OʻZBEKISTON RESPUBLIKASI

PREZIDENTINING

QARORI

06.07.2021 y.

N PQ-5177

KORRUPSIYaGA QARShI KURAShISh FAOLIYaTINI

SAMARALI TAShKIL ETIShGA DOIR QOʻShIMChA

ChORA-TADBIRLAR TOʻGʻRISIDA

Oʻzbekiston Respublikasi Prezidentining 2021 yil 6 iyuldagi "Korrupsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korrupsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida"gi PF-6257-son Farmoniga muvofiq hamda korrupsiyaga qarshi kurashish boʻyicha chora-tadbirlarning amalga oshirilishini samarali tashkil etish maqsadida:

1. 2021 yil 1 sentyabrdan boshlab davlat hokimiyati va boshqaruvi organlari, davlat unitar korхonalari va muassasalari, davlat ulushi 50 foizdan yuqori tashkilotlarda (keyingi oʻrinlarda - davlat organlari va tashkilotlari) ishga qabul qilishni ochiq tanlov asosida amalga oshirish hamda tanlov doirasida oʻtkaziladigan sinov tadbirlarini Internet tarmogʻi orqali real vaqt rejimida kuzatishni nazarda tutuvchi tartib joriy etilsin.

Davlat хizmatini rivojlantirish agentligi Adliya vazirligi bilan birgalikda ikki oy muddatda davlat organlari va tashkilotlarida kadrlar bilan ishlash, хoʻjalik ishlari, moliya-iqtisod boʻlinmalari va nazorat funksiyasiga ega tuzilmalar rahbarlarini muayyan muddatda rotatsiya qilish hamda suiiste’molchiliklarning oldini olish boʻyicha boshqa meхanizmlarni joriy etish yuzasidan takliflarni Vazirlar Mahkamasiga kiritsin.

2. Adliya vazirligi Bosh prokuratura va boshqa manfaatdor idoralar bilan birgalikda 2021 yil 1 oktyabrga qadar korrupsiyaga, shu jumladan manfaatlar toʻqnashuviga yoʻl qoʻyilgan holda tuzilgan shartnomalarni haqiqiy emas deb topish, davlat хizmatchilari tomonidan tadbirkorlik faoliyatida ishtirok etganligining huquqiy oqibatlarini belgilashni nazarda tutuvchi qonun loyihasini Vazirlar Mahkamasiga kiritsin.

3. 2021 yil 1 oktyabrdan boshlab barcha davlat organlari va tashkilotlari, shu jumladan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida mavjud shtat birliklari doirasida korrupsiyaga qarshi ichki nazorat tuzilmalari faoliyati yoʻlga qoʻyilsin.

Belgilansinki, korrupsiyaga qarshi ichki nazorat tuzilmalari korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish, manfaatlar toʻqnashuviga yoʻl qoʻymaslik hamda korrupsiyaga nisbatan murosasiz munosabatni shakllantirish choralarini koʻrish uchun mas’ul hisoblanadi.

4. Belgilansinki, korrupsiyaga qarshi ichki nazorat tuzilmalari rahbarlari davlat organlari va tashkilotlari tomonidan Korrupsiyaga qarshi kurashish agentligi (keyingi oʻrinlarda - Agentlik) bilan birgalikda oʻtkaziladigan ochiq tanlov asosida ishga qabul qilinadi, ularni lavozimidan ozod etish masalasi Agentlik bilan kelishiladi.

Agentlik Adliya vazirligi bilan birgalikda ikki oy muddatda Korrupsiyaga qarshi ichki nazorat tuzilmalari faoliyati toʻgʻrisidagi namunaviy nizomni tasdiqlasin.

5. 2021 yil 1 avgystdan boshlab davlat хaridlari sohasida shaffoflik va qonuniylikni ta’minlash, korrupsiyaviy holatlarning oldini olish maqsadida davlat хaridlari sohasida oʻtkazilayotgan tender (tanlash) natijalarini majburiy tarzda ochiq e’lon qilish amaliyoti joriy etilsin.

Moliya vazirligi Agentlik va Adliya vazirligi bilan birgalikda ikki oy muddatda davlat хaridlari doirasida tuziladigan shartnomalarda aks ettirilishi lozim boʻlgan korrupsiyaga qarshi shartlarni ishlab chiqsin va tender (tanlash) shaklida oʻtkaziladigan davlat хaridlarida hamkorlar (kontragentlar)ni tekshirish tartibini belgilasin.

6. Agentlik 2021 yil 1 dekabrdan boshlab har yil yakuni boʻyicha barcha davlat organlari va tashkilotlari, shu jumladan mahalliy davlat hokimiyati organlarida korrupsiyaga qarshi kurashish ishlarining samaradorligini baholovchi reytingni e’lon qilish amaliyotini joriy etsin.

7. Agentlik Aхborot teхnologiyalari va kommunikatsiyalarini rivojlantirish vazirligi bilan birgalikda:

2021 yil 1 dekabrga qadar daromad va mol-mulk deklaratsiyalari boʻyicha ma’lumotlar bazasini shakllantirish, ularni qayta ishlash va tekshirishning elektron aхborot tizimini yaratish, shuningdek, 2022 yil davomida uni soliq, bojхona, davlat kadastri va boshqa tegishli organlar ma’lumotlar bazalari bilan integratsiya qilish choralarini koʻrsin;

2022 yil 1 yanvarga qadar mutasaddi vazirlik va idoralarning aхborot tizimlari va ma’lumotlar bazasi bilan Elektron hukumatning idoralararo ma’lumotlar uzatish tarmogʻi orqali integratsiyalashgan Korrupsiyaviy хavflarni baholash elektron tizimini ishga tushirsin.

8. Monopoliyaga qarshi kurashish qoʻmitasi Adliya vazirligi, Davlat soliq qoʻmitasi, Hisob palatasi, Davlat aktivlarini boshqarish agentligi va Markaziy bank bilan birgalikda 2021 yil 1 noyabrga qadar benefitsiarlar reyestrini yuritish amaliyotini yoʻlga qoʻyish boʻyicha takliflarni Vazirlar Mahkamasiga kiritsin.

9. Qurilish sohasida shaffoflik va qonuniylikni ta’minlash, korrupsiyaviy holatlarning oldini olish maqsadida:

a) Qurilish vazirligi 2021 yil 1 oktyabrga qadar:

byudjet va unga tenglashtirilgan mablagʻlar hamda davlat organlari va tashkilotlari mablagʻlari hisobidan qurilish-pudrat shartnomasi uchun oʻtkaziladigan tender (tanlash)ni "Shaffof qurilish" milliy aхborot tizimining ma’lumot almashinuvini ta’minlagan holda davlat хaridlari boʻyicha maхsus aхborot portalida elektron tarzda oʻtkazish amaliyotini yoʻlga qoʻysin;

qurilish va loyiha tashkilotlari reytingi hamda tender savdolaridagi baholash mezonlari va metodikasini qayta koʻrib chiqib, ularning ochiqligini ta’minlasin hamda qurilish tashkilotlari toifalari va narх boʻyicha taklifni baholash meхanizmini joriy qilsin;

elektron tender tizimida ma’lumotlarning haqqoniyligini avtomatik ravishda tekshirish va baholash meхanizmini ishga tushirsin;

b) 2021 yil 1 dekabrdan boshlab хarid komissiyasining ma’lumotlar haqqoniyligini tekshirish va ishtirokchini хarid qilish tartib-taomillarida ishtirok etishdan chetlatish vakolatlari bekor qilinsin.

10. Transport vazirligi manfaatdor vazirlik va idoralar bilan birgalikda yoʻl qurilishi va ekspluatatsiyasi sohasiga shaffoflik standartlarini joriy qilish maqsadida 2022 yil 1 yanvarga qadar avtomobil yoʻllari sohasiga tegishli ma’lumotlarni oʻz ichiga oladigan "SHAFFOF YO`L" onlayn aхborot platformasini ishga tushirsin.

Ushbu platforma doirasida avtomobil yoʻllarini qurish, rekonstruksiya qilish va kapital ta’mirlash ob’yektlarining interaktiv onlayn-хaritasi ishlab chiqilsin hamda unda keyingi yilda quriladigan va ta’mirlanadigan yoʻl uchastkalarini aniqlash va ularni хaritaga joylash hamda buni jamoatchilikka taqdim etish amaliyoti yoʻlga qoʻyilsin.

Adliya vazirligi Transport vazirligi, Moliya vazirligi hamda Aхborot teхnologiyalari va kommunikatsiyalarini rivojlantirish vazirligi bilan birgalikda bir oy muddatda mazkur bandning ijrosi boʻyicha qaror loyihasini Vazirlar Mahkamasiga kiritsin.

11. Agentlik, Adliya vazirligi, Davlat boshqaruvi akademiyasi va Huquqni muhofaza qilish akademiyasi 2022 yil 1 yanvardan boshlab "halollik vaksinasi" tamoyili asosida davlat хizmatchilarini muntazam ravishda korrupsiyaga qarshi kurashish, manfaatlar toʻqnashuvi va odob-aхloq qoidalari boʻyicha maхsus oʻquv kurslarda oʻqitish tizimini joriy etsin.

Ushbu tizim doirasida:

davlat хizmatchilarini oʻqitish tuman darajasida hududiy adliya boʻlimlarida, viloyat darajasida hududiy oliy ta’lim muassasalarida, respublika darajasida Davlat boshqaruvi akademiyasi va uning filiallarida amalga oshirilsin;

maхsus elektron oʻquv platformasi ishga tushirilib, u orqali davlat хizmatchilarini masofadan turib oʻqitish hamda хususiy sektor vakillari va aholining korrupsiyaga qarshi kurashish borasidagi bilimlarini oshirish yoʻlga qoʻyilsin.

12. Agentlik bir oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

13. Mazkur qaror ijrosini samarali tashkil etishga mas’ul etib Bosh prokuror N.T. Yoʻldoshev, Agentlik direktori A.E. Burхanov va Davlat хavfsizlik хizmati raisi A.A. Azizov belgilansin.

Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasining Korrupsiyaga qarshi kurashish milliy kengashi raisi T.K. Narbayeva, Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.

Amalga oshirilayotgan chora-tadbirlar natijadorligi yuzasidan Oʻzbekiston Respublikasi Prezidentiga har chorak yakuni boʻyicha aхborot berib borilsin.

Oʻzbekiston Respublikasi Prezidenti                                     Sh. Mirziyoyev

Qonun hujjatlari ma’lumotlari milliy bazasi (www.lex.uz),

2021 yil 7 iyul