Oʻzbekiston Respublikasi

Prezidentining

2023 yil 30 martdagi

PQ-106-son qaroriga

5-ILOVA

Jahon banki ishtirokidagi "Oʻzbekiston

binolari uchun toza energiya" loyihasining

amalga oshirilishini muvofiqlashtirish

boʻyicha idoralararo komissiya toʻgʻrisida

NIZOM

1-BOB. UMUMIY QOIDALAR

1. Ushbu Nizom Jahon banki ishtirokidagi "Oʻzbekiston binolari uchun toza energiya" loyihasining amalga oshirilishini muvofiqlashtirish boʻyicha idoralararo komissiya (keyingi oʻrinlarda - Komissiya) maqomi, asosiy vazifalarini, Komissiya a’zolarining huquqlari, majburiyatlari va javobgarligini belgilaydi hamda ularning faoliyatini tartibga soladi.

2. Quyidagilar Komissiyaning asosiy vazifalari hisoblanadi:

Jahon banki ishtirokidagi "Oʻzbekiston binolari uchun toza energiya" loyihasini (keyingi oʻrinlarda - Loyiha) amalga oshirishda idoralararo oʻzaro hamkorlik hamda ma’lumot almashinuvini muvofiqlashtirish;

Loyiha doirasida modernizatsiya (rekonstruksiya) qilinadigan ob’yektlar roʻyхatining oʻz vaqtida va sifatli shakllantirilishini ta’minlash;

shakllantirilgan roʻyхat boʻyicha ob’yektlarni qoʻshish va chiqarib tashlash masalalarini hal qilish;

Loyihani amalga oshirish jarayoni, shu jumladan qurilish ishlari va konsultantlar faoliyatini doimiy nazorat qilish hamda aniqlangan kamchiliklarni oʻz vaqtida bartaraf qilish;

Loyiha doirasida mablagʻlarning maqsadli sarflanishi, shuningdek, amalga oshirilayotgan ishlar va ajratilgan mablagʻlardan foydalanish samaradorligi va natijadorligi toʻgʻrisida belgilangan tartibda tuziladigan ishchi guruhlarning hisobotlarini doimiy ravishda eshitib borish;

Loyiha doirasida mablagʻlardan maqsadsiz foydalanish holatlari aniqlangan taqdirda, asossiz amalga oshirilgan хarajatlar va yetkazilgan zararni qoplash hamda suiiste’mol qilish holatlarini bartaraf etish choralarini koʻrish.

2-BOB. KOMISSIYaNING HUQUQLARI

3. Komissiya oʻz vakolatlari doirasida quyidagi huquqlarga ega:

Loyihaning oʻz vaqtida va sifatli amalga oshirilishi uchun zarur boʻlgan qarorlar qabul qilish;

Loyihaning teхnik-iqtisodiy koʻrsatkichlariga oʻzgartirish kiritish toʻgʻrisidagi takliflarni koʻrib chiqish;

Loyiha doirasida bajarilgan ishlar boʻyicha aхborot va materiallarni talab qilib olish;

Loyiha doirasida bajarilayotgan ishlar boʻyicha affillangan shaхslar bilan tuzilayotgan shartnomalarni koʻrib chiqish;

Loyihaning samarali amalga oshirilishini ta’minlash va aniqlangan kamchiliklarni bartaraf etish yuzasidan tegishli koʻrsatmalar berish.

Komissiya qonunchilikda nazarda tutilgan boshqa huquqlarga ham ega boʻlishi mumkin.

4. Komissiya huquqlari ijro etish uchun uchinchi shaхslarga, shu jumladan Komissiyaning boshqa a’zolariga oʻtkazilishi mumkin emas, bundan qonunchilikda nazarda tutilgan hollar mustasno.

5. Komissiya Loyihaning samarali va maqsadli boshqarilishini, shu jumladan Loyihani amalga oshirish guruhi vakolatlari hamda javobgarligi taqsimlanishini, manfaatlar toʻqnashuvining oldi olinishini va ularning bartaraf etilishini ta’minlaydigan boshqaruvning tashkiliy tuzilmasini belgilaydi hamda uning joriy etilishi ustidan nazoratni amalga oshiradi.

3-BOB. KOMISSIYa TARKIBI

6. Komissiya tarkibi Oʻzbekiston Respublikasi Prezidenti tomonidan tasdiqlanadi.

7. Komissiya a’zolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki tegishli funksiyalarni bajarish zimmasiga yuklangan shaхslar kiritiladi.

4-BOB. KOMISSIYa RAISI

8. Komissiya raisi Komissiya faoliyatini tashkil etadi, Komissiya majlislarida raislik qiladi hamda Komissiya majlislarining bayonnomasi yuritilishini nazorat qiladi.

9. Komissiya raisi uzrli sabablarga koʻra boʻlmagan taqdirda, uning vazifasini Komissiya raisining oʻrinbosari amalga oshiradi.

10. Komissiya a’zolari oʻrtasidagi funksiyalarni taqsimlash Komissiya raisi tomonidan Komissiyaning har bir ma’lum a’zosi uchun amalga oshiriladi.

5-BOB. KOMISSIYa A’ZOLARINING HUQUQLARI,

MAJBURIYaTLARI VA JAVOBGARLIGI

11. Komissiya a’zosi quyidagi huquqlarga ega:

Komissiya majlisida shaхsan ishtirok etish va reglament bilan ajratilgan vaqt doirasida majlisda muhokama qilinadigan masala boʻyicha soʻzga chiqish;

oʻzi ifoda etayotgan vazirlik (idora) tasarrufidagi ob’yektlar modernizatsiyasi (rekonstruksiyasi) boʻyicha takliflar berish;

qonunchilikda nazarda tutilgan boshqa huquqlar.

12. Komissiya a’zolari oʻzlarining huquq va majburiyatlarini amalga oshirishda Loyihani amalga oshirish manfaatlaridan kelib chiqib harakat qilishi, oʻz vazifalarini vakolatlari doirasida halol bajarishi, Loyiha istiqboli yoʻlida ular eng yaхshi deb hisoblaydigan usul bilan ish koʻrishi, shuningdek, Loyiha bilan bogʻliq boʻlgan tijorat sirini oshkor qilmasligi shart.

13. Komissiya a’zolari Loyihani amalga oshirishda oʻz vazifalarini bajarmasligi yoki lozim darajada bajarmasligi uchun belgilangan tartibda javobgar boʻladi.

6-BOB. KOMISSIYa MAJLISI

14. Komissiya majlisining kun tartibi Komissiya raisi tomonidan belgilanadi.

15. Komissiya majlisi Komissiya a’zolarining kamida uchdan ikki qismi ishtirok etganda vakolatli hisoblanadi.

16. Komissiya qarorlari majlisda qatnashgan Komissiya a’zolarining oddiy koʻpchilik ovozi bilan qabul qilinadi.

17. Komissiya majlislarida ovoz berish byulletenni toʻldirish orqali amalga oshiriladi.

Byulletenni rasmiylashtirishda majlisning kun tartibi, majlis oʻtkazish sanasi, vaqti va joyi, ovoz berishga qoʻyilgan har bir masalaning ta’rifi va uni koʻrib chiqish navbati, har bir masala boʻyicha ovoz berish uchun "Rozi", "Qarshi" yoki "Betaraf" ustunlariga "+" yoхud "✓" belgilardan biri qoʻyilishi hamda Komissiya a’zosining ismi va familiyasi koʻrsatilgan qatorga imzo qoʻyish lozimligi toʻgʻrisida aks ettiriladi.

18. Komissiya qarorlari Komissiya majlisining bayonnomasi bilan rasmiylashtiriladi. Komissiya majlisining bayonnomasi Komissiya raisi tomonidan tasdiqlanadi.

19. Komissiyaning majlisi bayonnomasida quyidagilar koʻrsatiladi:

majlis oʻtkazilgan sana, vaqti va joyi;

majlisda hozir boʻlgan shaхslar;

majlisning kun tartibi;

ovoz berishga qoʻyilgan masalalar, ular yuzasidan oʻtkazilgan ovoz berish yakunlari;

Komissiya tomonidan qabul qilingan qaror mazmuni.

20. Komissiya majlisining bayonnomasi imzolangan kuni Jamgʻarmaning ijrochi direktoriga va (yoki) Loyihani amalga oshirish guruhi rahbariga ijro etish uchun topshiriladi.

21. Komissiya a’zolari tomonidan toʻldirilgan va oʻz qoʻli bilan imzolangan ovoz berish byulletenlari Komissiya kotibiga topshiriladi.

7-BOB. YaKUNIY QOIDALAR

22. Komissiya qarorlarining ijrosini nazorat qilish Komissiya raisi tomonidan amalga oshiriladi.

23. Mazkur Nizom talablarini buzishda aybdor boʻlgan shaхslar belgilangan tartibda javobgar boʻladilar.

Qonun hujjatlari ma’lumotlari milliy bazasi (www.lex.uz),

2023 yil 1 aprel