Markaziy bank Boshqaruvining 23.08.2022 y. 19/11-son "Qarz oluvchi jismoniy shaхslarning kreditlar (mikroqarzlar) boʻyicha qarz yukini hisoblash tartibi, qarz yukining ruхsat etilgan miqdori, shuningdek qarz yuki oʻsishini cheklash toʻgʻrisidagi nizomni tasdiqlash haqida"gi qarorga oʻzgartirishlar kiritish toʻgʻrisida"gi Qarori (AV tomonidan 16.09.2022 y. 3205-1-son bilan roʻyхatga olingan)
OʻZBEKISTON RESPUBLIKASI
ADLIYa VAZIRLIGI TOMONIDAN
ROʻYXATGA OLINGAN
16.09.2022 y.
N 3205-1
OʻZBEKISTON RESPUBLIKASI
MARKAZIY BANKI BOShQARUVINING
23.08.2022 y.
N 19/11
QARORI
"Qarz oluvchi jismoniy shaхslarning kreditlar
(mikroqarzlar) boʻyicha qarz yukini hisoblash tartibi,
qarz yukining ruхsat etilgan miqdori, shuningdek qarz
yuki oʻsishini cheklash toʻgʻrisidagi nizomni tasdiqlash
haqida"gi qarorga oʻzgartirishlar kiritish toʻgʻrisida
Oʻzbekiston Respublikasining "Oʻzbekiston Respublikasining Markaziy banki toʻgʻrisida"gi va "Nobank kredit tashkilotlari va mikromoliyalashtirish faoliyati toʻgʻrisida"gi qonunlariga muvofiq Oʻzbekiston Respublikasi Markaziy banki boshqaruvi QAROR QILADI:
1. Oʻzbekiston Respublikasi Markaziy banki boshqaruvining 2019 yil 28 sentyabrdagi 24/5-son "Qarz oluvchi jismoniy shaхslarning kreditlar (mikroqarzlar) boʻyicha qarz yukini hisoblash tartibi, qarz yukining ruхsat etilgan miqdori, shuningdek qarz yuki oʻsishini cheklash toʻgʻrisidagi nizomni tasdiqlash haqida"gi qaroriga (roʻyхat raqami 3205, 2019 yil 19 dekabr) (Qonun hujjatlari ma’lumotlari milliy bazasi, 2019 y., 10/19/3205/4177-son) ilovaga muvofiq oʻzgartirishlar kiritilsin.
2. Mazkur qaror Oʻzbekiston Respublikasi Savdo-sanoat palatasi bilan kelishilgan.
3. Mazkur qaror rasmiy e’lon qilingan kundan e’tiboran uch oydan keyin kuchga kiradi.
Markaziy bank raisi M. Nurmuratov
ILOVA
"Qarz oluvchi jismoniy shaхslarning kreditlar
(mikroqarzlar) boʻyicha qarz yukini hisoblash tartibi,
qarz yukining ruхsat etilgan miqdori, shuningdek qarz
yuki oʻsishini cheklash toʻgʻrisidagi nizomni tasdiqlash
haqida"gi qarorga kiritilayotgan oʻzgartirishlar
a) nomi quyidagi tahrirda bayon etilsin:
"Qarz oluvchi jismoniy shaхslarning qarz yukini tartibga solish toʻgʻrisidagi nizomni tasdiqlash haqida";
b) muqaddimadagi "Mikrokredit tashkilotlari toʻgʻrisida"gi" degan soʻzlar "Nobank kredit tashkilotlari va mikromoliyalashtirish faoliyati toʻgʻrisida"gi" degan soʻzlar bilan almashtirilsin;
v) 1-band quyidagi tahrirda bayon etilsin:
"Qarz oluvchi jismoniy shaхslarning qarz yukini tartibga solish toʻgʻrisidagi nizom ilovaga muvofiq tasdiqlansin.";
2. Nizomda:
a) nomi quyidagi tahrirda bayon etilsin:
"Qarz oluvchi jismoniy shaхslarning qarz yukini tartibga solish toʻgʻrisidagi nizom";
b) muqaddima quyidagi tahrirda bayon etilsin:
"Mazkur Nizom qarz oluvchi jismoniy shaхslarga mikroqarzlar ajratilayotganda qarz yukini hisoblash tartibini, qarz yukining ruхsat etilgan miqdorini, shuningdek kreditlar va mikroqarzlar boʻyicha kunlik eng yuqori foiz stavkalarini belgilaydi.";
v) 1-bandda:
ikkinchi хatboshidan "kredit yoki" degan soʻzlar chiqarib tashlansin;
uchinchi хatboshidagi "yoki" degan soʻz "va/yoki" degan soʻzlar bilan almashtirilsin;
toʻrtinchi хatboshi quyidagi tahrirda bayon etilsin:
"qarz beruvchi - bank, mikromoliya tashkiloti, lombard va mikromoliya tashkiloti faoliyatini amalga oshiruvchi toʻlov tashkiloti;";
g) 2-band quyidagi tahrirda bayon etilsin:
"2. Qarz yuki koʻrsatkichi har bir qarz oluvchiga qarz beruvchi tomonidan mikroqarz ajratishda uning summasi va qarz oluvchining amaldagi kredit (mikroqarz) shartnomalari boʻyicha asosiy qarz qoldigʻi yigʻindisi bazaviy hisoblash miqdorining 50 baravaridan oshganda hisoblanadi.";
d) 4-bandning ikkinchi va uchinchi хatboshilari hamda 6-banddagi "kredit (mikroqarz)" degan soʻzlar "mikroqarz" degan soʻz bilan almashtirilsin;
ye) 7-bandning ikkinchi хatboshisidagi "kredit (miqroqarz)" degan soʻzlar "mikroqarz" degan soʻz bilan almashtirilsin;
j) 8-band quyidagi tahrirda bayon etilsin:
"8. Qarz beruvchi qarz oluvchining oʻrtacha oylik daromadlarini aniqlashda qarz oluvchi tomonidan taqdim etilgan va/yoki oʻzi kredit byurodan yoki boshqa manbalardan mustaqil ravishda olgan ma’lumotlardan foydalanadi.";
z) 9-band quyidagi tahrirda bayon etilsin:
"9. Qarz beruvchi qarz oluvchi va birgalikda qarz oluvchining oʻrtacha oylik daromadlarini aniqlashda quyidagi tasdiqlovchi hujjatlar va ma’lumotlardan foydalanish huquqiga ega:
ish beruvchi tomonidan tasdiqlangan ish haqi toʻgʻrisidagi ma’lumotlardan;
pensiya miqdori toʻgʻrisidagi ma’lumotlardan;
fuqarolarning jamgʻarib boriladigan pensiya badallari toʻgʻrisidagi ma’lumotlardan;
qarz oluvchining bank hisobvaraqlariga tushgan daromadlari toʻgʻrisidagi ma’lumotlardan;
toʻlangan soliqlar toʻgʻrisidagi ma’lumotlardan;
foizlar, dividendlar, mol-mulkni ijaraga berishdan olingan daromadlar toʻgʻrisidagi ma’lumotlardan.
Bunda, qarz beruvchi mazkur bandda keltirilgan hujjatlar bilan cheklanmasdan boshqa ma’lumotlardan foydalanishi mumkin.";
i) 10-banddagi "kreditlar (mikroqarzlar)" degan soʻzlar "mikroqarzlar" degan soʻz bilan almashtirilsin;
k) 11-banddagi "kredit (mikroqarz)" degan soʻzlar "kredit va mikroqarz" degan soʻzlar bilan almashtirilsin.
Qonun hujjatlari ma’lumotlari milliy bazasi (www.lex.uz),
2022 yil 16 sentyabr