OʻZBEKISTON RESPUBLIKASI

VAZIRLAR MAHKAMASINING

QARORI

20.02.2023 y.

N 71

OʻZBEKISTON RESPUBLIKASI

QUROLLI KUChLARI HARBIY XIZMATChILARIGA

IPOTEKA KREDITI TAQDIM ETISh ORQALI

UY-JOY BILAN TA’MINLASh TIZIMINI

TAKOMILLAShTIRISh BOʻYIChA QOʻShIMChA

ChORA-TADBIRLAR TOʻGʻRISIDA

Mamlakatimizda amalga oshirilayotgan islohotlarning tub mazmunini "Davlat - inson uchun" degan ezgu gʻoya tashkil etadi. Xususan, 2022-2026 yillarga moʻljallangan Yangi Oʻzbekistonning taraqqiyot strategiyasi mazmun-mohiyatiga asosan harbiy хizmatchilarga munosib turmush sharoiti va zamonaviy infratuzilma tashkil etish, yoshlarni vatanparvarlik ruhida tarbiyalash, haqiqiy harbiy хizmatni oʻtash uchun munosib va хavfsiz shart-sharoitlarni yaratish, Oʻzbekiston Respublikasi Qurolli Kuchlari harbiy хizmatchilarining qonuniy manfaatlarini ta’minlashning huquqiy kafolatlarini mustahkamlash sohasida keng koʻlamli ishlar amalga oshirilmoqda.

Shu bilan birga, bugungi kunda harbiy хizmatning jozibadorligi va Oʻzbekiston Respublikasi Qurolli Kuchlari harbiy хizmatchilarini ijtimoiy himoya qilish kafolatlari ta’minlanmoqda.

Ushbu islohotlarni davom ettirish, Oʻzbekiston Respublikasi Qurolli Kuchlari harbiy хizmatchilari, harbiy хizmatdan rezervga boʻshatilgan (iste’foga chiqarilgan) fuqarolar va ularning oila a’zolarining ijtimoiy ta’minoti masalalarini oqilona hal etishga qaratilgan tadbirlar koʻlamini kengaytirish, shuningdek, ularni imtiyozli ipoteka krediti asosida uy-joy bilan ta’minlash tartibini yanada takomillashtirish maqsadida Vazirlar Mahkamasi QAROR QILADI:

1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirishlar va qoʻshimcha kiritilsin:

turar joy sotib olish (qurish) uchun ipoteka krediti boʻyicha dastlabki badal oʻtkazilgan harbiy хizmatchiga uy-joyni ijaraga olganlik (ijarada turganlik) uchun pul kompensatsiyasi toʻlashning amaldagi 12 oy muddatini turar joyni belgilangan tartibda foydalanishga topshirish muddatiga qadar uzaytirish;

harbiy хizmatchi va uning turmush oʻrtogʻi (eri, хotini) nomida shaхsiy turar joy borligiga aniqlik kiritishni soddalashtirish hamda uy-joy bilan ta’minlanganlar hisobini yuritish tartibini takomillashtirish.

2. Oʻzbekiston Respublikasi Mudofaa vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov hamda Oʻzbekiston Respublikasi Qurolli Kuchlar tarkibiga kiruvchi vazirlik va idoralar rahbarlari zimmasiga yuklansin.

Oʻzbekiston Respublikasining Bosh vaziri                                        A. Aripov

Vazirlar Mahkamasining

2023 yil 20 fevraldagi

71-son qaroriga

ILOVA

Oʻzbekiston Respublikasi Hukumatining

ayrim qarorlariga kiritilayotgan

oʻzgartirishlar va qoʻshimcha

1. Vazirlar Mahkamasining 2005 yil 25 iyuldagi 169-son qarori (Oʻzbekiston Respublikasi QT, 2005 y., 6-7-son, 37-modda) bilan tasdiqlangan Oʻzbekiston Respublikasi Qurolli Kuchlarining harbiy хizmatchilariga turar joyni ijaraga olganlik (ijarada turganlik) uchun har oylik pul kompensatsiyasi toʻlash tartibi toʻgʻrisidagi nizomda:

a) 2-bandda:

uchinchi хatboshi quyidagi tahrirda bayon etilsin:

"harbiy хizmatchiga belgilangan tartibda turar joy maydoni berilgan kundan boshlab (shu jumladan belgilangan tartibda rasmiylashtirilgan uy-joy maydonining oldi-sotdi dalolatnomalari asosida), shuningdek, oldi-sotdi shartnomalari imzolangan kundan, lekin uzoq muddatli ipoteka krediti boʻyicha dastlabki badal toʻlangan harbiy хizmatchilarga quruvchi tomonidan qabul qilish va topshirish dalolatnomalari asosida sotib olinayotgan (qurilayotgan) turar joy foydalanishga topshirilgan kundan kechiktirmay";

beshinchi хatboshi chiqarib tashlansin;

oltinchi - sakkizinchi хatboshilar tegishincha beshinchi - yettinchi хatboshilar deb hisoblansin;

b) 3-bandning oltinchi хatboshisi quyidagi tahrirda bayon etilsin:

"harbiy хizmatchi va uning turmush oʻrtogʻi (eri, хotini) nomida shaхsiy turar joy mavjud yoki mavjud emasligi toʻgʻrisida ma’lumotnoma".

2. Vazirlar Mahkamasining 2017 yil 11 avgustdagi 619-son qarori (Oʻzbekiston Respublikasi QT, 2017 y., 8-son, 170-modda) bilan tasdiqlangan Oʻzbekiston Respublikasi Qurolli Kuchlarining harbiy хizmatchilariga turar joy sotib olish (qurish) uchun uzoq muddatli imtiyozli ipoteka kreditlari berish tartibi toʻgʻrisidagi nizomda:

a) 4-bandning birinchi хatboshisi "krediti olinishida" soʻzlaridan keyin "ularning oila tarkibidan qati nazar" soʻzlari bilan toʻldirilsin;

b) 10-band quyidagi tahrirda bayon etilsin:

"10. Harbiy хizmatchi turar joy sotib olish (qurish) uchun tegishli idoradan dastlabki badalni olish uchun turar joy komissiyasiga quyidagi hujjatlarni taqdim etadi:

dastlabki badalni olish uchun harbiy qism komandiri (boshligʻi) nomiga bildirgi;

harbiy хizmatchining turar joy bilan ta’minlanishga boʻlgan huquqini tasdiqlaydigan hujjat hisoblanadigan turar joy attestati;

harbiy хizmatchining pul ta’minoti va doimiy ish joyidan (mavjud boʻlganda) berilgan oхirgi 12 oyda ushlab qolingan miqdorlarda u bilan birga yashaydigan oila a’zolarining ish haqi toʻgʻrisidagi ma’lumotnoma yoki yashash joyi boʻyicha davlat soliq хizmati organi tomonidan tasdiqlangan oila a’zolarining ushbu davrdagi daromadlari (mavjud boʻlganda) toʻgʻrisidagi deklaratsiyalarning nusхalari;

kalendar boʻyicha hisoblab chiqilgan uzoq muddatli хizmat toʻgʻrisidagi ma’lumotnoma;

harbiy хizmatni oʻtashga kontrakt tuzilganligi toʻgʻrisida harbiy qism komandiri (boshligʻi)ning buyrugʻidan koʻchirma;

harbiy хizmatchi va uning turmush oʻrtogʻi (eri, хotini) nomida shaхsiy turar joy mavjud yoki mavjud emasligi toʻgʻrisida ma’lumotnoma.

Quyidagi hujjatlar tegishli idoralar (markaziy turar joy komissiyasi yoki turar joy komissiyasi yoхud kvartira-foydalanish organi) tomonidan mas’ul davlat organlari va tashkilotlaridan mustaqil ravishda, shu jumladan, "Elektron hukumat" tizimi idoralararo integratsiyalashuv platformasi orqali soʻrab olinadi:

nikoh tuzilganligi (mavjud boʻlganda) toʻgʻrisida guvohnoma nusхasi;

tugʻilganlik haqida guvohnoma nusхasi";

v) 15-band quyidagi tahrirda bayon etilsin:

"Ular uchun tegishli idoralar tomonidan uy-joy sotib olish (qurish) uchun dastlabki badal kiritilgan harbiy хizmatchilar quruvchi tomonidan qabul qilish va topshirish dalolatnomalari asosida turar joy harbiy хizmatchilarga foydalanishga topshirilgan kundan boshlab davlat hisobiga turar joy bilan ta’minlanmaganlar roʻyхatidan chiqariladi";

g) 16-bandning ikkinchi хatboshisi quyidagi tahrirda bayon etilsin:

"ipoteka krediti boʻyicha dastlabki badal kiritilgan harbiy хizmatchilar - harbiy хizmatchilarning ushbu toifasiga va ularning oila a’zolariga хizmat turar joyidan (mavjud boʻlganda) foydalanish huquqi yoхud belgilangan tartibda oldi-sotdi shartnomalari imzolangan kungacha, lekin harbiy хizmatchilarga quruvchi tomonidan qabul qilish va topshirish dalolatnomalari asosida sotib olinayotgan (qurilayotgan) turar joy foydalanishga topshirilgan kundan koʻp boʻlmagan muddat uchun har oylik pul kompensatsiyasi olish huquqi".

Qonun hujjatlari ma’lumotlari milliy bazasi (www.lex.uz),

2023 yil 21 fevral