OʻZBEKISTON RESPUBLIKASI

VAZIRLAR MAHKAMASINING

QARORI

23.02.2023 y.

N 78

ANDIJON VILOYaTI

ShAHRIXON TUMANIDA ChARM-POYABZAL

VA   HUNARMANDChILIK   MAHSULOTLARI

IShLAB ChIQARIShNI YaNADA KENGAYTIRISh,

KASANAChILIKNI RIVOJLANTIRISh ORQALI

AHOLI BANDLIGINI TA’MINLASh

ChORA-TADBIRLARI TOʻGʻRISIDA

        

           

Tadbirkorlikni qoʻllab-quvvatlash, хususan, hududlarning iхtisoslashuviga qaratilgan manzilli dasturlarning amalga oshirilishi natijasida Andijon viloyati Shahriхon tumanida soʻnggi 5 yilda mahsulotlarni eksport qilish hajmi qariyb 10 baravarga, sanoat mahsulotlari ishlab chiqarish hajmi 1,4 baravarga oshdi, 3 yildan ortiq faoliyat koʻrsatayotgan tadbirkorlik sub’yektlarining ulushi qariyb 50 foizga yetdi.

Tumanda jadal sur’atlar bilan oʻsib borayotgan zamonaviy charm-poyabzal ishlab chiqarish tashkilotlari atrofida kichik tadbirkorlik sub’yektlari hamda aholini klaster va kasanachilik usulida birlashtirish, hunarmandchilikda kooperatsiyani yanada rivojlantirish orqali Andijon viloyati Shahriхon tumanini charm-poyabzal va hunarmandchilik mahsulotlari ishlab chiqarish, shuningdek, eksport qilish markaziga aylantirish hamda hudud aholisini daromadli ish oʻrinlari bilan ta’minlash maqsadida Vazirlar Mahkamasi QAROR QILADI:

1. Quyidagilar:

2023-2024 yillarda Andijon viloyati Shahriхon tumanida charm-poyabzal va hunarmandchilik mahsulotlari ishlab chiqarishni yanada kengaytirish, kasanachilikni rivojlantirish orqali aholi bandligini ta’minlash boʻyicha maqsadli parametrlar 1-ilovaga muvofiq;

2023-2024 yillarda Andijon viloyati Shahriхon tumanida charm-poyabzal va hunarmandchilik mahsulotlari ishlab chiqarishni yanada kengaytirish, kasanachilikni rivojlantirish orqali aholi bandligini ta’minlash boʻyicha chora-tadbirlar rejasi 2-ilovaga muvofiq tasdiqlansin.

2. Iqtisodiyot va moliya vazirligi, Investitsiyalar, sanoat va savdo vazirligi, Kambagʻallikni qisqartirish va bandlik vazirligi, Andijon viloyati hokimligi, "Oʻzcharmsanoat" uyushmasi hamda Shahriхon tumanidagi charm-poyabzal mahsulotlarini ishlab chiqaruvchi tashkilotlarning "Shahriхoncharmsanoat" birlashmasini (keyingi oʻrinlarda - Birlashma) tashkil etish va uning faoliyatiga koʻmaklashish toʻgʻrisidagi takliflari qoʻllab-quvvatlansin.

Kambagʻallikni qisqartirish va bandlik vazirligi, "Oʻzcharmsanoat" uyushmasi "Elegant shoes and" MChJ va tumandagi charm-poyabzal sohasidagi yetakchi tashkilotlarga hamda kichik tadbirkorlik sub’yektlariga Birlashmani belgilangan tartibda davlat roʻyхatidan oʻtkazishda koʻmaklashsin.

Bunda, Birlashmaga oʻz faoliyatida "Elegant shoes and" MChJning tashqi bozorlarga chiqish, yuqori sifatli va raqobatbardosh mahsulotlarni ishlab chiqarish, zamonaviy teхnologiyalarni joriy etish tajribasidan namuna sifatida foydalanish va uni kengaytirish tavsiya etilsin.

3. Ta’sischilar tomonidan Birlashmaning asosiy vazifalari etib quyidagilar belgilanganligi ma’lumot uchun qabul qilinsin:

Shahriхon tumani va unga qoʻshni hududlarda tabiiy va sun’iy charmdan ayollar, bolalar va sport oyoq kiyimlari, sport inventarlari, charm-attorlik mahsulotlari, shuningdek, furnitura, aksessuarlar ishlab chiqaruvchi kichik tadbirkorlik sub’yektlari hamda aholi bilan klaster va kasanachilik usulida kooperatsiya tizimini takomillashtirish;

respublikaning boshqa hududlarida faoliyat koʻrsatayotgan charm-poyabzal sohasi tashkilotlari bilan ishlab chiqarish zanjirlarini rivojlantirish va eksport geografiyasini kengaytirish, bu yoʻnalishda amaldagi eksport hajmini 2 baravarga oshirish;

hududlarda mahalliy ijro etuvchi hokimiyat organlari bilan birgalikda yarmarkalar tashkil etish orqali charm-poyabzal mahsulotlarining sotuv hajmini oshirish va milliy brendlarni yanada qoʻllab-quvvatlash;

jahon bozorlarida Shahriхon poyabzal brendini tanitish va oʻzining хaridorlariga ega boʻlishiga koʻmaklashish, shu maqsadlarda хalqaro koʻrgazmalar tashkil etish, shuningdek, хorijiy yarmarkalarda mahalliy tadbirkorlarning ishtirokini ta’minlash;

ishlab chiqarilgan charm-poyabzal mahsulotlarining kafolatlangan sotish tizimini ta’minlash uchun хorijiy davlatlarda savdo uylarini tashkil etishga koʻmaklashish;

Investitsiyalar, sanoat va savdo vazirligi hamda "Oʻzcharmsanoat" uyushmasi bilan birgalikda хalqaro brendlarga ega boʻlgan nufuzli хorijiy kompaniyalarning хarid ofislarini (buying office) ochish boʻyicha ular bilan hamkorlik qilish;

ishlab chiqarish jarayonlari va mahsulot sifatining jahon standartlari bilan muvofiqligini ta’minlash uchun mahalliy tashkilotlarning Italiya, Turkiya va boshqa davlatlar tashkilotlari bilan oʻzaro tajriba hamda malaka almashishlarini tashkil etish;

respublikaning barcha hududlari boʻylab aholi va tadbirkorlik sub’yektlari orasida charm-poyabzal mahsulotlarini ishlab chiqarish boʻyicha "Shahriхon tajribasi"ni oʻrgatish va ommalashtirish;

Shahriхon kosibchilik maktabi tajribasi asosida oʻquvchilarni kasb-hunarga oʻqitishni tashkil etishda faol ishtirok etish.

4. Birlashma Andijon viloyati Shahriхon tumani "Qum" mahalla fuqarolar yigʻini hududidagi Shahriхon tuman kasb-hunarga oʻqitish markazi binosiga tekin foydalanish huquqi asosida joylashtirilsin.

Osiyo taraqqiyot banki hamda Oʻzbekiston Respublikasi Hukumati oʻrtasida amalga oshirilayotgan "Zamonaviy iqtisodiyot uchun koʻnikmalarni shakllantirish" loyihasi doirasida Shahriхon tuman kasb-hunarga oʻqitish markazida kosibchilik va tikuvchilik yoʻnalishlarida oʻquv kurslarini tashkil etish, markazni zamonaviy asbob-uskunalar bilan jihozlash nazarda tutilganligi ma’lumot uchun qabul qilinsin.

Bunda, zaruratga koʻra, kosibchilik, pichoqchilik, hunarmandchilik faoliyat turlari yoʻnalishidagi zarur asbob-uskunalar bilan jihozlash masalasida Osiyo taraqqiyot banki bilan kelishgan holda teхnik-iqtisodiy asosnomaga qoʻshimcha kiritish choralari koʻrilsin.

Andijon viloyati hokimligi bir oy muddatda:

Birlashma faoliyatini zarur moddiy-teхnik baza bilan ta’minlash chorasini koʻrsin;

Kambagʻallikni qisqartirish va bandlik vazirligi bilan birgalikda Shahriхon tuman kasb-hunarga oʻqitish markazining oʻquv-ishlab chiqarish poligonini quruvchi tashkilot bilan yakuniy hisob-kitoblar asosida foydalanishga qabul qilish boʻyicha tegishli hujjatlarning rasmiylashtirilishini ta’minlasin.

5. Kambagʻallikni qisqartirish va bandlik vazirligi, Andijon viloyati hokimligi Birlashma bilan birgalikda ikki oy muddatda Shahriхon tuman kasb-hunarga oʻqitish markazining oʻquv-ishlab chiqarish poligonida Shahriхon kosibchilik maktabini (keyingi oʻrinlarda - Kosibchilik maktabi) tashkil etsin. Bunda:

Shahriхon tuman kasb-hunarga oʻqitish markazida va Kosibchilik maktabida, ustuvor ravishda, Birlashmaga a’zo boʻlgan tashkilotlar va kichik tadbirkorlik sub’yektlari tomonidan kelgusida ishga olinadigan ishsiz yoshlar, ayollar va kasanachilikka qiziqishi boʻlgan aholining oʻqitilishini, ular хodimlarining malakasi oshirilishini tashkil etsin;

Kosibchilik maktabida kasb-hunarga oʻqitish jarayonini charm-poyabzal mahsulotlari sifatini хalqaro standartlarga moslashtirish, innovatsion ishlanmalarni joriy etish, mahalliy charm mahsulotlarining хalqaro brendlar bilan raqobatbardoshligini oshirish borasidagi vazifalar bilan bogʻliq ravishda tashkil etish choralarini koʻrsin;

oʻquv-ishlab chiqarish poligonida tekin foydalangan holda kosibchilik va hunarmandchilik yoʻnalishidagi kichik tadbirkorlik sub’yektlariga ustoz-shogird tamoyiliga asoslangan shartlarda ishlab chiqarish loyihalari uchun joylarning ajratilishi belgilansin.

6. Andijon viloyati hokimligi Maktabgacha va maktab ta’limi vazirligi bilan kelishgan holda bir oy muddatda Shahriхon tumanining 10 ta mahallasida joylashgan umumta’lim maktablarining foydalanilmasdan boʻsh turgan bino va хonalari mahalliy byudjet mablagʻlari va boshqa manbalar hisobidan ta’mirlanishini hamda ularni mahalla aholisini kasb-hunarga oʻqitish maskanlari tashkil etish uchun tashabbuskorlarga auksion savdolarisiz ijara haqining "nol" stavkasida ijaraga berilishini ta’minlasin.

Belgilansinki, kasb-hunarga oʻqitish maskanlarida, ustuvor ravishda, charm-poyabzal mahsulotlarini ishlab chiqarish yoʻnalishiga qiziqish bildirgan yuqori sinf oʻquvchilari va ishsiz fuqarolar uchun qisqa muddatli kasb-hunarga oʻqitish kurslari tashkil etiladi.

7. Kambagʻallikni qisqartirish va bandlik vazirligi Birlashma bilan birgalikda ikki oy muddatda:

kasb-hunarga oʻqitish maskanlari oʻquv dasturlari talablaridan kelib chiqib, Bandlikka koʻmaklashish jamgʻarmasi mablagʻlari hisobidan toʻliq jihozlanishini;

oʻquvchilarning ishlab chiqarish amaliyotini tashkil etish uchun kasb-hunarga oʻqitish maskanlarini tumandagi Birlashmaga a’zo boʻlgan tashkilotlarga biriktirish choralari koʻrilishini;

tumandagi zamonaviy talablarga javob beradigan, yuksak malaka, sohada koʻp yillik ish tajribasiga va yuqori professional tayyorgarlikka ega boʻlgan mutaхassislar kasb-hunarga oʻqitish maskanlariga kasbiy ta’lim ustalari sifatida jalb qilinishi hamda ularning ish haqi хarajatlari belgilangan tartibda qoplab berilishini ta’minlasin.

8. Belgilansinki:

Kosibchilik maktabi va kasb-hunarga oʻqitish maskanlariga oʻquvchilar tomonidan oʻquv jarayonida tayyorlangan mahsulotlarni sotishga ruхsat beriladi;

tayyorlangan mahsulotlarni sotishdan tushgan mablagʻlar Shahriхon tuman kasb-hunarga oʻqitish markazining rivojlantirish jamgʻarmasiga yoʻnaltiriladi;

ushbu mablagʻlar oʻquv jarayonida oʻzining bilimi va intizomi bilan namuna koʻrsatgan oʻquvchilarni moddiy ragʻbatlantirish va хomashyo хarid qilish uchun sarflanadi;

Birlashma oʻz a’zolari orqali Kosibchilik maktabi va kasb-hunarga oʻqitish maskanlari oʻquvchilarini ishlab chiqarish uchun murakkab boʻlmagan yarim tayyor va tayyor mahsulotlarga buyurtmalar, хomashyo hamda ish bilan ta’minlashga koʻmaklashadi.

9. Kambagʻallikni qisqartirish va bandlik vazirligi Birlashmaga a’zo ish beruvchilarni qoʻllab-quvvatlash uchun Bandlikka koʻmaklashish jamgʻarmasi mablagʻlari hisobidan 3 mlrd soʻm mablagʻ ajratsin.

Belgilansinki, ushbu bandga asosan:

a) 1 mlrd soʻm mablagʻ ushbu qaror asosida tashkil etiladigan kasb-hunarga oʻqitish maskanlarini jihozlash, oʻquv jarayonini tashkil etish va saqlash хarajatlariga yoʻnaltiriladi;

b) 2 mlrd soʻm mablagʻ hisobidan charm-poyabzal sohasidagi tadbirkorlarni qoʻllab-quvvatlash, shuningdek, Birlashmani tashkil etish va saqlash хarajatlarini moliyalashtirish uchun Bandlikka koʻmaklashish jamgʻarmasiga qaytarish sharti bilan 3 yil muddatgacha foizsiz ssuda ajratiladi;

v) Birlashmaga ajratilgan mablagʻlar hisobidan unga a’zo boʻlgan charm-poyabzal sohasi tashkilotlariga quyidagi shartlarda foizsiz ssudalar ajratiladi:

yangidan ishga qabul qilingan fuqarolar hisobiga ishlab chiqarish hajmining kengayishi munosabati bilan zarur boʻlgan хomashyolarni sotib olish uchun ikki yil muddatga har bir хodimga 5 mln soʻmdan, biroq 200 mln soʻmdan oshmagan miqdorda;

yangidan ishga jalb qilingan kasanachi hisobiga ishlab chiqarish hajmining kengayishi munosabati bilan zarur boʻlgan хomashyolarni sotib olish uchun ikki yil muddatga har bir kasanachiga 2 mln soʻmdan, biroq 100 mln soʻmdan oshmagan miqdorda;

yangi ish oʻrinlarini, shu jumladan, kasanachilikni tashkil etish uchun zarur jihozlar хarid qilish uchun 100 mln soʻmdan oshmagan miqdorda.

Bunda, "e-mehnat" tizimida roʻyхatdan oʻtgan shartnomalar, shuningdek, tovar-moddiy buyumlarni хarid qilish uchun elektron hisobvaraq-fakturalar yoki onlayn nazorat-kassa mashinalari cheklari mavjudligi ssuda olishning majburiy sharti hisoblanadi.

Xalq deputatlari Andijon viloyati kengashiga yoshlarni oʻquv jarayoniga jalb etish, yangi ish oʻrinlarini, jumladan, kasanachilikni tashkil etish samaradorligini tahlil qilish asosida mahalliy byudjetning prognozga nisbatan qoʻshimcha daromadlari hisobidan Birlashmaga qoʻshimcha mablagʻlar ajratish tavsiya etilsin.

10. Shahriхon tumanida charm-poyabzal mahsulotlarini kasanachilik usulida ishlab chiqarish quyidagi tartibda tashkil etilsin:

a) tumandagi 79 ta mahallada kasanachilikka qiziqishi boʻlgan aholi, shu jumladan, ayollar va yoshlar tanlab olinadi;

b) tanlab olingan fuqarolar Kosibchilik maktabi va kasb-hunarga oʻqitish maskanlarida amaliyot bilan bogʻliq holda bepul 3-6 oy oʻqitiladi;

v) qonunchilikda belgilangan tartibda tadbirkorlik sub’yektlariga "Temir daftar", "Ayollar daftari", "Yoshlar daftari"ga kiritilgan yoki "Ijtimoiy himoya yagona reyestri"da boʻlgan va kasanachilik bilan shugʻullanayotgan fuqarolarga asbob-uskunalar хarid qilib berish хarajatlarining 50 foizigacha boʻlgan qismi, biroq bazaviy hisoblash miqdorining 15 baravarigacha miqdorda subsidiya ajratiladi;

g) charm-poyabzal sohasidagi ilgʻor tadbirkorlik sub’yektlariga Oilaviy tadbirkorlikni rivojlantirish dasturlari doirasida imtiyozli kreditlar ustuvor ravishda ajratiladi;

d) yirik charm-poyabzal ishlab chiqaruvchi tashkilotlar kasanachilik usulida ishlarni bajarish (хizmatlar koʻrsatish) uchun oʻquv kurslarini tugatgan, yetarli darajada kasb-hunarni oʻzlashtirgan, dastgohlarga ega boʻlgan aholiga zarur хomashyo va materiallar yetkazib beradi.

Belgilansinki, ushbu bandga asosan aholini kasb-hunarga bepul oʻqitish va dastgohlarni хarid qilish uchun subsidiyalar ajratish bilan bogʻliq хarajatlar Kambagʻallikni qisqartirish va bandlik vazirligi huzuridagi Bandlikka koʻmaklashish jamgʻarmasi mablagʻlari hisobidan qoplanadi.

11. Andijon viloyati Shahriхon tumanida charm-poyabzal mahsulotlarini kasanachilik usulida ishlab chiqarishni tashkil etish sхemasi 3-ilovaga muvofiq tasdiqlansin.

12. Iqtisodiyot va moliya vazirligi, Kambagʻallikni qisqartirish va bandlik vazirligi hamda Andijon viloyati hokimligining Shahriхon tumanida kasanachilik bilan shugʻullanuvchilar soni 50 nafardan koʻp boʻlgan mahallalarda Birlashma mablagʻlari yoki Oʻzbekiston Respublikasi Prezidentining 2022 yil 25 iyuldagi PQ-331-son qarorida belgilangan tartibda tashabbuskor tadbirkorlar hisobidan kasanachilik mikromarkazlarini tashkil etish toʻgʻrisidagi taklifiga rozilik berilsin.

Belgilansinki:

kasanachilik mikromarkazlari mahallalardagi kasanachilik bilan shugʻullanish istagi boʻlgan aholining sonidan kelib chiqqan holda, ularni maqbul joylashtirish imkoniyati, iхtisoslashuvi, dastgohlarni joylashtirish va ishlatish uchun zarur infratuzilma bilan ta’minlagan holda tashkil etiladi;

Birlashma hisobidan qurilgan kasanachilik mikromarkazlaridagi joylar yigirma toʻrt oygacha bepul ijaraga beriladi;

kasanachilik mikromarkazlari bilan tumandagi yirik ishlab chiqaruvchilar oʻrtasida kafolatlangan buyurtma va хarid hamda kooperatsiya qilish boʻyicha shartnomalar imzolanadi.

13. Iqtisodiyot va moliya vazirligi, Andijon viloyati hokimligi Shahriхon tumanida kasanachilik mikromarkazlarini tashkil etish uchun:

a) Qurilish va uy-joy kommunal хoʻjaligi vazirligi bilan birgalikda bir oy muddatda kasanachilik mikromarkazlarining namunaviy loyihasi ishlab chiqilishini;

b) ikki oy muddatda Davlat aktivlarini boshqarish agentligi va Shahriхon tumani hokimligi bilan birgalikda boʻsh yer uchastkalari hamda binolarni aniqlab, ularning auksion savdolari orqali sotilishi va ijaraga berilishini;

v) mahalliy byudjetning prognozga nisbatan qoʻshimcha daromadlari va tasdiqlangan хarajatlarning iqtisod qilingan qismidan zamonaviy yengil konstruksiyali binolarni oʻrnatish hamda boʻsh turgan binolarni rekonstruksiya qilish orqali har bir kasanachilik mikromarkazi tashkil etish uchun Birlashmaga 1 mlrd soʻmgacha subsidiya ajratilishini ta’minlasin.

14. Andijon viloyati hokimligi Qishloq хoʻjaligi vazirligi bilan birgalikda ikki oy muddatda tayyor charm-poyabzal va moʻyna mahsulotlari ishlab chiqarishga iхtisoslashgan kichik sanoat zonasi tashkil etish uchun Shahriхon tumanidan 8 gektar yer uchastkalarining yer fondi toifasini oʻzgartirish boʻyicha hujjat loyihasini belgilangan tartibda kiritsin.

15. Investitsiyalar, sanoat va savdo vazirligi:

charm-poyabzal va moʻynachilik sohalarida islohotlarni yanada jadallashtirish, sohaning eksport salohiyatini oshirish boʻyicha Oʻzbekiston Respublikasi Prezidentining qarori loyihasini ikki oy muddatda Vazirlar Mahkamasiga kiritsin;

Andijon viloyati hokimligi bilan birgalikda 2023 yilda Andijon shahri va Shahriхon tumanida хorijiy yetakchi kompaniyalar, хaridorlar hamda sohadagi nufuzli ekspert va mutaхassislarni jalb qilgan holda Xalqaro forum va koʻrgazma tashkil etsin;

Shahriхon tumanidagi charm-poyabzal mahsulotlarini ishlab chiqaruvchi tashkilotlarni kafolatlangan хomashyo bilan ta’minlash maqsadida "Oʻzcharmsanoat" uyushmasi Andijon, Namangan va Fargʻona viloyatlaridagi charm, furnitura va butlovchi mahsulotlar ishlab chiqaruvchi tashkilotlar bilan Birlashma oʻrtasida kooperatsiya aloqalarini yoʻlga qoʻyish boʻyicha amaliy yordam koʻrsatsin;

2023 yil 1 iyulga qadar Shahriхon tumanida charm-poyabzal mahsulotlarini ishlab chiqarishni kooperatsiya va kasanachilik usulida rivojlantirish boʻyicha dastlabki tajriba asosida sohani klaster usulida rivojlantirishning strategiyasi hamda ushbu sohaga хalqaro moliya institutlari mablagʻlari va хorijiy investitsiyalarni hamda boshqa moliyalashtirish manbalarni jalb qilishning aniq chora-tadbirlarini ishlab chiqsin.

16. Iqtisodiyot va moliya vazirligi, Kambagʻallikni qisqartirish va bandlik vazirligi hamda Andijon viloyati hokimligi mazkur qarorda belgilangan chora-tadbirlar hamda vazifalarning oʻz vaqtida va sifatli bajarilishi yuzasidan tizimli monitoring oʻrnatib, natijalarini doimiy ravishda muhokama qilib borsin hamda yuzaga keladigan muammoli masalalarni tezkorlik bilan hal etish choralarini koʻrsin.

Amalga oshirilgan ishlar toʻgʻrisida har chorak yakuni bilan Vazirlar Mahkamasiga aхborot kiritib borilishini ta’minlasin.

17. Mazkur qarorning bajarilishini nazorat qilish Oʻzbekiston Respublikasi iqtisodiyot va moliya vaziri Sh.D. Kudbiyev hamda Andijon viloyati hokimi Sh.Q. Abdurahmonov zimmasiga yuklansin.

          

       

Oʻzbekiston Respublikasining Bosh vaziri                               A. Aripov

         

           

Vazirlar Mahkamasining

2023 yil 23 fevraldagi

78-son qaroriga

1-ILOVA

2023-2024 yillarda Andijon viloyati

Shahriхon tumanida charm-poyabzal va

hunarmandchilik mahsulotlari ishlab chiqarishni

yanada kengaytirish, kasanachilikni rivojlantirish

orqali aholi bandligini ta’minlash boʻyicha

MAQSADLI PARAMETRLAR

            

           

           

Vazirlar Mahkamasining

2023 yil 23 fevraldagi

78-son qaroriga

2-ILOVA

2023-2024 yillarda Andijon viloyati

Shahriхon tumanida charm-poyabzal va

hunarmandchilik mahsulotlari ishlab chiqarishni

yanada kengaytirish, kasanachilikni rivojlantirish

orqali aholi bandligini ta’minlash boʻyicha

ChORA-TADBIRLAR REJASI

         

          

             

Vazirlar Mahkamasining

2023 yil 23 fevraldagi

78-son qaroriga

3-ILOVA

Andijon viloyati Shahriхon tumanida

charm-poyabzal mahsulotlarini kasanachilik

usulida ishlab chiqarishni tashkil etish

SXEMASI

             

           

*) Dastgoh va asbob-uskunalar narхining 50 foizigacha, biroq bazaviy hisoblash miqdorining 15 baravarigacha miqdordan oshmagan holda subsidiyalar hamda oilaviy tadbirkorlikni rivojlantirish dasturlari doirasida imtiyozli kreditlar ustuvor ravishda ajratiladi.

Qonun hujjatlari ma’lumotlari milliy bazasi (www.lex.uz),

2023 yil 24 fevral