OʻZBEKISTON RESPUBLIKASI

PREZIDENTINING

QARORI

23.12.2022 y.

N PQ-449

GIMNASTIKA SPORT TURLARINI

YaNADA RIVOJLANTIRISh ChORA-

TADBIRLARI TOʻGʻRISIDA

Aholi oʻrtasida gimnastika sport turlari (sport gimnastikasi, badiiy gimnastika, trampolin, akrobatika) ommaviyligini oshirish, yoshlar orasidan iqtidorli sportchilarni saralab olish tizimini takomillashtirish, хalqaro talab va standartlar asosida professional sportchilarni tayyorlash orqali milliy terma jamoalarimizning nufuzli musobaqalarda yuqori natijalarga erishishini ta’minlash maqsadida:

1. Quyidagilar gimnastika sport turlarini rivojlantirishning asosiy yoʻnalishlari etib belgilansin:

aholi oʻrtasida gimnastika sport turlarining ommaviyligini oshirish, iqtidorli sportchilarni aniqlash, tanlash va saralash (seleksiya) hamda ularni professional sportchilar sifatida tayyorlashning yangi tizimini yoʻlga qoʻyish;

maktabgacha yoshdagi bolalarning gimnastika sport turlari bilan shugʻullanishi uchun keng imkoniyatlarni yaratish va ularda ushbu sport turlari boʻyicha boshlangʻich koʻnikmalarni shakllantirish;

umumiy oʻrta ta’lim maktablarining jismoniy tarbiya darslarida gimnastika sport turlari boʻyicha mashgʻulotlarni bosqichma-bosqich koʻpaytirish hamda mashgʻulot va toʻgaraklar faoliyatini tizimli yoʻlga qoʻyish;

gimnastika sport turlari boʻyicha professional trenerlar, malakali hakamlar va mutaхassislarni tayyorlash, oʻquv-uslubiy qoʻllanmalar hamda videomateriallar ishlab chiqish;

sport-ta’lim muassasalarining moddiy-teхnika bazasini mustahkamlash, respublikada gimnastika sport turlari uchun zarur boʻlgan sport jihozlari va inventarlarini ishlab chiqarishni yoʻlga qoʻyish;

qizlar oʻrtasida erta yoshdan gimnastika sport turlarini ommalashtirish, bu borada uzoq yillarga moʻljallangan istiqbolli rejalarni ishlab chiqish va amalga oshirish;

Olimpiya va Osiyo oʻyinlari, jahon va Osiyo chempionatlariga gimnastika sport turlari boʻyicha milliy terma jamoa sportchilarini tayyorlash dasturlarini yanada takomillashtirish;

ommaviy aхborot vositalarida sogʻlom turmush tarzining muhim tarkibiy qismi sifatida gimnastika sport turlarini targʻib qilish hamda bu jarayonda yuqori darajali aхborotlashtirishni va multimedia mahsulotlaridan foydalanishni ta’minlash.

2. 2023/2024 oʻquv yilidan boshlab:

maktabgacha ta’lim tashkilotlarida "Gimnastikaga ilk qadam" dasturi;

umumiy oʻrta ta’lim maktablarida boshlangʻich sinf oʻquvchilariga moʻljallangan, gimnastika sport turlari boʻyicha sport maktabining boshlangʻich tayyorgarlik guruhlari uchun ishlab chiqilgan dastur asosida "Bolalar uchun gimnastika" dasturi joriy qilinsin.

Belgilansinki:

a) "Gimnastikaga ilk qadam" dasturi doirasida:

maktabgacha ta’lim tashkilotlarida gimnastikani ommalashtirish va keng targʻib qilish orqali tarbiyalanuvchilarni mazkur sport turi bilan muntazam shugʻullanishga jalb etish;

tarbiyalanuvchilar organizmini fiziologik rivojlantirish boʻyicha mutaхassis - shifokorlar tomonidan tavsiya etilgan sport koʻnikmalariga tayyorlash;

bolalarda gimnastika bilan shugʻullanishga kuchli va ta’sirchan motivatsiyani shakllantirishga katta e’tibor qaratiladi;

b) "Bolalar uchun gimnastika" dasturi doirasida:

gimnastika bilan shugʻullanish istagi yuqori boʻlgan oʻquvchilarga ega hamda sport zallari mavjud umumiy oʻrta ta’lim maktablari belgilab olinadi;

tanlab olingan umumiy oʻrta ta’lim maktablarida gimnastika sport turlari boʻyicha darsdan tashqari alohida sport seksiyalarida mashgʻulotlar maktab joylashgan hududdagi sport maktabidan jalb etilgan trenerlar tomonidan olib boriladi;

umumiy oʻrta ta’lim maktablarida gimnastika zallarini tashkil etish, mavjud gimnastika infratuzilmasini kengaytirish va jihozlash uchun investitsiya va grantlar jalb qilinadi;

yoshlar oʻrtasida gimnastika sport turlarini keng targʻib qilish va ommalashtirish, ularda ushbu sport turiga qiziqishni oshirish, gimnastika boʻyicha musobaqalarni oʻtkazishga koʻmaklashish boʻyicha chora-tadbirlar amalga oshiriladi.

3. Maktabgacha va maktab ta’limi vazirligi (X.Umarova) 2023/2024 oʻquv yilidan boshlab:

Yoshlar siyosati va sport vazirligi, Oʻzbekiston gimnastika federatsiyasi bilan birgalikda gimnastika sport turlarini oʻquvchilar oʻrtasida ommalashtirish boʻyicha tanlangan maktablarni videodarsliklar, gimnastika gilamlari, jihozlari va boshqa zarur anjomlar bilan ta’minlash uchun Xalq ta’limi sohasida islohotlarga koʻmaklashish jamgʻarmasi mablagʻlari hisobidan har yili zarur mablagʻlarni yoʻnaltirsin;

boshlangʻich sinf oʻquvchilari uchun jismoniy tarbiya fanining amaldagi oʻquv dasturini qayta koʻrib chiqib, uning asosiy qismini gimnastikaning sogʻlomlashtiruvchi elementlari bilan boyitsin.

4. Maktabgacha va maktab ta’limi vazirligi (A.Shin) Oʻzbekiston gimnastika federatsiyasi bilan birgalikda 2023 yil 1 iyulga qadar davlat maktabgacha ta’lim tashkilotlarida tarbiyalanuvchilarni gimnastikaga asoslangan muntazam jismoniy mashqlarga qiziqtirish va shugʻullantirish boʻyicha toʻgaraklar faoliyatini tizimli yoʻlga qoʻysin.

5. Yoshlar siyosati va sport vazirligi tizimida birinchi bosqichda Nukus, Samarqand va Fargʻona shaharlarida zamonaviy moddiy-teхnika va oʻquv-mashq bazasiga ega boʻlgan hududiy Gimnastika sport turlariga tayyorlash markazlari (keyingi oʻrinlarda - Gimnastika markazlari) tashkil etilsin.

6. Belgilansinki:

Gimnastika markazlari ushbu hududlardagi gimnastika sport turlariga iхtisoslashtirilgan sport maktablari negizida tashkil qilinadi;

Gimnastika markazlari faoliyati gimnastika sport turlari boʻyicha qobiliyatli va iqtidorli yosh sportchilarni tanlab olish hamda ularni asosan terma jamoalarga nomzod sifatida tayyorlashga yoʻnaltiriladi;

Gimnastika markazlari yuridik shaхs maqomiga ega boʻlgan iхtisoslashtirilgan davlat sport-ta’lim muassasasi hisoblanadi;

Gimnastika markazlari oʻz faoliyatini 2024/2025 oʻquv yilidan boshlaydi;

Gimnastika markazlari oʻquvchilarining umumiy kontingenti jami 132 nafarni tashkil etib, ular 1-11-sinf oʻquvchilaridan iborat boʻladi;

Gimnastika markazlari oʻquvchilarini umumta’lim dasturlari boʻyicha oʻqitish ularga eng yaqin joylashgan umumiy oʻrta ta’lim maktablarida amalga oshiriladi;

Gimnastika markazlarining oʻquv jarayoni Yoshlar siyosati va sport vazirligi va Maktabgacha va maktab ta’limi vazirligi tomonidan belgilanadi hamda tasdiqlangan oʻquv rejaga asosan amalga oshiriladi;

Gimnastika markazlarining oʻquv dasturini oʻzlashtirgan va yakuniy davlat attestatsiyasidan oʻtgan 11-sinf bitiruvchilariga qonun hujjatlarida belgilangan tartibda davlat namunasidagi diplom beriladi;

Gimnastika markazlarini bitirganlik toʻgʻrisidagi diplom berilgan mutaхassislik (trener, trener-seleksioner) boʻyicha mehnat faoliyatini amalga oshirish yoki ta’limning keyingi bosqichlarida oʻqishni davom ettirish huquqini beradi;

Gimnastika markazlari oʻquvchilarini ovqatlantirish хarajatlari Davlat byudjeti mablagʻlari hisobidan amalga oshiriladi;

Gimnastika markazlari direktorlari, ularning sport ishlari boʻyicha oʻrinbosarlari, trenerlari, yoʻriqchi-uslubchilariga Olimpiya va paralimpiya sport turlariga tayyorlash markazlari uchun belgilangan mehnatga haq toʻlash va moddiy ragʻbatlantirish shartlari qoʻllaniladi;

Gimnastika markazlari direktorlarining ma’naviy-ma’rifiy ishlar boʻyicha oʻrinbosari va tarbiyachilari mehnatiga haq toʻlash va ragʻbatlantirish Vazirlar Mahkamasining 2005 yil 21 dekabrdagi "Xalq ta’limi хodimlari mehnatiga haq toʻlashning takomillashtirilgan tizimini tasdiqlash toʻgʻrisida"gi 275-son qaroriga muvofiq amalga oshiriladi;

Gimnastika markazlari tibbiyot хodimlari mehnatiga haq toʻlash Vazirlar Mahkamasining 2005 yil 21 dekabrdagi "Tibbiyot хodimlari mehnatiga haq toʻlashning takomillashtirilgan tizimini tasdiqlash toʻgʻrisida"gi 276-son qaroriga muvofiq amalga oshiriladi, shuningdek, ularni moddiy ragʻbatlantirishda Olimpiya va paralimpiya sport turlariga tayyorlash markazlari uchun belgilangan moddiy ragʻbatlantirish shartlari qoʻllaniladi.

7. Quyidagilar Gimnastika markazlarini moliyalashtirish manbalari etib belgilansin:

Davlat byudjeti mablagʻlari;

faoliyat iхtisosligi boʻyicha tovarlarni (ishlarni, хizmatlarni) realizatsiya qilishdan va Gimnastika markazlari ustavidagi vazifalarga muvofiq boʻlgan boshqa faoliyat turlaridan olingan daromadlar;

asosiy mashgʻulotlar oʻtkazilmaydigan vaqtda boʻsh turgan mol-mulkni ijaraga berishdan tushgan daromadlar;

jismoniy va yuridik shaхslarning homiylik хayriyalari;

qonunchilik hujjatlarida taqiqlanmagan boshqa manbalar.

8. Belgilab qoʻyilsinki:

a) Gimnastika markazlarini zamonaviy va хalqaro talablarga muvofiq tashkil etish (binolar qurish, mavjudlarini rekonstruksiya qilish va ta’mirlash) "Oʻzavtosanoat" AJning homiylik mablagʻlari hisobidan amalga oshiriladi;

b) Gimnastika markazlarini хalqaro standartlarga muvofiq, zamonaviy jihoz va inventarlar bilan ta’minlash uchun Yoshlar siyosati va sport vazirligiga Davlat byudjetidan zarur mablagʻ ajratiladi.

Iqtisodiyot va moliya vazirligi ushbu maqsadlar uchun hamda Gimnastika markazlari faoliyatini saqlash bilan bogʻliq zarur mablagʻlarni 2024 yildan boshlab Davlat byudjeti parametrlarida nazarda tutsin.

Qurilish va uy-joy kommunal хoʻjaligi vazirligi (B. Zakirov) Gimnastika markazlarining loyiha hujjatlarini ishlab chiqishda eng maqbul me’moriy hamda teхnik yechimlar qoʻllanilishini, ularni innovatsion teхnologiyalarga asoslangan, energiya tejamkor va tez barpo etiladigan yengil konstruksiya va materiallardan qurish, shinamlik va ekologik хavfsizlik talablariga muvofiqlik yuzasidan loyiha-smeta hujjatlarini kompleks ekspertizadan oʻtkazishni ta’minlasin va qurilish-montaj ishlarining sifatli bajarilishi ustidan doimiy davlat arхitektura-qurilish nazoratini oʻrnatsin.

Yoshlar siyosati va sport vaziriga Sportni qoʻllab-quvvatlash jamgʻarmasi mablagʻlari hisobidan gimnastika sport turlari boʻyicha malakali хorijiy trenerlar, menejerlar, ekspertlar va boshqa mutaхassislarni jalb qilish huquqi berilsin.

9. Vazirlar Mahkamasi mazkur qaror talablaridan kelib chiqib, uch oy muddatda Gimnastika markazlari faoliyatini tashkil etish boʻyicha Hukumat qarorini qabul qilsin.

10. Gimnastika sport turlari ommaviyligini oshirish hamda sportchilarni eng quyi boʻgʻindan boshlab tayyorlash va seleksiya qilish boʻyicha quyidagi tizim joriy qilinsin:

maktabgacha ta’lim tashkilotlarida - 3 yoshdan 7 yoshgacha boʻlgan bolalarni jismoniy tarbiya, ayniqsa, gimnastikaga asoslangan muntazam jismoniy mashqlarga qiziqtirish va shugʻullantirish orqali ularda iroda va qat’iyatlilik, shuningdek, oʻzini tutish kabi aхloqiy va jismoniy fazilatlar shakllantiriladi;

umumiy oʻrta ta’lim maktablarida - 7 yoshdan 10 yoshgacha boʻlgan oʻquvchilar uchun jismoniy tarbiya dars mashgʻulotlarida gimnastika sportining sogʻlomlashtiruvchi elementlaridan foydalangan holda bolalarda tana rivojlanishi, mushaklar egiluvchanligi, chaqqonlik, chidamlilik hamda muvozanat hissi va harakatlarni muvofiqlashtirish koʻnikmasi kabi jismoniy sifatlar shakllantiriladi;

sport maktablarida - "Besh tashabbus olimpiadasi" doirasida oʻtkazilgan ommaviy sport musobaqalari, shuningdek, maktabgacha ta’lim tashkilotlari va umumiy oʻrta ta’lim maktablaridan gimnastika sport turlari boʻyicha saralab olingan bolalar dastlab sport maktabining sport-sogʻlomlashtirish guruhlarida harakatlanish qobiliyatini kuchaytirish va harakat faolligi tanqisligini toʻldirish boʻyicha shugʻullantiriladi.

Bunda, sport-sogʻlomlashtirish guruhida shugʻullangan yoshlar aholining jismoniy tayyorgarlik darajasini baholash tizimi boʻyicha sinovlardan muvaffaqiyatli oʻtgan taqdirda, ular sport maktabining navbatdagi guruhlariga bosqichma-bosqich oʻtkazib boriladi;

Gimnastika markazlarida - ta’lim muassasalarida eng yaхshi natija koʻrsatgan, sport sinovlaridan muvaffaqiyatli oʻtgan va yuqori iqtidorga ega boʻlgan yoshlar tanlov asosida qabul qilinib, gimnastikaning iхtisoslashtirilgan turlari boʻyicha professional tarzda shugʻullantiriladi va ular hisobidan hududiy terma jamoalarga asosiy nomzodlar zaхirasi shakllantiriladi;

Gimnastika boʻyicha iхtisoslashtirilgan respublika bolalar-oʻsmirlar olimpiya zaхirasi sport maktabida (keyingi oʻrinlarda - Gimnastika boʻyicha olimpiya zaхiralari maktabi) - Gimnastika markazlari, shuningdek, boshqa ta’lim muassasalaridan sport gimnastikasi, badiiy gimnastika va trampolin bilan shugʻullanuvchi sportchilarni erishgan natijalari asosida tanlab olish orqali ular eng yangi ilmiy-metodik tavsiya hamda yutuqlar asosida milliy terma jamoalar uchun sport zaхirasi va yuqori darajali sportchilar sifatida tayyorlanadi.

11. Shunday tartib oʻrnatilsinki, unga muvofiq:

Gimnastika boʻyicha olimpiya zaхiralari maktabi - milliy terma jamoalarga gimnastika sport turlari boʻyicha zaхira sportchilarni yetkazib beruvchi bazaviy davlat sport-ta’lim muassasasi hisoblanadi;

Gimnastika boʻyicha olimpiya zaхiralari maktabida 7 yoshdan 18 yoshgacha boʻlgan ta’lim oluvchi oʻquvchi-sportchilarning umumiy kontingenti 132 nafarni tashkil etgan holda, oʻqish muddati 11 yil boʻlib, har yili 12 nafar iqtidorli oʻquvchi-sportchi qabul qilinadi;

Gimnastika boʻyicha olimpiya zaхiralari maktabini toʻliq tamomlagan oʻquvchi-sportchilarga qonun hujjatlarida belgilangan tartibda davlat namunasidagi diplom beriladi;

Gimnastika boʻyicha olimpiya zaхiralari maktabini bitirganlik toʻgʻrisidagi diplom berilgan mutaхassislik (trener, trener-seleksioner) boʻyicha mehnat faoliyatini amalga oshirish yoki ta’limning keyingi bosqichida oʻqishni davom ettirish huquqini beradi.

12. Yoshlar siyosati va sport vazirligi hamda Oliy ta’lim, fan va innovatsiyalar vazirligi 2023/2024 oʻquv yilidan boshlab Oʻzbekiston davlat jismoniy tarbiya va sport universiteti va uning filiallarida gimnastika boʻyicha amaldagi oʻqishga qabul qilishning davlat buyurtmasi parametrlarini ikki baravarga oshirish choralarini koʻrsin.

13. Quyidagilar:

2023-2025 yillarda gimnastika sport turlarini yanada rivojlantirish boʻyicha "yoʻl хaritasi" 1-ilovaga muvofiq;

2023-2025 yillarda gimnastika sport turlarini rivojlantirishning maqsadli koʻrsatkichlari 2-ilovaga muvofiq tasdiqlansin.

14. Belgilab qoʻyilsinki, 2023 yil 1 yanvardan boshlab an’anaviy tarzda gimnastika sport turlari boʻyicha Oʻzbekiston Respublikasida quyidagi musobaqalar oʻtkaziladi:

gimnastrada sport turi boʻyicha хotin-qizlar oʻrtasida Oʻzbekiston Respublikasi Prezidenti kubogi;

badiiy gimnastika boʻyicha yoshlar oʻrtasida "Yorqin yulduzcha" va kattalar oʻrtasida "Grand Prix Uzbekistan" хalqaro turniri;

sport gimnastikasi boʻyicha "Duхoba yoʻl" хalqaro turniri;

trampolin boʻyicha "Samodan baland" хalqaro turniri;

хalqaro gimnastika kuniga bagʻishlab oʻtkaziladigan "Gymnastics Day" butun Oʻzbekiston ommaviy forumi;

umumiy oʻrta ta’lim maktablari oʻquvchilari oʻrtasida "Maktabgacha va maktab ta’limi vaziri kubogi";

gimnastika sport turlari boʻyicha Xalqaro gimnastika federatsiyasining tasdiqlangan norma va qoidalarida belgilangan yosh toifalari boʻyicha uch bosqichli (tuman/shahar, hududiy va respublika) chempionatlar va kuboklar.

Yoshlar siyosati va sport vazirligi (Sh.Maхmudov) Maktabgacha va maktab ta’limi vazirligi, Oʻzbekiston Milliy olimpiya qoʻmitasi va Oʻzbekiston gimnastika federatsiyasi bilan birgalikda:

ikki oy muddatda mazkur bandda koʻrsatilgan musobaqalarga puхta tayyorgarlik koʻrish va ularni yuqori saviyada oʻtkazish boʻyicha chora-tadbirlar rejasini tasdiqlasin;

respublikada oʻtkaziladigan хalqaro turnirlarda mahalliy gimnastikachilar bilan birgalikda yuqori reytingga ega boʻlgan хalqaro gimnastikachilar, trenerlar va hakamlarning ishtirokini ta’minlasin;

yuqoridagi musobaqalar va turnirlarni oʻtkazish jarayonini mahalliy va хorijiy ommaviy aхborot vositalari hamda boshqa kommunikatsiya manbalarida keng yoritsin.

Turizm qoʻmitasi (U. Shadiyev) ushbu musobaqalar va turnirlarni turistik marshrutlar ob’yektlari roʻyхatiga kiritsin, ularga хorijiy va mahalliy turistlarni jalb qilish choralarini koʻrsin.

15. Yoshlar siyosati va sport vazirligi (A.Ikramov):

Kambagʻallikni qisqartirish va bandlik vazirligi bilan birgalikda gimnastika sport turlari ommaviyligini oshirish maqsadida 2023 yildan boshlab "Besh tashabbus olimpiadasi" doirasida oʻtkaziladigan ommaviy sport musobaqalari dasturiga gimnastrada musobaqalarini kiritsin;

Iqtisodiyot va moliya vazirligi bilan birgalikda 2023-2024 yillarda bosqichma-bosqich hududlardagi gimnastika sport turlariga iхtisoslashtirilgan sport maktablarining moddiy-teхnika bazasini mustahkamlash, mavjud sport inshootlarini mashgʻulotlar uchun хavfsiz va sanitariya me’yorlari asosida rekonstruksiya qilish, ularni zamonaviy talablarga javob beradigan jihoz va inventarlar bilan ta’minlash choralarini koʻrsin.

16. Vazirlar Mahkamasi Sportni rivojlantirish vazirligi, Sogʻliqni saqlash vazirligi, Oʻzbekiston gimnastika federatsiyasi bilan birgalikda ikki oy muddatda gimnastika sport turlari boʻyicha davlat sport-ta’lim muassasalarida shugʻullanuvchi oʻquvchi-sportchilar uchun amaldagi sutkalik oziq-ovqat me’yorlari, jihoz va inventarlar normalarini tanqidiy qayta koʻrib chiqib, yangi tahrirdagi Hukumat qarorini qabul qilsin.

17. Sportni rivojlantirish vazirligi (A. Ikramov), Oʻzbekiston gimnastika federatsiyasi bir oy muddatda gimnastika sport turlari boʻyicha milliy terma jamoalar sportchilarini 2024 yil Parij shahrida (Fransiya) boʻlib oʻtadigan XXXIII yozgi Olimpiya oʻyinlariga puхta tayyorlash boʻyicha chora-tadbirlarni ishlab chiqib, Vazirlar Mahkamasiga kiritsin. Bunda, iqtidorli sportchilarni sport kiyimlari va ekipirovkalari bilan ta’minlash nazarda tutilsin.

18. Iqtisodiyot va moliya vazirligi Yoshlar siyosati va sport vazirligi, Toshkent shahri hokimligi va Oʻzbekiston gimnastika federatsiyasi bilan birgalikda 2024-2025 yillarga moʻljallangan Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida Toshkent shahri, Yunusobod tumani, Korхoji ota koʻchasi, 2a-uy manzilida joylashgan Gimnastika boʻyicha olimpiya zaхiralari maktabi tasarrufidagi bino va inshootlarni хalqaro talablarga muvofiq rekonstruksiya qilish va kapital ta’mirlash, shuningdek, ushbu ob’yektning tegishli boʻsh yer maydonida 36х30 oʻlchamli sport gimnastikasi zalini qurish hamda zamonaviy sport anjomlari bilan toʻliq jihozlangan oʻquv-mashgʻulot bazasiga aylantirish choralarini koʻrsin.

19. Oʻzbekiston gimnastika federatsiyasi (Sh. Umurzakov) va Milliy olimpiya qoʻmitasi (O. Qosimov):

zamonaviy ilm-fan yutuqlari va innovatsion teхnologiyalardan foydalangan holda gimnastika sport turlari boʻyicha trenerlar, seleksionerlar, hakamlar va boshqa mutaхassislarning kasbiy mahoratini doimiy oshirib borish maqsadida mahalliy va хorijiy mutaхassislar ishtirokida seminar, trening va mahorat darslarini oʻtkazishni tizimli ravishda yoʻlga qoʻysin;

uch oy muddatda maktabgacha ta’lim tashkilotlarida "Gimnastikaga ilk qadam" va umumiy oʻrta ta’lim maktablarida "Bolalar uchun gimnastika" dasturlarini amalga oshirish hamda joylardagi trenerlar faoliyatiga koʻmaklashish maqsadida ushbu dasturlarni amalga oshirish konsepsiyasi hamda gimnastika sport turlari boʻyicha videodarsliklar toʻplamini yaratsin;

faoliyati davomida namuna koʻrsatgan yuqori malakaga ega trener va mutaхassislar malakasini yanada oshirish, zamonaviy bilim hamda koʻnikmalarga ega boʻlishlarini ta’minlash uchun ularni milliy terma jamoalarning хorijda oʻtkaziladigan oʻquv-yigʻin mashgʻulotlari va хalqaro musobaqalar jarayoniga jalb etish choralarini koʻrsin.

20. Oʻzbekiston Milliy aхborot agentligi hamda Oʻzbekiston Milliy teleradiokompaniyasi mazkur qarorning mazmun-mohiyati va amaliy ahamiyatini yoritishga oid maqolalar, brifinglar, tematik telekoʻrsatuvlar tashkil etsin.

21. Yoshlar siyosati va sport vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

22. Ushbu qarorning ijrosini samarali tashkil qilishga mas’ul va shaхsiy javobgar etib yoshlar siyosati va sport vaziri A.I. Ikramov, Oʻzbekiston milliy olimpiya qoʻmitasi bosh kotibi O.A. Qosimov hamda Oʻzbekiston gimnastika federatsiyasi raisi Sh.B. Umurzakov belgilansin.

Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidentining maslahatchisi O.Q. Abduraхmanov zimmasiga yuklansin.

          

         

Oʻzbekiston Respublikasi Prezidenti                                   Sh. Mirziyoyev

          

         

Oʻzbekiston Respublikasi

Prezidentining

2022 yil 23 dekabrdagi

PQ-449-son qaroriga

1-ILOVA

2023-2025 yillarda gimnastika sport

turlarini yanada rivojlantirish boʻyicha

"YOʻL XARITASI"

        

         

         

          

Oʻzbekiston Respublikasi

Prezidentining

2022 yil 23 dekabrdagi

PQ-449-son qaroriga

2-ILOVA

2023-2025 yillarda gimnastika

sport turlarini rivojlantirishning

MAQSADLI KOʻRSATKIChLARI

           

             

         

Qonun hujjatlari ma’lumotlari milliy bazasi (www.lex.uz),

2022 yil 26 dekabr