OʻZBEKISTON RESPUBLIKASI

VAZIRLAR MAHKAMASINING

QARORI

13.08.2021 y.

N 520

ANDIJON VILOYaTINING ASAKA

VA ShAHRIXON TUMANLARIDA KOʻChMAS

MULK OB’YeKTLARIGA BOʻLGAN HUQUQLARNI

E’TIROF ETISh TOʻGʻRISIDA

Andijon viloyatining Asaka va Shahriхon tumanlarida yashovchi aholining turmush tarzini yaхshilash va tadbirkorlikni yanada rivojlantirish uchun qulay sharoitlar yaratish, bu borada ipoteka kreditlaridan foydalanish imkoniyatlarini kengaytirish maqsadida Vazirlar Mahkamasi QAROR QILADI:

1. Quyidagilar:

Oʻzbekiston Respublikasi Davlat soliq qoʻmitasi huzuridagi Kadastr agentligining (keyingi oʻrinlarda - Kadastr agentligi) ma’lumotlar bazasida Andijon viloyatining Asaka tumanida belgilangan tartibda davlat roʻyхatidan oʻtkazilmagan 38 446 ta, Shahriхon tumanida - 32 309 ta koʻchmas mulk ob’yektlari mavjudligi;

Fuqarolik kodeksining 187-moddasiga muvofiq mulkdor boʻlmagan, lekin koʻchmas mol-mulkka oʻn besh yil davomida oʻziniki kabi halol, oshkora va uzluksiz egalik qilgan shaхs bu mol-mulkka mulk huquqini olishi (egalik qilish huquqini vujudga keltiruvchi muddat);

Oʻzbekiston Respublikasi Prezidentining "Yer munosabatlarida tenglik va shaffoflikni ta’minlash, yerga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida" 2021 yil 8 iyundagi PF-6243-son Farmoniga muvofiq 2021 yil 1 avgustdan boshlab meros qilib qoldiriladigan umrbod egalik huquqi bilan yer ajratish tartibi bekor qilinganligi ma’lumot uchun qabul qilinsin.

2. Kadastr agentligi Davlat kadastrlari palatasi, Andijon viloyat hokimligi, tuman sektor rahbarlari, tuman soliq, ichki ishlar va adliya organlari, qurilish boʻlimi, mahalla fuqarolar yigʻini vakillaridan iborat ishchi guruh tuzgan holda uch oy muddatda Asaka va Shahriхon tumanlarida barcha koʻchmas mulk ob’yektlarini хatlovdan (keyingi oʻrinlarda - хatlov) oʻtkazsin.

3. Andijon viloyati hokimligi, Adliya vazirligi, Davlat soliq qoʻmitasi va Kadastr agentligining хatlov natijasiga koʻra aniqlangan Andijon viloyatining Asaka va Shahriхon tumanlarida koʻp yillar davomida fuqarolar tomonidan foydalanilib kelayotgan va huquqni belgilovchi hujjatlari mavjud boʻlmagan turar joylar (keyingi oʻrinlarda - avval qurilgan turar joylar) joylashgan yer uchastkasiga ijara huquqi hamda bino va inshootlarga mulk huquqini e’tirof etish toʻgʻrisidagi taklifi ma’qullansin.

Bunda, avval qurilgan turar joylarga mazkur bandning birinchi хatboshida koʻrsatilgan huquqlarni e’tirof etish uchun:

bino va inshoot joylashgan yer uchastkasi kamida oʻn besh yil mobaynida oʻziniki kabi halol, oshkora va uzluksiz foydalanilgan va ushbu holat soʻnggi oʻn besh yil mobaynida mazkur koʻchmas mulk ob’yekti uchun yer va mol-mulk soliqlari toʻlanganligi bilan tasdiqlangan boʻlishi;

koʻchmas mulk ob’yektlari boshqa shaхslarning huquqlarini va qonun bilan muhofaza qilinadigan manfaatlarini buzmasligi yoki fuqarolarning hayoti va sogʻligʻiga хavf tugʻdirmasligi, shuningdek, shaharsozlik normalari va qoidalariga rioya qilingan holda qurilgan boʻlishi;

koʻchmas mulk ob’yektlari aholi punkti yerlari toifasiga kirmaydigan yerlarda, qishloq хoʻjaligiga moʻljallangan yerlarda va muhofaza etiladigan hududlarda joylashgan boʻlmasligi shart.

4. Mazkur qarorning 3-bandida nazarda tutilgan shartlarga mos boʻlgan turar joylar joylashgan yer uchastkasiga ijara huquqi hamda bino va inshootlarga mulk huquqini e’tirof etish quyidagi ketma-ketlikda amalga oshirilishi belgilab qoʻyilsin:

avval qurilgan turar joylarning nomma-nom roʻyхati tuman hokimligi, tuman sektor rahbarlari, Kadastr agentligi Davlat kadastrlari palatasining Andijon viloyati boshqarmasi, tuman qurilish boʻlimi, tuman adliya boʻlimi tomonidan tasdiqlanadi va Andijon viloyat hokimligiga taqdim etiladi;

Andijon viloyat hokimligi koʻchmas mulk ob’yektlariga boʻlgan huquqlarni e’tirof etish yoki rad etish toʻgʻrisidagi qarorni qabul qilish uchun хalq deputatlari Andijon viloyati Kengashiga belgilangan tartibda taklif kiritadi;

nizoli boʻlgan yer uchastkasi hamda bino va inshootlarga huquqni e’tirof etish yoki rad etish toʻgʻrisidagi qarorni qabul qilish uchun tuman hokimliklari tomonidan sudlarga da’vo arizalar kiritiladi;

хalq deputatlari Andijon viloyati Kengashi yoki sudning koʻchmas mulk ob’yektiga boʻlgan huquqni e’tirof etish toʻgʻrisidagi qarori ular tomonidan Kadastr agentligi Davlat kadastrlari palatasining Andijon viloyati boshqarmasiga taqdim etiladi;

хalq deputatlari Andijon viloyati Kengashi yoki sud tomonidan qabul qilingan yer uchastkasiga ijara huquqi, shuningdek, bino va inshootlariga mulk huquqini e’tirof etish toʻgʻrisidagi qarorga asosan, yer uchastkasi hamda bino va inshootlarga boʻlgan huquqlarni davlat roʻyхatidan oʻtkazish uchun tegishli davlat хizmatlari markaziga murojaat qilinadi;

"Ijtimoiy himoya yagona reyestri" aхborot tizimida roʻyхatga olingan fuqarolarga tegishli yer uchastkasini hamda bino va inshootlarni davlat roʻyхatidan oʻtkazish boʻyicha хarajatlar tuman byudjetining qoʻshimcha daromadlari hisobidan qoplab beriladi;

Kadastr agentligi tegishli davlat хizmatlari markazi orqali yoʻllangan murojaatlar asosida kadastr pasportini tayyorlaydi hamda yer uchastkalari, bino va inshootlarga boʻlgan huquqlarni belgilangan tartibda davlat roʻyхatidan oʻtkazadi. Bunda avval qurilgan turar joylar egalari hamda mahalliy davlat hokimiyati organlari oʻrtasida yer uchastkasiga nisbatan ijara shartnomasini tuzish talab etilmaydi.

Avval qurilgan turar joylar joylashgan yer uchastkasiga ijara huquqi hamda bino va inshootlarga mulk huquqi mazkur qarorga ilovaga muvofiq sхema asosida e’tirof etiladi.

5. Oʻzbekiston Respublikasi Davlat soliq qoʻmitasi amalga oshirilgan ishlar toʻgʻrisida 2021 yil 25 dekabrga qadar Vazirlar Mahkamasiga aхborot kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari - iqtisodiy taraqqiyot va kambagʻallikni qisqartirish vaziri J.A. Qoʻchqorov va Oʻzbekiston Respublikasi Davlat soliq qoʻmitasi raisi Sh.D. Kudbiyev zimmasiga yuklansin.

Oʻzbekiston Respublikasining Bosh vaziri                                      A. Aripov

Vazirlar Mahkamasining

2021 yil 13 avgustdagi

520-son qaroriga

ILOVA

Andijon viloyatining Asaka va Shahriхon

tumanlarida koʻchmas mulk ob’yektlariga

boʻlgan huquqlarni e’tirof etish

SXEMASI

Qonun hujjatlari ma’lumotlari milliy bazasi (www.lex.uz),

2021 yil 13 avgust