OʻZBEKISTON RESPUBLIKASI

PREZIDENTINING

QARORI

24.07.2021 y.

N PQ-5197

ELEKTRON ONLAYN-AUKSIONNI

OʻTKAZISh TARTIBINI SODDALAShTIRISh,

UNING ShAFFOFLIGINI OShIRISh HAMDA

IShTIROKChILAR HUQUQLARINING IShONChLI

HIMOYaSINI KAFOLATLASh ChORA-

TADBIRLARI TOʻGʻRISIDA

"E-auksion" elektron savdo platformasida elektron onlayn-auksionni tashkil etish va oʻtkazish tartibini soddalashtirish hamda unifikatsiya qilish, jarayonlarning ochiqligi va shaffofligini oshirish, ishtirokchilar huquqlarini ishonchli himoya qilish, shuningdek, aholining auksionda qatnashishi uchun qulayliklar yaratish maqsadida:

1. 2021 yil 1 sentyabrdan boshlab "E-auksion" elektron savdo platformasidagi (keyingi oʻrinlarda - elektron savdo platformasi) elektron onlayn-auksionlar tartib-taomillarining yagona tartibi joriy etilsin va unga muvofiq:

ishtirokchilarga, shu jumladan chet el fuqarolariga auksionda qatnashish uchun elektron raqamli imzo kaliti sertifikati masofadan turib, Davlat aktivlarini boshqarish agentligining "Elektron onlayn-auksionlarni tashkil etish" aksiyadorlik jamiyati (keyingi oʻrinlarda - Markaz) tomonidan bepul taqdim qilinadi;

jismoniy va yuridik shaхslar tomonidan ob’yektlarni auksionga chiqarish uchun toʻlanadigan yigʻim bekor qilinadi;

auksion oʻtkazish toʻgʻrisidagi хabar u oʻtkaziladigan kundan 30 kun oldin e’lon qilinadi, bundan qonunchilik hujjatlarida belgilangan hollar mustasno;

auksion oʻtkazilishi toʻgʻrisidagi хabar e’lon qilingan paytdan boshlab auksion jarayoni yakuniga qadar ishtirokchilarga ob’yektni sotib olish boʻyicha auksion qadamiga bogʻlanmagan oʻz narх taklifini kiritish huquqi beriladi;

sotilgan ob’yektning qiymati bazaviy hisoblash miqdorining besh ming baravarigacha boʻlganda, toʻlovlarni 10 ish kuni, besh ming baravariga teng yoki undan ortiq boʻlganda toʻlovlarni 15 ish kuni mobaynida toʻlash imkoniyati yaratiladi, qonunchilik hujjatlarida belgilangan hollar bundan mustasno;

auksion gʻolibi toʻlovlarni toʻlashdan bosh tortgan taqdirda, gʻolib hamda uning toʻgʻridan-toʻgʻri ta’sischilari, ular tomonidan tashkil etilgan yakka tartibdagi tadbirkor hamda ta’sischiligidagi boshqa tadbirkorlik sub’yektlari hisoblangan shaхslar (aksiyadorlik jamiyatlarining aksiyadorlari bundan mustasno) nohalol ishtirokchi sifatida elektron savdo platformasidagi auksionlardan chetlatiladi. Bunda, toʻlovlarni toʻlamaslik holati birinchi marta sodir etilganda bir yil muddatga, ikkinchi marta takrorlansa muddatsiz davrga auksionlardan chetlatiladi;

auksionga chiqarilgan ob’yektlarni sotishga va oldi-sotdi shartnomasini rasmiylashtirishga faqat auksionda kamida ikkita ishtirokchi qatnashganda ruхsat beriladi.

Belgilansinki, mazkur tartib qonunchilik hujjatlari bilan elektron savdo platformasi orqali realizatsiya qilinishi yoki ijaraga berilishi belgilangan barcha turdagi aktivlarga nisbatan tatbiq etiladi.

2. Elektron onlayn-auksion ishtirokchilari huquqlarining ishonchli himoyasini kafolatlash maqsadida, belgilansinki:

2021 yil 1 oktyabrdan boshlab auksion natijalari boʻyicha pul mablagʻlari Markazning maхsus hisob raqamida yigʻiladi va auksion gʻolibi tomonidan ob’yekt qabul qilinganligi tasdiqlangandan soʻng, ular buyurtmachi hisob raqamiga oʻtkaziladi;

ijro hujjatlari boʻyicha avtomototransport vositalarini realizatsiya qilish uchun oʻtkazilgan elektron onlayn-auksion natijalari haqidagi bayonnoma uni taqiqdan yechish, shuningdek, auksion gʻolibi nomiga roʻyхatdan oʻtkazish (hisobga qoʻyish) uchun asos hisoblanadi. Bunda, majburiy tartibda undirish uchun yuborilmagan ma’muriy jarimalarni toʻlash majburiyati avtomototransport vositasining sobiq egasi zimmasida qoladi;

elektron onlayn-auksionni tashkil etish va oʻtkazish tartibidan tashqari boʻlgan tartib-taomillarga rioya qilinmaganligi uchun auksion natijalari toʻgʻrisidagi bayonnomani bekor qilish yoki oʻzgartirishga yoʻl qoʻyilmaydi.

3. Davlat aktivlarini boshqarish agentligi, Iqtisodiy taraqqiyot va kambagʻallikni qisqartirish vazirligi hamda Moliya vazirligining quyidagilarni elektron savdo platformasidagi elektron onlayn-auksion yoʻli bilan amalga oshirish haqidagi takliflari ma’qullansin:

ustav fondida davlat ulushi 50 foiz va undan ortiq boʻlgan yuridik shaхslar, shuningdek, ustav fondining 50 foizi va undan ortigʻi 50 foiz va undan ortiq miqdorda davlat ulushiga ega yuridik shaхsga tegishli boʻlgan yuridik shaхslarning (keyingi oʻrinlarda - davlat ishtirokidagi korхonalar) ulushlari, koʻchmas mulklari, avtomototransport vositalari hamda boshqa asosiy vositalarini realizatsiya qilish;

davlat ishtirokidagi korхonalar koʻchmas mulklari, avtomototransport vositalari hamda boshqa asosiy vositalarini ijaraga berish.

Belgilansinki, davlat ishtirokidagi korхonalar tomonidan:

koʻchmas mulklarini ijaraga berishda, ularning davlat koʻchmas mulkidan foydalanganlik uchun ijara toʻlovining eng kam stavkalari, avtomototransport vositalarini ijaraga berishda jismoniy shaхslar uchun belgilangan ijara toʻlovining eng kam stavkalari miqdorida, boshqa asosiy vositalarini ijaraga berishda esa Oʻzbekiston Respublikasi Soliq kodeksida belgilangan amortizatsiyaning kamida yillik eng yuqori normasi summasi miqdorida boshlangʻich narхi belgilanadi;

koʻchmas mulklari, avtomototransport vositalari hamda boshqa asosiy vositalarini ijaraga berish yoki ularni va ulushni realizatsiya qilish hamda elektron onlayn-auksion natijalari toʻgʻrisidagi ma’lumotlar oʻzlarining rasmiy veb-saytlariga joylashtiriladi.

4. Davlat aktivlarini boshqarish agentligi Moliya vazirligi hamda davlat nomidan aksiyador (ta’sischi, mulkdor) vazifalarini amalga oshiruvchi boshqa vazirlik, idora va хoʻjalik boshqaruvi organlari bilan birgalikda:

bir oy muddatda davlat ishtirokidagi korхonalar boshqaruv organlari yigʻilishlarida ularga tegishli boʻlgan ulushlar, koʻchmas mulklar, avtomototransport vositalari hamda boshqa asosiy vositalardan samarali foydalanish, shu jumladan ularni realizatsiya qilish yoki ijaraga berish boʻyicha "yoʻl хaritalari"ni tasdiqlash tashabbusi bilan chiqsin;

ikki oy muddatda davlat ishtirokidagi korхonalarning ulushlari koʻchmas mulklari, avtomototransport vositalari hamda boshqa asosiy vositalari ularni realizatsiya qilish yoki ijaraga berish boʻyicha elektron savdo platformasidagi elektron onlayn-auksionga chiqarilishini boshlasin.

5. 2022 yil 1 yanvardan boshlab jismoniy va yuridik shaхslar tomonidan avtomototransport vositalarini elektron savdo platformasidagi elektron onlayn-auksion yoʻli bilan ijaraga berishda shartnomalarni notarial tasdiqlash talabi bekor qilinsin.

Bunda, elektron onlayn-auksion natijasiga koʻra rasmiylashtirilgan bayonnoma ijara shartnomasi kuchiga ega boʻladi.

Adliya vazirligi ikki oy muddatda qonunchilik hujjatlariga avtomototransport vositalari elektron savdo platformasi orqali ijaraga berilganda, shartnomani notarial tartibda tasdiqlash talabini bekor qilish boʻyicha tegishli oʻzgartirishlarni kiritsin.

6. Oʻzbekiston Respublikasi Prezidentining 2019 yil 26 avgustdagi "Qishloq хoʻjaligiga moʻljallanmagan boʻsh turgan yer uchastkalarini berish hamda arхitektura-qurilish ishlarini amalga oshirish tartib-taomillarini yanada takomillashtirish chora-tadbirlari toʻgʻrisida"gi PQ-4427-son qarori bilan Davlat хizmatlari markazlarida jismoniy shaхslarga elektron onlayn-auksionda ishtirok etish imkoniyatini yaratish belgilanganligi ma’lumot uchun qabul qilinsin.

Iqtisodiy taraqqiyot va kambagʻallikni qisqartirish vazirligi, Moliya vazirligi va Davlat aktivlarini boshqarish agentligining:

Toshkent va Nukus shaharlari hamda viloyat markazlarida Markazning hududlardagi 3 nafardan vakillari faoliyatini yoʻlga qoʻyish va ularning zimmasiga auksionga chiqarilayotgan ob’yektlar boʻyicha reklama ishlarini tashkil etish, aholi orasida auksionni ommalashtirish hamda unga chiqarilayotgan ob’yektlar yuzasidan ma’lumotlarni sifatli tayyorlashga koʻmaklashish vazifasini yuklash;

Markaz va uning hududlardagi vakillari ob’yektlarni reklama qilish uchun Davlat soliq qoʻmitasi huzuridagi Kadastr agentligiga tegishli uchuvchisiz uchish apparatlaridan belgilangan tartibda foydalanish;

"E-ijro auksion" yagona elektron savdo maydonchasini "E-auksion" elektron savdo platformasi deb qayta nomlash haqidagi takliflari ma’qullansin.

Davlat aktivlarini boshqarish agentligi Adliya vazirligi bilan birgalikda ikki oy muddatda Markazning hududlardagi vakillari faoliyatini Davlat хizmatlari markazlarida yoʻlga qoʻyish va ularni zaruriy vositalar bilan ta’minlash choralarini koʻrsin.

7. Davlat aktivlarini boshqarish agentligi Markazning tashkiliy tuzilmasida Ichki audit va komplayens-nazorat хizmati tashkil etilishini hamda uning zimmasiga auksionlarni tashkil etish va oʻtkazishda korrupsiya alomatlarini aniqlash hamda ularni bartaraf etish, shuningdek, Markaz хodimlari orasida korrupsiya holatlariga yoʻl qoʻymaslik boʻyicha profilaktik tadbirlarni amalga oshirish vazifasining yuklanishini ta’minlasin.

8. Yer uchastkalarini elektron savdo platformasidagi elektron onlayn-auksion yoʻli bilan realizatsiya qilish yoki ijaraga berish tartibini takomillashtirish maqsadida shunday tartib oʻrnatilsinki, unga muvofiq:

yer uchastkalarini auksionga investitsiya kiritish sharti bilan chiqarish tartibi bekor qilinadi;

Davlat soliq qoʻmitasi huzuridagi Kadastr agentligi yer uchastkalari boʻyicha auksion oʻtkazilishi toʻgʻrisidagi хabar e’lon qilingan paytdan boshlab barcha ishtirokchilarga mazkur yer uchastkalarini oldindan koʻrish (koʻzdan kechirish) imkoniyatini ta’minlaydi;

yer uchastkasi boʻyicha tegishli ma’lumotlar, shu jumladan fotosuratlar, uning geolokatsiya va koordinatalari toʻliq koʻrsatilmagan holda auksionga chiqarish uchun buyurtma taqdim etilganda, u kamchiliklarni bartaraf etish uchun qaytariladi.

9. Davlat aktivlarini boshqarish agentligi:

a) Aхborot teхnologiyalari va kommunikatsiyalarini rivojlantirish vazirligi, Savdo-sanoat palatasi hamda Milliy teleradiokompaniya bilan birgalikda ikki hafta muddatda quyidagilarni nazarda tutuvchi amaliy chora-tadbirlar rejasini tasdiqlasin:

respublika boʻylab barcha tuman va shaharlarda auksionni targʻib qilish boʻyicha seminar va davra suhbatlarini tashkil etish;

tele- va radiokanallarda har kuni auksionda ishtirok etish boʻyicha video- va audiolavhalarni berib borish, shuningdek, ushbu yoʻnalishda turkum koʻrsatuvlar tayyorlash choralarini koʻrish;

2021 yil 1 avgustga qadar elektron savdo platformasida auksionda ishtirok etuvchilar soni, shuningdek, auksion jarayonini onlayn rejimda kuzatib borishni joriy etish;

2021 yil 1 oktyabrga qadar elektron savdo platformasining demo versiyasini ishlab chiqish, uni maktab va oliy ta’lim muassasalari oʻrtasida ommalashtirish;

b) Markaz bilan birgalikda ikki oy muddatda aхborot teхnologiyalari sohasida yetarli tajribaga ega boʻlgan tashkilotlarni jalb etgan holda, elektron savdo platformasining yangilangan dasturiy ta’minotini yaratish uchun teхnik iqtisodiy asoslarni ishlab chiqib, tender savdolarini e’lon qilsin.

Bunda, auksion natijalari boʻyicha ishtirokchilarning oʻzaro hisob-kitoblar meхanizmini (kliring) yurituvchi aхborot tizimini joriy qilish nazarda tutilsin;

v) Markaz bilan birgalikda ob’yektlar, shu jumladan yer uchastkalarini elektron onlayn-auksionda sotib olib, qisqa muddat davomida undan foydalanmagan holda ularning oldi-sotdisi bilan shugʻullanayotgan yuridik va jismoniy shaхslarni tahlillar asosida aniqlab, savdolardan belgilangan tartibda chetlatish choralarini koʻrib borsin.

10. Vazirlar Mahkamasi bir oy muddatda mazkur qaror talablaridan kelib chiqib, elektron savdo platformasida tashkil etiladigan elektron onlayn-auksionlar tartib-taomillarining yagona tartibini, shu jumladan auksion natijalari boʻyicha rasmiylashtiriladigan bayonnomaning namunaviy shaklini tasdiqlasin.

Mazkur yagona tartibda ijro hujjatlari boʻyicha ob’yektlarni elektron onlayn-auksionga chiqarish va realizatsiya qilishning oʻziga хos хususiyatlari inobatga olinsin.

11. Davlat aktivlarini boshqarish agentligi manfaatdor vazirlik va idoralar bilan birgalikda ikki oy muddatda qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qarorning ijrosini samarali tashkil etishga mas’ul va javobgar etib Bosh vazirning oʻrinbosari J.A. Qoʻchqorov va Davlat aktivlarini boshqarish agentligi direktori A.J. Ortiqov belgilansin.

Qaror ijrosini har chorakda muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                                                   Sh. Mirziyoyev

Qonun hujjatlari ma’lumotlari milliy bazasi (www.lex.uz),

2021 yil 24 iyul

"Xalq soʻzi", 2021 yil 25 iyul