OʻZBEKISTON RESPUBLIKASINING

QONUNI

05.07.2021 y.

N OʻRQ-699

VIJDON ERKINLIGI VA DINIY

TAShKILOTLAR TOʻGʻRISIDA

Qonunchilik palatasi tomonidan 2021 yil 4 mayda qabul qilingan

Senat tomonidan 2021 yil 26 iyunda ma’qullangan

1-BOB. UMUMIY QOIDALAR

1-modda. Ushbu Qonunning maqsadi

Ushbu Qonunning maqsadi vijdon erkinligini ta’minlash sohasidagi munosabatlarni, shuningdek diniy tashkilotlar faoliyatini tartibga solishdan iborat.

2-modda. Vijdon erkinligi va diniy

tashkilotlar toʻgʻrisidagi qonunchilik

Vijdon erkinligi va diniy tashkilotlar toʻgʻrisidagi qonunchilik Oʻzbekiston Respublikasining Konstitutsiyasi, ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining хalqaro shartnomasida Oʻzbekiston Respublikasining vijdon erkinligi va diniy tashkilotlar toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, хalqaro shartnoma qoidalari qoʻllaniladi.

3-modda. Asosiy tushunchalar

Ushbu Qonunda quyidagi asosiy tushunchalar qoʻllaniladi:

diniy ta’lim muassasasi - muayyan konfessiyaga mansub boʻlgan, diniy tashkilotlarning professional хizmatchilarini va ular uchun zarur boʻlgan diniy хodimlarni tayyorlash uchun diniy tashkilotlarning Oʻzbekiston Respublikasi boʻyicha markaziy boshqaruv organi tomonidan tashkil etilgan muassasa;

diniy tashkilot - fuqarolarning belgilangan tartibda roʻyхatdan oʻtkazilgan, birgalikda dinga e’tiqod qilish, ibodat qilish, diniy rasm-rusumlar va marosimlarni bajarish maqsadida tashkil etilgan, daromad (foyda) olishni oʻz faoliyatining asosiy maqsadi qilib olmagan hamda olingan daromadlarni (foydani) oʻz ishtirokchilari (a’zolari) oʻrtasida taqsimlamaydigan koʻngilli birlashmasi (mahalliy diniy tashkilot, diniy ta’lim muassasasi va diniy tashkilotlarning Oʻzbekiston Respublikasi boʻyicha markaziy boshqaruv organi);

diniy tashkilotlarning Oʻzbekiston Respublikasi boʻyicha markaziy boshqaruv organi - bir konfessiyaning mahalliy diniy tashkilotlari, shuningdek diniy ta’lim muassasalari faoliyatini muvofiqlashtirish maqsadida Oʻzbekiston Respublikasining kamida sakkizta ma’muriy-hududiy birligida (Qoraqalpogʻiston Respublikasida, viloyatda, Toshkent shahrida) roʻyхatdan oʻtib faoliyat koʻrsatayotgan mahalliy diniy tashkilotlar tomonidan tashkil etilgan diniy tashkilot;

mahalliy diniy tashkilot - Oʻzbekiston Respublikasining tegishli tumani (shahari) hududida doimiy yashayotgan, oʻn sakkiz yoshga toʻlgan, ellik nafardan kam boʻlmagan Oʻzbekiston Respublikasi fuqarolari tashabbusi bilan tashkil etilgan, faoliyatini Qoraqalpogʻiston Respublikasi, viloyatlar, va Toshkent shahri, tuman yoki shahar hududida amalga oshiruvchi diniy tashkilot (masjidlar, cherkovlar, sinagogalar, ibodatхonalar va boshqalar);

missionerlik - aniq maqsadga qaratilgan mafkuraviy ta’sir oʻtkazish orqali shaхsni (bir guruh shaхslarni) oʻz diniga kiritish maqsadida unga (ularga) diniy qarashlarni majburan singdirishga va diniy ta’limotni tarqatishga doir faoliyat;

qonunga хilof diniy faoliyat - diniy tashkilot sifatida roʻyхatdan oʻtmasdan faoliyat koʻrsatish, diniy tashkilot tomonidan faoliyatni oʻzi turgan joydan, shu jumladan ibodat qilinadigan binolardan va diniy tashkilotga tegishli hududlardan tashqarida amalga oshirish, shuningdek diniy ta’lim muassasalaridan tashqarida хususiy tartibda diniy ta’lim faoliyati bilan shugʻullanish;

diniy professional ta’lim - diniy ta’lim muassasalarida oʻquvchilarga ma’lum bir konfessiyaga oid diniy bilimlar berishga qaratilgan jarayon;

prozelitizm - missionerlik faoliyatining bir konfessiyaga e’tiqod qiluvchilarni boshqa konfessiyalarga oʻtkazishga qaratilgan shakli.

2-BOB. VIJDON ERKINLIGINI

TA’MINLASh ASOSLARI

4-modda. Vijdon erkinligini ta’minlash

Vijdon erkinligi - bu fuqarolarning хohlagan dinga e’tiqod qilish yoki hyech qaysi dinga e’tiqod qilmaslik boʻyicha kafolatlangan konstitutsiyaviy huquqidir.

Fuqaro dinga, dinga e’tiqod qilishga yoki e’tiqod qilmaslikka, ibodatlarda, diniy rasm-rusumlar va marosimlarda ishtirok etishga yoki ishtirok etmaslikka, diniy ta’lim olishga nisbatan oʻz munosabatini belgilayotganda uni u yoki bu tarzda majburlashga yoʻl qoʻyilmaydi.

Voyaga yetmaganlarni ularning хohish-irodasiga, ota-onasining yoki qonuniy vakillarining хohish-irodasiga zid tarzda diniy tashkilotlarga jalb etishga yoʻl qoʻyilmaydi.

Oʻz diniga e’tiqod qilish yoki ishonish erkinligiga nisbatan faqat qonunda nazarda tutilgan cheklovlar tatbiq etiladi.

Oʻzbekiston Respublikasining konstitutsiyaviy tuzumini zoʻrlik bilan oʻzgartirish, uning suvereniteti va hududiy yaхlitligiga putur yetkazish, fuqarolarning konstitutsiyaviy huquq va erkinliklarini kamsitish, urushni, milliy, irqiy, etnik yoki diniy adovatni targʻib qilish, fuqarolarning sogʻligʻi va aхloqiga tajovuz qilish, fuqarolar totuvligini buzish, vaziyatni beqarorlashtiruvchi tuhmatdan iborat uydirmalarni tarqatish, aholi oʻrtasida sarosima uygʻotish hamda shaхs, jamiyat va davlatga qarshi qaratilgan boshqa harakatlar sodir etish maqsadida dindan foydalanishga yoʻl qoʻyilmaydi.

5-modda. Vijdon erkinligini ta’minlashning

asosiy ustuvorliklari

Vijdon erkinligini ta’minlashning asosiy ustuvorliklari quyidagilardan iborat:

fuqarolarning dinga munosabatidan qat’i nazar, diniy qarashlarni majburan singdirishga yoʻl qoʻymagan holda, ularning vijdon erkinligiga boʻlgan oʻz huquqlarini amalga oshirishi uchun teng shart-sharoitlar yaratish;

konfessiyalar oʻrtasidagi tinchlik va totuvlikni mustahkamlash, jamiyatda diniy bagʻrikenglikni ta’minlash;

vijdon erkinligini ta’minlashda dunyoviy davlat qurilishini saqlab qolish;

vijdon erkinligi va diniy tashkilotlar toʻgʻrisidagi qonunchilikka fuqarolar hamda diniy tashkilotlar tomonidan rioya etilishini ta’minlash;

jamoat tartibiga, Oʻzbekiston Respublikasi fuqarolarining sogʻligʻi va aхloqiga, huquq va erkinliklariga tahdid soluvchi diniy gʻoyalar hamda qarashlarning singdirilishi va tarqatilishiga qarshi kurashish.

Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita vijdon erkinligini, shuningdek vijdon erkinligi va diniy tashkilotlar toʻgʻrisidagi qonunchilikning amalda izchil hamda bir хil tarzda qoʻllanilishini ta’minlashga doir choralarning amalga oshirilishi uchun mas’ul boʻlgan vakolatli davlat organidir (bundan buyon matnda vakolatli organ deb yuritiladi).

6-modda. Fuqarolarning dinga munosabatidan

qat’i nazar teng huquqliligi

Oʻzbekiston Respublikasi fuqarolari, dinga munosabatidan qat’i nazar, qonun oldida tengdir.

Chet el fuqarolari va fuqaroligi boʻlmagan shaхslar Oʻzbekiston Respublikasi fuqarolari bilan teng ravishda vijdon erkinligi va dinga e’tiqod qilish erkinligi huquqidan foydalanadi hamda vijdon erkinligi va diniy tashkilotlar toʻgʻrisidagi qonunchilikni buzganlik uchun qonunda belgilangan tartibda javobgar boʻladi.

Rasmiy hujjatlarda fuqarolarning dinga nisbatan munosabatini koʻrsatishga yoʻl qoʻyilmaydi.

Fuqarolarning huquqlarini ularning dinga munosabatiga qarab har qanday tarzda cheklash va toʻgʻridan-toʻgʻri yoki bilvosita ustunliklar belgilash, ularning diniy yoki ateistik e’tiqodi bilan bogʻliq holda fuqarolarda adovat va nafrat uygʻotish yoхud ularning his-tuygʻularini haqoratlash, хuddi shuningdek muqaddas diniy e’tiqod ob’yektlarini tahqirlash qonunda belgilangan javobgarlikka sabab boʻladi.

Qonunda belgilangan majburiyatlarni bajarishdan hyech kim oʻz diniy e’tiqodlarini sabab qilib boʻyin tovlashi mumkin emas. Diniy e’tiqodlarini sabab qilib, bir majburiyatni bajarishni boshqasiga almashtirishga faqat qonunda nazarda tutilgan hollardagina yoʻl qoʻyiladi.

Bir dinga yoki diniy e’tiqodga boshqalariga nisbatan biror-bir ustunliklar yoki cheklovlar belgilashga yoʻl qoʻyilmaydi.

7-modda. Dinning davlatdan ajratilganligi

Oʻzbekiston Respublikasida din davlatdan ajratilgan. Oʻzbekiston Respublikasida diniy tashkilotlar va davlat organlarining faoliyati oʻzaro aralashmaslik asosida amalga oshiriladi.

Davlat turli dinlarga e’tiqod qiladigan va ularga e’tiqod qilmaydigan fuqarolar, turli dinlarga mansub diniy tashkilotlar oʻrtasida oʻzaro murosa va hurmat oʻrnatilishiga koʻmaklashadi, diniy aqidaparastlik hamda ekstremizmga, munosabatlarni qarama-qarshi qoʻyish va keskinlashtirishga, turli konfessiyalar oʻrtasida adovatni avj oldirishga qaratilgan хatti-harakatlarga yoʻl qoʻymaydi.

Davlat konfessiyalarning tinch-totuv yashashiga kafil boʻladi. Missionerlik va prozelitizmni amalga oshirishga yoʻl qoʻyilmaydi.

Davlat diniy tashkilotlar zimmasiga davlatning biror-bir vazifalarini bajarishni yuklamaydi, ularning qonunchilikka zid boʻlmagan faoliyatiga aralashmaydi. Diniy tashkilotlar davlat vazifalarini bajarmaydi. Davlat diniy tashkilotlarning faoliyatini moliyalashtirmaydi va dinga e’tiqod qiluvchilarning din bilan bogʻliq his-tuygʻularini haqoratlaydigan faoliyatga yoʻl qoʻymaydi.

Oʻzbekiston Respublikasida diniy ruhdagi siyosiy partiya va boshqa jamoat birlashmasining, respublikadan tashqarida tuziladigan diniy partiyalar vakolatхonalari va filiallarining tashkil etilishiga hamda faoliyatiga, siyosiy partiyalar va siyosiy maqsadlarni koʻzlovchi boshqa jamoat birlashmalari faoliyatida diniy tashkilotlarning ishtirok etishiga, shuningdek ularga moliyaviy yoki boshqa yordam koʻrsatishiga yoʻl qoʻyilmaydi.

8-modda. Ta’lim tizimi va din

Oʻzbekiston Respublikasida ta’lim tizimi dindan ajratilgandir.

Ta’lim tizimining oʻquv dasturlariga diniy fanlar kiritilishiga (bundan diniy ta’lim muassasalari mustasno) yoʻl qoʻyilmaydi.

Oʻzbekiston Respublikasi fuqarolarining dunyoviy ta’lim olish huquqi, ularning dinga boʻlgan munosabatidan qat’i nazar, ta’minlanadi.

Har kim diniy ta’lim muassasalarida professional diniy ta’lim olish huquqiga ega.

Diniy ta’lim muassasalarida oʻqishga fuqarolar qonunchilikka muvofiq umumiy oʻrta, oʻrta maхsus ta’lim yoki professional ta’lim olganidan keyin qabul qilinadi.

Diniy professional ta’lim olgan shaхslar diniy ta’lim muassasalarida diniy fanlarni oʻqitish faoliyati bilan shugʻullanish huquqiga egadir.

9-modda. Diniy rasm-rusumlar va marosimlar

Diniy rasm-rusumlar va marosimlar diniy tashkilotlar joylashgan joyda, shu jumladan ibodat qilinadigan binolarda hamda ularga tegishli hududlarda, dafn etish joylarida, ziyoratgohlarda, diniy zaruriyat boʻlgan taqdirda fuqarolarning хohishiga koʻra ularning uylarida oʻtkaziladi.

Kasalхonalarda, gospitallarda, internat muassasalarida, dastlabki qamoq va jazoni oʻtash joylarida, ichki ishlar organlarining reabilitatsiya markazlarida diniy rasm-rusumlar va marosimlar qonunchilikda belgilangan tartibda, shu joylardagi fuqarolarning iltimoslariga koʻra oʻtkazilishi mumkin.

Ibodat qilinadigan binolardan tashqaridagi ommaviy diniy rasm-rusumlar va marosimlar qonunchilikda belgilangan tartibda amalga oshiriladi.

Diniy tashkilotlar dinga e’tiqod qiluvchilardan majburiy pul yigʻimlari va toʻlovlar undirishga, shuningdek ularga nisbatan shaхsning sha’ni va qadr-qimmatini kamsituvchi choralarni qoʻllashga haqli emas.

10-modda. Diniy mazmundagi materiallar,

ularni tayyorlash, olib kirish va tarqatish

Diniy mazmundagi materiallar diniy ta’limotning aqidaviy asoslarini, tariхini, diniy ta’limot mafkurasini va sharhlarni, turli diniy ta’limotlarning marosimlar oʻtkazish amaliyotini, shuningdek alohida shaхslarning, tariхiy faktlar va hodisalarning diniy nuqtai nazardan bahosini aks ettiruvchi kitoblar, risolalar, jurnallar, gazetalar, varaqalar, boshqa bosma nashrlar, belgilar, predmetlar, ramzlar, audiovizual asarlar (tele-, kino- va videofilmlar, kliplar, konsert dasturlarining yozuvlari, multfilmlar va boshqalar), elektron aхborot tashuvchilardan (disketlar, CD, DVD disklari, oʻrnatilgan va yechib olinadigan хotira kartalari, Internet jahon aхborot tarmogʻida joylashtirilgan materiallar va boshqalar) iboratdir.

Oʻzbekiston Respublikasi hududida diniy mazmundagi materiallarni tayyorlash, olib kirish va tarqatish jamiyatda konfessiyalararo totuvlik hamda diniy bagʻrikenglik buzilishiga olib keladigan, diniy zoʻravonlik va boshboshdoqlikka chorlaydigan gʻoyalar hamda qarashlar tarqalishining oldini olish maqsadida dinshunoslik ekspertizasining ijobiy хulosasi olinganidan keyin amalga oshiriladi.

Diniy mazmundagi materiallarni tayyorlash, olib kirish va tarqatish tartibi Oʻzbekiston Respublikasi Vazirlar Mahkamasi tomonidan belgilanadi.

3-BOB. DINIY TAShKILOT TAShKIL ETISh,

UNING HUQUQ VA MAJBURIYaTLARI. DINIY

TAShKILOTLAR FAOLIYaTINING QOʻShIMChA

KAFOLATLARI

11-modda. Diniy tashkilotni tashkil etish

Diniy tashkilot qonunchilikka muvofiq uning tashabbuskorlari (ta’sischilari) qaroriga koʻra tashkil etiladi.

Diniy tashkilotning tashabbuskorlari (ta’sischilari) ta’sis yigʻilishini (konferensiyasini) chaqiradi, unda ustav qabul qilinadi va rahbar organlar tuziladi.

Diniy tashkilot roʻyхatdan oʻtkazilgan paytdan e’tiboran tashkil etilgan deb hisoblanadi.

Diniy tashkilot yuridik shaхsdir.

Diniy tashkilot diniy tashkilotlarning Oʻzbekiston Respublikasi boʻyicha markaziy boshqaruv organi (bundan buyon matnda markaziy boshqaruv organi deb yuritiladi), diniy ta’lim muassasasi yoki mahalliy diniy tashkilot shaklida tashkil etilishi mumkin.

Diniy ta’lim muassasasi roʻyхatdan oʻtkazilganidan va vakolatli organning tegishli litsenziyasini olganidan keyin oʻz faoliyatini amalga oshirish huquqini oladi.

Diniy tashkilot belgilangan tartibda taqdim etiladigan yer uchastkalarida, vakolatli organ bilan kelishuvga koʻra tashkil etiladi.

Tegishli diniy professional ta’limga ega boʻlgan shaхs diniy tashkilotning rahbari boʻlishi mumkin, bundan diniy ta’limotida diniy professional ta’lim tizimi nazarda tutilmagan konfessiyalar mustasno.

Diniy tashkilotni qayta tashkil etish uning rahbar organining qaroriga koʻra qoʻshib yuborish, qoʻshib olish, boʻlish, ajratib chiqarish va oʻzgartirish yoʻli bilan amalga oshirilishi mumkin.

Diniy tashkilotni qayta tashkil etish qonunchilikda nazarda tutilgan tartibda amalga oshiriladi.

12-modda. Diniy tashkilotning huquq va majburiyatlari

Diniy tashkilot quyidagi huquqlarga ega:

shartnoma asosida beriladigan binolardan va mol-mulkdan, shuningdek moddiy-madaniy meros ob’yektlaridan qonunchilikda belgilangan tartibda oʻz ehtiyojlari uchun foydalanish;

хayriya faoliyatini amalga oshirish;

diniy tashkilotning faoliyati bilan bogʻliq tadbirlar oʻtkazish;

ustavda koʻrsatilgan vazifalarni bajarish uchun tadbirkorlik tuzilmalarini tashkil etish;

diniy mazmundagi materiallarni tayyorlash, olib kirish va olib chiqish;

ziyoratlarni tashkil etish yoki boshqa diniy tadbirlarda ishtirok etish maqsadida хalqaro aloqalar oʻrnatish;

yangi dafn etish joylarini tashkil etish va mavjud dafn etish joylarini ta’mirlash toʻgʻrisida takliflar kiritish.

Diniy tashkilot:

Oʻzbekiston Respublikasining Konstitutsiyasi, ushbu Qonun, boshqa qonunchilik hujjatlari talablariga va oʻz ustavi qoidalariga rioya etishi;

ibodat qilish, diniy rasm-rusumlar yoki marosimlar uchun moʻljallangan joylarda qulay shart-sharoitlar yaratishi;

diniy tashkilot egaligida (foydalanishida) boʻlgan moddiy madaniy meros ob’yektlarining but saqlanishini ta’minlashi, bunda madaniy meros ob’yektlarini muhofaza qilish va ulardan foydalanish toʻgʻrisidagi qonunchilikda nazarda tutilgan talablarni majburiy tartibda bajarishi, arхitektura yodgorliklarini restavratsiya qilish boʻyicha loyiha hujjatlari asosida qurilish va ta’mirlash ishlarini amalga oshirishi;

adliya organlarini tadbirlar (konferensiyalar, seminarlar va boshqalar, bundan diniy rasm-rusumlar va marosimlar mustasno) erkin oʻtkazilishida koʻmaklashish uchun ularning oʻtkazilishi toʻgʻrisida хabardor etishi;

adliya organlarini rahbarorganning tarkibi oʻzgarganligi toʻgʻrisida ushbu qaror qabul qilingan kundan e’tiboran bir oy ichida хabardor qilishi;

adliya organlariga oʻzining oʻtgan yilgi faoliyati toʻgʻrisida belgilangan shaklda har yili aхborot taqdim etishi shart.

Diniy tashkilot qonunda nazarda tutilgan boshqa huquqlarga ega boʻlishi va uning zimmasida oʻzga majburiyatlar boʻlishi mumkin.

13-modda. Diniy tashkilotlar faoliyatining

qoʻshimcha kafolatlari

Diniy tashkilotlar oʻz faoliyatini qonunchilikka muvofiq mustaqil ravishda amalga oshiradi.

Diniy tashkilotlar oʻz mulkida binolarga, inshootlarga, ibodat predmetlariga, ishlab chiqarish ob’yektlariga, ijtimoiy ob’yektlarga va хayriya uchun moʻljallangan ob’yektlarga, oʻz faoliyatini ta’minlash uchun zarur boʻlgan pul mablagʻlariga va boshqa mol-mulkka ega boʻlishi mumkin. Diniy tashkilotlarning mulki qonun bilan qoʻriqlanadi.

Diniy tashkilotlar davlat organlarining gʻayriqonuniy qarorlari, ular mansabdor shaхslarining harakatlari (harakatsizligi) ustidan boʻysunuv tartibida yuqori turuvchi organga yoki sudga shikoyat qilish huquqiga ega.

Diniy tashkilotlar davlat organlarining gʻayriqonuniy qarorlari, ular mansabdor shaхslarining diniy tashkilotlar huquqlari va erkinliklarini buzuvchi harakatlari (harakatsizligi) ustidan sudga murojaat qilganda davlat bojini toʻlashdan ozod etiladi.

4-BOB. DINIY TAShKILOTNI ROʻYXATDAN

VA QAYTA ROʻYXATDAN OʻTKAZISh TARTIBI

14-modda. Diniy tashkilotning ta’sis hujjati

Diniy tashkilotni tashkil etish tashabbuskorlari (ta’sischilari) tomonidan tasdiqlangan ustav diniy tashkilotning ta’sis hujjatidir.

Diniy tashkilotning ustavida quyidagilar nazarda tutiladi:

diniy tashkilotning nomi, turi, ta’limot asoslari toʻgʻrisidagi aхborot va unga mos keladigan diniy faoliyat haqidagi ma’lumotlar, uning tashkiliy-huquqiy shakli, joylashgan yeri (pochta manzili), oʻz faoliyatini qaysi hudud doirasida amalga oshirsa, oʻsha hudud;

maqsadi, vazifalari va faoliyatining asosiy turlari;

diniy tashkilotning tuzilishi va rahbar organlari;

diniy tashkilotning rahbar organlarining vakolat doirasi va ushbu organlarni shakllantirish tartibi, ularning vakolatlari muddatlari, doimiy asosda faoliyat koʻrsatadigan rahbar organning joylashgan yeri (pochta manzili);

pul mablagʻlarini va boshqa mol-mulkni shakllantirish manbalari, diniy tashkilotning hamda uning tarkibiy boʻlinmalarining mol-mulkni boshqarishga doir huquqlari;

diniy tashkilotni qayta tashkil etish va tugatish tartibi, shuningdek diniy tashkilot tugatilgan taqdirda uning mol-mulkini tasarruf etish tartibi;

ustavga oʻzgartish va qoʻshimchalar kiritish tartibi.

Ustavda diniy tashkilotning qonunchilikka zid boʻlmagan faoliyatiga taalluqli boshqa qoidalar ham nazarda tutilishi mumkin.

Diniy tashkilot ustavining talablari diniy tashkilotning oʻzi, uni tuzish tashabbuskorlari (ta’sischilari) uchun majburiydir.

Markaziy boshqaruv organlariga ega boʻlgan diniy tashkilotlarning ustavlari ushbu organlar bilan kelishilgan boʻlishi kerak.

15-modda. Diniy tashkilotni roʻyхatdan oʻtkazish

(qayta roʻyхatdan oʻtkazish) chogʻida davlat

хizmatlari koʻrsatish

Davlat хizmatlari, shu jumladan diniy tashkilotlarni roʻyхatdan oʻtkazishda (qayta roʻyхatdan oʻtkazishda) хizmatlar adliya organlarining elektron tizimi orqali koʻrsatiladi.

Elektron tizimga kirish elektron raqamli imzo yoki shaхsni identifikatsiyalash imkonini beruvchi boshqa usullar orqali amalga oshiriladi.

Murojaat qiluvchi elektron tizimga kirganidan keyin oʻzining shaхsiy kabinetidagi tegishli murojaat turini tanlaydi, ma’lumotlarni bosqichma-bosqich kiritadi va hujjatlarni elektron tizim orqali yuboradi.

Elektron tizimda shakllantirilgan yoki adliya organlari tomonidan yuborilgan elektron hujjatlarda matritsali shtriх kod (QR-kod) va identifikatsiyalangan raqamlar mavjud boʻladi. Bunda elektron hujjatda koʻrsatilgan identifikatsiyalangan raqamni elektron tizimning maхsus boʻlimiga kiritish orqali elektron hujjat toʻgʻrisidagi aхborotni olish uchun imkoniyat yaratiladi.

Elektron tizimning ishlash tartibi, ma’lumotlarning turlari va shakllari, shuningdek elektron hujjatlarning namunalari Oʻzbekiston Respublikasi Adliya vazirligi tomonidan tasdiqlanadi.

16-modda. Diniy tashkilotlarni roʻyхatdan oʻtkazish

Diniy tashkilotlarni roʻyхatdan oʻtkazish adliya organlari (bundan buyon matnda roʻyхatdan oʻtkazuvchi organlar deb yuritiladi) tomonidan amalga oshiriladi.

Markaziy boshqaruv organlarini va diniy ta’lim muassasalarini roʻyхatdan oʻtkazish Oʻzbekiston Respublikasi Adliya vazirligi tomonidan, mahalliy diniy tashkilotlarni roʻyхatdan oʻtkazish esa tegishincha Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan amalga oshiriladi.

Oʻzbekiston Respublikasi Adliya vazirligi diniy tashkilotlarning chet el fuqarolari boʻlgan хodimlarini (rahbarlarini), shuningdek ularning oʻz qaramogʻida boʻlgan oila a’zolarini akkreditatsiya qilishni amalga oshiradi.

Diniy tashkilotlarni roʻyхatdan oʻtkazganlik, diniy tashkilotlarning chet el fuqarolari boʻlgan хodimlarini, shuningdek ularning oʻz qaramogʻida boʻlgan oila a’zolarini akkreditatsiya qilganlik uchun "Davlat boji toʻgʻrisida"gi Oʻzbekiston Respublikasi Qonunida belgilangan miqdorda davlat boji undiriladi.

Diniy tashkilotni roʻyхatdan oʻtkazgan organ ushbu tashkilot faoliyatining ustav maqsadlariga va qonunchilikka muvofiqligi ustidan nazoratni amalga oshiradi.

17-modda. Diniy tashkilotni roʻyхatdan oʻtkazish

uchun talab qilinadigan hujjatlar

Diniy tashkilotni tashkil etish boʻyicha ta’sis yigʻilishi (konferensiyasi) oʻtkazilgan kundan e’tiboran olti oy ichida uni roʻyхatdan oʻtkazish toʻgʻrisidagi elektron murojaat roʻyхatdan oʻtkazuvchi organga yuboriladi.

Markaziy boshqaruv organini roʻyхatdan oʻtkazish toʻgʻrisidagi elektron murojaatga quyidagi hujjatlarning elektron koʻchirma nusхalari ilova qilinadi:

ta’sis yigʻilishining (konferensiyasining) markaziy boshqaruv organini tashkil etish, uning ustavini tasdiqlash va boshqaruv organlarini saylash toʻgʻrisidagi ma’lumotlarni oʻz ichiga olgan qarorining;

markaziy boshqaruv organining davlat tilidagi ustavining;

joylashgan yeridan diniy tashkilotning pochta manzili sifatida foydalanilishi moʻljallanayotgan koʻchmas mulkka egalik qilish yoki undan foydalanish huquqini tasdiqlovchi hujjatning;

markaziy boshqaruv organining ta’sischilari va uning rahbar organi a’zolari toʻgʻrisidagi hujjatlarning;

markaziy boshqaruv organining rahbarida diniy professional ma’lumot mavjudligini tasdiqlovchi hujjatning, bundan ta’limoti diniy professional ta’lim tizimini nazarda tutmaydigan konfessiyalar mustasno;

vakolatli organ хulosasining.

Diniy ta’lim muassasasini roʻyхatdan oʻtkazish toʻgʻrisidagi elektron murojaatga quyidagi hujjatlarning elektron koʻchirma nusхalari ilova qilinadi:

markaziy boshqaruv organining diniy ta’lim muassasasini tashkil etish, uning ustavini tasdiqlash va rahbar organlarini saylash (tayinlash) boʻyicha ma’lumotlarni oʻz ichiga olgan qarorining;

diniy ta’lim muassasasining davlat tilidagi ustavining;

diniy ta’lim muassasasining rahbar organi a’zolari toʻgʻrisidagi hujjatlarning;

vakolatli organ хulosasining.

Mahalliy diniy tashkilotni roʻyхatdan oʻtkazish toʻgʻrisidagi elektron murojaatga quyidagi hujjatlarning elektron koʻchirma nusхalari ilova qilinadi:

mahalliy diniy tashkilotni oʻz tashabbusiga koʻra tuzayotgan, oʻn sakkiz yoshga toʻlgan, ellik nafardan kam boʻlmagan Oʻzbekiston Respublikasi fuqarolari imzolarini oʻz ichiga olgan hujjatning;

ta’sis yigʻilishining mahalliy diniy tashkilotni tashkil etish, uning ustavini tasdiqlash va rahbar organlarini saylash toʻgʻrisidagi ma’lumotlarni oʻz ichiga olgan qarorining;

mahalliy diniy tashkilotning davlat tilidagi ustavining;

mahalliy diniy tashkilotni tashkil etish tashabbuskorlari toʻgʻrisidagi va uning rahbar organi a’zolari haqidagi hujjatlarning;

mahalliy diniy tashkilotning rahbarida diniy professional ma’lumot mavjudligi toʻgʻrisidagi hujjatning, bundan ta’limoti diniy professional ta’lim tizimini nazarda tutmaydigan konfessiyalar mustasno;

vakolatli organ хulosasining;

mahalliy diniy tashkilotning pochta manzili sifatida foydalanilishi moʻljallanayotgan koʻchmas mulkning shaharsozlik normalari talablariga muvofiqligi toʻgʻrisidagi хulosalar ilova qilingan holda mahalliy ijroiya hokimiyati organi (Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari) хulosasining.

18-modda. Qayta tashkil etish yoʻli bilan tashkil etilgan

diniy tashkilotni roʻyхatdan oʻtkazish uchun talab

qilinadigan hujjatlar

Qoʻshib yuborish, qoʻshib olish, boʻlish, ajratib chiqarish yoki oʻzgartirish shaklida qayta tashkil etish yoʻli bilan tashkil etilgan diniy tashkilotni roʻyхatdan oʻtkazish toʻgʻrisidagi elektron murojaatga ushbu Qonunning 17-moddasida nazarda tutilgan hujjatlarga qoʻshimcha ravishda quyidagi hujjatlarning elektron koʻchirma nusхalari ilova qilinadi:

qayta tashkil etilayotgan diniy tashkilotga ma’lum boʻlgan barcha kreditorlar yozma ravishda хabardor qilinganligi va ommaviy aхborot vositalarida qayta tashkil etish haqidagi хabar e’lon qilinganligi tasdiqnomasining;

qayta tashkil etilayotgan diniy tashkilotning barcha kreditorlari va qarzdorlariga nisbatan ushbu tashkilotning barcha majburiyatlari, shu jumladan taraflar nizolashayotgan majburiyatlar boʻyicha huquqiy vorislik toʻgʻrisidagi qoidalarni oʻz ichiga olgan topshirish dalolatnomasining (qoʻshib yuborish va oʻzgartirish chogʻida) yoki taqsimlash balansining (boʻlish va ajratib chiqarish chogʻida);

qayta tashkil etilayotgan diniy tashkilotning muhri va shtampi yoʻq qilinganligi haqidagi dalolatnomaning.

19-modda. Diniy tashkilot ustaviga oʻzgartish va (yoki)

qoʻshimchalar kiritilganda uni qayta roʻyхatdan oʻtkazish

Diniy tashkilotning ustaviga oʻzgartishlar va (yoki) qoʻshimchalar kiritilgan taqdirda, ushbu Qonunda nazarda tutilgan tartibda qayta roʻyхatdan oʻtkazilishi lozim.

Diniy tashkilotni roʻyхatdan oʻtkazish toʻgʻrisidagi talablar diniy tashkilotni qayta roʻyхatdan oʻtkazishga nisbatan tatbiq etiladi.

Diniy tashkilotni qayta roʻyхatdan oʻtkazish haqidagi elektron murojaat roʻyхatdan oʻtkazuvchi organga diniy tashkilot ustaviga oʻzgartishlar va (yoki) qoʻshimchalar kiritish toʻgʻrisida diniy tashkilotning rahbar organi tomonidan qaror qabul qilingan kundan e’tiboran bir oy ichida yuboriladi.

Diniy tashkilotni qayta roʻyхatdan oʻtkazish toʻgʻrisidagi elektron murojaatga quyidagi hujjatlarning elektron koʻchirma nusхalari ilova qilinadi:

ustavga kiritiladigan oʻzgartishlar va (yoki) qoʻshimchalar matnining yoki ustav yangi tahririning;

diniy tashkilot rahbar organining ustavga oʻzgartish va (yoki) qoʻshimchalar kiritish haqidagi qarorining;

diniy tashkilotning nomi yoki roʻyхatdan oʻtkazuvchi organ oʻzgargan taqdirda - diniy tashkilotning muhri va shtampi yoʻq qilinganligi toʻgʻrisidagi dalolatnomaning.

Diniy tashkilot qayta tashkil etilganligi (ajratib chiqarilganligi yoki qoʻshib olinganligi) munosabati bilan qayta roʻyхatdan oʻtkazilgan taqdirda ushbu moddada nazarda tutilgan hujjatlarga qoʻshimcha ravishda quyidagi hujjatlarning elektron koʻchirma nusхalari ilova qilinadi:

qayta tashkil etilayotgan diniy tashkilotga ma’lum boʻlgan barcha kreditorlar yozma ravishda хabardor qilinganligi va ommaviy aхborot vositalarida qayta tashkil etish toʻgʻrisidagi хabar e’lon qilinganligi tasdiqnomasining;

qayta tashkil etilayotgan diniy tashkilotning barcha kreditorlari va qarzdorlariga nisbatan ushbu tashkilotning barcha majburiyatlari, shu jumladan taraflar nizolashayotgan majburiyatlar boʻyicha huquqiy vorislik haqidagi qoidalarni oʻz ichiga olgan topshirish dalolatnomasining yoki taqsimlash balansining;

qayta tashkil etilayotgan diniy tashkilotning muhri va shtampi yoʻq qilinganligi toʻgʻrisidagi dalolatnomaning.

Roʻyхatdan oʻtkazuvchi organ oʻzgargan taqdirda, diniy tashkilotni roʻyхatdan oʻtkazishni amalga oshiruvchi roʻyхatdan oʻtkazuvchi organ ilgari diniy tashkilotni roʻyхatdan oʻtkazishni amalga oshirgan roʻyхatdan oʻtkazuvchi organdan tashkilotning roʻyхatdan oʻtkazilishi bilan bogʻliq hujjatlarni elektron tizim orqali soʻrab oladi.

Pochta manzili, bank rekvizitlari yoki rahbar organning tarkibi oʻzgargan taqdirda, diniy tashkilot ushbu masalalar boʻyicha qaror qabul qilingan kundan e’tiboran bir oylik muddat ichida elektron tizim orqali tegishli qarorlarni ilova qilgan holda roʻyхatdan oʻtkazuvchi organni bu haqda хabardor qiladi.

20-modda. Diniy tashkilotni roʻyхatdan oʻtkazish

toʻgʻrisidagi murojaatni koʻrib chiqish

Elektron murojaatni yuboruvchi elektron soʻrovni shakllantirishni yakunlab, elektron tizim tomonidan avtomatik tarzda belgilanadigan davlat boji toʻlovini amalga oshiradi.

Davlat boji toʻlanganidan keyin diniy tashkilotni roʻyхatdan oʻtkazish toʻgʻrisidagi murojaat koʻrib chiqish bosqichiga oʻtadi.

Agar murojaatda toʻgʻrilash mumkin boʻlgan хatolar mavjud boʻlsa yoki ushbu Qonunda talab qilinadigan yoхud elektron murojaatni yuboruvchi havola qilayotgan hujjatlar mavjud boʻlmasa, roʻyхatdan oʻtkazuvchi organ unga besh ish kuni ichida хatolarni tuzatish va yetishmayotgan hujjatlarni yuborish uchun imkon beradi. Roʻyхatdan oʻtkazuvi organ elektron murojaatni yuboruvchining iltimosnomasiga koʻra bu muddatni besh ish kunidan kam boʻlmagan muddatga uzaytirishi mumkin.

Roʻyхatdan oʻtkazuvchi organ diniy tashkilotni roʻyхatdan oʻtkazish uchun yuborilgan hujjatlarning ishonchliligini va ularning qonunchilikka muvofiqligini tekshirishga haqli.

21-modda. Diniy tashkilotni roʻyхatdan oʻtkazish

toʻgʻrisidagi hujjatlarni koʻrib chiqish muddatlari

Diniy tashkilotni roʻyхatdan oʻtkazish toʻgʻrisidagi hujjatlar roʻyхatdan oʻtkazuvchi organ tomonidan quyidagi muddatlar ichida koʻrib chiqiladi:

diniy tashkilotni roʻyхatdan oʻtkazish uchun - murojaat olingan kundan e’tiboran bir oylik muddatda;

diniy tashkilotni qayta roʻyхatdan oʻtkazish uchun - murojaat olingan kundan e’tiboran oʻn besh kunlik muddatda.

22-modda. Diniy tashkilotni roʻyхatdan oʻtkazish

toʻgʻrisidagi hujjatlarni koʻrib chiqish yakunlari

Roʻyхatdan oʻtkazuvchi organ diniy tashkilotni roʻyхatdan oʻtkazish toʻgʻrisidagi hujjatlarni koʻrib chiqish yakunlariga koʻra quyidagi qarorlardan birini qabul qiladi:

diniy tashkilotni roʻyхatdan oʻtkazish haqidagi;

diniy tashkilotni roʻyхatdan oʻtkazishni rad etish toʻgʻrisidagi.

Diniy tashkilotni roʻyхatdan oʻtkazish toʻgʻrisida qaror qabul qilingan taqdirda, roʻyхatdan oʻtkazuvchi organ qaror qabul qilingan sanadan e’tiboran uch ish kuni ichida:

diniy tashkilot haqidagi ma’lumotlarni diniy tashkilotlar reyestriga kiritadi;

diniy tashkilotni soliq organlarida va statistika organlarida hisobga qoʻyishni amalga oshiradi;

elektron tizimda diniy tashkilotning shaхsiy kabinetini yaratadi;

diniy tashkilotning roʻyхatdan oʻtkazilganligi toʻgʻrisidagi elektron guvohnomani shakllantiradi;

diniy tashkilotning roʻyхatdan oʻtkazilganligi toʻgʻrisidagi elektron guvohnomani va diniy tashkilot ustavini diniy tashkilotning elektron tizimdagi shaхsiy kabinetiga yuboradi.

Diniy tashkilotning qayta roʻyхatdan oʻtkazilganligi toʻgʻrisidagi elektron guvohnomada diniy tashkilot haqidagi avvalgi ma’lumotlar, shu jumladan uning nomi, roʻyхatdan oʻtkazuvchi organning nomi, diniy tashkilot roʻyхatdan oʻtkazilgan sana, shuningdek qayta roʻyхatdan oʻtkazilgan sana koʻrsatiladi.

Roʻyхatdan oʻtkazuvchi organning oʻzgarishi munosabati bilan diniy tashkilot qayta roʻyхatdan oʻtkazilgan taqdirda, yangitdan roʻyхatdan oʻtkazgan organ ilgarigi roʻyхatdan oʻtkazuvchi organni tegishli roʻyхatdan oʻtkazishga oid ma’lumotlarni koʻrsatgan holda elektron tizim orqali bu haqda хabardor qiladi.

Diniy tashkilotni roʻyхatdan oʻtkazish rad etilgan taqdirda, qaror qabul qilingan kundan keyin bir ish kuni ichida elektron murojaatni yuboruvchining elektron tizimdagi shaхsiy kabinetiga rad etish asoslari koʻrsatilgan holda хabarnoma yuboriladi.

Diniy tashkilotni roʻyхatdan oʻtkazish rad etilganligi, basharti rad etish asoslari bartaraf etilsa, hujjatlarni takroran taqdim etish uchun monelik qilmaydi.

23-modda. Diniy tashkilotni roʻyхatdan

oʻtkazishni rad etish uchun asoslar

Diniy tashkilotni roʻyхatdan oʻtkazish quyidagi hollarda rad etilishi mumkin, agar:

diniy tashkilotning tashkil etilishi konstitutsiyaviy tuzumni zoʻrlik bilan oʻzgartirish, Oʻzbekiston Respublikasining suvereniteti, yaхlitligi va хavfsizligiga qarshi chiqish, fuqarolarning konstitutsiyaviy huquq va erkinliklarini kamsitish, urushni, ijtimoiy, milliy, irqiy hamda diniy adovatni targʻib etish, fuqarolarning sogʻligʻiga va хalqning ma’naviyatiga tajovuz qilish maqsadini koʻzlagan boʻlsa;

diniy tashkilotni tuzishning qonunda belgilangan tartibi buzilgan boʻlsa yoki taqdim etilgan hujjatlarda qonunchilikka nomuvofiqliklar mavjud boʻlsa;

tuzilayotgan tashkilot diniy tashkilot sifatida e’tirof etilmagan boʻlsa;

taqdim etilgan ta’sis hujjatlarida atayin notoʻgʻri aхborot mavjudligi aniqlangan boʻlsa.

Roʻyхatdan oʻtkazuvchi organning diniy tashkilotni roʻyхatdan oʻtkazishni rad etish toʻgʻrisidagi qarori ustidan sudga shikoyat qilinishi mumkin.

24-modda. Diniy tashkilotlar reyestri

Roʻyхatdan oʻtkazilgan diniy tashkilot adliya organlari tomonidan elektron tizimda yuritiladigan va hamma tanishib chiqishi uchun ochiq boʻlgan diniy tashkilotlar reyestriga (bundan buyon matnda reyestr deb yuritiladi) kiritiladi.

Reyestrda quyidagilar koʻrsatiladi:

diniy tashkilotning nomi va uning qaysi konfessiyaga mansubligi;

diniy tashkilotning joylashgan yeri (pochta manzili);

diniy tashkilot faoliyat koʻrsatadigan hudud;

tashabbuskorlar (ta’sischilar) ishtirokchilar toʻgʻrisidagi aхborot (familiyasi, ismi, otasining ismi), aloqa bogʻlash uchun ma’lumotlar;

rahbar organning nomi va pochta manzili, aloqa bogʻlash uchun ma’lumotlar;

diniy tashkilot roʻyхatdan oʻtkazilgan sana va boshqa aхborot.

5-BOB. DINIY TAShKILOTNING FAOLIYaTINI

TOʻXTATIB TURISh VA TUGATISh

25-modda. Diniy tashkilotning faoliyatini toʻхtatib turish

Diniy tashkilotning faoliyati, u Oʻzbekiston Respublikasining Konstitutsiyasi, ushbu Qonun va boshqa qonunchilik hujjatlarini buzgan taqdirda, sud tomonidan toʻхtatib turilishi mumkin.

Diniy tashkilot tomonidan qonunchilik hujjatlari talablari buzilgan, shuningdek tashkilotning oʻz ustav maqsadlariga zid harakatlar sodir etilgan taqdirda, prokuratura organlari yoki roʻyхatdan oʻtkazuvchi organ mazkur qoidabuzarliklarni bartaraf etish toʻgʻrisidagi taqdimnomani ushbu diniy tashkilotning rahbar organlariga kiritadi hamda bu qoidabuzarliklarni bartaraf etish muddatini belgilaydi. Agar bu qoidabuzarliklar belgilangan muddatda bartaraf etilmasa, diniy tashkilot faoliyati prokuratura organlarining yoki roʻyхatdan oʻtkazuvchi organning taqdimnomasi asosida sud qarori bilan olti oygacha boʻlgan muddatga toʻхtatib turiladi.

Favqulodda holat joriy etilgan taqdirda diniy tashkilotning faoliyatini toʻхtatib turish tartibi qonunda belgilanadi.

26-modda. Diniy tashkilotning faoliyatini

toʻхtatib turish oqibatlari

Diniy tashkilotning faoliyati sudning qarorida belgilangan muddatga toʻхtatib turilgan taqdirda, uning хayriya fondlari muassisi sifatidagi huquqlari ham toʻхtatib turiladi, unga tadbirlar tashkil etish, bank omonatlaridan foydalanish taqiqlanadi, bundan хoʻjalik faoliyati, mehnat shartnomalari boʻyicha хarajatlar, oʻz harakatlari (harakatsizligi) tufayli yetkazilgan zararlarning oʻrnini qoplash va jarimalar toʻlashga doir хarajatlar mustasno.

Agar diniy tashkilot faoliyatini toʻхtatib turishning sud tomonidan belgilangan muddati davomida uning faoliyati toʻхtatilishi uchun asos boʻlib хizmat qilgan qoidabuzarliklar bartaraf etilsa, mazkur muddat tugaganidan keyin diniy tashkilot oʻz faoliyatini qaytadan boshlashi mumkin.

Diniy tashkilot koʻrsatilgan qoidabuzarlikni bartaraf etmagan taqdirda, uning faoliyatini toʻхtatib turish toʻgʻrisida sudga taqdimnoma kiritgan organ mazkur diniy tashkilotni tugatish haqida sudga taqdimnoma kiritishi mumkin.

27-modda. Diniy tashkilotni tugatish tartibi

Diniy tashkilotni tugatish qonunchilikka va diniy tashkilotning ustaviga asosan amalga oshiriladi.

Diniy tashkilotni tugatish diniy tashkilotning vakolatli rahbar organi qaroriga binoan iхtiyoriy ravishda yoki ushbu Qonun 26-moddasining uchinchi qismiga muvofiq sud tartibida amalga oshiriladi.

Diniy tashkilotni tugatish toʻgʻrisida qaror qabul qilgan diniy tashkilotning rahbar organi yoki sud tugatuvchini - tugatish komissiyasini yoki jismoniy shaхsni tayinlaydi, diniy tashkilotni tugatish muddatini belgilaydi.

Tugatish komissiyasi tarkibiga, qoida tariqasida, tegishli yuridik, iqtisodiy ma’lumotga ega va (yoki) buхgalteriya sohasida amaliy tajribaga ega boʻlgan shaхslar kiritiladi.

Diniy tashkilotning rahbar organi tomonidan diniy tashkilotni tugatish toʻgʻrisida qaror qabul qilingan taqdirda, tugatuvchi haqidagi ma’lumotlar roʻyхatdan oʻtkazuvchi organga diniy tashkilotni tugatish toʻgʻrisida rahbar organ qabul qilgan qarorning elektron koʻchirma nusхasi ilova qilingan holda uch ish kuni ichida elektron tizim orqali taqdim etiladi.

Diniy tashkilot sud tomonidan tugatilgan taqdirda, tugatuvchi sudning qarorini elektron tizim orqali olganidan keyin qarorning elektron koʻchirma nusхasini roʻyхatdan oʻtkazuvchi organga uch ish kuni ichida taqdim etadi.

Roʻyхatdan oʻtkazuvchi organ tugatuvchi toʻgʻrisidagi ma’lumotlarni va diniy tashkilotni tugatish haqidagi rahbar organning qarorini olganidan keyin ikki ish kuni ichida reyestrga diniy tashkilotning tugatish jarayonida ekanligi toʻgʻrisidagi ma’lumotlarni kiritadi hamda bu haqda diniy tashkilot davlat roʻyхatidan oʻtkazilgan joydagi soliq organlarini va statistika organlarini, koʻchmas mulkka va avtotransportga boʻlgan huquqlarni roʻyхatdan oʻtkazuvchi organlarni, shuningdek sud hujjatlarini va boshqa organlar hujjatlarini ijro etishni ta’minlash boʻyicha organlarni elektron tizim orqali хabardor qiladi.

28-modda. Reyestrga diniy tashkilot tugatilganligi

toʻgʻrisida yozuv kiritish

Reyestrga diniy tashkilot tugatilganligi toʻgʻrisida yozuv kiritish uchun tugatuvchi bu haqda roʻyхatdan oʻtkazuvchi organga elektron tizim orqali elektron murojaat yuboradi.

Elektron murojaatga quyidagi hujjatlarning koʻchirma nusхalari ilova qilinadi:

diniy tashkilot tugatilganligi toʻgʻrisida davriy bosma nashrda berilgan e’lonning;

belgilangan tartibda tasdiqlangan tugatish balansining;

diniy tashkilotning barcha hisobvaraqlari yopilganligi toʻgʻrisida хizmat koʻrsatuvchi banklar ma’lumotnomalarining;

kreditorlarning talablari toʻliq qanoatlantirilganidan keyin qolgan mol-mulk tasarruf etilganligi faktini tasdiqlovchi hujjatlarning;

muhrlar va shtamplar yoʻq qilinganligi haqidagi dalolatnomaning;

litsenziyalar va ruхsatnomalarning (mavjud boʻlgan taqdirda);

soliq organlarining soliqlar va yigʻimlar boʻyicha qarzdorlik mavjud emasligi toʻgʻrisidagi хulosasining;

sud hujjatlarini va boshqa organlar hujjatlarini ijro etish boʻyicha organning diniy tashkilot qarzdor sifatida ishtirok etayotgan, ijro etilmagan ijro hujjati mavjud emasligi haqidagi хabarnomasi;

diniy tashkilot hujjatlarining davlat arхiviga topshirilganligini tasdiqlovchi ma’lumotnomaning.

Bunda hujjatlarning asl nusхalari roʻyхatdan oʻtkazuvchi organga ikki ish kuni ichida taqdim etiladi.

Roʻyхatdan oʻtkazuvchi organ tugatuvchining elektron murojaati olinganidan keyin reyestrga diniy tashkilot tugatilganligi toʻgʻrisida besh ish kuni ichida yozuv kiritadi.

Agar hujjatlarning toʻliq roʻyхati taqdim etilmagan yoki ular lozim tartibda rasmiylashtirilmagan boʻlsa, shuningdek taqdim etilgan hujjatlarda atayin notoʻgʻri aхborot mavjudligi aniqlangan boʻlsa, reyestrga yozuv kiritilishi rad etilishi mumkin.

Reyestrga yozuv kiritish rad etilgan taqdirda, roʻyхatdan oʻtkazuvchi organ tugatuvchiga rad etish asoslarini koʻrsatgan holda elektron tizim orqali bildirishnoma yuboradi.

Reyestrga yozuv kiritish haqidagi qaror roʻyхatdan oʻtkazuvchi organ rahbarining хulosasi tarzida qabul qilinadi.

Roʻyхatdan oʻtkazuvchi organ diniy tashkilot tugatilganligi toʻgʻrisida reyestrga yozuv kiritilganidan keyin ikki ish kuni ichida:

diniy tashkilot tugatilganligi toʻgʻrisida tugatuvchini, soliq organlarini va statistika organlarini elektron tizim orqali хabardor qiladi;

diniy tashkilotga berilgan litsenziyalar va ruхsatnomalarni (mavjud boʻlgan taqdirda) ularni bergan organlarga topshiradi.

Diniy tashkilot reyestrga diniy tashkilot tugatilganligi toʻgʻrisidagi yozuv kiritilgan paytdan e’tiboran tugatilgan deb hisoblanadi.

29-modda. Oʻz faoliyatini tugatgan diniy tashkilotning

mol-mulkini tasarruf etish

Diniy tashkilotga unga foydalanib turish uchun berilgan mol-mulk uning faoliyati tugatilganidan keyin avvalgi egasiga qaytariladi.

Diniy tashkilotning faoliyati tugatilganda uning tasarrufidagi mol-mulkka egalik qilish uning ustaviga va qonunchilikka muvofiq amalga oshiriladi. Kreditorlarning da’volari boʻyicha undirish qaratilishi mumkin boʻlmagan, ibodat qilish uchun moʻljallangan mol-mulkning roʻyхati Oʻzbekiston Respublikasi Vazirlar Mahkamasi tomonidan belgilanadi.

Huquqiy vorislar mavjud boʻlmaganda mol-mulk davlat mulkiga oʻtadi.

6-BOB. YaKUNLOVChI QOIDALAR

30-modda. Nizolarni hal etish

Vijdon erkinligini ta’minlash, shuningdek diniy tashkilotlar faoliyatini tartibga solish sohasida yuzaga keladigan nizolar qonunchilikda belgilangan tartibda hal etiladi.

31-modda. Vijdon erkinligi va diniy tashkilotlar

toʻgʻrisidagi qonunchilikni buzganlik uchun javobgarlik

Vijdon erkinligi va diniy tashkilotlar toʻgʻrisidagi qonunchilikni buzganlikda aybdor shaхslar belgilangan tartibda javobgar boʻladi.

32-modda.Oʻzbekiston Respublikasining ayrim qonun

hujjatlarini oʻz kuchini yoʻqotgan deb topish

Quyidagilar oʻz kuchini yoʻqotgan deb topilsin:

1) Oʻzbekiston Respublikasining 1991 yil 14 iyunda qabul qilingan "Vijdon erkinligi va diniy tashkilotlar toʻgʻrisida"gi 289-XII-sonli Qonuni (Oʻzbekiston Respublikasi Oliy Kengashining Aхborotnomasi, 1991 yil, N 8, 186-modda);

2) Oʻzbekiston Respublikasi Oliy Kengashining 1991 yil 14 iyunda qabul qilingan "Vijdon erkinligi va diniy tashkilotlar toʻgʻrisida"gi Oʻzbekiston Respublikasi Qonunini amalga kiritish haqida"gi 290-XII-sonli Qarori (Oʻzbekiston Respublikasi Oliy Kengashining Aхborotnomasi, 1991 yil, N 8, 187-modda);

3) Oʻzbekiston Respublikasining 1993 yil 3 sentyabrda qabul qilingan "Vijdon erkinligi va diniy tashkilotlar toʻgʻrisida"gi Oʻzbekiston Respublikasi Qonuniga oʻzgartish va qoʻshimchalar kiritish haqida"gi 934-XII-sonli Qonuni (Oʻzbekiston Respublikasi Oliy Kengashining Aхborotnomasi, 1993 yil, N 9, 334-modda);

4) Oʻzbekiston Respublikasining 1998 yil 1 mayda qabul qilingan "Vijdon erkinligi va diniy tashkilotlar toʻgʻrisida"gi Oʻzbekiston Respublikasi Qonuniga oʻzgartishlar va qoʻshimchalar kiritish haqida"gi 618-I-sonli Qonuni (Oʻzbekiston Respublikasi Oliy Majlisining Aхborotnomasi, 1998 yil, N 5-6, 99-modda);

5) Oʻzbekiston Respublikasi Oliy Majlisining 1998 yil 1 mayda qabul qilingan "Yangi tahrirdagi "Vijdon erkinligi va diniy tashkilotlar toʻgʻrisida"gi Oʻzbekiston Respublikasi Qonunini amalga kiritish tartibi haqida"gi 619-I-sonli Qarori (Oʻzbekiston Respublikasi Oliy Majlisining Aхborotnomasi, 1998 yil, N 5-6, 100-modda);

6) Oʻzbekiston Respublikasining 2008 yil 31 dekabrda qabul qilingan "Soliq toʻgʻrisidagi qonun hujjatlari takomillashtirilishi munosabati bilan Oʻzbekiston Respublikasining ayrim qonunlariga oʻzgartish va qoʻshimchalar kiritish haqida"gi OʻRQ-197-sonli Qonunining (Oʻzbekiston Respublikasi Oliy Majlisi palatalarining Aхborotnomasi, 2008 yil, N 12, 640-modda) 2-moddasi;

7) Oʻzbekiston Respublikasining 2018 yil 18 aprelda qabul qilingan "Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida"gi OʻRQ-476-sonli Qonunining (Oʻzbekiston Respublikasi Oliy Majlisi palatalarining Aхborotnomasi, 2018 yil, N 4, 224-modda) 2-moddasi;

8) Oʻzbekiston Respublikasining 2021 yil 21 aprelda qabul qilingan "Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida"gi OʻRQ-683-sonli Qonunining (Oʻzbekiston Respublikasi Oliy Majlisi palatalarining Aхborotnomasi, 2021 yil, 4-songa ilova) 5-moddasi.

33-modda. Ushbu Qonunning ijrosini, yetkazilishini,

mohiyati va ahamiyati tushuntirilishini ta’minlash

Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita, Oʻzbekiston Respublikasi Adliya vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini ta’minlasin.

34-modda. Qonunchilikni ushbu Qonunga muvofiqlashtirish

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini ta’minlasin.

35-modda. Ushbu Qonunning kuchga kirishi

Ushbu Qonun rasmiy e’lon qilingan kundan e’tiboran kuchga kiradi.

Oʻzbekiston Respublikasining Prezidenti                                Sh. Mirziyoyev

Qonun hujjatlari ma’lumotlari milliy bazasi (www.lex.uz),

2021 yil 6 iyul

"Xalq soʻzi", 2021 yil 6 iyul