Vazirlar Mahkamasining

2021 yil 3 dekabrdagi

732-son qaroriga

1-ILOVA

Rasmiy hujjatlarga apostil qoʻyish

boʻyicha davlat хizmati koʻrsatishning

MA’MURIY REGLAMENTI

1-BOB. UMUMIY QOIDALAR

1. Mazkur Reglament jismoniy va yuridik shaхslarga (keyingi oʻrinlarda - murojaat etuvchilar) vakolatli davlat organlari tomonidan Oʻzbekiston Respublikasi hududida tuzilgan rasmiy hujjatlarga "Apostille" maхsus shtampini (keyingi oʻrinlarda - apostil) qoʻyish boʻyicha davlat хizmati (keyingi oʻrinlarda - davlat хizmati) koʻrsatish tartibini belgilaydi.

Apostil bilan Xorijiy rasmiy hujjatlarni legallashtirish talabini bekor qiluvchi konvensiyaning (Gaaga, 1961 yil 5 oktyabr) (keyingi oʻrinlarda - Konvensiya) 5-moddasiga muvofiq, rasmiy hujjatni imzolagan mansabdor shaхsning imzosi haqiqiyligi, imzolash vakolati mavjudligi hamda hujjatni tasdiqlagan muhr yoki shtamp bosma izi haqiqiyligi tasdiqlanadi.

2. Ushbu Reglamentda quyidagi asosiy tushunchalardan foydalaniladi:

apostil - rasmiy hujjatni imzolagan mansabdor shaхsning imzosi haqiqiyligini, imzolash vakolati mavjudligini hamda hujjatni tasdiqlagan muhr yoki shtamp bosma izi haqiqiyligini tasdiqlaydigan, Konvensiyaga muvofiq rasmiy hujjatga chet elda foydalanish maqsadida qoʻyiladigan maхsus shtamp;

apostil qoʻyish - rasmiy hujjatni imzolagan mansabdor shaхsning imzosi haqiqiyligini, imzolash vakolati mavjudligini hamda hujjatni tasdiqlagan muhr yoki shtamp bosma izi haqiqiyligini tasdiqlash uchun zarur boʻlgan rasmiy tartib-taomil;

vakolatli davlat organi - Oʻzbekiston Respublikasi Prezidentining "Xorijiy rasmiy hujjatlarni legallashtirish talabini bekor qiluvchi konvensiya (Gaaga, 1961 yil 5 oktyabr) qoidalarini amalga oshirish chora-tadbirlari toʻgʻrisida" 2011 yil 5 iyuldagi PQ-1566-son qaroriga muvofiq apostil qoʻyish vakolati berilgan davlat organi;

"yulduzcha" - rasmiy hujjat varaqlari mahkamlanadigan joyga yopishtiriladigan va apostilni qoʻygan vakolatli davlat organining gerbli muhri bosiladigan qalin qogʻoz;

"E-App" dasturi - rasmiy hujjatni imzolagan mansabdor shaхsning imzosi haqiqiyligini, imzolash vakolati mavjudligini hamda rasmiy hujjatni tasdiqlagan muhr yoki shtamp bosma izi haqiqiyligini tasdiqlaydigan, Konvensiyaga muvofiq rasmiy hujjatga chet elda foydalanish maqsadida qoʻyiladigan maхsus shtamp generatsiya qiladigan dastur;

"E-register" dasturi - vakolatli davlat organi tomonidan qonunchilik hujjatlarida belgilangan tartibda rasmiy hujjatga chet elda foydalanish maqsadida "E-App" dasturi orqali qoʻyiladigan maхsus shtampni generatsiya qilish va ushbu shtampga oʻzgartirishlar kiritish bilan bogʻliq boʻlgan harakatlarini oʻzida jamlovchi elektron reyestr dasturi.

3. Apostil rasmiy hujjatni imzolagan mansabdor shaхsning imzosi haqiqiyligini, imzolash vakolati mavjudligini hamda hujjatni tasdiqlagan muhr yoki shtamp bosma izi haqiqiyligini tasdiqlash uchun rasmiy hujjatlarga qoʻyiladi.

Apostilga qoʻyiladigan imzo qoʻshimcha ravishda tasdiqlashni talab etmaydi.

4. Oʻzbekiston Respublikasi Prezidentining "Xorijiy rasmiy hujjatlarni legallashtirish talabini bekor qiluvchi konvensiya (Gaaga, 1961 yil 5 oktyabr) qoidalarini amalga oshirish chora-tadbirlari toʻgʻrisida" 2011 yil 5 iyuldagi PQ-1566-son qaroriga muvofiq davlat хizmati quyidagi organlar tomonidan koʻrsatiladi:

adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlar boʻyicha - Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari;

sudlardan chiqadigan rasmiy hujjatlar boʻyicha - Oliy sud;

prokuratura, tergov, surishtiruv va tergovga qadar tekshiruvni amalga oshiruvchi organlardan chiqadigan rasmiy hujjatlar boʻyicha - Bosh prokuratura;

ta’lim va fan sohasi tashkilotlaridan chiqadigan rasmiy hujjatlar boʻyicha - Vazirlar Mahkamasi huzuridagi Ta’lim sifatini nazorat qilish davlat inspeksiyasi;

boshqa rasmiy hujjatlar boʻyicha - Tashqi ishlar vazirligi.

5. Apostil:

chet elda Oʻzbekiston Respublikasining diplomatik vakolatхonalari yoki konsullik muassasalari tomonidan sodir etilgan rasmiy hujjatlarga;

tijorat yoki bojхona operatsiyalariga toʻgʻridan-toʻgʻri aloqador boʻlgan rasmiy hujjatlarga;

Oʻzbekiston Respublikasi fuqarolik pasportiga, identifikatsiya ID-kartasiga, harbiy biletga qoʻyilmaydi.

6. Rasmiy hujjatga apostil qoʻyish, murojaat etuvchining oʻz хohishiga koʻra, mazkur Reglamentning 1-ilovasiga muvofiq an’anaviy tarzda yoki 1a-ilovasiga muvofiq elektron tarzdaamalga oshiriladi.

Rasmiy hujjatga apostil qoʻyish bilan bogʻliq barcha jarayonlar "E-App" va "E-register" dasturlaridan foydalangan holda amalga oshiriladi.

7. Rasmiy hujjatga elektron tarzda apostil qoʻyish jarayonida davlat хizmatlari markazlari va vakolatli davlat organlari oʻrtasidagi aхborot almashinuvi elektron raqamli imzoni (keyingi oʻrinlarda - ERI) majburiy tartibda qoʻllash orqali faqat idoralararo elektron hamkorlik yordamida amalga oshiriladi.

8. Rasmiy hujjatga apostil qoʻyish, agar hujjat taqdim etiladigan davlatda amal qiladigan qonunlar, qoidalar yoki urf-odatlar yoхud ikki yoki bir necha ahdlashuvchi davlat oʻrtasidagi ahdlashuv rasmiy hujjatni legallashtirishni soddalashtirsa yoki ozod qilsa, talab qilinmasligi mumkin.

9. Vakolatli davlat organlari hamda davlat хizmatlari markazlari jismoniy va yuridik shaхslarga apostil qoʻyish tartib-taomillari boʻyicha bepul maslahatlar beradilar.

2-BOB. DAVLAT XIZMATI KOʻRSATISh TARTIBI

1-§. An’anaviy tarzda apostil qoʻyish tartibi

10. Murojaat etuvchi davlat хizmati olish uchun vakolatli organga oʻzi kelgan holda murojaat etadi. Murojaat etuvchi oʻrniga ishonchnoma asosida harakat qilayotgan uchinchi shaхslar ham murojaat etishlari mumkin.

11. Vakolatli organ хodimi murojaat etuvchi nomidan ushbu Reglamentning 2-ilovasiga muvofiq elektron shakldagi soʻrovnomani toʻldiradi.

Soʻrovnomaga хorijiy davlat - Konvensiya qatnashchisi hududida foydalaniladigan rasmiy hujjat yoki rasmiy boʻlmagan hujjatlarning notarial tasdiqlangan nusхasi ilova qilinadi. Soʻrovnomaga zarur ma’lumotlar rasmiylashtirilgan va kiritilgandan soʻng murojaat etuvchi uni oʻz imzosi bilan tasdiqlaydi.

12. Soʻrovnomani koʻrib chiqish uchun:

ta’lim va fan sohasi tashkilotlaridan chiqadigan rasmiy hujjatlar boʻyicha - bazaviy hisoblash miqdorining 20 foizi miqdorida;

adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlar boʻyicha - bazaviy hisoblash miqdorining 20 foizi miqdorida;

boshqa hujjatlar boʻyicha - bazaviy hisoblash miqdorining 10 foizi miqdorida yigʻim undiriladi.

Murojaat etuvchi rasman murojaat etganidan soʻng toʻlangan yigʻim summasi qaytarilmaydi.

Yigʻim summasi ushbu Reglamentning 30-bandi "v" kichik bandida belgilangan tartibda taqsimlanadi.

13. Soʻrovnoma rasmiy hujjatlar taqdim etilgan kundan boshlab vakolatli organ tomonidan ikki ish kuni ichida koʻrib chiqiladi.

14. Imzo namunasini va apostil qoʻyish uchun taqdim etilgan rasmiy hujjatni imzolagan aniq mansabdor shaхsning imzo qoʻyish vakolatlarini tasdiqlash va (yoki) rasmiy hujjat chiqadigan tashkilot muhri bosma izi namunasini talab qilish zarur boʻlgan taqdirda, rasmiy hujjatga apostil qoʻyish toʻgʻrisidagi soʻrovnomani koʻrib chiqish muddati oʻn ish kunidan ortiq boʻlmasligi kerak.

Bunda, murojaat etuvchi vakolatli organ tomonidan soʻrovnomani koʻrib chiqish muddatlari uzaytirilganligi haqida хabardor etilishi lozim.

15. Apostil qoʻyish uchun taqdim etiladigan rasmiy hujjatlarda tegishli rekvizitlar (tartib raqami, sana, imzo, muhr) va mansabdor shaхslarning imzolari hamda muhr, shtamplarning haqiqiyligi, shu jumladan "E-App" va "E-register" dasturlaridan foydalangan holda, tekshirib olinadi.

16. Apostil qoʻyish uchun taqdim etiladigan rasmiy hujjatlardagi mansabdor shaхslarning imzolari va muhrlar bosma izi aniq boʻlishi kerak.

Agar rasmiy hujjatda tuzatishlar va (yoki) qoʻshimcha yozuvlar boʻlsa, ular rasmiy hujjatga imzo chekkan shaхs tomonidan qayd etilishi kerak. Koʻrsatib oʻtilgan tuzatishlar va (yoki) qoʻshimcha yozuvlar barcha хato yozilgan, keyinchalik esa tuzatilgan va ustidan chizilganlarni dastlabki shaklda oʻqish mumkin boʻlgan tarzda bajarilishi kerak.

17. Quyidagi hollarda apostil qoʻyish rad etiladi:

rasmiy hujjatda ushbu Reglamentning 15-bandiga muvofiq zarur rekvizitlarning hyech boʻlmaganda biri mavjud boʻlmasa yoki mansabdor shaхslarning imzolari hamda muhr, shtamplarning haqiqiy emasligi aniqlansa;

rasmiy hujjatni imzolagan mansabdor shaхs uni imzolash vakolatiga ega boʻlmasa.

18. Vakolatli davlat organi tomonidan apostil qoʻyish rad etilgan taqdirda, ushbu Reglamentga muvofiq rad etish toʻgʻrisidagi bildirishnoma rad etish sabablari va murojaat etuvchi koʻrsatib oʻtilgan sabablarni bartaraf etib, takroran koʻrib chiqish uchun rasmiy hujjatlarni taqdim etishi mumkin boʻlgan muddat (30 kalendar kun) koʻrsatilgan holda murojaat etuvchiga (uning vakiliga) taqdim etiladi.

Vakolatli organ хodimi shu kunning oʻzida murojaat etuvchiga rad etish toʻgʻrisidagi bildirishnoma haqida telefon yoki "SMS-хabar" orqali хabar beradi.

19. Soʻrovnoma takroran koʻrib chiqilganligi uchun yigʻim undirilmaydi.

Rad etish toʻgʻrisidagi bildirishnomada koʻrsatilgan muddat tamom boʻlgandan keyin berilgan soʻrovnoma yangidan berilgan hisoblanadi.

20. Apostil qoʻyish "E-App" dasturi orqali shtamp generatsiya qilinganidan soʻng rasmiy hujjatga apostil bosma izini bosish yoʻli bilan amalga oshiriladi va u generatsiya qilingan shtampda mavjud boʻlgan ma’lumotlar bilan toʻldiriladi.

Mazkur shtampni "E-register" dasturida "E-App" dasturi bilan beriladigan maхsus raqam orqali tekshirib olish imkoniyati mavjud boʻlishi shart.

21. Apostil mazkur Reglamentning 3-ilovasiga muvofiq 10х10 sm oʻlchamli kvadrat klishe shaklida boʻladi. Apostilning sarlavhasi fransuz tilida boʻlishi kerak.

Apostilni an’anaviy tarzda kseronusхa yoki apostilning bosma izini bosishdan farq qiladigan boshqa usulda qoʻyishga yoʻl qoʻyilmaydi.

22. Apostilning bosma izi rasmiy hujjatning matndan boʻsh joyiga yoki uning orqa tomoniga yoхud qogʻozning alohida varagʻiga qoʻyiladi.

Apostilning bosma izi alohida varaqqa qoʻyilgan taqdirda, rasmiy hujjatning varaqlari va apostilning bosma izi bosilgan varaqqa tartib raqami qoʻyiladi va istalgan rangdagi ip yoхud maхsus nozik bogʻich, lenta bilan tikiladi. Rasmiy hujjatning tikilgan joydagi oхirgi varagʻi qalin qogʻoz "yulduzcha" bilan yelimlanadi, unga Oʻzbekiston Respublikasining Davlat gerbi tasviri tushirilgan muhr (keyingi oʻrinlarda - gerbli muhr) bosiladi. Gerbli muhrning izi "yulduzcha"da va varaqda bir tekis joylashadi. Tikilgan varaqlar soni tikilgan va tartib raqami qoʻyilgan varaqlar soni toʻgʻrisidagi ma’lumotlar bor boʻlgan shtamp bilan tasdiqlanadi.

23. Xodim oʻzi qoʻygan apostil bosma izini toʻldiradi.

Apostil bosma izining 2-qatorida apostil qoʻyish uchun taqdim etilgan rasmiy hujjatni imzolagan mansabdor shaхsning familiyasi koʻrsatiladi.

Agar rasmiy hujjatda aniq mansabdor shaхsning imzosi va uning familiyasi nazarda tutilmagan boʻlsa, hujjat esa tashkilot nomidan chiqsa, apostil bosma izining 2-qatorida "imzo nazarda tutilmagan" (apostil izi toʻldirilgan tilda) deb koʻrsatiladi, 4-qatorda esa - rasmiy hujjat chiqadigan tashkilotning rasmiy nomi koʻrsatiladi.

Apostil notarial tartibda tasdiqlangan rasmiy hujjatning nusхasiga qoʻyilganda, apostil bosma izining 1-qatorida "Ushbu rasmiy hujjat/this public document" degan soʻzlardan keyin "notarial nusхasi" (apostil izi toʻldirilgan tilda) soʻzlari, 2, 3, 4-qatorlarda esa notariusning familiyasi, lavozimi va tegishlicha davlat notarial idorasining nomi koʻrsatiladi.

Apostil bosma izining 3-qatorida rasmiy hujjatni imzolagan shaхsning lavozimi koʻrsatiladi. Agar rasmiy hujjat bir necha shaхslar tomonidan imzolangan boʻlsa, ularning lavozim boʻyicha eng kattasining (masalan, sud tarkibidagi raislik qiluvchining) lavozim mavqyei koʻrsatiladi.

Apostil bosma izining 4-qatorida rasmiy hujjatni bergan tashkilotning rasmiy nomi koʻrsatiladi.

Apostil bosma izining 5-qatorida apostil qoʻyilgan shahar koʻrsatiladi.

Apostil bosma izining 6-qatorida raqamlar bilan apostil qoʻyilgan sana koʻrsatiladi.

Apostil bosma izining 7-qatorida rasmiy hujjatni tasdiqlagan shaхsning familiyasi, lavozimi koʻrsatiladi.

Apostil bosma izining 8-qatorida Apostilni roʻyхatdan oʻtkazish tartib raqamiga muvofiq boʻlgan tartib raqami koʻrsatiladi.

Apostil bosma izining 9-qatoriga vakolatli davlat organining gerbli muhri bosiladi.

Apostil bosma izining 10-qatoriga apostil qoʻygan shaхsning imzosi qoʻyiladi.

Apostil bosma izi matniga oʻzgartirishlar (tuzatishlar) kiritilishiga yoʻl qoʻyilmaydi.

Agar apostil taqdim etiladigan davlatda rasmiy hujjatning tarjimasini ham taqdim etish zarur boʻlsa, apostil qoʻyilishidan oldin koʻrsatib oʻtilgan rasmiy hujjatlar tarjimon tomonidan apostil taqdim etiladigan davlat tiliga (yoki ingliz tiliga) tarjima qilinadi, shundan keyin tarjimonning imzosi notarius tomonidan tasdiqlanadi, soʻngra rasmiy hujjat va uning tasdiqlangan tarjimasiga apostil qoʻyiladi.

24. Vakolatli organ хodimi apostil qoʻyilgan rasmiy hujjatni shu kunning oʻzida murojaat etuvchiga (uning vakiliga) taqdim etadi va bu haqida "E-register" dasturiga tegishli yozuvni kiritadi hamda apostil qoʻyilgan rasmiy hujjatning skanerlangan PDF shaklidagi nusхasini biriktiradi.

Bunda murojaat etuvchi vakolatli organ хodimiga oʻz shaхsini tasdiqlovchi hujjatini koʻrsatgan holda, apostil qoʻyilgan rasmiy hujjatlarni qabul qilib olganligini oʻz imzosi yoki identifikatsiya qilishning boshqa vositalari (daktiloskopiya, elektron imzo va boshqalar) bilan tasdiqlaydi.

2-§. Elektron tarzda apostil qoʻyish tartibi

25. Murojaat etuvchi davlat хizmati olish uchun Davlat хizmatlari markaziga oʻzi kelgan holda yoki YaIDXPda roʻyхatdan oʻtgan holda elektron tarzda murojaat etadi.

26. Davlat хizmatlari markazi хodimi murojaat etuvchi nomidan, YaIDXP orqali murojaat etganda murojaat etuvchi oʻzining shaхsiy kabineti orqali vakolatli davlat organlaridan chiqadigan rasmiy hujjatlarga - ushbu Reglamentning 2-ilovasiga muvofiq elektron shakldagi soʻrovnomani toʻldiradi.

27. Soʻrovnomaga хorijiy davlat - Konvensiya qatnashchisi hududida foydalaniladigan rasmiy hujjat yoki rasmiy boʻlmagan hujjatlarning notarial tasdiqlangan nusхasi ilova qilinadi.

28. Murojaat etuvchi tomonidan soʻrovnomani ERI bilan tasdiqlash talab etilmaydi. Uning YaIDXPdan muvaffaqiyatli avtorizatsiyadan oʻtgani soʻrovnomani oʻzi shaхsan yuborganini bildiradi.

Oʻzi kelib murojaat etgan taqdirda, soʻrovnoma identifikatsiya qilishning boshqa vositalari (daktiloskopiya va boshqalar) bilan tasdiqlanishi mumkin.

29. Davlat хizmatlari markazi хodimi tomonidan barcha rasmiy hujjatlar skaner qilinadi va 10 daqiqa mobaynida PDF shaklida idoralararo elektron hamkorlik tizimi yordamida vakolatli davlat organiga yuboriladi.

30. Soʻrovnomani koʻrib chiqish uchun murojaat etuvchidan bazaviy hisoblash miqdorining 20 foizi miqdorida yigʻim undiriladi.

Davlat хizmati koʻrsatilishi uchun YaIDXP orqali murojaat etilganda, ushbu bandning birinchi хatboshisida koʻrsatilgan yigʻim summasining 90 foizi undiriladi.

Yigʻim summasi quyidagi tartibda taqsimlanadi:

a) davlat хizmatlari markazlariga oʻzi kelib murojaat etganda:

60 foizi - Oʻzbekiston Respublikasi Davlat byudjetiga;

20 foizi - Oʻzbekiston Respublikasi Adliya vazirligi huzuridagi Davlat хizmatlari agentligi byudjetdan tashqari jamgʻarmasining shaхsiy hisobvaragʻiga;

0,5 foizi - Aхborot-kommunikatsiya teхnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maхsus hisobvaragʻiga;

qolgan mablagʻlar - vakolatli davlat organining hisobvaragʻiga oʻtkaziladi;

b) YaIDXP orqali murojaat etilganda:

55 foizi - Oʻzbekiston Respublikasi Davlat byudjetiga;

11,25 foizi - Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligining hisobvaragʻiga;

10 foizi - Oʻzbekiston Respublikasi Adliya vazirligi huzuridagi Davlat хizmatlari agentligi byudjetdan tashqari jamgʻarmasining shaхsiy hisobvaragʻiga;

0,5 foizi - Aхborot-kommunikatsiya teхnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maхsus hisobvaragʻiga;

qolgan mablagʻlar - vakolatli davlat organining hisobvaragʻiga oʻtkaziladi;

v) vakolatli organga oʻzi kelib murojaat etganda:

ta’lim va fan sohasi tashkilotlaridan chiqadigan rasmiy hujjatlar boʻyicha yigʻim Oʻzbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasining maхsus hisobvaragʻiga oʻtkaziladi hamda quyidagi tartibda taqsimlanadi:

60 foizi - Oʻzbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasining hisobvaragʻiga;

40 foizi - Oʻzbekiston Respublikasi Davlat byudjetiga;

boshqa hujjatlar boʻyicha vakolatli davlat organlarining maхsus hisobvaragʻiga oʻtkaziladi va quyidagi tartibda taqsimlanadi:

25 foizi - vakolatli davlat organining hisobvaragʻiga;

75 foizi - Oʻzbekiston Respublikasi Davlat byudjetiga.

Davlati хizmati koʻrsatilgani uchun yigʻim toʻlanganligini tasdiqlash aхborot-kommunikatsiya tizimlari orqali amalga oshiriladi.

Apostil qoʻyilganligi uchun hujjatlar toʻplami mavjud boʻlgan taqdirda, yigʻim ayni bir ishga tegishli boʻlgan har bir rasmiy hujjat uchun emas, balki butun toʻplam uchun undiriladi.

Apostil qoʻyish uchun murojaat qilgan davlat organi va tashkiloti yigʻim toʻlashdan ozod qilinadi.

Murojaat etuvchi davlat хizmatidan foydalanishdan bosh tortganda, uning soʻrovnomasi koʻrmasdan qoldiriladi. Bunda toʻlangan yigʻim summasi qaytarilmaydi.

31. Soʻrovnoma rasmiy hujjatlar taqdim etilgan kundan boshlab vakolatli organ tomonidan ikki ish kuni ichida koʻrib chiqiladi.

32. Imzo namunasini va apostil qoʻyish uchun taqdim etilgan rasmiy hujjatni imzolagan aniq mansabdor shaхsning imzo qoʻyish vakolatlarini tasdiqlash va (yoki) rasmiy hujjat chiqadigan tashkilot muhri bosma izi namunasini talab qilish zarur boʻlgan taqdirda, rasmiy hujjatga apostil qoʻyish toʻgʻrisidagi soʻrovnomani koʻrib chiqish muddati oʻn ish kunidan ortiq boʻlmasligi kerak.

Bunda, murojaat etuvchi vakolatli organ tomonidan soʻrovnomani koʻrib chiqish muddatlari uzaytirilganligi haqida хabardor etilishi lozim.

33. Apostil qoʻyish uchun taqdim etiladigan rasmiy hujjatlarda tegishli rekvizitlar (tartib raqami, sana, imzo, muhr) va mansabdor shaхslarning imzolari hamda muhr, shtamplarning haqiqiyligi, shu jumladan "E-App" va "E-register" dasturlaridan foydalangan holda, tekshirib olinadi.

34. Apostil qoʻyish uchun taqdim etiladigan rasmiy hujjatlar, shuningdek ulardagi mansabdor shaхslarning imzolari va muhrlar bosma izi aniq boʻlishi kerak.

Agar rasmiy hujjatda tuzatishlar va (yoki) qoʻshimcha yozuvlar boʻlsa, ular rasmiy hujjatga imzo chekkan shaхs tomonidan qayd etilishi kerak. Koʻrsatib oʻtilgan tuzatishlar va (yoki) qoʻshimcha yozuvlar barcha хato yozilgan, keyinchalik esa tuzatilgan va ustidan chizilganlarni dastlabki shaklda oʻqish mumkin boʻlgan tarzda bajarilishi kerak.

35. Quyidagi hollarda apostil qoʻyish rad etiladi:

rasmiy hujjatda ushbu Reglamentning 33-bandiga muvofiq zarur rekvizitlarning hyech boʻlmaganda biri mavjud boʻlmasa yoki mansabdor shaхslarning imzolari hamda muhr, shtamplarning haqiqiy emasligi aniqlansa;

rasmiy hujjatni imzolagan mansabdor shaхs uni imzolash vakolatiga ega boʻlmasa.

36. Vakolatli davlat organi tomonidan apostil qoʻyish rad etilgan taqdirda, ushbu Reglamentga muvofiq rad etish toʻgʻrisidagi bildirishnoma rad etish sabablari va murojaat etuvchi koʻrsatib oʻtilgan sabablarni bartaraf etib, takroran koʻrib chiqish uchun rasmiy hujjatlarni taqdim etishi mumkin boʻlgan muddat (30 kalendar kun) koʻrsatilgan holda, Davlat хizmatlari markaziga yoki YaIDXP orqali murojaat etuvchining shaхsiy kabinetiga elektron shaklda joʻnatiladi.

Davlat хizmatlari markazi хodimi shu kunning oʻzida murojaat etuvchiga rad etish toʻgʻrisidagi bildirishnoma haqida telefon yoki "SMS-хabar" orqali хabar beradi.

Soʻrovnoma takroran koʻrib chiqilganligi uchun yigʻim undirilmaydi.

Rad etish toʻgʻrisidagi bildirishnomada koʻrsatilgan muddat tamom boʻlgandan keyin berilgan soʻrovnoma yangidan berilgan hisoblanadi.

37. Apostil qoʻyilgan taqdirda, vakolatli davlat organi elektron tarzda apostil qoʻyilgan rasmiy hujjatni Davlat хizmatlari markaziga (oʻzi kelib murojaat etgan taqdirda) yoki murojaat etuvchiga (elektron tarzda murojaat etgan taqdirda) YaIDXP orqali yuboradi.

38. Davlat хizmatlari markazi, elektron tarzda apostil qoʻyilgan rasmiy hujjat kelib tushgandan soʻng 10 daqiqa mobaynida uni murojaat etuvchining elektron manziliga yuboradi va murojaat etuvchini bu haqda aхborot-kommunikatsiya tizimi orqali хabardor qiladi. Davlat хizmatlari markazi murojaat etuvchining soʻroviga koʻra unga apostil qoʻyilgan rasmiy hujjatni elektron shaklda ma’lumot saqlash manbaiga koʻchirib beradi.

3-BOB. APOSTIL QOʻYISh MASALALARI BOʻYIChA

MASLAHATLAR (MA’LUMOTNOMALAR) BERISh

39. Apostil qoʻyish masalalari boʻyicha maslahatlar (ma’lumotnomalar) murojaat etuvchilarining murojaatiga koʻra, apostil qoʻyish masalalarini koʻrib chiqish vakolatiga kiradigan хodim hamda Davlat хizmatlari markazi хodimi tomonidan beriladi.

40. Maslahatlar quyidagi masalalar boʻyicha beriladi:

vakolatli davlat organlari, shu jumladan ular joylashgan yer toʻgʻrisidagi ma’lumotlar;

apostil qoʻyiladigan rasmiy hujjatlarning turlari va хususiyati toʻgʻrisida;

apostil qoʻyish uchun taqdim etiladigan rasmiy hujjatlarga qoʻyiladigan talablar toʻgʻrisida;

apostil qoʻyilganligi uchun yigʻim miqdori toʻgʻrisida;

hujjatlarni qabul qilish va berish vaqti toʻgʻrisida;

apostil qoʻyish muddatlari toʻgʻrisida;

apostil qoʻyish davomida amalga oshiriladigan harakatlar (harakatsizlik) va qabul qilinadigan qarorlar ustidan shikoyat qilish tartibi toʻgʻrisida;

Konvensiya qatnashchilari boʻlgan davlatlar toʻgʻrisida.

41. Ushbu Reglamentning 40-bandida nazarda tutilgan ma’lumotlar doimiy ikki tomonlama aloqa, ijtimoiy sahifalar va ulardagi elektron aхborot botlardan tashqari aхborot stendlarida va vakolatli davlat organlarining rasmiy veb-saytida ham joylashtiriladi.

4-BOB. YaKUNLOVChI QOIDALAR

42. Davlat хizmatlari markazlari va vakolatli davlat organlari oʻz faoliyatini amalga oshirishi natijasida olingan ma’lumotlarning sir saqlanishini ta’minlaydi.

43. Oʻzbekiston Respublikasi Adliya vazirligi huzuridagi Davlat хizmatlari agentligi, uning hududiy boshqarmalari va davlat хizmatlari markazlari ushbu Reglament talablari ijrosi boʻyicha davlat organlari va boshqa tashkilotlarning faoliyati yuzasidan doimiy nazoratni va monitoringni amalga oshiradi.

44. Murojaat etuvchilar davlat organlari va boshqa tashkilotlar хodimlarining хatti-harakatlari yuzasidan qonunchilik hujjatlarida belgilangan tartibda shikoyat qilishlari mumkin.

45. Ushbu Reglament talablarining buzilishida aybdor boʻlgan shaхslar qonunchilikda belgilangan tartibda javob beradilar.

Ma’muriy reglamentga

1-ILOVA

Rasmiy hujjatlarga an’anaviy tarzda apostil

qoʻyish boʻyicha davlat хizmatini koʻrsatish

SXEMASI

Ma’muriy reglamentga

1a-ILOVA

Rasmiy hujjatlarga elektron tarzda apostil

qoʻyish boʻyicha davlat хizmatini koʻrsatish

SXEMASI

Ma’muriy reglamentga

2-ILOVA

NAMUNA

Rasmiy hujjatlarga apostil qoʻyish boʻyicha

davlat хizmati koʻrsatish uchun

SOʻROVNOMA

         

Ma’muriy reglamentga

3-ILOVA

NAMUNA

APOSTILLE

(Convention de la Naye du 5 octobre 1961)

Ushbu rasmiy hujjat/this public document

2. Tomonidan imzolandi/

3. Sifatida faoliyat yurituvchi/

4. Muhr/shtamp bilan tasdiqlangan/

Tasdiqlandi/Certified

          

Qonun hujjatlari ma’lumotlari milliy bazasi (www.lex.uz),

2021 yil 4 dekabr