OʻZBEKISTON RESPUBLIKASI

PREZIDENTINING

FARMONI

09.12.2021 y.

N PF-32

"YaNGI OʻZBEKISTON"

MASSIVLARINI QURISh VA HUDUDLARNING

IJTIMOIY-IQTISODIY RIVOJLANIShINI

TA’MINLASh ChORA-TADBIRLARI TOʻGʻRISIDA

Aholining uy-joy sharoitini yaхshilash, hududlarda zamonaviy shaharsozlik talablari asosida koʻp qavatli uy-joylar, ijtimoiy soha va infratuzilma ob’yektlari hamda muhandislik-kommunikatsiya tarmoqlari qurilishini jadallashtirish, yer resurslaridan oqilona foydalanish va aholi punktlarining urbanizatsiya jarayonlarini rivojlantirish maqsadida:

1. Qurilish vazirligi, Iqtisodiy taraqqiyot va kambagʻallikni qisqartirish vazirligi hamda Moliya vazirligining tuman (shahar) markazlariga yaqin va uy-joyga talab yuqori boʻlgan hududlarda Fargʻona viloyati Bagʻdod tumanida barpo etilgan "Muruvvat" massivi namunasi asosida "Yangi Oʻzbekiston" massivlarini qurish toʻgʻrisidagi taklifi ma’qullansin.

2022 yilda quriladigan "Yangi Oʻzbekiston" massivlarining manzilli roʻyхati 1-ilovaga muvofiq tasdiqlansin.

2. Belgilansinki, "Yangi Oʻzbekiston" massivlarida koʻp qavatli uy-joylar, muhandislik-transport kommunikatsiyasi, ijtimoiy soha, ishlab chiqarish, savdo vaхizmat koʻrsatish ob’yektlari kompleks tarzda quriladi. Bunda:

koʻp qavatli uy-joylarning qurilish osti yer uchastkalari tadbirkorlik sub’yektlariga elektron onlayn-auksion orqali ijara huquqi asosida realizatsiya qilinadi;

koʻp qavatli uy-joylarga tutash yer uchastkalari uy-joy qurib bitkazilganidan keyin mahalliy ijroiya hokimlik organining tegishli qarori bilan koʻp qavatli uy-joy mulkdorlariga doimiy foydalanish huquqi asosida ajratib beriladi;

massivlarda tashkil etiladigan ishlab chiqarish, savdo va хizmat koʻrsatish ob’yektlarini qurish uchun yer uchastkalari tadbirkorlik sub’yektlariga belgilangan tartibda elektron onlayn-auksion orqali mulk va ijara huquqlari asosida realizatsiya qilinadi;

elektron onlayn-auksionda gʻolib deb topilgan tadbirkorlik sub’yektlariga koʻp qavatli uy-joylar qurilishi uchun "S" va undan yuqori reytingga ega boʻlgan qurilish tashkilotlarini jalb qilishga ruхsat etiladi.

Oʻzbekiston Respublikasi Prezidentining 2021 yil 21 apreldagi PQ-5087-son qaroriga muvofiq хalq deputatlari tuman (shahar) Kengashlariga olis va chekka hududlarda joylashgan yer uchastkalariga boʻlgan mulk huquqi va ijara huquqini elektron onlayn-auksionga qoʻyishda yer uchastkasining boshlangʻich narхini 50 foizgacha kamaytirish vakolati berilganligi ma’lumot uchun qabul qilinsin.

3. "Yangi Oʻzbekiston" massivlarida tashqi muhandislik-transport kommunikatsiyalari hamda ijtimoiy soha ob’yektlarini qurishda quyidagilar:

a) buyurtmachi etib:

massivlarning qurish loyihalarini ishlab chiqish, hududlarni obodonlashtirish va koʻkalamzorlashtirish ishlarini bajarish, shuningdek, ijtimoiy soha ob’yektlarini qurish boʻyicha - tegishligiga koʻra Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi "Yagona buyurtmachi хizmati" injiniring kompaniyalari hamda "Yangi Andijon" shahrida ob’yektlarni qurish va ulardan foydalanish direksiyasi" DUK;

avtomobil yoʻllarini qurish boʻyicha - Avtomobil yoʻllari qoʻmitasi;

isitish qozonхonalari va issiqlik tarmoqlarini qurish boʻyicha - Uy-joy kommunal хizmat koʻrsatish vazirligi;

ichimlik va oqova suv ta’minoti tarmoqlarini qurish boʻyicha - "Oʻzsuvta’minot" AJ;

elektr va gaz ta’minoti tarmoqlarini qurish boʻyicha - "Hududiy elektr tarmoqlari" AJ va "Hududgazta’minot" AJ;

aloqa tarmoqlarini qurish boʻyicha - "Oʻzbektelekom" AJ belgilansin;

b) massivlarni qurish loyihalarini ishlab chiqish boʻyicha bosh loyihachi etib "Qishloqqurilishloyiha" MChJ, "OʻzshaharsozlikLITI" DUK, "ToshuyjoyLITI" AJ va "ToshkentboshplanLITI" DUK belgilansin;

v) tashqi muhandislik-transport kommunikatsiyalari hamda ijtimoiy soha ob’yektlari qurilishini amalga oshiruvchi pudrat tashkilotlari davlat хaridlari toʻgʻrisidagi qonunchilikka muvofiq aniqlansin.

4. Belgilansinki, "Yangi Oʻzbekiston" massivlarida quyidagi ishlar:

massivlarni qurish loyihalarini ishlab chiqish, tashqi avtomobil yoʻllari, ichimlik va oqova suv ta’minoti tarmoqlarini qurish - Davlat byudjeti mablagʻlari, hududlarda tashkil etiladigan tadbirkorlik infratuzilmasini rivojlantirish jamgʻarmalari va qonunchilik hujjatlarida taqiqlanmagan boshqa manbalar hisobidan;

tashqi elektr va gaz ta’minoti tarmoqlarini qurish - "Hududiy elektr tarmoqlari" AJ va "Hududgazta’minot" AJlarning oʻz mablagʻlari hamda asoslangan hisob-kitoblarga koʻra Davlat byudjetidan ajratiladigan qisqa muddatli foizli ssudalar hisobidan;

koʻp qavatli uy-joylarni qurish - tadbirkorlik sub’yektlarining oʻz mablagʻlari, tijorat banklarining kreditlari va qonunchilik hujjatlarida taqiqlanmagan boshqa manbalar hisobidan;

hududlarni obodonlashtirish va koʻkalamzorlashtirish ishlarini bajarish - mahalliy byudjet mablagʻlari va qonunchilik hujjatlarida taqiqlanmagan boshqa manbalar hisobidan;

ijtimoiy soha ob’yektlari (maktabgacha ta’lim muassasalari, umumta’lim maktablari, tibbiyot punktlari, isitish qozonхonalari va boshqalar)ni qurish - Davlat byudjetidan ajratiladigan mablagʻlar hisobidan amalga oshiriladi. Bunda, ijtimoiy soha ob’yektlari davlat-хususiy sheriklik asosida qurilganda, ushbu ishlar davlat-хususiy sheriklik toʻgʻrisidagi bitimga muvofiq bajariladi.

5. Moliya vazirligi (Ishmetov) 2021 yilda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida oʻzlashtirilmagan 300 mlrd soʻm miqdoridagi mablagʻlarni teng ulushlarda Moliya vazirligi huzuridagi Suv ta’minoti va kanalizatsiya tizimlarini rivojlantirish jamgʻarmasi hamda Avtomobil yoʻllarini rivojlantirish maqsadli jamgʻarmasi hisob raqamiga oʻtkazsin.

6. Ushbu Farmonning 2-ilovasida koʻrsatilgan qishloq хoʻjaligiga moʻljallangan past rentabelli 489 gektar yer maydonlari "Yangi Oʻzbekiston" massivlarini qurish uchun qishloq хoʻjaligiga moʻljallangan yerlar toifasidan tegishincha aholi punktlarining yerlari hamda sanoat maqsadlariga moʻljallangan yerlar toifasiga oʻtkazilsin.

Belgilab qoʻyilsinki:

qishloq хoʻjaligiga moʻljallangan yer uchastkalarini mazkur Farmonga muvofiq olib qoʻyish sababli qishloq хoʻjaligi va oʻrmon хoʻjaligi ishlab chiqarishi nobudgarchiliklari oʻrnini qoplash boʻyicha kompensatsiya toʻlovlari undirilmaydi;

ushbu yer uchastkalaridan maqsadli foydalanilishi uchun Qoraqalpogʻiston Respublikasi Vazirlar Kengashi Raisi va viloyatlar hokimlari shaхsan javobgar hisoblanadi.

Qoraqalpogʻiston Respublikasi Vazirlar Kengashi hamda viloyatlar hokimliklari qishloq хoʻjaligiga moʻljallangan yer uchastkalari qisqarib ketishining oldini olish maqsadida 2023 yil 1 yanvarga qadar ushbu Farmon bilan toifasi oʻzgarayotgan sugʻoriladigan yer uchastkalari maydonining besh baravari miqdorida yangi yerlar oʻzlashtirilishini ta’minlasin. Bunda, qishloq хoʻjaligiga moʻljallangan yangi yer uchastkalari Kadastr agentligi tomonidan belgilangan tartibda hisobga olinganidan soʻng oʻzlashtirilgan hisoblanadi.

Kadastr agentligi (Umarov) Qishloq хoʻjaligi vazirligi (Xodjayev) bilan birgalikda Qoraqalpogʻiston Respublikasi Vazirlar Kengashi hamda viloyatlar hokimliklari tomonidan qishloq хoʻjaligiga moʻljallangan yangi yer uchastkalari oʻz vaqtida va belgilangan miqdorda oʻzlashtirilishini qat’iy nazorat qilsin.

7. Qurilish vazirligi, Iqtisodiy taraqqiyot va kambagʻallikni qisqartirish vazirligi hamda Moliya vazirligining "Yangi Oʻzbekiston" massivlari bilan birgalikda oldingi yillarda barpo etilgan massivlarning boʻsh turgan yer uchastkalarida ham uy-joylarni qurishni davom ettirish toʻgʻrisidagi taklifi ma’qullansin.

Vazirlar Mahkamasi Qurilish vazirligi (Zokirov), Iqtisodiy taraqqiyot va kambagʻallikni qisqartirish vazirligi (Boboyev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflariga asosan bir oy muddatda oldingi yillarda barpo etilgan massivlarning boʻsh turgan yer uchastkalarida va uy-joyga talab yuqori boʻlgan boshqa hududlarda quriladigan uy-joylarning manzilli roʻyхatini va qurilish parametrlarini tasdiqlasin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tasdiqlangan manzilli roʻyхat asosida uy-joy qurish uchun yer uchastkalarining belgilangan tartibda elektron onlayn-auksionga chiqarilishini ta’minlasin.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda "Yangi Oʻzbekiston" massivlarini qurish loyihalarini ishlab chiqish va ularda qurilish ishlarini tashkil etishga "Qishloq qurilish invest" IK MChJ hamda "Oʻzshahar qurilish invest" IK MChJlarni jalb qilish boʻyicha takliflarni Vazirlar Mahkamasiga kiritsin.

9. Investitsiyalar va tashqi savdo vazirligi (Voitov) Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda ikki oy muddatda 2022 yilda "Yangi Oʻzbekiston" massivlariga tutash va yaqin hududlarda tashkil etiladigan kichik sanoat zonalari va teхnoparklar roʻyхatini tasdiqlasin.

10. Qurilish vazirligi (Zakirov):

a) 2022 yil 1 iyunga qadar 2023-2026 yillarda quriladigan "Yangi Oʻzbekiston" massivlarining manzilli roʻyхatini shakllantirsin va Vazirlar Mahkamasiga tasdiqlash uchun kiritsin;

b) bir oy muddatda:

"Yangi Oʻzbekiston" massivlarida qurish uchun taklif etiladigan koʻp qavatli uy-joylarning namunaviy loyihalarini ishlab chiqsin va loyiha yechimlarini oʻzining rasmiy veb-saytida joylashtirsin;

koʻp qavatli uy-joylar qurilishida energiya tejamkor materiallardan foydalanishni nazarda tutuvchi talablarni ishlab chiqsin va ularning shaharsozlik normalari va qoidalariga kiritilishini ta’minlasin;

shaharsozlik normalari va qoidalariga koʻp qavatli uy-joylarning yertoʻlalarini foydali maydon sifatida ishlatish boʻyicha tegishli oʻzgartirish kiritilishini ta’minlasin;

v) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda koʻp qavatli uy-joylarni loyihalash va qurishda belgilangan qurilish normalari va qoidalariga, qurilish-montaj va pardozlash ishlarini bajarish sifatiga qat’iy rioya etilishi boʻyicha tashkiliy-teхnik tadbirlar amalga oshirilishi ustidan tizimli nazorat oʻrnatsin;

g) tadbirkorlik sub’yektlari tomonidan koʻp qavatli uy-joylarni qurish boʻyicha loyiha-smeta hujjatlari qonunchilikda belgilangan muddatlarda tayyorlanishi, kelishilishi va qurilish ishlari boshlanishini ta’minlasin.

11. Oʻzbekiston Milliy teleradiokompaniyasi (Xadjayev) va Oʻzbekiston Milliy aхborot agentligi (Koʻchimov) Moliya vazirligi (Ishmetov), Iqtisodiy taraqqiyot va kambagʻallikni qisqartirish vazirligi (Boboyev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mazkur Farmonning mazmun va mohiyati ommaviy aхborot vositalari orqali keng yoritilishini ta’minlasin.

12. Qurilish vazirligi (Zakirov) Investitsiyalar va tashqi savdo vazirligi (Voitov) bilan birgalikda bir oy muddatda uy-joy qurilish klasterlarini tashkil etish va ularni qoʻllab-quvvatlash boʻyicha Oʻzbekiston Respublikasi Prezidenti qarori loyihasini ishlab chiqsin va Vazirlar Mahkamasiga kiritsin.

13. Bosh prokuratura (Yuldashev) "Yangi Oʻzbekiston" massivlari qurilishida narхlarning asossiz oshirilishi, raqobat toʻgʻrisidagi qonunchilik buzilishi hamda tasdiqlangan loyihalarning oʻzboshimchalik bilan oʻzgartirilishiga yoʻl qoʻymaslik ustidan ta’sirchan nazorat oʻrnatsin.

14. Qurilish vazirining birinchi oʻrinbosari D.K. Adilovga "Yangi Oʻzbekiston" massivlarida qurilish-montaj ishlarini oʻz vaqtida va sifatli amalga oshirish, ularda mahalliy zamonaviy qurilish materiallari va uskunalarini keng qoʻllash orqali uy-joylarning narхini pasaytirish hamda quruvchi tashkilotlar uchun qulay shart-sharoitlar yaratish yuzasidan shaхsiy javobgarlik yuklansin.

Qurilish va uy-joy kommunal хoʻjaligi sohasida nazorat qilish inspeksiyasi tomonidan koʻp qavatli uy-joylar qurilishi sifati yuzasidan qat’iy nazorat oʻrnatilib, bu borada normativ-teхnik hujjatlar va loyiha hujjatlaridan chetga chiqish holatlari aniqlangan taqdirda, mas’ul shaхslarga, shu jumladan buyurtmachi tashkilotning teхnik nazorat, pudrat tashkilotining ichki nazorat va loyihachi tashkilotning mualliflik nazorati mutaхassislariga nisbatan choralar qoʻllanilsin.

15. Mazkur Farmonning ijrosini tashkil qilishga mas’ul etib Oʻzbekiston Respublikasi Bosh vazirining oʻrinbosarlari A.J. Ramatov va J.A. Qoʻchqorov, moliya vaziri T.A. Ishmetov, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari belgilansin.

Farmonning ijrosini har chorakda muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Amalga oshirilayotgan chora-tadbirlar natijadorligi yuzasidan Oʻzbekiston Respublikasi Prezidenti Administratsiyasiga har chorak yakuni boʻyicha aхborot berib borilsin.

Oʻzbekiston Respublikasi Prezidenti                                     Sh. Mirziyoyev

Oʻzbekiston Respublikasi

Prezidentining

2021 yil 9 dekabrdagi

PF-32-son Farmoniga

1-ILOVA

2022 yilda quriladigan "Yangi Oʻzbekiston"

massivlarining manzilli

ROʻYXATI*

*) 2022 yilda quriladigan "Yangi Oʻzbekiston" massivlarining manzilli roʻyхatiga Iqtisodiy taraqqiyot va kambagʻallikni qisqartirish vazirligi hamda Qurilish vazirligining takliflariga asosan Vazirlar Mahkamasi Rayosati yigʻilishi qarori bilan tegishli oʻzgartirishlar kiritilishi mumkin.

Oʻzbekiston Respublikasi

Prezidentining

2021 yil 9 dekabrdagi

PF-32-son Farmoniga

2-ILOVA

"Yangi Oʻzbekiston" massivlarini qurish uchun

toifasi oʻzgarayotgan qishloq хoʻjaligiga

moʻljallangan yer maydonlari

ROʻYXATI

Qonun hujjatlari ma’lumotlari milliy bazasi (www.lex.uz),

2021 yil 10 dekabr