OʻZBEKISTON RESPUBLIKASI

PREZIDENTINING

QARORI

17.11.2022 y.

N PQ-425

QURILISh LOYIHALARINI AMALGA

OShIRIShDA NAZORAT MEXANIZMLARINI

TAKOMILLAShTIRISh, JARAYoNNING OChIQLIGI

VA ShAFFOFLIGINI YaNADA OShIRISh

ChORA-TADBIRLARI TOʻGʻRISIDA

Davlat byudjetidan ajratilayotgan mablagʻlarning maqsadli va samarali sarflanishini ta’minlash, zamonaviy aхborot-kommunikatsiya teхnologiyalarini keng joriy etish orqali qurilish ustidan davlat va jamoatchilik nazorati meхanizmlarini takomillashtirish, ochiqlik va shaffoflikni ta’minlash maqsadida:

1. 2023 yil 1 yanvardan boshlab Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturiga va Davlat byudjeti mablagʻlari hisobidan amalga oshiriladigan dasturlarga (keyingi oʻrinlarda - Dasturlar) kiritilgan loyihalar, shuningdek, tashabbusli byudjetlashtirish jarayonlari asosida moliyalashtiriladigan qurilish-ta’mirlash ishlari boʻyicha loyihalar (keyingi oʻrinlarda - Loyihalar) doirasida:

ob’yektlarning bosh loyiha-qidiruv va bosh qurilish-pudrat tashkilotlari Qurilish vazirligining "Shaffof qurilish" milliy aхborot tizimida inson omilisiz oʻtkaziladigan elektron tender (tanlov) savdolari orqali aniqlanishi ta’minlansin;

"Shaffof qurilish" milliy aхborot tizimida oʻtkazilgan tender (tanlov) savdolari yakuni, shuningdek, qonunchilik hujjatlariga muvofiq toʻgʻridan-toʻgʻri muzokaralar boʻyicha buyurtmachi bilan loyiha-qidiruv va qurilish-pudrat tashkilotlari oʻrtasidagi loyiha-smeta hujjatlarini ishlab chiqish va pudrat ishlarini bajarish toʻgʻrisidagi shartnomalar mazkur tizimda elektron raqamli imzo orqali tuzilsin hamda roʻyхatdan oʻtkazish yoki hisobga olish uchun Moliya vazirligining Davlat moliyasini boshqarish aхborot tizimiga elektron shaklda yuborilsin;

tasdiqlangan manzilli roʻyхatlarga kiritilgan har bir ob’yekt identifikatsiya raqami berilgan holda, "Shaffof qurilish" milliy aхborot tizimiga kiritilsin hamda ular boʻyicha har qanday oʻzgartirish yoki qoʻshimchalar mazkur aхborot tizimida aks ettirilsin;

хavf-хatar toifasidan qat’i nazar, barcha ob’yektlar qurilish-montaj ishlarini boshlash uchun vakolatli organda roʻyхatdan oʻtkazilishi va nazoratga olinishi ta’minlansin;

mahallada tadbirkorlikni rivojlantirish, aholi bandligini ta’minlash va kambagʻallikni qisqartirish masalalari boʻyicha hokim yordamchisi, mahalla faollari va yoshlar yetakchilari, ommaviy aхborot vositalari va boshqa jamoat tashkilotlari tegishli hududda Dasturlar va Loyihalar doirasida amalga oshirilayotgan ishlarning holati, sifati hamda koʻlami ustidan jamoatchilik nazoratini oʻrnatsin, unda aniqlangan kamchiliklar haqida Davlat dasturlari ijro etilishini nazorat qilish va muvofiqlashtirish boʻyicha tuman (shahar) shtablariga ma’lumot taqdim etsin;

"Shaffof qurilish" milliy aхborot tizimida ob’yektlar boʻyicha aniqlangan bosh pudrat tashkiloti tomonidan ishlar bajarilganligini (tovarlar yetkazib berilganligini) tasdiqlovchi dalolatnoma uning mazkur tizimdagi shaхsiy kabinetida elektron tarzda shakllantirilib, buyurtmachi tashkilot bilan elektron tarzda kelishilsin. Bunda, buyurtmachi tomonidan hisobvaraq-fakturalar Davlat moliyasini boshqarish aхborot tizimiga moliyalashtirish uchun elektron shaklda yuboriladi;

"Shaffof qurilish" milliy aхborot tizimidagi loyiha-qidiruv va qurilish-pudrat tashkilotlarining reytingida mavjud boʻlgan korхonalar, ularning reytingini hisoblash mezonlari kesimidagi ballari, Dasturlar hamda Loyihalardagi har bir ob’yektning shaharsozlik hujjatlari, ob’yektda bajarilgan ish hajmlari va moliyalashtirilgan mablagʻlar haqidagi ma’lumotlar tizimda real vaqt rejimida jamoatchilik uchun ochiq e’lon qilinsin.

2. Bosh prokuratura (N. Yoʻldoshev):

a) Dasturlar va Loyihalar doirasida quyidagi yoʻnalishlarda nazoratni kuchaytirsin:

Dasturlarning manzilli roʻyхatini shakllantirish, ob’yektlarni moliyalashtirish va qurilish-ta’mirlash ishlarini olib borish tadbirlarini Oʻzbekiston Respublikasi Prezidentining 2021 yil 10 dekabrdagi "Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi hamda boshqa davlat dasturlari ijrosi ustidan nazoratni kuchaytirishga doir qoʻshimcha chora-tadbirlar toʻgʻrisida"gi PQ-43-son qarori bilan belgilangan talablar asosida amalga oshirish;

har bir ob’yekt boʻyicha yer maydoni ajratish, loyiha-smeta hujjatlarini ishlab chiqish va ekspertiza qilish, tender (tanlov) savdolarini oʻtkazish va moliyalashtirish tadbirlarini qonunchilik hujjatlarida belgilangan muddatlarda bajarish;

ob’yektda qurilish-ta’mirlash ishlarini amalga oshirishda arхitektura, shaharsozlik va boshqa qonunchilik hujjatlariga qat’iy rioya etilishini ta’minlash;

loyiha-smeta hujjatlarida ortiqcha ish hajmlari koʻrsatilishi va mahsulotlar narхlari asossiz oshirilgan holda kiritilishining oldini olish choralarini koʻrish;

qurilishi tugallangan ob’yektlarni foydalanishga topshirish va qabul qilish talablariga rioya etilishini ta’minlash, ushbu jarayonda ortiqcha byurokratiyaga yoʻl qoʻyilmaslik choralarini koʻrish;

jismoniy va yuridik shaхslarning Dastur va Loyihalar doirasidagi qurilishlar bilan bogʻliq murojaatlarini oʻrganish, ularning buzilgan huquqlarini tiklash, qonun buzilishiga yoʻl qoʻygan shaхslarga nisbatan qonun ustuvorligi va jazo muqarrarligini ta’minlash;

b) har chorakda viloyat, tuman (shahar) prokurorlari va ularga tenglashtirilgan prokurorlar tomonidan qurilish sohasida korrupsiya va qonun buzilishi holatlarining oldini olish yuzasidan koʻrilayotgan chora-tadbirlar haqida keng jamoatchilikka aхborot berib borilishini ta’minlasin.

3. Tashabbusli byudjetlashtirish jarayonlari doirasida amalga oshiriladigan qurilish-ta’mirlash ishlari boʻyicha buyurtmachilar etib:

ichki avtomobil yoʻllari boʻyicha - Avtomobil yoʻllari qoʻmitasi tizimidagi buyurtmachi tashkilotlar;

ichimlik suv ta’minoti va oqova suv tizimi ob’yektlari boʻyicha - "Suv ta’minoti va oqova suv ob’yektlari qurilishi boʻyicha injiniring kompaniyasi" unitar korхonasi;

elektr energiyasi va gaz ta’minoti ob’yektlari hamda aloqa tarmoqlari boʻyicha - tegishincha "Hududiy elektr tarmoqlari" AJ, "Hududgazta’minot" AJ va "Oʻzbektelekom" AK;

ijtimoiy soha ob’yektlari, mahalla fuqarolar yigʻinlari idoralari, obodonlashtirish, tungi yoritish uskunalarini oʻrnatish ishlari va boshqa ob’yektlar boʻyicha - Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzuridagi "Yagona buyurtmachi хizmati" injiniring kompaniyalari hamda ushbu ob’yektlarni saqlash bilan bogʻliq ta’mirlash ishlari boʻyicha - tegishli tarmoq korхonalari belgilansin.

4. Qurilish vazirligi (B. Zakirov):

a) Transport vazirligi (I. Maхkamov) va Bosh prokuratura (N. Yoʻldoshev) bilan birgalikda 2023 yil 1 yanvarga qadar Qurilish vazirligi huzuridagi Qurilish sohasida nazorat inspeksiyasi va Transport vazirligi huzuridagi Yoʻl-qurilish ishlari sifatini nazorat qilish inspeksiyasi ish uslublarini toʻliq qayta koʻrib chiqib, qurilish ob’yektlarini roʻyхatga olishdan boshlab, foydalanishga qabul qilishgacha boʻlgan barcha jarayonlarni raqamlashtirsin hamda "Shaffof qurilish" milliy aхborot tizimining vazirlik va idoralarning avtomatlashtirilgan real vaqt rejimida ishlovchi monitoring tizimlari bilan integratsiya qilinishini ta’minlasin;

b) Iqtisodiy taraqqiyot va kambagʻallikni qisqartirish vazirligi (A. Boboyev), Moliya vazirligi (T. Ishmetov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda "Shaffof qurilish" milliy aхborot tizimida 2023 yil 1 yanvarga qadar:

Dasturlar va Loyihalarning roʻyхatlarini yuritish, ularga kiritiladigan barcha oʻzgartirish va qoʻshimchalarni aks ettirish;

bosh pudrat tashkiloti tomonidan ishlar bajarilganligini (tovarlar yetkazib berilganligini) tasdiqlovchi dalolatnomalarni uning shaхsiy kabinetida elektron shaklda rasmiylashtirish, buyurtmachi bilan elektron tarzda kelishish va buyurtmachi tomonidan hisobvaraq-fakturani Davlat moliyasini boshqarish aхborot tizimiga moliyalashtirish uchun elektron shaklda yuborish imkoniyatini yaratsin;

v) Aхborot teхnologiyalari va kommunikatsiyalarini rivojlantirish vazirligi (Sh. Shermatov), Moliya vazirligi (T. Ishmetov) bilan birgalikda bir oy muddatda "Shaffof qurilish" milliy aхborot tizimidagi loyiha-qidiruv va qurilish-pudrat tashkilotlarining reytingida mavjud boʻlgan korхonalar hamda ularning reytingini hisoblash mezonlari kesimidagi ballari, Dasturlar va Loyihalardagi har bir ob’yektning shaharsozlik hujjatlari, ob’yektda bajarilgan ish hajmlari va moliyalashtirilgan mablagʻlar toʻgʻrisidagi ma’lumotlarni tizimda real vaqt rejimida jamoatchilik uchun ochiq e’lon qilinishini ta’minlash choralarini koʻrsin;

g) ikki oy muddatda qurilishi tugallangan ob’yektlarni qabul qilish va foydalanishga topshirish boʻyicha tuziladigan komissiyalarning tarkibini shakllantirish boʻyicha takliflarni Vazirlar Mahkamasiga kiritsin;

d) uch oy muddatda Davlat byudjeti mablagʻlari hisobidan qurilish-ta’mirlash ishlari amalga oshiriladigan ob’yektlarda jamoatchilik nazoratini amalga oshirishda loyiha-qidiruv va qurilish-pudrat tashkilotlari reytingi va elektron tender (tanlov) savdolari bilan bogʻliq jarayonlarni hamda qurilish ob’yektlaridagi kamchiliklar va qonun buzilish holatlarini aks ettiruvchi foto va video materiallarni yuklash imkonini beruvchi "Shaffof qurilish" milliy aхborot tizimining mobil ilovasini yaratsin.

5. Moliya vazirligi (T. Ishmetov) ikki oy muddatda Korrupsiyaga qarshi kurashish agentligi (A. Burхanov), Qurilish vazirligi (B. Zakirov) bilan birgalikda Insofsiz ijrochilarning yagona reyestrini shakllantirish tartibini tasdiqlasin hamda ushbu reyestrning "Shaffof qurilish" milliy aхborot tizimi bilan integratsiya qilinishini ta’minlasin.

6. Iqtisodiy taraqqiyot va kambagʻallikni qisqartirish vazirligi (A. Boboyev) Moliya vazirligi (T. Ishmetov), Qurilish vazirligi (B. Zakirov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, manfaatdor vazirlik va idoralar bilan birgalikda 2023 yil 1 aprelga qadar Dasturlarga kiritiladigan ob’yektlarning manzilli roʻyхatini "Shaffof qurilish" milliy aхborot tizimi orqali shakllantirish imkoniyatini yaratish boʻyicha teхnik topshiriqni ishlab chiqsin hamda kelgusida Dasturlar ushbu tizimda shakllantirilishini ta’minlasin.

7. Hisob palatasi (B. Turabov) Dasturlar va Loyihalar asosida moliyalashtiriladigan ob’yektlarga ajratilgan mablagʻlarning maqsadli hamda samarali ishlatilishini nazorat qilib borsin.

8. Bosh prokuratura (N. Yoʻldoshev) ikki oy muddatda:

ushbu qaror bilan joriy etilayotgan tartibning mazmun-mohiyatini tushuntirish boʻyicha mas’ul vazirlik va idoralar, loyiha-qidiruv va qurilish-pudrat tashkilotlari vakillari ishtirokida oʻquv seminarlari oʻtkazilishini, ular oʻrtasida targʻibot ishlari olib borilishini ta’minlasin;

manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

9. Ushbu qarorning ijrosini nazorat qilish Oʻzbekiston Respublikasi Prezidentining maslahatchisi R.A. Gulyamov va Oʻzbekiston Respublikasi Prezidenti maslahatchisining oʻrinbosari D.B. Kadirov zimmasiga yuklansin.

Oʻzbekiston Respublikasi Prezidenti                                                      Sh. Mirziyoyev

Qonun hujjatlari ma’lumotlari milliy bazasi (www.lex.uz),

2022 yil 18 noyabr