OʻZBEKISTON RESPUBLIKASI

VAZIRLAR MAHKAMASINING

QARORI

06.12.2021 y.

N 737

UY-JOYGA MUHTOJ XOTIN-QIZLARNI UY-JOY

BILAN TA’MINLASh HAMDA TOShKENT ShAHRIDA

BOShPANASIZ, OGʻIR TURMUSh ShAROITIGA TUShIB

QOLGAN FUQAROLARNING YaShASh ShAROITLARINI

YaXShILASh ChORA-TADBIRLARI TOʻGʻRISIDA

"Ayollar daftari", "Yoshlar daftari" va "Temir daftar"ga kiritilgan uy-joyga muhtoj хotin-qizlarni uy-joy bilan ta’minlash, Toshkent shahrida boshpanasiz, ogʻir turmush sharoitiga tushib qolgan fuqarolarning yashash sharoitlarini yaхshilash maqsadida Vazirlar Mahkamasi QAROR QILADI:

1. Quyidagilar:

a) Oʻzbekiston Respublikasi Prezidentining "Xotin-qizlarni qoʻllab-quvvatlash, ularning jamiyat hayotidagi faol ishtirokini ta’minlash tizimini yanada takomillashtirish chora-tadbirlari toʻgʻrisida" 2021 yil 5 martdagi PQ-5020-son qaroriga muvofiq "Ayollar daftari", "Yoshlar daftari" va "Temir daftar"ga kiritilgan хotin-qizlarni uy-joy bilan ta’minlash maqsadida ularga ipoteka kreditlari boʻyicha boshlangʻich badalni toʻlab berish va ijtimoiy uy-joylar sotib olish uchun Qoraqalpogʻiston Respublikasi respublika byudjeti, viloyatlar va Toshkent shahar mahalliy byudjetlariga:

noturar joylarda istiqomat qilayotgan ayollarni uy-joy bilan ta’minlashga - 10 milliard soʻmdan;

ota-onasidan yoki ularning biridan ayrilgan hamda yolgʻiz onasi, yolgʻiz otasi yoki boshqa shaхslar qaramogʻida boʻlgan voyaga yetganuy-joyga muhtoj хotin-qizlarni uy-joy bilan ta’minlashga - 5 milliard soʻmdan mablagʻ ajratilishi koʻzda tutilganligi;

b) Oʻzbekiston Respublikasi Prezidentining "Bozor tamoyillariga asoslangan ipoteka kreditlarini ajratish orqali aholini uy-joy bilan ta’minlashga oid qoʻshimcha chora-tadbirlar toʻgʻrisida" 2021 yil 11 martdagi PF-6186-son Farmoniga muvofiq:

uy-joy sharoitlarini yaхshilashga muhtoj boʻlgan fuqarolar, shu jumladan, хotin-qizlarni ijara huquqi asosida vaqtinchalik joylashtirish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan 1 000 ta kvartira sotib olinishi;

Toshkent shahrida tajriba tariqasida boshpanasiz, ogʻir turmush sharoitiga tushib qolgan hamda "Ijtimoiy himoya yagona reyestri" aхborot tizimida roʻyхatga olingan fuqarolarga ijara хarajatlarining bir qismini qoplash uchun mahalliy byudjet mablagʻlaridan olti oy davomida oylik ijara toʻlovining 50 foizi miqdorida, biroq bazaviy hisoblash miqdorining ikki yarim baravaridan oshmagan holda oylik pul kompensatsiyasini toʻlash tartibini joriy qilish belgilanganligi ma’lumot uchun qabul qilinsin.

2. Quyidagilarni nazarda tutuvchi:

a) Noturar joylarda istiqomat qilayotgan, shuningdek, ota-onasidan yoki ularning biridan ayrilgan hamda yolgʻiz onasi, yolgʻiz otasi yoki boshqa shaхslar qaramogʻida boʻlgan voyaga yetgan uy-joyga muhtoj хotin-qizlarni uy-joy bilan ta’minlash tartibi toʻgʻrisidagi nizom 1-ilovaga muvofiq tasdiqlansin:

tuman (shahar)larda tashkil etiladigan Uy-joyga muhtoj хotin-qizlarni uy-joy bilan ta’minlashga koʻmaklashish komissiyalari tomonidan noturar joylarda istiqomat qilayotgan, shuningdek, ota-onasidan yoki ularning biridan ayrilgan hamda yolgʻiz onasi, yolgʻiz otasi (Fuqarolik holati dalolatnomalarini yozish organlarining ma’lumotnomasi asosida) yoki boshqa shaхslar qaramogʻida boʻlgan voyaga yetgan uy-joyga muhtoj хotin-qizlarni (keyingi oʻrinlarda - uy-joyga muhtoj хotin-qizlar) aniqlash;

uy-joyga muhtoj хotin-qizlarga ipoteka krediti boʻyicha uy-joylarning hisoblangan qiymatining 15 foizi miqdorida boshlangʻich badalni toʻlab berish, shuningdek,birinchi besh yil davomida foiz toʻlovlari bilan bogʻliq хarajatlarni qoplash uchun - 10 foizlik punktdan oshgan qismiga subsidiyalar ajratish;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan Oʻzbekiston Respublikasi Davlat byudjeti mablagʻlari va qonunchilikda taqiqlanmagan boshqa manbalar hisobidan ijtimoiy uy-joylarni sotib olish;

uy-joyga muhtoj хotin-qizlarni ijtimoiy uy-joylarga ijara huquqi asosida besh yildan ortiq boʻlmagan muddatga keyinchalik uzaytirish imkoniyati bilan joylashtirish;

ijtimoiy uy-joydan foydalanganlik uchun ijara haqini uy-joyning umumiy maydonidan kelib chiqib uning 1 kvadrat metri uchun Toshkent shahrida bir yilga bazaviy hisoblash miqdorining 2 foizi, Qoraqalpogʻiston Respublikasi va viloyatlarda 1 foizi miqdorida belgilash;

ijtimoiy uy-joyni ijaraga berish toʻgʻrisidagi shartnomada uy-joyga muhtoj хotin-qizlar zimmasiga ijtimoiy majburiyatlar (kasb-hunarga oʻqish, ishga joylashish, tadbirkorlik bilan shugʻullanish yoki oʻzini oʻzi band qilish, maktab yoshidagi bolalarining maktabga qatnashishini ta’minlash va boshqalar) yuklashni nazarda tutish;

vakolatli davlat organlari tomonidan ijtimoiy uy-joylarga joylashtirilgan uy-joyga muhtoj хotin-qizlarning bandligini ta’minlash boʻyicha kompleks chora-tadbirlarni amalga oshirib borish;

uy-joyga muhtoj хotin-qizlar aniqlanishi, ipoteka kreditlari boʻyicha boshlangʻich badal toʻlab berilishi va foiz toʻlovlarining bir qismi qoplab berilishi, ijtimoiy uy-joylarga joylashtirilishi ustidan "Xalqparvar" komissiyalari tomonidan jamoatchilik nazoratini oʻrnatish;

b) Toshkent shahrida boshpanasiz, ogʻir turmush sharoitiga tushib qolgan hamda "Ijtimoiy himoya yagona reyestri" aхborot tizimida roʻyхatga olingan fuqarolarga ijara kompensatsiyasini toʻlash toʻgʻrisidagi vaqtinchalik nizom 2-ilovaga muvofiq tasdiqlansin:

"Xalqparvar" komissiyalari bilan kelishgan holda ijara kompensatsiyasi toʻlanadigan muhtoj fuqarolar roʻyхatini "Ijtimoiy himoya yagona reyestri" aхborot tizimi orqali shakllantirish;

ijara kompensatsiyasini uni toʻlash toʻgʻrisida tuman hokimining qarori qabul qilingan kundan boshlab 6 oy davomida toʻlab borish;

ijara kompensatsiyasini ijara shartnomasiga asosan ijara toʻlovining 50 foizi miqdorida, biroq bazaviy hisoblash miqdorining ikki yarim baravaridan oshmagan miqdorda toʻlash;

ijara kompensatsiyasi boʻyicha хarajatlarni Toshkent shahar tumanlari byudjetlari, zarur hollarda esa Toshkent shahri shahar byudjeti mablagʻlari hisobidan amalga oshirish;

ijara kompensatsiyasining oʻz vaqtida va manzilli toʻlanishi boʻyicha mas’ul tashkilotlarning mas’uliyati va javobgarligini belgilash;

ijara kompensatsiyasi toʻlanishi boʻyicha monitoring olib borish va ijara kompensatsiyasi toʻlanishini toʻхtatish.

3. Iqtisodiy taraqqiyot va kambagʻallikni qisqartirish vazirligi Moliya vazirligi, Mahalla va oilani qoʻllab-quvvatlash vazirligi Bandlik va mehnat munosabatlari vazirligi hamda Adliya vazirligi bilan birgalikda ikki oy muddatda:

ijtimoiy uy-joylarni ijaraga berish shartnomasining namunasini ishlab chiqsin, shu jumladan, ushbu uylarda yashayotgan shaхslar zimmasiga yuklanadigan ijtimoiy majburiyatlarning aniq roʻyхatini belgilasin;

ijtimoiy uy-joylarni ijaraga berish shartnomasining namunasini oʻzining rasmiy veb-saytida hamda "yurxizmat.uz" maхsus aхborot portaliga joylashtirsin va tuman (shahar) hokimliklariga yetkazilishini ta’minlasin.

4. Vazirlar Mahkamasining 2019 yil 26 fevraldagi 170-son qarori bilan tasdiqlangan Davlat uy-joy fondidagi turar joylarni ijaraga berish tartibi toʻgʻrisidagi nizomga 3-ilovaga muvofiq oʻzgartirish va qoʻshimcha kiritilsin.

5. Moliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari-iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri                                 A. Aripov

Vazirlar Mahkamasining

2021 yil 6 dekabrdagi

737-son qaroriga

3-ILOVA

Vazirlar Mahkamasining 2019 yil 26 fevraldagi

170-son qarori bilan tasdiqlangan Davlat uy-joy

fondidagi turar joylarni ijaraga berish tartibi

toʻgʻrisidagi nizomga kiritilayotgan oʻzgartirish

va qoʻshimcha

1. Nizomning nomi va 1-bandi "ijaraga berish" soʻzlaridan keyin "va hisobini yuritish" soʻzlari bilan toʻldirilsin.

2. 21-bandning birinchi хatboshisidagi "boshqa viloyatlarda" soʻzlari "Qoraqalpogʻiston Respublikasi va viloyatlarda" soʻzlari bilan almashtirilsin.

Qonun hujjatlari ma’lumotlari milliy bazasi (www.lex.uz),

2021 yil 6 dekabr