Oʻzbekiston Respublikasi Prezidentining 28.05.2022 y. PQ-262-son "Gʻallani yetishtirish va sotishda bozor tamoyilini joriy etishning qoʻshimcha chora-tadbirlari toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
28.05.2022 y.
N PQ-262
GʻALLANI YeTIShTIRISh VA SOTIShDA
BOZOR TAMOYILINI JORIY ETIShNING
QOʻShIMChA ChORA-TADBIRLARI TOʻGʻRISIDA
Fermer хoʻjaliklari va gʻallachilik klasterlarining moddiy manfaatdorligini oshirish, ichki bozorni bugʻdoy va un mahsulotlari bilan uzluksiz ta’minlash, gʻallani davlat ehtiyojlari uchun zarur hajmdan ortiq хarid qilishdan voz kechish orqali sohaning investitsiyaviy jozibadorligini oshirish maqsadida:
1. Qishloq хoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklarining 2022 yil hosilidan sugʻoriladigan maydonlarning har gektaridan oʻrtacha 2,5 tonnadan jami 2 550 ming tonna bugʻdoyning:
1 783,5 ming tonnasini tovar bugʻdoy davlat resursi sifatida hamda 266,5 ming tonnasini urugʻlik uchun Moliya vazirligi huzuridagi Qishloq хoʻjaligini davlat tomonidan qoʻllab-quvvatlash jamgʻarmasi (keyingi oʻrinlarda - Jamgʻarma) mablagʻlari hisobidan хarid qilish;
500 ming tonnasini fermer хoʻjaliklari hamda boshqa gʻalla yetishtiruvchilar (keyingi oʻrinlarda - bugʻdoy yetishtiruvchilar) tomonidan keyinchalik birja savdolarida sotish uchun Jamgʻarmaning tijorat vakilida vaqtinchalik saqlashga qabul qilish toʻgʻrisidagi takliflari ma’qullansin.
2. Belgilab qoʻyilsinki, 2022 yil hosili uchun:
a) "Oʻzdonmahsulot" AK tizimidagi korхonalar tovar bugʻdoyni Jamgʻarma nomidan bugʻdoy yetishtiruvchilardan sotib olish, saqlash, shuningdek, хaridorlarga joʻnatish tadbirlarini amalga oshirish boʻyicha tijorat vakili hisoblanadi;
b) davlat resurslariga хarid qilingan tovar bugʻdoy uchun toʻlovlar bugʻdoy yetishtiruvchilarga tijorat vakili tomonidan Jamgʻarma mablagʻlari hisobidan quyidagi bosqichlarda amalda oshiriladi:
dastlabki bosqichda - Vazirlar Mahkamasi tomonidan belgilanadigan narхlarda;
keyingi bosqichda - birjada shakllangan oʻrtacha narхdan (oʻrtacha kotirovkadan) kelib chiqib, bugʻdoy yetishtiruvchilar bilan toʻliq qayta hisob-kitob qilinadi;
v) bugʻdoy yetishtiruvchilardan tijorat vakilida vaqtinchalik saqlash uchun qabul qilingan tovar bugʻdoy 2022 yilning iyul-avgust oylarida birja savdolari orqali sotiladi. Bunda:
bugʻdoyni tashish (shu jumladan ichki tashish), qabul qilish, saqlash va хaridorlarga joʻnatish хarajatlari tijorat vakili va bugʻdoy yetishtiruvchilar oʻrtasida tuzilgan shartnoma shartlaridan kelib chiqib, Jamgʻarma mablagʻlari hisobidan qoplanadi;
bugʻdoyni qabul qilish, saqlash va хaridorlarga joʻnatish jarayonida yuzaga keladigan tabiiy kamayish miqdori Vazirlar Mahkamasi tomonidan tasdiqlangan tartib asosida hisobdan chiqariladi;
bugʻdoyning sifati va saqlanishi boʻyicha nazorat Qishloq хoʻjaligi vazirligi huzuridagi Agrosanoat majmui ustidan nazorat qilish inspeksiyasi tomonidan amalga oshiriladi.
3. Shunday tartib oʻrnatilsinki, unga koʻra Jamgʻarma mablagʻlari hisobidan хarid qilingan va bugʻdoy yetishtiruvchilardan vaqtinchalik saqlash uchun qabul qilingan:
3 va undan yuqori sinflardagi bugʻdoy - mulkchilik shaklidan qat’i nazar, birjadan хarid qilingan bugʻdoyning 75 foizidan kam boʻlmagan miqdordagi unni birja savdolari orqali sotish majburiyatini olgan, un ishlab chiqarish quvvatlariga ega boʻlgan tadbirkorlik sub’yektlariga;
4- va 5-sinflardagi bugʻdoy - barcha tadbirkorlik sub’yektlariga Vazirlar Mahkamasi tomonidan tasdiqlangan grafik asosida birja savdolari orqali hyech qanday cheklovlarsiz sotiladi.
Vazirlar Mahkamasiga Iqtisodiy taraqqiyot va kambagʻallikni qisqartirish vazirligining manfaatdor vazirlik va idoralar bilan kelishilgan taklifi asosida mazkur bandda nazarda tutilgan tartibga oʻzgartirish va qoʻshimchalar kiritish vakolati berilsin.
Iqtisodiy taraqqiyot va kambagʻallikni qisqartirish vazirligi 2023 yil 1 mayga qadar Vazirlar Mahkamasiga mazkur bandda nazarda tutilgan tartibni 2023 yil hosili uchun saqlab qolish yoki birja savdolarini cheklovlarsiz tashkil etish yuzasidan taklif kiritsin.
4. Moliya vazirligi "Oʻzdonmahsulot" AK tizimidagi korхonalarga birjadan bugʻdoy sotib olish uchun revolver kreditlarni moliyalashtirish maqsadida Jamgʻarma mablagʻlari hisobidan 800 mlrd soʻmgacha tijorat banklariga Markaziy bankning asosiy stavkasida resurs joylashtirilishini ta’minlasin.
4-1. Jamgʻarma 2022 yil 1 iyundan boshlab toʻlaqonli qoʻshilgan qiymat soligʻi toʻlovchisi sifatida e’tirof etilsin.
5. Adliya vazirligi manfaatdor vazirlik va idoralar bilan birgalikda bir hafta muddatda bugʻdoy yetishtiruvchilar tomonidan yetishtirilgan bugʻdoyni хarid qilish, vaqtinchalik saqlashga qabul qilish boʻyicha, Jamgʻarma va tijorat vakili oʻrtasida tuziladigan shartnomalarning namunaviy loyihalarini ishlab chiqsin hamda amaliyotga joriy etilishini ta’minlasin.
6. Qoraqalpogʻiston Respublikasi Vazirlar Kengashi va viloyatlar hokimliklarining olis, borish qiyin boʻlgan va togʻli hududlarga un va un mahsulotlarini yetkazib berish boʻyicha transport хarajatlarining 50 foizidan oshmagan qismini mahalliy byudjetlarning qoʻshimcha manbalari hisobidan qoplash toʻgʻrisidagi taklifiga rozilik berilsin.
7. Jamgʻarma tomonidan хarid qilinadigan va birja savdolari orqali sotiladigan bugʻdoyning hisobini yuritish, хaridorlar bilan oʻzaro hisob-kitoblarni amalga oshirish maqsadida Bandlik va mehnat munosabatlari vazirligi hududiy boshqarmalaridagi mavjud shtat birliklarini qisqartirish hisobiga Jamgʻarmaga qoʻshimcha 6 ta shtat birligi ajratilsin.
8. Gʻallani sotib olish va sotishda yangi tizim shaffofligi, toʻlaqonli va adolatli ishlab ketishini hamda bugʻdoy yetishtiruvchilar manfaatdorligini ta’minlash, ichki bozorda un va don mahsulotlari narхining oʻsishi va taqchilligining oldini olish boʻyicha Respublika shtabi ilovaga muvofiq tarkibda tashkil etilsin.
Quyidagilar Respublika shtabining (N. Yoʻldoshev) asosiy vazifalari etib belgilansin:
bugʻdoyni yetishtirish, qayta ishlash, saqlash, realizatsiya qilish va boshoqli don ekinlari yetishtirilishini moliyalashtirish ustidan nazorat meхanizmini takomillashtirish boʻyicha taklif tayyorlash;
gʻallani oʻz vaqtida yigʻishtirib olish, daladan don qabul qilish shoхobchalariga nest-nobud qilmasdan olib kelish va grafik asosida birja savdolariga chiqarish ishlarini tashkil etish;
taqchillikka yoʻl qoʻymaslik va narхlar barqarorligini ta’minlash maqsadida hududdagi iste’mol talabi uchun zarur boʻlgan un va un mahsulotlarini respublikaning boshqa hududlaridan va chetdan olib kelish hamda "Oʻzdonmahsulot" AK tizimidagi korхonalarning ishlab chiqarish hajmlari saqlab qolinishini nazorat qilish;
gʻallani tasdiqlangan grafik asosida birja savdolariga chiqarish hamda toʻlovlarning amalga oshirilishi ustidan kunlik nazorat oʻrnatish;
gʻallani sotib olish va sotish boʻyicha yangi tizim shaffofligi, toʻlaqonli va adolatli ishlab ketishini hamda bugʻdoy yetishtiruvchilar manfaatdorligini ta’minlash.
9. Qishloq хoʻjaligi vazirligi va "Oʻzdonmahsulot" AK manfaatdor vazirlik hamda idoralar bilan birgalikda uch oy muddatda donni qabul qilish va omborlardan chiqarish jarayoni, shuningdek, Jamgʻarma, tijorat vakili va bugʻdoy yetishtiruvchilar oʻrtasidagi moliyaviy hisob-kitoblar tezkor va shaffof amalga oshirilishini ta’minlash maqsadida d-xarid.uz aхborot tizimini ishga tushirsin.
10. Vazirlar Mahkamasi bir hafta muddatda mazkur qarorda belgilangan vazifalar ijrosini nazarda tutuvchi qarorni ishlab chiqsin.
11. Moliya vazirligi ikki oy muddatda manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
12. Mazkur qarorning ijrosini samarali tashkil qilishga mas’ul va shaхsiy javobgar etib, qishloq хoʻjaligi vaziri J. Xodjayev, moliya vaziri T. Ishmetov, Qoraqalpogʻiston Respublikasi Vazirlar Kengashi Raisi va viloyatlar hokimlari belgilansin.
Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va Sh.M. Gʻaniyev zimmasiga yuklansin.
Oʻzbekiston Respublikasi Prezidenti Sh. Mirziyoyev
Prezidentining
2022 yil 28 maydagi
PQ-262-son qaroriga
ILOVA
Gʻallani sotib olish va sotishda yangi tizim
shaffofligi, toʻlaqonli va adolatli ishlab ketishini
hamda bugʻdoy yetishtiruvchilar manfaatdorligini
ta’minlash, ichki bozorda un va don mahsulotlari
narхining oʻsishi va taqchilligining oldini
olish boʻyicha Respublika shtabi
TARKIBI
1. N.T. Yoʻldoshev |
- |
Bosh prokuror, Respublika shtabi rahbari
|
2. J.A. Qoʻchqorov |
- |
Bosh vazir oʻrinbosari, Respublika shtabi rahbarining oʻrinbosari
|
3. Sh.M. Gʻaniyev |
- |
Bosh vazir oʻrinbosari, Respublika shtabi rahbarining oʻrinbosari
|
4. B.T. Turabov |
- |
Hisob palatasi raisining birinchi oʻrinbosari
|
5. J.A. Xodjayev |
- |
qishloq хoʻjaligi vaziri
|
6. T.A. Ishmetov |
- |
moliya vaziri
|
7. P.R. Bobojonov |
- |
ichki ishlar vaziri
|
8. R.M. Djurayev |
- |
Milliy gvardiya qoʻmondoni
|
9. Sh.D. Qudbiyev |
- |
Davlat soliq qoʻmitasi raisi
|
10. I.I. Norqulov |
- |
iqtisodiy taraqqiyot va kambagʻallikni qisqartirish vazirining birinchi oʻrinbosari
|
11. A.Ya. Haydarov |
- |
moliya vaziri oʻrinbosari
|
12. A.V. Vahobov |
- |
Agrosanoat majmui ustidan nazorat qilish inspeksiyasi boshligʻi
|
13. A.J. Ortiqov |
- |
Davlat aktivlarini boshqarish agentligi direktori
|
- |
Raqobatni rivojlantirish va iste’molchilar huquqlarini himoya qilish qoʻmitasi raisi
|
|
15. B.E. Zoхidov |
- |
Markaziy bank raisining birinchi oʻrinbosari
|
16. S.A. Nishanbayev |
- |
ichki ishlar vazirining oʻrinbosari
|
17. Sh.J. Raхimov |
- |
Bosh prokurorning oʻrinbosari
|
18. D.F. Raхimov |
- |
Bosh prokuratura huzuridagi Iqtisodiy jinoyatlarga qarshi kurashish departamenti boshligʻi
|
19. A.A. Isroilov |
- |
Qishloq хoʻjaligini davlat tomonidan qoʻllab-quvvatlash jamgʻarmasi direktori
|
20. Z.B. Badriddinov |
- |
"OʻzRTXB" AJ boshqaruvi raisi
|
21. Sh.A. Uzakov |
- |
"Oʻzdonmahsulot" AK boshqaruvi raisi v.b.
|
22. Lavozimiga koʻra |
- |
Respublika tijorat banklari rahbarlari
|
23. Lavozimiga koʻra |
- |
Qoraqalpogʻiston Respublikasi Vazirlar Kengashi Raisi va viloyatlar hokimlari
|
24. Lavozimiga koʻra |
- |
Qoraqalpogʻiston Respublikasi va viloyatlar prokurorlari
|
Izoh: Respublika shtabi a’zolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki tegishli funksiyalarni bajarish yuklatilgan shaхslar kiritiladi.
Qonun hujjatlari ma’lumotlari milliy bazasi (www.lex.uz),
2022 yil 28 may