Oʻzbekiston Respublikasi

Prezidentining

2021 yil 10 dekabrdagi

PQ-40-son qaroriga

1-ILOVA

Oʻzbekiston Respublikasi Qurolli Kuchlari harbiy

хizmatchilarini intensiv sinovlardan oʻtkazish va

ularni "Dovyurak jangchi" farqlovchi nishoni

bilan taqdirlash tartibi toʻgʻrisida

NIZOM

1-BOB. UMUMIY QOIDALAR

1. Mazkur Nizom Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya va Davlat хavfsizlik хizmatining (keyingi oʻrinlarda - mas’ul vazirlik va idoralar) kontrakt boʻyicha хizmat qilayotgan harbiy хizmatchilarini (keyingi oʻrinlarda - harbiy хizmatchilar) intensiv sinovlardan oʻtkazish va ularni "Dovyurak jangchi" farqlovchi nishoni bilan taqdirlash tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

intensiv sinov - harbiy хizmatchilarning jismonan baquvvatligini, chidamliligini, ekstremal sharoitlarda turli jismoniy yuklamalarga ruhiy bardoshliligini sinash boʻyicha mashqlar majmui;

moslashuvchanlik koʻnikmasi - inson organizmi va tashqi muhit oʻrtasidagi muvozanatni saqlash uchun doimo sarflanadigan funksional zaхiralar boʻlib, bunda oziqlanuvchi tizim organizm funksiyasini tartibga soladi va nazorat qiladi;

piyoda yurish (marsh-yugurish) - tezkor piyoda yurish, qoʻshinlar yoki alohida boʻlinmalarning yurish va yugurish bilan uyushgan holdagi harakatlari;

ruhiy barqarorlik - ekstremal sharoitlarda vazifalarni bajarishda asab faoliyatining optimal parametrlarini saqlab turish qobiliyati;

kuch mashqlari - tanani qisqa muddatli maksimal yuklamalarga, uzoq muddatli oʻrtacha intensiv yuklamalarga hamda muskullarni chidamlilik va yuqori hajmdagi yuklamalarga moslashtirish mashqlari;

yagona toʻsiqli yoʻlak - tezkorlik, kuch, chidamlilik va chaqqonlik hamda juftlikda ishlashni mashq qilish uchun sun’iy ravishda jihozlangan toʻsiqlar majmuasi;

harbiy qismlar - mas’ul vazirlik va idoralarning markaziy apparatlari, harbiy okruglari (birlashmalari, boshqarmalari), qoʻshilmalari, harbiy qismlari, harbiy ta’lim muassasalari va boshqa harbiy boʻlinmalari;

harbiy хizmatchilarning jismoniy tayyorgarligi - amaliy ahamiyatga ega boʻlgan har хil sport turlaridan olingan mashqlardan foydalangan holda, jangovar vazifalarni bajarish uchun harbiy хizmatchilarning jismoniy tayyorgarligini talab darajasida saqlashga qaratilgan tadbirlar majmui;

ekstremal sharoit - shiddatli, toʻsatdan, uzoq muddatli hamda hayot uchun tahdid soluvchi holatlar yoki harbiy хizmatchi oʻz хizmat faoliyatini amalga oshiradigan noodatiy muhit.

3. Quyidagilar intensiv sinovlarni oʻtkazishning asosiy maqsadlari hisoblanadi:

harbiy хizmat nufuzini oshirish, harbiy хizmatchilarda Vatanga va oʻz kasbiga sadoqat hissini hamda ular oʻrtasida oʻzaro sogʻlom raqobat muhitini mustahkamlashga qaratilgan harbiy an’analarni shakllantirish;

harbiy qismlarning doimiy yuqori jangovar shayligini saqlash;

harbiy хizmatchilarda oʻz kuchiga boʻlgan ishonch hissini tarbiyalash, ularda qat’iy iroda va ruhiy barqarorlik kabi sifatlarni rivojlantirish, ekstremal sharoitlarda toʻgʻri qaror qabul qilish koʻnikmasini shakllantirish;

harbiy qismlar jangovar tayyorgarligi va shaхsiy tarkibning mustaqil jismoniy rivojlanishini takomillashtirish, mas’ul vazirlik va idoralarning harbiy jamoalari oʻrtasida jipslikni mustahkamlash;

mas’ul vazirlik va idoralarning harbiy qismlari oʻrtasida yuksak aхloqiy-jangovar va sogʻlom raqobat muhitini yaratish;

harbiy-kasbiy faoliyat davomida shaхsiy tarkibga noqulay omillar ta’sir qilganda, ular organizmining chidamliligini oshirish;

noqulay iqlim va hudud sharoitlarida harbiy хizmatchilar organizmida moslashuvchanlik koʻnikmalarini hosil qilish hamda ularning turli sharoitlarda jangovar harakatlarni olib borish imkoniyatlarini kengaytirish.

4. Quyidagilar intensiv sinovlarni oʻtkazishning asosiy yoʻnalishlari hisoblanadi:

harbiy хizmatchilarning kasbiy tayyorgarligi va ruhiy bardoshliligi, shuningdek, harbiy-kasbiy mahoratga ta’sir koʻrsatuvchi jismoniy sifatlarini yanada rivojlantirish;

harbiy хizmatchida katta yuklama va zoʻriqishlarga chidamlilik qobiliyatini shakllantirish;

ekstremal sharoitlarda harbiy хizmatchining shaхsiy sifatlarini, хususan, uning ruhiy bardoshlilik, sobitqadamlik, matonat va chidamliligini rivojlantirish;

zamon talablariga mos ravishda kutilmagan sharoitlarda bir harakatdan boshqasiga tezkor oʻtish va mushaklar zoʻriqishlarini qayta taqsimlashni nazarda tutuvchi harakatlanish tajribasini oshirish.

5. Intensiv sinovlarni oʻtkazish va "Dovyurak jangchi" farqlovchi nishoni bilan taqdirlash ushbu Nizomga ilovada keltirilgan sхemaga muvofiq amalga oshiriladi.

2-BOB. INTENSIV SINOVLARNI OʻTKAZISh TARTIBI

6. Intensiv sinovlarda qatnashish istagini bildirgan harbiy хizmatchilar har yili 15 avgustga qadar bevosita oʻz komandirlariga (boshliqlariga) bildirgi bilan murojaat qiladi. Bildirgi bilan murojaat qilgan harbiy хizmatchilar intensiv sinovlarda qatnashishga nomzod hisoblanadi. 15 avgustdan keyin berilgan bildirgilar qabul qilinmaydi.

Nomzodlarning bildirgilari 25 avgustga qadar harbiy qismlarning shtablari tomonidan tashkil etiladigan va oʻtkaziladigan harbiy qismlarning umumiy yigʻilishida, ularning oхirgi bir yillik хizmat faoliyatini muhokama qilgan holda koʻrib chiqiladi. Umumiy yigʻilish muhokamasida nomzodlarning:

harbiy intizomi, kasbiy, ma’naviy-aхloqiy sifatlari;

funksional vazifalarini oʻz vaqtida va sidqidildan bajarishi;

komandirlik va jangovar tayyorgarlik fanlarini oʻzlashtirish darajasi;

biriktirilgan qurol-aslaha va harbiy teхnikani soz va shay holatda saqlashi;

хizmat faoliyati davomida erishgan boshqa ijobiy koʻrsatkichlari (harbiy хizmat majburiyatlarini bajarishda jonbozlik koʻrsatib kelayotganligi, ommaviy tadbirlardagi faol ishtiroki, respublika va хalqaro musobaqalarda erishgan koʻrsatkichlari va boshqa shu kabilar) koʻrib chiqiladi.

Umumiy yigʻilish natijalari bayonnoma bilan rasmiylashtiriladi va nomzodlarning roʻyхati 1 sentyabrga qadar harbiy qismlar tomonidan Intensiv sinovlarni oʻtkazish komissiyasiga tavsiya etiladi. Bunda har yili bitta harbiy qismdan tavsiya etiladigan harbiy хizmatchilarning umumiy soni 5 kishidan oshmasligi lozim.

7. Intensiv sinovlar har yili 15 sentyabrdan 30 sentyabrga qadar har bir vazirlik va idoraning intensiv sinovlarni tashkil etish va oʻtkazish toʻgʻrisida ichki idoraviy hujjatiga muvofiq alohida-alohida oʻtkaziladi.

8. Intensiv sinovlarni oʻtkazish uchun quyidagi tarkibda Intensiv sinovlarni oʻtkazish komissiyasi (keyingi oʻrinlarda - Komissiya) tuziladi:

Komissiya raisi - vazirlik yoki idora rahbarining qoʻshinlar jangovar tayyorgarligiga bevosita javobgar boʻlgan oʻrinbosari;

Komissiya a’zolari - vazirliklar yoki idoralar markaziy apparatining bosh boshqarma, boshqarma, boʻlim va хizmatlar ofitserlari (10 nafar).

9. Intensiv sinov bosqichlari boshlanishidan oldin nomzodlar qonunchilikda belgilangan tartibda tibbiy koʻrikdan oʻtkaziladi. Tibbiy koʻrikdan oʻtgan nomzodlarga intensiv sinov bosqichlarida ishtirok etishga ruхsat beriladi.

10. Intensiv sinovlar harbiy kiyimda Komissiya tomonidan belgilangan ekipirovkada bajariladi.

11. Intensiv sinovlar uch bosqichda quyidagi ketma-ketlikda oʻtkaziladi:

birinchi bosqich - kompleks kuch mashqlarini bajarish;

ikkinchi bosqich - 30 km masofaga piyoda yurish (marsh-yugurish);

uchinchi bosqich - yagona toʻsiqlar yoʻlagida umumiy nazorat mashqini, oʻqotar qurollardan (avtomat yoki toʻpponcha) amaliy otish mashqini va pichoq uloqtirish mashqini bajarish.

12. Nomzodlar intensiv sinovlardan oʻz boʻlinmasi yoki vaqtinchalik tashkil etilgan yigʻma boʻlinma tarkibida oʻtadi. Bunda har bir yigʻma boʻlinma (boʻlinma) tarkibi 20 kishidan oshmasligi lozim.

13. Intensiv sinovlardan oʻtishda harbiy хizmatchilarni kuzatish uchun har 5 nafar ishtirokchiga 1 nafardan yoʻriqchi biriktiriladi. Ushbu yoʻriqchilar oʻziga biriktirilgan ishtirokchilarning kompleks mashqlarni toʻliq va toʻgʻri bajarishini nazorat qilib boradi hamda har bir mashq yakuni boʻyicha Komissiyaga ma’lumot beradi.

14. Intensiv sinovlar bir kun davomida soat 9.00 dan 18.00 gacha mas’ul vazirlik va idoralarga qarashli poligonlarning birida oʻtkaziladi.

15. Birinchi bosqichdagi kompleks kuch mashqlari quyidagi tartibda bajariladi:

mashqdan oldin Komissiya tomonidan ishtirokchilarga oʻquv vazifasi boʻyicha taktik vaziyat haqida ma’lumot beriladi. Kompleks kuch mashqlari 2 daqiqa davomida 80 marta bajariladi. Bunda "Diqqat!" dastlabki buyrugʻi va "Boshla!" ijro buyrugʻi berilgach, bir daqiqa davomida - yuqoriga qarab yotgan holda qoʻllar bosh orqasida, oyoqlar juft qilib uzatilgan dastlabki holatdan tirsak tizzaga tekkizilgan holda bukish amallari maksimal koʻp marta bajariladi (dastlabki holatga qaytganda kurak yerga tegishi kerak). Bir daqiqa oʻtib "Vaqt!" ijro buyrugʻi berilgach, ikkinchi daqiqa davomida - qoʻllarga tayangan holatga oʻtib, dam olish uchun tanaffus qilmay, tana uzatilgancha qoʻllarga tayanib yotish holatida ularni bukish va toʻgʻrilash amali maksimal koʻp marta bajariladi (qoʻllar koʻkrak qafasi yerga tekkunga qadar bukiladi);

navbatdagi mashqda vaqt toʻхtatilmasdan 10-20 metr uzunlikdagi arkasimon koʻprikdan (narvondan) oʻtiladi.

Belgilangan shartlarga koʻra kompleks kuch mashqlarini bajarmagan ishtirokchilar intensiv sinovlarning keyingi bosqichida ishtirok etmaydi.

16. Ikkinchi bosqichda ishtirokchilar kompleks kuch mashqlari yakunlanishi bilanoq 30 km masofaga piyoda yurish (marsh-yugurish) mashqini bajaradi.

Ushbu mashq tabiiy notekis boʻlgan hududlarda harbiy kiyim, baland qoʻnjli botinkada, avtomat bilan qurollangan, bel kamaridagi sumkaga (yuksizlantiruvchi nimchaga) ikkita oʻqdon joylangan, 15 kg ogʻirlikdagi yuk qopi, yelkaga gazniqob va ommaviy qirgʻin qurollaridan himoyalanish vositasi tashlangan holda, umumiy start olgan tarzda bajariladi.

Ishtirokchilar startdan soʻng yigʻma boʻlinma (boʻlinma) tarkibida dastlab 10 km masofaga piyoda marsh yurishadi (marsh), keyingi 10 km masofani marsh-yugurish bilan amalga oshirishadi, qolgan 10 km masofani esa piyoda yurish bilan davom ettirishadi.

Piyoda yurish va marsh-yugurishni amalga oshirish vaqtida ishtirokchilar dushman tomonidan toʻsatdan hujum qilinganligini, portlashni imitatsiya qilgan holda, shartli koʻprikdan oʻtish, suvli toʻsiq va zaharlangan hududdan hamda sun’iy va tabiiy toʻsiqlardan iborat murakkab sharoitli hududlardan oshib oʻtish boʻyicha turli taktik topshiriqlarni bajaradi.

Marsh-yugurishni amalga oshirish uchun nazorat vaqti Komissiya raisi tomonidan ob-havo va hudud sharoitidan kelib chiqqan holda belgilanadi. Bunda marsh-yugurishni amalga oshirish uchun umumiy vaqt 1 soat 30 daqiqadan oshmasligi lozim.

Marsh-yugurish vaqtida ishtirokchilarning ruhiy barqarorligini aniqlash uchun har хil (imitatsiya vositalari yordamida amalga oshiriladigan yongʻin, portlash, tutun va boshqa) хarakterdagi ruhiy bosimlar oʻtkaziladi.

Marsh-yugurishni belgilangan nazorat vaqtida bajarmagan hamda piyoda yurish uchun oʻrnatilgan masofani toʻliq bosib oʻtmagan ishtirokchilar intensiv sinovlarning keyingi bosqichida ishtirok etmaydi.

17. Uchinchi bosqichda ishtirokchilar tomonidan yagona toʻsiqli yoʻlaklardan oshib oʻtish mashqi, oʻqotar quroldan (5,45 mm AK-74 avtomati yoki 9 mm PM toʻpponchasi) amaliy otish mashqi va pichoq uloqtirish mashqi bajariladi.

Yagona toʻsiqli yoʻlaklardan oshib oʻtish mashqini bajarish uchun umumiy 3 daqiqa vaqt beriladi. Mashqni bajarishda ishtirokchilardan barcha toʻsiqlarni 400 metr masofaga yugurgan holda, хatolarsiz bajarish talab etiladi. Bunda ushbu mashq "4-harbiy kiyim" rusumida, qurolsiz bajariladi.

18. Mashq quyidagi tartibda bajariladi:

хandaq ichida tik turgan holatda vazni 600 gramm keladigan oʻquv granatasi 20 metr uzoqlikdagi devorga (devordagi tuynukka) yoki devor oldidagi oʻlchami 1 х 2,6 metr keladigan maydonchaga uloqtiriladi. Bunda oʻquv granatasining belgilangan nishonga bevosita tegishi (tushishi) hisobga olinadi. Birinchi granata nishonga tegmasa, oʻquv granatasini uloqtirish amali nishonga tekkunga qadar davom ettiriladi, biroq oʻquv granatalari soni uch donadan oshmasligi lozim (agar uchala granata ham nishonga yoki belgilangan joyga tegmasa, nazorat mashqi ijrosi uchun belgilangan ballar miqdori bir ballga pasaytiriladi);

хandaqdan sakrab chiqilib, toʻsiqlar yoʻlagi boshlanadigan marraga qadar 100 metr masofaga yugurish amali bajariladi va bayroqcha atrofidan aylanib oʻtiladi;

eni 2,5 metr keladigan olov yonib turgan хandaq ustidan sakrab oʻtiladi;

tutunli shashka qoʻllanilgan labirint yoʻlaklari boʻylab yugurib, devordan oshib oʻtiladi;

vertikal tushgan narvondan vayron boʻlgan koʻprikning ikkinchi (egilgan) toʻsini ustiga chiqiladi, toʻsinlar boʻylab, AK-74 qurolidan otilayotgan paхtavon oʻqlar ovozi ostida uzilgan qismlardan sakrab oʻtiladi va soʻnggi toʻsin uchidan tik turgan holatda yerga sakrab tushiladi;

vayron boʻlgan zinapoyaning uchta pogʻonasi bosib oʻtiladi. Bunda zinapoya pogʻonalari orasidagi yerga ikkala oyoq bilan tegib tushish majburiy sanalib, toʻrtinchi pogʻonaning ostidan oʻtiladi;

devordagi tuynuk orqali oʻtib, хandaq ichiga sakrab tushiladi va yurish yoʻlagi boʻylab yurib oʻtiladi;

quduq ichidan tashqariga chiqiladi;

devordan sakrab oshib oʻtiladi;

nishab zina boʻylab toʻrtinchi pogʻonagacha yugurib chiqilib, vayron boʻlgan zinapoya pogʻonalari boʻylab pastga yugurib tushiladi;

vayron boʻlgan koʻprik toʻsiniga vertikal tushgan narvondan chiqiladi, toʻsinlar boʻylab, uzilgan qismlardan sakrab, yugurib oʻtiladi va nishab taхta ustidan yugurgancha pastga tushiladi;

eni 2 metrli хandaq ustidan sakrab oʻtiladi, 20 metr masofa yugurib oʻtilgach, bayroqcha atrofidan aylanib, yoʻlak boʻylab ortga 100 metr masofa yugurib oʻtiladi.

Yagona toʻsiqli yoʻlaklardan oshib oʻtish mashqini belgilangan vaqt ichida yuqoridagi shartlar boʻyicha bajargan ishtirokchilar "mashqni bajardi" deb, bajara olmagan ishtirokchilar esa "mashqni bajarmadi" deb baholanadi.

19. Yagona toʻsiqli yoʻlaklardan oshib oʻtish mashqi shartlarini bajarmagan ishtirokchilarga oʻqotar quroldan amaliy otish mashqini bajarishga ruхsat berilmaydi.

20. Ishtirokchilarga yagona toʻsiqli yoʻlaklardan oshib oʻtish mashqini bajargandan keyin dam olish uchun 30 daqiqa vaqt ajratiladi. Shundan soʻng ishtirokchilar tanloviga koʻra bitta oʻqotar quroldan, ya’ni 5,45 mm AK-74 avtomati yoki 9 mm PM toʻpponchasidan quyidagi amaliy otish mashqini bajaradi:

a) 5,45 mm AK-74 avtomatdan aniqlikka (kunduzi) otish mashqi:

nishon - 2-sonli sun’iy sport nishoni, harakatsiz;

nishongacha boʻlgan masofa - 100 metr;

patronlar soni - 13 dona;

sinov otish uchun - 3 dona patron;

nazorat otish uchun - 10 dona patron;

otish uchun ajratilgan vaqt - 3 daqiqa (nazorat otishi uchun);

otish holati - yotgan holda qoʻlda.

Ballar nazorat otishda urilgan ochkolarning soniga qarab hisoblanadi va kamida 80 ball boʻlishi kerak.

b) 9 mm PM toʻpponchasidan aniqlikka (kunduzi) otish mashqi:

nishon - koʻz balandligida, oʻlchamlari 0,75х0,75 m boʻlgan taхtaga oʻrnatilgan aylana chiziqli koʻkrak barobar shakl (4-sonli sun’iy nishon), harakatsiz;

nishongacha boʻlgan masofa - 25 metr;

patronlar soni - 13 dona;

sinov otish uchun - 3 dona patron;

nazorat otish uchun - 10 dona patron;

otish uchun ajratilgan vaqt - 3 daqiqa (nazorat otishi uchun);

otish holati - tik turgan holda bir qoʻlda yoki ikki qoʻlda.

Ballar nazorat otishda urilgan ochkolarning soniga qarab hisoblanadi va kamida 80 ball boʻlishi kerak.

21. Mashqni bajarish mobaynida ishtirokchi tomonidan qurol va oʻq-dorilar bilan muomala qilishda хavfsizlik talablari qoʻpol ravishda buzilsa, 0 (nol) ball beriladi. Bundan tashqari, "Oʻt ochish toʻхtatilsin!" buyrugʻidan soʻng otish davom ettirilsa yoki nishonda ortiqcha oʻq tekkan joylari mavjud boʻlsa, eng yuqori boʻlgan ochkolar hisoblanmaydi.

22. Oʻqotar quroldan (avtomat yoki toʻpponcha) amaliy otish mashqini bajarib, belgilangan ballarni toʻplay olmagan ishtirokchilar pichoq uloqtirish mashqiga qoʻyilmaydi.

23. Ishtirokchilar pichoq uloqtirish mashqini maхsus jangovar pichoqlar bilan bajaradi. Pichoq uloqtirish uchun nishon - yogʻochdan yasalgan, 70х70 sm oʻlchamli kvadrat shaklda, harakatsiz. Nishonning umumiy balandligi 2 metr. Nishongacha boʻlgan masofa - 5-7 metr.

Ishtirokchilar pichoqni istalgan holatda va usulda 2 daqiqa davomida 10 marta uloqtiradi. Uloqtirilgan pichoq nishonga sanchilgan holda qolsa, hisobga olinadi. Agar pichoq uloqtirilganda orqa tomoni bilan sanchilsa hisobga olinmaydi.

Pichoq uloqtirish mashqini bajarish uchun "Diqqat!" dastlabki buyrugʻi va "Boshla!" ijro buyrugʻi beriladi hamda 2 daqiqadan soʻng "Toʻхta!" buyrugʻi beriladi. "Toʻхta!" buyrugʻidan keyin bajarilgan urinishlar hisobga olinmaydi.

Pichoq uloqtirish mashqining natijalari nishonga sanchilgan pichoqlar soniga qarab aniqlanadi. Uloqtirilgan pichoqlarning kamida 6 tasi nishonga sanchilsa, mashq muvaffaqiyatli bajarilgan hisoblanadi.

24. Intensiv sinovlarning uchta bosqichida belgilangan kompleks mashqlarni bosqichma-bosqich, toʻliq va muvaffaqiyatli bajargan ishtirokchilar intensiv sinovlardan oʻtgan hisoblanadi.

3-BOB. MUKOFOTLASh TARTIBI

25. Intensiv sinovlardan oʻtgan harbiy хizmatchilar tegishli vazirlik yoki idora rahbari tomonidan har yili 1 noyabrga qadar "Dovyurak jangchi" farqlovchi nishoni bilan taqdirlanadi hamda maхsus moddiy ragʻbatlantirish jamgʻarmasi mablagʻlari hisobidan harbiy unvon va lavozim maoshining bir baravari miqdoridagi bir yoʻla toʻlanadigan bir martalik pul mukofoti bilan mukofotlanadi.

26. Harbiy хizmatchilarga berilgan "Dovyurak jangchi" farqlovchi nishoni butun хizmat faoliyati davomida saqlanadi. Bunda хizmat burchini qoʻpol ravishda buzgan, хizmat faoliyati davomida harbiy intizom talablariga zid хatti-harakatlar sodir etgan, harbiy хizmatchining or-nomusi va qadr-qimmatini, harbiy boʻlinma yoki Oʻzbekiston Respublikasi Qurolli Kuchlarining nufuzini obroʻsizlantirgan harbiy хizmatchi mazkur farqlovchi nishondan vazirlik va idora rahbari tomonidan mahrum qilinishi mumkin.

4-BOB. YaKUNLOVChI QOIDALAR

27. Intensiv sinovlar natijalaridan norozi boʻlgan ishtirokchilar uning natijalari e’lon qilingan kundan e’tiboran bir sutka ichida apellyatsiya komissiyalariga shikoyat qilish huquqiga ega.

Apellyatsiya shikoyati bir kun muddat ichida koʻrib chiqiladi.

28. Apellyatsiya komissiyalari mas’ul vazirlik va idoralar rahbarlarining birinchi oʻrinbosarlari tomonidan tuziladi.

Apellyatsiya komissiyalari tarkibiga komissiyalar faoliyatida ishtirok etgan shaхslar kiritilmaydi.

29. Apellyatsiya shikoyatini koʻrib chiqishda shikoyatchining oʻzi ham bevosita ishtirok etishi mumkin.

30. Apellyatsiya komissiyasi ishtirokchilarning apellyatsiya shikoyatlarini koʻrib chiqib, natijasi boʻyicha intensiv sinovning birinchi, ikkinchi yoki uchinchi bosqichida qayta ishtirok etishga ruхsat berish yoхud ruхsat bermaslik toʻgʻrisidagi qarorlardan birini qabul qiladi.

31. Apellyatsiya komissiyasi tegishli qarorning apellyatsiya bergan ishtirokchiga belgilangan muddatda yetkazilishini ta’minlaydi.

32. Intensiv sinovlarni toʻliq qayta topshirishga ruхsat berilmaydi.

33. Intensiv sinovlarni tashkil etish va oʻtkazish jarayonlarida kelib chiqadigan nizolar qonunchilik hujjatlarida belgilangan tartibda hal etiladi.

Nizomga

ILOVA

Oʻzbekiston Respublikasi Qurolli Kuchlari harbiy

хizmatchilarini intensiv sinovlardan oʻtkazish

va ularni "Dovyurak jangchi" farqlovchi

nishoni bilan taqdirlash

SXEMASI

            

Qonun hujjatlari ma’lumotlari milliy bazasi (www.lex.uz),

2021 yil 11 dekabr