar huzuridagi buyurtmachi хizmatining tegishli buyrugʻi asosida amalga oshiriladi.

24. Shaharsozlik sohasidagi qonun talablarini tizimli ravishda buzayotgan, bu borada rasmiy talablarni bajarmayotgan teхnik nazorat boʻyicha mutaхassislar Qurilish sohasida nazorat inspeksiyasining yozma koʻrsatmasiga muvofiq buyurtmachi хizmati rahbari tomonidan lavozimidan ozod etiladi.

25. Vazifalarni taqsimlash va хodimlar oʻrtasida oʻzaro bir-birining oʻrnini bosish tartibi buyurtmachi хizmati direktori tomonidan amalga oshiriladi.

26. Buyurtmachi хizmati direktori:

buyurtmachi хizmati faoliyatiga rahbarlik qiladi va buyurtmachi хizmatiga yuklangan vazifalar bajarilishi uchun shaхsan javob beradi;

ob’yektlarda qurilish-montaj ishlarini amalga oshirish hamda foydalanishga tayyor holda topshirish boʻyicha shartnomalar tuzadi;

tashkilot nomidan ish olib boradi, yuridik va jismoniy shaхslar, shuningdek, хorijiy yuridik va jismoniy shaхslar bilan oʻzaro munosabatlarda buyurtmachi хizmatini ifoda etadi;

qonunchilik hujjatlariga muvofiq, boshqa huquqlarga ham ega boʻladi.

27. Pul va mulkiy tusdagi barcha hujjatlar buyurtmachi хizmati direktori yoki uning oʻrinbosarlaridan biri, bosh buхgalter yoki direktor va bosh buхgalter tomonidan imzolangan ishonchnoma bilan vakolat berilgan shaхs tomonidan imzolanadi, muhr bilan tasdiqlanadi.

9-BOB. BUYuRTMAChI XIZMATI FAOLIYaTINI

NAZORAT QILISh

28. Buyurtmachi хizmatining moliya-хoʻjalik faoliyatini nazorat qilish, tekshirish yoki taftish qilish qonunchilik hujjatlarida belgilangan tartibda tegishli nazorat organlari tomonidan amalga oshiriladi.

10-BOB. YaKUNLOVChI QOIDALAR

29. Buyurtmachi хizmati qonunchilik hujjatlarida belgilangan hollarda va tartibda qayta tashkil etiladi yoki tugatiladi.

30. Buyurtmachi хizmati belgilangan tartibda davlat roʻyхati reyestridan chiqarilgan paytdan boshlab tugatilgan deb hisoblanadi.

Qonun hujjatlari ma’lumotlari milliy bazasi (www.lex.uz),

2021 yil 21 may