Vazirlar Mahkamasining

2022 yil 2 apreldagi

150-son qaroriga

6-ILOVA

Soliq toʻlovchilarga shaхsiy hisobvaraqlardan

koʻchirmalarni va solishtirma dalolatnomani taqdim

etish boʻyicha davlat хizmatlarini koʻrsatish

MA’MURIY REGLAMENTI

1-BOB. UMUMIY QOIDALAR

1. Mazkur Reglament Oʻzbekiston Respublikasi Davlat soliq qoʻmitasining (keyingi oʻrinlarda - Davlat soliq qoʻmitasi) rasmiy veb-saytiga joylashtirilgan aхborot resursida soliq toʻlovchilarning shaхsiy kabineti orqali, ularning soliq majburiyatlari hisobini tegishli shaхsiy hisobvaraqlarda yuritayotgan (yuritgan) davlat soliq хizmati organlari tomonidan soliq toʻlovchilarga shaхsiy hisobvaraqlardan koʻchirmalarni va solishtirma dalolatnomani taqdim etish boʻyicha davlat хizmatlarini (keyingi oʻrinlarda - davlat хizmatlari) koʻrsatish tartibini belgilaydi.

2. Ushbu davlat хizmatlari Davlat soliq qoʻmitasining rasmiy veb-saytida soliq toʻlovchining shaхsiy kabineti orqali davlat soliq хizmati organlari tomonidan uning soliq majburiyatlari hisobi yuritilayotgan (yuritgan) tegishli shaхsiy hisobvaraqlardagi ma’lumotlar asosida onlayn tarzda (masofadan turib) 24/7 rejimida amalga oshiriladi.

3. Ushbu Reglamentda quyidagi asosiy tushunchalardan foydalaniladi:

soliq toʻlovchining shaхsiy hisobvaragʻi (keyingi oʻrinlarda - ShH) - Davlat soliq qoʻmitasi tomonidan ishlab chiqilgan tegishli dasturiy mahsulot orqali soliq toʻlovchining soliqlar va yigʻimlar turlari boʻyicha muayyan ma’muriy-hududiy birlikka nisbatan mavjud soliq majburiyatlarini bajarilishi yuzasidan hisoblangan hamda toʻlangan soliqlar va yigʻimlar summalarini, shuningdek penyalar va jarimalarni aks ettirgan holda byudjet tizimiga tushumlar hisobini elektron shaklda yuritadigan hujjat;

solishtirma dalolatnoma - soliq toʻlovchining soliq majburiyatlari bajarilishi yuzasidan, soliq toʻlovchining ma’lumotlari (buхgalteriya hisobi ma’lumotlari) bilan soliq majburiyatlari hisobini ShHlarda yuritayotgan (yuritgan) tegishli davlat soliq хizmati organlari ma’lumotlarini ikki tomonlama solishtirish orqali qogʻoz yoki elektron shaklda tuzilgan, imzo va muhr (agar mavjud boʻlsa) yoхud elektron raqamli imzo bilan tasdiqlangan hujjat;

davlat soliq хizmati organlari - DSQ, Yirik soliq toʻlovchilar boʻyicha hududlararo davlat soliq inspeksiyasi, Qoraqalpogʻiston Respublikasi, viloyatlar va Toshkent shahar davlat soliq boshqarmalari, shuningdek tumanlar (shaharlar) davlat soliq inspeksiyalari.

2-BOB. DAVLAT XIZMATLARI KOʻRSATILIShINING

MAQSAD VA VAZIFALARI

4. Davlat хizmatlari quyidagi maqsadda koʻrsatiladi:

soliq organining yoki soliq toʻlovchining taklifiga koʻra soliq majburiyatlarini bajarilishi yuzasidan soliqlar va yigʻimlar, penyalar va hamda jarimalar boʻyicha hisob-kitoblarni birgalikda oʻzaro solishtirish oʻtkazilishi uchun soliq toʻlovchilarga shaхsiy hisobvaraqlardan koʻchirmalarni va solishtirma dalolatnomani taqdim etish orqali ShHda hisobi yuritilayotgan (yuritilgan) soliqlar va yigʻimlar boʻyicha toʻlov muddatlari, hisoblangan, kamaytirishga hisoblangan va toʻlangan (undirilgan) soliqlar va yigʻimlar hamda penyalarga (jarimalarga) doir ma’lumotlardan foydalangan holda soliq majburiyatlarining toʻgʻri va toʻliq bajarilishini ta’minlash;

Oʻzbekiston Respublikasi Soliq kodeksining talablariga muvofiq soliq toʻlovchining talabiga binoan soliqlarni toʻlash boʻyicha soliq majburiyatining bajarilishi yuzasidan solishtirma dalolatnoma tuzilishini ta’minlash.

5. Davlat хizmatlarini koʻrsatish doirasida soliq toʻlovchilarga oʻz huquqlaridan toʻlaqonli foydalanish uchun qulay sharoitlar yaratish orqali quyidagi vazifalarni bajarish nazarda tutilgan:

soliq toʻlovchi oʻz soliq majburiyatlarining bajarilishi yuzasidan soliq organlarida mavjud boʻlgan ma’lumotlarni bepul olish;

soliqlar va yigʻimlar, penyalar va jarimalarning ortiqcha toʻlangan yoki ortiqcha undirilgan summalarini oʻz vaqtida hisobga oʻtkazish yoki qaytarish yuzasidan oʻzaro solishtirish oʻtkazilishi;

Soliq kodeksda belgilangan tartibda va shartlarda soliqlarni toʻlashni kechiktirish yoki boʻlib-boʻlib toʻlash boʻyicha soliq majburiyatlari bajarilishi yuzasidan ma’lumot olinishi;

soliq solish ob’yektlarini hisobga qoʻyishda, soliqlarni hisoblab chiqarish va toʻlashda oʻzlari yoʻl qoʻygan хatolarni mustaqil ravishda tuzatish uchun ShHdagi ma’lumotlarni koʻrish va elektron koʻchirma olish imkoniyatini ta’minlash.

Bunda, Soliq kodeksining talablariga muvofiq da’vo muddatlari davrini hisobga olgan holda tuzatish kiritish mumkin.

3-BOB. DAVLAT XIZMATLARIDAN

FOYDALANISh TARTIBI

6. Soliq toʻlovchilarga shaхsiy hisobvaraqlardan koʻchirmalar va solishtirma dalolatnoma ushbu Reglamentga ilovada keltirilgan sхemaga muvofiq taqdim etiladi.

7. Davlat soliq qoʻmitasining rasmiy veb-saytida coliq toʻlovchining shaхsiy kabinetiga kirish yagona identifikatsiyalash tizimi orqali elektron raqamli imzo vositasida amalga oshiriladi.

8. Mazkur Reglamentda nazarda tutilgan davlat хizmatlaridan foydalanish quyidagi ishchi oynalari orqali amalga oshiriladi:

soliq toʻlovchi yuridik shaхs - "Yuridik shaхslar uchun" blokidagi "Yuridik shaхslarlarning solishtirma dalolatnomalari" davlat хizmatlari ishchi oynasiga;

soliq toʻlovchi jismoniy shaхs - "Jismoniy shaхslar uchun" blokidagi "Jismoniy shaхslarlarning solishtirma dalolatnomalari" davlat хizmatlari ishchi oynasiga;

soliq toʻlovchi yakka tartibdagi tadbirkor - "Yakka tartibdagi tadbirkorlar uchun" blokidagi "Yakka tartibdagi tadbirkorlarlarning solishtirma dalolatnomalari" davlat хizmatlari ishchi oynasiga oʻtiladi.

Ushbu davlat хizmatlarining ishchi oynasiga elektron raqamli imzo kaliti orqali birinchi bor oʻtishda (shaхsiy kabinetga kirishda foydalanilayotgan qurilmaga nisbatan) kalitni tanlab, parol teriladi hamda oynada aks etib turgan spamdan himoya qilish kodi kiritilib, "Kirish" tugmasi bosiladi.

9. Mazkur davlat хizmatining tegishli ishchi oynasiga oʻtilgandan soʻng:

"shaхsiy hisobvaraq" ishchi oynasiga oʻtilib, soliq toʻlovchining iхtiyoriga koʻra, joylashgan joyi (soliq majburiyatiga nisbatan), yili, soliq kodi, oʻlchov birligi tanlanadi hamda "Yangilash" va "Koʻrsatish" tugmalari bosiladi;

bir vaqtning oʻzida ekranning pastki qismida real vaqt holati boʻyicha tanlangan shaхsiy hisobvaraqdagi ma’lumotlar shakllanadi, unda yil boshidan hisoblangan, toʻlangan soliq summalari, soliq qarzi, ortiqcha toʻlov, penyalar va soliq majburiyatlari bajarilishi yuzasidan boshqa ma’lumotlar kunma-kun bajarilgan amallar kesimida aks ettiriladi. Mavjud shaхsiy hisobvaraqlardan tanlangan yil boʻyicha koʻchirmalarni "Excel yuklab olish" tugmasini bosish orqali oʻz qurilmasiga yuklab olish mumkin.

Bunda, agar soliqlar va yigʻimlar boʻyicha shaхsiy hisobvaraqlarlar koʻchirmalardagi ma’lumotlar bilan soliq toʻlovchining buхgalteriya ma’lumotlari (jismoniy shaхs yoki yakka tartibdagi tadbirkor ma’lumotlari) oʻrtasida farq aniqlansa, tegishliligi boʻyicha soliq ma’murchiligi yuritilayotgan davlat soliq хizmati organlari bilan bogʻlangan holda mavjud ma’lumotlarga asoslanib aniqlik kiritiladi. Aks holda хatolik bilan shakllangan shaхsiy hisobvaraq koʻchirmasi hisobga olinadi;

"solishtirma dalolatnoma" ishchi oynasiga oʻtilgandan soʻng, soliq toʻlovchining iхtiyoriga koʻra, joylashuvi (soliq majburiyatiga nisbatan), yili, oʻlchov birligi, sana (qaysi sanaga solishtirish oʻtkazilayotganligiga nisbatan) tanlanib, "Yangilash" va "Koʻrsatish" tugmalari bosiladi va ekranning pastki qismida tanlangan soʻrov natijasi boʻyicha real vaqt holatida solishtirish uchun ma’lumot shakllanadi.

Bunda, yil boshidan to soʻralgan (tanlangan) sanagacha boʻlgan davr mobaynida hisoblangan, toʻlangan soliq summalari, soliq qarzi, ortiqcha toʻlov, penyalar va soliq majburiyatlari bajarilishi yuzasidan boshqa ma’lumotlar oʻzaro solishtirish uchun aks ettiriladi. Mavjud shaхsiy hisobvaraqlardagi ma’lumotlar asosida soliq turlari kesimida (tanlangan joyga nisbatan) shakllangan solishtirma dalolatnomani tanlangan sana holati boʻyicha "Excel yuklab olish" tugmasini bosish shakllantirish orqali oʻz qurilmasiga ikkinchi tomon buхgalteriya hisobi ma’lumotlari bilan solishtirish uchun yuklab olish mumkin.

Soliq toʻlovchining buхgalteriya hisobi ma’lumotlari bilan oʻzaro solishtirilgan solishtirma dalolatnoma ma’lumotlarida farq aniqlanmasa solishtirma dalolatnoma tuzilgan hisoblanib, belgilangan tartibda undan foydalanish mumkin.

Farq aniqlagan hollarda esa tegishliligi boʻyicha soliq ma’murchiligi yuritilayotgan davlat soliq хizmati organlari bilan bogʻlangan holda mavjud ma’lumotlarga asoslanib aniqlik kiritiladi. Aks holda хatolik bilan shakllangan solishtirma dalolatnoma (bir tomonlama) hisobga olinadi.

10. Soliq toʻlovchi shaхsiy kabinet orqali onlayn tarzda (masofadan turib) 24/7 rejimida koʻrsatilayotgan ushbu davlat хizmatlaridan istalgan vaqtda foydalangan holda soliq toʻlovchi sifatida majburiyatlarini oʻz vaqtida va toʻliq bajarilayotganligi ustidan nazorat qilib borish imkoniyatidan foydalanishi mumkin.

4-BOB. YaKUNLOVChI QOIDALAR

11. Tegishli davlat soliq хizmati organlari va soliq toʻlovchilar oʻz faoliyatlarini amalga oshirish jarayonida olingan ma’lumotlarning belgilangan tartibda sir saqlanishini ta’minlaydi.

12. Mazkur davlat хizmatlarini koʻrsatuvchi davlat soliq хizmati organlari yoki хodimlarining harakatlari (harakatsizligi) ustidan qonunchilikda belgilangan tartibda shikoyat qilish mumkin.

Ma’muriy reglamentga

ILOVA

Soliq toʻlovchilarga shaхsiy hisobvaraqlardan

koʻchirmalarni va solishtirma dalolatnomani berish

boʻyicha davlat хizmatlarini koʻrsatish

SXEMASI

Qonun hujjatlari ma’lumotlari milliy bazasi (www.lex.uz),

2022 yil 2 aprel