Tuzni ishlab chiqarish, saqlash, tashish va sotishga qoʻyiladigan gigiyena talablarini (0042-22-son SanQvaN) tasdiqlash toʻgʻrisida"gi Qarori (OʻzR Sanitariya-epidemiologik osoyishtalik va jamoat salomatligi хizmatining 21.12.2022 y. N 42-son)
OʻZBEKISTON RESPUBLIKASI
SANITARIYa-EPIDEMIOLOGIK OSOYIShTALIK
VA JAMOAT SALOMATLIGI XIZMATINING
21.12.2022 y.
N 42-son
QARORI
Tuzni ishlab chiqarish, saqlash,
tashish va sotishga qoʻyiladigan gigiyena
talablarini (0042-22-son SanQvaN)
tasdiqlash toʻgʻrisida
[Oʻzbekiston Respublikasi Adliya vazirligi tomonidan
2023 yil 19 yanvarda hisobga olindi, hisob raqami 142]
Oʻzbekiston Respublikasining "Aholining sanitariya-epidemiologik osoyishtaligi toʻgʻrisida"gi Qonuni va Oʻzbekiston Respublikasi Prezidentining 2020 yil 25 iyuldagi PF-6035-son "Koronavirus pandemiyasini yumshatish, aholining sanitariya-epidemiologik osoyishtaligi va salomatligini saqlash tizimini tubdan takomillashtirish chora-tadbirlari toʻgʻrisida"gi Farmoniga muvofiq, Oʻzbekiston Respublikasi Sanitariya-epidemiologik osoyishtalik va jamoat salomatligi хizmati QAROR QILADI:
1. Tuzni ishlab chiqarish, saqlash, tashish va sotishga qoʻyiladigan gigiyena talablari (0042-22-son SanQvaN) ilovaga muvofiq tasdiqlansin.
2. "Tuzni ishlab chiqarish, saqlash, tashish va realizatsiyasi uchun gigiyenik talablar" (0290-11-sonli SanQvaN, 2011 yil 6 aprel) oʻz kuchini yoʻqotgan deb topilsin.
3. Mazkur qaror Oʻzbekiston Respublikasi Prezidenti huzuridagi Tadbirkorlik sub’yektlarining huquqlari va qonuniy manfaatlarini himoya qilish boʻyicha vakil, Monopoliyaga qarshi kurashish qoʻmitasi, Investitsiyalar va tashqi savdo vazirligi huzuridagi Oʻzbekiston teхnik jihatdan tartibga solish agentligi va Savdo sanoat palatasi bilan kelishilgan.
4. Mazkur qaror rasmiy e’lon qilingan kundan e’tiboran kuchga kiradi.
Oʻzbekiston Respublikasi
Sanitariya-epidemiologik osoyishtalik
va jamoat salomatligi хizmati boshligʻi B.K. Yusupaliyev
Qonun hujjatlari ma’lumotlari milliy bazasi (www.lex.uz).