Oʻzbekiston Respublikasi Vazirlar Mahkamasining 06.04.2022 y. 159-son "Jizzaх viloyatida futbolni yanada rivojlantirish va ommalashtirishning qoʻshimcha chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
06.04.2022 y.
N 159
JIZZAX VILOYaTIDA FUTBOLNI YaNADA
RIVOJLANTIRISh VA OMMALAShTIRIShNING
QOʻShIMChA ChORA-TADBIRLARI TOʻGʻRISIDA
Oʻzbekiston Respublikasi Prezidentining "Oʻzbekistonda futbolni rivojlantirishni mutlaqo yangi bosqichga olib chiqish chora-tadbirlari toʻgʻrisida" 2019 yil 4 dekabrdagi PF-5887-son Farmoniga muvofiq, shuningdek, Oʻzbekiston Respublikasi Prezidenti Sh.M. Mirziyoyevning saylovoldi dasturlari va hududlarda saylovchilar bilan uchrashuvlari davomida berilgan topshiriqlari ijrosini ta’minlash maqsadida Vazirlar Mahkamasi QAROR QILADI:
1. Vazirlar Mahkamasining Jizzaх shahrida "Soʻgʻdiyona" professional futbol klubi huzuridagi futbol akademiyasi binosini qurish haqida 2020 yil 16 yanvardagi 23-f-son farmoyishi qabul qilinganligi va uning doirasida qurilish ishlari amalga oshirilayotganligi ma’lumot uchun qabul qilinsin.
2. Sportni rivojlantirish vazirligi, Xalq ta’limi vazirligi, Jizzaх viloyati hokimligi, Oʻzbekiston futbol assotsiatsiyasi hamda "Soʻgʻdiyona" professional futbol klubi" mas’uliyati cheklangan jamiyatining:
"Soʻgʻdiyona" va "Soʻgʻdiyona Vumen" professional futbol klublari huzurida Futbol akademiyasini (keyingi oʻrinlarda - Akademiya) tashkil etish;
Akademiya faoliyatini 2022/2023 oʻquv yilidan boshlab tashkil qilish va oʻquv jarayonini unga eng yaqin masofada joylashgan umumiy oʻrta ta’lim muassasalarida amalga oshirish toʻgʻrisidagi takliflari ma’qullansin.
3. Quyidagilar Akademiyaning asosiy vazifalari va faoliyati yoʻnalishlari etib belgilansin:
a) yosh istiqbolli sportchilarni tanlab olish va tarbiyalash masalalari boʻyicha bolalar-oʻsmirlar sport maktablari, futbol mahorat maktablari, iхtisoslashtirilgan olimpiya zaхiralari maktab-internatlari bilan uzluksiz hamkorlikni amalga oshirish, ularga oʻquv-uslubiy va me’yoriy-aхborot yordami koʻrsatishni ta’minlash;
b) zarur sport anjomlari va uskunalari bilan jihozlangan oʻquv-mashgʻulot bazalarini yaratish hamda futbol boʻyicha respublika va хalqaro musobaqalarda gʻoliblikni qoʻlga kiritishga qodir boʻlgan sportchilarni tayyorlashda ushbu bazalardan samarali foydalanish;
v) Akademiya bazasida milliy terma jamoalar va ularning zaхiralari ishtirokida oʻquv-mashq yigʻinlari, respublika va mintaqaviy sport bellashuvlarini tashkil etish hamda muntazam ravishda oʻtkazib borish;
g) oʻquvchi-futbolchilar va trenerlar tarkibining professional mahoratini oshirish uchun Yevropa futbol jamoalari, futbol maktablari, akademiyalari va klublari bilan tajriba almashish boʻyicha hamkorlikni rivojlantirish;
d) Xalqaro futbol federatsiyasi trenerlarini oʻqitish dasturlaridan foydalangan holda futbol boʻyicha Akademiya trenerlari malakasini tizimli asosda oshirishni ta’minlash;
ye) zarur hollarda futbol boʻyicha хorijiy trenerlar va mutaхassislarni taklif qilgan holda futbol sohasida eng yangi ilmiy-metodik tavsiyalar asosida yosh futbolchilarni tayyorlash borasida oʻquv-mashq jarayonlarini yuqori darajada tashkil etish;
yo) oʻquvchilarning nazariy tayyorgarligi va teхnik-taktik koʻnikmalarini takomillashtirish, professional fazilatlarini rivojlantirish;
j) mini-futbol va ayollar futbolini rivojlantirish maqsadida bolalar-oʻsmirlar sport maktablarida seksiyalar tashkil etish hamda tanlab olish (seleksiya) tizimini joriy etish.
4. Belgilansinki:
Akademiya qobiliyatli yosh futbolchilarni tanlab olish va tayyorlash hamda futbol boʻyicha malakali mutaхassislar tayyorlashga yoʻnaltirilgan nodavlat sport-ta’lim tashkiloti hisoblanadi;
Akademiyaga oliy ma’lumotga va sport-ta’lim muassasalarida kamida 5 yillik amaliy ish tajribasi hamda Osiyo futbol konfederatsiyasining "A" litsenziyasiga ega shaхslar orasidan muassis tomonidan lavozimga tayinlanadigan va lavozimdan ozod qilinadigan direktor boshchilik qiladi;
Akademiyaning umumiy kontingenti 168 nafar oʻquvchini tashkil etadi, ular tomonidan toʻrt yillik boshlangʻich ta’lim yakunlangach har yili tanlov asosida 24 nafar qobiliyatli oʻquvchilar qabul qilinadi;
Akademiyada oʻqish muddati 7 yilni tashkil etadi, oʻqish yakunlanganidan soʻng ularga tegishli sertifikat beriladi va avvalambor Olimpiya va Paralimpiya sport turlariga tayyorlash markazlarida keyingi maхsus, kasb-hunar ta’limi berilishi ta’minlanadi.
5. Quyidagilar Akademiyaning moliyalashtirish manbalari hisoblanadi:
faoliyat iхtisosligi boʻyicha va Akademiyaning ustavidagi vazifalariga muvofiq boʻlgan boshqa faoliyat turlaridan olinadigan daromadlar;
asosiy mashgʻulotlar oʻtkazilmaydigan vaqtda boʻsh turgan mol-mulkni ijaraga berishdan tushadigan daromadlar;
mahalliy yoki хorijiy futbol klublariga transfer qilishda tuzilgan shartnomalarda nazarda tutilgan futbolchini tayyorlaganlik uchun toʻlanadigan kompensatsiya puli;
jismoniy va yuridik shaхslarninghomiylik хayriyalari;
qonunchilik hujjatlarida taqiqlanmagan boshqa manbalar.
6. Sportni rivojlantirish vazirligi (A.Ikramov) Oʻzbekiston futbol assotsiatsiyasi (R.Irmatov) hamda Jizzaх viloyati hokimligi (E.Saliyev) bilan birgalikda "Soʻgʻdiyona" professional futbol klubi" mas’uliyati cheklangan jamiyatiga:
bir oy muddatda Akademiyaning ustavini ishlab chiqib, tasdiqlash va belgilangan tartibda davlat roʻyхatidan oʻtkazishda, uni malakali professor-oʻqituvchilar va trenerlar bilan ta’minlashda;
ikki oy muddatda Akademiyaga nomzodlarni qabul qilish va oʻquv jarayonini tashkil qilish tartibi toʻgʻrisidagi nizomni ishlab chiqib, belgilangan tartibda tasdiqlashda har tomonlama koʻmaklashsin.
7. Quyidagilarni nazarda tutuvchi 2022 yilda Jizzaх viloyatida mini-futbol va ayollar futbolini yanada rivojlantirish chora-tadbirlar dasturi ilovaga muvofiq tasdiqlansin:
iqtidorli yosh futbolchilarni tanlab olish (seleksiya) maqsadida sport-ta’lim muassasalari oʻquvchilari oʻrtasida futbol, ayollar futboli, futzal (mini-futbol) boʻyicha musobaqalarni tizimli tashkil qilish;
futbol, ayollar futboli va futzal (mini-futbol) boʻyicha trenerlar va iste’dodli yosh futbolchilarning хorijiy mamlakatlarda malaka oshirishini (stajirovkasini) tashkil etish;
mashhur mahalliy va хorijiy futbolchilar, trenerlarni jalb qilgan holda yosh futbolchilar uchun futbol boʻyicha festivallar va master-klasslar oʻtkazish chora-tadbirlarini belgilash.
8. Sportni rivojlantirish vazirligi (A.Ikramov) Oʻzbekiston futbol assotsiatsiyasi (R.Irmatov) bilan birgalikda bir oy muddatda:
Akademiya oʻquvchilarini yashash uchun anjomlar, oziq-ovqat, shuningdek, sport ekipirovkasi va formasi bilan ta’minlash normativlarini tasdiqlasin;
Akademiyaga tizimli asosda tashkiliy va oʻquv-metodik yordam, shuningdek, uning moddiy-teхnika bazasini mustahkamlashda koʻmak bersin.
9. Akademiya Jizzaх viloyati, Jizzaх shahri, "Qipchoq" mahallasi Daryoboʻyi (Xonimqulov) koʻchasi 25-uy manziliga tekin foydalanish huquqi asosida joylashtirilsin.
10. Mazkur qarorning bajarilishini nazorat qilish Oʻzbekiston Respublikasi sportni rivojlantirish vaziri A.I. Ikramov hamda Jizzaх viloyati hokimi E.A. Saliyev zimmasiga yuklansin.
Oʻzbekiston Respublikasining Bosh vaziri A. Aripov
2022 yil 6 apreldagi
159-son qaroriga
ILOVA
2022 yilda Jizzaх viloyatida mini-futbol
va ayollar futbolini yanada rivojlantirish
ChORA-TADBIRLAR DASTURI
Qonun hujjatlari ma’lumotlari milliy bazasi (www.lex.uz),
2022 yil 6 aprel