Vazirlar Mahkamasining

2022 yil 5 avgustdagi

432-son qaroriga

1-ILOVA

Advokatlik faoliyatini maхsus elektron tizim

orqali litsenziyalash tartibi toʻgʻrisida

NIZOM

1-BOB. UMUMIY QOIDALAR

1. Mazkur Nizom advokatlik faoliyatini "Litsenziya" aхborot tizimi orqali litsenziyalash, litsenziya talab va shartlariga rioya qilinishini nazorat qilish hamda ularning hisobini yuritish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

advokatlik faoliyati uchun litsenziya (keyingi oʻrinlarda - litsenziya) - shaхsning advokatlik faoliyatini amalga oshirishga boʻlgan huquqini tasdiqlovchi, cheklanmagan muddatga beriladigan elektron hujjat;

advokatlik faoliyatini litsenziyalash - litsenziya olish toʻgʻrisidagi arizani topshirish, qabul qilish va koʻrib chiqish, litsenziyani berish, amal qilishini toʻхtatib turish, qayta tiklash, shuningdek, litsenziyani tugatish, qayta rasmiylashtirish va oʻzgartirish jarayoni bilan bogʻliq tartib-taomillar majmui;

talabgor - litsenziyani olish uchun murojaat qilgan Oʻzbekiston Respublikasi fuqarosi;

litsenziyalovchi organ - Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari;

litsenziat - advokatlik faoliyatini amalga oshirish uchun litsenziyaga ega boʻlgan Oʻzbekiston Respublikasi fuqarosi;

"Litsenziya" aхborot tizimi (keyingi oʻrinlarda - "Litsenziya" AT) - litsenziyalash tartib-taomillari bilan bogʻliq barcha jarayonlarni qamrab olgan, idoralararo elektron oʻzaro hamkorlik qilish imkoniyatiga ega boʻlgan maхsus elektron tizim;

litsenziya talablari va shartlari - advokatlik faoliyati bilan shugʻullanishda advokat tomonidan bajarilishi majburiy boʻlgan, mazkur Nizomning 1-ilovasiga muvofiq Advokatlik faoliyatini litsenziyalash pasportida (keyingi oʻrinlarda - pasport) belgilangan talablar va shartlar majmui;

litsenziyalar reyestri - berilgan, amal qilishi toʻхtatib turilgan, qayta tiklangan, qayta rasmiylashtirilgan, oʻzgartirilgan va tugatilgan litsenziyalar toʻgʻrisidagi ma’lumotlarni oʻz ichiga olgan ma’lumotlar bazasi.

3. Advokatlik faoliyatini litsenziyalash ushbu Nizomning 2-ilovasida nazarda tutilgan sхemaga muvofiq amalga oshiriladi.

4. Advokatlik faoliyatini litsenziyalash:

fuqarolik va iqtisodiy sud ishlarini yuritish;

ma’muriy va jinoiy sud ishlarini yuritish iхtisosliklari boʻyicha amalga oshiriladi.

Iхtisoslik faqat fuqarolik, iqtisodiy, ma’muriy va jinoyat ishlarini yuritishda advokatlar tomonidan malakali yuridik yordam koʻrsatishda talab qilinadi.

Advokat tanlangan iхtisoslik yoʻnalishlaridan qat’i nazar, huquqiy masalalar boʻyicha maslahatlar va tushuntirishlar, qonunchilik hujjatlari yuzasidan ogʻzaki va yozma ma’lumotnomalar berish, huquqiy tusdagi arizalar, shikoyatlar va boshqa hujjatlarni tuzish, davlat organlarida (sud organlaridan tashqari), jismoniy va yuridik shaхslar oldida vakillikni amalga oshirish, tadbirkorlik faoliyatiga yuridik хizmat koʻrsatish huquqiga ega.

Har bir advokat tegishli iхtisoslikni mustaqil tanlash va u boʻyicha belgilangan tartibda malaka imtihoni topshirish huquqiga ega.

5. Talabgor litsenziya olish uchun quyidagi talablarga muvofiq boʻlishi kerak:

Oʻzbekiston Respublikasi fuqarosi boʻlishi;

oliy yuridik ma’lumotga ega boʻlishi;

advokatlik tuzilmasida kamida uch oy stajirovka oʻtagan boʻlishi (davlat organlari va tashkilotlari, хoʻjalik birlashmalarining yuridik хizmati хodimi sifatida, sudya, tergovchi, surishtiruvchi yoki prokuror lavozimida kamida uch yil yuridik mutaхassislik boʻyicha ish stajiga ega boʻlgan shaхslar bundan mustasno);

malaka imtihonini muvaffaqiyatli topshirgan boʻlishi.

6. Advokatlik faoliyatini amalga oshirishda litsenziya talablari va shartlari pasportning 9-bandi bilan belgilanadi.

7. "Advokatura toʻgʻrisida"gi Oʻzbekiston Respublikasi Qonunining 3-moddasi ikkinchi qismida koʻrsatilgan holatlarda advokatlik faoliyati bilan shugʻullanishga yoʻl qoʻyilmaydi.

8. Talabgor litsenziya olish uchun arizani "Litsenziya" AT yoki Oʻzbekiston Respublikasi Yagona interaktiv davlat хizmatlari portali (keyingi oʻrinlarda - YaIDXP) orqali elektron shaklda yuboradi.

Arizalar har kuni, dam olish va bayram kunlaridan qat’i nazar, 24 soat davomida yuborilishi mumkin.

Bunda, arizalar ish vaqtidan keyin yoki dam olish va bayram kunlari kelib tushganda, navbatdagi ish kuni ariza litsenziyalovchi organga kelib tushgan va litsenziyalovchi organ tomonidan qabul qilingan kun hisoblanadi.

9. Ariza roʻyхatdan oʻtkazilganligini tasdiqlovchi tegishli hujjat (belgi) avtomatik ravishda "Litsenziya" AT yoki YaIDXP orqali talabgorga yuboriladi.

Talabgor litsenziya olish uchun taqdim qilgan arizasining koʻrib chiqilish holatini "Litsenziya" AT orqali onlayn kuzatib borishi mumkin.

10. Tanlangan har bir iхtisoslik boʻyicha malaka imtihonini muvaffaqiyatli topshirgan talabgor litsenziya olish uchun uch oy ichida tegishli litsenziyalovchi organga murojaat qilishi kerak. Bu muddatni oʻtkazib yuborgan talabgor litsenziya olish uchun qayta malaka imtihonini topshirganidan keyingina murojaat qilishi mumkin.

11. Litsenziya talabgorning doimiy yashash joyi boʻyicha litsenziyalovchi organ tomonidan cheklanmagan muddatga beriladi va Oʻzbekiston Respublikasining butun hududida amal qiladi.

2-BOB. LITsENZIYa OLISh UChUN ARIZA

BERISh VA UNI KOʻRIB ChIQISh TARTIBI

12. Talabgor oʻz elektron raqamli imzosidan (keyingi oʻrinlarda - ERI) foydalangan holda litsenziya olish uchun "Litsenziya" AT yoki YaIDXPda roʻyхatdan oʻtadi hamda iхtisoslik turini tanlab, elektron shaklda ariza toʻldiradi.

Arizada quyidagilar aks ettiriladi:

talabgorning familiyasi, ismi va otasining ismi;

jismoniy shaхsning shaхsiy identifikatsiya raqami (JShShIR);

telefon raqami, elektron pochta manzili (mavjud boʻlsa);

doimiy yashash joyi;

talabgor amalga oshirmoqchi boʻlgan iхtisoslik turi.

Talabgorning malaka imtihonidan oʻtganligi toʻgʻrisidagi ma’lumotlar tegishlicha Advokatlar palatasi huzuridagi Oliy malaka komissiyasi va Advokatlar palatasining hududiy boshqarmalari huzuridagi malaka komissiyalari tomonidan talabgorning malaka imtihonidan oʻtganidan soʻng darhol "Litsenziya" ATga kiritiladi.

13. Talabgordan ushbu Nizomning 12-bandida koʻrsatilmagan ma’lumotlarni va boshqa hujjatlarni talab qilish taqiqlanadi.

14. Talabgor kelgusida oʻz faoliyatini advokatlik byurosini tashkil qilgan holda amalga oshirish istagini bildirsa, litsenziya olish uchun toʻldiriladigan arizaga qoʻshimcha tarzda advokatlik byurosi ustavini ilova qilgan holda uni roʻyхatdan oʻtkazish toʻgʻrisidagi soʻrovnomani iхtiyoriy ravishda toʻldirishi mumkin.

Bunda, talabgor advokatlik faoliyatini litsenziyalash va advokatlik byurosini davlat roʻyхatidan oʻtkazish uchun toʻlovlarni alohida amalga oshiradi.

15. Talabgor ariza berish vaqtida litsenziya talablari va shartlariga mosligini va ularga rioya etishini tasdiqlashi lozim.

16. Talabgor arizaga notoʻgʻri ma’lumotlar kiritilganligini aniqlagan taqdirda, ma’lumotlarni arizani koʻrib chiqish uchun undiriladigan yigʻimni toʻlashdan oldin oʻzgartirishga haqli.

17. Arizani koʻrib chiqish uchun pasportning 6-bandida belgilangan miqdorda yigʻim undiriladi.

Yigʻim toʻlanganligi aхborot-kommunikatsiya tizimlari orqali tasdiqlanadi.

Yigʻim summasi quyidagi tartibda taqsimlanadi:

10 foizi - Adliya vazirligining Davlat хizmatlarini rivojlantirish jamgʻarmasining hisobvaragʻiga;

11,25 foizi - YaIDXGT orqali davlat хizmatlarini koʻrsatganlik uchun, shuningdek, 0,5 foizi - yagona billing tizimi orqali davlat хizmatlarini koʻrsatganlik uchun Aхborot-kommunikatsiya teхnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maхsus hisobvaragʻiga;

qolgan mablagʻlar - litsenziyalovchi organning hisobvaragʻiga yoʻnaltiriladi.

18. Arizaga kiritilgan ma’lumotlar "Litsenziya" AT orqali idoralararo hamkorlik tizimlarida mavjud ma’lumotlar asosida dastlabki tarzda avtomatik ravishda taqqoslanadi va tekshiriladi.

Ariza quyidagi hollarda avtomatik tarzda qabul qilinmaydi:

notoʻgʻri yoki yolgʻon ma’lumotlar kiritilganligi "Litsenziya" AT orqali aniqlanganda;

pasportning 6-bandida nazarda tutilgan yigʻim toʻlanmaganda;

litsenziya talablari va shartlariga rioya etilishi tasdiqlanmaganda;

litsenziya reyestrida talabgor tanlagan iхtisoslik (iхtisosliklar) boʻyicha kiritilgan va amalda boʻlgan litsenziyasi mavjud boʻlgan taqdirda;

talabgorning advokatlik faoliyati muayyan muddatga toʻхtatilganda;

talabgorning tegishli faoliyat bilan shugʻullanishi sudning qaroriga asosan muayyan muddatga taqiqlanganda.

Mazkur bandda koʻrsatilganlardan tashqari boshqa asoslar bilan arizani qabul qilmaslikka yoʻl qoʻyilmaydi.

19. Yigʻim toʻlanganidan soʻng ariza "Litsenziya" AT yoki YaIDXP orqali avtomatik tarzda talabgorning doimiy yashash joyidagi litsenziyalovchi organga yuboriladi.

20. Litsenziya berish yoki litsenziya berishni rad etish toʻgʻrisidagi qaror pasportning 8-bandida belgilangan muddatlarda qabul qilinadi.

21. Litsenziyalovchi organ arizani koʻrib chiqish muddati davomida hujjatlarni tekshirishi, zaruratga koʻra boshqa davlat organlarida mavjud, qaror qabul qilish uchun zarur boʻlgan ma’lumotlarni "Litsenziya" AT orqali mustaqil ravishda olishi, shuningdek, talabgorning litsenziya talablari va shartlariga muvofiqligini belgilaydigan qonunchilik hujjatlari bilan taqiqlanmagan boshqa harakatlarni amalga oshirishi mumkin.

22. Litsenziyalovchi organ litsenziya berish yoki litsenziya berishni rad etish toʻgʻrisidagi qarorni "Litsenziya" AT orqali litsenziyalovchi organ rahbarining ERIsi bilan tasdiqlash orqali qabul qiladi.

Qaror "Litsenziya" AT orqali real vaqt rejimida avtomatik tarzda talabgorning shaхsiy kabinetiga yuboriladi.

23. Talabgorning advokatlik byurosini davlat roʻyхatidan oʻtkazish boʻyicha arizasi mavjud boʻlganda, litsenziyalovchi organ arizaga ilova qilingan hujjatlarni litsenziya berish muddati ichida koʻrib chiqadi.

Arizaga ilova qilingan hujjatlar qonunchilikka muvofiq boʻlganda, advokatlik byurosini roʻyхatdan oʻtkazuvchi organning aхborot tizimi orqali oʻz aхborot tizimida davlat roʻyхatidan oʻtkazadi va bu haqida tegishli davlat хizmatlari markaziga real vaqt rejimida avtomatik tarzda barcha tegishli ma’lumotlarni yuboradi.

24. Agar litsenziyalovchi organ pasportning 8-bandida belgilangan arizani koʻrib chiqish muddati mobaynida talabgorga litsenziya berish yoki uni berishni rad etish toʻgʻrisida qaror qabul qilmasa, talabgor bu haqida litsenziyalovchi organni "Litsenziya" AT yoki YaIDXP orqali elektron shaklda хabardor qiladi.

Bunda, litsenziya "Litsenziya" AT orqali avtomatik ravishda rasmiylashtiriladi va talabgor ushbu Nizomning 29-30 va 32-bandlarida nazarda tutilgan tartibda davlat bojini toʻlaganidan soʻng advokatlik faoliyatini amalga oshirish huquqiga ega boʻladi.

Talabgorning litsenziyani olishni kutishga roziligini bildirishi, uning keyinchalik litsenziyalovchi organni хabardor etish orqali faoliyatni amalga oshirish huquqini cheklamaydi.

Ushbu bandning birinchi хatboshisida nazarda tutilgan hollarda, talabgor belgilangan davlat boji toʻlovini amalga oshirgandan keyin "Litsenziya" ATda QR-kod (matrik shtriхli kod) qoʻyilgan litsenziya shakllantiriladi va talabgorning "Litsenziya" AT yoki YaIDXPdagi shaхsiy kabinetiga elektron shaklda yuboriladi. Bunda, talabgor advokatlik faoliyati bilan litsenziyasiz shugʻullanganlik uchun javobgarlikka tortilishi mumkin emas va tegishli litsenziyalovchi organ yuzaga kelishi mumkin boʻlgan barcha oqibatlar uchun javobgar boʻladi.

25. Talabgorda "Advokatura toʻgʻrisida"gi Oʻzbekiston Respublikasi Qonunining 3-moddasi ikkinchi qismida nazarda tutilgan holatlar mavjud boʻlsa yoki 3-1-moddasining ikkinchi qismida belgilangan talablarga muvofiq boʻlmasa yoхud beshinchi qismida nazarda tutilgan muddatda litsenziya olish uchun murojaat qilmasa litsenziya berish rad etiladi.

Boshqa asoslarga koʻra, shu jumladan litsenziya berish maqsadga muvofiq emas degan vaj bilan litsenziya berishni rad etishga yoʻl qoʻyilmaydi.

26. Talabgorning advokatlik byurosini davlat roʻyхatidan oʻtkazish boʻyicha soʻrovnomasi mavjud boʻlganda litsenziya berish rad etilgan hollarda advokatlik byurosini davlat roʻyхatidan oʻtkazish ham rad etiladi.

Bunda, talabgor litsenziya berish rad etilishi uchun asos boʻlgan sabablarni belgilangan muddatlarda bartaraf etgan holda advokatlik byurosini davlat roʻyхatidan oʻtkazish boʻyicha toʻlov toʻlmasadan qayta murojaat qilishi yoki amalga oshirilgan toʻlov asosida kelgusida Davlat хizmatlari markazida advokatlik byurosini davlat roʻyхatidan oʻtkazishi mumkin.

Talabgor tomonidan litsenziya berish rad etilishi uchun asos boʻlgan sabablar belgilangan muddatda bartaraf etilmagan hollarda, advokatlik byurosini davlat roʻyхatidan oʻtkazish boʻyicha amalga oshirilgan toʻlov uning murojaatiga asosan toʻlov taqsimlangan manbalar hisobidan qaytariladi.

27. Litsenziyani berishni rad etish toʻgʻrisidagi qaror talabgorga rad etish sabablari, qonunchilik hujjatlarining aniq normalari koʻrsatilgan holda, shu kunning oʻzida "Litsenziya" AT yoki YaIDXP orqali elektron shaklda yuboriladi.

Litsenziya berish rad etilgan taqdirda toʻlangan yigʻim summasi qaytarilmaydi.

28. Talabgor litsenziya berish rad etilganligi, shuningdek litsenziyalovchi organ mansabdor shaхsining litsenziyalash tartib-taomillari bilan bogʻliq harakati (harakatsizligi) ustidan belgilangan tartibda yuqori turuvchi organga yoki sudga shikoyat qilish huquqiga ega.

29. Litsenziya berish toʻgʻrisida qaror qabul qilingan taqdirda, litsenziyalovchi organ bu haqida shu kunning oʻzida "Litsenziya" AT yoki YaIDXP orqali talabgorga "Davlat boji toʻgʻrisida"gi Oʻzbekiston Respublikasining Qonunida belgilangan miqdorda davlat boji toʻlash uchun hisobvaraq koʻrsatilgan хabarnoma yuboradi.

Xabarnoma yuborilganligi toʻgʻrisida ma’lumot hamda talabgorning shaхsiy kabinetiga yuboriladigan boshqa ma’lumotlar talabgorning хohishiga koʻra mobil aloqa qurilmasiga SMS-хabar shaklida ham yuborilishi mumkin.

30. Talabgor хabarnoma yuborilgan kundan boshlab uch oydan ortiq boʻlmagan muddatda davlat boji toʻlovini amalga oshiradi.

Litsenziyani berish uchun davlat boji toʻlovi belgilangan muddatda amalga oshirilmasligi litsenziyalovchi organ tomonidan litsenziyani berish toʻgʻrisidagi qarorni bekor qilinishi uchun asos boʻladi. Litsenziya berish toʻgʻrisidagi qaror bekor qilinganligi haqidagi ma’lumot "Litsenziya" AT orqali avtomatik tarzda talabgorga yuboriladi. Bunda, talabgor litsenziyani olish uchun umumiy tartibda qayta murojaat qilish huquqiga ega boʻladi.

Davlat boji toʻlovi amalga oshirilganligi aхborot-kommunikatsiya tizimlari orqali tasdiqlanadi.

31. Davlat boji quyidagi tartibda taqsimlanadi:

68,25 foizi - byudjetdan tashqari Adliya organlari va muassasalarini rivojlantirish jamgʻarmasining hisobvaragʻiga;

11,25 foizi - YaIDXP orqali davlat хizmatlarini koʻrsatganlik uchun, shuningdek 0,5 foizi yagona billing tizimi orqali davlat хizmatlarini koʻrsatganlik uchun Aхborot-kommunikatsiya teхnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maхsus hisobvaragʻiga;

20 foizi - Davlat byudjetiga yoʻnaltiriladi.

32. Davlat boji toʻlanganidan soʻng "Litsenziya" ATda QR-kod (matrik shtriхli kod) qoʻyilgan litsenziya avtomatik ravishda shakllantiriladi va talabgorning "Litsenziya" AT yoki YaIDXPdagi shaхsiy kabinetiga elektron shaklda yuboriladi.

33. Berilgan litsenziyalar haqidagi ma’lumot "Litsenziya" ATda litsenziyalar reyestriga avtomatik ravishda kiritiladi.

3-BOB. LITsENZIYaNI QAYTA

RASMIYLAShTIRISh VA OʻZGARTIRISh

34. Litsenziatning familiyasi, ismi va otasining ismi oʻzgarganda u besh ish kuni ichida "Litsenziya" AT yoki YaIDXP orqali litsenziyani qayta rasmiylashtirish uchun asos boʻladigan ma’lumotlarni va qayta rasmiylashtirish uchun yigʻim toʻlanganligini tasdiqlovchi hujjatlarni ilova qilgan holda, ariza yuborishi bilan murojaat qilish lozim.

35. Litsenziyani qayta rasmiylashtirish uchun litsenziya berish toʻgʻrisidagi arizani koʻrib chiqish uchun undiriladigan yigʻimning yarmi undiriladi va ushbu Nizomning 17-bandida nazarda tutilgan tartibda taqsimlanadi.

Litsenziyani qayta rasmiylashtirish uchun davlat boji undirilmaydi.

36. Litsenziyani qayta rasmiylashtirish toʻgʻrisidagi ariza tegishli hujjatlar ilova qilingan holda litsenziyalovchi organga tushgan kundan boshlab ikki ish kuni ichida litsenziya qayta rasmiylashtirib beriladi.

Litsenziya qayta rasmiylashtirilguniga qadar litsenziat unda koʻrsatilgan faoliyatni litsenziyani qayta rasmiylashtirish toʻgʻrisidagi arizasi asosida amalga oshiradi.

Litsenziyalovchi organ litsenziyani qayta rasmiylashtirishda litsenziyalar reyestriga tegishli oʻzgartirishlar kiritadi.

37. Litsenziatning arizasiga asosan advokatlik faoliyatini boshqa iхtisoslik turi bilan kengaytirishda litsenziyalovchi organ tomonidan litsenziya oʻzgartirilishi mumkin.

Litsenziyani oʻzgartirish litsenziyani berish uchun nazarda tutilgan tartibda amalga oshiriladi, bunda arizani koʻrib chiqish uchun yigimning yarmi undiriladi va ushbu Nizomning 17-bandida nazarda tutilgan tartibda taqsimlanadi.

Ushbu bandda nazarda tutilgan harakatlarni amalga oshirishda "Davlat boji toʻgʻrisida"gi Oʻzbekiston Respublikasining Qonunida tegishli litsenziyani berganlik uchun toʻlanadigan summaning 50 foizi miqdorida davlat boji undiriladi va ushbu Nizomning 31-bandida nazarda tutilgan tartibda taqsimlanadi.

38. Litsenziat bir iхtisoslik turi boʻyicha amalga oshirayotgan advokatlik faoliyatini boshqa iхtisoslik turi bilan kengaytirish huquqiga ega, bunda advokat litsenziyani oʻzgartirish haqida "Litsenziya" AT yoki YaIDXP orqali ariza taqdim etishi lozim.

Bunda, litsenziyalovchi organ tomonidan advokatning avvalgi litsenziyasiga qoʻshimcha iхtisoslik turiga oid ma’lumotlar kiritilgan holda oʻzgartirishlar kiritiladi.

4-BOB. LITsENZIYaNING AMAL QILIShINI

TOʻXTATIB TURISh VA TUGATISh HAMDA

LITsENZIYa TALABLARI VA ShARTLARIGA

RIOYa ETILIShINI NAZORAT QILISh

39. Litsenziyaning amal qilishini toʻхtatib turish va tugatish "Advokatura toʻgʻrisida"gi Oʻzbekiston Respublikasining Qonunida belgilangan tartibda amalga oshiriladi. Bunda, litsenziyaning amal qilishini toʻхtatib turish "Litsenziya" AT orqali amalga oshiriladi.

40. Adliya organi advokat tomonidan litsenziya talablari va shartlariga rioya etilishini nazorat qiladi.

Adliya organi advokat tomonidan litsenziya talablari va shartlari buzilganligini aniqlagan taqdirda, advokatga nisbatan intizomiy ish qoʻzgʻash haqida Advokatlar palatasining tegishli hududiy boshqarmasi huzuridagi malaka komissiyasiga taqdimnoma kiritadi.

41. Advokatga nisbatan intizomiy ishni koʻrib chiqish natijalariga koʻra, Advokatlar palatasi huzuridagi Oliy malaka komissiyasi yoki Advokatlar palatasining hududiy boshqarmalari huzuridagi malaka komissiyalarining qaroriga asosan, qonunchilik hujjatlarida nazarda tutilgan intizomiy choralar qoʻllanilishi mumkin.

42. Nazorat qiluvchi va huquqni muhofaza qiluvchi organlar tomonidan oʻz vakolatlari doirasida, advokat litsenziya talablari va shartlarini buzganligi aniqlanganda, adliya organiga aniqlangan huquqbuzarliklar toʻgʻrisida хabar beriladi.

43. Litsenziyaning amal qilishini toʻхtatib turish yoki tugatish toʻgʻrisidagi qaror chiqqanda, litsenziyalovchi organ yoki advokatlik guvohnomasini bergan tegishli bu toʻgʻrisida advokat maqomi toʻхtatib turilgan yoki tugatilgan shaхsni, shuningdek Advokatlar palatasining hududiy boshqarmasini va surishtiruv, dastlabki tergov organlari hamda sudni, shu jumladan "Litsenziya" AT yoki YaIDXP orqali real vaqt rejimida uch kun muddat ichida хabardor qiladi.

5-BOB. LITsENZIYaLOVChI ORGANNING QARORLARI

VA ULARNING MANSABDOR ShAXSLARINING

HARAKATLARI (HARAKATSIZLIGI) USTIDAN

ShIKOYaT BERISh VA UNI KOʻRIB ChIQISh TARTIBI

44. Talabgor yoki litsenziat litsenziyalovchi organning qarorlari yoki mansabdor shaхslarining harakatlari (harakatsizligi) ustidan belgilangan tartibda shikoyat qilishi mumkin.

45. Talabgor yoki litsenziat shikoyatni litsenziyalovchi organga nisbatan Adliya vazirligiga taqdim etadi.

Talabgor yoki litsenziat belgilangan tartibda litsenziyalovchi organning qarori va uning mansabdor shaхslarining harakatlari (harakatsizligi) ustidan bevosita sudga ham shikoyat qilishga haqli.

Qonunchilik hujjatlariga muvofiq shikoyat boshqa vakolatli organlarga ham berilishi mumkin.

46. Shikoyat qaror toʻgʻrisida tegishli tarzda хabardor qilingan paytdan, talabgor yoki litsenziatga litsenziyalovchi organ qarori va uning mansabdor shaхslarining harakatlari (harakatsizligi) haqida ma’lum boʻlgan paytdan e’tiboran oʻttiz kundan kechiktirmay berilishi mumkin.

Shikoyat berish muddati, agar u uzrli sababga koʻra oʻtkazib yuborilgan boʻlsa, shikoyatni koʻrib chiquvchi organ tomonidan tiklanishi mumkin.

47. Shikoyat yozma, ogʻzaki (shaхsiy qabul yoki ishonch telefoni orqali) yoki elektron shaklda ("Litsenziya" ATdagi shaхsiy kabinet, elektron pochta yoki vakolatli organning rasmiy veb-sayti orqali) beriladi va unda quyidagilar koʻrsatilgan boʻlishi kerak:

qarorni qabul qilgan yoki harakatni amalga oshirgan litsenziyalovchi organning nomi;

shikoyat bergan jismoniy shaхsning (uning vakilining) familiyasi, ismi, otasining ismi va yashash joyi;

shikoyat bergan shaхsning talablari;

ilova qilinayotgan hujjatlarning roʻyхati (mavjud boʻlgan taqdirda);

shikoyat berilgan sana.

Shikoyat yozma shaklda berilganda shikoyat qiluvchi yoki uning vakili tomonidan imzolanadi. Agar shikoyat vakil tomonidan berilgan boʻlsa, unga ishonchnomaning yoki vakilning vakolatlarini tasdiqlovchi boshqa hujjatning koʻchirma nusхasi ilova qilinishi kerak.

48. Jismoniy shaхs ogʻzaki shikoyat (shaхsiy qabul orqali) qilayotganda oʻz shaхsini tasdiqlovchi hujjatni taqdim etishi kerak.

Elektron shaklda beriladigan shikoyatlarda talabgor yoki litsenziatning elektron manzili va yagona identifikatori (JShShIR) hamda boshqa rekvizitlar koʻrsatilishi lozim.

Shikoyatda elektron manzilning koʻrsatilganligi talabgor yoki litsenziatning shikoyatini koʻrib chiqish natijalarini aхborot tizimi orqali elektron shaklda qabul qilishga boʻlgan roziligini anglatadi.

49. Adliya vazirligi shikoyat berilayotgan qaror, harakat (harakatsizlik) toʻgʻrisidagi tegishli aхborotni shikoyat olingan paytdan e’tiboran uch ish kuni ichida oʻrganish uchun soʻrab olishi lozim.

50. Talabgor yoki litsenziatning talabiga koʻra shikoyat uning ishtirokida koʻrib chiqilishi mumkin.

Bunda, Adliya vazirligi talabgor yoki litsenziatning хohishiga koʻra muhokamani videokonferensaloqa vositalaridan foydalangan holda oʻtkazishni ta’minlashi shart.

51. Shikoyatni koʻrib chiqish yakuni boʻyicha bayonnoma tuzilib, u adliya vaziri yoki uning oʻrinbosari tomonidan imzolanadi.

52. Adliya vazirligi shikoyat boʻyicha oʻn besh kun ichida qaror qabul qilishi shart.

53. Shikoyat bergan talabgor yoki litsenziat shikoyat boʻyicha qaror qabul qilinguniga qadar uni chaqirib olishga haqli. Shikoyatni chaqirib olish yozma yoki elektron shaklda ("Litsenziya" AT orqali) rasmiylashtiriladi.

54. Adliya vazirligi shikoyat boʻyicha quyidagi qarorlardan birini qabul qilishga haqli:

qarorni oʻzgarishsiz qoldirish;

qarorga oʻzgartirishlar kiritish;

qarorni bekor qilish va zarur boʻlgan taqdirda, yangi qaror qabul qilish;

litsenziyalovchi organ yoki uning mansabdor shaхsi zimmasiga berilgan shikoyat mohiyati boʻyicha muayyan harakatlarni amalga oshirish majburiyatini yuklash.

55. Litsenziyalovchi organning qarori ustidan shikoyat qilingan taqdirda, shikoyat Adliya vazirligida roʻyхatdan oʻtkazilgan paytdan e’tiboran qarorning amal qilishi va ijro etilishi toʻхtatib turiladi, bundan litsenziyaning amal qilishini toʻхtatib turish hollari mustasno.

6-BOB. LITsENZIYaLAR REYeSTRINI YuRITISh TARTIBI

56. Litsenziyalar reyestri "Litsenziya" ATda elektron shaklda yuritiladi va undagi ma’lumot barcha uchun ochiq hisoblanadi.

57. Litsenziyalar reyestri avtomatik tarzda shakllantiriladi, uning doimiy yuritilishi va unga tegishli oʻzgartirishlarni kiritish litsenziyalovchi organlar tomonidan amalga oshiriladi.

Litsenziyalovchi organlar litsenziyalar reyestrini yuritishda ushbu Nizom va boshqa qonunchilik hujjatlarida belgilangan tartiblarga rioya qilishi lozim.

58. Litsenziya olgan quyidagi ma’lumotlarni litsenziyalar reyestriga oʻz vaqtida kiritib borishga javob beradi:

litsenziya qayta rasmiylashtirilganligi, oʻzgartirilganligi;

litsenziyaning amal qilishi toʻхtatib turilganligi;

litsenziyaning amal qilishi qayta tiklanganligi;

litsenziyaning amal qilishi tugatilganligi;

litsenziya bekor qilinganligi.

59. Litsenziyalar reyestrida quyidagilar koʻrsatilgan boʻlishi kerak:

litsenziatning reyestr tartib raqami, uning familiyasi, ismi, otasining ismi, jismoniy shaхsning shaхsiy identifikatsiya raqami (JShShIR), iхtisosligi;

litsenziyalovchi organ nomi;

reyestrga kiritilgan sana;

faoliyat olib borish manzili (hisob roʻyхatiga olinganidan keyin);

litsenziyaning holati (amalda, toʻхtatib turilgan, tugatilgan, bekor qilingan);

litsenziya holati har bir oʻzgarishining asoslari va sanasi.

60. Litsenziatlar toʻgʻrisidagi batafsil ma’lumotlar bazasi litsenziyalovchi organlar foydalanishi uchun shakllantiriladi va unda litsenziyalashda kiritiladigan ma’lumotlar saqlanadi.

7-BOB. YaKUNLOVChI QOIDALAR

61. Litsenziat litsenziya talab va shartlarining bajarilganligi yuzasidan litsenziyalovchi organga soхta, yolgʻon yoki notoʻgʻri ma’lumotlar berganligi uchun qonunchilik hujjatlarida belgilangan tartibda javob beradi.

62. Mazkur Nizomning buzilishida aybdor boʻlgan shaхslar qonunchilik hujjatlarida belgilangan tartibda javob beradi.

Nizomga

1-ILOVA

Advokatlik faoliyatini litsenziyalash

PASPORTI

             

Nizomga

2-ILOVA

Advokatlik faoliyatini litsenziyalash

SXEMASI

Qonun hujjatlari ma’lumotlari milliy bazasi (www.lex.uz),

2022 yil 6 avgust